དེའི་དགོངས་འགྲེལ་ཟབ་མོ་རྣམས་ཀྱང་དེ་དང་མཐུན་པར་བསྟན་པ།

དེ་རྣམས་ཀྱི་དགོངས་པ་ཡང༌། ངོ་བོ་ཉིད་གསུམ་རྟག་མེད་དང༌། །ཡོད་ཀྱང་ཁོ་ན་མ་ཡིན་དང༌། །ཡོད་དང་མེད་དེ་ཁོ་ན་སྟེ། །ངོ་བོ་ཉིད་ནི་གསུམ་དུ་འདོད། །ཅེས་[སྔར་བཤད་པ་]དང༌། ཀུན་ཏུ་རྟོག་དོན་[ཀུན་བརྟགས་དང་]རྣམ་རྟོག་དོན[གཞན་དབང་དང་]། །ཆོས་ཉིད་དོན་གྱིས་[ཡོངས་གྲུབ་སྟེ་དེ་ལྟར་ངོ་བོ་ཉིད་གསུམ་]དེ་དང་དེར། །ཞེས་དང༌། ཡང་དག་མ་ཡིན་ཀུན་རྟོག་[གཞན་དབང་ནི་ཀུན་རྫོབ་ཀྱི་བདེན་པར་]ཡོད། །དེ་ལ་[བདག་]གཉིས་པོ་ཡོད་མ་ཡིན། །[བདག་དང་གཟུང་འཛིན་གཉིས་ཀྱིས་]སྟོང་པ་ཉིད་[ཀྱི་གཞི་དོན་དམ་]ནི་[ཀུན་རྫོབ་]དེ་ལ་ཡོད། །[དོན་དམ་]དེ་ལ་ཡང་ནི་[ཀུན་རྫོབ་]དེ་ཡོད་དོ། །[དོན་དམ་གྱིས་]སྟོང་པ་མ་ཡིན་[ཀུན་རྫོབ་ཀྱིས་]མི་སྟོང་[པ་]མིན། །དེ་ལྟ་བས་ན་[བདེན་གཉིས་སུ་གཏོགས་པ་]ཐམས་ཅད་བཤད། །[ཡང་དག་མིན་པའི་ཀུན་རྟོག་ཏུ་]ཡོད་པས་[གཞན་དབང་དང་ལོག་པའི་ཀུན་རྫོབ་ཏུ་ཡོད་ཀྱང་ཡང་དག་ཀུན་རྫོབ་ཏུ་]མེད་པས་[ན་ཀུན་བརྟགས་དང་དོན་དམ་དུ་]ཡོད་པས་ན། །[ཆོས་ཉིད་ཡོངས་གྲུབ་སྟེ་]དེ་ནི་[མཐའ་གཉིས་སྤངས་པ་]དབུ་མའི་ལམ་ཡིན་ནོ། །ཞེས་དབུ་མ་པ་ཆེན་པོ་རྒྱལ་བ་བྱམས་པས། ལེགས་པར་ཕྱེ་སྟེ་གསུངས་པ་དང་དོན་གཅིག་གོ །དེ་ལྟ་བས་ན་ངོ་བོ་ཉིད་གསུམ་སྟོན་པའི་རྒྱུ་མཚན་གྱིས་སེམས་ཙམ་གྱི་རང་གཞུང་དུ་མི་འགྱུར་ཏེ། དབུ་མ་ཆེན་པོའི་གཞུང་ལུགས་ཡུམ་རྒྱས་པ་དང༌། བར་མ་དང༌། ཁྲི་བརྒྱད་སྟོང་པ་རྣམས་ཀྱི་འགྲེལ་པ་དང༌། འབུམ་པ་རྒྱ་ཆེར་བཤད་པ་ལ་སོགས་པ་[དབུ་མའི་གཞུང་]གཞན་དང་གཞན་མང་པོར་ཡང་ངོ་བོ་ཉིད་གསུམ་གྱི་རྣམ་གཞག་ཡང་དང་ཡང་དུ་གསུངས་ཤིང༌། ཀུན་བརྟགས་ཀྱིས་སྟོང་པའི་གཞི་གཞན་དབང༌། དེས་ཀྱང་སྟོང་པའི་གཞི་ཆོས་ཉིད་ཡོངས་གྲུབ། དེས་སྟོང་པའི་གཞི་མི་སྲིད་པ་དང༌། ཡང་སྔ་མ་གཉི་ག་ཀུན་བརྟགས་སུ་གསུངས་ནས། དེས་སྟོང་པའི་གཞི་དོན་དམ། དེས་སྟོང་པའི་གཞི་མི་སྲིད་པར་གསུངས་པའི་ཕྱིར་དང༌། བརྒྱད་སྟོང་དོན་བསྡུས་སུ་ཡང༌། ཤེས་རབ་ཕ་རོལ་ཕྱིན་པར་ནི། །བསྟན་པ་གསུམ་ལ་ཡང་དག་བརྟེན། །[ཀུན་ཏུ་]བརྟགས་པ་དང་ནི་གཞན་དབང་དང༌། །ཡོངས་སུ་གྲུབ་པ་ཁོ་ནའོ། །མེད་ཅེས་བྱ་ལ་སོགས་ཚིག་གིས། །[ཀུན་ཏུ་]བརྟགས་པ་ཐམས་ཅད་[ཀུན་རྫོབ་ཏུ་བདེན་པའང་]འགོག་པ་སྟེ། །སྒྱུ་མ་ལ་སོགས་དཔེ་རྣམས་ཀྱིས། །གཞན་གྱི་དབང་ནི་ཡང་དག་བསྟན།།[རང་བཞིན་དང༌། དྲི་བྲལ་དང༌། དམིགས་པ་དང༌། རྒྱུ་མཐུན་པའི་རྣམ་བྱང་སྟེ་]རྣམ་པར་བྱང་བ་བཞི་[ཞེས་སློབ་དཔོན་དཀོན་མཆོག་འབངས་ཀྱིས་བཀྲལ་བ་]ཡིས་ནི། །ཡོངས་སུ་གྲུབ་པ་རབ་ཏུ་བསྒྲགས། །ཤེས་རབ་ཕ་རོལ་ཕྱིན་པར་ནི། །སངས་རྒྱས་ཀྱིས་ནི་གཞན་བསྟན་མེད། །ཅེས་སོགས་གསུངས་པའི་ཕྱིར། ངོ་བོ་ཉིད་གསུམ་སེམས་ཙམ་པའི་ཆོས་སྐད་ཐུན་མོང་མ་ཡིན་པར་འདོད་པ་རྣམས་ནི་ཤིན་ཏུ་འཁྲུལ་ལོ། །གཞན་ཡང་དབུ་མ་སྣང་བར། དབུ་མ་པ་རྣམས་ཀྱང་ངོ་བོ་ཉིད་གསུམ་རྣམ་པར་གཞག་པ་ཁས་མི་ལེན་པ་ནི་མ་ཡིན་ཏེ། གཞན་དུ་ན་མཐོང་བ་ལ་སོགས་པ་དང་འགལ་བ་ཇི་ལྟར་སྤོངས་པར་འགྱུར། ཞེས་དང༌། ངོ་བོ་ཉིད་མེད་པ་རྣམ་པ་གསུམ་གྱི་དགོངས་པ་བསྟན་པས་དབུ་མའི་ལམ་མཐའ་གཉིས་དང་བྲལ་བར་རབ་ཏུ་བསྟན་པའི་ཕྱིར། ངེས་པའི་དོན་ཁོ་ན་གཞུང་འཛུགས་པར་མཛད་པ་ཡིན་ནོ། །ཞེས་དང༌། ཆོས་ཐམས་ཅད་རང་བཞིན་མེད་པར་གྲུབ་པ་ཞེས་བྱ་བ་དབུ་མ་ཆེན་པོའི་གཞུང་དུ་ཡང༌། ངོ་བོ་ཉིད་རྣམ་པ་གསུམ་ནི། ངས་ཆོས་ཐམས་ཅད་ངོ་བོ་ཉིད་མེད་པ་རྣམ་པ་གསུམ་ལ་དགོངས་ནས། ངོ་བོ་ཉིད་གསུམ་དུ་གསུངས་སོ། ། ཞེས་བསྟན་པ་གང་ཡིན་པ་དེ་དང་ཡང་མི་འགལ་བ་ཉིད་དེ། འདིར་ཡང་ངོ་བོ་ཉིད་གསུམ་རྣམ་པར་གཞག་པ་འགལ་བ་མེད་པའི་ཕྱིར་རོ། །འདི་ལྟར་མ་བརྟགས་པ་གྲགས་པ་དངོས་པོ་རྣམས་ཀྱི་རྟེན་ཅིང་འབྲེལ་བར་འབྱུང་བའི་ངོ་བོ་ཉིད་གང་ཡིན་པ་དེ་ནི་གཞན་གྱི་དབང་གི་ངོ་བོ་ཉིད་དེ། ཀུན་རྫོབ་ཏུ་སྒྱུ་མ་ལ་སོགས་པ་བཞིན་དུ་རྐྱེན་གྱི་དབང་གིས་སྐྱེ་བས་ངོ་བོ་ཉིད་མེད་པའི་ཕྱིར། སྐྱེ་བ་[ཡང་དག་པར་]ངོ་བོ་ཉིད་མེད་པ་ཡིན་ནོ། །ཞེས་སོགས་རྒྱས་པ་དང༌། དབུ་མ་པ་ཆེན་པོ་སློབ་དཔོན་ཀླུའི་བཤེས་གཉེན་གྱིས་མཛད་པའི་སྐུ་གསུམ་ལ་འཇུག་པའི་སྒོར་ཡང༌། ངོ་བོ་ཉིད་ནི་རྣམ་གསུམ་པོ[ལས]། །[ཀུན་བརྟགས་ནི་]ཡོངས་སུ་ཤེས་དང་[གཞན་དབང་ནི་]སྤངས་[པ་དང་ཡོངས་གྲུབ་ནི་གློ་བུར་དྲི་མས་]དག་པས། །སྐུ་གསུམ་པོ་དང་འཐོབ་འགྱུར་ཏེ། །དེ་ཕྱིར་དེ་དག་དེ་ཡིས་བསྡུས།།ཞེས་དང༌། དེའི་འགྲེལ་པ་སློབ་དཔོན་དབུ་མ་པ་ཆེན་པོ་ཡེ་ཤེས་ཟླ་བས་མཛད་པར་ཡང༌། ཀུན་བརྟགས་པ་དང་གཞན་གྱི་དབང་དང༌། ཡོངས་སུ་གྲུབ་པའི་ངོ་བོ་ཉིད་རྣམས་དཔེས་ཡོངས་སུ་ཤེས་པར་བྱ་བ་དང༌། སྤང་བ་དང་མངོན་སུམ་དུ་བྱ་བ་རྣམས་ཀྱིས་སྟོན་ཏོ། །ཞེས་པ་ལ་སོགས་པ་ཡང་[ཁ་ཅིག་]དབུ་མ་པའི་ལུགས་ལ་ངོ་བོ་ཉིད་གསུམ་གྱི་རྣམ་གཞག་མེད་དོ། །ཞེས་འདོད་པ་རྣམས་ལ་གནོད་བྱེད་དུ་འགྱུར་ཏེ། དེ་སྐད་སྨྲ་བ་དེ་དག་གིས་གཞུང་དེ་དག་མ་མཐོང་བའམ་མ་ངེས་པ་ཉིད་དུ་ཟད་དོ། །[ཤེར་ཕྱིན་ལྔ་བརྒྱ་པར་ཡང༌། གཟུགས་སོགས་ཆོས་རྣམས་ལ་དངོས་པོ་མེད་པ་དང༌། དངོས་པོ་ངན་པ་དང༌། དངོས་པོ་ཡོད་པ་སྟེ་ལེའུ་གསུམ་གསུམ་དུ་འབྱེད་ཤེས་པའི་ཕན་ཡོན་དང༌། མ་ཤེས་པའི་ཉེས་དམིགས་རླབས་པོ་ཆེ་གསུངས་པ་ཡང་མ་མཐོང་བའམ་མ་ངེས་པ་ཉིད་དུ་ཟད་དོ། །དེ་ལྟ་བས་ན་མདོ་དེ་ཉིད་མཁས་པ་རྣམས་ཀྱིས་ངེས་པར་མཐོང་ཞིང་ལེགས་པར་ཁོང་དུ་ཆུད་ནས་གཞན་མང་པོ་ལའང་སྟོན་པར་གྱུར་ཅིག །]གཞན་ཡང་དོན་ལ་སེམས་ཙམ་ལས་འདས་པར་སྟོན་ཡང༌། འགའ་ཞིག་སེམས་ཙམ་དུ་འཁྲུལ་ནས་དེ་ལྟར་བསྒྲགས་པའི་གཞུང་ལུགས་མང་པོར་ངོ་བོ་ཉིད་གསུམ་བསྟན་པ་ཡོད་དེ། དགོངས་འགྲེལ་གྱི་མདོར། དེ་འདི་ལྟར་[གཤིས་ལ་ཀུན་རྫོབ་ཡོད་དོ་ཞེས་]སྒྲོ་བཏགས་པའི་མཐའ་དང༌། [གཤིས་ལ་དོན་དམ་མེད་དོ་ཞེས་]སྐུར་བའི་མཐའ་སྤངས་ནས་དབུ་མའི་ལམ་གྱིས་ངེས་པར་འབྱུང་བར་འགྱུར་བ་དེ་ནི་དེའི་ཤེས་རབ་ཡིན་ནོ། །ཤེས་རབ་དེས་ཀྱང་རྣམ་པར་ཐར་པའི་སྒོ་སྟོང་པ་ཉིད་དང༌། སྨོན་པ་མེད་པ་དང༌། མཚན་མ་མེད་པ་གསུམ་ལ་རྣམ་པར་ཐར་པའི་སྒོའི་དོན་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཀུན་བརྟགས་པ་དང༌། གཞན་གྱི་དབང་དང༌། ཡོངས་སུ་གྲུབ་པའི་ངོ་བོ་ཉིད་གསུམ་ལ། ངོ་བོ་ཉིད་ཀྱི་དོན་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེས་སོགས་མཐའ་བྲལ་དབུ་མ་སྟོན་པའི་གཞུང་རྣམས་སུ་ངོ་བོ་ཉིད་གསུམ་བསྟན་པ་རྣམས་ཀྱི་དགོངས་པ་ལ་ཤིན་ཏུ་མཁས་པར་གྱུར་ཅིག །[དེ་ལྟ་མ་ཡིན་ན་ངོ་བོ་ཉིད་གསུམ་བསྟན་པ་ཙམ་གྱིས་སེམས་ཙམ་ལས་འོས་མེད་སྙམ་དུ་འགའ་ཞིག་འཁྲུལ་ནས། དབུ་མ་པ་ཆེན་པོ་སློབ་དཔོན་དབྱིག་གཉེན་དང༌། ཕྱོགས་གླང་དང༌། མཆེ་བའི་སྡེ་ལ་སོགས་པས་ཤེར་ཕྱིན་སེམས་ཙམ་དུ་བཀྲལ་ཞེས་སོགས་འཆལ་གཏམ་གྱིས་ཆོས་སྤོང་ལ་སྦྱོར་རོ།།]