མྱང་འདས་ཆེན་པོ་འཁོར་འདས་དབྱེར་མེད་ཀྱི་དོན་དུ་བསྟན་པ།

གལ་ཏེ་མྱང་འདས་ཆེན་པོ་གནས་ལུགས་ལ་གྲུབ་ན་མྱང་འདས་བརྟག་པའི་རབ་བྱེད་ལ་སོགས་པར། མྱང་འདས་བདེན་པར་འདོད་པ་སུན་ཕྱུང་བ་མ་ཡིན་ནམ་ཞེ་ན། དེའི་དགོངས་པ་ལ་ཡང་ཤིན་ཏུ་མཁས་དགོས་ཏེ། རྩ་བ་ཤེས་རབ་ཏུ། གང་ཞིག་[གཉེན་པོས་སྤང་བྱ་]སྤོང་དང་འགགས་པ་ལས། །མྱ་ངན་འདའ་བར་འགྱུར་བར་འདོད[པ་ཀུན་རྫོབ་ཀྱི་མྱང་འདས་གཤིས་ལ་མ་གྲུབ་ཅིང༌། གཤིས་ཀྱི་མྱང་འདས་ནི་གཉེན་པོས་སྤང་བྱ]། །སྤངས་པ་མེད་པ་[ཡོན་ཏན་སྔར་མེད་]ཐོབ་མེད་པ། །ཆད་པ་མེད་པ་རྟག་མེད་པ། །འགག་པ་མེད་པ་སྐྱེ་མེད་པ[འི་གཞི་དོན་དམ་བདེན་པ]། །དེ་ནི[རིགས་པས་མི་གནོད་པའི་]མྱ་ངན་འདས་པར་འདོད། །ཅེས་མྱང་འདས་གཉིས་གསུངས་པ་ལས་སྔ་མ་ལ་དོན་དམ་[པ་རྣམ་པར་དཔྱོད་]པའི་རིགས་པས་གནོད་ཅིང༌། ཕྱི་མ་[མྱང་འདས་ཆེན་པོ་]ནི་ཆོས་ཉིད་ཀྱི་རིགས་པས་གྲུབ་པ་ཉིད་ཀྱི་ཕྱིར། འཕགས་པ་ཀླུ་སྒྲུབ་ཞབས་ཀྱང་བཞེད་ལ། དེ་ཡང་སྲིད་ཞི་དབྱེར་མེད་དམ་འཁོར་འདས་དབྱེར་མེད་ཀྱི་དོན་དུ་བཞེད་དཻ། རིགས་པ་དྲུག་ཅུ་པར། སྲིད་པ་དང་ནི་མྱ་ངན་འདས[ཀུན་རྫོབ་པ]། །གཉིས་པོ་འདི་ནི་[གཤིས་ལ་]ཡོད་མ་ཡིན། །སྲིད་པ་[གཞན་རང་རིག་ཡེ་ཤེས་ཀྱིས་]ཡོངས་སུ་ཤེས་པ་ཉིད། །མྱ་ངན་འདས་[པ་ཆེན་པོ་]ཞེས་བྱ་བར་བརྗོད། །ཅེས་དང༌། དྲི་མེད་འོད་དུ་ཡང༌། སྲིད་པ་[གཞན་རང་རིག་ཡེ་ཤེས་ཀྱིས་]ཡོངས་སུ་ཤེས་པ་ནི་མྱ་ངན་ལས་འདས་པ་[ཆེན་པོ་]ཞེས་བརྗོད་དོ། །ཞེས་དང༌། ཀྱེའི་རྡོ་རྗེར་ཡང༌། [དོན་དམ་གྱི་]ཨེ་ཝཾ་རྣམ་པའི་རང་བཞིན་ཅན། །[དོན་དམ་གྱི་]བདེ་བ་སྲུང་བ[འམ་སྐྱོང་བ་]ཉིད་ཀྱི་ཕྱིར། །[ཆོས་དབྱིངས་ལ་]བདེ་བ་ཅན་ཞེས་རབ་ཏུ་བསྒྲགས། །སངས་རྒྱས་བྱང་ཆུབ་སེམས་དཔའ་དང༌། །རྡོ་རྗེ་འཛིན་པ་རྣམས་ཀྱི་གནས། །[འགོག་བདེན་ཆོས་དབྱིངས་]འདི་ཉིད་[རྣམ་པ་]འཁོར་བ་ཞེས་བྱ་སྟེ། །[འགོག་བདེན་ཆོས་དབྱིངས་]འདི་ཉིད་[ངོ་བོ་]མྱ་ངན་འདས་པ་ཉིད། །འཁོར་བ[འི་རྣམ་པ་]སྤངས་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར། །འཁོར་བ་གཟུགས་དང་སྒྲ་ལ་སོགས། །འཁོར་བ་ཚོར་བ་ལ་སོགས་པ། །འཁོར་བ་དབང་པོ་རྣམས་ཉིད་དེ། །འཁོར་བ་ཞེ་སྡང་ལ་སོགས་པ། །འདི་རྣམས་[ཀྱི་]ཆོས་[ཉིད་འཁོར་བའི་རྣམ་པ་ཅན་]ནི་མྱ་ངན་འདས། །རྨོངས་ཕྱིར་འཁོར་བའི་གཟུགས་ཅན་ཉིད། །རྨོངས་མེད་[ཀྱི་]འཁོར་བ་[གདོད་ནས་]དག་པས་ནི། །འཁོར་བ[འི་རྣམ་པ་དེ་ཉིད་]མྱ་ངན་འདས་[པ་ཡིན་]པར་འགྱུར[ལ]། །[དེ་ཉིད་དོན་དམ་]བྱང་ཆུབ་སེམས་[ཡིན་ཏེ་དེ་]ནི་མྱ་ངན་འདས། །ཀུན་རྫོབ་དོན་དམ་[དབྱེར་མེད་ཀྱི་]ཚུལ་ཅན་ནོ[དོན་དམ་ཀུན་རྫོབ་ཚུལ་ཅན། ཞེས་པར་བྱུང་ནའང་ལེགས]། །ཞེས་དང༌། རྩ་བ་ཤེས་རབ་དང༌། རང་འགྲེལ་ག་ལས་འཇིགས་མེད་དུ་ཡང༌། འཁོར་བ་མྱ་ངན་འདས་པ་ལས། །ཁྱད་པར་ཅུང་ཟད་ཡོད་མ་ཡིན། །མྱ་ངན་འདས་པའང་འཁོར་བ་ལས། །ཁྱད་པར་ཅུང་ཟད་ཡོད་མ་ཡིན། །[དེའི་དགོངས་པ་ནི་]མྱ་ངན་འདས་[པའི་ཡང་དག་པའི་]མཐའ་གང་ཡིན་པ། །དེ་ནི་འཁོར་བའི་[ཡང་དག་པའི་]མཐའ་ཡིན་ཏེ། ། [འཁོར་འདས་ཀྱི་ཡང་དག་མཐའ་]དེ་གཉིས་ཁྱད་པར་ཅུང་ཟད་ནི། །ཤིན་ཏུ་ཕྲ་བའང་ཡོད་མ་ཡིན། །མྱ་ངན་ལས་འདས་པ་དང་འཁོར་བའི་ཡང་དག་པའི་མཐའ་དང་སྐྱེ་བ་མེད་པའི་མཐའ་དང་ཡང་དག་པའི་མཐར་ཐུག་པ་གང་ཡིན་པ་དེ་དག་ནི་[རྣམ་ཤེས་ཀྱིས་]དམིགས་སུ་མེད་པར་མཉམ་པ་ཉིད་ཀྱིས་ཁྱད་པར་ཤིན་ཏུ་ཕྲ་བ་ཅུང་ཟད་ཀྱང་ཡོད་པ་མ་ཡིན་[ཞེས་དང༌། ཕུང་པོ་རྣམས་མི་འབྱུང་བ་ནི་མྱ་ངན་ལས་འདས་པ་ཡིན་]ནོ། །ཞེས་དང༌། དམ་པ་དང་པོའི་རྒྱུད་ལས་ཀྱང༌། ཁམས་གསུམ་པོ་ནི་མ་ལུས་པའི། །སངས་རྒྱས་གཟུགས་ནི་བསྒོམ་པར་བྱ། །ཞེས་དང༌། བདེ་མཆོག་སྟོད་འགྲེལ་དུའང༌། ཁམས་གསུམ་པའི་སངས་རྒྱས་ཀྱི་གཟུགས། ཞེས་སོགས་དང༌། དོན་དམ་པའི་མཚན་མང་པོ་གླུར་བླངས་པར་ཡང༌། སྡུག་གུ་འཇིག་རྟེན་གསུམ་གྱི་མཆོག །ཅེས་དང༌། སྡུག་གུ་འཇིག་རྟེན་གསུམ་མཛེས་པ། །ཞེས་སོགས་དང༌། [དཀྱིལ་འཁོར་ཆོ་ག་ཉི་ཤུ་པ་ལ་སོགས་པ་གཞུང་]གཞན་དུ་ཡང༌། [དོན་དམ་གྱི་]སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་ལྡན་པའི། །[དོན་དམ་གྱི་]སྲིད་པ་དམ་པ་[ཐོབ་པར་]བྱེད་པར་འགྱུར། །ཞེས་སོགས་རྒྱ་ཆེར་གསུངས་པ་རྣམས་ཀྱི་དགོངས་པ་ཟབ་མོ་ནི་བླ་མ་དམ་པའི་མན་ངག་ལས་[འཁོར་འདས་དབྱེར་མེད་ཀྱི་དོན་དུ་]ཁོང་དུ་ཆུད་པར་བྱ་བའོ། །