དོན་དམ་གྱི་སེམས་ཙམ་གསང་སྔགས་ཟབ་མོ་རྣམས་སུ་བསྟན་ཚུལ།

དེ་དང་རྗེས་སུ་མཐུན་པར་དབུ་མ་ཆེན་པོའི་མཐར་ཐུག་པ་དཔལ་དུས་ཀྱི་འཁོར་ལོའི་རྒྱུད་དུ་ཡང༌། ཀུན་རྫོབ་ཀྱི་སེམས་གདོད་ནས་འགགས་པའི་གཞི་དོན་དམ་པའི་སེམས་ཙམ་གསུངས་པ་འདི་ལྟ་སྟེ། [དོན་དམ་གྱི་]སེམས་ཙམ་[དོན་དམ་གྱི་]སྔགས་ཀྱི་ངོ་བོ་[དོན་དམ་གྱི་]ལྷ་ཡིས་ཡོངས་སུ་བསྐོར་བ་[བདེན་བཞི་དབྱེར་མེད་ཡིན་པས་]སྡུག་བསྔལ་དང་ནི་བདེ་བའི་རང་བཞིན་ཏེ། །ཞེས་སོགས་དང༌། [དོན་དམ་གྱི་]སེམས་ཀྱི་སྣང་བ་ཙམ་སྟེ་རང་གི་ཡིད་[ཀུན་བཟང་]ལས་སྐྱེས་པ་[པྲ་ཕབ་པའི་]མེ་ལོང་གི་ནི་གཟུགས་བརྙན་ལྟ་བུ་ཉིད། །གང་ཞིག་མཐའ་དག་རྒྱལ་བའི་སྲས་དང་སངས་རྒྱས་རྣམས་ཀྱིས་བསྟེན་པ་རྣལ་འབྱོར་དབང་པོས་བསྟེན་བྱ་སྟེ། །ཞེས་པ་ལ་སོགས་པས། རང་བྱུང་དོན་དམ་པའི་དབྱིངས་རིག་དབྱེར་མེད་རྡོ་རྗེ་སེམས་དཔའ་དང་ཕྱག་རྒྱ་ཆེན་མོ་ལ་སེམས་ཙམ་དུ་གསུངས་པ་ཡང༌། དོན་དམ་པའི་སེམས་ཙམ་ལ་དགོངས་པ་ཡིན་ཏེ། ལང་ཀར་གཤེགས་པ་ལ་སོགས་པ་འཁོར་ལོ་གསུམ་པའི་གཞུང་ལུགས་ཟབ་མོ་རྣམས་སུ་གསུངས་པའི་དོན་དམ་པའི་སེམས་ཙམ་དང་གཅིག་པ་ཡིན་ནོ། །དེ་བཞིན་དུ་རྗེ་བཙུན་སྤྱན་རས་གཟིགས་དབང་ཕྱུག་གི་ཞལ་སྔ་ནས་ཀྱང༌། གང་ཞིག་[དོན་དམ་གྱི་]སེམས་དམིགས་པ་དང་བཅས་པའི་སྟོང་པ་ཉིད་དང་དམིགས་པ་མེད་པའི་སྙིང་རྗེའི་བདག་ཉིད། ཅེས་པ་ལ་སོགས་པས་དོན་དམ་པའི་སེམས་གསུངས་པ་ཡང་དེ་བཞིན་ནོ། །མཁའ་འགྲོ་མ་རྡོ་རྗེ་གུར་དུ་ཡང༌། ཇི་ལྟར་ནམ་མཁའ་དེ་བཞིན་[དོན་དམ་གྱི་]སེམས[བཞུགས་པའི]། །སྐྱེ་[བོ་]འདི་སངས་རྒྱས་མཆོག་ཉིད་དུ། །[དོན་དམ་གྱི་]སེམས་བསྒོམས་པས་ནི་འཚང་རྒྱའོ། །རིན་ཆེན་[འབྱུང་ལྡན་དང་གཅིག་པའི་]སེམས་ལས་ཕྱིར་གྱུར་པའི། །སངས་རྒྱས་[གཤིས་ལ་]མེད་ཅིང་སེམས་ཅན་མེད། །ཞེས་དང༌། [དཔེར་ན་འདུས་མ་བྱས་]ནམ་མཁའ་འབྱུང་བ་[བཞི་པོ་]ཐམས་ཅད་དང༌། །ཆོས་རྣམས་ཀུན་གྱི་གཞིར་གྱུར་བཞིན། །[རང་བཞིན་འགྱུར་མེད་]བདེ་མཆོག་[གདོད་ནས་]དག་པའི་སེམས་ཉིད་[འོད་གསལ་]ཏེ། །མཁའ་བཞིན་[གདོད་ནས་]དག་པའི་སེམས་ཉིད་ཀྱང་[ཆོས་རྣམས་ཀུན་གྱི་གཞི་ཡིན་ལ]། །[དོན་དམ་གྱི་]ཡུལ་དང་དབང་པོའི་རང་བཞིན་ནི།།[དོན་དམ་གྱི་]སེམས་ལས་ཕྱི་རོལ་གྱུར་མིན་ཡང༌། །[དོན་དམ་གྱི་]གཟུགས་སོགས་སོ་སོར་སྣང་བ་རྣམས། །[དོན་དམ་གྱི་]སེམས་ཉིད་ཁོ་ནར་སྣང་བ་ཡིན། །ཞེས་པ་ལ་སོགས་པས་ཀྱང་དོན་དམ་པའི་སེམས་གསལ་བར་མཛད་དེ། དོན་དམ་པའི་སངས་རྒྱས་ནམ་མཁའ་ལྟར་རྒྱ་ཆེ་ཞིང་འདུས་མ་བྱས་པའི་སེམས་བསྒོམས་པས་འཚང་རྒྱ་བ་དང༌། འཁོར་འདས་ཀུན་གྱི་གཞིར་གྱུར་པའི་དོན་དམ་གྱི་སེམས་རིན་པོ་ཆེ་དང༌། ནམ་མཁའ་ལྟར་ཆོས་ཐམས་ཅད་ཀྱི་གཞིར་གྱུར་པ་བདེ་མཆོག་[འཁོར་ལོ་གདོད་ནས་]དག་པའི་སེམས་ཉིད་ཡུལ་དང་དབང་པོ་ལ་སོགས་པ་རྣམ་པ་ཀུན་ལྡན་རྣམ་པ་མེད་པའི་སེམས་ནི་དོན་དམ་པའི་སེམས་སོ། །ས་ར་ཧ་པའི་ཞལ་སྔ་ནས་ཀྱང༌། [དོན་དམ་གྱི་]སེམས་ཉིད་གཅིག་པུ་ཀུན་གྱིས་ས་བོན་ཏེ། །གང་ལས་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་འཁོར་འདས་ཀུན་གྱི་གཞིར་གྱུར་པའི་ཆོས་ཉིད་དོན་དམ་གྱི་སེམས་ཡིད་བཞིན་ནོར་བུ་ལྟ་བུར་གསུངས་ལ། [སེམས་འདི་དག་ཀུན་རྫོབ་ཀྱི་སེམས་ལ་འཆད་པ་ནི་དགོངས་པ་མ་ཡིན་ནོ།།]དེ་བཞིན་དུ། དཔལ་རྡོ་རྗེ་ཕྲེང་བའི་རྒྱུད་དུ་ཡང༌། དབྱིངས་ནི་བྱང་ཆུབ་སེམས་སུ་གསུངས། །ཞེས་ཆོས་ཀྱི་དབྱིངས་ཉིད་དོན་དམ་གྱི་སེམས་སུ་གསུངས་ཤིང༌། ཕྱག་རྒྱ་ཆེན་པོ་ཐིག་ལེའི་རྒྱུད་དུ་ཡང༌། དབྱིངས་ནི་སེམས་སུ་ཤེས་པར་དྲན། །ཞེས་པ་ལ་སོགས་པས། ཆོས་ཀྱི་དབྱིངས་ཉིད་དོན་དམ་གྱི་སེམས་སུ་གསུངས་སོ། །དེ་བཞིན་དུ་དཔལ་སམ་པུ་ཊིར་ཡང༌། [སྟོང་གཞི་དོན་དོན་གྱི་སེམས་ནི་ནམ་མཁའ་ལྟར་]ཆ་[ཤས་]མེད་[ཅིང་]མཆོག་ཏུ་ཕྲ་བ་སྟེ། །ཐིག་ལེའི་གཟུགས་ཅན་[ནམ་རང་བཞིན་ཅན་དོན་དམ་གྱི་]ཡིད་ཀྱི་དངོས། །གཟི་བརྗིད་ཆེན་པོའི་འོད་དང་ལྡན། །རྟག་ཏུ་སྙིང་གི་དབུས་ན་གནས། །ཞེས་དང༌། དྲི་མེད་ཤེལ་དང་མཚུངས་པའི་འོད། །[དོན་དམ་གྱི་]བྱང་ཆུབ་སེམས་ནི་འོད་གསལ་བ། །ཡེ་ཤེས་ལྔ་ཡི་དངོས་པོ་[སྟེ་ངོ་བོ་]ཉིད། །ཅེས་པ་ལ་སོགས་པས་ཀྱང་དོན་དམ་པའི་སེམས་གསལ་བར་མཛད་དེ། རྟག་ཏུ་ཀུན་གྱི་སྙིང་ལ་གནས་པའི་རང་བཞིན་འོད་གསལ་ཆ་མེད་མཆོག་ཏུ་ཕྲ་བའི་ཐིག་ལེ་ཡེ་ཤེས་ལྔ་དང༌། དོན་དམ་པའི་ཡིད་ཀུན་ཏུ་བཟང་པོ་ལ་དོན་དམ་བྱང་ཆུབ་ཀྱི་སེམས་སུ་གསུངས་པ་ཡིན་ནོ། །དེ་བཞིན་དུ། དཔལ་མཁའ་འགྲོ་རྒྱ་མཚོར་ཡང༌། འཇིག་རྟེན་གསུམ་དུ་རྙེད་དཀའ་བ། །ཐོག་མ་དབུས་མཐར་ཡང་དག་གནས[ཏེ]། །[ནམ་ཡང་བཞུགས་པ་]གང་ཞིག་མཐའ་བྲལ་རྣམས་ཀྱི་[སྟེ་མཐའ་རྣམས་དང་བྲལ་བའི་]སེམས། །[བདེ་སྟོང་གི་]སེམས་དེ་རོ་མཉམ་གྱུར་བའོ། །ཞེས་པ་ལ་སོགས་པས་ཀྱང་མཐའ་བྲལ་རོ་མཉམ་དོན་དམ་གྱི་སེམས་ཐོག་མ་དབུས་མཐར་རྟག་ཏུ་བཞུགས་ཀྱང༌། འཇིག་རྟེན་པས་རྙེད་དཀའ་བ་གསུངས་སོ། །དེ་བཞིན་དུ། དཔལ་དང་པོའི་སངས་རྒྱས་ལས་ཀྱང༌། མ་སྐྱེས་པ་དང་མ་འགགས་པའི། །ཤེས་བྱ་གང་ཞིག་འདིར་མཐོང་བ། །དེ་ནི་རང་སེམས་[དོན་དམ་པ་ཡིན་གྱི་དེ་ལས་]གཞན་མ་ཡིན། །ཞེས་པ་ལ་སོགས་པས་དོན་དམ་པའི་ཤེས་བྱ་ཡང་ཡིན་ལ། དོན་དམ་པའི་སེམས་ཀྱང་ཡིན་པ་གསུངས་སོ། །