ཀུན་རྫོབ་གཟུགས་སྐུའི་ཡོན་ཏན།

ཀུན་རྫོབ་གཟུགས་ཀྱི་སྐུ་ལ་རྣམ་པར་སྨིན་པའི་ཡོན་ཏན་མཚན་སུམ་ཅུ་རྩ་གཉིས་ཞེས་[རྒྱུད་བླ་མ་ལ་སོགས་པར་]གང་གསུངས་པ་དེ་ཡང་གཙོ་བོ་བསྡུས་པ་སྟེ་རྒྱས་པར་ནི་དཔེ་བྱད་བརྒྱད་ཅུ་དང༌། རི་མོའི་རྗེས་ཀྱི་མཚན་བརྒྱད་ཅུ་ལ་སོགས་པ་རྣམ་པ་དུ་མར་གསུངས་སོ། །དེ་ཡང་མདོ་སྡེའི་རྒྱན་དུ། ལོངས་སྤྱོད་རྫོགས་པ[འི་སྐུ་ནི་འཇིག་རྟེན་གྱི་]ཁམས་ཀུན་ཏུ། །འཁོར་[དག་པ་]ཡོངས་[སུ་]སྡུད་[པ་]དང་[སངས་རྒྱས་ཀྱི་]ཞིང་དང་མཚན[དང་]། །སྐུ་དང་ཆོས་[ལ་]རྫོགས་[པར་]ལོངས་སྤྱོད་[པ་]དང༌།།མཛད་པ་དག་གིས་ཐ་དད་དོ། །ཞེས་དང༌། མངོན་རྟོགས་རྒྱན་དུ། [ཀུན་རྫོབ་ལམ་བདེན་གྱིས་བསྡུས་པའི་]མཚན་ནི་སུམ་ཅུ་རྩ་གཉིས་[ཚང་བ་]དང༌། །དཔེ་བྱད་བརྒྱད་ཅུའི་བདག་ཉིད་[ཚང་བའི་སྐུ་]འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཕྱག་ཞབས་[ཀྱི་མཐིལ་ལ་རྩིབས་སྟོང་ལྟེ་བ་དང་བཅས་པའི་]འཁོར་ལོའི་མཚན་དང་རུས་སྦལ་[གྱི་ལྟོ་ལྟར་མཉམ་པའི་]ཞབས[མཐིལ་ཅན]། །ཕྱག་དང་ཞབས་[ཀྱི་]སོར་[མོ་རྣམས་ངང་པའི་ལྟར་]དྲ་བས་འབྲེལ་བ་དང༌། །ཕྱག་ནི་ཞབས་བཅས་འཇམ་ཞིང་གཞོན་ཤ་ཆགས།།འདི་ཡི་སྐུ་ནི་[བོལ་གོང་གཉིས། ཕྱག་གི་རྒྱབ་གཉིས། ཕྲག་གོང་གཉིས། ལྟག་པའི་ཕྱོགས་ཏེ་]བདུན་དག་མཐོ་བ་དང༌། །སོར་མོ་རིང་[བ་]དང་རྟིང་[པ་]ཡངས་[པ་དང་]སྐུ་ཆེ་[ཞིང་]དྲང[བའི་ཚད་ནི་ཡུམ་ལས། སྐུ་ལག་པ་བདུན་དུ་འཕགས་ལ་དྲང་བས་སྐུ་ཆེ་ཞིང་དྲང་བ་ཞེས་སོ]། །ཞབས་འབུར་[ལུང་བུ་]མི་མངོན་སྤུ་[རྣམས་ཀྱི་རྩེ་མོ་]ནི་གྱེན་དུ་ཕྱོགས[ཤིང་གཡས་སུ་འཁྱིལ]། །བྱིན་པ་[གཙང་གཞུག་ཆུང་ཞིང་འདྲིལ་བ་]ཨེ་ན་ཡ[ཤ་བ]འི་[བྱིན་པ་]འདྲ་[ལ་སྨྱིག་མ་དང་ལྡུམ་བུ་དར་བ་ལྟར་ཟླུམ་པ་དང་སྐུ་མ་བཏུད་ཀྱང་]ཕྱག་[མཐིལ་གྱིས་པུས་མོའི་ལྷ་ང་ལ་སླེབ་པར་]རིང་[ཞིང་]མཛེས། །འདོམས་ཀྱི་སྦ་བ་[གླང་པོ་ཆེའི་ལྟར་]སྦུབས་སུ་ནུབ་པའི་མཆོག །ལྤགས་པ་གསེར་མདོག་ལྤགས་པ་སྲབ་པ་དང༌། །[བ་སྤུའི་བུ་ག་རེ་རེ་ལས་]སྤུ་ནི་རེ་རེ་ནས་གཡས་[འཁྱིལ་དུ་]ལེགས་འཁྲུངས་དང༌། །ཞལ་[གྱི་སྨིན་མའི་དབུས་སུ་]མཛོད་སྤུ[རས་བལ་གྱི་སྐུད་པ་ལྟར་དཀར་ཞིང་ཕྲ་བ་སུམ་ཅུ་རྩ་གཉིས་གཡས་སུ་འཁྱིལ་བ]ས་བརྒྱན་[པ་དང་]རོ་སྟོད་[ཆེ་བ་]སེང་གེའི་འདྲ། །འདི་ཡི་དཔུང་པའི་མགོ་ཟླུམ་ཐལ་གོང་རྒྱས། ། འདི་ལ་རོ་མི་ཞིམ་པ་རོ་མཆོག་སྣང༌། །སྐུ་ནི་ནྱ་གྲོ་དྷ་ལྟར་ཆུ་ཞེང་གབ། །གཙུག་ཏོར་[གདུགས་ལྟར་ཡོངས་སུ་གྱུར་ཅིང་མཐོ་བའི་]དབུར་ལྡན་ལྗགས་[ཀྱིས་དབུ་སྐྲ་དང་སྙན་གྱི་བར་དུ་ཁྱབ་པས་]རིང་[ཞིང་]མཛེས་པ་དང༌། །ཚངས་[པའི་]དབྱངས་[ཀྱིས་འཁོར་མཐའ་ཡས་པ་ལ་ཕྱི་ནང་ཀུན་ཏུ་ཁྱབ་པ་དང་]འགྲམ་པ་སེང་གེའི་འདྲ་དང་ཚེམས། །ཤིན་ཏུ་དཀར་དང་ཚད་མཉམ་ཐགས་བཟང་དང༌། །གྲངས་ནི་བཞི་བཅུ་ཐམ་པ་ཚང་བ་དང༌། །སྤྱན་ནི་མཐོན་མཐིང་སྤྱན་[གྱི་]རྫི་[མ་]བ་མཆོག་གི །འདྲ་བ་[སྟེ་ཁྱི་མཆོག་གི་ལྟར་སྤྱན་གྱི་སྟེང་དང་འོག་ནས་བྱུང་བའོ། །དེ་ལྟར་]འདི་དག་སུམ་ཅུ་རྩ་གཉིས་མཚན། །ཞེས་དང༌། ཐུབ་པའི་སེན་མོ་ཟངས་མདོག་དང༌། །[སེན་མོའི་]མདོག་སྣུམ་[སེན་མོ་]མཐོ་དང་སོར་མོ་རྣམས། །ཟླུམ་རྒྱས་བྱིན་གྱིས་ཕྲ་བ་དང༌། །རྩ་མི་མངོན་དང་[རྩ་ལ་]མདུད་པ་མེད། །ལོང་བུ་མི་མངོན་ཞབས་མཉམ་དང༌།།སེང་གེ་གླང་ཆེན་བྱ་[ངང་པའི་རྒྱལ་པོ་]དང་ནི། །ཁྱུ་མཆོག་[གི་]སྟབས་[སུ་]གཤེགས་[ཤིང་]གཡས་ཕྱོགས་[སུ་ལྡོག་ཅིང་གཤེགས་པ་]དང༌། །མཛེས་[པར་]གཤེགས་[ཤིང་]དྲང་[པོར་གཤེགས་པ་]དང་[སྐུ་]འཁྲིལ་བག་ཆགས། །བྱི་དོར་བྱས་འདྲ་རིམ་པར་འཚམ། །གཙང་དང་འཇམ་དང་དག་པའི་སྐུ། །མཚན་ནི་ཡོངས་སུ་རྫོགས་པ་དང༌། ། [ཁྲི་ལྔ་གྲུ་བཞིར་མཉམ་པའི་]སྐུ་ཡི་ཁོ་ལག་ཡངས་ཤིང་བཟང༌། །གོམ་[པ་]སྙོམས་པ་དང་སྤྱན་གཉིས་ནི། །དག་དང་[སྐུ་]གཞོན་ཤ་ཅན་ཉིད་དང༌། །སྐུ་ཞུམ་མེད་དང་རྒྱས་པ་དང༌། །ཤིན་ཏུ་གྲིམས་པའི་སྐུ་ཉིད་དང༌། །ཡན་ལག་ཤིན་ཏུ་རྣམ་འབྱེས་དང༌། །གཟིགས་པ་སྒྲིབ་མེད་དག་པ་དང༌། །དཀུ་ཟླུམ་[ཕྱལ་གྱི་]སྐབས་ཕྱིན་[ཕྱལ་]མ་རྙོངས་དང༌། །[ཕྱལ་]ཕྱང་ངེ་བ་[འམ་ཕྱམ་མེ་བ་]དང་ལྟེ་བ་ནི། །ཟབ་དང་གཡས་ཕྱོགས་[སུ་]འཁྱིལ་བ་དང༌། །ཀུན་ནས་ལྟ་ན་སྡུག་པ་དང༌། །ཀུན་སྤྱོད་གཙང་དང་སྐུ་ལ་ནི། །སྨེ་བ་ནག་བག་མེད་པ་དང༌། །ཕྱག་ནི་ཤིང་བལ་ལྟར་འཇམ་དང༌། །ཕྱག་རིས་[སྣུམ་པའི་]མདངས་ཡོད་[ཕྱག་རིས་]ཟབ་[ལ་]རིང་[བ་]དང༌། །ཞལ་ནི་ཧ་ཅང་མི་རིང་དང༌། །མཆུ་ནི་བིམ་པ་ལྟར་དམར་དང༌། །ལྗགས་མཉེན་པ་དང་སྲབ་པ་དང༌། །[ལྗགས་]དམར་དང་འབྲུག་གི་སྒྲ་ཉིད་དང༌། །གསུང་མཉེན་འཇམ་དང་མཆེ་བ་ཟླུམ། །རྣོ་དང་དཀར་དང་མཉམ་པ་དང༌། །བྱིན་གྱིས་ཕྲ་དང་ཤངས་མཐོ་དང༌། །[ཤངས་]མཆོག་ཏུ་དག་པ་དག་དང་ནི། །སྤྱན་ཡངས་པ་དང་རྫི་མ་སྟུག །པད་མའི་འདབ་མ་འདྲ་བ་དང༌། །སྨིན་ཚུགས་རིང་དང་[སྨིན་མ་]འཇམ་པ་དང༌། །[སྨིན་མ་]སྣུམ་དང་[སྨིན་མའི་]སྤུ་ནི་མཉམ་པ་དང༌། །ཕྱག་རིང་རྒྱས་དང་སྙན་མཉམ་དང་[འདིར་མདོ་ལས། སྙན་ལེགས་ཤིང་སྙན་ཤལ་རིང་བ། །ཞེས་གསུངས་པས། སྙན་ལེགས་རྒྱས་དང་སྙན་མཉམ་དང༌། །ཞེས་པར་བྱུང་ན་འཐད]། །[སྙན་གྱི་དབང་པོ་]ཉམས་པ་རྣམ་པར་སྤངས་པ་དང༌། །དཔྲལ་བ་ལེགས་པར་འབྱེས་པ་དང༌། །[དཔྲལ་བའི་]དབྱེས་ཆེ་བ་དང་དབུ་རྒྱས་དང༌། །དབུ་སྐྲ་བུང་བ་ལྟར་ནག་དང༌། །[དབུ་སྐྲ་]སྟུག་དང་འཇམ་དང་མ་འཛིངས་དང༌། །མི་བཤོར་དྲི་ཞིམ་སྐྱེས་བུ་ཡི། །ཡིད་ནི་འཕྲོག་པར་བྱེད་པ་དང༌། །[ཕྱག་ཞབས་]དཔལ་གྱི་བེའུ་དང་བཀྲ་ཤིས་ནི། །གཡུང་དྲུང་འཁྱིལ་པས་བརྒྱན་པ་སྟེ། །སངས་རྒྱས་དཔེ་བྱད་བཟང་པོར་བཞེད། །ཅེས་དང༌། འཇམ་དཔལ་གྱིས་དྲིས་པའི་མདོར། དེ་བཞིན་གཤེགས་པའི་ཕྱག་ཞབས་ཀྱི་མཐིལ་ལ་རི་མོའི་རྗེས་ཀྱི་མཚན་བརྒྱད་ཅུ་གསུངས་པ་འདི་ལྟ་སྟེ། གདུགས་དང༌། རྒྱལ་མཚན་དང༌། དཔལ་བེའུ་དང༌། ཕྲེང་བ་དང༌། ཀྱོ་བ་ཐང་དང༌། ཅོད་པན་དང༌། དབྱིག་ཏོ་དང༌། བུམ་པ་དང༌། གླང་པོ་དང༌། རྟ་དང༌། སྟག་དང༌། ཆུ་སྲིན་དང༌། ཉ་དང༌། རུས་སྦལ་དང༌། རྨ་བྱ་དང༌། ཀ་ལ་པིང་ཀ་དང༌། ཤང་ཤང་ཏེའུ་དང༌། [སྲོག་ཆགས་]ཙཱ་ཤ་དང༌། ངུར་པ་དང༌། ནེ་ཙོ་དང༌། ངང་པ་དང༌། ཐི་བ་དང༌། ནས་དང༌། སྨན་ཆེན་པོ་དང༌། འོད་མ་དང༌། བ་མེན་དང༌། ཀླུ་དང༌། ར་དང༌། ཁྱུ་མཆོག་དང༌། བིལ་བ་དང༌། [ལྗོན་]ཤིང་དང༌། རི་དྭགས་ནག་པོ་དང༌། ནོར་བུ་རིན་པོ་ཆེ་དང༌། རལ་གྲི་[སྟེ་རལ་གྲི་]མཆོག་དང༌། རྡོ་རྗེ་དང༌། གཞུ་དང༌། མདའ་དང༌། ཤཱཀ་ཏི་དང༌། མདུང་རྩེ་གསུམ་པ་དང༌། བཤོལ་དང༌། གཏུན་དང༌། སྟ་རེ་དང༌། ཞགས་པ་དང༌། གྲུ་དང༌། མུ་ཏིག་གི་རྒྱན་དང༌། སྤྲིན་དང༌། ཚངས་པ་དང༌། དབང་པོ་དང༌། འཁོར་སྲུང་པོ་[སྟེ་ཡུལ་འཁོར་སྲུང་]དང༌། ཆུ་ཡི་ལྷ་དང༌། འཕགས་སྐྱེས་པོ་དང༌། མིག་མི་བཟང་དང༌། ནོར་སྦྱིན་དང༌། དྲང་སྲོང་ཆེན་པོ་དང༌། དཔལ་དང༌། ཉི་མ་དང༌། ཟླ་བ་དང༌། མེ་དང༌། རླུང་དང༌། པད་མོ་དང༌། གཡུང་དྲུང་དང༌། གྲུ་གསུམ་དང༌། དགེ་བའི་སྟན་དང༌། མེ་ལོང་དང༌། རྔ་ཡབ་དང༌། ཙྭ་དུར་བ་དང༌། པུ་རོ་ད་ཤ་དང༌། ཁྱེའུ་དང༌། བུ་མོ་དང༌། རྔ་དང༌། དུང་དང༌། མྲྀ་ཏང་ག་དང༌། གདུ་བུ་དང༌། དཔུང་རྒྱན་དང༌། རྣ་ཆ་དང༌། སོར་གདུབ་དང༌། རྣ་ཆ་འཕྱང་སྤྲུལ་ཅན་དང༌། མེ་ཏོག་བཟང་པོ་དང༌། དཔག་བསམ་ཤིང་དང༌། འཁོར་ལོའི་དཔུང་[སྟེ་དབུས་]གི་སེང་གེ་དང༌། འདི་རྣམས་ནི་རི་མོའི་རྗེས་ཀྱི་མཚན་བརྒྱད་ཅུ་ཡིན་ཏེ། འདི་དག་ནི་དེ་བཞིན་གཤེགས་པའི་ཕྱག་དང་ཞབས་ཀྱི་འཐིལ་ལ་འབྱུང་ངོ༌། །ཞེས་སོ། །ཡོན་ཏན་གྱི་ཁྱད་པར་མང་པོ་གསུངས་པ་གཞན་རྣམས་ནི་འདིར་[ཡི་གེ་མང་དུ་དོགས་ནས་]མ་བྲིས་སོ། །ཀུན་རྫོབ་སྤྲུལ་པའི་སྐུ་ནི། མདོ་སྡེའི་རྒྱན་དུ། སངས་རྒྱས་སྤྲུལ་པ[འི་བྱེ་བྲག་]དཔག་མེད་པ[སྟོན་པ་ནི]། །སྤྲུལ་པའི་སྐུར་ནི་འདོད་པ་སྟེ། །[རང་གཞན་གྱི་]དོན་གཉིས་ཕུན་སུམ་ཚོགས་པ་ནི། །རྣམ་པ་ཐམས་ཅད་[ཀྱང་རང་བཞིན་གྱི་སྐུ་དང་ལོངས་སྤྱོད་རྫོགས་སྐུ་སྟེ་]གཉིས་ལ་གནས། །[པི་ཝང་བསྒྱུར་བ་ལ་སོགས་པ་]བཟོ་[སྤྲུལ་པ་]དང་[སྣ་ཚོགས་སུ་]སྐྱེ་[བ་སྤྲུལ་པ་]དང་བྱང་ཆུབ་ཆེ[ན་པོ་མཆོག་གི་སྤྲུལ་པ་དང་]། །མྱ་ངན་འདས་པ་རྟག་སྟོན་པས། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་པོ[ཡིན]། །ཞེས་དང༌། མངོན་རྟོགས་རྒྱན་དུ་ཡང༌། གང་གིས་འཁོར་བ་ཇི་སྲིད་པར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་འཆད། །ཅེས་གསུངས་སོ། །