རྒྱས་བཤད་ལ་བཅུ། གནས་ལུགས་དེ་ཉིད་སྐུ་བཞི་དང་བཅུ་དྲུག་ལ་སོགས་པར་བཞུགས་ཚུལ།
དེ་བཞིན་དུ། རྣམ་པར་བཅས་ཀྱང་རྣམ་མེད་བཅོམ་ལྡན་འདས་མ་ཤེས་རབ་[ཀྱི་ཕ་རོལ་ཏུ་ཕྱིན་]མ་སྟེ་དེ་ཡིས་འཁྱུད། །སྐྱེ་འཇིག་སྤངས་པའི་འགྱུར་མེད་བདེ་བ་དང་ལྡན་རྒོད་པ་[ལྟ་བ་ལག་བཅངས་]ལ་སོགས་[ཀྱི་]བདེ་བ་སྤངས[པའི་རང་བཞིན་འགྱུར་མེད་ཀྱི་བདེ་བ་ངོ་བོ་ཉིད་སྐུ་སྟེ་མི་བསྐྱོད་པ་ལ་སོགས་པ]། །སངས་རྒྱས་རྣམས་ཀྱི་བསྐྱེད་མཛད་[གཙོ་བོ་སྟེ་]སྐུ་[ལྷག་མ་]གསུམ་རྣམས་དང་ལྡན་ཞིང་དུས་གསུམ་ཡང་དག་རིག །ཀུན་མཁྱེན་མཆོག་གི་དང་པོའི་སངས་རྒྱས་བཅོམ་ལྡན་གཉིས་མེད་[ཡེ་ཤེས་]དེ་ཉིད་ལ་ཕྱག་འཚལ། །ཞེས་པ་དེ་བཞིན་ཉིད་འགྱུར་བ་མེད་པའི་ཡོངས་གྲུབ་གང་ཡིན་པ་དང་པོའི་སངས་རྒྱས་ངོ་བོ་ཉིད་ཀྱི་སྐུ་སྟེ། དོན་དམ་གྱི་སྐུ་ལྷག་མ་གསུམ་དབྱེར་མེད་རོ་གཅིག་ཏུ་ལྡན་པའི་ཕྱིར་ཆོས་ཀྱི་དབྱིངས་ཀུན་ཏུ་འགྲོ་བའི་སྐུ་བཞིའོ། །དེ་ཡང༌། [མདོ་སྡེའི་རྒྱན་དུ།]སྔ་མ་[དྲི་བཅས་དང་]ཕྱི་མར་[དྲི་མེད་ལ་ངོ་བོ་]ཁྱད་མེད་ཀྱང༌། །སྒྲིབ་པ་ཀུན་གྱི་དྲི་མེད་པ། །དེ་བཞིན་ཉིད་ནི་སངས་རྒྱས་འདོད། །དག་པ་མ་ཡིན་མ་དག་མིན། །ཞེས་དང༌། [རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་[ཁྱེའུ་བཞིའི་[ཏིང་ངེ་འཛིན་གྱི་མདོར།]གང་དེ་བཞིན་ཉིད་མ་ཡིན་པ་དེ་དེ་བཞིན་གཤེགས་པ་མ་ཡིན་ནོ། །ཞེས་དང༌། [རྒྱུད་བླ་མར།]དྲི་བཅས་དེ་བཞིན་ཉིད་དང་དྲི་མ་མེད། །ཅེས་སོགས་གསུངས་པས་དེ་བཞིན་ཉིད་ལ་ཁྱད་པར་མེད་ཀྱང་གང་ལ་དྲི་བཅས་སུ་བཞུགས་པ་དེ་དག་པ་གཅིག་ལྡན་དང༌། གང་ལ་དྲི་བྲལ་དུ་བཞུགས་པ་དེ་དག་པ་གཉིས་ལྡན་ཡིན་པའི་ཕྱིར། འགའ་ཞིག་ལ་གཞིའི་ངོ་བོར་བཞུགས་པ་གང་ཡིན་པ་དེ་ཉིད་འགའ་ཞིག་ལ་འབྲས་བུའི་ངོ་བོར་བཞུགས་ཤིང༌། འགའ་ཞིག་ལ་འབྲས་བུའི་ངོ་བོར་བཞུགས་པ་གང་ཡིན་པ་དེ་ཉིད་འགའ་ཞིག་ལ་གཞིའི་ངོ་བོར་ཡང་བཞུགས་པ་ཉིད་ལས་གཞི་འབྲས་ངོ་བོ་དབྱེར་མེད་པ་ཞེས་བྱ་སྟེ། ཇི་ལྟར་ངོ་བོ་དབྱེར་མེད་པའི་ནམ་མཁའ་སྤྲིན་ཚོགས་ཡོད་མེད་ཀྱི་ཡུལ་ཐམས་ཅད་ལ་ཁྱབ་པ་བཞིན་ནོ། །དེའི་ཕྱིར་གཅིག་ཏུ་དག་པ་ཡང་མ་ཡིན་ལ་གཅིག་ཏུ་མ་དག་པ་ཡང་མ་ཡིན་པར་གསུངས་པ་རྣམས་ཀྱི་དགོངས་པ་ནི་དེ་ཡིན་ནོ། །དེ་བཞིན་དུ། ཐམས་ཅད་མཁྱེན་པ་[དང་]ཡེ་ཤེས་སྐུ་དང་ཉིན་མོར་བྱེད་པའི་སྐུ་སྟེ་པད་མའི་འདབ་མ་རྒྱས་པའི་སྤྱན། །སངས་རྒྱས་ཞེས་དཔལ་ལྡན་རྒྱུད་དུ་གང་གསུངས་པ། དེ་ཡང་གདོད་ནས་གྲོལ་བ་ཆོས་ཉིད་ཀྱི་སྐུ་བཞིར་[འགྲེལ་ཆེན་དུ་]གསུངས་པ། ཀུན་མཁྱེན་[དང་]ཡེ་ཤེས་སྐུ་ནི་[རིམ་པ་ལྟར་]རྒྱལ་བའི་བདག་པོའི་ལྷན་ཅིག་སྐྱེས་[སྐུ་]དང་དེ་བཞིན་ཆོས་ཀྱི་སྐུ[ཡིན་ལ]། །ལོངས་སྤྱོད་རྫོགས་དང་སྤྲུལ་པའི་སྐུ་ཡང་[གྲངས་བཞིན་དུ་]ཉིན་བྱེད་སྐུ་དང་པད་མའི་འདབ་མ་རྒྱས་པའི་སྤྱན[ཡིན་ཞིང་]། །[དེ་རྣམས་ཀྱང་རྡོ་རྗེའི་]རྣལ་འབྱོར་དག་པ་[བཞི་དང་]རྣམ་པར་ཐར་[པ་བཞི་]དང་སྲིད་བྲལ་[གྱི་]སྲིད་[གསུམ་ཀུན་ནས་དང་བར་]གནས་[པ་]སྐུ་གསུང་ཐུགས་[དང་]ཆགས་[པ་ཡེ་ཤེས་རྡོ་རྗེ་སྟེ་དེ་ཐམས་ཅད་]ཤེས་རབ་དང༌། །ཐབས་ནི་གཉིས་མེད་གང་ཞིག་ལྷ་མི་ལྷ་མིན་གྱིས་བསྟོད་[པའི་འོས་སུ་གྱུར་པ་]དང་པོའི་སངས་རྒྱས་[ཏེ་]དེ་ལ་འདུད། །ཅེས་པ་སྟེ་[རྒྱུད་དུ་]ཐམས་ཅད་མཁྱེན་པ་ལ་སོགས་པ་[སྐུ་]བཞི[འི་མིང་གཞན་གསུངས་པ་]ནི་ལྷན་ཅིག་སྐྱེས་པ་ལ་སོགས་པའི་སྐུ་བཞི་དང་དག་པའི་རྣལ་འབྱོར་ལ་སོགས་པ་རྡོ་རྗེའི་རྣལ་འབྱོར་བཞི་དང༌། སྟོང་པ་ཉིད་ལ་སོགས་པ་རྣམ་པར་ཐར་པའི་སྒོ་བཞི་དང༌། རྡོ་རྗེའི་སྐུ་ལ་སོགས་པ་རྡོ་རྗེ་བཞིའི་བདག་ཉིད་དེ་བཞིན་ཉིད་དུ་རོ་གཅིག་པ་ཡིན་ཡང་མིང་ཙམ་ཐ་དད་པ་ཉིད་ཀྱི་ཕྱིར། དེ་དང་དེ་དག་རྣམ་གྲངས་ཡིན་ཞིང་ཐམས་ཅད་ཀྱང་ཐབས་ཤེས་གཉིས་སུ་དབྱེར་མེད་པའི་ཡེ་ཤེས་སྲིད་ཞི་དབྱེར་མེད་འགལ་འདུས་སྐྱོན་མེད་ཀྱི་སྲིད་པར་གནས་པས་དཔེར་བྱ་ཀུན་ལས་འདས་པ་ཁམས་གསུམ་པའི་སངས་རྒྱས་སོ། །དེ་བཞིན་དུ། སངས་རྒྱས་སེང་གེའི་ཁྲིར་བཞུགས་[པ་ནི་ཨེ་ལ་ཝཾ་བཞུགས་པ་སྟེ་དེ་ཉིད་]རྡོ་རྗེའི་རྣལ་འབྱོར་[གདོད་ནས་]རྣམ་པར་དག་པ་སྲིད་པ་གསུམ་གྱིས་མཆོད། །དེ་ཉིད་གཅིག་པུ་སྐུ་ཡི་རབ་ཏུ་དབྱེ་བས་རྣམ་པ་བཅུ་དྲུག་སྲིད་མེད་སྲིད་པར་གནས། །ཤེས་[པ་གཞན་]དང་ཤེས་བྱ་[གཞན་གདོད་ནས་]གཅིག་གྱུར་རྒྱལ་བ་མཆོག་གི་དམ་ཚིག་ཡན་ལག་རྣམ་པ་བཅུ་གཉིས་ཀྱི། །བདེན་དོན་བྱང་ཆུབ་སེམས་ནི་རྒྱལ་བའི་རྡོ་རྗེའི་གནས་གྱུར་དུས་ཀྱི་འཁོར་ལོ་ལ་ཕྱག་འཚལ། །ཞེས་པ་ཡང༌། དོན་དམ་སྟོང་ཆེན་ལ་དབྱེར་མེད་དུ་བཞུགས་པའི་དོན་དམ་བདེ་ཆེན་དེ་ཉིད་གཅིག་པུ་རྡོ་རྗེའི་རྣལ་འབྱོར་བཞི་དང༌། རྡོ་རྗེའི་སྐུ་བཞིར་བཞུགས་ཤིང་སྐུ་རེ་རེའང་དོན་དམ་གྱི་སྐུ་གསུང་ཐུགས་དང་ཡེ་ཤེས་སམ་དོན་དམ་གྱི་དགའ་བ་བཞི་བཞིར་རྟག་ཏུ་བཞུགས་པའི་ཕྱིར། དེ་ཉིད་རྣམ་པ་བཅུ་དྲུག་རིག་པ་ཤེས་པ་གཞན་དང་བདེན་དོན་རྣམ་པ་བཅུ་གཉིས་ལྡན་པ་ཤེས་བྱ་གཞན་ཏེ་དེ་དག་དབྱེར་མེད་གཅིག་ཏུ་གདོད་ནས་འདྲེས་པ་[མ་ནིང་]དོན་དམ་བྱང་ཆུབ་ཀྱི་སེམས་རྒྱལ་བའི་རྡོ་རྗེའི་གནས་སུ་གྱུར་ཅིང༌། འཇིག་རྟེན་དཔེ་ལས་འདས་པ་སྲིད་གསུམ་གཞན་ནོ། །དེ་བཞིན་དུ། [དོན་དམ་གྱི་]ཡེ་ཤེས་[ནི་]སྟོང་ཉིད་[ཀྱི་རྣམ་ཐར་གྱི་]ཡེ་ཤེས་ཀྱིས། །ལེགས་[པར་]དག་[པ་]རྣམ་དག་འགྱུར་བ་མེད[པའི་རྣམ་འབྱོར་རོ]། །[དོན་དམ་གྱི་]སེམས་ནི་མཚན་མེད་[རྣམ་ཐར་གྱི་]ཡེ་ཤེས་ཀྱིས། །ལེགས་[པར་]དག་[པ་]གཉིས་མེད་ཆོས་[ཀྱི་]བདག་ཉིད[ཀྱི་རྣལ་འབྱོར་རོ]། །[དོན་དམ་གྱི་]ངག་ནི་སྨོན་མེད་[རྣམ་ཐར་གྱི་]ཡེ་ཤེས་ཀྱིས། །དག་པ་གསང་སྔགས་མི་ཟད་སྒྲ[སྟེ་སྔགས་ཀྱི་རྣལ་འབྱོར་རོ]། །དེ་བཞིན་[དོན་དམ་གྱི་]ལུས་[ནི་]མངོན་[པར་]འདུས་མ་བྱས[པའི་རྣམ་ཐར་གྱི]། །ཡེ་ཤེས་ཀྱིས་དག་[ཅིང་]དྲི་མ་མེད[པ]། །དབྱིབས་[ཀྱི་རྣམ་འབྱོར་]ཏེ་རྫུ་འཕྲུལ་བགྲོད་པ་ཅན[ནོ]། །[དེ་བཞི་ཀའང་]ཤེས་རབ་ཐབས་ཀྱི་བདག་ཉིད་[གཅིག་ཏུ་]སྦྱོར[བ་སྟེ]། །[དེ་རྣམས་]དེ་བཞིན་གཤེགས་པས་[གྲངས་བཞིན་དུ་]རྡོ་རྗེ་སེམས[དཔའ་དང་]། །བྱང་ཆུབ་སེམས་དཔའ་[དང་]སེམས་དཔའ་ཆེ[དང་]། །དམ་ཚིག་སེམས་དཔར་གསུངས་པ་གང༌། །དངོས་དང་དངོས་མེད་ཟད་པའི་གཙོ། །ཐོག་མཐའ་མེད་ཅིང་ཞི་བ་ཡི། །བྱང་ཆུབ་སེམས་དེ་ལ་ཕྱག་འཚལ། །ཞེས་སྔར་བསྟན་པ་དོན་དམ་གྱི་སངས་རྒྱས་ཆོས་ཉིད་ཡོངས་གྲུབ་དེ་ཉིད་ཐོག་མཐའ་མེད་ཅིང་གདོད་ནས་ཞི་བ་བྱང་ཆུབ་ཀྱི་སེམས་ཏེ། དངོས་པོ་དང་དངོས་མེད་ཀྱི་མཐའ་གཉིས་སྤངས་པའི་དབུས་[ཕུང་པོ་གསུམ་པ་]གང་ཡིན་པ་དོན་དམ་པའི་གཙོ་བོའམ་གཙོ་བོ་གཞན་ནོ། །དེ་ཡང་ཆོས་ཀྱི་དབྱིངས་ཀུན་ཏུ་འགྲོ་བའི་ཡེ་ཤེས་དང༌། སེམས་དང་ངག་དང་ལུས་རྣམས་དོན་དམ་པའི་རྣམ་ཐར་སྒོ་བཞིའི་ཡེ་ཤེས་ཀྱིས་གདོད་ནས་དག་པ་རྡོ་རྗེའི་རྣལ་འབྱོར་བཞི་དང༌། སེམས་དཔའ་བཞིའི་བདག་ཉིད་དེ། ཐམས་ཅད་ཀྱང་ཤེས་རབ་ཐབས་ཀྱི་བདག་ཉིད་གདོད་ནས་གཅིག་ཏུ་སྦྱོར་བའོ། །དེ་བཞིན་དུ། སྔར་བསྟན་པའི་དེ་ཉིད་བཅུ་དྲུག་གསལ་བར་མཛད་ནས་ཕྱག་རྒྱ་ཆེན་པོ་ཨེ་ཝཾ་གསུངས་པ། སྤྲུལ་པ་ཡི་ནི་སྐུ་གསུང་ཐུགས། །ཡེ་ཤེས་[རྣམས་]གཅིག་[ཏུ་]སྦྱོར་[ཞིང་]སྡོམ་པ་[སྤྲུལ་པའི་དགའ་བ་བཞི་]དང༌། །ལོངས་སྤྱོད་རྫོགས་པའི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་[ལོངས་སྤྱོད་རྫོགས་པའི་དགའ་བ་བཞི་]དང༌། །དཔལ་ལྡན་ཆོས་ཀྱི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་[ཆོས་སྐུའི་དགའ་བ་བཞི་]དང༌། །ལྷན་ཅིག་སྐྱེས་པའི་སྐུ་གསུང་ཐུགས། །ཡེ་ཤེས་གཅིག་སྦྱོར་སྡོམ་པ་[ངོ་བོ་ཉིད་ཀྱི་དགའ་པ་བཞི་]ནི། །སད་[པ་དང་]རྨི་[ལམ་དང་]གཉིད་སྟུག་[དང་]བཞི་པ་ཡི། །[གནས་སྐབས་]དབང་པོ་གཉིས་སྐྱེས་[ཀྱི་]བདེ་[བ་]མིན་ཞིང༌། །ཡེ་ཤེས་[དང་]སེམས་དང་ངག་དང་ལུས[ཀྱི]། །གནས་[ལྟེ་བ་སྙིང་ཁ་མགྲིན་པ་དཔྲལ་བ་སྟེ་]བཞིར་[འབྲེལ་ནས་]ཡང་དག་མི་གནས་ཏེ། །ལས་ཀྱི་ཕྱག་རྒྱ་ཡོངས་དོར་ཞིང༌། །ཡེ་ཤེས་ཕྱག་རྒྱ་རྣམ་པར་སྤངས། །ཕྱག་རྒྱ་ཆེ་ལས་ཡང་དག་སྐྱེས། །ལྷན་སྐྱེས་གཞན་དང་འགྲོགས་པ་མིན། །རྣམ་རྟོག་སྒོམ་པ་ལས་འདས་པ། །ཕྱག་རྒྱ་ཆེན་པོ་མི་འགྱུར་བདེ། །གཟུང་དང་འཛིན་པ་དབྱིབས་དག་དང༌། །རྟོག་དང་བརྗོད་པ་རྣམ་པར་སྤངས། །དྲི་ཟའི་གྲོང་ཁྱེར་རྣམ་པ་དང༌། །པྲ་ཕབ་པ་ཡི་རང་བཞིན་ཅན། །ཐབས་དང་ཤེས་རབ་བདག་ཉིད་སྦྱོར། །ཨེ་ཝཾ་ཡི་གེ་དེ་ལ་འདུད། །ཅེས་པ་ལ་རང་བཞིན་གཉུག་མ་ཆོས་ཉིད་ཀྱི་དེ་ཉིད་བཅུ་དྲུག་ནི་ཀུན་རྫོབ་གློ་བུར་བའི་ཆོས་ཐམས་ཅད་ལས་གདོད་མ་ཉིད་ནས་རང་བཞིན་གྱིས་འདས་པའི་ཕྱིར་འཇིག་རྟེན་པའི་གནས་སྐབས་བཞི་དང་ཐིག་ལེ་བཞི་དང༌། བསྐྱེད་རིམ་གྱི་སྒོམ་བཟླས་ལ་སོགས་པ་རྣམ་རྟོག་ཐམས་ཅད་དང་གདོད་ནས་བྲལ་བའི་གཞི་ལྷན་ཅིག་སྐྱེས་པའི་ཡེ་ཤེས་པྲ་ཕབ་པ་ལ་སོགས་པ་དང་མཚུངས་པ་ནི་དངོས་པོ་གཞན་དང་སྦྱོར་བ་མ་ཡིན་པས་ལས་དང་ཡེ་ཤེས་ཀྱི་ཕྱག་རྒྱ་སྤངས་ཀྱང་ཐབས་དང་ཤེས་རབ་ཀྱི་བདག་ཉིད་གདོད་ནས་རྟག་ཏུ་སྦྱོར་བ་མ་ནིང་གི་གོ་འཕང་ཕྱག་རྒྱ་ཆེན་མོ་ལས་སྐྱེས་པ་སྟེ། མ་སྐྱེས་པའི་སྐྱེས་པ་ཞེས་པ་འགལ་འདུས་སྐྱོན་མེད་འཇིག་རྟེན་དཔེ་ལས་འདས་[པའི་སྐྱེས་]པའོ། །དེའི་ཕྱིར་འབྲས་བུ་གཞན་དོན་དམ་གྱི་འབྲས་བུ་འགྱུར་མེད་བདེ་ཆེན་དམིགས་པ་མེད་པའི་སྙིང་རྗེ་ཆེན་པོ་ནི་རྒྱུ་གཞན་དམིགས་བཅས་སྟོང་ཉིད་ཕྱག་རྒྱ་ཆེན་མོ་ལས་སྐྱེས་ཀྱང་འདུས་བྱས་མ་ཡིན་ཏེ་རྒྱུ་ཕྱག་རྒྱ་ཆེན་མོ་གང་ལས་ཀྱང་མ་སྐྱེས་པའི་ཕྱིར་རོ། །འདི་ལ་དགོངས་ནས་[དུས་འཁོར་]རྩ་བའི་རྒྱུད་དུ་ཡང༌། [ཐབས་ཤེས་བདེ་སྟོང་ཡུལ་ཡུལ་ཅན་རྟེན་དང་བརྟེན་པ་སྟོང་ཉིད་སྙིང་རྗེ་ལ་སོགས་]ཕན་ཚུན་འཁྱུད་པ་ཞི་བ་སྟེ། །མ་ནིང་གི་ནི་གོ་འཕང་མཆོག །ཤེས་རབ་[སྟོང་ཆེན་ནི་]རྒྱུ་ལས་མ་བྱུང་ཞིང༌། །ཤེས་རབ་[སྟོང་ཆེན་གྱི་]རྒྱུ་ལས་བྱུང་བ་[བདེ་ཆེན་]འབྲས[བུ་སྟེ]། །ཤེས་རབ་[སྟོང་ཆེན་]རྒྱུ་[གང་]ལས་[ཀྱང་]མ་སྐྱེས་ཕྱིར། །ཤེས་རབ་ལས་སྐྱེས་[པ་བདེ་ཆེན་དོན་དམ་ནི་]རྒྱུ་སྐྱེས་མིན། །དེ་ཕྱིར་[རང་བྱུང་]ཡེ་ཤེས་རྒྱུ་སྐྱེས་མིན[པས་དོན་དམ་གྱི]། །ཤེས་རབ་ཡེ་ཤེས་བླ་ན་མེད། །ཅེས་པ་ལ་སོགས་པ་གསུངས་པ་ཡིན་ནོ། །དེ་བཞིན་དུ། [གཤིས་ལུགས་ཟབ་མོའི་]མཁྱེན་པ་བཞི་དང༌། ཧེ་རུ་ཀ་བཞི་དང༌། མངོན་པར་བྱང་ཆུབ་པ་བཞི་དང༌། སྐད་ཅིག་མ་བཞི་དང༌། དེ་ཁོ་ན་ཉིད་བཞི་ལ་སོགས་པ་མཐར་ཐུག་དོན་དམ་གྱི་སྐུ་བཞི་དང་དོན་གཅིག་ཀྱང་མིང་ཐ་དད་པ་སྣ་ཚོགས་ཀྱིས་གསུངས་པ་ཐམས་ཅད་འགྱུར་མེད་ཡོངས་གྲུབ་དེ་བཞིན་ཉིད་ལས་ཕྱེ་བའི་སྐུ་བཞི་ཡིན་གྱི་ཡང་དག་ཡེ་ཤེས་ཕྱིན་ཅི་མ་ལོག་པའི་ཡོངས་གྲུབ་ལས་ཕྱེ་བའམ། གཟུགས་སྐུ་ཉིད་ལས་ཕྱེ་བའམ། ཆོས་སྐུ་གཟུགས་སྐུ་ཚོགས་པ་ལས་ཕྱེ་བ་ནི་མ་ཡིན་ནོ། །