དེ་ལྟར་དོན་བཞིན་རྟོགས་པའི་ཡང་དག་ལྟ་བས་ཕྱིན་ཅི་ལོག་ཐམས་ཅད་སྤོང་ཚུལ།

དེ་ལྟར་ཡང་དག་པའི་ལྟ་བས་ནི་ཕྱིན་ཅི་ལོག་ཐམས་ཅད་སྤངས་ནས་[དོན་ལ་]ཇི་ལྟར་གནས་པ་བཞིན་དུ་རྟོགས་པར་འགྱུར་ཏེ། མྱང་འདས་ཆེན་པོར། རིགས་ཀྱི་བུ་གལ་ཏེ་སེམས་ཅན་གང་[ཆོས་ཉིད་ཡོངས་གྲུབ་ཀྱི་]བདག་ཡོད་པ་ལ་བདག་མེད་པར་ལྟ་བ་དང༌། [ཀུན་བརྟགས་གཞན་དབང་གི་]བདག་མེད་པ་ལ་བདག་ཡོད་པར་ལྟ་བ་དང༌། [མཐར་ཐུག་གི་དཀོན་མཆོག་གསུམ་]རྟག་པ་ལ་མི་རྟག་པར་ལྟ་བ་དང༌། [རང་སྟོང་གང་ཡིན་ཆོས་སྐུ་ཡིན་ན་འདུས་བྱས་རྣམས་ཀྱང་ཆོས་སྐུ་ཡིན་པར་འགྱུར་བས་]མི་རྟག་པ་ལ་རྟག་པར་[དོན་གྱིས་]ལྟ་བ་དང༌། [དོན་དམ་དོན་དམ་གྱིས་སྟོང་ན་དོན་དམ་གྱི་]བདེ་བ་[དོན་དམ་དུ་བཞུགས་པ་]ལ་མི་བདེ་བ[སྟེ་དོན་དམ་དུ་བདེ་བ་མ་གྲུབ་པ]ར་ལྟ་བ་དང༌། [འཁོར་བ་འདི་མྱང་འདས་དང་དབྱེར་མེད་དུ་འདོད་ན་]མི་བདེ་བ་ལ་བདེ་བར་ལྟ་བ་དང༌། [བདེ་གཤེགས་སྙིང་པོ་ལ་སྐུར་བ་འདེབས་པ་ལྟ་བུ་]ཡོངས་སུ་དག་པ་ལ་ཡོངས་སུ་མ་དག་པར་ལྟ་བ་དང༌། [འཁོར་བ་འདྀ་མྱང་འདས་དང་དབྱེར་མེད་དུ་འདོད་པ་ལ་སོགས་]ཡོངས་སུ་མ་དག་པ་ལ་ཡོངས་སུ་དག་པར་ལྟ་བ་དང༌། [འཁོར་བ་འདྀ་མྱང་འདས་དང་དབྱེར་མེད་དུ་འདོད་པ་ལ་སོགས་]མི་འགོག་པ་ལ་འགོག་པར་ལྟ་བ་དང༌། [བདེ་གཤེགས་སྙིང་པོ་ལ་སྐུར་བ་འདེབས་པ་ལྟ་བུ་]འགོག་པ་ལ་མི་འགོག་པར་ལྟ་བ་དང༌། [གཤིས་ལ་སངས་རྒྱས་མེད་པར་འདོད་པ་ལྟ་བུ་]སྡིག་པ་ལ་མི་སྡིག་པར་ལྟ་བ་དང༌། [དག་པའི་བདག་འདོད་ན་མུ་སྟེགས་དང་འདྲ་ཞེས་པ་ལྟ་བུ་]མི་སྡིག་པ་ལ་སྡིག་པར་ལྟ་བ་དང༌། [བཅས་པ་ཕྲ་མོ་འགའ་ཞིག་ལ་སྡིག་ཆེན་དུ་ལྟ་བ་ལྟ་བུ་]སྡིག་པ་ཡང་བ་ལ་ལྕི་བར་ལྟ་བ་དང༌། [གཤིས་ལ་སངས་རྒྱས་མེད་པར་འདོད་པ་ལྟ་བུ་]སྡིག་པ་ལྕི་བ་ནི་ཡང་བར་ལྟ་བ་དང༌། [བདེ་གཤེགས་སྙིང་པོ་ལ་སྐུར་བ་འདེབས་པ་ལྟ་བུ་]ཐེག་པ་ལ་ཐེག་པ་མ་ཡིན་པར་ལྟ་བ་དང༌། [གཤིས་ལ་སངས་རྒྱས་མེད་པར་འདོད་པ་ལྟ་བུ་]ཐེག་པ་མ་ཡིན་པ་ལ་ཐེག་པར་ལྟ་བ་དང༌། [མཐའ་གཉིས་སྤངས་པའི་དབུས་མི་སྲིད་ཞེས་སོགས་]ལམ་ལ་ལམ་མ་ཡིན་པར་ལྟ་བ་དང༌། [ཐམས་ཅད་རང་སྟོང་དུ་ཤེས་པས་གྲོལ་ཞེས་སོགས་]ལམ་མ་ཡིན་པ་ལ་ལམ་དུ་ལྟ་བ་དང༌། [བདེ་གཤེགས་སྙིང་པོ་ལ་སྐུར་བ་འདེབས་པ་ལྟ་བུ་]བྱང་ཆུབ་ཡང་དག་པ་ལ་ནི་བྱང་ཆུབ་མ་ཡིན་པར་ལྟ་བ་དང༌། [སྟོང་ཚད་ཆོས་སྐུར་འདོད་པ་ལྟ་བུ་]བྱང་ཆུབ་མ་ཡིན་པ་ལ་བྱང་ཆུབ་ཏུ་ལྟ་བ་དང༌། [དུག་ལྔ་ཡེ་ཤེས་ལྔར་འདོད་པ་ལ་སོགས་]སྡུག་བསྔལ་ལ་སྡུག་བསྔལ་མ་ཡིན་པར་ལྟ་བ་དང༌། [དག་པའི་བདག་འདོད་ན་མུ་སྟེགས་དང་འདྲ་ཞེས་པ་ལྟ་བུ་]སྡུག་བསྔལ་མ་ཡིན་པ་ལ་སྡུག་བསྔལ་དུ་ལྟ་བ་དང༌། [རྣམ་རྟོག་ཆོས་སྐུ་ཡིན་ཞེས་སོགས་]ཀུན་འབྱུང་ལ་ཀུན་འབྱུང་མ་ཡིན་པར་ལྟ་བ་དང༌། [བདེ་གཤེགས་སྙིང་པོ་ལ་སྐུར་བ་འདེབས་པ་ལྟ་བུ་]འགོག་པ་ལ་འགོག་པ་མ་ཡིན་པར་ལྟ་བ་དང༌། [དག་པའི་བདག་ལ་སྐུར་བ་འདེབས་པ་ལྟ་བུ་]བདེན་པ་ལ་བདེན་པ་མ་ཡིན་པར་ལྟ་བ་དང༌། [རང་སྟོང་གང་ཡིན་དོན་དམ་དུ་འདོད་ན་]ཀུན་རྫོབ་ལ་དོན་དམ་པར་ལྟ་བ་དང༌། [རང་བཞིན་འོད་གསལ་མི་རྟག་པར་འདོད་པ་ལྟ་བུ་]དོན་དམ་པ་ལ་ཀུན་རྫོབ་ཏུ་ལྟ་བ་དང༌། [དོན་དམ་གཞན་སྟོང་ལ་སྐུར་བ་འདེབས་པ་ལྟ་བུ་]སྐྱབས་སུ་འགྲོ་བ[འི་གནས་]ལ་སྐྱབས་སུ་འགྲོ་བ[འི་གནས་]མ་ཡིན་པར་ལྟ་བ་དང༌། [རང་སེམས་རྣམ་ཤེས་འདི་སངས་རྒྱས་སུ་འདོད་པ་ལ་སོགས་]སྐྱབས་སུ་འགྲོ་བ[འི་གནས་]མ་ཡིན་པ་ལ་སྐྱབས་སུ་འགྲོ་བར་[བྱ་བའི་གནས་སུ་]ལྟ་བ་དང༌། [མྱང་འདས་ཆེན་པོ་བཀའ་འགྱུར་དུ་མི་འདྲི་བ་ལ་སོགས་]སངས་རྒྱས་ཀྱི་བཀའ་ཡང་དག་པ་ལ་ནི་བདུད་ཀྱི་ཚིག་ཅེས་[དོན་གྱིས་]ཟེར་བ་དང༌། [བོད་ཀྱིས་བརྩམས་པའི་རྒྱུད་ལ་སོགས་]བདུད་ཀྱི་ཚིག་ཡང་དག་པ་[སྟེ་ཡིན་ངེས་]ལ་ནི་སངས་རྒྱས་ཀྱི་བཀའ་ཞེས་ཟེར་བ། དེ་ལྟ་བུའི་དུས་ན་དེ་བཞིན་གཤེགས་པ་རྣམས་ཀྱིས་གདོད་ཡོངས་སུ་མྱང་ངན་ལས་འདའ་བའི་མདོ་འདི་གསུང་ངོ༌། །ཞེས་དང༌། རིགས་ཀྱི་བུ་སངས་རྒྱས་ཀྱི་རང་བཞིན་ཞེས་བྱ་བ་ནི། [ཀུན་རྫོབ་སྟོང་པ་མ་ཡིན་གྱི་]དོན་དམ་པ་སྟོང་པའོ། །དོན་དམ་པ་སྟོང་པ་ནི་[རང་བྱུང་]ཡེ་ཤེས་ཞེས་བྱའོ། །དེ་ལ་[རང་རང་ངོ་བོས་]སྟོང་པ་ཞེས་བྱ་བ་ནི་[རང་རང་ངོ་བོས་]སྟོང་པ་དང་[རང་རང་ངོ་བོས་]མི་སྟོང་པ་གཉི་ག་མི་མཐོང་བ[ར་ཕྱོགས་གཅིག་ཏུ་ཆད་པ]འོ། །ཤེས་རབ་ཅན་གྱིས་ནི་[རང་རང་ངོ་བོས་]སྟོང་པ་[ཀུན་རྫོབ་]དང་[རང་རང་ངོ་བོས་]མི་སྟོང་པ་[དོན་དམ་]དང༌།[དོན་དམ་]རྟག་པ་དང་[ཀུན་རྫོབ་འདུས་བྱས་]མི་རྟག་པ་དང༌།[ཁམས་གསུམ་འདི་]སྡུག་བསྔལ་བ་དང་[ཁམས་གསུམ་གཞན་]བདེ་བ་དང་[དག་པའི་]བདག་[དོན་དམ་]དང་བདག་མེད་པ་[ཀུན་རྫོབ་སྟེ་བདེན་གཉིས་ཀྱི་གནས་ལུགས་]ཀུན་[ཇི་ལྟ་བར་]མཐོང་ངོ༌། །[རང་རང་ངོ་བོས་]སྟོང་པ་ཞེས་བྱ་བ་ནི་འཁོར་བ་ཐམས་ཅད་དོ། །[རང་རང་ངོ་བོས་]མི་སྟོང་པ་ཞེས་བྱ་བ་ནི་ཡོངས་སུ་མྱ་ངན་ལས་འདས་པ[ཆེན་པོ]འོ། །[མི་རྟག་པ་དང་སྡུག་བསྔལ་བ་དང་]བདག་མེད་པའི་བར་དུ་འཁོར་བའོ། །[རྟག་པ་དང་བདེ་བ་དང་དག་པའི་]བདག་ཅེས་བྱ་བ་ནི་ཡོངས་སུ་མྱ་ངན་ལས་འདས་པ་[མཁའ་ཁྱབ་]སྟེ། [དེ་ལྟར་རྟོགས་ན་མཐའ་གཉིས་སྤངས་པའི་དབུ་མ་རྟོགས་པ་ཡིན་གྱི་དེ་ལས་གཞན་དུ་]ཐམས་ཅད་སྟོང་པར་མཐོང་ལ། སྟོང་པ་མ་ཡིན་པ་མི་མཐོང་བ་ནི་[མེད་པ་དང་སྐུར་འདེབས་ཀྱི་མཐར་ལྷུང་བས་]ལམ་དབུ་མ་ཞེས་མི་བྱ། ཐམས་ཅད་[མི་རྟག་པ་དང་སྡུག་བསྔལ་བ་དང་]བདག་མེད་པའི་བར་དུ་མཐོང་ལ། [རྟག་པ་དང་བདེ་བ་དང་དག་པའི་]བདག་མི་མཐོང་བ་ནི་[མེད་པ་དང་སྐུར་འདེབས་ཀྱི་མཐར་ལྷུང་བས་]ལམ་དབུ་མ་ཞེས་མི་བྱའོ། །ལམ་དབུ་མ་ཞེས་བྱ་བ་ནི་[མཐའ་དེ་གཉིས་སྤངས་པའི་དབུས་གང་ཡིན་པ་ཕུང་པོ་གསུམ་པ་སྟེ་]སངས་རྒྱས་ཀྱི་རང་བཞིན་ནོ། །དོན་དེ་ལྟ་བས་ན་སངས་རྒྱས་ཀྱི་རང་བཞིན་ནི་རྟག་པ་མི་འགྱུར་ཞིང་འཕོ་བ་མེད་པ་[མཁའ་ཁྱབ་ཏུ་བཞུགས་པ་]སྟེ། མ་རིག་པས་ཁེབས་པས་སེམས་ཅན་ཐམས་ཅད་ཀྱིས་མཐོང་བར་མ་གྱུར་ཏོ། །ཉན་ཐོས་དང་རང་སངས་རྒྱས་ཀྱིས་ཐམས་ཅད་སྟོང་པར་མཐོང་སྟེ། མི་སྟོང་བར་མི་མཐོང་བ་ནས་ཐམས་ཅད་[མི་རྟག་པ་དང་སྡུག་བསྔལ་བ་དང་]བདག་མེད་པའི་བར་དུ་མཐོང་སྟེ། [རྟག་པ་དང་བདེ་བ་དང་དག་པའི་]བདག་ཏུ་མི་མཐོང་ངོ༌། །དེ་བས་ན་དོན་དམ་པའི་སྟོང་པ་མ་ཐོབ་བོ། །དོན་དམ་པའི་སྟོང་པ་[རང་བྱུང་ཡེ་ཤེས་མཁའ་ཁྱབ་]མ་ཐོབ་པའི་ཕྱིར། ལམ་དབུ་མ་མི་སྤྱོད། ལམ་དབུ་མ་མེད་པའི་ཕྱིར་སངས་རྒྱས་ཀྱི་རང་བཞིན་མི་མཐོང་ངོ༌། །ཞེས་དང༌། རིགས་ཀྱི་བུ་གང་ལ་ལ་ཞིག་གིས་ཆོས་ཐམས་ཅད་ལ་རྟག་པ་མེད་པ། བདག་མེད་པ། བདེ་བ་མེད་པ། ཡོངས་སུ་དག་པ་མེད་པར་མཐོང་བ་དང༌། ཆོས་མ་ཡིན་པ་[དོན་དམ་ཆོས་ཉིད་]ཐམས་ཅད་ལ་རྟག་པ་མེད་པ། བདག་མེད་པ། བདེ་བ་མེད་པ། ཡོངས་སུ་དག་པ་མེད་པར་མཐོང་བ་དེས་ནི། [ཆད་པའི་མཐར་ལྷུང་བའི་ཕྱིར་]སངས་རྒྱས་ཀྱི་རང་བཞིན་མི་མཐོང་ངོ༌། །དེ་ལ་[ཆོས་]ཐམས་ཅད་ཅེས་བྱ་བ་ནི་འཁོར་བའོ། །[ཆོས་]ཐམས་ཅད་མ་ཡིན་པ་[སྟེ་ཆོས་ཉིད་]ནི་[དོན་དམ་གྱི་]དཀོན་མཆོག་གསུམ་སྟེ། [མཐའ་གཉིས་སྤངས་པའི་དབུས་མའམ་བར་མ་ཕུང་པོ་གསུམ་པར་བཞུགས་པའོ།།]ཉན་ཐོས་དང་རང་སངས་རྒྱས་ཀྱིས་ཆོས་ཐམས་ཅད་མི་རྟག་པ་དང༌། བདག་མེད་པ། བདེ་བ་མེད་པ། ཡོངས་སུ་མ་དག་པར་མཐོང༌། ཆོས་མ་ཡིན་པ་[དོན་དམ་ཆོས་ཉིད་]ཐམས་ཅད་ལ་ཡང་མི་རྟག་པ། བདག་མེད་པ། བདེ་བ་མེད་པ། ཡོངས་སུ་མ་དག་པར་མཐོང་སྟེ། དོན་དེ་ལྟ་བས་ན་[ཕྱོགས་སུ་ལྷུང་བས་]སངས་རྒྱས་ཀྱི་རང་བཞིན་མི་མཐོང་ངོ༌། །བྱང་ཆུབ་སེམས་དཔའ་ས་བཅུ་པས་ནི་ཆོས་ཐམས་ཅད་ལ་མི་རྟག་པ། བདག་མེད་པ། བདེ་བ་མེད་པ། ཡོངས་སུ་དག་པ་མེད་པར་མཐོང་ལ། ཆོས་མ་ཡིན་པ་[དོན་དམ་ཆོས་ཉིད་]ཐམས་ཅད་ལ་ནི་རྟག་པ་དང༌། བདག་དང༌། བདེ་བ་དང༌། ཡོངས་སུ་དག་པར་ཕྱོགས་ཙམ་ཞིག་མཐོང་སྟེ། དོན་དེ་ལྟ་བས་ན་བཅུ་ཆ་གཅིག་ཙམ་མཐོང་ངོ༌། །སངས་རྒྱས་བཅོམ་ལྡན་འདས་ནི་[ཕྱོགས་སུ་མ་ལྷུང་བ་རྫོགས་པར་ཐུགས་སུ་ཆུད་པས་]ཆོས་ཐམས་ཅད་ལ་མི་རྟག་པ། བདག་མེད་པ། བདེ་བ་མེད་པ། ཡོངས་སུ་དག་པ་མེད་པར་གཟིགས་ལ། ཆོས་མ་ཡིན་པ་[དོན་དམ་ཆོས་ཉིད་]ཐམས་ཅད་ལ་རྟག་པ་དང༌། བདག་དང༌། བདེ་བ་དང༌། ཡོངས་སུ་དག་པར་གཟིགས་ཏེ་དེ་ལྟ་བས་ན་སངས་རྒྱས་ཀྱི་རང་བཞིན་ལག་མཐིལ་དུ་སྐྱུ་རུ་རའི་འབྲས་བུ་གཞག་པ་ལྟར་གཟིགས་སོ། །དོན་དེ་ལྟ་བས་ན་དཔའ་བར་འགྲོ་བའི་ཏིང་ངེ་འཛིན་ནི་མཐར་ཐུག་པ་ཞེས་བྱའོ། །ཞེས་དང༌། བདག་མེད་པ་ལ་བདག་ཏུ་འདུ་ཤེས། བདག་ལ་བདག་མེད་པར་འདུ་ཤེས་པ་ཡང་ཕྱིན་ཅི་ལོག་གོ །[དེ་དག་རྒྱས་པར་བཤད་ན་]འཇིག་རྟེན་པ་ཡང་[ཀུན་རྫོབ་ཀྱི་]བདག་ཡོད་པར་སྨྲ། སངས་རྒྱས་ཀྱི་ཆོས་ལ་ཡང་[དོན་དམ་གྱིས་]བདག་ཡོད་པར་སྨྲ་སྟེ། འཇིག་རྟེན་པ་དག་[ཀུན་རྫོབ་ཀྱི་]བདག་ཡོད་པར་སྨྲ་མོད་ཀྱི། སངས་རྒྱས་ཀྱི་རང་བཞིན་[དག་པའི་བདག་]ཡོད་[པར་རྟོགས་]པ་མ་ཡིན་པས་དེ་ནི་[ཀུན་རྫོབ་]བདག་མེད་པ་ལ་བདག་ཏུ་འདུ་ཤེས་པ་སྟེ་ཕྱིན་ཅི་ལོག་ཅེས་བྱའོ། །སངས་རྒྱས་ཀྱི་ཆོས་[ཉིད་]ཀྱི་བདག་ཡོད་པ་ནི་སངས་རྒྱས་ཀྱི་རང་བཞིན་ནོ། །འཇིག་རྟེན་པ་དག་ནི་སངས་རྒྱས་ཀྱི་ཆོས་ལ་བདག་[གང་ཡང་]མེད་ཅེས་སྨྲ་སྟེ། དེ་བས་ན་[ཆོས་ཉིད་ཀྱི་]བདག་ལ་བདག་མེད་པར་འདུ་ཤེས་པ་ཞེས་བྱའོ། །ཞེས་དང༌། མུ་སྟེགས་ཅན་གྱི་ཆོས་ལ་ནི་ངེས་པར་[ཆོས་ཉིད་ཀྱི་]བདག་[སྟོན་པ་]མེད་དོ། །གང་[ཆོས་ཉིད་ཀྱི་]བདག་ཅེས་བྱ་བ་ནི་[དོན་དམ་གྱི་]དེ་བཞིན་གཤེགས་པ་ཡིན་ནོ། །དེ་ཅིའི་ཕྱིར་ཞེ་ན། [ཆོས་ཉིད་ཀྱི་]སྐུ་མཐའ་ཡས་པ་ཐེ་ཚོམ་གྱི་དྲ་བ་མེད་པ་[རྒྱུ་རྐྱེན་གྱིས་]མི་བྱེད་པ་[སྲིད་པ་ཉེ་བར་]མི་ལེན་པའི་ཕྱིར་རྟག་པ་ཞེས་བྱའོ། །ཞེས་དང༌། དེ་ལ་ཤེས་རབ་ཅེས་བྱ་བ་ནི་འདི་ལྟ་སྟེ། [དོན་དམ་གྱི་]དེ་བཞིན་གཤེགས་པ་ལ་རྟག་པ་དང༌། བདེ་བ་དང༌། བདག་དང༌། ཡོངས་སུ་དག་པར་ལྟ་བ་དང༌། སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པར་ལྟ་བ་དང༌། ཆོས་ཀྱི་མཚན་ཉིད་གཉིས་[གཉིས་]སུ་ལྟ་སྟེ། འདི་ལྟར་[རང་གི་ངོ་བོས་]སྟོང་པ་[ཀུན་རྫོབ་]དང་[རང་གི་ངོ་བོས་]སྟོང་པ་མ་ཡིན་པ་[དོན་དམ་]དང༌། [དོན་དམ་]རྟག་པ་དང༌། མི་རྟག་པ་[ཀུན་རྫོབ་]དང༌། [དོན་དམ་]བདེ་བ་དང༌། [རང་བཞིན་གྱི་]བདེ་བ་མེད་པ་[ཀུན་རྫོབ་]དང༌། [དག་པའི་]བདག་[དོན་དམ་]དང༌། བདག་མེད་པ་[ཀུན་རྫོབ་]དང༌། [གདོད་ནས་]ཡོངས་སུ་དག་པ་[དོན་དམ་]དང༌། [གདོད་ནས་]ཡོངས་སུ་མ་དག་པ་[ཀུན་རྫོབ་]དང༌། ཆོས་ཐ་དད་པ་གཅད་དུ་རུང་བ་[ཀུན་རྫོབ་]དང༌། ཆོས་ཐ་དད་པ་གཅད་དུ་མི་རུང་བ་[དོན་དམ་]དང༌། ཆོས་ཐ་དད་པ་རྐྱེན་ལས་སྐྱེ་བ་[ཀུན་རྫོབ་]དང༌། ཆོས་ཐ་དད་པ་རྐྱེན་ལས་མི་སྐྱེ་བ་[དོན་དམ་]དང༌། ཆོས་ཐ་དད་པ་རྐྱེན་ལས་འབྲས་བུར་གྱུར་པ་[ཀུན་རྫོབ་]དང༌། ཆོས་ཐ་དད་པ་རྐྱེན་ལས་འབྲས་བུར་གྱུར་པ་མ་ཡིན་[པ་དོན་དམ་སྟེ་དེ་ལྟར་བདེན་གཉིས་རྣམ་དབྱེ་ལེགས་]པར་རྟོགས་པ་ནི་ཤེས་རབ་དང་ལྡན་པ་ཞེས་བྱ་སྟེ[གཞན་ནི་དེ་ལྟ་མ་ཡིན་ནོ།]། ཞེས་དང༌། དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག །ཁྱེད་ཀྱིས་མི་ར་རོ་བ་ལ་དཔེ་བླངས་པ་ནི་ཚིག་དང་འབྲུ་ཙམ་ཤེས་པར་ཟད་ཀྱི་དོན་ནི་མ་རྟོགས་སོ། །དེ་ལ་དོན་ཞེས་བྱ་བ་གང་ཞེ་ན། དཔེར་ན་མི་ར་རོ་བས་ཉི་ཟླ་ལ་སོགས་པ་མི་འཁོར་བ་[ལ་]འཁོར་བར་འདུ་ཤེས་པ་དང་འདྲ་བར། སོ་སོའི་སྐྱེ་བོ་ཡང་དེ་དང་འདྲ་སྟེ། ཀུན་ནས་ཉོན་མོངས་པའི་མ་རིག་པས་ཡོངས་སུ་ཁེབས་པས་ན་ཕྱིན་ཅི་ལོག་གི་སེམས་བསྐྱེད་དེ། [ཆོས་ཉིད་ཀྱི་]བདག་ལ་བདག་མེད་པར་འདུ་ཤེས། [དོན་དམ་སྟོང་ཉིད་]རྟག་པ་ལ་མི་རྟག་པར་འདུ་ཤེས། [དོན་དམ་སྟོང་ཉིད་]ཡོངས་སུ་དག་པ་ལ་ཡོངས་སུ་མ་དག་པར་འདུ་ཤེས། [དོན་དམ་སྟོང་ཉིད་]བདེ་བ་ལ་སྡུག་བསྔལ་བར་འདུ་ཤེས་ཏེ། ཀུན་ནས་ཉོན་མོངས་པས་ཡོངས་སུ་ཁེབས་པས་དེ་འདྲ་བར་འདུ་ཤེས་མོད་ཀྱི། དོན་ཁོང་དུ་མ་ཆུད་པས་མི་ར་རོ་བ་དེ་[ཉི་ཟླ་]འཁོར་བའི་གནས་མ་ཡིན་པ་ལ་འཁོར་བར་འདུ་ཤེས་བསྐྱེད་པ་བཞིན་ནོ། །[དག་པའི་]བདག་ཅེས་བྱ་བ་ནི་[དོན་དམ་གྱི་]སངས་རྒྱས་ཞེས་བྱ་བའི་དོན་ཏོ། །[ཆོས་ཉིད་]རྟག་པ་ནི་ཆོས་ཀྱི་སྐུ་ཞེས་བྱ་བའི་དོན་ཏོ། །[ཆོས་ཉིད་]བདེ་བ་ནི་མྱ་ངན་ལས་འདས་པ་[ཆེན་པོ་]ཞེས་བྱ་བའི་དོན་ཏོ། །[ཆོས་ཉིད་]ཡོངས་སུ་དག་པ་ནི་[དོན་དམ་གྱི་]ཆོས་ཞེས་བྱ་བའི་དོན་ཡིན་ན་ཅིའི་ཕྱིར་དགེ་སློང་ཁྱོད་བདག་ཏུ་འདུ་ཤེས་པ་ནི་ང་རྒྱལ་ཅན་ཡིན་ཏེ། འཁོར་བ་ན་འཁོར་རོ་ཞེས་སྨྲ། ཁྱོད་སྨྲ་བ་ལྟར་ན་བདག་[ཅག་]ཀྱང་མི་རྟག་པ་དང༌། སྡུག་བསྔལ་བ་དང༌། བདག་མེད་པའི་འདུ་ཤེས་ལ་ནན་ཏན་བྱེད་དོ་ཞེས་བྱ་བ་ནི་ཡང་དག་པར་དོན་མེད་དོ། །ནན་ཏན་བྱེད་པ་[མི་རྟག་སྡུག་བསྔལ་བདག་མེད་དེ་]གསུམ་པོ་དེ་ལ་ཡང་དག་པའི་དོན་མེད་པས་དེ་མ་ཡིན་པ་ནན་ཏན་བྱེད་པའི་ཆོས་[མི་རྟག་སྡུག་བསྔལ་བདག་མེད་དེ་]གསུམ་པོ་ལས་ལྷག་པ་ངས་བཤད་པར་བྱའོ། །[འཁོར་བ་]སྡུག་བསྔལ་ལ་བདེ་བར་འཛིན་པ་དང༌། [མྱང་འདས་བདེ་གཤེགས་སྙིང་པོ་]བདེ་བ་ལ་སྡུག་བསྔལ་དུ་འཛིན་པ་ནི་ཕྱིན་ཅི་ལོག་གི་ཆོས་[སུ་མཚུངས་]སོ། །[འཁོར་བ་]མི་རྟག་པ་ལ་རྟག་པར་འཛིན་པ་དང༌། [མྱང་འདས་བདེ་གཤེགས་སྙིང་པོ་]རྟག་པ་ལ་མི་རྟག་པར་འཛིན་པ་ནི་ཕྱིན་ཅི་ལོག་གི་ཆོས་[སུ་མཚུངས་]སོ། །[འཁོར་བ་]བདག་མེད་པ་ལ་བདག་ཏུ་འཛིན་པ་དང༌། [མྱང་འདས་བདེ་གཤེགས་སྙིང་པོ་]བདག་ལ་བདག་མེད་པར་འཛིན་པ་ནི་ཕྱིན་ཅི་ལོག་གི་ཆོས་[སུ་མཚུངས་]སོ། །[འཁོར་བ་]ཡོངས་སུ་མ་དག་པ་ལ་ཡོངས་སུ་དག་པར་འཛིན་པ་དང༌། [མྱང་འདས་བདེ་གཤེགས་སྙིང་པོ་]ཡོངས་སུ་དག་པ་ལ་ཡོངས་སུ་མ་དག་པར་འཛིན་པ་ནི་ཕྱིན་ཅི་ལོག་གི་ཆོས་[སུ་མཚུངས་]སོ། །ཕྱིན་ཅི་ལོག་གི་ཆོས་རྣམ་པ་བཞི་པོ་འདི་ནི་ཡང་དག་པ་ཇི་ལྟ་བར་ནན་ཏན་བྱ་བ་གང་ཟག་གིས་མི་ཤེས་སོ། །ཞེས་དང༌། འཇིག་རྟེན་ན་ཡང་རྟག་པ་དང༌། བདེ་བ་དང༌། བདག་དང་ཡོངས་སུ་དག་པ[ར་བརྟགས་པ་ཙམ་]ཡོད་དོ། །འཇིག་རྟེན་ལས་འདས་པ་ལ་ཡང་རྟག་པ་དང་བདེ་བ་དང་བདག་དང་ཡོངས་སུ་དག་པ[དོན་དམ་]ཡོད་དོ། །འཇིག་རྟེན་གྱི་ཆོས་ནི་བརྗོད་དུ་ཡོད་ལ་དོན་མེད་པའོ། །འཇིག་རྟེན་ལས་འདས་པ་ནི་བརྗོད་དུ་ཡང་ཡོད་ལ་དོན་ཡང་ཡོད་དོ། །དེ་ཅིའི་ཕྱིར་ཞེ་ན། འཇིག་རྟེན་གྱི་ཆོས་ནི་ཕྱིན་ཅི་ལོག་བཞི་དང་བཅས་པས་དོན་མི་རྟོགས་སོ། །དེ་ཇི་ལྟ་ཞེ་ན། འདུ་ཤེས་ཕྱིན་ཅི་ལོག་དང༌། སེམས་ཕྱིན་ཅི་ལོག་དང༌། ལྟ་བ་ཕྱིན་ཅི་ལོག་དང༌། ཕྱིན་ཅི་ལོག་གསུམ་གྱིས་འཇིག་རྟེན་པ་ནི་[མྱང་འདས་བདེ་གཤེགས་སྙིང་པོ་]བདེ་བ་ལ་སྡུག་བསྔལ་དུ་ལྟ། [མྱང་འདས་བདེ་གཤེགས་སྙིང་པོ་]རྟག་པ་ལ་མི་རྟག་པར་ལྟ། [མྱང་འདས་བདེ་གཤེགས་སྙིང་པོ་]བདག་ལ་བདག་མེད་པར་ལྟ། [མྱང་འདས་བདེ་གཤེགས་སྙིང་པོ་]ཡོངས་སུ་དག་པ་ལ་ཡོངས་སུ་མ་དག་པར་ལྟ་སྟེ་ཕྱིན་ཅི་ལོག་ཅེས་བྱའོ། །ཕྱིན་ཅི་ལོག་པས་ན་འཇིག་རྟེན་པས་ནི་ཚིག་ཏུ་སྨྲ་བ་ཤེས་ཀྱི་དོན་མི་ཤེས་སོ། །དེ་ལ་དོན་ཞེས་བྱ་བ་གང་ཞེ་ན། བདག་མེད་པ་ནི་འཁོར་བ་ཞེས་བྱའོ། །བདག་ཅེས་བྱ་བ་ནི་དེ་བཞིན་གཤེགས་པའོ། །མི་རྟག་པ་ནི་ཉན་ཐོས་དང་རང་སངས་རྒྱས་སོ། །རྟག་པ་ནི་དེ་བཞིན་གཤེགས་པའི་ཆོས་ཀྱི་སྐུའོ། །སྡུག་བསྔལ་བ་ནི་མུ་སྟེགས་ཅན་ཐམས་ཅད་དོ། །བདེ་བ་ནི་ཡོངས་སུ་མྱ་ངན་ལས་འདས་པའོ། །ཡོངས་སུ་མ་དག་པ་ནི་འདུས་བྱས་པའི་ཆོས་སོ། །ཡོངས་སུ་དག་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཡང་དག་པའི་ཆོས་[ཉིད་]ཡིན་ཏེ། [དེ་ལྟར་ལེགས་པར་ཕྱེ་སྟེ་རྟོགས་པ་]དེ་བས་ན་[འདུ་ཤེས་དང་སེམས་དང་ལྟ་བ་]ཕྱིན་ཅི་མ་ལོག་པ་ཞེས་བྱའོ།།དེ་ལྟར་[འདུ་ཤེས་དང་སེམས་དང་ལྟ་བ་]ཕྱིན་ཅི་མ་ལོག་པས་ཚིག་ཏུ་བརྗོད་པ་ཡང་ཤེས་ལ་དོན་ཡང་ཤེས་སོ། །གང་ཞིག་ཕྱིན་ཅི་ལོག་བཞི་པོ་ཡོངས་སུ་སྤོང་བར་འདོད་ན། དེ་ལྟ་བུའི་ཚུལ་དུ་[མྱང་འདས་བདེ་གཤེགས་སྙིང་པོ་]རྟག་པ་དང་[མྱང་འདས་བདེ་གཤེགས་སྙིང་པོ་]བདེ་བ་དང་[མྱང་འདས་བདེ་གཤེགས་སྙིང་པོ་]བདག་དང་[མྱང་འདས་བདེ་གཤེགས་སྙིང་པོ་]ཡོངས་སུ་དག་པར་རིག་པར་བྱའོ། །ཞེས་སོགས་དང༌། ལྷའི་ཟླ་བས་བསྒྱུར་བའི་མྱང་འདས་ཆེན་པོར། ཡང་དེའི་ཚེ་བསླབ་པའི་གཞི་ལྔ་བླངས་ཤིང་ཚུལ་ཁྲིམས་དང་གོ་ཆ་དང་ཡོན་ཏན་དང་ལྡན་པའི་དགེ་བསྙེན་འོད་དྲི་མ་མེད་པར་གྲགས་པའི་རྒྱལ་པོ་ལ་སོགས་པ་དགེ་བསྙེན་གང་གཱའི་ཀླུང་གཉིས་ཀྱི་བྱེ་མ་སྙེད་ཐམས་ཅད་ཟུང་དང་ཟུང་དུ་ཤེས་པར་འདོད་པ་ཤ་སྟག་སྟེ། [འཁོར་བ་]སྡུག་བསྔལ་བ་དང༌། [མྱང་འདས་བདེ་གཤེགས་སྙིང་པོ་]བདེ་བ་དང༌། [མྱང་འདས་བདེ་གཤེགས་སྙིང་པོ་]རྟག་པ་དང༌། [འཁོར་བ་]མི་རྟག་པ་དང༌། [མྱང་འདས་བདེ་གཤེགས་སྙིང་པོ་]བདག་ཡོད་པ་དང༌། [འཁོར་བ་]བདག་མེད་པ་དང༌། [འཁོར་བ་]སྟོང་པ་དང༌། [མྱང་འདས་བདེ་གཤེགས་སྙིང་པོ་]སྟོང་པ་མ་ཡིན་པ་དང༌།[མྱང་འདས་བདེ་གཤེགས་སྙིང་པོ་]དེ་ཁོ་ན་དང༌། [འཁོར་བ་]དེ་ཁོ་ན་མ་ཡིན་པ་དང༌། [མྱང་འདས་བདེ་གཤེགས་སྙིང་པོ་]སྐྱབས་དང་[འཁོར་བ་]སྐྱབས་མ་ཡིན་པ་དང༌། [འཁོར་བ་]སེམས་ཅན་དང༌། [མྱང་འདས་བདེ་གཤེགས་སྙིང་པོ་]སེམས་ཅན་མེད་པ་དང༌།[མྱང་འདས་བདེ་གཤེགས་སྙིང་པོ་]བརྟན་པ་དང༌། [འཁོར་བ་]བརྟན་པ་མ་ཡིན་པ་དང༌། [མྱང་འདས་བདེ་གཤེགས་སྙིང་པོ་]ཞི་བ་དང༌། [འཁོར་བ་]ཞི་བ་མ་ཡིན་པ་དང༌། [འཁོར་བ་]འདུས་བྱས་དང༌།[མྱང་འདས་བདེ་གཤེགས་སྙིང་པོ་]འདུས་མ་བྱས་དང༌། [མྱང་འདས་བདེ་གཤེགས་སྙིང་པོ་]ཐེར་ཟུག་དང༌། [འཁོར་བ་]ཐེར་ཟུག་མ་ཡིན་པ་དང༌། [མྱང་འདས་བདེ་གཤེགས་སྙིང་པོ་]ཡོངས་སུ་མྱ་ངན་ལས་[རང་བཞིན་གྱིས་]འདས་པ་དང༌། [འཁོར་བ་]ཡོངས་སུ་མྱ་ངན་ལས་འདས་པ་མ་ཡིན་པ་ལ་སོགས་པའི་ཁྱད་པར་དང༌། [དེ་དག་གི་ནང་ནས་གཙང་བདག་བདེ་དང་རྟག་པའི་བདེ་གཤེགས་སྙིང་པོ་]ཁྱད་པར་དུ་འཕགས་པ་ཤེས་པར་འདོད་པ་ཤ་སྟག་སྟེ། ཞེས་དང༌། ཁྱེད་[འཁོར་བ་]སྟོང་པ་དང༌། [མྱང་འདས་བདེ་གཤེགས་སྙིང་པོ་]སྟོང་པ་མ་ཡིན་པའམ། [མྱང་འདས་བདེ་གཤེགས་སྙིང་པོ་]རྟག་པ་དང༌།[འཁོར་བ་]མི་རྟག་པའམ། [མྱང་འདས་བདེ་གཤེགས་སྙིང་པོ་]སྐྱབས་དང༌། [འཁོར་བ་]སྐྱབས་མ་ཡིན་པའམ། [འཁོར་བ་]འགྲོ་བ་དང༌། [མྱང་འདས་བདེ་གཤེགས་སྙིང་པོ་]མི་འགྲོ་བའམ། [མྱང་འདས་བདེ་གཤེགས་སྙིང་པོ་]རྟེན་དང་[འཁོར་བ་]རྟེན་མ་ཡིན་པའམ། [མྱང་འདས་བདེ་གཤེགས་སྙིང་པོ་]ཐེར་ཟུག་དང༌། [འཁོར་བ་]ཐེར་ཟུག་མ་ཡིན་པའམ། [མྱང་འདས་བདེ་གཤེགས་སྙིང་པོ་]བརྟན་པ་དང༌། [འཁོར་བ་]བརྟན་པ་མ་ཡིན་པའམ། [འཁོར་བ་]སེམས་ཅན་དང༌།[མྱང་འདས་བདེ་གཤེགས་སྙིང་པོ་]སེམས་ཅན་མ་ཡིན་པའམ། [མྱང་འདས་བདེ་གཤེགས་སྙིང་པོ་]ཡང་དག་པ་དང༌། [འཁོར་བ་]ཡང་དག་པ་མ་ཡིན་པའམ། [མྱང་འདས་བདེ་གཤེགས་སྙིང་པོ་]བདེན་པ་དང༌།[འཁོར་བ་]བདེན་པ་མ་ཡིན་པའམ། [བདེ་གཤེགས་སྙིང་པོ་རང་བཞིན་གྱིས་]མྱ་ངན་ལས་འདས་པ་དང༌།[འཁོར་བ་]མྱ་ངན་ལས་འདས་པ་མ་ཡིན་པའམ། [མྱང་འདས་བདེ་གཤེགས་སྙིང་པོ་]གསང་བ་དང༌། [འཁོར་བ་]གསང་བ་མ་ཡིན་པ་དང༌། [འཁོར་བ་གཟུངས་འཛིན་]གཉིས་དང༌། [མྱང་འདས་བདེ་གཤེགས་སྙིང་པོ་]གཉིས་སུ་མེད་པ་དང༌། དེ་བཞིན་དུ་ཆོས་རྣམ་པ་དུ་མ་དག་ལ་སོམ་ཉིའམ་ཡིད་གཉིས་སམ་ཐེ་ཚོམ་ཟ་བ་ཅི་དང་ཅི་ཡོད་པ་དེ་དང་དེ་དག་ཞུས་ཤིག་དང་[ཐེ་ཚོམ་གྱི་དྲ་བ་]ཐམས་ཅད་གཅད་པར་བྱའོ། །[མྱང་འདས་བདེ་གཤེགས་སྙིང་པོ་]བདུད་རྩིའི་མཆོག་ཀྱང་ཁྱེད་ལ་བསྟན་པར་བྱ་སྟེ་དེའི་འོག་ཏུ་ཡོངས་སུ་མྱ་ངན་ལས་འདའ་བར་བྱའོ། །ཞེས་སོགས་དང༌། རྒྱུད་བླ་མའི་འགྲེལ་པར། དེ་ལ་ཕྱིན་ཅི་ལོག་ལ་མངོན་པར་དགའ་བ་ནི་ཉན་ཐོས་དང༌། རང་སངས་རྒྱས་དག་ལ་བརྗོད་དེ། དེ་ཅིའི་ཕྱིར་ཞེ་ན། འདི་ལྟར་དེ་དག་ཀྱང་དེ་བཞིན་གཤེགས་པའི་སྙིང་པོ་རྟག་པ་ཉིད་དུ་བསྒོམ་པར་བྱ་བ་[ཡིན་པ་]ལས། སླར་དེ་རྟག་པའི་འདུ་ཤེས་སུ་སྒོམ་པ་ལས་བཟློག་ནས་མི་རྟག་པའི་འདུ་ཤེས་སུ་སྒོམ་པ་ལ་མངོན་པར་དགའ་བ་ཉིད་དང༌། དེ་བཞིན་གཤེགས་པའི་སྙིང་པོ་བདེ་བར་བསྒོམ་པར་བྱ་བ་[ཡིན་པ་]ལས། སླར་བདེ་བའི་འདུ་ཤེས་སྒོམ་པ་ལས་བཟློག་ནས་སྡུག་བསྔལ་བའི་འདུ་ཤེས་སུ་སྒོམ་པ་ལ་མངོན་པར་དགའ་བ་ཉིད་དང༌། དེ་བཞིན་གཤེགས་པའི་སྙིང་པོ་བདག་ཏུ་བསྒོམ་པར་བྱ་བ་[ཡིན་པ་]ལས། སླར་དེ་ལ་བདག་གི་འདུ་ཤེས་སྒོམ་པ་ལས་བཟློག་ནས། བདག་མེད་པའི་འདུ་ཤེས་སྒོམ་པ་ལ་དགའ་བ་ཉིད་དང༌། དེ་བཞིན་གཤེགས་པའི་སྙིང་པོ་གཙང་བར་བསྒོམ་པར་བྱ་བ་[ཡིན་པ་]ལས། སླར་དེ་ལ་གཙང་བའི་འདུ་ཤེས་སྒོམ་པ་ལས་བཟློག་ནས་མི་གཙང་བའི་འདུ་ཤེས་སྒོམ་པ་ལ་མངོན་པར་དགའ་བ་ཉིད་ཀྱི་ཕྱིར་རོ། །དེ་ལྟར་རྣམ་གྲངས་འདིས་ནི་ཆོས་ཀྱི་སྐུ་ཐོབ་པ་དང་འགལ་བའི་ལམ་ལ་མངོན་པར་དགའ་བའི་ཕྱིར་མཆོག་ཏུ་རྟག་པ་དང༌། བདེ་བ་དང་བདག་དང་སྡུག་པའི་མཚན་ཉིད་ཀྱི་ཁམས་[ཏེ་དབྱིངས་]དེ་ནི་ཉན་ཐོས་དང་རང་སངས་རྒྱས་ཐམས་ཅད་ཀྱི་ཡང་སྤྱོད་ཡུལ་མ་ཡིན་ཞེས་བཤད་པ་ཡིན་ནོ། །ཇི་ལྟར་[བདེ་གཤེགས་སྙིང་པོ་]དེ་[ཉན་རང་]ཕྱིན་ཅི་ལོག་ལ་མངོན་པར་དགའ་བ་[ཐམས་ཅད་]མི་རྟག་པ་དང་[ཐམས་ཅད་]སྡུག་བསྔལ་བ་དང་[ཐམས་ཅད་]བདག་མེད་པ་དང་[ཐམས་ཅད་]མི་སྡུག་པའི་འདུ་ཤེས་ཅན་རྣམས་ཀྱི་སྤྱོད་ཡུལ་མ་ཡིན་པ་དེ་ལྟར་རྒྱས་པར་ཡོངས་སུ་མྱ་ངན་ལས་འདས་པ་ཆེན་པོའི་མདོར། བཅོམ་ལྡན་འདས་ཀྱིས་རྫིང་གི་ཆུའི་ནོར་བུའི་དཔེས་རབ་ཏུ་བསྒྲུབས་ཏེ། འདི་ལྟ་སྟེ། དགེ་སློང་དག་དཔེར་ན་སོ་ཀའི་དུས་ལ་བབ་པ་ན་སྐྱེ་བོ་དག་ཁྲུས་རས་བཅིངས་ཏེ། རང་རང་གི་རྒྱན་དང་ཉེ་བར་སྤྱོད་པ་དག་གིས་ཆུ་ལ་རྩེའོ། །དེ་ནས་དེར་གཅིག་གིས་རིགས་དང་ལྡན་པའི་ནོར་བུ་བཻཌཱུརྻ་ཆུའི་ནང་དུ་བཞག་པ་དང༌། དེ་ནས་བཻཌཱུརྻ་དེ་[ལེན་པ]འི་དོན་དུ་དེ་དག་ཐམས་ཅད་རྒྱན་བཞག་ནས་ཞུགས་པར་གྱུར་ཏོ། །རྫིང་གི་ཆུ་དེ་ཡང་ནོར་བུའི་མཐུས་ནོར་བུའི་འོད་དང་འདྲ་བར་སྣང་ངོ༌། །དེ་དག་དེ་ལྟར་སྣང་བའི་ཆུ་དེ་མཐོང་ནས་ཨེ་མའོ་ནོར་བུའོ་སྙམ་པའི་ཡོན་ཏན་གྱི་འདུ་ཤེས་རབ་ཏུ་ཞུགས་སོ། །དེ་ནས་[རྫིང་]དེ་ན་ཡོད་པའི་གསེག་མའམ་གྱོ་མོ་དེ་དག་ལ་ནོར་བུའོ་སྙམ་ནས་[ལག་པས་]བཟུང་སྟེ་བདག་གིས་ནོར་བུ་རྙེད་དོ་སྙམ་ནས་[ཕྱིར་]ཕྱུང་ངོ༌། །ཕྱུང་ནས་ཀྱང་རྫིང་བུའི་འགྲམ་དུ་བལྟས་པ་ན། འདི་ནི་ནོར་བུ་མ་ཡིན་ནོ་སྙམ་པའི་འདུ་ཤེས་རབ་ཏུ་འཇུག་གོ །དེ་ནས་དེ་ལ་ཐབས་མཁས་ཤིང་ཡིད་གཞུངས་པ་གཅིག་གིས་ནོར་བུ་དེ་ཡང་དག་པར་རྙེད་པར་གྱུར་ཏོ། །དགེ་སློང་དག་དེ་བཞིན་དུ་[རྫིང་གི་གསེག་མ་ལ་]ནོར་བུ་[འོ་སྙམ་དུ་འཛིན་པ་]ལྟར་ཆོས་ཀྱི་དེ་ཁོ་ན་མི་ཤེས་པ་ཁྱེད་ཀྱིས་ཐམས་ཅད་མི་རྟག་པ་དང༌། ཐམས་ཅད་སྡུག་བསྔལ་བ་དང༌། ཐམས་ཅད་བདག་མེད་པ་དང་ཐམས་ཅད་མི་སྡུག་པའོ། །ཞེས་འཛིན་པ་ཐམས་ཅད་ཀྱིས་བསྒོམས་ཤིང་བསྒོམས་པ་མང་དུ་བྱས་ཤིང་མང་དུ་བྱས་པས་ཉེ་བར་བཞག་པ་དེ་ཐམས་ཅད་ནི་[མཐར་ཐུག་གི་]དོན་མེད་དོ། །དགེ་སློང་དག་དེའི་ཕྱིར་[ནོར་བུར་བློས་བཟུང་ཡང་དོན་ལ་]རྫིང་གི་གསེག་མ་དང་གྱོ་མོར་རྣམ་པར་གནས་པ་ལྟར་མི་འགྱུར་བར་ཁྱེད་ཅག་རྣམས་ཐབས་ལ་མཁས་པར་གྱིས་ཤིག །དགེ་སློང་དག་ཁྱེད་ཀྱིས་གང་དང་གང་ཐམས་ཅད་མི་རྟག་པ་དང༌། ཐམས་ཅད་སྡུག་བསྔལ་བ་དང༌། ཐམས་ཅད་བདག་མེད་པ་དང༌། ཐམས་ཅད་མི་གཙང་བའོ་ཞེས་འཛིན་པ་ཐམས་ཅད་ཀྱིས་བསྒོམས་ཤིང་བསྒོམས་ལ་མང་དུ་བྱས་པ་དེ་དང་དེ་ཉིད་ལ་རྟག་པ་དང་བདེ་བ་དང་བདག་དང་སྡུག་པ[འི་མཐར་ཐུག་པ་རྟོགས་པ་དང་མཐོང་བ་དང་ཐོབ་པ་]ཉིད་ཡོད་པ་མ་ཡིན་ནོ། །ཞེས་རྒྱས་པར་ཆོས་ཀྱི་དེ་ཁོ་ན་ཉིད་དོན་དམ་པ་རྣམ་པར་བཞག་པ་ལས་བརྩམས་ཏེ། ཕྱིན་ཅི་ལོག་ཏུ་གྱུར་པ་བསྟན་པ་ནི་མདོ་ཇི་ལྟ་བ་བཞིན་དུ་རྟོགས་པར་བྱའོ། །དེ་ལ་[དོན་དམ་]སྟོང་པ་ཉིད་ལས་སེམས་རྣམ་པར་གཡེངས་པ་ནི་ཐེག་པ་ལ་གསར་དུ་ཡང་དག་པར་ཞུགས་པའི་བྱང་ཆུབ་སེམས་དཔའ་[དོན་དམ་]སྟོང་པ་ཉིད་ཀྱི་དོན་གྱི་ཚུལ་དེ་བཞིན་གཤེགས་པའི་སྙིང་པོ་[མཐོང་ཞིང་རྟོགས་པ་]ལས་ཉམས་པ་དག་ལ་བརྗོད་དོ། །ཞེས་གསུངས་སོ། །