སྟོང་ཚུལ་དེ་ཉིད་གནས་ལུགས་ལ་ཡོད་མེད་དང་སྤངས་རྟོགས་ལ་སོགས་པའི་དོན་དུ་གསུངས་ཚུལ།

མྱང་འདས་ཆེན་པོར་ཡང༌། དེ་ལྟར་རྟག་པ་དང་བདེ་བ་དང་བདག་དང་ཡོངས་སུ་དག་པ་དང་ཆོས་རྣམ་པ་བཞི་པོ་འདི་དག་ནི་[རང་གི་ངོ་བོས་]སྟོང་པ་ཉིད་ཅེས་མི་བྱ་སྟེ། ཞེས་པ་ལ་སོགས་པས་རང་གིས་མི་སྟོང་པའི་སྟོང་ཉིད་ཟབ་མོ་ཡང་དང་ཡང་དུ་གསུངས་ཤིང༌། གང་རང་གི་ངོ་བོས་སྟོང་པ་དེ་གཤིས་ཀྱི་གནས་ལུགས་ལ་མེད་པ་དང༌། དེའི་ལྷག་མ་གང་ཡིན་པ་དེ་གཤིས་ཀྱི་གནས་ལུགས་ལ་ཡོད་པར་ཡང༌། མདོ་དེ་ཉིད་དུ་གསུངས་ཏེ། ཇི་སྐད་དུ། དེ་བཞིན་གཤེགས་པའི་སངས་རྒྱས་ཀྱི་རང་བཞིན་ནི་རྣམ་པ་གཉིས་ཏེ། [ཡོན་ཏན་རྣམས་]ཡོད་པ་དང་[སྐྱོན་རྣམས་]མེད་པའོ། །དེ་ལ་[རང་བཞིན་པའི་ཡོན་ཏན་]ཡོད་པ་ནི་འདི་ལྟ་སྟེ། [དོན་དམ་པའི་]མཚན་སུམ་ཅུ་རྩ་གཉིས་དང༌། [དོན་དམ་པའི་]དཔེ་བྱད་བཟང་པོ་བརྒྱད་ཅུ་དང༌། [དོན་དམ་པའི་]སྟོབས་བཅུ་དང༌། [དོན་དམ་པའི་]མི་འཇིགས་པ་བཞི་དང༌། [དོན་དམ་པའི་]དྲན་པ་ཉེ་བར་གཞག་པ་གསུམ་དང༌། [དོན་དམ་པའི་]བྱམས་པ་ཆེན་པོ་དང༌། [དོན་དམ་པའི་]སྙིང་རྗེ་ཆེན་པོ་དང༌། [དོན་དམ་པའི་]དཔའ་བར་འགྲོ་བའི་ཏིང་ངེ་འཛིན་ལ་སོགས་པ་[དོན་དམ་པའི་]ཏིང་ངེ་འཛིན་ཚད་མེད་པ་སྙེད་དང༌། [དོན་དམ་པའི་]རྡོ་རྗེ་ལྟ་བུའི་ཏིང་ངེ་འཛིན་ལ་སོགས་པ་ཚད་མེད་པ་སྙེད་དང༌། [དོན་དམ་པའི་]ཐབས་མཁས་པ་ལ་སོགས་པའི་ཏིང་ངེ་འཛིན་ཚད་མེད་པ་སྙེད་དང༌། [དོན་དམ་པའི་]ཡེ་ཤེས་ལྔ་ལ་སོགས་པའི་ཏིང་ངེ་འཛིན་ཚད་མེད་པ་སྙེད་ནི་[གདོད་ནས་རང་བཞིན་གྱིས་ལྷུན་གྲུབ་ཏུ་]ཡོད་པ་ཞེས་བྱའོ། །དེ་ལ་[བཅོས་མ་གློ་བུར་བ་རྣམས་]མེད་པ་ནི་འདི་ལྟ་སྟེ། དེ་བཞིན་གཤེགས་པའི་འདས་པའི་དགེ་བ་རྣམས་དང༌། མི་དགེ་བ་དང་ལུང་དུ་མི་སྟོན་པ་དང་ལས་དང་རྒྱུ་དང་འབྲས་བུ་དང་རྣམ་པར་སྨིན་པ་དང་ཉོན་མོངས་པ་དང་ཕུང་པོ་ལྔ་དང་རྟེན་ཅིང་འབྲེལ་ཏེ་འབྱུང་བ་བཅུ་གཉིས་ནི་[རང་བཞིན་དུ་]མེད་པ་ཞེས་བྱའོ། །རིགས་ཀྱི་བུ་ཇི་ལྟར་ཡོད་པ་དང་མེད་པ་[ཚང་བ་]དང་འདྲ་བར་[ཡིན་པ་དང་མ་ཡིན་པ་ཡང་ཚང་སྟེ། མ་བྱས་པ་དོན་དམ་པའི་]དགེ་བ་[ཡིན་པ་]དང་མི་དགེ་བ་[མ་ཡིན་པ་]དང་ཟག་པ་དང་བཅས་པ་[མ་ཡིན་པ་]དང༌། ཟག་པ་མེད་པ་[ཡིན་པ་]དང༌། འཇིག་རྟེན་[མ་ཡིན་པ་]དང༌། འཇིག་རྟེན་མ་ཡིན་[ཏེ་འཇིག་རྟེན་ལས་འདས་]པ་[ཡིན་པ་]དང༌། འཕགས་པ་[ཡིན་པ་]དང༌། འཕགས་པ་མ་ཡིན་པ་[མ་ཡིན་པ་]དང༌། འདུས་བྱས་[མ་ཡིན་པ་]དང༌། འདུས་མ་བྱས་[ཡིན་པ་]དང༌། ཡང་དག་པ་[ཡིན་པ་]དང༌། ཡང་དག་པ་མ་ཡིན་པ་[མ་ཡིན་པ་]དང༌། ཞི་བ་[ཡིན་པ་]དང༌། མ་ཞི་བ་[མ་ཡིན་པ་]དང༌། རྩོད་པ་[མ་ཡིན་པ་]དང༌། རྩོད་པ་མ་ཡིན་པ་[ཡིན་པ་]དང༌། [ཆོས་ཉིད་]ཁམས་[ཏེ་དབྱིངས་ཡིན་པ་]དང༌། ཁམས་[ཏེ་དབྱིངས་]མ་ཡིན་པ་[མ་ཡིན་པ་]དང༌། ཉོན་མོངས་པ་[མ་ཡིན་པ་]དང༌། ཉོན་མོངས་པ་མ་ཡིན་པ་[ཡིན་པ་]དང༌། [ཉེ་བར་]ལེན་པ་[མ་ཡིན་པ་]དང༌། ལེན་པ་མ་[ཡིན་པ་]ཡིན་པ་དང༌། [དགེ་བ་ཡིན་པས་]ལུང་སྟོན་པ་[ཡིན་པ་]དང༌། ལུང་སྟོན་པ་མ་ཡིན་པ་[མ་ཡིན་པ་]དང༌། [གཤིས་ལ་]ཡོད་པ་[ཡིན་པ་]དང༌། ཡོད་པ་མ་ཡིན་པ་[མ་ཡིན་པ་]དང༌། དུས་གསུམ་[མ་ཡིན་པ་]དང་དུས་གསུམ་མ་ཡིན་པ་[ཡིན་པ་]དང༌། དུས་[མ་ཡིན་པ་]དང་དུས་མ་ཡིན་པ་[ཡིན་པ་]དང༌། རྟག་པ་[ཡིན་པ་]དང་མི་རྟག་པ་[མ་ཡིན་པ་]དང༌། [དོན་དམ་གྱི་]བདག་[ཡིན་པ་]དང་[དོན་དམ་གྱི་]བདག་མེད་པ་[མ་ཡིན་པ་]དང༌། [དོན་དམ་གྱི་]བདེ་བ་[ཡིན་པ་]དང་བདེ་བ་མེད་པ་[མ་ཡིན་པ་]དང༌། [གདོད་ནས་]ཡོངས་སུ་དག་པ་[ཡིན་པ་]དང་[གདོད་ནས་]ཡོངས་སུ་མ་དག་པ་[མ་ཡིན་པ་]དང༌། [དོན་དམ་གྱི་]གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་[ཡིན་པ་]དང༌། [ཀུན་རྫོབ་ཀྱི་]གཟུགས་དང་ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་མ་ཡིན་པ་དང༌། [དོན་དམ་གྱི་]ནང་གི་སྐྱེ་མཆེད་[དྲུག་ཡིན་པ་]དང༌། [ཀུན་རྫོབ་ཀྱི་]ནང་གི་སྐྱེ་མཆེད་[དྲུག་]མ་ཡིན་པ་དང༌། [དོན་དམ་གྱི་]ཕྱིའི་སྐྱེ་མཆེད་[དྲུག་ཡིན་པ་]དང༌། [ཀུན་རྫོབ་ཀྱི་]ཕྱིའི་སྐྱེ་མཆེད་[དྲུག་]མ་ཡིན་པ་དང༌། [དོན་དམ་གྱི་]རྟེན་ཅིང་འབྲེལ་ཏེ་འབྱུང་བ་བཅུ་གཉིས་[ཡིན་པ་]དང༌། [ཀུན་རྫོབ་ཀྱི་]རྟེན་ཅིང་འབྲེལ་ཏེ་འབྱུང་བ་བཅུ་གཉིས་མ་ཡིན་པ་ནི་དེ་བཞིན་གཤེགས་པའི་སངས་རྒྱས་ཀྱི་རང་བཞིན་ཡོད་པ་དང་མེད་པ་[དང་ཡིན་པ་དང་མ་ཡིན་པ་]ཞེས་བྱ་སྟེ། ལོག་སྲེད་ཅན་གྱི་སངས་རྒྱས་ཀྱི་རང་བཞིན་ཡོད་པ་དང་མེད་པ[དང་ཡིན་པ་དང་མ་ཡིན་པ]འི་བར་དུ་དེ་དང་འདྲའོ། །ཞེས་སོགས་རྒྱ་ཆེར་གསུངས་ཏེ་འགལ་འདུས་སྐྱོན་མེད་ཀྱི་མན་ངག་ཟབ་མོ་ལ་བརྟེན་ནས་ཡོད་མེད་དང༌། སྤངས་རྟོགས་དང༌། རྣམ་གཅོད་ཡོངས་གཅོད་དང༌། མེད་དགག་མ་ཡིན་དགག་ལ་སོགས་པའི་དོན་ལེགས་པར་རྣམ་པར་ཕྱེ་སྟེ་བདེན་པ་གཉིས་ཀྱི་གནས་ལུགས་སམ་བདེ་གཤེགས་སྙིང་པོ་དང་གློ་བུར་དྲི་མའི་གནས་ལུགས་[སམ་རང་བཞིན་གཉུག་མ་དང༌། བཅོས་མ་གློ་བུར་བའི་ཁྱད་པར་]ཇི་ལྟར་ཡིན་པ་བཞིན་ལེགས་པར་ཁོང་དུ་ཆུད་པར་བྱ་དགོས་སོ། །གཞན་དུ་ན་ཟབ་མོའི་དེ་ཉིད་མཐོང་བར་མི་འགྱུར་ཏེ། ཇི་སྐད་དུ། གང་དག་བདེན་པ་དེ་གཉིས་ཀྱི། །རྣམ་དབྱེ་རྣམ་པར་མི་ཤེས་པ། །དེ་ཡིས་སངས་རྒྱས་བསྟན་པ་ཡི། །ཟབ་མོའི་དེ་ཉིད་རྣམ་མི་མཐོང༌། །ཞེས་གསུངས་པའི་ཕྱིར་རོ། །