བཤད་པའི་དོན་བསྡུས་ཏེ་གདམས་ཤིང་སྨོན་ལམ་གདབ་པ།
དེ་ལྟ་བས་ན་ཡང་དག་པའི་ལྟ་བ་རྣམ་པར་དག་པས་ནི་ཆོས་རྣམས་ཀྱི་གནས་ལུགས་ཇི་ལྟར་ཡིན་པ་དང་ཇི་ལྟར་གནས་པ་བཞིན་དུ་ལེགས་པར་རྟོགས་དགོས་ཏེ། དོན་དང་མཐུན་པར་རྟོགས་དགོས་པའི་ཕྱིར་རོ། །དེ་ལ་དོན་ནི་བདེན་པ་གཉིས་དང་འཁོར་འདས་གཉིས་དང་བདེ་གཤེགས་སྙིང་པོ་དང་གློ་བུར་དྲི་མ་ལ་སོགས་པའི་རང་བཞིན་ནམ་མཚན་ཉིད་ཇི་ལྟར་གནས་པ་སྟེ། འགའ་ཞིག་ནི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་དང་མི་གཙང་བ་ལ་སོགས་པར་གནས་ལ། འགའ་ཞིག་ནི་དེ་རྣམས་ལས་བཟློག་པར་ཡང་གནས་སོ། །དེ་བཞིན་དུ་རང་སྟོང་གཞན་སྟོང་དང༌། རང་བྱུང་གཞན་བྱུང་དང༌། རང་རིག་གཞན་རིག་དང༌། རང་རིག་ལ་ཡང་རྣམ་ཤེས་རང་རིག་དང༌། ཡེ་ཤེས་རང་རིག་དང༌། ཡེ་ཤེས་རང་རིག་ལ་ཡང་རང་བྱུང་གཞན་བྱུང་ངམ་འགོག་བདེན་ཡེ་ཤེས་དང་ལམ་བདེན་ཡེ་ཤེས་སམ་ཡང་དག་ཡེ་ཤེས་[ཀྱི་རང་རིག་]དང་དེ་བཞིན་ཉིད་ཀྱི་རང་རིག་གམ་འདུས་བྱས་འདུས་མ་བྱས་ཀྱི་ཡོངས་གྲུབ་གཉིས་ཀྱི་རང་རིག་གི་ཁྱད་པར་དང༌། ཤེས་དང་ཤེས་བྱ་གཅིག་མི་གཅིག་དང༌། རྣམ་ཤེས་ཡེ་ཤེས་གཅིག་མི་གཅིག་དང༌། གཟུང་བ་དང་འཛིན་པ་གཅིག་མི་གཅིག་དང༌། སྲིད་གསུམ་གཅིག་མི་གཅིག་དང༌། སྲིད་གསུམ་སྐྱེ་འཇིག་ཡོད་མེད་དང༌། སྲིད་གསུམ་སྐད་ཅིག་ལས་འདས་མ་འདས་དང༌། ཀུན་ནས་དང་བ་ཡིན་མིན་གྱི་སྲིད་གསུམ་དང༌། སངས་རྒྱས་སམ་ཆོས་སྐུ་ཡིན་མིན་གྱི་ཁམས་གསུམ་[དང་སྲིད་གསུམ་]ལ་སོགས་པ་དང༌། བདེན་གཉིས་དབྱེར་ཡོད་དབྱེར་མེད་དང༌། བདེན་བཞི་དབྱེར་ཡོད་དབྱེར་མེད་དང༌། སྐུ་གསུམ་དབྱེར་ཡོད་དབྱེར་མེད་དང༌། འཁོར་འདས་དབྱེར་ཡོད་དབྱེར་མེད་དང༌། རྒྱུ་འབྲས་དབྱེར་ཡོད་དབྱེར་མེད་དང༌། གཞི་འབྲས་དབྱེར་ཡོད་དབྱེར་མེད་དང༌། གཟུང་འཛིན་དབྱེར་ཡོད་དབྱེར་མེད་དང༌། རྣམ་ཤེས་ཡེ་ཤེས་དབྱེར་ཡོད་དབྱེར་མེད་དང༌། རྟེན་དང་བརྟེན་པ་དབྱེར་ཡོད་དབྱེར་མེད་དང༌། བརྗོད་བྱ་རྗོད་བྱེད་དབྱེར་ཡོད་དབྱེར་མེད་དང༌། དབྱངས་དང་གསལ་བྱེད་དབྱེར་ཡོད་དབྱེར་མེད་དང༌། ཕུང་པོ་ཁམས་སོགས་དབྱེར་ཡོད་དབྱེར་མེད་[དང༌། གཙོ་འཁོར་དབྱེར་ཡོད་དབྱེར་མེད་དང༌། དུས་གསུམ་དབྱེར་ཡོད་དབྱེར་མེད་དང༌། ཁམས་གསུམ་དབྱེར་ཡོད་དབྱེར་མེད་དང༌། ཐེག་གསུམ་དབྱེར་ཡོད་དབྱེར་མེད་དང༌། སྐྱབས་གསུམ་དབྱེར་ཡོད་དབྱེར་མེད་དང༌། འགྲོ་བ་རིགས་དྲུག་དབྱེར་ཡོད་དབྱེར་མེད་]ལ་སོགས་པ་དང༌། འགལ་འདུས་སྐྱོན་ཡོད་སྐྱོན་མེད་དང༌། [ཡོད་པར་རྟོགས་པ་ལ་སྐྱོན་ཡོད་སྐྱོན་མེད་དང༌། མེད་པར་རྟོགས་པ་ལ་སྐྱོན་ཡོད་སྐྱོན་མེད་དང༌། རྟག་པར་རྟོགས་པ་ལ་སྐྱོན་ཡོད་སྐྱོན་མེད་དང༌། ཆད་པར་རྟོགས་པ་ལ་སྐྱོན་ཡོད་སྐྱོན་མེད་ལ་སོགས་པ་དང་]དངོས་འགལ་ལ་ཕུང་གསུམ་ཡོད་མེད་དང༌། [གཤིས་ཀྱི་]གནས་ལུགས་ལ་ཡོད་པ་དང་མེད་པ་དང༌། རྟེན་འབྲེལ་གྱི་ཆོས་ལས་འདས་མ་འདས་དང༌། རྣམ་ཤེས་ཀྱི་ཆོས་ལས་འདས་མ་འདས་དང༌། སྐད་ཅིག་གི་ཆོས་ལས་འདས་མ་འདས་དང༌། རྟོག་གེའི་ཆོས་ལས་འདས་མ་འདས་དང༌། འཇིག་རྟེན་དཔེ་ལས་འདས་མ་འདས་[དང༌། དངོས་པོར་ཡོད་མེད་ལས་འདས་མ་འདས་]ལ་སོགས་པའི་ཁྱད་པར་དང༌། རང་བཞིན་གཉུག་མ་དང་བཅོས་མ་གློ་བུར་བའི་ཁྱད་པར་དང༌། རྣམ་པར་དག་པ་ལ་རང་བཞིན་གྱིས་དག་པ་དང༌། གཉེན་པོས་དག་པར་བྱས་པའི་ཁྱད་པར་དང༌། དེ་བཞིན་དུ་བྲལ་བ་དང་གཙང་བ་དང་ཞི་བ་དང་དབེན་པ་དང་འགགས་པ་དང་སྤངས་པ་དང་ཟད་པ་དང་ནུབ་པ་ཞེས་བྱ་བ་ལ་སོགས་པ་རྣམས་ལ་ཡང་གཉིས་གཉིས་སུ་གནས་པ་དང༌། དེ་ལྟར་སྤངས་པ་དང་གནད་གཅིག་པའི་རྟོགས་པ་ལ་ཡང་ཚུལ་གཉིས་གཉིས་སུ་གནས་པ་དང༌། རང་བཞིན་གྱིས་སྟོང་པར་གསུངས་པ་ལ་གང་མེད་པ་དང༌། དེའི་ལྷག་མ་གང་ཡིན་པའི་ཁྱད་པར་དང༌། བདག་དང་སེམས་ཅན་དང་སྲོག་དང་གསོ་བ་ལ་སོགས་པ་མེད་པར་གསུངས་པ་ལ་གང་མེད་པ་དང༌། དེའི་ལྷག་མ་གང་ཡིན་པའི་ཁྱད་པར་དང༌། དེ་བཞིན་དུ་མ་སྐྱེས་པ་དང་མཚན་མ་མེད་པ་དང་སྤྲོས་པ་མེད་པ་དང༌། མཐའ་དང་བྲལ་བ་[དང༌། སྐྱེ་འགག་འཕོ་འགྱུར་དང་བྲལ་བ་]ལ་སོགས་པ་དང༌། དག་པ་དང་བྲལ་བ་[དང་དབེན་པ་]ལ་སོགས་པ་རྣམས་ལ་ཡང་གང་མ་སྐྱེས་པ་ནས་གང་དང་བྲལ་བའི་བར་དང༌། དེའི་གཞིའམ་ལྷག་མ་གང་ཡིན་པའི་ཁྱད་པར་དང༌། དབུ་མ་ལ་སྣང་བཅས་སྣང་མེད་ཀྱི་ཁྱད་པར་དང༌། སེམས་ཙམ་ལ་དོན་དམ་ཀུན་རྫོབ་[དང་]རང་བཞིན་བཅོས་མ་[དང་]གཉུག་མ་གློ་བུར་བའི་ཁྱད་པར་དང༌། ངོ་བོ་ཉིད་མེད་པ་ལ་མེད་ཚུལ་གྱི་ཁྱད་པར་[གསུམ་མམ་གཉིས་]དང༌། གནས་གྱུར་པ་ལ་གྱུར་ཚུལ་གྱི་ཁྱད་པར་[ངོ་བོ་འགྱུར་མི་འགྱུར་]དང༌། སྟོང་པ་ཉིད་ལ་དངོས་པོ་མེད་པ་དང༌། དངོས་པོ་མེད་པའི་ངོ་བོ་ཉིད་དམ་རང་གི་དངོས་པོ་དང༌། གཞན་གྱི་དངོས་པོས་སྟོང་པ་ཉིད་ཀྱི་ཁྱད་པར་དང༌། རྨི་ལམ་སྒྱུ་མ་སོགས་དང་འདྲ་བར་གསུངས་པ་ལ་ཀུན་རྫོབ་འདྲ་ཚུལ་དང་དོན་དམ་འདྲ་ཚུལ་གྱི་ཁྱད་པར་དང༌། ནམ་མཁའ་དང་འདྲ་བར་གསུངས་པ་ལ་ཀུན་རྫོབ་འདྲ་ཚུལ་དང་དོན་དམ་འདྲ་ཚུལ་གྱི་ཁྱད་པར་དང༌། ཅི་ཡང་མེད་པར་གསུངས་པ་ལ་གློ་བུར་དྲི་མ་མེད་ཚུལ་དང༌། བདེ་གཤེགས་སྙིང་པོ་ལ་མེད་ཚུལ་གྱི་ཁྱད་པར་དང༌། ཡོད་མེད་ལས་འདས་པར་ཡང་གསུངས་ལ་ཡོད་པར་ཡང་གསུངས་པ་དང༌། རྟག་ཆད་ལས་འདས་པར་ཡང་གསུངས་ལ་རྟག་པར་ཡང་གསུངས་པ་དང༌། རང་བཞིན་མེད་པར་ཡང་གསུངས་ལ་རང་བཞིན་ལྷུན་གྱིས་གྲུབ་པར་ཡང་གསུངས་པ་དང༌། ངོ་བོ་ཉིད་མེད་པར་ཡང་གསུངས་ལ་ངོ་བོ་ཉིད་ཀྱི་སྐུ་ཡོངས་སུ་གྲུབ་པར་ཡང་གསུངས་པ་དང༌། འདུས་མ་བྱས་སུ་ཡང་གསུངས་ལ་འདུས་བྱས་འདུས་མ་བྱས་གཉི་ག་ལས་འདས་པར་ཡང་གསུངས་པ་དང༌། ཆོས་ཐམས་ཅད་ཀྱི་གནས་སུ་ཡང་གསུངས་ལ་ཆོས་གང་ཡང་མི་གནས་པར་གསུངས་པ་དང༌། ཆོས་ཐམས་ཅད་ལ་གནས་པར་ཡང་གསུངས་ལ་ཆོས་གང་ལ་ཡང་མི་གནས་པར་གསུངས་པ་དང༌། རྟེན་དང་བརྟེན་པར་ཡང་གསུངས་ལ། རྟེན་དང་བརྟེན་པ་མེད་པར་ཡང་གསུངས་པ་དང༌། བདག་མེད་པར་ཡང་གསུངས་ལ་བདག་ཡོད་པར་ཡང་གསུངས་པ་དང༌། སྟོང་པར་ཡང་གསུངས་ལ་མི་སྟོང་པར་ཡང་གསུངས་པ་དང༌། ཡོད་པར་ཡང་གསུངས་ལ་མེད་པར་ཡང་གསུངས་པ་དང༌། སྐྱེ་བར་ཡང་གསུངས་ལ་མི་སྐྱེ་བར་ཡང་གསུངས་པ་དང༌། [བྱུང་བར་ཡང་གསུངས་ལ་མ་བྱུང་བར་ཡང་གསུངས་པ་དང་]འགགས་པར་ཡང་གསུངས་ལ་འགག་པ་མེད་པར་ཡང་གསུངས་པ་དང༌། འགྱུར་བར་ཡང་གསུངས་ལ་འགྱུར་བ་མེད་པར་ཡང་གསུངས་པ་དང༌། སྤྲོས་པར་ཡང་གསུངས་ལ་སྤྲོས་པ་མེད་པར་ཡང་གསུངས་པ་དང༌། སྤྲོ་བསྡུ་མེད་པར་ཡང་གསུངས་ལ་སྤྲོ་བ་དང་བསྡུ་བར་ཡང་གསུངས་པ་དང༌། དབྱེ་བ་མེད་པར་ཡང་གསུངས་ལ་དབྱེ་བ་མང་པོར་ཡང་གསུངས་པ་དང། དམིགས་པ་དང་བཅས་པར་ཡང་གསུངས་ལ་དམིགས་པ་མེད་པར་ཡང་གསུངས་པ་དང༌། ཡེ་ཤེས་[དང་]རྣམ་ཤེས་ལ་སྣང་བར་ཡང་གསུངས་ལ་མི་སྣང་བར་ཡང་གསུངས་པ་དང༌། རྣམ་པར་རིག་པར་ཡང་གསུངས་ལ་རྣམ་རིག་མེད་པར་ཡང་གསུངས་པ་དང༌། ཁས་ལེན་དམ་བཅའ་མེད་པར་ཡང་གསུངས་ལ་ཡོད་པར་ཡང་གསུངས་པ་དང༌། མྱ་ངན་ལས་འདས་པ་མེད་པའམ་མི་བདེན་པར་ཡང་གསུངས་ལ་ཡོད་པའམ་བདེན་པར་ཡང་གསུངས་པ་དང༌། འབྲས་བུ་ཐོབ་པར་ཡང་གསུངས་ལ་ཐོབ་པ་མེད་པར་ཡང་གསུངས་པ་དང༌། ཆོས་བྱར་ཡོད་ཀྱང་གསུངས་ལ་བྱར་མེད་ཀྱང་གསུངས་པ་[དང༌། ལམ་དང་ཡེ་ཤེས་ཡོད་པར་ཡང་གསུངས་ལ་མེད་པར་ཡང་གསུངས་པ་]ལ་སོགས་པ་འགལ་འགལ་འདྲ་བ་རྣམས་ཀྱི་དགོངས་པ་མི་འགལ་ཞིང་མཐུན་པར་སྒྲུབ་པ་དང༌། ཀུན་གཞི་ལ་ཡེ་ཤེས་དང་རྣམ་ཤེས་སུ་འབྱེད་པའམ། སྦྱང་གཞི་དང་སྦྱང་བྱར་འབྱེད་པ་དང༌། རིགས་ལ་ཡོད་པ་དོན་དམ་རང་བཞིན་གྱི་རིགས་དང༌། མེད་པ་ཀུན་རྫོབ་རྒྱས་པའི་རིགས་ཀྱི་ཁྱད་པར་དང༌། ལམ་ལ་རྟོག་བཅས་རྟོག་མེད་དང༌། ཉེ་རིང་དང༌། མཉམ་རྗེས་ལ་སོགས་པའི་ཁྱད་པར་དང༌། འབྲས་བུ་ལ་བྲལ་འབྲས་བསྐྱེད་འབྲས[དང་]། རང་དོན་གཞན་དོན་[དང་]དོན་དམ་ཆོས་སྐུ། ཀུན་རྫོབ་གཟུགས་སྐུའི་ཁྱད་པར་དང༌། སྤང་བྱའམ་སྦྱང་བྱ་ལ་ཀུན་བརྟགས་[མཐོང་བས་སྤང་བར་བྱ་བ་དང་]ལྷན་སྐྱེས་[སྒོམ་པས་སྤང་བར་བྱ་བ་]དང༌། ཉོན་སྒྲིབ་ཤེས་སྒྲིབ་ལ་སོགས་པའི་ཁྱད་པར་དང༌། དེ་དག་གི་རྩ་བ་དང་བཞོན་པ་གང་ཡིན་པ་དང༌། གཉེན་པོ་ལ་མཉམ་བཞག་གི་ཤེས་རབ་དང༌། རྗེས་ཐོབ་ཀྱི་ཡེ་ཤེས་ལ་སོགས་པའི་ཁྱད་པར་དང༌། དེ་དག་གི་གནད་དམ་རྩ་བ་གང་ཡིན་པ་དང༌། བདེན་པ་གཉིས་དང་བཞི་དང་བཅུ་གཉིས་ཀྱི་ཁྱད་པར་དང༌། སྦྱང་གཞི་སྦྱང་བྱ་སྦྱོང་བྱེད་སྦྱངས་འབྲས་སྦྱོང་མཁན་སྦྱོང་ཚུལ་གྱི་ཁྱད་པར་དང༌། གཞི་ལམ་འབྲས་བུ་དང༌། ལྟ་སྒོམ་སྤྱོད་པ་རྣམས་ལ་དྲང་དོན་ངེས་དོན་དང༌། ཐུན་མོང་དང་ཐུན་མོང་མ་ཡིན་པའི་ཁྱད་པར་དང༌། ཐེག་པ་གསུམ་དང་བསླབ་པ་གསུམ་དང༌། བཀའ་འཁོར་ལོ་གསུམ་དང༌། ངོ་བོ་ཉིད་གསུམ་དང༌། ཕྱི་ནང་གཞན་གསུམ་དང༌། རྒྱུ་དང་འབྲས་བུའི་རང་བཞིན་མདོ་དང་སྔགས་ཀྱི་ཚུལ་ལ་ཁྱད་པར་ཡོད་པ་དང་ཁྱད་པར་མེད་པ་ལ་སོགས་པ་གནས་ཚུལ་གང་ཡིན་པ་ཇི་ལྟ་བ་བཞིན་དུ་ལེགས་པར་རྟོགས་ན་ཡང་དག་པའི་ལྟ་བར་འགྱུར་གྱི་[དེ་དག་ལས་]གཞན་དུ་[ཐམས་ཅད་རང་སྟོང་དུ་རྟོགས་པའམ། དོན་དམ་དུ་ཅིར་ཡང་མ་གྲུབ་ཅིང༌། ཀུན་རྫོབ་ཀྱི་རྣམ་བཞག་ཐམས་ཅད་འཇིག་རྟེན་གྲགས་སྡཻའམ། སེམས་ཙམ་པའམ། མདོ་སྡེ་པའི་རྗེས་སུ་འབྲང་ཞེས་སོགས་དང༌། ཉོན་མོངས་རྣམ་རྟོག་ངོ་ཤེས་ན་ཡེ་ཤེས་དང་ཆོས་སྐུ་ཡིན་ཞེས་སོགས་སུ་ལྟ་]ན་[ཡང་དག་པའི་ལྟ་བ་]དེར་མི་འགྱུར་རོ། ། དེ་ལྟ་བས་ན་མདོ་རྒྱུད་ཟབ་མོ་རྣམས་ཀྱི་དགོངས་པ་ཇི་ལྟ་བ་བཞིན་དུ་ལེགས་པར་རྟོགས་པའི་ལྟ་བ་རྣམ་པར་དག་པ་དང་ནམ་དུ་ཡང་མི་འབྲལ་བར་གྱུར་ཅིག །དེ་ལྟར་རྣམ་པ་དུ་མར་རྣམ་པར་ཕྱེ་སྟེ་ལེགས་པར་གཏན་ལ་ཕབ་ཀྱང་མཉམ་གཞག་ཟབ་མོའི་སྐབས་སུ་ནི་རྟོག་མེད་སྤྲོས་བྲལ་མཉམ་པ་ཉིད་ལ་འཇོག་དགོས་ཤིང༌། གྲོགས་སྤྱོད་པ་དང་དམ་ཚིག་གི་ཚོགས་རྣམ་པར་དག་པ་ཡང་ཚང་དགོས་ཏེ། ལོགས་ཤིག་ཏུ་བསྟན་པ་ལས་ཤེས་པར་བྱའོ། །[དུང་དཀར་པོར་གནས་པ་ལྟ་བུ་]གནས་ལུགས་[དང་དེ་སེར་པོར་མཐོང་བ་ལྟ་བུ་]འཁྲུལ་ལུགས་[གང་ཡིན་]ཇི་བཞིན་ལེགས་རྟོགས་ནས། །[མཁྲིས་ནད་འཇོམས་པའི་སྨན་མཆོག་བསྟེན་པ་ལྟ་བུ་]འཁྲུལ་བ་བཟློག་པའི་ཐབས་ཀྱི་མཆོག་གྱུར་པ། །ཤིན་ཏུ་དག་པའི་ལྟ་སྒོམ་སྤྱོད་པ་རྣམས། །བདག་གཞན་ཀུན་གྱིས་མྱུར་དུ་རྫོགས་བྱེད་ཤོག །རྣམ་དག་ལེགས་པའི་ལམ་གྱི་སྐབས་སོ། །།།