དེ་གཟུགས་ཀྱི་སྐུ་མ་ཡིན་པར་བསྟན་པ།

དེ་ཡང་རྗེ་བཙུན་འདི་ཉིད་ཀྱི་ཞལ་སྔ་ནས། [གཤིས་ལུགས་ཀྱི་]སངས་རྒྱས་བཅོམ་ལྡན་འདས་[ནི་]གཟུགས་ཀྱི་སྐུར་མི་འགྱུར་ཏེ། གང་གི་ཕྱིར་ནམ་མཁའ་ལས་བྱུང་བའི་ཕྱིར་དང༌། རང་བྱུང་བའི་ཕྱིར་དང༌། རྣམ་པ་ཀུན་ལྡན་རྣམ་པ་མེད་པའི་ཕྱིར་དང༌། [བཅུ་དྲུག་གི་ཕྱེད་ཀྱི་ཕྱེད་]ཐིག་ལེ་བཞི་འཛིན་པའི་ཕྱིར་དང༌། [ནག་ཕྱོགས་ཀྱི་]ཆ་[ལ་ཞུགས་པ་]མེད་[དཀར་ཕྱོགས་ཀྱི་]ཆ་ལས་འདས་པ[ཡེ་ཤེས་ཀྱི་ལྷན་ཅིག་སྐྱེས་དགའ་དང་ལྷན་ཅིག་སྐྱེས་པའི་ཡེ་ཤེས་ཡིན་པ]འི་ཕྱིར་དང༌། དགའ་བ་བཞི་པའི་རྩེ་མོ་[རང་བཞིན་འགྱུར་མེད་ཀྱི་ལྷན་ཅིག་སྐྱེས་དགའ་]འཛིན་པའི་ཕྱིར་དང༌། ཆགས་བྲལ་[གྱི་]དང་པོ་[ཆགས་པའི་མཐའ་ལྷན་ཅིག་སྐྱེས་དགའ་]ཆགས་པ་ཆེ་བའི་ཕྱིར་དང༌། བདག་གིར་མི་འཛིན་པའི་ཕྱིར་དང༌། ངར་མི་འཛིན་པའི་ཕྱིར་དང༌། ཁམས་ཐམས་ཅད་མི་ཟད་པའི་ཕྱིར་དང༌། གསང་སྔགས་དོན་ཀུན་སྐྱེད་པ་པོའི་ཕྱིར་དང༌། ཐིག་ལེ་ཆེན་པོ་ཡི་གེ་མེད་པའི་ཕྱིར་དང༌། སྟོང་པ་ཆེན་པོ་འགྱུར་མེད་ལྔའི་ཕྱིར་དང༌། ཐིག་ལེ་སྟོང་པ་འགྱུར་མེད་དྲུག་གི་ཕྱིར་དང༌། མཁའ་ལྟར་མཉམ་པ་ཉིད་ལ་གནས་པའི་ཕྱིར་རོ། །ཞེས་གསུངས་ཏེ། རྒྱུ་མཚན་འདི་རྣམས་ཀྱིས་ནི་འདུས་བྱས་སྐད་ཅིག་མ་དང་ནུས་པ་ཉི་ཚེ་བ་དང་རྟེན་འབྲེལ་ལས་འདས་པར་ཡང་གྲུབ་ཅིང༌། མཐར་ཐུག་གི་སངས་རྒྱས་གང་ཡིན་པ་དེ་གཟུགས་སྐུ་མ་ཡིན་པར་ཡུམ་དང་མྱང་འདས་ལ་སོགས་པ་གསུང་རབ་གཞན་མང་པོར་ཡང་རབ་ཏུ་གྲགས་པ་ཡིན་ནོ། །