གནས་ལུགས་ཀྱི་གསང་བ་གསང་ཆེན་ལ་སོགས་པ་དང་རང་སྟོང་རྣམ་གྲངས་ཡིན་ན་ཧ་ཅང་ཐལ་བ།

གཞན་ཡང་དཔལ་རྡོ་རྗེ་འཆང་ཆེན་པོས་རྒྱུད་སྡེ་རིན་པོ་ཆེ་རྣམས་སུ་གསང་བ་ཞེས་པ་དང་གསང་ཆེན་ཞེས་པ་ལ་སོགས་པས་སྟོང་ཉིད་མཐར་ཐུག་གི་རྣམ་གྲངས་གསུངས་པ་རྣམས་ཀྱང་དངོས་པོ་མེད་པའི་ངོ་བོ་ཉིད་སྟོང་པ་ཉིད་གང་ཡིན་པ་སྟོང་གཞི་དོན་དམ་གཞན་སྟོང་ལ་དགོངས་པ་ཡིན་གྱི་དངོས་པོ་མེད་པ་སྟོང་པ་ཉིད་[དང༌། རང་གི་སྟོང་པ་ཉིད་དང༌། སྟོང་པའི་སྟོང་པ་ཉིད་དང༌། སྐྱེས་པའི་སྟོང་པ་ཉིད་དང༌། ཀུན་འགྲོ་མ་ཡིན་པའི་སྟོང་པ་ཉིད་དང༌། མེད་དགག་མ་ཡིན་པའི་སྟོང་པ་ཉིད་དང༌། ཀུན་རྫོབ་དང་འབྲེལ་བའི་སྟོང་པ་ཉིད་དང༌། ཆད་པའི་སྟོང་པ་ཉིད་དང༌། བེམ་པོའི་སྟོང་པ་ཉིད་]ཙམ་གང་ཡིན་པ་རང་སྟོང་ལ་ནི་དགོངས་པ་མ་ཡིན་ཏེ། དེ་དང་དེ་རྣམ་གྲངས་སུ་མི་རུང་བའི་ཕྱིར་རོ། །གལ་ཏེ་གསང་བ་ཞེས་པ་རང་སྟོང་གི་རྣམ་གྲངས་ཡིན་ན་ཉེར་ལེན་གྱི་ཕུང་པོ་ལྔ་ཡང་རང་སྟོང་ཡིན་པའི་ཕྱིར་མཐར་ཐུག་ངེས་དོན་གྱི་གསང་བ་ཡིན་པར་འགྱུར་ལ། འདོད་ན་དེ་རྣམས་ཤེར་ཕྱིན་ཡིན་པར་ཧ་ཅང་ཐལ་བ་འགྱུར་ཏེ། གསང་བདག་ཕྱག་ན་རྡོ་རྗེའི་ཞལ་སྔ་ནས། གསང་བ་ཞེས་པ་དྲང་བའི་དོན་གྱིས་ལས་ཀྱི་ཕྱག་རྒྱའི་བྷ་ག་བརྗོད་དོ། །ངེས་པའི་དོན་གྱིས་[གཞི་འབྲས་ངོ་བོ་དབྱེར་མེད་ཀྱི་]ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་པ་ཉིད་དོ། །ཞེས་གསུངས་པའི་ཕྱིར་རོ། །འདིར་གཞི་འབྲས་ངོ་བོ་དབྱེར་མེད་ཀྱི་ཤེར་ཕྱིན་སྟོང་ཉིད་དུ་གསུངས་པ་འདི་ཡང་རང་སྟོང་ནི་མ་ཡིན་གྱི་སྟོང་གཞི་དོན་དམ་གཞན་སྟོང་དངོས་པོ་མེད་པའི་ངོ་བོ་ཉིད་སྟོང་པ་ཉིད་[མཁའ་ཁྱབ་]ཡིན་ཏེ་ཤེར་ཕྱིན་[མཁའ་ཁྱབ་]ཡང་ཡིན་ལ་ཆོས་ཉིད་[མཁའ་ཁྱབ་]ཀྱང་ཡིན་པའི་ཕྱིར་རོ། །དེ་བཞིན་དུ་མཐར་ཐུག་གཞི་འབྲས་ངོ་བོ་དབྱེར་མེད་ཀྱི་སྟོང་ཉིད་ཟབ་མོའི་རྣམ་གྲངས་སུ། གསང་གནས་ཆེན་མོ་[མཁའ་ཁྱབ་]མཁའ་འགྲོ་མ[འི་]གསང་བ་[མཁའ་ཁྱབ་རྣམ་པ་]ཀུན་གྱི་བདག་ཉིད་དུ་[དོན་དམ་སྟོང་ཆེན་]ནི་[དོན་དམ་བདེ་ཆེན་]རྟག་ཏུ་བཞུགས། ཞེས་མཁའ་འགྲོ་མ་[མཁའ་ཁྱབ་]དང་ཀུན་གྱི་བདག་ཉིད་[དང༌། གསང་བ་དང༌། གསང་གནས་ཆེན་མོ་]ལ་སོགས་པ་དཔལ་ཕྱག་ན་རྡོ་རྗེས་རབ་ཏུ་གསུངས་ཤིང༌། དཔལ་འཁོར་ལོ་སྡོམ་པ་ཉུང་ངུའི་རྒྱུད་དུ་ཡང༌། གསང་ཆེན་[དང་]མཆོག་ཏུ་དགྱེས་པ་[མཁའ་ཁྱབ་]དང༌། །[རྣམ་པ་]ཀུན་གྱི་བདག་ཉིད་[དོན་དམ་སྟོང་ཆེན་]ན་[དོན་དམ་བདེ་ཆེན་]རྟག་[ཏུ་]བཞུགས། །ཞེས་པ་ལ་སོགས་པས་དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་གཞན་གྱི་དངོས་པོ་སྟོང་པ་ཉིད་[ལ་སོགས་པ་སྔར་སྨོས་པའི་རྣམ་གྲངས་མང་པོ་ཅན་]གང་ཡིན་པ་སྟོང་གཞི་དོན་དམ་གཞན་སྟོང་[མཁའ་ཁྱབ་]གི་རྣམ་གྲངས་མང་དུ་གསུངས་སོ།།