དེ་ཡང་འགལ་འདུ་སྐྱོན་མེད་ཕུང་པོ་གསུམ་པའི་དོན་དུ་བསྟན་པ།

དེ་བཞིན་དུ་སྲིད་མེད་སྲིད་པ་དང༌། སྲིད་གསུམ་གཅིག་པ་ལ་སོགས་པ་འགལ་འདུས་སྐྱོན་མེད་མང་དུ་གསུངས་པ་རྣམས་ཀྱི་དགོངས་པ་ཡང༌། མྱང་འདས་ཆེན་པོར། [གཤིས་ཀྱི་]དེ་བཞིན་གཤེགས་པའི་སྐུ་ནི་[འདུས་བྱས་ཀྱི་]སྐུ་མ་ཡིན་པའི་[ཆོས་]སྐུ་མི་སྐྱེ་མི་འགོག་པ[འི་འགོག་བདེན་]ཞེས་དང༌། [ཀུན་རྫོབ་ཀྱི་]སེམས་དང་བྲལ་བ་[དོན་དམ་གྱི་]སེམས་དང་བྲལ་བ་ཡང་མ་ཡིན་པ། སེམས་མཉམ་པ་མེད་པ། མེད་པ་ཡང་མ་ཡིན་པ། [ངོ་བོ་]སོང་བ་དང་འོང་བ་མེད་པ། [རྣམ་པ་]སོང་བ་དང་འོང་བ་མེད་པ་ཡང་མ་ཡིན་པ། ཞེས་དང༌། [ཀུན་རྫོབ་ཀྱི་]བདག་པོ་མེད་པ། [དོན་དམ་གྱི་]བདག་པོ་མེད་པ་ཡང་མ་ཡིན་པ། [ཀུན་རྫོབ་ཏུ་]ཡོད་པ་ཡང་མ་ཡིན་[དོན་དམ་དུ་]མེད་པ་ཡང་མ་ཡིན། ཞེས་དང༌། [ཀུན་རྫོབ་ཀྱི་]ཡི་གེ་མ་ཡིན་[དོན་དམ་གྱི་]ཡི་གེ་མེད་པ་ཡང་མ་ཡིན། [ཀུན་རྫོབ་ཀྱི་]ཏིང་ངེ་འཛིན་མ་ཡིན་ཏེ་[དོན་དམ་གྱི་]ཏིང་ངེ་འཛིན་མེད་པ་ཡང་མ་ཡིན། [རྣམ་ཤེས་ཀྱིས་]བལྟར་མེད་པ་[ཡེ་ཤེས་ལ་]མངོན་པར་སྣང་བ། [འབྲེལ་ཏེ་]གནས་མེད་པ་[མ་འབྲེལ་བར་]གནས་མེད་པ་མ་ཡིན་པ། [འབྲེལ་ཏེ་]རྟེན་མེད་པ་[མ་འབྲེལ་བར་]རྟེན་མེད་པ་ཡང་མ་ཡིན་པ། མུན་པ་མ་ཡིན་པ་[ཀུན་རྫོབ་ཀྱི་]སྣང་བ་མ་ཡིན་པ། ཞི་བ་[ཉན་རང་]མ་ཡིན་མ་ཞི་བ་[འཁོར་བ་]མ་ཡིན། [སྐྱོན་]ཇི་ཡང་མེད་པ། [ཡོན་ཏན་]ཇི་ཡང་མེད་པ་མ་ཡིན་པ། ཞེས་དང༌། [ཀུན་རྫོབ་ཀྱི་]ཆོས་མ་ཡིན་པ་[དོན་དམ་དུ་]ཆོས་མ་ཡིན་པ་ཡང་མ་ཡིན་པ། བསོད་ནམས་ཀྱི་ཞིང་[འདུས་བྱས་]མ་ཡིན་པ། བསོད་ནམས་ཀྱི་ཞིང་མ་ཡིན་པ་ཡང་མ་ཡིན་པ། ཞེས་དང༌། [དོན་དམ་]སྟོང་པ་[ཡིན་པ་]ཉིད་[ཀུན་རྫོབ་]སྟོང་པ་ཉིད་[ཡིན་པ་]དང་བྲལ་བ། [ངོ་བོ་]རྟག་ཏུ་གནས་པ་[རྣམ་པ་]རྟག་ཏུ་གནས་པ་མ་ཡིན་པ། ཞེས་དང༌། དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་དོན་བྱས་ཀྱང་སེམས་ཅན་གྱི་དོན་བྱས་པ[འི་རྟོག་པ་]མེད་པ། སེམས་ཅན་རྣམ་པར་བཀྲོལ་ཡང་རྣམ་པར་བཀྲོལ་བ[འི་རྟོག་པ་]མེད་པ། སེམས་ཅན་མངོན་པར་འཚང་རྒྱ་བར་མཛད་ཀྱང་མངོན་བར་འཚང་རྒྱ་བ[འི་རྟོག་པ་]མེད་པ། ཞེས་དང༌། རྟག་ཏུ་ཐེག་པ་གཅིག་ལ་སྤྱོད་ཀྱང་སེམས་ཅན་གྱིས་གསུམ་དུ་མཐོང་བ། [འདུས་བྱས་ཀྱི་]མཚན་ཉིད་མ་ཡིན་པ། [འདུས་མ་བྱས་ཀྱི་]མཚན་ཉིད་ལ་གནས་པ། ཞེས་དང༌། [ཀུན་རྫོབ་ཀྱི་]ཕུང་པོ་དང༌། སྐྱེ་མཆེད་དང༌། ཁམས་མ་ཡིན་པ། [དོན་དམ་གྱི་]ཕུང་པོ་དང༌། སྐྱེ་མཆེད་དང་ཁམས་མ་ཡིན་པ་ཡང་མ་ཡིན། འཕེལ་བ་མ་ཡིན། འབྲི་བ་མ་ཡིན། བཟང་པོ[འི་རྟོག་པའམ་ཀུན་རྫོབ་ཀྱི་བཟང་པོ་]མ་ཡིན། ངན་པ་མ་ཡིན་ནོ། །དེ་བཞིན་གཤེགས་པའི་སྐུ་ནི་དེ་ལྟར་ཡོན་ཏན་ཚད་མེད་པ་དང་ལྡན་ཏེ། [རྣམ་ཤེས་ཀྱིས་]ཤེས་པ་མེད་ཅིང་[ཡེ་ཤེས་ཀྱིས་]མི་ཤེས་པ་ཡང་མེད། [ཀུན་རྫོབ་]མཐོང་བ་མེད་ཅིང་[དོན་དམ་]མི་མཐོང་བ་ཡང་མེད། འདུས་བྱས་མ་ཡིན། འདུས་མ་བྱས་[ནམ་མཁའ་ལྟ་བུ་ནུས་པ་དང་རྣམ་པ་དང་ཡེ་ཤེས་མེད་]པ་ཡང་མ་ཡིན། [ངོ་བོ་]འཇིག་རྟེན་མ་ཡིན། [རྣམ་པ་]འཇིག་རྟེན་མ་ཡིན་པ་ཡང་མ་ཡིན། [ངོ་བོ་]བྱས་པ་མ་ཡིན། [རྣམ་པ་]མ་བྱས་པ་ཡང་མ་ཡིན། [ཆོས་རྣམས་ལ་འབྲེལ་ཏེ་]གནས་པ་མ་ཡིན། [མ་འབྲེལ་བཞིན་དུ་]མི་གནས་པ་ཡང་མ་ཡིན། [ཀུན་རྫོབ་ཀྱི་འབྱུང་བ་]ཆེན་པོ་བཞི་མ་ཡིན། [དོན་དམ་གྱི་འབྱུང་བ་]ཆེན་པོ་བཞི་མ་ཡིན་པ་ཡང་མ་ཡིན། རྒྱུ་[ཀུན་རྫོབ་པ་]མ་ཡིན། རྒྱུ་[གཞན་འགལ་འདུས་སྐྱོན་མེད་ཀྱི་རྒྱུ་]མེད་པ་མ་ཡིན། [ཀུན་རྫོབ་ཀྱི་]སེམས་ཅན་མ་ཡིན། [དོན་དམ་གྱི་]སེམས་ཅན་མེད་པ་མ་ཡིན། [འདུས་བྱས་ཀྱི་]སྐུ་མ་ཡིན་པ། [འདུས་མ་བྱས་ཀྱི་]སྐུ་མ་ཡིན་པ་ཡང་མ་ཡིན་པ། ཞེས་དང༌། [གཟུགས་སྐུ་]མྱ་ངན་ལས་འདའ་བ་[སྟེ་མི་རྟག་པར་སོང་བ་]ན། [ཆོས་སྐུ་]མྱ་ངན་ལས་མི་འདའ་བ་[ཞེས་པ་འདིར་མི་རྟག་པར་མི་འགྲོ་བ་]སྟེ། དེ་བཞིན་གཤེགས་པའི་ཆོས་ཀྱི་སྐུ་ནི་དེ་ལྟ་བུའི་ཡོན་ཏན་ཚད་མེད་པ་དམ་པ་དང་ལྡན་ནོ། །འོད་སྲུང་དེ་ནི་དེ་བཞིན་གཤེགས་པ་ཉག་གཅིག་གིས་མཁྱེན་གྱི། ཉན་ཐོས་དང༌། རང་སངས་རྒྱས་ཀྱིས་ཤེས་པ་མ་ཡིན་ནོ། །ཞེས་སོགས་རྒྱ་ཆེར་གསུངས་པ་སྟེ་མན་ངག་ཟབ་མོ་བཞིན་དུ་རིག་པར་བྱའོ། །དེ་བཞིན་དུ་སྤྲིན་ཆེན་པོའི་མདོར་ཡང༌། [རྣམ་པ་]མི་མཉམ་ཞིང་ཤིན་ཏུ་མི་མཉམ་ལ་[ངོ་བོ་]མི་མཉམ་པ་ཡང་མ་ཡིན་པ་ཞེས་བྱ་བ་དང༌། [རྣམ་པ་]སྡུག་བསྔལ་ཞིང་མི་བདེ་ལ་[ངོ་བོ་]བདེ་བ་ཞེས་བྱ་བ་དང༌། [གཞན་དབང་གིས་]སྟོང་ཞིང་[ཀུན་བརྟགས་ཀྱིས་]ཤིན་ཏུ་སྟོང་ལ་[ཆོས་ཉིད་ཡོངས་གྲུབ་ཀྱིས་]སྟོང་པ་མ་ཡིན་པ་ཞེས་བྱ་བ་དང༌། [རྣམ་པ་]མི་རྟག་ཅིང་ཤིན་ཏུ་མི་རྟག་ལ་[ངོ་བོ་]ཤིན་ཏུ་རྟག་པ་ཞེས་བྱ་བ་དང༌། [ཀུན་རྫོབ་ཀྱི་]བདག་མེད་པར་གྱུར་པ་ལ་ཤིན་ཏུ་[དོན་དམ་གྱི་]བདག་ཉིད་དུ་གྱུར་པ་ཞེས་བྱ་བ་དང༌། [རྣམ་པ་]མི་སྡུག་ཅིང་ཤིན་ཏུ་མི་སྡུག་ལ་[ངོ་བོ་]ཤིན་ཏུ་སྡུག་པ་ཞེས་བྱ་བ་ཡོད་དེ། ཞེས་སོགས་དང༌། མདོ་སྡེའི་རྒྱན་དུ་ཡང༌། [ཆོས་རྣམས་]མེད་པ་གང་ཡིན་དེ་ཉིད་[ཀྱི་གཞི་]ནི། །[ཆོས་ཉིད་]ཡོད་པ་ཡི་ནི་དམ་པ་ཡིན། །[ཀུན་རྫོབ་]རྣམ་པ་ཀུན་ཏུ་མི་དམིགས་པ། །[དོན་དམ་]དམིགས་པ་ཡི་ནི་མཆོག་ཏུ་འདོད། །སྒོམ་པ་རྣམ་པར་མི་ལྟ་བའི། །[ཡེ་ཤེས་ནི་]སྒོམ་པ་དམ་པར་འདོད་པ་སྟེ། །ཐོབ་པར་ལྟ་བ[འི་རྟོག་པ་]མེད་རྣམས་ཀྱི། །[ཆོས་ཉིད་]ཐོབ་པ་ཡང་ནི་དམ་པར་འདོད། །ཅེས་པ་ལ་སོགས་པ་གསུངས་ཤིང༌། མདོ་རྒྱུད་ཟབ་མོ་གཞན་རྣམས་དང༌། སེམས་འགྲེལ་ཁྱད་འཕགས་རྣམས་སུ་དེ་དང་དེ་འདྲ་བ་དག་གི་འགལ་འདུས་སྐྱོན་མེད་ཤིན་ཏུ་མང་ཞིང༌། ཆེས་མང་བར་གསུངས་པ་རྣམས་ཀྱི་དགོངས་པ་ཡང་དོན་ལ་ཇི་ལྟར་གནས་པ་བཞིན་དུ་རྟོགས་པར་བྱ་སྟེ།