དེ་ཉིད་གཤིས་ལ་ཡོད་པ་དང་མེད་པའི་དོན་དུ་གསུངས་ཚུལ།

གཞན་ཡང་ཡང་དག་པར་མེད་པ་དང་ཡོད་པའི་དོན་ནི་[རིམ་པ་ལྟར་]ཆོས་དང་ཆོས་ཉིད་ལ་རྒྱལ་བ་བྱམས་པས་གསུངས་ཏེ། མཐར་ཐུག་གི་དབུ་མ་ཆོས་དང་ཆོས་ཉིད་རྣམ་པར་འབྱེད་པ་ལས། [ཆོས་དང་ཆོས་ཉིད་]གཉིས་པོ་དག་ནི་[ངོ་བོ་]གཅིག་ཉིད་དང༌། །[ངོ་བོ་]སོ་སོ་བ་ཡང་མ་ཡིན་ཏེ། ། [ཆོས་ནི་འགལ་འདུས་སྐྱོན་ཡོད་ཡིན་པས་]ཡོད་པ་དང་ནི་མེད་པ་དག །ཁྱད་པར་ཡོད་[དེ་ཡོད་ན་ཡང་མེད་པར་འགལ་ཞིང་མེད་ན་ཡོད་པར་འགལ་བའི་ཕྱིར་]དང་[ཆོས་ཉིད་ནི་འགལ་འདུས་སྐྱོན་མེད་ཡིན་པས་ཡོད་པ་དང་མེད་པ་ཁྱད་པར་]མེད་[པའི་]ཕྱིར་རོ། །[དེས་ན་དེ་གཉིས་ངོ་བོ་གཅིག་པ་བཀག་པའི་ཐ་དད་ཡིན།]ཞེས་དང༌། མདོ་སྡེའི་རྒྱན་དུ་ཡང༌། བྱིས་པ་[རྣམས་ལ་]ཡང་དག་[པའི་མཐའ་]ཉིད་[རྣམ་ཤེས་ཀྱི་]བསྒྲིབས་ནས[མི་མཐོང་ཞིང་]། །ཡང་དག་མིན་པ་[ལས་གཟུགས་]ཀུན་ཏུ་སྣང༌། །བྱང་ཆུབ་སེམས་དཔའ་[སྒྲིབ་གཡོགས་]དེ་བསལ་ནས། །ཡང་དག་[པའི་མཐའ་བདེ་གཤེགས་སྙིང་པོ་]ཉིད་ནི་ཀུན་ཏུ་སྣང༌། །ཞེས་དང༌། [གནས་ལུགས་ཀྱི་]དོན་[ལ་]མེད་པ[འི་ཆོས་ཀུན་རྫོབ་]དང་[གནས་ལུགས་ཀྱི་]དོན་[ལ་]ཡོད[པ་དོན་དམ་ཆོས་ཉིད་]དག །[གོ་རིམ་བཞིན་དུ་ཡེ་ཤེས་ལ་]མི་སྣང་[བ་དང་]སྣང་བ་ཉིད་[དུ་]ཤེས་[པར་]བྱ། །ཞེས་དང༌། འགྲོ་བ་དག་ན་[ཆོས་ཉིད་དོམ་དམ་]དེ་ལས་གཞན་ཡང་ཅུང་ཟད་ཡོད་མིན་ལ། །འགྲོ་བ་མ་ལུས་པ་ཡང་[ཆོས་ཉིད་དོམ་དམ་]དེ་ལ་ཀུན་ཏུ་རྨོངས་པའི་བློས། །[གཤིས་ལ་]ཡོད་པ་[ཆོས་ཉིད་དོམ་དམ་]ཀུན་ནས་སྤངས་ཏེ་[གཤིས་ལ་]མེད་[པ་ཆོས་ཀུན་རྫོབ་]ལ་མངོན་ཞེན་གང་ཡིན་པ། །འཇིག་རྟེན་རྨོངས་པའི་རྣམ་པ་ཚབས་ཆེན་འདི་ཀོ་ཇི་ལྟ་བུ། ། ཞེས་པ་ལ་སོགས་པས་ཀུན་བརྟགས་གཞན་དབང་གི་ཆོས་རྣམས་ནི་ཡང་དག་པར་མེད་པ་དང༌། ཆོས་ཉིད་ཡོངས་གྲུབ་ནི་ཡང་དག་ཏུ་ཡོད་པར་བསྟན་ཏེ་འདི་དག་གིས་ཀྱང་རང་སྟོང་དང་གཞན་སྟོང་གི་དོན་[དང༌། སྟོང་ཙམ་དང༌། སྟོང་གཞིའི་དོན་དང༌། སྟོང་པའི་སྟོང་པ་ཉིད་དང༌། མི་སྟོང་པའི་སྟོང་པ་ཉིད་ཀྱི་དོན་དང༌། ཀུན་འགྲོ་མིན་པ་དང་ཡིན་པའི་སྟོང་ཉིད་ཀྱི་དོན་ལ་སོགས་པ་]བསྟན་པ་ཡིན་ནོ། །འདི་ལ་དགོངས་ནས། [དོན་དམ་པའི་མཚན་མང་པོ་བརྗོད་པའི་རྒྱུད་དུ།]ཡེ་ཤེས་ལྡན་པ་ཡོད་མེད་ཤེས། །ཞེས་གསུངས་ཏེ། འདིར་ཡང་[གཤིས་ཀྱི་]གནས་ལུགས་ལ་ཡོད་པ་ནི་[སྟོང་གཞི་དོན་དམ་]གཞན་སྟོང་དང༌། མེད་པ་ནི་[སྟོང་ཙམ་ཀུན་རྫོབ་]རང་སྟོང་ངོ༌། །མདོ་སྡེའི་རྒྱན་གྱི་དེ་ཁོ་ན་ཉིད་སྟོན་པའི་སྐབས་སུ་ཡང༌། དོན་དམ་པ་གཞན་སྟོང་དུ་གསུངས་ཏེ། འདི་ལྟར་དོན་དམ་པའི་མཚན་ཉིད་དུ་ཚིགས་སུ་བཅད་པ། ཡོད་མིན་མེད་མིན་དེ་བཞིན་མིན་གཞན་མིན། །སྐྱེ་དང་འཇིག་མེད་འབྲི་བར་མི་འགྱུར་ཏེ། །འཕེལ་བ་མེད་ཅིང་རྣམ་པར་དག་པའང་མེད། །རྣམ་པར་དག་འགྱུར་དེ་ནི་དོན་དམ་མཚན། །ཞེས་པའཽ། །འདིའི་དོན་ནི་ཡོད་མིན་ཞེས་པ་ཀུན་བརྟགས་དང་གཞན་དབང་ནི་ཡང་དག་པར་ཡོད་པ་མ་ཡིན་ནོ། །མེད་མིན་ཞེས་པ་ཆོས་ཉིད་ཡོངས་གྲུབ་ནི་ཡང་དག་པར་མེད་པ་མ་ཡིན་ནོ། །དེ་བཞིན་མིན་ཞེས་པ་དེ་དག་ངོ་བོ་གཅིག་པ་མ་ཡིན་ལ། གཞན་མིན་ཞེས་པ་དེ་དག་ངོ་བོ་ཐ་དད་པ་ཡང་མ་ཡིན་ཏེ། ཀུན་བརྟགས་དང་གཞན་དབང་ལ་ཡང་དག་པར་ངོ་བོ་མ་གྲུབ་པའི་ཕྱིར་རོ། །[དེས་ན་དེ་དག་ངོ་བོ་གཅིག་པ་བཀག་པའི་ཐ་དད་ཡིན་ཏེ་བདེན་པ་གཉིས་ཀྱི་ཐ་དད་ལུགས་ཇི་ལྟ་བ་བཞིན་ནོ།།]དེ་ལྟར་[ཀུན་བརྟགས་གཞན་དབང་]དེ་གཉིས་ཀྱིས་སྟོང་པའི་གཞི་ཆོས་ཉིད་ཡོངས་གྲུབ་ནི་འདུས་མ་བྱས་ཡིན་པའི་ཕྱིར་སྐྱེ་འཇིག་དང་འཕེལ་འགྲིབ་མེད་ལ། རང་བཞིན་གྱིས་དག་པའི་ཕྱིར་ངོ་བོ་རྣམ་པར་དག་པར་བྱ་དགོས་པ་ཡང་མེད་ཅིང༌། དེ་ཐོབ་པ་ལ་གློ་བུར་དྲི་མ་རྣམ་པར་དག་དགོས་པ་སྟེ། དེ་ལྟར་གཉིས་མེད་པའི་མཚན་ཉིད་ལྔ་ཚང་བ་དེ་ནི་དོན་དམ་པའི་མཚན་ཉིད་དོ། །ཞེས་པ་དགོངས་པ་སྟེ། དེ་ཉིད་ཀྱི་འགྲེལ་པ་ལྟར་བཤད་པའོ། །དེས་ན་འདི་ཡང་ཀུན་བརྟགས་དང་གཞན་དབང་གིས་སྟོང་པའི་[གཞི་]ཆོས་ཉིད་ཡོངས་གྲུབ་དོན་དམ་དུ་ཡོད་པར་གསུངས་པའི་ཕྱིར། དོན་དམ་གཞན་སྟོང་ཉིད་དུ་ལེགས་པར་གྲུབ་བོ། །