འཁོར་ལོ་བཞིར་དབུགས་ཀྱི་རྒྱུན་འགགས་པས་དེ་རྣམས་ཐོབ་ཚུལ།
དེ་བཞིན་དུ། དུས་ཀྱི་འཁོར་ལོའི་རྒྱུད་ཕྱི་མར་ཡང༌། སྲོག་རླུང་[གདོད་ནས་]འགགས་པས་[འགོག་བདེན་དོན་དམ་གྱི་]ཕྱག་གཉིས་དགྱེས་རྡོར་ཞི་བ་འདིར་ནི་ང་རྒྱལ་འཇོམས་པ་རྡོ་རྗེ་སེམས། །སྲོག་རླུང་[གདོད་ནས་]བཀག་པས་[འགོག་བདེན་དོན་དམ་གྱི་]ཕྱག་བཞི་པ་ཡི་དགྱེས་རྡོར་བྱིན་ཟ་ཞེ་སྡང་འཇོམས་པ་བྱང་ཆུབ་སེམས། །[འགོག་བདེན་དོན་དམ་གྱི་]དགྱེས་པའི་རྡོ་རྗེ་འདོད་ཆགས་འཇོམས་པ་ཞལ་གསུམ་ཕྱག་དྲུག་སེམས་དཔའ་ཆེན་པོར་འགྱུར། །[འགོག་བདེན་དོན་དམ་གྱི་]ཞལ་བརྒྱད་[ཕྱག་བཅུ་དྲུག་]པ་ལ་ཞབས་བཞི་གཏི་མུག་འཇོམས་པ་ཚངས་པ་བདེ་བ་དང་བཅས་དམ་ཚིག་སེམས། །ལྟེ་བར་སྲོག་རླུང་[གདོད་ནས་]བཀག་པས་དྲི་མ་གསུམ་བྲལ་རྡོ་རྗེ་སེམས་དཔའ་དེ་ནི་[འགོག་བདེན་དོན་དམ་གྱི་]སངས་རྒྱས་ཉིད། །སྙིང་ཁར་[གདོད་ནས་དབུགས་]བཀག་པས་དྲི་མ་གསུམ་བྲལ་བྱང་ཆུབ་སེམས་དཔའ་[འགོག་བདེན་དོན་དམ་གྱི་]རང་རྒྱལ་དེ་ནི་སངས་རྒྱས་ཉིད། །མགྲིན་པར་ཉི་མ་དེ་ནི་དྲི་མ་གསུམ་བྲལ་སེམས་དཔའ་ཆེན་པོ་[འགོག་བདེན་དོན་དམ་གྱི་]ཉན་ཐོས་ཉིད་དུ་འགྱུར། །དཔྲལ་བར་རླུང་གི་དབང་པོ་[གདོད་ནས་]འགགས་པས་བདེ་བ་དང་བཅས་དམ་ཚིག་སེམས་དཔའ་[འགོག་བདེན་དོན་དམ་གྱི་]སྟོན་པའི་སྲས། །ཞེས་ཞི་བ་དང་བྱིན་ཟ་དང་ཚངས་པ་ལ་སོགས་པ་རྣམས་དང༌། སངས་རྒྱས་དང་རང་རྒྱལ་དང་ཉན་ཐོས་དང་རྒྱལ་སྲས་རྣམས་ལ་ཡང་བདེན་གཉིས་རྣམ་དབྱེ་ཤེས་པར་བྱས་ནས་དོན་དམ་པའི་ཞི་བ་ལ་སོགས་པ་བཞི་ཚན་ཇི་སྙེད་གསུངས་པ་ཐམས་ཅད་ཧེ་རུ་ཀ་བཞི་ལ་སོགས་པ་གཞི་འབྲས་ངོ་བོ་དབྱེར་མེད་ཀྱི་སྐུ་བཞིའི་རྣམ་གྲངས་སུ་ཤེས་པར་བྱ་ཞིང༌། [དེ་ཐམས་ཅད་དོན་དམ་གྱི་འཁོར་ལོ་བཞི་ལ་དབྱེར་མེད་དུ་བཞུགས་པ་དང༌། ཀུན་རྫོབ་ཀྱི་འཁོར་ལོ་བཞི་ལ་དབྱེར་ཡོད་དུ་བཞུགས་ཀྱང༌། དབུགས་མ་འགགས་བར་ལ་མི་འཐོབ་ཅིང༌། དབུགས་འགགས་པ་ཙམ་གྱིས་ཐོབ་པ་ཡང་རིག་པར་བྱའོ།།]འབུམ་ཕྲག་ལྔ་པར། བཞི་ཚན་གཞན་ཡང་རྒྱ་ཆེར་གསུངས་པ་རྣམས་ཀྱང་དེ་བཞིན་ཏེ། ལུང་ནི་སྔར་གཞིའི་སྐབས་སུ་དྲངས་པ་གང་ཡིན་པའོ། །