གནས་ལུགས་ཀྱི་ཕྱག་རྒྱ་ཆེན་མོ་ལ་སོགས་པ་དང་རང་སྟོང་རྣམ་གྲངས་ཡིན་ན་ཧ་ཅང་ཐལ་བ།

གཞན་ཡང་རང་སྟོང་ལས་གཞན་པའི་སྟོང་ཉིད་ཟབ་མོ་མེད་པར་འདོད་ན་གཞི་འབྲས་ངོ་བོ་དབྱེར་མེད་ཀྱི་ཕྱག་རྒྱ་ཆེན་མོ་[མཁའ་ཁྱབ་]དང༌། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་[མཁའ་ཁྱབ་]དང༌། ཡུམ་ཤེར་ཕྱིན་[མཁའ་ཁྱབ་]ཡང་མེད་པར་འགྱུར་ཏེ། རང་སྟོང་གིས་དེ་རྣམས་ཀྱི་གོ་མི་ཆོད་པའི་ཕྱིར་རོ། །གལ་ཏེ་ཆོད་ན་དུག་དང་བཤང་བ་ལ་སོགས་པ་དངོས་པོ་ངན་པ་རྣམས་ཀྱང་དེ་དང་དེ་ཡིན་པར་འགྱུར་ཏེ་རང་རང་ངོ་བོས་སྟོང་པའི་ཕྱིར་རོ། །འདོད་པར་མི་ནུས་ཏེ། བཅོམ་ལྡན་འདས་སྤྱན་རས་གཟིགས་དབང་ཕྱུག་གི་ཞལ་སྔ་ནས། ཕྲ་རབ་རྡུལ་གྱི་ཆོས་ཉིད་འདས། །པྲ་ཕབ་པ་ཡི་རང་བཞིན་ཅན། །རྣམ་པ་ཀུན་གྱི་མཆོག་ལྡན་མ[མཁའ་ཁྱབ]། །ཕྱག་རྒྱ་ཆེན་མོ་[མཁའ་ཁྱབ་]དེ་ལ་འདུད། །ཅེས་དང༌། གང་ཞིག་ཕུང་པོ་ལ་སོགས་སྒྲིབ་པ་[གདོད་ནས་]རབ་[ཏུ་]བཅོམ་[པའི་གཞི་དོན་དམ་གྱི་ལ་སོགས་]ཡུལ་ནི་པྲ་ཕབ་བརྒྱད་ལྟ་བུ[མཁའ་ཁྱབ]། །ཀུན་མཁྱེན་[གྱི་]བདེ་སྟེར་དེ་ཉིད་གཅིག་པུ་རྡོ་རྗེ་འཛིན་པའི་ཕྱག་རྒྱ་ཆེན་མོ་[མཁའ་ཁྱབ་]སྟེ། །ཞེས་དང༌། ཕྱག་རྒྱ་ཆེན་མོ་ནི་[ཀུན་རྫོབ་ཀྱི་ཆོས་ཐམས་ཅད་ཀྱི་]རང་བཞིན་མེད་པའི་[གཞི་དོན་དམ་པའི་]ཆོས་ཐམས་ཅད་ཀྱི་མཚན་ཉིད་ཅན་རྣམ་པ་ཐམས་ཅད་ཀྱི་མཆོག་དང་ལྡན་[ཡང་རྣམ་པའི་དངོས་པོ་མེད་]པ། ཤེས་རབ་ཀྱི་ཕ་རོལ་ཏུ་ཕྱིན་མ་[མཁའ་ཁྱབ་]སངས་རྒྱས་[ཐམས་ཅད་]སྐྱེད་པར་མཛད་པའོ། །ཞེས་སོགས་རྒྱ་ཆེར་གསུངས་ཤིང༌། རྒྱུད་ཀྱི་རྒྱལ་པོར་ཡང༌། ཕྱག་རྒྱ་[ཆེན་མོ་]སྒྱུ་མའི་རྗེས་སུ་མཐུན་པ་ཡིད་དང་ནམ་མཁའ་ལ་ནི་[པྲ་ཕབ་པའི་]མེ་ལོང་དག་ལ་གཟུགས་བཞིན་ཏེ། །[དོན་དམ་གྱི་]འཇིག་རྟེན་གསུམ་པོ་[མཁའ་ཁྱབ་]སྣང་བར་བྱེད་ཅིང་དྲི་མེད་ཀློག་དང་མཚུངས་པའི་འོད་ཟེར་དུ་མ་འཕྲོ་བར་བྱེད། །ཅེས་སོགས་དང༌། མཁའ་འགྲོ་མ་རྡོ་རྗེ་གུར་དུ་ཡང༌། ནམ་མཁའི་ཁམས་ནི་ཇི་སྙེད་པ[ཁྱབ་ཅིང་]། །འཇིག་རྟེན་ཁམས་ནི་སྟོང་ཕྲག་ན[རྟག་ཏུ་བཞུགས་པའི]། །བདེ་ཆེན་ཕུན་ཚོགས་ཕྱག་རྒྱ་ཆེ[གང་ཡིན་པ་དེ་ཉིད]། །[དོན་དམ་གྱི་]སངས་རྒྱས་[ཏེ་བརྟན་གཡོ་ཀུན་ལ་ཁྱབ་པས་]ནམ་མཁའ་འདྲ་བར་བཞུགས། །ཞེས་དང༌། དེ་ཉིད་འདུས་པར་ཡང༌། [དོན་དམ་གྱི་]དེ་བཞིན་གཤེགས་པ་[ནི་]ཕྱག་རྒྱ་ཆེ[མཁའ་ཁྱབ]། །ཞེས་དང༌། ཕྱག་རྒྱ་ཆེན་པོའི་ཚུལ་དུ་ནི། །ཇི་ལྟར་རྡོ་རྗེ་འཛིན་[གདོད་ནས་ལྷུན་གྱིས་]གྲུབ་པ[མཁའ་ཁྱབ]། །ཞེས་དང༌། གསང་བདག་ཕྱག་ན་རྡོ་རྗེའི་ཞལ་སྔ་ནས་ཀྱང༌། [མཆོག་གི་]དངོས་གྲུབ་ནི་ཕྱག་རྒྱ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་[མཁའ་ཁྱབ་]རྣམ་པ་ཐམས་ཅད་ཀྱི་མཆོག་དང་ལྡན་[ཡང་རྣམ་པའི་དངོས་པོ་མེད་]པའོ། །ཞེས་དང༌། ཕྱག་རྒྱ་ཆེན་པོ་འདོད་པའི་དངོས་གྲུབ་[མཁའ་ཁྱབ་]དེ་ནི་[དོན་དམ་སྐུ་བཞི་མཁྱེན་པ་བཞི་སྟེ་]ཐམས་ཅད་མཁྱེན་པ་ཉིད་[རང་བཞིན་པའི་སྐུ་མཁའ་ཁྱབ་]དང་རྣམ་པ་ཐམས་ཅད་མཁྱེན་པ་ཉིད་[སྤྲུལ་པའི་སྐུ་མཁའ་ཁྱབ་]དང༌། ལམ་མཁྱེན་པ་ཉིད་[ལོངས་སྐུ་མཁའ་ཁྱབ་]དང་ལམ་གྱི་རྣམ་པ་ཐམས་ཅད་མཁྱེན་པ་ཉིད་[ཆོས་སྐུ་མཁའ་ཁྱབ་]དང༌། [དོན་དམ་གྱི་]སྟོབས་བཅུ་དང༌། མི་འཇིགས་པ་བཞི་ལ་སོགས་པ་སངས་རྒྱས་ཀྱི་ཡོན་ཏན་[མཁའ་ཁྱབ་]མཐའ་དག་སྟེར་བར་བྱེད་པ་མོ་སྟེ། ཞེས་དང༌། ནང་དུ་ནི་[དོན་དམ་གྱི་]ཁམས་གསུམ་པ་མ་ལུས་པའི་སངས་རྒྱས་ཀྱི་གཟུགས་བརྙན་མཐོང་བ་སྟེ་ཕྱག་རྒྱ་ཆེན་པོ་མཐོང་བ་དང༌། ཞེས་དང༌། སྒྲིབ་པ་ཐམས་ཅད་དང་[གདོད་ནས་རང་བཞིན་གྱིས་]བྲལ་བ་པྲ་ཕབ་པ་ལྟ་བུ་ཕྱག་རྒྱ་ཆེན་པོ་སངས་རྒྱས་ཀྱི་འོད་ཟེར་གྱི་སྤྲིན་མཐའ་ཡས་པ་[མཁའ་ཁྱབ་]སྤྲོ་བར་བྱེད་[ཀྱང་སྤྲོ་བསྡུ་མེད་]པ་འོད་ཀྱི་དཀྱིལ་འཁོར་གྱིས་[གདོད་ནས་རང་བཞིན་གྱིས་]རྣམ་པར་སྤྲས་པ། ཞེས་དང༌། [སྟོང་གཞི་དོན་དམ་གཞན་སྟོང་]དེ་ནི་རྡོ་རྗེ་རྣལ་འབྱོར་མ་[མཁའ་ཁྱབ་]རང་གི་སེམས་[རང་བཞིན་དུ་གནས་པའི་རིགས་རང་བྱུང་ཡེ་ཤེས་]ཀྱི་སྣང་བ་ཙམ་ཕྱག་རྒྱ་ཆེན་པོ་རྣམ་པ་ཐམས་ཅད་ཀྱི་མཆོག་དང་ལྡན་པ་ཤེས་རབ་ཀྱི་ཕ་རོལ་ཏུ་ཕྱིན་པ་[མི་སྟོང་པའི་]སྟོང་པ་ཉིད་[མཁའ་ཁྱབ་]དང་དེ་བཞིན་ཉིད་དང༌། རིགས་ལྡན་མ་[མཁའ་ཁྱབ་]དང་པད་མ་[མཁའ་ཁྱབ་]ཞེས་བརྗོད་པར་བྱའོ། །ཞེས་སོགས་དང༌། དཔལ་ཀྱེའི་རྡོ་རྗེའི་རྒྱུད་དུ་ཡང༌། [དོན་དམ་གྱི་]བོ་ལའི་བདེ་བ་ཕྱག་རྒྱ་ཆེ[མཁའ་ཁྱབ]། །[དོན་དམ་གྱི་]རྡོ་རྗེའི་སྐྱེ་མཆེད་[སེམས་དཔའ་སེམས་མ་]ཐམས་ཅད་ཉིད[ཡིན་ལ]། །[དོན་དམ་གྱི་བོ་ལ་དང་བྷ་ག་སྦྱོར་བ་]གསང་བའི་སྙོམས་འཇུག་འདི་ཡིས་ནི། །[དོན་དམ་གྱི་]ཕྱི་རོལ་[ཀུན་རྫོབ་ཕོ་མོ་]གཉིས་[ཀྱིས་དབང་པོ་]གཉིས་[སྦྱོར་བ་ངེས་དོན་དུ་]བསྟན་པ་མེད། །ཅེས་སོགས་དང༌། [དོན་དམ་གྱི་]ག་པུར་[ཐིག་ལེ་]ཉིད་ནི་བདག་མེད་མ[མཁའ་ཁྱབ]། །[དོན་དམ་གྱི་]བདེ་བ་བདག་མེད་ཚུལ་ཅན་ཉིད[མཁའ་ཁྱབ]། །[དོན་དམ་]དེ་ཡི་བདེ་བ་ཕྱག་རྒྱ་ཆེ[མཁའ་ཁྱབ]། །[དོན་དམ་གྱི་]ལྟེ་བའི་དཀྱིལ་འཁོར་ཉིད་དུ་གནས། །དང་པོའི་དབྱངས་ཡིག་རང་བཞིན་[ཨ་ཡིག་]ཏེ། །[དོན་དམ་གྱི་]བློ་ཞེས་སངས་རྒྱས་རྣམས་ཀྱིས་བརྟགས། །ཞེས་དང༌། [དོན་དམ་]དེ་ཉིད་བཅོམ་ལྡན་ཤེས་རབ་མ[མཁའ་ཁྱབ]། །[དོན་དམ་]དེ་ནི་[ཀུན་རྫོབ་ཀྱི་]རིང་མིན་ཐུང་བ་མིན། །[ཀུན་རྫོབ་ཀྱི་]གྲུ་བཞི་མ་ཡིན་ཟླུམ་པོ་མིན། །[ཀུན་རྫོབ་ཀྱི་]དྲི་དང་རོ་དང་མྱང་ངན་འདས། །[དོན་དམ་གྱི་]ལྷན་ཅིག་སྐྱེས་དགའ་བྱེད་པ་ཅན། །[སྟོང་ཆེན་]དེ་ལས་སྐྱེས་པའི་[བདཻ་ཆེན་]རྣལ་འབྱོར་པ། །དེ་ཡི་བདེ་བ་ཟ་བ་[སྟེ་སྤྱོད་པ་]ཉིད། །[ཅེས་པར་བསྒྱུར་བ་བདེ།]།[དོན་དམ་བདེ་ཆེན་སྟོང་ཆེན་]དེ་དང་ལྷན་ཅིག་ཕྱག་རྒྱ་ཆེ[མཁའ་ཁྱབ]། །ཞེས་སོགས་དང༌། ཡང༌། [དོན་དམ་སྟོང་ཆེན་]དེ་ཉིད་ལྷན་ཅིག་སྐྱེས་པའི་གཟུགས[མཁའ་ཁྱབ]། །[དོན་དམ་]བདེ་ཆེན་[སྟོང་ཆེན་དེ་ཉིད་]བཟང་པོའི་རྣལ་འབྱོར་མ[མཁའ་ཁྱབ]། །[དོན་དམ་བདེ་ཆེན་སྟོང་ཆེན་]དེ་ཉིད་དཀྱིལ་འཁོར་འཁོར་ལོ་[མཁའ་ཁྱབ་]དང༌། །[དོན་དམ་བདེ་ཆེན་སྟོང་ཆེན་]ཡེ་ཤེས་ལྔ་ཡི་རང་བཞིན་ཅན[མཁའ་ཁྱབ]། །[དོན་དམ་བདེ་ཆེན་སྟོང་ཆེན་]དེ་ནི་མེ་ལོང་ཡེ་ཤེས་གཟུགས[མཁའ་ཁྱབ་དང་]། །མཉམ་ཉིད་ཡེ་ཤེས་དངོས་པོ་ཅན[དང་]། །ཡང་དག་[མཐར་]གྱུར་པ་སོ་སོར་རྟོག[པའི་ཡེ་ཤེས་ཀྱང་ཡིན་ལ།]།[དོན་དམ་བདེ་ཆེན་སྟོང་ཆེན་]དེ་ཉིད་བྱ་བ་ནན་ཏན་[གྱི་ཡེ་ཤེས་]ཏེ། །ཆོས་དབྱིངས་ཤིན་ཏུ་རྣམ་དག་པ[ཡང་ཡིན་ལ]། །[དོན་དམ་བདེ་ཆེན་སྟོང་ཆེན་]དེ་ཉིད་དཀྱིལ་འཁོར་བདག་པོ་[མཁའ་ཁྱབ་]ང་[ཨ་ཧཾ་ཡང་ཡིན་ཞིང་]། །[དོན་དམ་བདེ་ཆེན་སྟོང་ཆེན་]དེ་ཉིད་བདག་མེད་རྣལ་འབྱོར་མ[སྟེ]། །ཆོས་ཀྱི་དབྱིངས་ཀྱི་རང་བཞིན་ཅན[ནོ]། །ཞེས་དང༌། [མཆོག་གི་]དངོས་གྲུབ་[དོན་དམ་གྱི་]མཚན་ཉིད་[ཅན་གང་གིས་ཀྱང་]མི་ཕྱེད་པ། །[དོན་དམ་བདེ་ཆེན་སྟོང་ཆེན་]ཕྱག་རྒྱ་[ཆེན་པོ་རྡོ་རྗེའི་]རྣལ་འབྱོར་པ་ཡི་འགྲུབ། །ཅེས་དང༌། རྗེ་ནཱ་རོ་པཎ་ཆེན་གྱི་ཞལ་སྔ་ནས་ཀྱང༌། སྒྱུ་མ་ལ་སོགས་དཔེ་རྣམས་ཀྱིས། །[དོན་དམ་བདེ་ཆེན་སྟོང་ཆེན་]གང་གི་ངོ་བོ་རྟོགས་བྱ་བ། །ཕྱག་རྒྱ་ཆེན་མོ་[མཁའ་ཁྱབ་]དེ་ཉིད་ལ། །ཀུན་ཏུ་གུས་པས་བདག་ཕྱག་འཚལ། །ཞེས་དང༌། ཐོབ་བྱ་ཞེས་པ་[མཁའ་ཁྱབ་]ཕྱག་རྒྱ་ཆེན་པོ་[མཁའ་ཁྱབ་]སྟེ། ཞེས་པ་ལ་སོགས་པ་རྣམས་ཀྱིས་ཆོས་ཀྱི་དབྱིངས་དང་རང་བྱུང་ཡེ་ཤེས་དབྱེར་མེད་གཅིག་པ་དེ་ཉིད་ངེས་དོན་མཐར་ཐུག་གི་བོ་ལའི་བདེ་བ་[མཁའ་ཁྱབ་]དང་བདག་མེད་མ་[མཁའ་ཁྱབ་]དང་ཤེས་རབ་ཀྱི་ཕ་རོལ་ཏུ་ཕྱིན་མ་[མཁའ་ཁྱབ་]དང་ཨ་ཡིག་[མཁའ་ཁྱབ་]དང་པདྨ་[མཁའ་ཁྱབ་]དང་དེ་བཞྀན་ཉིད་[མཁའ་ཁྱབ་]དང་སྟོང་ཉིད་[མཁའ་ཁྱབ་]དང་རྡོ་རྗེ་རྣལ་འབྱོར་མ་[མཁའ་ཁྱབ་]དང་རིགས་ལྡན་མ་[མཁའ་ཁྱབ་]ལ་སོགས་པའི་རང་བཞིན་ཕྱག་རྒྱ་ཆེན་པོ་[མཁའ་ཁྱབ་]རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་[དོན་དམ་གཞན་སྟོང་]གསུངས་ལ། དེ་ཡང་རང་སྟོང་མ་ཡིན་པའི་སྟོང་ཉིད་ཟབ་མོ་ཡིན་པའི་ཕྱིར་ཤེས་བྱེད་ཁྱད་པར་དུ་འཕགས་པ་འདི་རྣམས་ཀྱིས་ཀྱང་མཐར་ཐུག་གཞི་འབྲས་ངོ་བོ་དབྱེར་མེད་ཀྱི་ཕྱག་རྒྱ་ཆེན་མོ་[མཁའ་ཁྱབ་]དང༌། ཡུམ་ཆེན་མོ་[མཁའ་ཁྱབ་]དང་བདག་མེད་མ་[མཁའ་ཁྱབ་]དང༌། ཨ་ཡིག་[མཁའ་ཁྱབ་]དང་པདྨ་[མཁའ་ཁྱབ་]དང་ལྷན་ཅིག་སྐྱེས་པའི་སྐུའམ་དགའ་བ་[མཁའ་ཁྱབ་]དང་དཀྱིལ་འཁོར་འཁོར་ལོ་[མཁའ་ཁྱབ་]དང་ཡེ་ཤེས་ལྔ་[མཁའ་ཁྱབ་]དང་དེ་བཞིན་ཉིད་[མཁའ་ཁྱབ་]དང༌། རྡོ་རྗེ་རྣལ་འབྱོར་མ་[མཁའ་ཁྱབ་]དང་རིགས་ལྡན་མ་[མཁའ་ཁྱབ་]ལ་སོགས་པ་རྣམས་ནི་ཆོས་ཐམས་ཅད་ཀྱིས་སྟོང་པའི་གཞི་ཆོས་ཉིད་དོན་དམ་པའི་བདེན་པ་མི་འབྲལ་བའི་ཡོན་ཏན་མཐའ་ཡས་པའི་བདག་ཉིད་བདེ་གཤེགས་སྙིང་པོ་དང་སངས་རྒྱས་ཀྱི་རང་བཞིན་དེ་བཞིན་ཉིད་བདག་དག་པའི་བདག་དངོས་པོ་མེད་པའི་ངོ་བོ་ཉིད་སྟོང་པ་ཉིད་[དང༌། གཞན་གྱི་དངོས་པོ་སྟོང་པ་ཉིད་དང༌། མི་སྟོང་པའི་སྟོང་པ་ཉིད་དང༌། མ་སྐྱེས་པའི་སྟོང་པ་ཉིད་དང༌། ཀུན་འགྲོའི་སྟོང་པ་ཉིད་དང༌། མེད་དགག་མ་ཡིན་པའི་སྟོང་པ་ཉིད་དང༌། ཀུན་རྫོབ་དང་མ་འབྲེལ་བའི་སྟོང་པ་ཉིད་དང༌། རྣམ་ཀུན་མཆོག་ལྡན་ཡེ་ཤེས་རང་རིག་གི་སྟོང་པ་ཉིད་]ལ་དགོངས་ནས་གསུངས་པ་སྟེ། དེ་ལྟར་མཐོང་ན་དགོངས་པ་ཆེན་པོའི་དོན་ཡང་དག་པ་མཐོང་བ་ཡིན་ནོ། །དེ་ལྟ་མ་ཡིན་ན་[གཞི་འབྲས་ངོ་བོ་དབྱེར་མེད་ཀྱི་]ཕྱག་རྒྱ་ཆེན་མོ་[དང༌། དབུ་མ་ཆེན་པོ་དང༌། ལྷན་ཅིག་སྐྱེས་སྦྱོར་དང༌། ཤིན་ཏུ་རྣལ་འབྱོར་དང༌། སངས་རྒྱས་མཉམ་སྦྱོར་དང༌། བདེ་དགྱེས་གསང་འདུས་བདག་མེད་མ་རྡོ་རྗེ་ཕག་མོ་]ལ་སོགས་པ་རྣམས་ཀྱི་སྟོང་ཚུལ་རྡོ་རྗེ་འཆང་གི་དགོངས་པ་བཞིན་དུ་རྙེད་པར་མི་འགྱུར་རོ། །