དེ་ལྟར་རྟོགས་ན་མཐའ་གཉིས་སྤངས་པའི་དབུ་མའམ་བར་མ་མ་ནིང་དང་དཔེ་བྲལ་དང་ཕུང་པོ་གསུམ་པར་རྟོགས་ཚུལ།

དེ་རྟོགས་ན་མཐའ་བྲལ་དབུ་མའི་དོན་ཟབ་མོ་ཡང་རྟོགས་པར་འགྱུར་ཏེ། དེ་ནི་མཐའ་དང་བྲལ་ཙམ་གྱི་མེད་དགག་གམ། རྣམ་གཅོད་ཙམ་དུ་བས་པ་མ་ཡིན་གྱི། མཐའ་གཉིས་སྤངས་པའི་དབུས་མའམ་བར་མ་ཡོངས་གཅོད་དུ་གྲུབ་ཅིང་ཕུང་པོ་གསུམ་པ་ཡིན་པའི་ཕྱིར་རོ། །དེ་ཡང༌། འཕགས་པ་ལྷས་མཛད་པའི་ཡེ་ཤེས་སྙིང་པོ་ཀུན་ལས་བཏུས་ཀྱི་བཤད་སྦྱར་དུ། ཡོད་མེད་མིན་ཞེས་སྨོས་ཏེ་ཕུང་པོ་གསུམ་པར་གྱུར་པའི་ཕྱིར་རོ། །ཞེས་མཁས་པ་ཆེན་པོ་སློབ་དཔོན་བྱང་ཆུབ་བཟང་པོས་གསུངས་ཤིང༌། དཀོན་མཆོག་བརྩེགས་པར་འོད་སྲུང་གིས་ཞུས་པར་ཡང༌། འོད་སྲུང་རྟག་ཅེས་བྱ་བ་[འདུས་མ་བྱས་ནམ་མཁའ་ལྟ་བུ་]དེ་ནི་མཐའ་གཅིག་གོ །མི་རྟག་ཅེས་བྱ་བ་དེ་ནི་[བུམ་པ་ལ་སོགས་པ་ལྟ་བུ་]མཐའ་[གཅིག་སྟེ་དེ་ལྟར་ན་མཐའ་]གཉིས་སོ། །མཐའ་དེ་གཉིས་ཀྱི་དབུས་[ནམ་མཁའ་ལྟར་ནུས་པ་མེད་པས་རྟག་པ་མ་ཡིན་ལ། མི་རྟག་པ་ཡང་མ་ཡིན་པས་ཕུང་པོ་གསུམ་པ་]གང་ཡིན་པ་[རང་བྱུང་ཡེ་ཤེས་]དེ་ནི་[རྟོག་གེས་]དཔྱད་དུ་མེད་པ། [རྣམ་ཤེས་ལ་]བསྟན་དུ་མེད་པ། [འབྲེལ་བའི་ཚུལ་གྱིས་ཆོས་རྣམས་ཀྱི་]རྟེན་མ་ཡིན་པ། [ཁམས་གསུམ་པོ་]སྣང་བ་མེད་པ། རྣམ་པར་རིག་པ་[སྟཻ་རྣམ་ཤེས་]མེད་པ། [ཆོས་རྣམས་ལ་འབྲེལ་ཏེ་]གནས[པ་]མེད་པ་སྟེ། འོང་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ[འི་ཡེ་ཤེས་རང་བྱུང་མཁའ་ཁྱབ་]འོ། །འོད་སྲུང་བདག་ཅེས་བྱ་བ་[མུ་སྟེགས་པ་འདོད་པ་ལྟ་བུ་]དེ་ནི་མཐའ་གཅིག་གོ །བདག་མེད་ཅེས་བྱ་བ་[ཐམས་ཅད་རང་སྟོང་དུ་འདོད་པ་ལྟ་བུ་]དེ་ནི་མཐའ[གཅིག་སྟེ་དེ་ལྟར་ན་མཐའ་]གཉིས་སོ། །མཐའ་དེ་གཉིས་ཀྱི་དབུས་[ཀུན་རྫོབ་ཀྱི་བདག་ཡོད་པ་མ་ཡིན་ལ། དོན་དམ་གྱི་བདག་མེད་པ་མ་ཡིན་པས་ཕུང་པོ་གསུམ་པ་]གང་ཡིན་པ་[རང་བྱུང་ཡེ་ཤེས་]དེ་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ[འམ་སོ་སོར་གཟིགས་པའི་ཡེ་ཤེས་མཁའ་ཁྱབ་]ཞེས་བྱའོ། །ཞེས་དང༌། འོད་སྲུང་ཡོད་ཅེས་བྱ་བ[དངོས་སྨྲ་བ་འདོད་པ་ལྟ་བུ་]དེ་ནི་མཐའ་གཅིག་གོ །མེད་ཅེས་བྱ་བ་[ཐམས་ཅད་རང་སྟོང་དུ་འདོད་པ་ལྟ་བུ་]དེ་ནི་མཐའ་[གཅིག་སྟེ་དེ་ལྟར་ན་མཐའ་]གཉིས་སོ། །དེ་གཉིས་ཀྱི་དབུས་[ཆོས་རྣམས་ཡོད་པ་མ་ཡིན་ལ། ཆོས་ཉིད་མཻད་པ་མ་ཡིན་པས་ཕུང་པོ་གསུམ་པ་]གང་ཡིན་པ་[རང་བྱུང་ཡེ་ཤེས་མཁའ་ཁྱབ་]དེ་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ[འམ་སོ་སོར་གཟིགས་པའི་ཡེ་ཤེས་མཁའ་ཁྱབ་]ཞེས་བྱའོ། །འོད་སྲུང་འཁོར་བ་ཞེས་བྱ་བ་དེ་ནི་མཐའ་གཅིག་གོ །མྱ་ངན་ལས་འདས་པ་ཞེས་བྱ་བ་[ཉན་རང་དགྲ་བཅོམ་ལྟ་བུ་]དེ་ནི་མཐའ་[གཅིག་སྟེ་དེ་ལྟར་ན་མཐའ་]གཉིས་སོ། །དེ་གཉིས་ཀྱི་དབུས་[མྱང་འདས་ཆེན་པོ་]གང་ཡིན་པ[འཁོར་འདས་དབྱེར་མེད་]དེ་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པ་སྟེ། འོད་སྲུང་འདི་ནི་དབུ་མའི་ལམ་ཆོས་རྣམས་ལ་ཡང་དག་པར་སོ་སོར་རྟོག་པ་[རང་བྱུང་ཡེ་ཤེས་མཁའ་ཁྱབ་]ཞེས་བྱའོ། །ཞེས་མཐའ་གཉིས་སྤངས་པའི་དབུས་གང་ཡིན་པ་ཆོས་ཉིད་དབུ་མའི་དོན་ནི་ཕུང་པོ་གསུམ་པའི་དོན་དུ་གསུངས་ལ། དེ་ཉིད་རྣམ་པར་མི་རྟོག་ཡེ་ཤེས་ཀྱི་མཚན་ཉིད་དུ་རྒྱལ་བ་བྱམས་པའི་ཞལ་སྔ་ནས་གསུངས་ཏེ། ཆོས་དང་ཆོས་ཉིད་རྣམ་འབྱེད་དུ། དེས་ན་[མཐའ་གཉིས་སྤངས་པའི་དབུས་མའམ་བར་མ་ཕུང་པོ་གསུམ་པ་]འདི་ནི་བརྟག་[ཏུ་]མེད་པ། །བསྟན་དུ་མེད་པ་གནས་མེད་པ། །སྣང་བ་མེད་ཅིང་རྣམ་རིག་མེད། །གནས་མེད་པ་ཞེས་བྱ་བ་སྟེ། །[ཆོས་དྲུག་པོ་དེ་ནི་]རྣམ་པར་མི་རྟོག་[རང་བྱུང་]ཡེ་ཤེས་ཀྱི། །མཚན་ཉིད་[ཡིན་པར་དཀོན་བརྩེགས་ཀྱི་]མདོ་བཞིན་བརྗོད་པ་ཡིན། །ཞེས་སོ། །གཞན་ཡང་མཐའ་བྲལ་དབུ་མའི་དོན་དཀོན་མཆོག་བརྩེགས་པར་གསུངས་པ་གང་ཡིན་པ་དབུས་མཐའ་རྣམ་འབྱེད་ཀྱི་འགྲེལ་པར་གསལ་བར་མཛད་པ་ཡང༌། གང་ཟག་དང་ཆོས་དེ་གཉིས་ཡོད་དོ། །ཞེས་བྱ་བ་ནི་[ཆོས་འདུས་བྱས་རྣམས་གཤིས་ལ་ཡོད་པར་ཁས་བླངས་ན་རྟག་པར་ཁས་བླངས་པར་འགྱུར་བས་མི་རྟག་པ་ལ་]རྟག་པ[ར་ལྟ་བ]འི་མཐའོ། །[ཐམས་ཅད་]མེད་དོ་ཞེས་བྱ་བ་ནི་[དོན་དམ་གྱི་བདག་ཉིད་ཀྱང་མེད་པར་ཁས་བླངས་པར་འགྱུར་བས་མ་ཆད་པ་ལ་]ཆད་པ[ར་ལྟ་བ]འི་མཐའོ། །དེ་[གཉིས་]ཡོངས་སུ་སྤངས་པའི་ཕྱིར་དབུ་མའི་ལམ་སྟེ། མཐའ་དེ་གཉིས་ཀྱི་དབུས་[གང་ཟག་དང་ཆོས་ཀྱི་བདག་ཡོད་པ་མ་ཡིན་ལ། བདག་ཉིད་ཆེན་པོའི་བདག་མེད་པ་མ་ཡིན་པས་ཕུང་པོ་གསུམ་པ་]གང་ཡིན་[པ་དོན་དམ་བདེན་]པའོ།།ཞེས་གསུངས་ཏེ། འདིས་ནི་ཁ་ཅིག་མཐའ་དང་བྲལ་བའི་དབུས་མ་གྲུབ་པར་འདོད་པ་བསལ་བ་ཡིན་ནོ། །དེ་བཞིན་དུ་གཞན་དག་དབུས་མི་འདོད་པར་དབུ་མ་འདོད་པ་ཡང་འཁྲུལ་ཏེ། འདིར་[སྐད་དོད་]མ་དྷྱ་ཞེས་པའི་སྒྲའི་དོན་ནང་ངམ། བར་རམ། དབུས་ཡིན་པས། ཟབ་མོ་ཆོས་ཀྱི་དབྱིངས་ནི་མཐའ་གང་ཡང་མ་ཡིན་གྱི་དབུས་མའམ་བར་མ་[འམ་ནང་]ཡིན་ཞེས་པའི་དོན་ཏེ། ཕུངཔོ་གསུམ་པར་གསུངས་པའི་དོན་ཡང་དེ་ཡིན་ལ། མ་ནིང་གི་གོ་འཕང་དུ་གསུངས་པའི་དོན་ཡང་དེ་ཡིན་ཞིང༌། འཇིག་རྟེན་དཔེ་ལས་འདས་པའི་དོན་ཡང་དེ་ཡིན་ཏེ། འགལ་འདུས་སྐྱོན་མེད་དང༌། དངོས་འགལ་གྱི་ཕུང་གསུམ་ནི་ཀུན་རྫོབ་བདེན་པ་ལ་མི་སྲིད་པའི་ཕྱིར་རོ། །[དབུ་མ་ཆེན་པོའི་གཞུང་]དབུས་མཐའ་རྣམ་འབྱེད་རྩ་འགྲེལ་དུ་ཡང༌། དབུས་[མ་དོན་དམ་ནི་མཐའ་མ་ཀུན་རྫོབ་ལས་]རྣམ་[པར་]འབྱེད་པའི་བསྟན་བཅོས་ཏེ། དབུ་མའི་ལམ་རབ་ཏུ་སྟོན་པའི་ཕྱིར་རོ། །འདི་ནི་དབུས་[དངོས་པོ་ཡོད་མེད་ལས་འདས་པའི་དོན་དམ་]དང་མཐའ་[དངོས་པོ་ཡོད་མེད་ལས་མ་འདས་པ་ཀུན་རྫོབ་དག་]རྣམ་པར་འབྱེད་པ་ཡང་ཡིན་ཏེ། དབུས་[དོན་དམ་]དང་མཐའ་[ཀུན་རྫོབ་]གཉིས་རབ་ཏུ་[ཕྱེ་ནས་]སྟོན་པའི་ཕྱིར་རོ། །ཡང་ན་ཐོག་མ་དང་ཐ་མ་སྤངས་པའི་དབུས་རབ་ཏུ་སྟོན་པའི་ཕྱིར་རོ། །ཞེས་གསུངས་ཤིང༌། བཅོམ་ལྡན་འདས་འཇིག་རྟེན་དབང་ཕྱུག་གི་ཞལ་སྔ་ནས་ཀྱང༌། [དངོས་པོ་ཡོད་མེད་ལས་འདས་པའི་དོན་དམ་]རྣམ་པ་ཐམས་ཅད་པ་ནམ་མཁའ་ལས་[རང་]བྱུང་བ་ཀུན་ཏུ་བཟང་པོ་དབང་པོ་ཐམས་ཅད་པ་སེམས་ཅན་[གཞན་]ཐམས་ཅད་ཀྱི་བདག་ཉིད་དུ་གནས་པ་[རང་བཞིན་]ལྷན་ཅིག་སྐྱེས་པའི་དགའ་བ་གཏན་ཚིགས་དང་དཔེ་སྤངས་པ་འདི་ཡི་དཔེར་[རུང་བ་ཚོལ་ན་]དངོས་པོ་དང་དངོས་པོ་མེད་པ་གཅིག་པ་ཉིད་[ཀུན་རྫོབ་བདེན་པ་ལ་སྲིད་ན་དེ་རུང་བར་]འགྱུར་ཏེ་[དོན་དམ་ནི་]ཆོས་མི་མཐུན་[པ་གཉིས་འདུས་ཀྱང་སྐྱོན་མེད་]པའི་ཕྱིར་རོ། །དཔེར་ན་འཇིག་རྟེན་པའི་དཔེ་བུམ་པ་དང་ཆོས་མི་མཐུན་པའི་ཕྱིར་ནམ་མཁའི་མེ་ཏོག་ནི་མེད་པ་ཐམས་ཅད་ཀྱིས་མེད་དོ། །དེ་བཞིན་དུ་ནམ་མཁའི་མེ་ཏོག་དང་ཆོས་མི་མཐུན་པའི་ཕྱིར་བུམ་པ་ནི་དངོས་པོ་ཐམས་ཅད་ཀྱིས་ཡོད་དོ། །ཞེས་འདི་གཉིས་ཕན་ཚུན་ཆོས་མི་མཐུན་པའི་ཕྱིར་[དེ་གཉིས་གཅིག་ཏུ་འདུས་པ་སྲིད་ན་དོན་དམ་གྱི་]དཔེར་འགྱུར་རོ། །དེ་བཞིན་དུ་ཆད་པ་དང་ཆོས་མི་མཐུན་པའི་ཕྱིར་སྲིད་པ་ནི་དངོས་པོ་ཐམས་ཅད་ཀྱིས་ཡོད་དོ། །སྲིད་པ་དང་ཆོས་མི་མཐུན་པའི་ཕྱིར་ཆད་པ་ནི་མེད་པ་ཐམས་ཅད་ཀྱིས་མེད་དོ། །ཆད་པའི་སྒྲས་ནི་མྱ་ངན་ལས་འདས་པ་[ཉན་རང་ལ་གྲགས་པ་མར་མེ་ཤི་བ་དང་མཚུངས་པ་ལྟ་བུ་]དངོས་པོ་མེད་པའི་མཚན་ཉིད་དོ། །[དེ་དག་གིས་ནི་འཁོར་འདས་དབྱེར་ཡོད་ཀྱང་བསྟན་ཏོ།།]དེ་བཞིན་དུ་[གདོད་ནས་རང་བཞིན་གྱིས་]འཇིག་རྟེན་ལས་འདས་པ[དོན་དམ་པ]འི་དཔེར་[འོས་པ་ཚོལ་ན་]བུམ་པ་དང་ནམ་མཁའི་མེ་ཏོག་འདི་གཉིས་གཅིག་པ་ཉིད་[སྲིད་ན་དེ་འོས་པར་]འགྱུར་ཏེ་[དོན་དམ་ནི་]ཆོས་མི་མཐུན་[པ་འདུས་པ་འགལ་འདུས་སྐྱོན་མེད་ཡིན་]པའི་ཕྱིར་རོ། །བུམ་པ་དང་ནམ་མཁའི་མེ་ཏོག་འདི་དག་འཇིག་རྟེན་ཀུན་རྫོབ་ཏུ་གཅིག་པ་ཉིད་མེད་དེ་ཕན་ཚུན་འགལ་བ[འདུས་པ་ཀུན་རྫོབ་བདེན་པ་ལ་མི་སྲིད་པ]འི་ཕྱིར་རོ། །ཞེས་དང༌། འཇིག་རྟེན་པའི་དཔེ་ལས་འདས་པ་ཉིད་ཀྱི་ཕྱིར། སེམས་གང་[གཤིས་ལ་]ཡོད་པའི་སེམས་[རང་བཞིན་འོད་གསལ་]དེ་ནི་[གློ་བུར་བའི་]སེམས་[སུ་]མེད་པ་རྟག་པ་དང་ཆད་པའི་ཆོས་ཀྱི་མཚན་ཉིད་དང་བྲལ་བ་[དོན་དམ་གྱི་]སྟོང་པ་ཉིད་དང་སྙིང་རྗེ་དབྱེར་མེད་[པས་དབྱིངས་རིག་དབྱེར་མེད་]པའོ། །ཞེས་དེ་ཁོ་ན་ཉིད་ཟབ་མོ་ནི་ཡོད་མེད་ཀྱི་དབུས་སམ་ཕུང་པོ་གསུམ་པ་ཡིན་པ་ཉིད་ཀྱིས་དེའི་དཔེ་འཇིག་རྟེན་དུ་མི་སྲིད་པར་གསུངས་པ་དང་དོན་གཅིག་པ་ཉིད་དུ་རིག་པར་བྱའོ། །