དེ་རྣམས་ལ་ཉེས་སྤོང་གི་ལན་ཡང་སྐབས་ཇི་ལྟ་བར་དགག་པ།

གལ་ཏེ་སྡིག་པ་ལ་སོགས་པའི་དངོས་པོ་སྔར་སྨོས་པ་དེ་རྣམས་ཀྱི་སྟོང་པའི་ཆ་གང་ཡིན་པ་དེ་དོན་དམ་བྱང་ཆུབ་ཀྱི་སེམས་དང༌། ཆོས་ཀྱི་དབྱིངས་ལ་སོགས་པའི་རྣམ་གྲངས་ཡིན་ལ། སྣང་བའི་ཆ་གང་ཡིན་པ་དེ། དེ་ལྟ་མ་ཡིན་པས་སྐྱོན་དེ་དག་མེད་དོ་སྙམ་ན། དེ་ལྟ་ན་ནི་སྣང་བའི་ཆ་དེ་སྟོང་ངམ་མི་སྟོང༌། གལ་ཏེ་སྟོང་ན་ནི་དེ་ཡང་དེ་བཞིན་ཉིད་ལ་སོགས་པ་ཡིན་པར་འགྱུར་ལ། མི་སྟོང་པའི་དངོས་པོ་ནི་མི་སྲིད་དེ། [འཕགས་པ་ཀླུ་སྒྲུབ་ཀྱི་ཞལ་སྔ་ནས།]ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་སྟེ། །བྱས་དང་མི་རྟག་པ་བཞིན་དུ།།མེད་ན་མི་འབྱུང་ངེས་ཕྱིར་རོ། །ཞེས་དང༌། [ཤེས་རབ་སྙིང་པོར།]གཟུགས་སྟོང་པའོ། ། སྟོང་པ་ཉིད་གཟུགས་སོ། །ཞེས་པ་ལ་སོགས་པའི་ཚུལ་དང༌། རིགས་པས་སྣང་བ་སྟོང་པ་ཉིད་དོ། །སྟོང་པ་ཉིད་སྣང་བའོ། །དེ་ལས་དེ་གཞན་མ་ཡིན་ཞིང༌། །དེ་ལས་ཀྱང་དེ་གཞན་མ་ཡིན་ནོ། །ཞེས་པའི་དོན་དུ་འགྱུར་བའི་ཕྱིར། [ཀུན་རྫོབ་ཀྱི་སྟོང་ཆ་དོན་དམ་དུ་འདོད་པ་]འདི་ནི་ཤིན་ཏུ་མི་རིགས་པ་ཁོ་ན[སྟེ། དོན་དམ་གྱི་སྣང་བ་ལ་ཡང་དོན་དམ་ལས་མ་འདས་ཤིང་ཀུན་རྫོབ་ཀྱིས་སྟོང་ཆ་ཡང་ཀུན་རྫོབ་ལས་མ་འདས་པས་སྣང་བ་ལ་ཡང་བདེན་པ་གཉིས་དང༌། སྟོང་པ་ལ་ཡང་བདེན་པ་གཉིས་སུ་གནས་པ་མ་གོ་བའི་ཕྱིར་ན་]འོ། །དེ་བཞིན་དུ་མི་དགེ་བའི་སྟོང་པའི་ཆ། དེ་བཞིན་ཉིད་དང་རྣམ་གྲངས་སུ་འདོད་ན་ཡང༌། [དེ་བཞིན་ཉིད་དགེ་བ་ཡིན་པའི་ཕྱིར་མི་དགེ་བའི་སྟོང་ཆ་]དེ་དགེ་བ་ཡིན་དགོས་པས། འདིར་སྣང་བའི་ཆ་མི་དགེ་བ་དང༌། སྟོང་པའི་ཆ་དགེ་བ་ཡིན་པར་ཁས་བླང་དགོས་པར་ཡང་འགྱུར་ཞིང༌། [དེ་འདོད་ན་སྣང་སྟོང་ཁྱབ་མཉམ་དབྱེར་མེད་མ་ཡིན་པར་འགྱུར་ལ་]མི་སྟོང་པའི་སྣང་ཆ་མི་སྲིད་པས་མི་དགེ་བའི་སྣང་ཆ་ཡང༌། རང་གི་ངོ་བོས་སྟོང་པའི་ཕྱིར། དེ་བཞིན་ཉིད་དང་དགེ་བ་ཡིན་པར་ཧ་ཅང་ཐལ་བར་འགྱུར་ཏེ། འཕགས་པ་ཐོགས་མེད་ཞབས་ཀྱི་ཞལ་སྔ་ནས། དོན་དམ་པའི་དགེ་བ་གང་ཞེ་ན། དེ་བཞིན་ཉིད་དོ། །ཞེས་གསུངས་པའི་ཕྱིར་རོ། །