ཤིན་ཏུ་ངོ་མཚར་བའི་འཕྲིན་ལས་ཕུན་ཚོགས་བཤད་པ་ལ་གསུམ། འཕྲིན་ལས་དང་དེའི་འབྱུང་གནས་མདོར་བསྟན་པ།

དེ་ལྟར་དེ་བཞིན་གཤེགས་པ་ལ་རྟོག་པ་དང་རྩོལ་བ་མི་མངའ་བཞིན་དུ་གཞན་ལ་ཕན་པ་སྣ་ཚོགས་རྒྱུན་མི་འཆད་པར་ཕྱོགས་དུས་རབ་འབྱམས་ཀུན་ཏུ་ལྷུན་གྱིས་གྲུབ་པར་འཇུག་པའི་འཕྲིན་ལས་མངའ་སྟེ། དེ་ཡང་རྒྱུད་བླ་མར། གདུལ་བྱའི་ཁམས་[གང་ཞིག་]དང་[དེ་]འདུལ་བའི་ཐབས་[མང་པོ་གང་དག་]དང་ནི། །གདུལ་བྱའི་ཁམས་ཀྱིས་གདུལ་བའི་བྱ་བ་[མང་པོ་]དང༌། །དེ་ཡི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་[མི་རྟོག་ཅིང་འབད་མེད་]ལྷུན་གྱིས་གྲུབ་པར་འཇུག །ཅེས་དང༌། གཞན་[གདུལ་བྱ་རྣམས་]གྱི་དབང་གིས་[སངས་རྒྱས་ཀྱི་ཐུགས་རྗེ་]ངེས་[པར་]འབྱུང་[བ་]དང༌། །བདག་དང་སེམས་ཅན་མཚུངས་གཟིགས་དང༌། །མཛད་པ་ཡོངས་སུ་མ་རྫོགས་[ཏེ་རྫོགས་པ་མི་སྲིད་པའི་]ཕྱིར། །འཁོར་བ་[ཇི་]སྲིད་དུ་མཛད་[པ་རྒྱུན་]མི་འཆད། །ཅེས་དང༌། མངོན་རྟོགས་རྒྱན་དུ་ཡང༌། དེ་བཞིན་འཁོར་བ་ཇི་སྲིད་[དུ་སངས་རྒྱས་]འདིའི། །[འཕྲིན་]ལས་ནི་རྒྱུན་མི་འཆད་པར་འདོད། །ཅེས་པ་ལ་སོགས་པ་ནས། ཆོས་ཀྱི་སྐུ་ཡི་འཕྲིན་ལས་ནི། །རྣམ་པ་ཉི་ཤུ་བདུན་དུ་བཞེད། །ཅེས་པའི་མཐར་ཐུག་པ་དང༌། གསེར་འོད་དམ་པའི་མདོར་ཡང༌། རིགས་ཀྱི་བུ་ཇི་ལྟར་ན་ཆོས་ཀྱི་དེ་བཞིན་ཉིད་དང༌། དེ་བཞིན་ཉིད་ཀྱི་ཡེ་ཤེས་ལ་རྣམ་པར་རྟོག་པ་མི་མངའ་བཞིན[དུ]། འཕྲིན་ལས་ལ་མངའ་བརྙེས་པ་ཡིན་ཞེ་ན། རིགས་ཀྱི་བུ་དཔེར་ན། དེ་བཞིན་གཤེགས་པ་མྱ་ངན་ལས་འདས་ཀྱང་སྨོན་ལམ་ལ་མངའ་བརྙེས་པས་འཕྲིན་ལས་ཀྱི་རྣམ་པ་ཐམས་ཅད་ཀྱང་མཛད་དེ། དེ་བཞིན་ཉིད་དང་དེ་བཞིན་ཉིད་ཀྱི་ཡེ་ཤེས་ཀྱིས་དོན་ཐམས་ཅད་གྲུབ་པར་མངའ་མཛད་པ་ཡང་དེ་བཞིན་ནོ། །ཞེས་སོགས་དང༌། མདོ་སྡེའི་རྒྱུན་དུ་ཡང༌། སྟོབས་སོགས་སངས་རྒྱས་[ཀྱི་]ཆོས་རྣམས་ལ། །བྱང་ཆུབ་[ཆེན་པོ་ནི་]རིན་ཆེན་འབྱུང་གནས་[དང་]འདྲ། །འགྲོ་བའི་དགེ་བའི་ལོ་ཐོག་[སྤེལ་བ་]ལ། །སྤྲིན་ཆེན་དང་ཡང་འདྲ་བར་འདོད། །བསོད་ནམས་ཡེ་ཤེས་[ཀྱི་ཆ་ཤས་རྣམས་]རབ་རྫོགས་ཕྱིར། །ཟླ་བ་ཉ་བ་ལྟ་བུར་འདོད། །ཡེ་ཤེས་སྣང་བ་བྱེད་པའི་ཕྱིར། །ཉི་མ་ཆེན་པོ་འདྲ་བར་འདོད། །ཇི་ལྟར་ཉི་མའི་དཀྱིལ་འཁོར་གྱི། །འོད་ཟེར་དཔག་ཏུ་མེད་འདྲེས་ཤིང༌། །རྟག་ཏུ་[སྨིན་པ་དང་སྐེམས་པ་ལ་སོགས་པ་]བྱ་བ་གཅིག་[པ་སྟེ་མཐུན་པ་]ལ་འཇུག །འཇིག་རྟེན་ལ་ཡང་སྣང་བར་བྱེད། །དེ་བཞིན་ཟག་མེད་དབྱིངས་ན་ཡང༌། །སངས་རྒྱས་དཔག་ཏུ་མེད་[པ་གཅིག་ཏུ་]འདྲེས་ཤིང༌། །མཛད་པ་[ཐམས་ཅད་གཞན་ཕན་དུ་]གཅིག་[པ་]ནི་མཛད་པ་ལ། །ཡེ་ཤེས་སྣང་བ་མཛད་པར་འདོད། །དཔེར་ན་ཉི་མའི་འོད་ཟེར་གཅིག །བྱུང་ན་འོད་ཟེར་ཀུན་འབྱུང་བ། །དེ་བཞིན་སངས་རྒྱས་རྣམས་ཀྱི་ཡང༌། །ཡེ་ཤེས་[དུས་གཅིག་ཏུ་]འབྱུང་བར་ཤེས་པར་བྱ། །ཇི་ལྟར་ཉི་མའི་འོད་ཟེར་དག །[སྨིན་སོགས་ཀྱི་བྱ་བ་ལ་]འཇུག་[པ་]ལ་བདག་གིར་བྱ་བ་མེད། །དེ་བཞིན་སངས་རྒྱས་ཡེ་ཤེས་ཀྱང༌། །འཇུག་ལ་བདག་གིར་མཛད་མི་མངའ། །ཉི་མའི་འོད་ཟེར་གཅིག་བཏང་བས། །འགྲོ་བ་སྣང་བར་བྱེད་པ་ལྟར། །དེ་བཞིན་ཤེས་བྱ་ཐམས་ཅད་ལ། །སངས་རྒྱས་ཡེ་ཤེས་ཅིག་ཅར་སྣང༌། །ཞེས་དང༌།