ཐོབ་བྱ་དེ་ཉིད་ཕྱི་ནང་ཀུན་རྫོབ་འདི་ལས་གཞན་མཆོག་ཕ་རོལ་ཡིན་པར་བསྟན་པ།
གདོད་ནས་སྒྲིབ་བྲལ་དབྱེར་མེད་རོ་མཉམ་ཆོས་ཉིད་རྣམ་པ་ཐམས་ཅད་པའི་ཕུང་པོ་ཁམས་སོགས་དེ་རྣམས་ནི་ཕྱི་ནང་ཀུན་རྫོབ་ཀྱི་ཕུང་པོ་ཁམས་སོགས་[འདི་]ལས་གཞན་ནམ་མཆོག་གམ་ཕ་རོལ་ཡིན་ནོ། །དེ་ཡང་རྩ་རྒྱུད་འབུམ་ལྔར། [ཀུན་རྫོབ་ཀྱི་]རྒྱུ་དང་འབྲས་བུ་[གདོད་ནས་]འགགས་པ་ཡིས། །[དེའི་གཞི་ནི་]སངས་རྒྱས་ཉིད་དུ་ཐེ་ཚོམ་མེད། །[མཐར་ཐུག་གི་སངས་རྒྱས་ནི་]རྡུལ་མེད་རྡུལ་བྲལ་དྲི་མ་མེད། །ཉེས་པ་སྤངས་པ་སྐྱོན་མེད་པ། །[ཡེ་ཤེས་]ཤིན་ཏུ་སད་པ་[ཡང་ཡིན་ལ་]སད་པས་བདག [ཀྱང་ཡིན་ཞིང༌།]། ཀུན་ཤེས་ཀུན་རིག་དམ་པ་པོ[འང་ཡིན་ནོ]། །[ཀུན་རྫོབ་ཀྱི་]རྒྱུ་དང་འབྲས་བུ་[གདོད་ནས་]འགགས་པ་ཡིས། །རྒྱལ་བའི་དབང་པོའི་སྐུ་[ཀུན་རྫོབ་ལས་]གཞན་[ནམ་མཆོག་]ཡིན། །སྐུ་གསུང་ཐུགས་དང་བདེ་བ[འང་ཀུན་རྫོབ་ལས་]གཞན[ནམ་མཆོག]། །[དོན་དམ་གྱི་]ཕུང་པོའི་ཚོགས་ནི་[ཀུན་རྫོབ་འདི་ལས་]གཞན་ཡིན་ཏེ། །[དོན་དམ་གྱི་]ས་ཡི་ཁམས་ལ་སོགས་པ་[ཀུན་རྫོབ་འདི་ལས་]གཞན[ཡིན་ཞིང་]། །[དོན་དམ་གྱི་]ཡུལ་དང་དབང་པོ་རྣམས་དང་ནི། །དེ་བཞིན་[དོན་དམ་གྱི་]ལས་ཀྱི་དབང་པོ་དང༌། །[དོན་དམ་གྱི་]ལས་ཀྱི་དབང་པོའི་བྱ་བ་[ཀུན་རྫོབ་འདི་ལས་]གཞན[ཡིན་ལ]། །[དེ་ཡང་དབང་པོ་ཐམས་ཅད་པའམ་ཀུན་ནས་པ་ཡིན་པས་]ཀུན་ནས་ཕྱག་དང་[ཀུན་ནས་]ཞབས་ལ་སོགས། །ཀུན་ནས་སྤྱན་དང་[ཀུན་ནས་]ཞལ་དང་[ཀུན་ནས་]དབུ། །ཀུན་ནས་ཐོས་ལྡན་འཇིག་རྟེན་དུ། །ཐམས་ཅད་དུ་ནི་[ནམ་མཁའ་ལྟར་]ཁྱབ་པར་བཞུགས། །ཞེས་རྒྱུ་འབྲས་ཀྱིས་བསྡུས་པའི་ཕུང་པོ་རང་སྟོང་དུ་གནས་པ་འདི་རྣམས་འགགས་པས་ཕུང་པོ་གཞན་ལ་སོགས་པ་ཐོབ་པར་གསུངས་པ་འདིས་ཀྱང་རང་སྟོང་ལས་གཞན་པའི་ཕུང་པོ་ཁམས་སོགས་[གཤིས་ལ་]ཡོད་པར་གསུངས་ལ། དེ་རྣམས་སྟོང་པ་ཉིད་དུ་ཡང་གསུངས་པའི་ཕྱིར་རང་སྟོང་ལས་གཞན་པའི་སྟོང་ཉིད་ལེགས་པར་གྲུབ་ཅིང་དེ་ཡང་དོན་དམ་གཞན་སྟོང་ཡིན་ནོ། །དེ་ཉིད་ཀུན་ནས་ཕྱག་དང་ཞབས་ལ་སོགས་ཞེས་སོགས་ཀྱིས་ཐབས་ཤེས་[རབ་]ཟུང་འཇུག་དབྱེར་མེད་ཡེ་ཤེས་ཀྱི་སྐུ་དབང་པོ་ཐམས་ཅད[པའམ་ཀུན་ནས་]པར་བསྟན་ཅིང༌། དེ་ཉིད་ཀུན་ཁྱབ་ཏུ་བཞུགས་པར་ཡང་བསྟན་ཏེ། དེ་ནི་གཙང་བདག་བདེ་དང་རྟག་པར་[ཡང་ཡང་མདོ་མང་པོར་]གསུངས་པའི་ཆོས་སྐུ་མྱ་ངན་ལས་འདས་པ་ཆེན་པོ་དང་གཅིག་གོ །དོན་དེ་རྣམས་ཉིད། བློ་གྲོས་མི་ཟད་པས་བསྟན་པའི་མདོར་ཡང་གསུངས་ཏེ། ཇི་སྐད་དུ། ཆོས་ཀྱི་དབྱིངས་སའི་ཁམས་[གཞན་]ཡིན་མོད་ཀྱི་ཆོས་ཀྱི་དབྱིངས་སྲ་བའི་མཚན་ཉིད་ནི་མ་ཡིན་[པས་འགལ་འདུས་སྐྱོན་མེད་ཡིན་]ནོ། །ཆོས་ཀྱི་དབྱིངས་ཆུའི་ཁམས་[གཞན་]ཡིན་མོད་ཀྱི་ཆོས་ཀྱི་དབྱིངས་བརླན་པའི་མཚན་ཉིད་ནི་མ་ཡིན་[པས་འགལ་འདུས་སྐྱོན་མེད་ཡིན་]ནོ། །ཆོས་ཀྱི་དབྱིངས་མེའི་ཁམས་[གཞན་]ཡིན་མོད་ཆོས་ཀྱི་དབྱིངས་སྨིན་པར་བྱེད་པའི་མཚན་ཉིད་ནི་མ་ཡིན་[པས་འགལ་འདུས་སྐྱོན་མེད་ཡིན་]ནོ། །ཆོས་ཀྱི་དབྱིངས་རླུང་གི་ཁམས་[གཞན་]ཡིན་མོད་ཀྱི་ཆོས་ཀྱི་དབྱིངས་གཡོ་བའི་མཚན་ཉིད་ནི་མ་ཡིན་[པས་འགལ་འདུས་སྐྱོན་མེད་ཡིན་]ནོ། །ཆོས་ཀྱི་དབྱིངས་མིག་གི་ཁམས་[གཞན་]ཡིན་མོད་ཀྱི་ཆོས་ཀྱི་དབྱིངས་ལྟ་བའི་མཚན་ཉིད་ནི་མ་ཡིན་[པས་འགལ་འདུས་སྐྱོན་མེད་ཡིན་]ནོ། །ཆོས་ཀྱི་དབྱིངས་རྣ་བ་དང་སྣ་དང་ལྕེ་དང་ལུས་དང་ཡིད་དང་མིག་གི་རྣམ་པར་ཤེས་པ་དང༌། རྣ་བའི་རྣམ་པར་ཤེས་པ་དང༌། སྣའི་རྣམ་པར་ཤེས་པ་དང༌། ལྕེའི་རྣམ་པར་ཤེས་པ་དང༌། ལུས་ཀྱི་རྣམ་པར་ཤེས་པ་དང༌། ཡིད་ཀྱི་རྣམ་པར་ཤེས་པའི་ཁམས་[གཞན་]ཡིན་མོད་ཀྱི། ཆོས་ཀྱི་དབྱིངས་[གྲངས་བཞིན་དུ་]ཉན་པ་དང་སྣོམ་པ་དང་མྱང་བར་བྱེད་པ་དང་ནོམ་པ་དང༌། རྣམ་པར་རིག་པ་དང༌། གཟུགས་རྣམ་པར་རིག་པ་དང༌། སྒྲ་རྣམ་པར་རིག་པ་དང༌། དྲི་རྣམ་པར་རིག་པ་དང༌། རོ་རྣམ་པར་རིག་པ་དང༌། རེག་བྱ་རྣམ་པར་རིག་པ་དང༌། ཆོས་རྣམ་པར་རིག་པ་ཙམ་གྱི་མཚན་ཉིད་ནི་མ་ཡིན་[པས་འགལ་འདུས་སྐྱོན་མེད་ཡིན་]ནོ། །ཆོས་ཀྱི་དབྱིངས་གཟུགས་ཀྱི་ཁམས་དང་སྒྲ་དང་དྲི་དང་རོ་དང་རེག་བྱ་དང་ཆོས་ཀྱི་ཁམས་[གཞན་]ཡིན་མོད་ཀྱི་མིག་གི་རྣམ་པར་ཤེས་པ་དང༌། རྣ་བ[འི་རྣམ་པར་ཤེས་པ་]དང་སྣ[འི་རྣམ་པར་ཤེས་པ་]དང༌། ལྕེ[འི་རྣམ་པར་ཤེས་པ་]དང༌། ལུས་[ཀྱི་རྣམ་པར་ཤེས་པ་]དང༌། ཡིད་ཀྱི་རྣམ་པར་ཤེས་པས་རྣམ་པར་རིག་པར་བྱ་བའི་མཚན་ཉིད་ནི་མ་ཡིན[པས་འགལ་འདུས་སྐྱོན་མེད་ཡིན་]ནོ། །ཞེས་སོགས་རྒྱས་པར་སོ་སོར་སྦྱར་བས་མདོ་དེ་ཉིད་བལྟ་དགོས་[ཏེ་འདིར་ནི་བསྡུས་ནས་བརྗོད་པས་]སོ། །དེ་བཞིན་དུ། དཔལ་རྙོག་པ་མེད་པའི་རྒྱུད་དུ་ཡང༌། ཕུང་པོ་གཞན་[དང་ཁམས་གཞན་ལ་]སོགས་[ཡེ་ཤེས་ཀྱིས་]མཐོང་བའི་ཕྱིར། །[དོན་དམ་གྱི་]ཚོགས་ཀྱི་དཀྱིལ་འཁོར་[མཁའ་ཁྱབ་]ཞེས་བྱར་གསུངས། །ཞེས་དང༌། ཡེ་ཤེས་ལེའུར་ཡང༌། [དོན་དམ་]རྡོ་རྗེ་སེམས་དཔའ་གཅིག་པུ་[མཁའ་ཁྱབ་]འདི་ནི་དུས་མཐའི་སྤྲིན་དང་མཚུངས་པ་ཧེ་རུ་ཀར་ནི་བྱུང་བར་གྱུར[པ]། །གདུག་པ་རྣམས་ནི་སྨིན་པའི་དོན་ཏེ་དེ་ཡང་དམ་ཚིག་རྒྱལ་བ་རྨོངས་པ་རྣམས་ནི་བདེ་བའི་དོན། །རིན་ཆེན་དབང་པོ་སྡུག་བསྔལ་ལྡན་པ་རྣམས་ཀྱི་དེ་ཡང་པད་འཛིན་ཆགས་ཅན་རྣམས་ཀྱི་ཆགས་པའི་སླད། །བགེགས་རྣམས་དག་ནི་གཞོམ་པའི་དོན་དུ་ཕྱག་གི་པད་མ་རལ་གྲི་དོན་ཡོད་གྲུབ་པར་བྱུང་བར་གྱུར། །ཞེ་སྡང་ལས་ནི་སྣ་ཚོགས་ཡུམ་གང་དུས་མཐའི་རྩེ་མོ་ཅན་མཚུངས་དེ་ནི་མཁའ་འགྲོ་མར་བྱུང་གྱུར། །གཏི་མུག་དག་ལས་སྤྱན་མ་ཞེས་བྱ་མཆོག་གི་སྙིང་རྗེ་མཱ་མ་ཀཱི་ནི་ང་རྒྱལ་རྒྱུ་ལས་སོ། །ཆགས་ལས་དེ་ནི་གོས་དཀར་ཞེས་བྱ་མཐའ་དག་ཡོན་ཏན་གཏེར་ཏེ་སྒྲོལ་མ་ཡང་ནི་ཕྲག་དོག་ལས། །སྣ་ཚོགས་གཟུགས་ཅན་གཉིས་པོ་འདི་དག་ཡུལ་དང་ཡུལ་ཅན་གཞན་རྣམས་ཐམས་ཅད་དུ་ཡང་བྱུང་བར་གྱུར། །ཅེས་པའི་འགྲེལ་པར། སྔར་གསུངས་པའི་རྡོ་རྗེ་སེམས་དཔའ་དེ་ཉིད་གཅིག་པུ་འདི་ནི་དུས་མཐའི་སྤྲིན་དང་མཚུངས་པ་ནག་པོའི་ཧེ་རུ་ཀར་ནི་བྱུང་བར་གྱུར[པ]། །འཕོ་བ་མེད་པའི་ཆོས་ཀྱིས་རྣམ་པར་ཤེས་པ་གཞན་[འགོག་བདེན་གྱི་རྣམ་ཤེས་]དེ་ནི་ཧེ་རུ་ཀ་[མཁའ་ཁྱབ་]སྟེ་དེ་ཡང་གདུག་པ་རྣམས་ནི་སྨིན་པའི་དོན་དུ་རྡོ་རྗེ་སེམས་དཔས་སྤྲོས་པ་[ཡང་ཡིན་ལ་སྤྲོས་མེད་ཀྱང་ཡིན་པས་འགལ་འདུས་སྐྱོན་མེད་པ]འོ། །[དོན་དམ་]རྡོ་རྗེ་སེམས་དཔའ་དེ་ཡང་རྨོངས་པ་རྣམས་སྨིན་པའི་དོན་དུ་གཟུགས་གཞན་[འགོག་བདེན་གྱི་གཟུགས་]དེ་ནི་དམ་ཚིག་རྒྱལ་བ་སྟེ་རྣམ་པར་སྣང་མཛད་[མཁའ་ཁྱབ་]དུ་བྱུང་བར་གྱུར་ཏོ། །[དོན་དམ་རྡོ་རྗེ་སེམས་དཔའ་]དེ་ཡང་རིན་ཆེན་དབང་པོ་ནི་སྡུག་བསྔལ་ལྡན་པ་རྣམས་ལ་[བདེ་བ་]སྦྱིན་པའི་དོན་ཏེ་འཕོ་བ་མེད་པའི་ཆོས་ཀྱི་ཚོར་བ་གཞན་[འགོག་བདེན་གྱི་ཚོར་བ་]དེ་ནི་སྡུག་བསྔལ་ཐམས་ཅད་འཕྲོག་པར་བྱེད་པ་རིན་ཆེན་འབྱུང་ལྡན་[མཁའ་ཁྱབ་]དུ་བྱུང་བར་གྱུར་ཏོ། །[དོན་དམ་རྡོ་རྗེ་སེམས་དཔའ་]དེ་ཡང་པད་འཛིན་ཆགས་ཅན་རྣམས་ཀྱི་ཆགས་པའི་སླད་དུ་སྟེ་འཕོ་བ་མེད་པའི་ཆོས་ཀྱི་འདུ་ཤེས་གཞན་[འགོག་བདེན་གྱི་འདུ་ཤེས་]གང་ཡིན་པ་དེ་ནི་འཕོ་བ་མེད་པའི་བདེ་བ་སྟེར་བར་བྱེད་པ་པོ་[མཁའ་ཁྱབ་]སྣང་བ་མཐའ་ཡས་སུ་བྱུང་བར་གྱུར་ཏོ། །[དོན་དམ་རྡོ་རྗེ་སེམས་དཔའ་]དེ་ཡང་བགེགས་རྣམས་རྣམ་པར་གཞོམ་པའི་དོན་དུ་ཕྱག་གི་པད་མ་རལ་གྲི་སྟེ་འཕོ་བ་མེད་པའི་ཆོས་ཀྱི་འདུ་བྱེད་གཞན་[འགོག་བདེན་གྱི་འདུ་བྱེད་]གང་ཡིན་པ་དེ་དག་རྣམས་སེམས་སྒྲིབ་པ་མེད་པར་བྱེད་ཅིང་བདུད་ལ་སོགས་པའི་སྒྲིབ་པ་རྣམ་པར་འཇོམས་པར་བྱེད་པ་དོན་ཡོད་གྲུབ་པར་[མཁའ་ཁྱབ་]བྱུང་བར་གྱུར་ཏོ། །ཞེས་པ་སྟེ། [དོན་དམ་གྱི་]སངས་རྒྱས་[མཁའ་ཁྱབ་]ལྔ་[གདོད་ནས་]རྣམ་པར་དག་པའོ། །ད་ནི་[དོན་དམ་གྱི་]ཁམས་[མཁའ་ཁྱབ་]ལྔ་རྣམས་གསུངས་པ། ཞེ་སྡང་ཞེས་པ་ལ་སོགས་པ་སྟེ་འདིར་ཐ་མལ་པའི་ཞེ་སྡང་[གདོད་ནས་]ཟད་པའི་[གཞི་]ཞེ་སྡང་ཆེན་པོ་[མཁའ་ཁྱབ་]ལས་ཤེས་རབ་ཀྱི་ཕ་རོལ་ཏུ་ཕྱིན་མ་སྟོང་པ་ཉིད་རྣམ་པ་ཐམས་ཅད་པ་སྣ་ཚོགས་ཡུམ་[མཁའ་ཁྱབ་]གང་ཡིན་པ་དེ་ནི་རྡོ་རྗེ་དབྱིངས་ཀྱི་དབང་ཕྱུག་མ་རྡོ་རྗེ་མཁའ་འགྲོ་མར་བྱུང་བར་གྱུར་ཏོ། །དེ་བཞིན་དུ་[ཐ་མལ་པའི་]གཏི་མུག་[གདོད་ནས་]ཟད་པའི་[གཞྀ་]གཏི་མུག་ཆེན་པོ་[མཁའ་ཁྱབ་]ལས་སྤྱན་མའོ། །མཆོག་གི་སྙིང་རྗེ་མཱ་མ་ཀཱི་ནི་[ཐ་མལ་པའི་]ང་རྒྱལ་[གདོད་ནས་]ཟད་པའི་[གཞྀ་]ང་རྒྱལ་ཆེན་པོའི་རྒྱུ་ལས་བྱུང་བར་གྱུར་ཏོ། །[ཐ་མལ་པའི་]ཆགས་པ་[གདོད་ནས་]ཟད་པའི་[གཞྀ་]ཆགས་པ་ཆེན་པོ་[མཁའ་ཁྱབ་]ལས་དེ་ནི་གོས་དཀར་མོ[མཁའ་ཁྱབ་]འོ། །[ཐ་མལ་པའི་]ཕྲག་དོག་[གདོད་ནས་]ཟད་པའི་[གཞི་]ཕྲག་དོག་ཆེན་པོ་[མཁའ་ཁྱབ་]ལས་དེ་ནི་མཐའ་དག་ཡོན་ཏན་གཏེར་གྱུར་སྒྲོལ་མར་བྱུང་བར་གྱུར་ཏེ། དེ་ལྟར་[དེ་བཞིན་གཤེགས་མ་ལྔ་ནི་]ནམ་མཁའི་ཁམས་གཞན་དང་སའི་ཁམས་གཞན་དང་ཆུའི་ཁམས་གཞན་དང་མེའི་ཁམས་གཞན་དང་རླུང་གི་ཁམས་གཞན་ནོ། །ཞེས་པ་[འགོག་བདེན་གྱི་]ཁམས་ཀྱི་མཚན་ཉིད་དེ་སྒྲིབ་པ་[གདོད་ནས་]མེད་པའི་གཟུགས་དང་མི་འཕོ་བའི་བདེ་བ་ལས་[སྤྲོས་]སོ། །ཞེས་གྲུབ་བོ། །[དོན་དམ་]དུས་ཀྱི་འཁོར་ལོ་དང་སྣ་ཚོགས་ཡུམ་ཐབས་དང་ཤེས་རབ་གཅིག་ཏུ་[གདོད་ནས་]འདྲེས་པར་གྱུར་པ་སྣ་ཚོགས་གཟུགས་ཅན་[སྟོང་ཆེན་བདེ་ཆེན་]གཉིས་པོ་འདི་དག་ནི་ཡུལ་[གཞན་]དང་ཡུལ་ཅན་གཞན་རྣམས་ཐམས་ཅད་དུ་ཡང་བྱུང་བར་གྱུར་ཏེ་[འགོག་བདེན་གྱི་]དྲི་ལ་སོགས་པ་ཡུལ་གཞན་དེ་དག་[སེམས་དཔའ་དྲུག་]རྣམས་དང་[འགོག་བདེན་གྱི་]རྣ་བ་ལ་སོགས་པ་ཡུལ་ཅན་གཞན་དེ་དག་[སེམས་མ་དྲུག་]རྣམས་དང༌། [འགོག་བདེན་གྱི་]ངག་དང་ལག་པ་ལ་སོགས་པ་[ལས་ཀྱི་དབང་པོ་]གཞན་[ཁྲོ་བོ་དྲུག་]རྣམས་དང༌། [འགོག་བདེན་གྱི་]ལས་ཀྱི་དབང་པོའི་བྱ་བ་ལ་སོགས་པ་གཞན་[ཁྲོ་མོ་དྲུག་]རྣམས་ཏེ། དེ་ལྟར་ན་[འགོག་བདེན་གྱི་ལྷ་ཐམས་ཅད་ནི་]ཀུན་ནས་ཕྱག་དང་[ཀུན་ནས་]ཞབས་ལ་སོགས། །ཀུན་ཏུ་སྤྱན་དང་[ཀུན་ནས་]དབུ་དང་[ཀུན་ནས་]ཞལ། །ཀུན་ཏུ་ཐོས་ལྡན་འཇིག་རྟེན་དུ།།ཐམས་ཅད་ཁྱབ་པར་བྱས་ཏེ་བཞུགས[པ་ནི]། །རྡོ་རྗེ་སེམས་དཔའོ་ཞེས་སོ། །དེ་ལྟར། [འགོག་བདེན་དོན་དམ་ནི།]བདག་རིག་གཞན་རིག་[རྣམ་པ་དང་དབང་པོ་]ཐམས་ཅད་པ། །ཀུན་ལ་ཕན་པའི་གང་ཟག་མཆོག[གམ་གཞན་འགལ་འདུས་སྐྱོན་མེད་ཡིན་པས།]།འཇིག་རྟེན་དཔེ་ལས་འདས་པ་སྟེ། །[འགོག་བདེན་གྱི་]ཤེས་དང་ཤེས་བྱའི་བདག་པོ་མཆོག །ཅེས་དང༌། སྒྲུབ་ཐབས་ལེའུར་ཡང༌། འདིར་ཀུན་རྫོབ་ཀྱི་ཆོས་[གདོད་ནས་]འགགས་པར་གྱུར་པ་ན་གཞན་འདུ་བྱེད་[མཁའ་ཁྱབ་]ལ་སོགས་པ་དེ་དག་རྣམས་སོ། །དེས་ན་[འགོག་བདེན་གྱི་]འདུ་བྱེད་[གདོད་ནས་]རྣམ་པར་དག་པ[འི་གཞི་]ནི་དོན་ཡོན་གྲུབ་པ་[མཁའ་ཁྱབ་]སྟེ་[དེ་གང་ཟག་གིས་ཐོབ་པ་ནི་]འདུ་བྱེད་ཀྱི་སྒྲིབ་པ་[ལམ་བདེན་གྱིས་]ཟད་པས་སོ། །[ལམ་དང་བྲལ་ན་ནི་སངས་རྒྱས་བཞུགས་ཀྱང་མི་ཐོབ་སྟེ་འདི་ནི་སྐབས་ཐམས་ཅད་དུ་དྲན་དགོས་སོ། །འགོག་བདེན་གྱི་]ཚོར་བ་ནི་དྲི་མེད་ནོར་བུའི་ཕྱག་ཅེས་པ་རིན་ཆེན་འབྱུང་ལྡན་[མཁའ་ཁྱབ་]ཏེ་དང་ཡིག་ནི་སྡུད་པའི་དོན་ཏོ། །དེ་བཞིན་དུ་[འགོག་བདེན་གྱི་]འདུ་ཤེས་ནི་སྣང་བ་མཐའ་ཡས་སོ། །[འགོག་བདེན་གྱི་]གཟུགས་ཀྱི་ཕུང་པོ་ནི་འཁོར་ལོ་ཅན་ཞེས་པ་[མཁའ་ཁྱབ་]རྣམ་པར་སྣང་མཛད་དོ།།[ཕུང་པོ་གཞན་]འདི་དག་ནི་སླར་ཡང་མི་བསྐྱོད་པ་ལ་སོགས་པ་སྟེ། རི་བོང་ཅན་ཞེས་པ་ཁུ་བ་[གཞན་]དང༌། སྟོབས་ཞེས་བྱ་བ་ཤ་[གཞན་]དང་ཁྲག་[གཞན་]དང་གཅི་བ་[གཞན་]དང་བཤང་བ་[གཞན་]སྟེ་འདི་རྣམས་[གདོད་ནས་]རྣམ་པར་དག་ཅིང་སྒྲིབ་པ་[གདོད་ནས་]མེད་པས་[འགོག་བདེན་གྱི་]རྣམ་པར་ཤེས་པ་ལ་སོགས་པའི་ཕུང་པོ[གཞན་]ལྔ་[གདོད་ནས་]རྣམ་པར་དག་པར་འགྱུར་རོ། །དེ་བཞིན་དུ་[འགོག་བདེན་གྱི་]ལྷ་མོ་དྲུག་ཅེས་པ་སྣ་ཚོགས་ཡུམ་[མཁའ་ཁྱབ་]དང༌། རྡོ་རྗེ་དབྱིངས་ཀྱི་དབང་ཕྱུག་མ་[མཁའ་ཁྱབ་]དང༌། སྒྲོལ་མ་[མཁའ་ཁྱབ་]དང༌། གོས་དཀར་མོ་[མཁའ་ཁྱབ་]དང༌། མཱ་མ་ཀཱི་[གདོད་ནས་]དང༌། སྤྱན་མ་[མཁའ་ཁྱབ་]སྟེ་ཁམས་[གཞན་]རྣམས་ཀྱིས་ཞེས་པ་[ཀུན་རྫོབ་ཀྱི་]ཡེ་ཤེས་དང་ནམ་མཁའ་དང་རླུང་དང་མེ་དང་ཆུ་དང་སའི་ཁམས་རྣམས་[གདོད་ནས་]འགགས་པས་གཞན་[འགོག་བདེན་གྱི་]ཁམས་[དྲུག་པོ་]དེ་དག་རྣམས་[གདོད་ནས་]རྣམ་པར་དག་པར་འགྱུར་རོ། །ཡུལ་དང་ཡུལ་ཅན་རྣམས་ཀྱིས་ཞེས་པ་[འགོག་བདེན་གྱི་]གཟུགས་ལ་སོགས་པ་ཡུལ་དྲུག་དང་[འགོག་བདེན་གྱི་]མིག་ལ་སོགས་པ་ཡུལ་ཅན་[གདོད་ནས་]རྣམ་པར་དག་པ་རྣམས་ཀྱིས་གཞན་གཟུགས་ལ་སོགས་པ་དེ་རྣམས་དང་གཞན་མིག་ལ་སོགས་པ་དེ་རྣམས་[གདོད་ནས་]རྣམ་པར་དག་པ་ནི། [འགོག་བདེན་གྱི་]གཟུགས་རྡོ་རྗེ་མ་[མཁའ་ཁྱབ་]ལ་སོགས་པ་[དྲུག་]རྣམས་དང་ལྷན་ཅིག་ཏུ་[འགོག་བདེན་གྱི་]སའི་སྙིང་པོ་[མཁའ་ཁྱབ་]ལ་སོགས་པ་[དྲུག་]སྟེ་[འགོག་བདེན་གྱི་]བྱང་ཆུབ་སེམས་དཔའ་ཕྱག་རྒྱར་བཅས་པ་དག་པའོ། །[འགོག་བདེན་གྱི་]ཁྲོ་བོ་ལྔ་ནི་[འགོག་བདེན་གྱི་]སྟོབས་རྣམས་ཀྱིས་ཞེས་པ་[འགོག་བདེན་གྱི་]དད་པའི་སྟོབས་[མཁའ་ཁྱབ་]དང༌།[འགོག་བདེན་གྱི་]བརྩོན་འགྲུས་ཀྱི་སྟོབས་[མཁའ་ཁྱབ་]དང༌། [འགོག་བདེན་གྱི་]དྲན་པའི་སྟོབས་[མཁའ་ཁྱབ་]དང་[འགོག་བདེན་གྱི་]ཏིང་ངེ་འཛིན་གྱི་སྟོབས་[མཁའ་ཁྱབ་]དང༌།[འགོག་བདེན་གྱི་]ཤེས་རབ་ཀྱི་སྟོབས་[མཁའ་ཁྱབ་]ཏེ་དད་པ་མེད་པ་དང༌། བརྩོན་འགྲུས་མེད་པ་དང༌། དྲན་པ་མེད་པ་དང༌། ཏིང་ངེ་འཛིན་མེད་པ་དང༌། ཤེས་རབ་མེད་པའི་སྒྲིབ་པ་[གདོད་ནས་]ཟད་པས་[འགོག་བདེན་གྱི་]དད་པ་ལ་སོགས་པའི་སྟོབས་[མཁའ་ཁྱབ་]རྣམས་སུ་འགྱུར་ཏེ། [འགོག་བདེན་གྱི་]སྟོབས་དེ་རྣམས་ཀྱིས་[མི་མཐུན་ཕྱོགས་རྣམས་གདོད་ནས་]རྣམ་པར་དག་པ་ནི་[འགོག་བདེན་གྱི་]གཙུག་ཏོར་[མཁའ་ཁྱབ་]དང༌། [འགོག་བདེན་གྱི་]བགེགས་མཐར་བྱེད་[མཁའ་ཁྱབ་]དང་[འགོག་བདེན་གྱི་]ཤེས་རབ་མཐར་བྱེད་[མཁའ་ཁྱབ་]དང་[འགོག་བདེན་གྱི་]པད་མ་མཐར་བྱེད་[མཁའ་ཁྱབ་]དང༌།[འགོག་བདེན་གྱི་]གཤིན་རྗེ་མཐར་བྱེད་[མཁའ་ཁྱབ་]དེ་[འགོག་བདེན་གྱི་]ཁྲོ་བོའི་རྒྱལ་པོ་[མཁའ་ཁྱབ་]རྣམས་[གདོད་ནས་]དག་པའོ། །[དེ་རྣམས་ནི་འགོག་བདེན་གྱི་ཐུགས་དཀྱིལ་གྱི་ལྷ་སྟེ་གཙུག་ཏོར་ནི་མ་གཏོགས་སོ།།]ངེས་པར་སླར་ཡང་གཞན་པ་ཞེས་པ་[འགོག་བདེན་གྱི་]གནོད་མཛེས་རྒྱལ་པོ་[མཁའ་ཁྱབ་]དང་[འགོག་བདེན་གྱི་]དབྱུག་པ་སྔོན་པོ་[མཁའ་ཁྱབ་]དང་[འགོག་བདེན་གྱི་]འདོད་པའི་རྒྱལ་པོ་[མཁའ་ཁྱབ་]དང་[འགོག་བདེན་གྱི་]མི་གཡོ་བ་[མཁའ་ཁྱབ་]དང་[འགོག་བདེན་གྱི་]སྟོབས་པོ་ཆེ་[མཁའ་ཁྱབ་]ནི་[འགོག་བདེན་གྱི་]བྷ་ག་[མཁའ་ཁྱབ་]དང་[འགོག་བདེན་གྱི་]ངག་[མཁའ་ཁྱབ་]དང་[འགོག་བདེན་གྱི་]ལག་པ་[མཁའ་ཁྱབ་]དང་[འགོག་བདེན་གྱི་]རྐང་བ་[མཁའ་ཁྱབ་]དང༌།[འགོག་བདེན་གྱི་]བཤང་ལམ་གྱི་ལས་ཀྱི་དབང་པོ་[མཁའ་ཁྱབ་]ལྔ་པོ་རྣམས་ཀྱིས་ཏེ། [འགོག་བདེན་གྱི་]ལས་ཀྱི་དབང་པོའི་བྱ་བ་[མཁའ་ཁྱབ་]རྣམས་ཀྱིས་[འགོག་བདེན་གྱི་]དྲག་སྤྱན་མ་[མཁའ་ཁྱབ་]ལ་སོགས་པ་དང་ལྷན་ཅིག་[གདོད་ནས་]ཡོངས་སུ་དག་པའོ། །[དེ་རྣམས་ནི་གཙུག་ཏོར་དང་ལྷན་ཅིག་སྐུ་དཀྱིལ་གྱི་ཁྲོ་བོ་ཁྲོ་མོ་རྣམས་སོ། །དེ་ནས་གསུངས་དཀྱིལ་དུ་]ཙཱ་མུཎ་ཌཱ་སོགས་[འགོག་བདེན་གྱི་]ཐུན་[ཚོད་]བརྒྱད་ཀྱིས་སོ། །[འགོག་བདེན་གྱི་]པད་མ[བརྒྱད་པོ]འི་འདབ་མར་གནས་པ་[འགོག་བདེན་གྱི་]འཇིགས་མ་[མཁའ་ཁྱབ་]ལ་སོགས་པ་[འགོག་བདེན་གྱི་རྣལ་འབྱོར་མ་དྲུག་ཅུ་པོ་]རྣམས་[འགོག་བདེན་གྱི་]ཉི་མའི་དུས་སྦྱོར་[ཏེ་དུས་སྦྱོར་བཅུ་གཉིས་ཀྱི་]ཆུ་ཚོད་དྲུག་ཅུ་རྣམས་ཀྱིས་སོ། །[ལྷག་མ་]བཞི་ནི་སྟོང་པའི་འདབ་མ་[བཞི་གདོད་ནས་]རྣམ་པར་དག་པས་སོ། །[ལྟེ་བ་]སྤྲུལ་པའི་འཁོར་ལོའི་སྒྲིབ་པ་[གདོད་ནས་]ཟད་པས་གཞན་ཙཱར་ཙི་ཀཱ་ལ་སོགས་པ་[གཙོ་མོ་བརྒྱད་]དང་གཞན་འཇིགས་མ་ལ་སོགས་པ[འཁོར་དྲུག་ཅུ་རྩ་བཞི]འོ་ཞེས་པ་[གདོད་ནས་]དག་པའོ། །[སྐུ་དཀྱིལ་དུ་འགོག་བདེན་གྱི་]ལྷ་མིན་ལ་སོགས་ཞེས་པ་[འགོག་བདེན་གྱི་]བདེན་བྲལ་[མཁའ་ཁྱབ་]དང་[འགོག་བདེན་གྱི་]རླུང་[མཁའ་ཁྱབ་]དང་[འགོག་བདེན་གྱི་]མེ་[མཁའ་ཁྱབ་]དང་[འགོག་བདེན་གྱི་]གདོང་དྲུག་པ་[མཁའ་ཁྱབ་]དང་[འགོག་བདེན་གྱི་]རྒྱ་མཚོ་[མཁའ་ཁྱབ་]དང་[འགོག་བདེན་གྱི་]ཚོགས་ཀྱི་དབང་པོ་[མཁའ་ཁྱབ་]དང་[འགོག་བདེན་གྱི་]བརྒྱ་བྱིན་[མཁའ་ཁྱབ་]དང་[འགོག་བདེན་གྱི་]ཚངས་པ་[མཁའ་ཁྱབ་]དང་[འགོག་བདེན་གྱི་]དྲག་པོ་[མཁའ་ཁྱབ་]དང་[འགོག་བདེན་གྱི་]གནོད་སྦྱིན་[མཁའ་ཁྱབ་]དང་[འགོག་བདེན་གྱི་]ཁྱབ་འཇུག་[མཁའ་ཁྱབ་]དང་[འགོག་བདེན་གྱི་]གཤིན་རྗེ་[མཁའ་ཁྱབ་]རྣམས་ནི་[འགོག་བདེན་གྱི་]ནག་པའི་ཟླ་བ་[མཁའ་ཁྱབ་]དང་[འགོག་བདེན་གྱི་]ས་གའི་ཟླ་བ་[མཁའ་ཁྱབ་]དང་[འགོག་བདེན་གྱི་]སྣྲོན་གྱི་ཟླ་བ་[མཁའ་ཁྱབ་]དང་[འགོག་བདེན་གྱི་]ཆུ་སྟོད་ཀྱི་ཟླ་བ་[མཁའ་ཁྱབ་]དང་[འགོག་བདེན་གྱི་]གྲོ་བཞིན་གྱི་ཟླ་བ་[མཁའ་ཁྱབ་]དང་[འགོག་བདེན་གྱི་]ཁྲུམས་སྟོད་ཀྱི་ཟླ་བ་[མཁའ་ཁྱབ་]དང་[འགོག་བདེན་གྱི་]ཐ་སྐར་གྱི་ཟླ་བ་[མཁའ་ཁྱབ་]དང་[འགོག་བདེན་གྱི་]སྨིན་དྲུག་གི་ཟླ་བ་[མཁའ་ཁྱབ་]དང་[འགོག་བདེན་གྱི་]མགོའི་ཟླ་བ་[མཁའ་ཁྱབ་]དང་[འགོག་བདེན་གྱི་]རྒྱལ་གྱི་ཟླ་བ་[མཁའ་ཁྱབ་]དང་[འགོག་བདེན་གྱི་]མཆུའི་ཟླ་བ་[མཁའ་ཁྱབ་]དང་[འགོག་བདེན་གྱི་]དབོའི་ཟླ་བ་[མཁའ་ཁྱབ་]སྟེ་བཅུ་གཉིས་པོ་[མཁའ་ཁྱབ་]རྣམས་ཀྱི་སྒྲིབ་པ་[གདོད་ནས་]ཟད་པས་དག་པའོ། །[ལྷ་བཅུ་གཉིས་པོ་]དེ་རྣམས་ཀྱི་པད་མའི་འདབ་མར་གནས་[པ་སུམ་བརྒྱ་བཞི་བཅུ་རྩ་བརྒྱད་པོ་]རྣམས་[ཐུགས་དཀྱིལ་གྱི་མཆོད་པའི་ལྷ་མོ་]སྒེག་མོ་ལ་སོགས་པ་[བཅུ་གཉིས་]དང་ལྡན་པ་སུམ་བརྒྱ་དྲུག་ཅུ་ནི་ཆུ་ཚོད་[གཅིག་གི་]དབུགས་ཀྱི་གྲངས་ཀྱི་[སྟེ་སུམ་བརྒྱ་དྲུག་ཅུའི་]ཉིན་ཞག་[གཞན་]རྣམས་ཀྱིས་ཏེ། ཉིན་ཞག་སུམ་བརྒྱ་དྲུག་ཅུའི་སྒྲིབ་པ་[གདོད་ནས་]ཟད་པས་དག་པ་གཞན་[འགོག་བདེན་གྱི་]ལྷ་[གཙོ་བོ་བཅུ་གཉིས་པོ་]དེ་རྣམས་དང་གཞན་འདབ་མའི་ལྷ་མོ་[སྒེག་སོགས་དང་བཅས་པ་སུམ་བརྒྱ་དྲུག་ཅུ་པོ་]དེ་རྣམས་སོ་ཞེས་པ་[གདོད་ནས་]དག་པའོ། །[འགོག་བདེན་གྱི་]གསང་བར་མི་བདག་[སྟཻ་བཅུ་དྲུག་]ཉིས་འགྱུར་[གྱི་]ཆུ་ཚོད་[གཞན་]རྣམས་ཀྱིས་[འགོག་བདེན་གྱི་]ཀླུ་[བརྒྱད་]རྣམས་དང་ནི་གཏུམ་མོ་[བརྒྱད་]རྣམས་ཀྱང་[གདོད་ནས་]རྣམ་པར་དག །ཅེས་པ་[ཀླུ་དང་གཏུམ་མོ་བཅུ་དྲུག་པོ་ཐམས་ཅད་ལ་]ཤེས་རབ་དང་ཐབས་ཀྱི་དབྱེ་བས་ཉིས་འགྱུར་[སུམ་བཅུ་རྩ་གཉིས་]ཉིད་དོ། །དེ་བཞིན་འདོད་མ་ལ་སོགས་ཞེས་པ་ནི་འདིར་[འགོག་བདེན་གྱི་]འདོད་མ་སུམ་ཅུ་རྩ་དྲུག་དང་[འགོག་བདེན་གྱི་]ཕྱིར་འདོད་མ་སུམ་ཅུ་རྩ་དྲུག་སྔར་[གསུང་དཀྱིལ་དང་སྐུ་དཀྱིལ་གྱི་སྟེགས་བུ་ལ་]གསུངས་པ་རྣམས་རང་བཞིན་ཡོན་ཏན་དབང་གིས་[འགོག་བདེན་གྱི་]ལུས་ཀྱི་བྱ་བས་རྣམ་པར་དག་སྟེ་ལུས་ཀྱི་བྱ་བའི་སྒྲིབ་པ་[འགོག་བདེན་གྱི་]ཟད་པས་གཞན་[འགོག་བདེན་གྱི་]འདོད་མ་[རྣམས་དང་]ལ་སོགས་པ[འི་སྒྲས་ཕྱིར་འདོད་མ་]དེ་རྣམས་དག་པའོ། །[འགོག་བདེན་གྱི་]སྐྲ་[མཁའ་ཁྱབ་]རྣམས་ཀྱིས་ནི་[འགོག་བདེན་གྱི་]གྲུབ་པ་[མཁའ་ཁྱབ་]མཐའ་དག་གོ །སྒྲིབ་པ་[གདོད་ནས་]མེད་པའི་[འགོག་བདེན་གྱི་]བ་སྤུ་བྱེ་བ་ཕྲག་ཕྱེད་དང་བཅས་པའི་གསུམ་པོ་[མཁའ་ཁྱབ་]རྣམས་ཀྱིས་[འགོག་བདེན་གྱི་]དུར་ཁྲོད་དུ་[འགོག་བདེན་གྱི་]འབྱུང་པོའི་ཚོགས་[གདོད་ནས་]རྣམ་པར་དག་པ་སྟེ། དེ་ལྟར་གཞན་གྲུབ་པ་[མཁའ་ཁྱབ་]དེ་རྣམས་དང་གཞན་འབྱུང་པོ་[མཁའ་ཁྱབ་]དེ་རྣམས་སོ། །ཞེས་པ་སྟེ། [ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱི་ནི་]དག་པའོ། །[འགོག་བདེན་གྱི་]དེ་ཉིད་ཉི་ཤུ་རྩ་བཞི་སྒྲིབ་པ་[གདོད་ནས་]མེད་པ་རྣམས་ཀྱིས་[འགོག་བདེན་གྱི་]གཙོ་བོའི་མཚོན་ཆ་རྡོ་རྗེ་[རལ་གྲི་རྩེ་གསུམ་]ལ་སོགས་པ་རྣམས་[གདོད་ནས་]དག་པ་སྟེ། [ཀུན་རྫོབ་ཀྱི་]རྣམ་པ་ཉི་ཤུ་རྩ་བཞིའི་རང་བཞིན་མེད་པའི་[གཞི་ཡིན་པའི་]ཕྱིར་རོ། །རང་བཞིན་ཡོན་ཏན་དབང་གིས་ཞེས་པ་ལ་རང་བཞིན་ནི་[ཀུན་རྫོབ་ཀྱི་]ས་ལ་སོགས་པའི་ཁམས་ཀྱི་ཚོགས་སོ། །དེ་རྣམས་ཀྱི་ཡོན་ཏན་ནི་[ཀུན་རྫོབ་ཀྱི་]ཡུལ་དྲུག་སྟེ། དེ་རྣམས་ཀྱི་སྒྲིབ་པ་[གདོད་ནས་]ཟད་པ་ལས་གཞན་[དོན་དམ་གྱི་]དྲི་ལ་སོགས་པའི་ཁམས་རྣམས་ཀྱིས་[འགོག་བདེན་གྱི་ལྷ་རྣམས་ཀྱི་]ཕྱིའི་ཕྱག་རྒྱ་[འཁོར་ལོ། རྣ་ཆ། མགུལ་རྒྱན། གདུ་བུ། སྐ་རགས། ཐལ་བའི་དོན་ཕར་ཕྱིན་]དྲུག་[གདོད་ནས་]རྣམ་པར་དག་པའོ། །རྡོ་རྗེ་ཞེས་པ་[འགོག་བདེན་གྱི་]སྐུ་[མཁའ་ཁྱབ་]དང་[འགོག་བདེན་གྱི་]གསུང་[མཁའ་ཁྱབ་]དང་[འགོག་བདེན་གྱི་]ཐུགས་[མཁའ་ཁྱབ་]དང་[འགོག་བདེན་གྱི་]ཡེ་ཤེས་[མཁའ་ཁྱབ་]ཀྱི་རྡོ་རྗེ་སྟེ། སད་པ་དང་རྨི་ལམ་དང་ཤིན་ཏུ་གཉིད་ལོག་པ་དང་བཞི་པའི་མཚན་ཉིད་[གདོད་ནས་]རྣམ་པར་དག་པ་རྣམས་ཀྱིས་སྒྲིབ་པ་[གདོད་ནས་]མེད་པའི་ཕྱིར་ནང་གི་ཕྱག་རྒྱ་རྣམས་[གདོད་ནས་]དག་པ་སྟེ། གཞན་[དོན་དམ་ཡེ་ཤེས་ཀྱི་]སྐུའི་ཕྱག་རྒྱ་བཞི་པོ་དེ་རྣམས་[གདོད་ནས་]རྣམ་པར་དག་པའོ། །རྡོ་རྗེ་འཛིན་པའི་ཐུགས་ཁར་ཞེས་པ་[འགོག་བདེན་གྱི་]དཀྱིལ་འཁོར་གྱི་གཙོ་བོའི་ཐུགས་ཁར་ཟླ་བའི་སྟེང་དུ་ཡང་དག་པར་གནས་པའོ། །[འགོག་བདེན་གྱི་]དཔལ་ལྡན་རྡོ་རྗེ་ཅན་ནི་[དོན་དམ་སྟོང་ཆེན་དང་]ལྷན་ཅིག་སྐྱེས་པའི་དགའ་བ་[དོན་དམ་བདེ་ཆེན་]མཆོག་ཏུ་འགྱུར་བ་མེད་པའོ། །[འགོག་བདེན་གྱི་]སྣ་ཚོགས་ཡུམ་ནི་རྣམ་པ་ཐམས་ཅད་པའི་སྟོང་པ་ཉིད་ཀྱི་ཡེ་ཤེས་དུས་གསུམ་[དུས་མེད་]གཟིགས་པ་སྟེ་འཕོ་བའི་བདེ་བ་བརྟགས་པའི་སྒྲིབ་པ་[གདོད་ནས་]ཟད་པའི་ཕྱིར་རོ། །ཞེས་པ་[གདོད་ནས་]དག་པའོ། །རྣམ་གསུམ་སྲིད་གནས་ཞེས་པ་ནི་ཐམས་ཅད་དུ་ཐམས་ཅད་ཀྱི་ཚེ་[འགོག་བདེན་གྱི་]ཕུང་པོ་ལ་སོགས་པ་ཐམས་ཅད་[གདོད་ནས་]རྣམ་པར་དག་པ་སྟེ་སྒྲིབ་པ་ཐམས་ཅད་[གདོད་ནས་]ཟད་པའི་[གཞི་ཡིན་པའི་]ཕྱིར་རོ། །ཞེས་པ་བཅོམ་ལྡན་འདས་ཀྱི་ངེས་པའོ། །དེ་ལྟར་སྲིད་པ་[གཞན་ཡེ་ཤེས་རང་རིག་གིས་]ཡོངས་སུ་ཤེས་པ་ནི་མྱ་ངན་ལས་འདས་པ་[ཆེན་པོ་]ཞེས་བརྗོད་དོ། །ཞེས་པ་ལ་སོགས་པས་རང་སྟོང་དུ་གནས་པའི་ཕུང་པོ་ཁམས་སོགས་ལས་གཞན་པའི་ཕུང་པོ་ཁམས་སོགས་ཡེ་ཤེས་ཀྱི་ལྷ་ཡང་ཡིན་ལ་སྟོང་ཉིད་ཀྱང་ཡིན་པ་ཤིན་ཏུ་མང་བར་གསུངས་པའི་ཕྱིར་རང་སྟོང་ལས་གཞན་པའི་སྟོང་ཉིད་ཟབ་མོ་[གཤིས་ལ་]ཡོད་པར་གྲུབ་བོ། །དེ་བཞིན་དུ་གློ་བུར་དྲི་མའི་ཕུང་པོ་ཁམས་སོགས་རང་སྟོང་དུ་གནས་པ་རྣམས་འགགས་པས་བདེ་གཤེགས་སྙིང་པོའི་ཕུང་པོ་ཁམས་སོགས་ཡེ་ཤེས་ཀྱི་ལྷར་བཞུགས་པ་རྣམས་ཐོབ་པར་གསུངས་པ་འདིས་ཀྱང་སྦྱང་བྱ་དྲི་མ་ཟད་པས་སྦྱང་གཞི་བདེ་གཤེགས་སྙིང་པོ་མི་ཟད་པར་བསྟན་པ་ཡང་ཡིན་ནོ། །འཕགས་པ་རྡོ་རྗེ་སྙིང་པོའི་ཞལ་སྔ་ནས་ཀྱང༌། [ཀུན་རྫོབ་ཀྱི་]དངོས་པོའི་འཆིང་བ་དེ་ཡིས་[ཀུན་རྫོབ་ཀྱི་]རྣམ་པར་ཤེས་པ་དང་མིག་ལ་སོགས་པ་བཅིངས་པའོ། །དེ་ཡོངས་སུ་ཤེས་པས་གྲོལ་བར་འགྱུར་བ་ནི་[སྡུག་བསྔལ་དང་ཀུན་འབྱུང་གི་]ཡུལ་དང་དབང་པོ་དེ་རྣམས་[ལམ་བདེན་གྱིས་]འགགས་པ་ནི་ཡོངས་སུ་ཤེས་པ་ཞེས་བྱ[འི་གཟུངས་འཛིན་རང་སྟོང་དུ་ཤེས་པ་ཙམ་གྱིས་ནི་དེའི་གོ་མི་ཆོད་པ]འོ། །དེ་བས་ན་དངོས་པོ་ཉིད་ཀྱིས་གྲོལ་བར་འགྱུར་བ་[ཞེས་གསུངས་པ་]ནི་[འགོག་བདེན་མཐོང་བའི་]ལྷའི་མིག་ལ་སོགས་པ་རྣམས་ཀྱིས་[འགོག་བདེན་གྱི་]འདས་པ་དང་[འགོག་བདེན་གྱི་]མ་འོངས་པའི་ཡུལ་[ཡང་ཡིན་ལ་དུས་གསུམ་ལས་འདུས་པ་ཡང་ཡིན་པས་འགལ་འདུས་སྐྱོན་མེད་]རྣམས་མཐོང་བས་[ཀུན་རྫོབ་ཀྱི་]རྣམ་པར་ཤེས་པ་དྲུག་[གི་འཆང་བ་]དག་[ལས་]གྲོལ་བར་འགྱུར་རོ། །[གྲོལ་བའི་གཞིར་གྱུར་པའི་]རྣམ་པར་ཤེས་པ་དེ་ནི་[འགོག་བདེན་ཡིན་པས་ཀུན་རྫོབ་འདི་ལས་]གཞན་ཡིན་ནོ། །ཞེས་བཅོམ་ལྡན་འདས་ཀྱིས་བཀའ་བསྩལ་པས་སོ། །[ཡང་ན་དེ་རྣམས་རང་བཞིན་རྣམ་དག་ཉིད་དུ་བཤད་པར་བྱའོ།།]དེ་བཞིན་དུ་[འགོག་བདེན་གྱི་]གཟུགས་[དང་ཚོར་བ་]ལ་སོགས་པ་[ཕུང་པོ་ཁམས་སོགས་མཁའ་ཁྱབ་]དེ་དག་ཀྱང་[ཀུན་རྫོབ་འདི་ལས་]གཞན་[ཁོ་ན་ཡིན་གྱི་འདི་མ་འདྲེས་]ཞེས་བྱའོ། །དེའི་ཕྱིར་[དེ་ལྟ་བུའི་འགོག་བདེན་དེ་ནི་]ཐམས་ཅད་དུ་ནི་ཕྱག་དང་ཞབས། །ཐམས་ཅད་དུ་ནི་སྤྱན་ཞལ་དབུ། །འཇིག་རྟེན་ཀུན་སྒྲ་གསན་དང་ལྡན། །ཐམས་ཅད་ལ་ནི་[ནམ་མཁའ་ལྟར་]ཁྱབ་པར་བཞུགས[ཀྱང་རྣམ་ཤེས་ཀྱིས་མཐོང་བ་མི་སྲིད་དོ]། །ཞེས་གསུངས་ཏེ། [སྡུག་བསྔལ་ཀུན་འབྱུང་གི་]ཡུལ་དང་དབང་པོ་རྣམས་[ལམ་བདེན་གྱིས་]མ་འགགས་ན་བཅིངས་པ་དང༌། འགགས་ན་གྲོལ་བར་བསྟན་ཅིང༌། རྣམ་པར་ཤེས་པ་གཞན་ལ་སོགས་པ་དབང་པོ་ཐམས་ཅད་པའི་ཡེ་ཤེས་ཀྱི་སྐུ་ཀུན་ཁྱབ་ཏུ་བཞུགས་པར་གསུངས་པ་འདི་ཡང་རང་སྟོང་ལས་གཞན་པའི་སྟོང་ཉིད་ཟབ་མོ་ཡིན་ནོ། །དཔལ་ལྡན་དྲི་མ་དང་བྲལ་བའི་འོད་དུ་ཡང༌། ས་ལ་སོགས་པ་འདི་དག་གི་དབུས་སུ་[འགོག་བདེན་གྱི་]རྡོ་རྗེ་ཅན་ནི་རང་བཞིན་མིན་ཞིང་རྣམ་འགྱུར་མིན་ཏེ་ཁྱབ་བྱེད་རང་བཞིན་མེད་པའོ། །གང་གི་ཕྱིར་འཁོར་བའི་བག་ཆགས་ལས་[གདོད་ནས་]གྲོལ་བའི་[འགོག་བདེན་གྱི་]སེམས་ཀྱི་ཆོས་ཡིན་པ་དེའི་ཕྱིར་གང་སེམས་[གཤིས་ལ་]ཡོད་པའི་སེམས་[རང་བཞིན་འོད་གསལ་]དེ་ནི་[ཀུན་རྫོབ་ཀྱི་]སེམས་མ་ཡིན་ནོ། །ཞེས་འཁོར་བའི་སེམས་དང་[གདོད་ནས་]བྲལ་བ་[རང་བཞིན་གྱིས་]མྱ་ངན་ལས་འདས་པ[ཆེན་པོ]འི་སེམས་གཞན་[ཞིག་གཤིས་ལ་]ཡོད་པ་ནི་རྡོ་རྗེ་ཅན་གྱི་མིང་གིས་བཅོམ་ལྡན་འདས་ཀྱིས་གསུངས་སོ། །ཞེས་དང༌། མཁའ་ཁྱབ་མཁའ་ཡི་རྡོ་རྗེ་ཅན་ནི་[སྡུག་བསྔལ་དང་ཀུན་འབྱུང་གི་]ཡུལ་དང་རྣམ་བྲལ་[འགོག་བདེན་གྱི་ཡུལ་ཏེ་དེ་ཡང་ཟླ་ཉིའི་]ཡོན་ཏན་[བརྒྱད་པོ་གདོད་ནས་]མེད་ལ་རང་བཞིན་མེད་པ[འི་གཞི]འོ། །ཞེས་པ་སྟེ། རྒྱས་པར་བླ་མ[ས་བཅུ་པ]འི་མན་ངག་ལས་ཁོང་དུ་ཆུད་པར་བྱའོ། །གཞན་ཡང་དེ་ཉིད་དུ། འདིར་[འགོག་བདེན་གྱི་]སེམས་ཀྱི་རྡོ་རྗེ་བཞི་[གདོད་ནས་]རྣམ་པར་དག་པ་ནི་[འགོག་བདེན་གྱི་]སྐུ་བཞིའི་མཚན་ཉིད་དུ་འགྱུར་ཏེ། ཟློག་པར་དཀའ་བའི་འདོད་ཆགས་ཀྱི་དྲི་མས་ཀུན་ནས་བསྒོས་པ་བྷ་ག་དང་དབང་པོ[སྦྱོར་བ]འི་བདག་ཉིད་བཞི་པའི་སེམས་ཀྱི་དངོས་པོ་[གདོད་ནས་]མེད་པའི་[གཞིར་གྱུར་པ་འགོག་བདེན་གྱི་བཞི་པའི་]སེམས་ནི་ངོ་བོ་ཉིད་ཀྱི་སྐུ་[མཁའ་ཁྱབ་]སྟེ་[རྒྱུད་དུ་]ཐམས་ཅད་མཁྱེན་པ་ཞེས་པ[འི་མིང་གིས་གསུངས་པ]འོ། །མུན་པས་ཟིལ་གྱིས་མནན་པ་ཤིན་ཏུ་གཉིད་ལོག་པའི་སེམས་ཀྱི་དངོས་པོ་[གདོད་ནས་]མེད་པའི་[གཞི་འགོག་བདེན་གྱི་གཉིད་སྟུག་གྀ་]སེམས་ནི་ཆོས་ཀྱི་སྐུ་[མཁའ་ཁྱབ་]སྟེ་[རྒྱུད་དུ་]ཡེ་ཤེས་སྐུ། ཞེས་པ[འི་མིང་གིས་གསུངས་པ]འོ། །སྲོག་[སྟེ་རླུང་]གིས་བསྐྱེད་པ་ཡོད་པ་དང་མེད་པའི་རྨི་ལམ་གྱི་སེམས་ཀྱི་དངོས་པོ་[གདོད་ནས་]མེད་པའི་[གཞི་འགོག་བདེན་གྱི་རྨི་ལམ་གྱི་]སེམས་ནི་ལོངས་སྤྱོད་རྫོགས་པའི་སྐུ་[མཁའ་ཁྱབ་]སྟེ་[རྒྱུད་དུ་]ཉིན་མོར་བྱེད་པའི་སྐུ་ཞེས་པ[འི་མིང་གིས་གསུངས་པ]འོ། །རྣམ་པར་རྟོག་པ་དུ་མའི་དངོས་པོའི་འདུ་ཤེས་སད་པའི་སེམས་ཀྱི་དངོས་པོ་[གདོད་ནས་]མེད་པའི་[གཞི་འགོག་བདེན་གྱི་སད་པའི་]སེམས་ནི་སྤྲུལ་པའི་སྐུ་[མཁའ་ཁྱབ་]སྟེ་[རྒྱུད་དུ་]པད་མའི་འདབ་མ་རྒྱས་པའི་སྤྱན་ཞེས་པ[འི་མིང་གིས་གསུངས་པ]འོ། །ཞེས་གསུངས་ཏེ། འདི་དག་གིས་ཀྱང་ཀུན་རྫོབ་རང་སྟོང་དང་དོན་དམ་གཞན་སྟོང་དུ་བསྟན་པ་ཡིན་ནོ། །ཇི་ལྟར་བསྟན་ཞེ་ན་[སྡུག་བསྔལ་དང་ཀུན་འབྱུང་གི་]བཞི་པའི་སེམས་ཀྱི་དངོས་པོ་ནི་གློ་བུར་དྲི་མ་ཡིན་པའི་ཕྱིར་རང་སྟོང་ངོ༌། །དེ་མེད་པའི་གཞི་དོན་དམ་བདེ་གཤེགས་སྙིང་པོ་འགྱུར་མེད་བདེ་བའི་སེམས་[འགོག་བདེན་གྱི་བཞི་པ་]ནི་ངོ་བོ་ཉིད་ཀྱི་སྐུ་སྟེ་ནམ་ཡང་མེད་པ་མ་ཡིན་ཞིང་གཙང་བ་དང་བདེ་བ་དང་རྟག་པ་དང་བདག་གི་མཐར་ཐུག་པ་ཡིན་པའི་ཕྱིར། རང་སྟོང་ནི་མ་ཡིན་ལ་སྟོང་པ་ཆེན་པོ་ཡང་ཡིན་པའི་ཕྱིར་གཞུང་འདིས་ཀྱང་དོན་དམ་པ་གཞན་སྟོང་དུ་གྲུབ་བོ། །དེ་བཞིན་དུ་[སྡུག་བསྔལ་དང་ཀུན་འབྱུང་གི་]གཉིད་སྟུག་དང་རྨི་ལམ་དང་སད་པའི་སེམས་ཀྱི་དངོས་པོ་རྣམས་ནི་རང་སྟོང་ངོ༌། །དེ་རྣམས་མེད་པའི་གཞི་དོན་དམ་བདེ་གཤེགས་སྙིང་པོའི་ཐུགས་དང་གསུང་དང་སྐུའི་སེམས་[འགོག་བདེན་གྱི་གཉིད་སྟུག་དང་རྨི་ལམ་དང་སད་པ་]རྣམས་ནི་[རིམ་པ་ལྟར་]ཆོས་ཀྱི་སྐུ་དང་[དོན་དམ་གྱི་]ལོངས་སྤྱོད་རྫོགས་པའི་སྐུ་དང་སྤྲུལ་པའི་སྐུ་དོན་དམ་པས་བསྡུས་པ་དག་སྟེ་དེ་རྣམས་ཀྱང་གཞན་སྟོང་ངོ༌། །འདིར་སེམས་ཀྱི་དངོས་པོ་མེད་པའི་སེམས་ཞེས་པ་ལན་བཞི་གསུངས་པ་འདི་རྣམས་ཀྱང་སྔར་སྨོས་པའི། གང་ཞིག་གང་ན་མེད་པ་དེ་དེས་སྟོང་ངོ༌། །དེ་ལ་ལྷག་མ་གང་ཡིན་པ་དེ་རྟག་ཏུ་ཡོད་དོ། །ཞེས་སོགས་དང་ཤིན་ཏུ་མཐུན་ཏེ། [གཤིས་ལ་]ཡོད་མེད་ཤེས་ཚུལ་ཡང་དེ་བཞིན་ནོ། །འདི་དག་གིས་ནི་སྦྱང་བྱའི་དྲི་མ་དང་སྦྱང་བའི་གཞི་ཐ་དད་པར་ཡང་བསྟན་ཞིང༌། དེ་ཡང་ལྡོག་པ་ཐ་དད་པ་ཙམ་ནི་མ་ཡིན་ཏེ། བཅོས་མ་གློ་བུར་བ་དང་རང་བཞིན་གཉུག་མའི་ཁྱད་པར་ཡོད་པའི་ཕྱིར་དང༌། ཀུན་རྫོབ་དང་དོན་དམ་པའི་ཁྱད་པར་ཡོད་པའི་ཕྱིར་དང༌། ཆོས་དང་ཆོས་ཉིད་ཀྱི་ཁྱད་པར་ཡོད་པའི་ཕྱིར་དང༌། མཐའ་དང་དབུས་ཀྱི་ཁྱད་པར་ཡོད་པའི་ཕྱིར་དང༌། གཞན་བྱུང་དང་རང་བྱུང་གི་ཁྱད་པར་ཡོད་པའི་ཕྱིར་དང༌། ཀུན་བརྟགས་གཞན་དབང་དང་ཆོས་ཉིད་ཡོངས་གྲུབ་ཀྱི་ཁྱད་པར་ཡོད་པའི་ཕྱིར་དང༌། རྣམ་ཤེས་དང་ཡེ་ཤེས་ཀྱི་ཁྱད་པར་ཡོད་པའི་ཕྱིར་དང༌། འཇིག་རྟེན་དང་འཇིག་རྟེན་ལས་འདས་པའི་ཁྱད་པར་ཡོད་པའི་ཕྱིར་དང༌། འདུས་བྱས་དང་འདུས་མ་བྱས་ཀྱི་ཁྱད་པར་ཡོད་པའི་ཕྱིར་དང༌། སྡུག་བསྔལ་དང་བདེ་བའི་ཁྱད་པར་ཡོད་པའི་ཕྱིར་དང༌། ཟག་བཅས་དང་ཟག་མེད་ཀྱི་ཁྱད་པར་ཡོད་པའི་ཕྱིར་དང༌། ཆོས་སྐུའི་ཡོན་ཏན་མ་ཚང་བ་དང་ཚང་བའི་ཁྱད་པར་ཡོད་པའི་ཕྱིར་དང༌། གཞོམ་དུ་རུང་བ་དང་མི་རུང་བ་ལ་སོགས་པ་ཁྱད་པར་ཆེས་ཆེ་བ་མང་པོའི་སྒོ་ནས་ཁྱད་ཞུགས་པའི་ཕྱིར་རོ། །དེ་བཞིན་དུ་[ཡུམ་ལ་སོགས་པར་]སེམས་གང་ཞིག་[གཤིས་ལ་]ཡོད་[པ་དོན་དམ་]པའི་སེམས་དེ་ནི་[ཀུན་རྫོབ་ཀྱི་]སེམས་[སུ་]མེད་པ་ཞེས་རང་བཞིན་འོད་གསལ་གྱི་སེམས་ཡང་དང་ཡང་དུ་གསུངས་པ་ལས་ཀྱང་དོན་དམ་གཞན་སྟོང་གསུངས་པར་ཁོང་དུ་ཆུད་དེ། འདིར་དོན་དམ་གྱི་སེམས་ནི་[གཤིས་ཀྱི་]གནས་ལུགས་ལ་ཡོད་པའི་སེམས་སོ། །ཀུན་རྫོབ་ཀྱི་སེམས་ནི་[གཤིས་ཀྱི་]གནས་ལུགས་ལ་མེད་པའི་སེམས་སོ། །དེའི་ཕྱིར་སེམས་གང་ཞིག་ཡོད་པའི་སེམས་ཞེས་པ་དོན་དམ་བྱང་ཆུབ་ཀྱི་སེམས་རང་བཞིན་འོད་གསལ་བ་སྟེ། སེམས་ཅན་ཀུན་གྱི་[སེམས་ཆུང་ངུ་ཀུན་རྫོབ་ཀྱི་སེམས་ལ་ཁྱབ་པའི་]སེམས་ཆེན་པོ[དོན་དམ་གྱི་སེམས་ཏེ]། །[དེ་ནི་]རང་བཞིན་[གྱིས་]དག་ཅིང་དྲི་མ་མེད། །ཅེས་[གསང་འདུས་སུ་]གསུངས་པ་ཡང་[འགོག་བདེན་གྱི་སེམས་]དེ་ཡིན་ནོ། །དེ་ནི་[ཀུན་རྫོབ་ཀྱི་]སེམས་མེད་པ་ཞེས་པ་རང་གི་ངོ་བོར་སེམས་དང་ཡིད་དང་རྣམ་པར་ཤེས་པ་མེད་པ་སྟེ་རང་བཞིན་གྱིས་རྣམ་པར་དག་པའི་ཕྱིར་རོ། །དེས་ན་ཀུན་རྫོབ་རང་སྟོང་གི་སེམས་ཀྱིས་སྟོང་པའི་གཞི་ལ་དོན་དམ་གཞན་སྟོང་གི་སེམས་རང་བཞིན་པ་རྟག་ཏུ་བཞུགས་པར་དགོངས་སོ། །དེ་བཞིན་དུ་[ཀུན་རྫོབ་ཀྱི་]སེམས་མེད་པའི་[གཞི་དོན་དམ་གྱི་]སེམས་ཀྱི་རྡོ་རྗེ་ཞེས་གསུངས་པའི་དོན་ཡང་སྔ་མ་དང་མཐུན་པར་ཁོང་དུ་ཆུད་པར་བྱ་སྟེ། འདིར་ཀུན་རྫོབ་ཀྱི་སེམས་མེད་པའི་གཞི་སེམས་ཀྱི་རྡོ་རྗེ་ནི་རྡོ་རྗེའི་སེམས་ཏེ། མི་ཆོད་པ་དང་མི་ཤིགས་པ་ཆེན་པོ་དོན་དམ་པའི་སེམས་སོ། །དེ་བཞིན་དུ་ལུས་མེད་ལུས་དང་སྲིད་མེད་སྲིད་པ་དང་གཟུགས་མེད་གཟུགས་བཟང་དང་རྣམ་པ་ཀུན་ལྡན་རྣམ་པ་མེད་པ་ལ་སོགས་པ་འགལ་འདུས་སྐྱོན་མེད་ཀྱི་གསུང་མང་པོས་སྟོང་གཞི་དོན་དམ་གཞན་སྟོང་ཟབ་མོ་འཇིག་རྟེན་དཔེ་ལས་འདས་པ་ཡང་ཡང་བསྟན་ལ། དགོངས་པ་ལུང་སྟོན་པའི་རྒྱུད་དུ་ཡང༌། མ་རིག་པ་དང་འདུ་བྱེད་དང༌།།རྣམ་པར་ཤེས་དང་མིང་དང་གཟུགས། །སྐྱེ་མཆེད་དྲུག་དང་རེག་པ་དང༌། །ཚོར་བ་དང་ནི་སྲེད་པ་དང༌། །ཉེར་ལེན་སྲིད་པ་སྐྱེ་བ་དང༌། །རྒ་ཤི་ཞེས་བྱ་རིག་མ་ཡིན། །ང་རྒྱལ་[དང་]ཆེ་བའི་ང་རྒྱལ་དང༌། །ངའོ་སྙམ་པའི་[ང་རྒྱལ་དང་]མངོན་[པའི་]ང་རྒྱལ[དང་]། །གཞན་ཡང་ང་རྒྱལ་[ལས་ཀྱང་]ང་རྒྱལ་དང༌། །ཅུང་ཟད་[སྙམ་པའི་]ང་རྒྱལ་[དང་]ལོག་པ[འི་ང་རྒྱལ་དང་]ར་བཅས[པ]། །འདི་དག་[ལ་ཡང་བདེན་གཉིས་རྣམ་དབྱེ་ཤེས་དགོས་ཤིང་དོན་དམ་གྱི་མ་རིག་པ་ལ་སོགས་པ་ནི་]རྡོ་རྗེའི་མཐའ་ཅན་[ནམ་ཆོས་ཉིད་ཀྱི་མཐའ་ཅན་ལ་སོགས་པ་གསུངས་ཏེ་དེ་ནི་ཀུན་རྫོབ་ཐམས་ཅད་ལས་]མཆོག [དང་གཞན་དང་ཕ་རོལ་ལོ།]།ཅེས་དང༌། སངས་རྒྱས་ཐམས་ཅད་ཀྱི་དཔལ་འདུས་པར་ཡང༌། མདོར་ན་[འགོག་བདེན་དོན་དམ་པའི་]ཕུང་པོ་ལྔ་རྣམས་ནི། །[འགོག་བདེན་གྱི་]སངས་རྒྱས་ལྔར་ནི་རབ་ཏུ་བསྒྲགས། །རྡོ་རྗེའི་སྐྱེ་མཆེད་[མཁའ་ཁྱབ་]ཉིད་དག་ཀྱང༌། །[འགོག་བདེན་གྱི་]བྱང་ཆུབ་སེམས་དཔའི་དཀྱིལ་འཁོར་མཆོག །ཅེས་དང༌། [འགོག་བདེན་གྱི་]ས་ནི་སྤྱན་[མ་]ཞེས་བྱ་བ་ཡིན། །[འགོག་བདེན་གྱི་]ཆུ་ཡི་ཁམས་ནི་མཱ་མ་ཀཱི། །[གོས་]དཀར་[མོ་]དང་སྒྲོལ་མ་ཞེས་བྱ་བ། །[འགོག་བདེན་གྱི་]མེ་དང་རླུང་དུ་རབ་ཏུ་བསྒྲགས། །[འགོག་བདེན་གྱི་]མཁའ་དབྱིངས་རྡོ་རྗེའི་དམ་ཚིག་ནི། །རྡོ་རྗེ་འཛིན་པ་[མཁའ་ཁྱབ་]དེ་ཉིད་ཡིན། །ཞེས་སོགས་ཀྱིས་ཀྱང་བཅོས་མ་གློ་བུར་བའི་ཕུང་པོ་ཁམས་སོགས་ཀྱིས་གདོད་ནས་སྟོང་པའི་གཞི་རང་བཞིན་གཉུག་མ་ཆོས་ཉིད་ཀྱི་ཕུང་པོ་ཁམས་སོགས་རང་བཞིན་གྱིས་རྣམ་པར་དག་པ་རྒྱ་ཆེར་གསུངས་ཏེ། གཞན་དང་མཆོག་དང་ཕ་རོལ་དང་དམ་པའོ། །དེ་ལྟར་དོན་དམ་བདེན་པ་ནི་ཕྱི་ནང་ཀུན་རྫོབ་དམན་པ་འདི་ལས་གཞན་ནམ་ཕ་རོལ་ཏེ་དམ་པ་དང་མཆོག་གོ །དེ་ཡང་རྒྱུད་སྡེ་ཁྱད་འཕགས་དག་ཏུ། ཇི་ལྟར་ཕྱི་རོལ་དེ་བཞིན་ནང༌། །ཇི་ལྟར་ནང་ལ་དེ་བཞིན་གཞན། །ཞེས་འབྲུའི་ཤུན་པའི་ཕྱིའི་ཆ་དང་ནང་གི་ཆ་དང་འབྲུའི་སྙིང་པོ་རྣམས་ངོ་བོ་མི་གཅིག་ཀྱང་རྣམ་པ་མཚུངས་པར་གནས་པ་ཇི་ལྟ་བ་དེ་བཞིན་དུ། ཕྱི་སྣོད་ཀྱི་འཇིག་རྟེན་འདི་དང་ནང་བཅུད་ཀྱི་སེམས་ཅན་འདི་དང་[འདི་དག་ལས་]གཞན་བདེ་གཤེགས་སྙིང་པོ་དེ་བཞིན་ཉིད་ཀྱང་ངོ་བོ་མི་གཅིག་མོད་ཀྱི་རྣམ་པ་མཚུངས་པར་གསུངས་ལ། ཚུལ་འདི་ནི་དབུ་མ་ཆེན་པོའི་གཞུང་གཞན་དག་ཏུ། ཇི་ལྟར་སྣང་བ་འདི་ཁོ་ན། །ཀུན་རྫོབ་གཞན་ནི་གཅིག་ཤོས་ཡིན། །ཞེས་[དབུ་མ་བདེན་གཉིས་ལས་]གསུངས་པ་དང་ཡང་དོན་གཅིག་ཏུ་གནས་པ་ཡིན་ཏེ། ཇི་ལྟར་སྣང་བ་འདི་ཞེས་པ་ནི་རྣམ་ཤེས་ལ་སྣང་བའི་ཕྱི་ནང་འདི་ཀུན་རྫོབ་བོ། །འདི་ལས་གཞན་ནི་ཞེས་པ་ཆོས་ཀུན་རྫོབ་པ་འདི་ལས་གཞན་ཆོས་ཉིད་དོན་དམ་པ་སྟེ་ཕ་རོལ་ལམ་མཆོག་གམ་དམ་པའོ། །དེ་ནི་བདེན་པ་གཉིས་ལས་ཀུན་རྫོབ་བདེན་པའི་གཅིག་ཤོས་དོན་དམ་བདེན་པ་སྟེ། དེའི་ཕྱིར་གཅིག་ཤོས་ཡིན་ཞེས་པའོ། །དེ་ལྟར་དོན་དམ་གང་ཡིན་པ་དེ་ཀུན་རྫོབ་ལས་གཞན་དུ་གསུངས་པ་འདིས་ཀྱང་འགའ་ཞིག་བདེན་གཉིས་དབྱེར་མེད་དུ་འདོད་པ་བསལ་བ་ཡིན་ནོ། །ཡང་ཁ་ཅིག་རྣམ་ཤེས་ལ་སྣང་བའི་དངོས་པོ་འདི་ཀུན་རྫོབ་དང༌། དེ་དེ་ཉིད་ཀྱིས་སྟོང་པའི་ཆ་དོན་དམ་བདེན་པར་འདོད་པ་རྣམས་ནི་ཤིན་ཏུ་འཁྲུལ་ཏེ། རང་སྟོང་གང་ཡིན་པ་དེ་དོན་དམ་བདེན་པ་ཡིན་མི་སྲིད་ཅིང༌། དོན་དམ་བདེན་པ་གང་ཡིན་པ་དེ་རང་སྟོང་ཡིན་མི་སྲིད་པའི་ཕྱིར་དང༌། དེ་དག་གི་ཤེས་བྱེད་རྣམ་དག་མང་དུ་བཤད་ཅིང་འཆད་པར་འགྱུར་བའི་ཡང་ཕྱིར་རོ། །དེ་བཞིན་དུ་སྣང་བ་གང་ཡིན་ཀུན་རྫོབ་དང་སྟོང་པ་གང་ཡིན་དོན་དམ་དུ་འདོད་པ་ཡང་བབ་བཅོལ་ཏེ། ཀུན་རྫོབ་ལ་ཡང་སྣང་སྟོང་གཉིས་དང༌། དོན་དམ་ལ་ཡང་སྣང་སྟོང་གཉིས་ཚང་བའི་ཕྱིར་ཏེ། ཆོས་ཉིད་ཀྱི་སྣང་བ་ཡང་ཀུན་རྫོབ་ཡིན་པར་ཐལ་བ་དང༌། ཀུན་རྫོབ་སྟོང་ཉིད་ཀྱང་དོན་དམ་ཡིན་པར་ཧ་ཅང་ཐལ་བས་གནོད་པའི་ཕྱིར་རོ། །འདི་དག་གི་ཤེས་བྱེད་གཞན་ནི་མན་ངག་གཞན་དུ་ཡང་བསྟན་པར་བྱའོ། །