དཔེ་ཤིན་ཏུ་མང་པོས་རབ་ཏུ་རྒྱས་པར་བཤད་པ།

རྒྱུད་བླ་མར་ཡང༌། ཇི་ལྟར་བཻཌཱུར་[ཡ་]དག་པ་ཡི། །རང་བཞིན་[དུ་]ས་སྟེང་འདིར་འགྱུར་ཏེ། །གང་ཕྱིར་ལྷ་ཡི་དབང་པོ་དེར།།ལྷ་ཡི་བུ་མོའི་ཚོགས་དང་བཅས། །རྣམ་པར་རྒྱལ་བའི་ཁང་བཟང་དང༌། །ལྷ་གནས་དེ་ལས་གཞན་དག་དང༌། དེ་ཡི་གཞལ་ཡས་[ཁང་]སྣ་ཚོགས་དང༌། །ལྷ་རྫས་རྣམས་མང་[གི་གཟུགས་བརྙན་ཤར་བ་]དེ་མཐོང་ངོ༌། །དེ་ནས་སྐྱེས་པ་བུད་མེད་ཚོགས། །ས་ཡི་སྟེང་ན་གནས་པ་རྣམས། །[གཟུགས་བརྙན་གྱི་]སྣང་བ་དེ་ནི་མཐོང་གྱུར་ཏེ། །ངེད་ཀྱང་རིང་པོ་མི་ཐོགས་པར། །ལྷ་དབང་འདི་འདྲར་གྱུར་ཅིག་ཅེས། །དེ་འདྲའི་སྨོན་ལམ་འདེབས་བྱེད་ཅིང༌། །དེ་ཐོབ་དོན་དུ་དགེ་བ་ནི། །ཡང་དག་བླངས་ཏེ་གནས་པར་གྱུར། །དེ་དག་དགེ་བའི་ལས་དེས་ན། །འདི་[ལྷ་དབང་སོགས་ཀྱི་གཟུགས་བརྙན་]སྣང་[བ་]ཙམ་[ཡིན་གྱི་དངོས་མ་ཡིན་]ཞེས་དེ་ལྟ་བུར། །ཤེས་པ་མེད་ཀྱང་ས་སྟེང་ནས། །འཕོས་ཏེ་ལྷར་ནི་སྐྱེ་བར་འགྱུར། །[གཟུགས་བརྙན་གྱི་]སྣང་བ་དེ་ནི་ཤིན་ཏུ་ཡང༌། །རྟོག་པ་མེད་ཅིང་གཡོ་བ་མེད། །དེ་ལྟ་མོད་ཀྱི་འཇིག་རྟེན་ན། །དོན་ཆེན་གྱིས་ནི་ཉེ་བར་གནས། །དེ་བཞིན་དད་སོགས་དྲི་མེད་ཅན། །རང་སེམས་དད་སོགས་བསྒོམས་པ་ལ། །སྣང་བ་རྫོགས་པའི་སངས་རྒྱས་ནི། །མཚན་དང་དཔེ་བྱད་དང་ལྡན་པ། །འཆག་པ་དང་ནི་བཞེངས་པ་དང༌། བཞུགས་པ་དང་ནི་གཟིམས་པ་དང༌། །སྤྱོད་ལམ་སྣ་ཚོགས་མཛད་པ་ཅན། །ཞི་བའི་ཆོས་ནི་གསུང་བ་དང༌། །མི་གསུང་མཉམ་པར་བཞག་གྱུར་པ། །ཆོ་འཕྲུལ་རྣམ་པ་སྣ་ཚོགས་དག །མཛད་པ་གཟི་མདངས་ཆེན་པོ་ཅན། །[བསོད་ནམས་བསགས་པའི་]སེམས་ཅན་རྣམས་ཀྱིས་མཐོང་བར་འགྱུར། །དེ་མཐོང་ནས་ཀྱང་[སངས་རྒྱས་ཐོབ་པར་]འདོད་[པ་དང་]ལྡན་པ[འི་ཕྱིར]། །སངས་རྒྱས་ཉིད་[ཐོབ་པའི་]ཕྱིར་[དུ་ལམ་ལ་]རབ་སྦྱོར་ཏེ།།དེ་[འཐོབ་པའི་]རྒྱུ་[ཚོགས་གཉིས་]ཡང་དག་བླངས་ནས་ནི། །འདོད་པའི་གོ་འཕང་ཐོབ་པར་བྱེད། །[སངས་རྒྱས་གཟུགས་སྐུའི་]སྣང་བ་དེ་ནི་ཤིན་ཏུ་ཡང༌། །རྟོག་མེད་གཡོ་བ་མེད་པ་ཉིད། །དེ་ལྟ་ན་ཡང་འཇིག་རྟེན་ན། །དོན་ཆེན་པོས་ནི་ཉེ་བར་གནས། །འདི་ནི་རང་སེམས་[དག་པ་ལ་]སྣང་བ་ཞེས། །སོ་སོའི་སྐྱེ་བོས་མི་ཤེས་མོད། །དེ་ལྟ་ན་ཡང་[སངས་རྒྱས་ཀྱི་]གཟུགས་མཐོང་[བ་]དེ། །[མཐོང་མཁན་]དེ་དག་ལ་ནི་དོན་ཡོད་འགྱུར[ཏེ]། །རིམ་གྱིས་དེ་མཐོང་ལ་བརྟེན་ནས། །ཐེག་པ་འདི་ལ་གནས་པ་རྣམས། །ནང་གི་དམ་པའི་ཆོས་སྐུ་ནི། །ཤེས་རབ་མིག་གིས་མཐོང་བར་འགྱུར། །[དེ་ཉིད་བཤད་པ་ནི་]ཇི་ལྟར་ས་ཀུན་ཉམ་ངའི་གནས་གཞན་དང་བྲལ་དྲི་མེད་བཻཌཱུརྻ། །གསལ་མཛེས་ནོར་བུའི་ཡོན་ཏན་དྲི་བྲལ་དཔལ་ལྡན་[སའི་]སྟེང་ནི་མཉམ་གྱུར་པ། །དག་[ཅིང་དྭངས་པའི་]ཕྱིར་དེར་ནི་ལྷ་བདག་[གི་]གནས་ཚོགས་[དང་]ལྷ་དབང་[དང་འཁོར་]ལྷ་ཡི་[བུ་མོ་སོགས་ཀྱི་]གཟུགས་ཤར་ཏེ། །རིམ་གྱིས་ས་ཡི་ཡོན་ཏན་[ཤིན་ཏུ་དྭངས་པ་དེ་དང་]བྲལ་ཕྱིར་དེ་ནི་སླར་ཡང་མི་སྣང་འགྱུར། །དེ་དངོས་ཐོབ་ཕྱིར་བསྙེན་གནས་བརྟུལ་ཞུགས་ངེས་པར་སྦྱིན་སོགས་[དགེ་བ་]ལ་ཕྱོགས་པ། །བུད་མེད་སྐྱེས་[པ་ལ་]སོགས་སྨོན་པའི་སེམས་ཀྱིས་མེ་ཏོག་ལ་སོགས་འཐོར་བ་ལྟར། །དག་པའི་བཻཌཱུརྻ་འདྲའི་སེམས་ལ་སྣང་བའི་ཐུབ་དབང་ཐོབ་བྱའི་ཕྱིར། །རབ་དགའི་སེམས་ལྡན་རྒྱལ་བའི་སྲས་རྣམས་དེ་བཞིན་[བྱང་ཆུབ་ཏུ་]སེམས་རབ་སྐྱེད་པར་བྱེད། །[དོན་བསྡུས་པ་ནི་]ཇི་ལྟར་བཻཌཱུརྻ་ས་གཞི་གཙང་མ་[དྭངས་པ་]ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་[དག་པའི་]ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །འགྲོ་བར་[ཆོས་སྐུའི་]གཟུགས་བརྙན་[གཟུགས་སྐུ་]འཆར་[བ་དང་]ནུབ་[པ་ནི་རིམ་པ་ལྟར་]རྙོག་མེད་དང༌།།རྙོག་པའི་རང་སེམས་རབ་[ཏུ་]འཇུག་[པའི་]དབང་གིས་འཇུག །ཇི་ལྟར་འཇིག་རྟེན་དག་ན་[གཞི་དྭངས་པ་ལ་]གཟུགས་[བརྙན་]སྣང་[ཞིང་བཟློག་པ་ལ་མི་སྣང་བ་]ལྟར། །དེ་བཞིན་[རང་སེམས་ཀྱི་སྣང་བ་ལས་གཞན་པའི་སངས་རྒྱས་]ཡོད་དང་ཞིག་[ནས་མེད་]ཅེས་[མཁས་པ་]དེ་མི་ལྟ[སྟེ་སྐུའི་སྣང་བའོ]། །[དེ་བཞིན་དུ་གསུང་གི་སྣང་བ་ཡང་]ཇི་ལྟར་ལྷ་[ཡུལ་]ན་ལྷ་རྣམས་ཀྱི། །སྔོན་གྱི་[ལས་]དཀར་པོའི་མཐུ་ཡིས་ནི། །འབད་དང་གནས་དང་ཡིད་གཟུགས་དང༌། །རྣམ་པར་རྟོག་པ་མེད་བཞིན་དུ། །མི་རྟག་སྡུག་བསྔལ་བདག་མེད་དང༌། ཞི་བའི་སྒྲ་ཡིས་[འདོད་ཡོན་ལ་]བག་མེད་པའི། །ལྷ་རྣམས་ཐམས་ཅད་ཡང་ནས་ཡང༌། །ཆོས་ཀྱི་རྔས་ནི་སྐུལ་བྱེད་ལྟར། །དེ་བཞིན་ཁྱབ་བདག་འབད་སོགས་དང༌། །བྲལ་ཡང་འགྲོ་བ་མ་ལུས་པ། །སངས་རྒྱས་གསུང་གིས་ཁྱབ་མཛད་དེ། །སྐལ་ལྡན་རྣམས་ལ་ཆོས་སྟོན་ཏོ། །[དེ་ཉིད་བཤད་པ་]ཇི་ལྟར་ལྷ་[ཡུལ་]ན་ལྷ་རྣམས་ཀྱི། །རྔ་སྒྲ་རང་གི་ལས་[བཟང་པོ་]ལས་འབྱུང༌། །དེ་བཞིན་འཇིག་རྟེན་[དུ་]ཐུབ་པའི་ཆོས། །གསུང་བ་[གདུལ་བྱ་]རང་གི་ལས་[བཟང་པོ་]ལས་འབྱུང༌། །འབད་གནས་ལུས་དང་སེམས་བྲལ་བའི། །[རྔ་]སྒྲ་དེ་ཇི་ལྟར་[བག་མེད་]ཞི་[བ་]སྒྲུབ་[པ་]ལྟར། །དེ་བཞིན་[འབད་ནས་ལུས་སེམས་]དེ་བཞི་དང་བྲལ་བའི། ། [སངས་རྒྱས་ཀྱི་]ཆོས་འདི་[ཉོན་མོངས་]ཞི་བ་སྒྲུབ་པར་བྱེད། །[རབ་ཏུ་བཤད་པ་ནི་]ཇི་ལྟར་ལྷ་ཡི་གྲོང་ན་རྔ་སྒྲའི་རྒྱུས་བྱུང་མི་འཇིགས་སྦྱིན་པ་ནི། །ཉོན་མོངས་[ལྷ་མིན་དང་]གཡུལ་དུ་འཇུག་ཚེ་ལྷ་མིན་[གྱི་]དཔུང་[ལས་]རྒྱལ་[ཞིང་]རྩེད་མོ་[ལ་བག་མེད་པ་]སེལ་བ་ལྟར། །དེ་བཞིན་འཇིག་རྟེན་དག་ན་བསམ་གཏན་གཟུགས་མེད་ལ་སོགས་རྒྱུས་བྱུང་བ། །སེམས་ཅན་ཉོན་མོངས་སྡུག་བསྔལ་རབ་འཇོམས་ཞི་བ་བླ་མེད་ལམ་ཚུལ་བརྗོད། །[ཀུན་ནས་འདྲ་བ་ཡང་མ་ཡིན་ཏེ་]གང་ཕྱིར་[སངས་རྒྱས་ཀྱི་གསུང་ནི་]སྐྱེ་[བོ་]ཀུན་[ལ་སྙོམས་]པ་ཉིད་དང༌།།ཕན་བདེ་ཆོ་འཕྲུལ་གསུམ་ལྡན་པ། །དེ་ཕྱིར་ཐུབ་དབྱངས་ལྷ་རྫས་ཀྱི། །སིལ་སྙན་རྣམས་ལས་ཁྱད་པར་འཕགས། །[སྐྱེ་ཀུན་པའི་རྒྱས་བཤད་ནི་]ལྷར་ནི་རྔ་ཡི་སྒྲ་ཆེན་པོ། །སར་གནས་རྣམས་ཀྱི་རྣར་མི་འགྲོ། །སངས་རྒྱས་[གསུང་གི་]རྔ་སྒྲ་འཁོར་བ་ཡི། །ས་འོག་འཇིག་རྟེན་དག་ཏུ་འགྲོ། །[ཕན་བདེའི་རྒྱས་བཤད་ནི་]ལྷར་ནི་ལྷ་ཡི་སིལ་སྙན་བྱེ་བ་མང༌། །འདོད་མེ་མངོན་པར་འཕེལ་བའི་དོན་དུ་སྒྲོགས། །ཐུགས་རྗེའི་བདག་ཉིད་རྣམས་ཀྱི་དབྱངས་གཅིག་ཀྱང༌། །སྡུག་བསྔལ་མེ་རབ་ཞི་བའི་དོན་དུ་འཇུག །ལྷར་ནི་མཛེས་ཤིང་ཡིད་འོང་སིལ་སྙན་སྒྲ། །སེམས་ཀྱི་རྒོད་པ་འཕེལ་བར་འགྱུར་བའི་རྒྱུ། །ཐུགས་རྗེའི་བདག་ཉིད་དེ་བཞིན་གཤེགས་པའི་གསུང༌། །ཏིང་འཛིན་[ལ་]སེམས་གཏོད་[པ་ལ་སོགས་པ་དགེ་བ་རྣམས་ལ་]བསམ་པ་སྐུལ་བྱེད་ཉིད[དོ]། །[དོན་བསྡུས་ནས་གདམས་པ་ནི་]མདོར་ན་མ་ལུས་འཇིག་རྟེན་ཁམས་སུ་ཡང༌། །ལྷ་དང་ས་[སྟེང་ན་གནས་པ་ལ་སོགས་པ་]ཡི་བདེ་བའི་རྒྱུ་གང་ཡིན[པ་སངས་རྒྱས་ཀྱི་དབྱངས]། །དེ་ནི་མ་ལུས་འཇིག་རྟེན་[ཁམས་རྣམས་ལ་]ཁྱབ་སྣང་བས། །[སངས་རྒྱས་ཀྱི་]དབྱངས་ཉིད་ལ་ནི་རབ་ཏུ་བརྟེན་པར་མཛོད། །[འཇིག་རྟེན་ཀུན་ཏུ་ཁྱབ་ཀྱང་ལ་ལས་མི་ཐོས་ཏེ་]ཇི་ལྟར་རྣ་བ་དང་བྲལ་བས། །ཕྲ་མོའི་སྒྲ་ནི་མི་ཐོས་བཞིན། །[སྒྲ་]ཐམས་ཅད་ལྷ་ཡི་རྣ་བར་ཡང༌། །རྣ་ལམ་དུ་ནི་མི་འགྲོ་བཞིན། །དེ་བཞིན་ཆོས་ཕྲ་[ཞིང་ཟབ་ལ་]མཆོག་ཏུ་ནི། །ཞིབ་མོའི་ཡེ་ཤེས་སྤྱོད་ཡུལ་ཡང༌། །ཉོན་མོངས་མེད་ཡིད་འགའ་ཞིག་གི །རྣ་བའི་ལམ་དུ་འགྱུར་བ་ཡིན[གྱི་དེ་ལས་གཞན་གྱིས་མི་ཐོས་སོ]། །[མཁྱེན་བརྩེས་ཁྱབ་ཚུལ་ནི་]ཇི་ལྟར་དབྱར་གྱི་དུས་ན་སྤྲིན། །ལོ་ཐོག་ཕུན་སུམ་ཚོགས་པའི་རྒྱུ། །ཆུ་ཡི་ཕུང་པོ་འབད་མེད་པར། །ས་ལ་རྒྱུན་དུ་འབེབས་པ་ལྟར། །དེ་བཞིན་ཐུགས་རྗེའི་སྤྲིན་ལས་ནི། །རྒྱལ་བའི་དམ་ཆོས་ཆུ་ཡི་ཆར། །འགྲོ་བའི་དགེ་བའི་ལོ་ཐོག་རྒྱུ། །རྣམ་པར་རྟོག་པ་མེད་པར་འབེབས། །[དེ་ཉིད་བཤད་པ་ནི་]ཇི་ལྟར་འཇིག་རྟེན་དགེ་བའི་ལམ་[དུ་]འཇུག་[པས་ལོ་ལེགས་ཀྱི་སྐལ་བ་ཡོད་པ་]ལ། །ཀླུང་སྐྱེ་[བའི་]ཆུ་ཆར་སྤྲིན་གྱིས་འབེབས་པ་ལྟར། །དེ་བཞིན་བརྩེ་[བའི་ཆུ་]ཀླུང་འགྲོ་[བའི་]དགེ་[བ་]མངོན་སྤེལ་ཕྱིར། །སངས་རྒྱས་སྤྲིན་ལས་དམ་ཆོས་ཆར་པ་འབེབས། །སྲིད་ལ་མཁྱེན་དང་བརྩེ་ཆེན་འགྱུར་བ་དང༌།།མི་འགྱུར་མ་གོས་ནམ་མཁའི་དཀྱིལ་གནས་པ། །ཏིང་འཛིན་གཟུངས་ཆུ་དྲི་མེད་སྙིང་པོ་ཅན། །ཐུབ་དབང་སྤྲིན་ནི་དགེ་བའི་ལོ་ཐོག་རྒྱུ། །ཇི་ལྟར་བསིལ་ཞིམ་མངར་དང་འཇམ་པ་དང༌། །ཡང་བའི་ཆུ་ནི་སྤྲིན་དེ་ལས་འཐོན་པ། །ས་ལ་[ལྷུང་ནས་]བ་ཚྭ་ལ་སོགས་[ཀྱི་]གནས་[དང་]འབྲེལ་བས། །ཤིན་ཏུ་མང་པོའི་རོར་ནི་འགྱུར་བ་བཞིན། །དེ་བཞིན་འཕགས་པའི་ཡན་ལག་བརྒྱད་ཅུའི་ཆར། །རབ་ཡངས་བརྩེ་སྤྲིན་[བདེ་གཤེགས་]སྙིང་པོ་ལས་འཐོན་པ། །འགྲོ་བའི་རྒྱུད་ཀྱི་གནས་ཀྱི་དབྱེ་བ་ལས། །རྣམ་པ་མང་པོའི་རོ་དང་ལྡན་པར་འགྱུར། །ཞེས་དང༌། [སྤྲུལ་པ་སྟོན་ཚུལ་ནི་]ཇི་ལྟར་ཚངས་པ་ཚངས་པ་ཡི།།གནས་ནས་འཕོ་བ་མེད་བཞིན་དུ། །ལྷ་ཡི་གནས་ནི་ཐམས་ཅད་དུ། །སྣང་བ་འབད་མེད་སྟོན་པ་ལྟར། །དེ་བཞིན་ཐུབ་པ་ཆོས་སྐུ་ལས། །བསྐྱོད་པ་མེད་པར་ཁམས་ཀུན་ཏུ། །སྐལ་ལྡན་རྣམས་ལ་འབད་མེད་པར། །སྤྲུལ་པ་དག་གིས་[ལམ་]སྟོན་པར་མཛད། །[དེའི་རྒྱས་བཤད་ནི་]ཇི་ལྟར་ཚངས་[པ་]རྟག་[ཏུ་རང་གི་]གཞལ་ཡས་ཁང་ལས་མི་གཡོ་[བཞིན་དུ་]འདོད་ཁམས་[ཀྱི་ལྷ་རྣམས་ཀྱི་ནང་དུ་]ཞུགས་པ་དེ། །ལྷ་རྣམས་ཀྱིས་མཐོང་[ལ་ཚངས་པ་]དེ་མཐོང་[བའི་ལྷ་]དེ་ཡང་ཡུལ་ལ་དགའ་བ་སྤོང་བྱེད་ལྟར། །དེ་བཞིན་བདེ་གཤེགས་ཆོས་ཀྱི་སྐུ་ལས་མི་བསྐྱོད་[བཞིན་དུ་]འཇིག་རྟེན་ཀུན་དུ་དེ། །སྐལ་ལྡན་གྱིས་མཐོང་[ལ་]དེ་མཐོང་[བ་]དེའི་ཡང་རྟག་ཏུ་དྲི་མ་ཀུན་སེལ་བྱེད། །[རབ་ཏུ་བཤད་པ་ནི་]སྔོན་གྱི་[ཚངས་པ་]རང་ཉིད་[ཀྱི་]སྨོན་ལམ་དང༌། །ལྷ་རྣམས་ཀྱི་ནི་དགེ་བའི་མཐུས། །ཇི་ལྟར་ཚངས་པ་འབད་མེད་[དུ་ལྷ་གནས་ཀུན་ཏུ་]སྣང༌། །རང་བྱུང་[སངས་རྒྱས་ཀྱི་]སྤྲུལ་སྐུ་དེ་བཞིན་ནོ། །[དགའ་ལྡན་ནས་]འཕོ་དང་[ཡུམ་གྱི་]ལྷུམས་[སུ་]འཇུག་[པ་དང་སྐུ་]བལྟམ་[པ་]དང་ཡབ་ཀྱི་ཁབ་[ཏུ་]གཤེགས་[པ་]དང༌། །[བཙུན་མོའི་འཁོར་ལ་]དགྱེས་རོལ་བ་དང་དབེན་པར་སྤྱོད་དང་བདུད་བཅོམ་དང༌། །བྱང་ཆུབ་ཆེ་བརྙེས་ཞི་བའི་གྲོང་ཁྱེར་ལམ་སྟོན་[པ་ཆོས་ཀྱི་འཁོར་ལོ་]དག །བསྟན་ནས་ཐུབ་པ་སྐལ་མེད་མིག་གི་ལམ་མི་འགྱུར། །[ཡེ་ཤེས་ཀྱི་འོད་ཟེར་འཕྲོ་བའི་ཚུལ་ནི་]ཇི་ལྟར་ཉི་མས་གདུངས་པས་དུས་གཅིག་ཚེ་ཉིད་ལ། །པད་སོགས་རྒྱས་དང་ཀུ་མུད་ཏ་ནི་རབ་ཟུམ་པ། །ཆུ་སྐྱེས་[ཁ་]བྱེ་[བ་]དང་[ཀུ་མུད་ཏ་]ཟུམ་པའི་ཡོན་ཏན་[དང་]སྐྱོན་དག་ལ། །ཉི་མ་རྟོག་མེད་[དུ་འཆར་བ་ལྟར་]འདིར་ནི་འཕགས་པའི་ཉི་[མ་]དེ་བཞིན[དུ་སེམས་ཅན་གྱི་སྐྱོན་ཡོན་ལ་མི་རྟོག་པར་འཆར་རོ]། །ཇི་ལྟར་ཉི་མ་རྟོག་མེད་པར། །རང་འོད་ཅིག་ཅར་འཕྲོས་པ་ཡིས། །པད་མ་རྒྱས་པར་བྱེད་པ་དང༌། །[ལོ་ཐོག་ལ་སོགས་པ་]གཞན་དག་སྨིན་པར་བྱེད་པ་ལྟར། །དེ་བཞིན་[དུ་]དེ་བཞིན་གཤེགས་པ་ཡི། །ཉི་མ་དམ་ཆོས་འོད་ཟེར་དག །གདུལ་བྱའི་སྐྱེ་བོའི་པད་མ་ལ། །རྣམ་པར་རྟོག་པ་མེད་པར་འཇུག །ཆོས་[ཀྱི་སྐུ་]དང་གཟུགས་ཀྱི་སྐུ་དག་གིས། །བྱང་ཆུབ་སྙིང་པོའི་མཁར་ཤར་བ། །ཀུན་མཁྱེན་ཉི་མ་འགྲོ་བར་ནི། །ཡེ་ཤེས་འོད་ཟེར་འཕྲོ་བར་མཛད། །གང་ཕྱིར་གདུལ་བྱ་དག་པ་ཡི། །ཆུ་ཡི་སྣོད་ནི་ཐམས་ཅད་ལ། །བདེ་གཤེགས་ཉི་མའི་གཟུགས་བརྙན་ནི། །དཔག་ཏུ་མེད་པ་ཅིག་ཅར་འཆར། །རྟག་ཏུ་ཐམས་ཅད་ལ་ཁྱབ་པ། །ཆོས་དབྱིངས་ནམ་མཁའི་དཀྱིལ་དུ་ནི། །སངས་རྒྱས་ཉི་མ་གདུལ་བྱ་ཡི། །རི་ལ་ཇི་ལྟར་འོས་པར་འབབ། །ཇི་ལྟར་རྒྱ་ཆེན་འོད་ཟེར་སྟོང་ལྡན་ཉི་ཤར་འདིར། །འཇིག་རྟེན་ཀུན་ཏུ་སྣང་བར་བྱས་ནས་རིམ་གྱིས་ནི། །མཆོག་དང་བར་མ་དམན་པའི་རི་ལ་འབབ་[པ་]དེ་བཞིན[དུ]། །རྒྱལ་བའི་ཉི་མ་སེམས་ཅན་ཚོགས་ལ་རིམ་གྱིས་འབབ། །[ཀུན་ནས་མཚུངས་པ་ཡང་མ་ཡིན་ཏེ་]ཞིང་ཀུན་[དང་]ནམ་མཁའི་མཐར་འཕྲོ་[བ་]ཉི་མ་ལ་མེད་ལ[སངས་རྒྱས་ཡེ་ཤེས་ལ་ཡོད]། །མི་ཤེས་[པའི་]མུན་[པས་]བཀབ་[པ་བསལ་ནས་]ཤེས་བྱའི་དོན་སྟོན་པ་ཡང་[ཉི་མ་]མིན[ཞིང་རྒྱལ་བའི་ཡེ་ཤེས་ཡིན་ཏེ]། །ཐུགས་རྗེའི་བདག་ཉིད་སྣ་ཚོགས་མདོག་བཀྱེའི་འོད་ཚོགས་ཀྱིས། །གསལ་བ་དག་ནི་འགྲོ་ལ་ཤེས་བྱའི་དོན་སྟོན་མཛད[དོ]། །སངས་རྒྱས་གྲོང་དུ་གཤེགས་ཚེ་མིག་དང་མི་ལྡན་པ་ཡི་སྐྱེ་བོ་རྣམས། །མཐོང་ཞིང་དོན་མེད་ཚོགས་བྲལ་དོན་[སངས་རྒྱས་]དེ་མཐོང་བ་ལས་ནི་[ཆོས་ཉིད་ཉམས་སུ་]མྱོང་བ་དང༌། །གཏི་མུག་གིས་ལྡོངས་སྲིད་པའི་མཚོར་ལྷུང་ལྟ་བའི་མུན་པས་བསྒྲིབས་པ་རྣམས། །སངས་རྒྱས་ཉི་མའི་འོད་ཀྱི་བློ[འི་]སྣང་[བ་ཐོབ་ནས་སྔར་]མ་མཐོང་བ་ཡི་གནས་[ཆོས་ཉིད་མངོན་སུམ་དུ་]མཐོང་[བར་]འགྱུར། །[ཐུགས་མི་རྟོག་བཞིན་དུ་འདོད་དགུ་སྩོལ་བ་ནི་]ཇི་ལྟར་ཡིད་བཞིན་ནོར་བུ་[དབང་གི་རྒྱལ་པོ་]ནི། །རྟོག་པ་མེད་ཀྱང་ཅིག་ཅར་དུ། །སྤྱོད་ཡུལ་གནས་པ་རྣམས་ཀྱི་ནི། །བསམ་ཀུན་སོ་སོར་རྫོགས་བྱེད་ལྟར། །དེ་བཞིན་སངས་རྒྱས་ཡིད་བཞིན་[ནོར་མཆོག་]ལ། །བརྟེན་ནས་བསམ་པ་ཐ་དད་རྣམས།།སྣ་ཚོགས་ཆོས་ནི་ཐོས་འགྱུར་ཡང༌། །དེ་ནི་དེ་ལ་རྣམ་མི་རྟོག །ཇི་ལྟར་ནོར་བུ་རིན་ཆེན་རྟོག་མེད་འདོད་པའི་ནོར། །འབད་པ་མེད་པར་གཞན་པ་དག་ལ་རབ་སྟེར་ལྟར། །དེ་བཞིན་ཐུབ་པ་འབད་མེད་ཇི་ལྟར་འོས་པར་ནི། །གཞན་གྱི་དོན་དུ་སྲིད་པ་ཇི་སྲིད་རྟག་ཏུ་བཞུགས། །གང་ཕྱིར་རྒྱ་མཚོ་ས་འོག་གནས་དེ་ལ་འདོད་པས། །ཇི་ལྟར་ནོར་བུ་བཟང་པོ་འགྲོ་འདིར་རབ་རྙེད་དཀའ། །དེ་བཞིན་འགྲོ་བ་ཤིན་ཏུ་སྐལ་ངན་ཉོན་མོངས་ཟིན[པ་རྣམས་ཀྱི]། །ཡིད་འདིར་བདེ་གཤེགས་མཐོང་བ་རྙེད་དཀར་ཤེས་པར་བྱ། །[གསུང་གི་འཆར་ཚུལ་ནི་]ཇི་ལྟར་སྒྲ་བརྙན་གྱི་ནི་སྒྲ། །གཞན་གྱི་རྣམ་རིག་ལས་བྱུང་བ། །རྣམ་རྟོག་མེད་ཅིང་བཟོ་བ་མེད། །ཕྱི་དང་ནང་ན་མི་གནས་ལྟར། །དེ་བཞིན་[དུ་]དེ་བཞིན་གཤེགས་པའི་གསུང༌། །གཞན་གྱི་རྣམ་རིག་ལས་བྱུང་བ། །རྣམ་པར་རྟོག་མེད་བཟོ་མེད་ཅིང༌། །ཕྱི་དང་ནང་ན་གནས་མ་ཡིན། །[སྐུ་ཡིས་ཀུན་ཏུ་ཁྱབ་ཚུལ་ནི་འདུས་བྱས་]ཅུང་ཟད་མེད་ཅིང་[རྣམ་ཤེས་ལ་]སྣང་བ་མེད། །དམིགས་པ[འམ་འཛིན་པ་]མེད་ཅིང་རྟེན་མེད་ལ། །མིག་གི་ལམ་ལས་རབ་འདས་པ། །གཟུགས་མེད་བསྟན་དུ་མེད་པ་ཡི། །[འདུས་མ་བྱས་ནམ་]མཁའ་ལ་ཇི་ལྟར་མཐོ་དང་དམའ། །མཐོང་ཡང་དེ་ནི་དེ་ལྟ་མིན། །དེ་བཞིན་[དུ་མཐོ་དང་དམའ་བ་ལ་སོགས་པ་]ཐམས་ཅད་སངས་རྒྱས་ལ། །མཐོང་ཡང་དེ་ནི་དེ་ལྟ་མིན། །[དཀར་པོའི་ཆོས་རྣམས་ཀྱི་གཞིར་གྱུར་ཚུལ་ནི་]ཇི་ལྟར་ས་ལས་སྐྱེ་བ་ཀུན། །རྟོག་མེད་ས་ལ་བརྟེན་ནས་ནི། །འཕེལ་དང་བརྟན་དང་ཡངས་འགྱུར་ལྟར། །དེ་བཞིན་རྫོགས་པའི་སངས་རྒྱས་ས། །རྣམ་རྟོག་མེད་པ་ལ་བརྟེན་ནས། །འགྲོ་བའི་དགེ་བའི་རྩ་བ་ནི། །མ་ལུས་པ་ནི་འཕེལ་བར་འགྱུར། །ཞེས་དང༌། དེ་རྣམས་ཀྱི་དོན་བསྡུས་པ། གང་ཞིག་བརྒྱ་བྱིན་རྔ་དང་སྤྲིན་བཞིན་དང༌། །ཚངས་ཉི་རིན་ཆེན་ཡིད་བཞིན་ནོར་རྒྱལ་བཞིན། །སྒྲ་བརྙན་ནམ་མཁའ་ས་བཞིན་སྲིད་པ[ཇི་སྲིད་གནས་པ]འི་བར[དུ]། །འབད་མེད་གཞན་དོན་བྱེད་དེ་རྣལ་འབྱོར་[པས་]རིག[གི་རྟོག་གེའི་སྤྱོད་ཡུལ་ལས་འདས་སོ།]།[དེ་རྣམས་བཤད་པ་སྣང་བ་]སྟོན་པ་[ནི་]རིན་ཆེན་[གྱི་གཞི་ལ་ཤར་བའི་]ལྷ་དབང་[གི་]གཟུགས་བརྙན་བཞིན། །ལེགས་པར་འདོམས་མཛད་ལྷ་ཡི་རྔ་དང་འདྲ། །ཁྱབ་བདག་[གི་]མཁྱེན་དང་བརྩེ་ཆེན་[གྱི་]སྤྲིན་ཚོགས་ནི། །མཐའ་ཡས་འགྲོ་བ་སྲིད་རྩེའི་བར་དུ་[ཀུན་ལ་]ཁྱབ། །ཚངས་བཞིན་ཟག་མེད་གནས་ལས་མ་བསྐྱོད་པར། །སྤྲུལ་པ་རྣམ་པ་དུ་མ་རབ་ཏུ་སྟོན། །ཉི་བཞིན་ཡེ་ཤེས་སྣང་བ་རབ་འཕྲོ་གང༌། །རྣམ་དག་རིན་ཆེན་ཡིད་བཞིན་ནོར་འདྲའི་ཐུགས། །རྒྱལ་བ་རྣམས་ཀྱི་གསུང་དེ་བྲག་ཆ་བཞིན་དུ་ཡི་གེ་མེད། །སྐུ་ནི་ནམ་མཁའ་ལྟ་བུར་ཁྱབ་དང་གཟུགས་མེད་རྟག་པ་ཉིད། །ས་བཞིན་འགྲོ་བའི་དཀར་པོའི་ཆོས་ཀྱི་སྨན་རྣམས་མ་ལུས་པའི། །རྣམ་པ་ཀུན་ཏུ་གཞིར་གྱུར་པ་ནི་སངས་རྒྱས་ས་ཡིན་ནོ། །དགེ་བ་བཻཌཱུརྻ་འདྲ་ཡི། །སེམས་ལ་སངས་རྒྱས་མཐོང་བའི་རྒྱུ། །དེ་དག་ལ་ནི་མི་བཟློགས་པའི། །དད་པའི་དབང་པོ་རྟས་པ་ཉིད། །དགེ་བ་སྐྱེ་དང་འཇིག་པས་ན། །སངས་རྒྱས་གཟུགས་ནི་སྐྱེ་དང་འཇིག །བརྒྱ་བྱིན་བཞིན་དུ་ཐུབ་པ་ནི། །ཆོས་ཀྱི་སྐུ་ཡི་སྐྱེ་འཇིག་མེད། །དེ་བཞིན་དུ་ནི་འབད་མེད་པར། །སྐྱེ་མེད་འགག་མེད་ཆོས་སྐུ་ལས། །སྲིད་པ་ཇི་སྲིད་གནས་བར་དུ། །སྟོན་པ་ལ་སོགས་མཛད་པ་འཇུག །ཅེས་དང༌། [མཚུངས་ལ་མི་མཚུངས་པས་ཁྱད་པར་དུ་འཕགས་པ་ནི་]སངས་རྒྱས་[ཀྱི་སྐུ་ནི་ལྷ་དབང་གི་]གཟུགས་བརྙན་ལྟ་བུ་སྟེ། །[གཟུགས་བརྙན་དེ་ལ་]དབྱངས་དང་མི་ལྡན་[པས་]དེ་[དང་]འདྲ་[བ་]མིན། །[ལེགས་པར་འདོམས་པ་]ལྷ་ཡི་རྔ་བཞིན་[ཡིན་ལ་རྔ་དེ་ཞིང་ཁམས་]ཐམས་ཅད་དུ། །དོན་བྱེད་[པ་]མིན་པ[ས་]དེ་འདྲ་མིན། །[མཁྱེན་བརྩེ་]སྤྲིན་ཆེན་དང་མཚུངས་[ལ་]དོན་མེད་པའི། །ས་བོན་སྤོང་མིན་དེ་འདྲའང་མིན། །[སྤྲུལ་པ་སྟོན་པ་]ཚངས་ཆེན་བཞིན་ཏེ་ཀུན་ཏུ་ནི། །སྨིན་པར་བྱེད་མིན་དེ་འདྲའང་མིན། །[ཡེ་ཤེས་ཀྱི་འོད་ཟེར་]ཉི་མའི་གཟུགས་བཞིན་གཏན་དུ་ནི། །མུན་པ་འཇོམས་མིན་དེ་འདྲའང་མིན། །[ཐུགས་]ཡིད་བཞིན་ནོར་འདྲ་འབྱུང་བ་ནི། །རྙེད་པར་མི་དཀའ་དེ་འདྲའང་མིན། །[གསུང་]སྒྲ་བརྙན་བཞིན་ཏེ་རྐྱེན་ལས་ནི། །བྱུང་བ་དེ་འདྲ་བ་ཡང་མིན། །[སྐུ་]ནམ་མཁའ་དང་འདྲ་དགེ་བ་ཡི། །གཞི་མིན་དེ་དང་འདྲ་བའང་མིན། །འཇིག་རྟེན་འཇིག་རྟེན་ལས་འདས་པ། །འགྲོ་བའི་ཕུན་ཚོགས་མ་ལུས་པ། །དེ་གནས་པ་ཡི་རྟེན་ཡིན་ཕྱིར། །ས་ཡི་དཀྱིལ་འཁོར་དག་དང་འདྲ། །སངས་རྒྱས་བྱང་ཆུབ་ལ་བརྟེན་ནས། །འཇིག་རྟེན་འདས་པའི་ལམ་འབྱུང་ཕྱིར། །དགེ་བའི་ལས་ལམ་བསམ་གཏན་དང༌། །ཚད་མེད་པ་དང་གཟུགས་མེད་འབྱུང༌། །ཞེས་དང༌། རྒྱལ་སྲས་ཞི་བ་ལྷས་ཀྱང༌། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་[དེ་ལས་]གཞན་[པའི་ཆོས་]མེད་པས། །[ཆོས་གང་ཡང་]དམིགས་པ་མེད་པར་[རྣམ་ཤེས་]རབ་ཏུ་ཞི[བའི་གཞིའི་ཡེ་ཤེས་ཐོབ་ནས་གཞན་དོན་མཛད་དེ]། །[དཔེར་ན་]ཡིད་བཞིན་ནོར་བུ་དཔག་བསམ་ཤིང་[གིས]། །ཇི་ལྟར་རེ་བ་ཡོངས་སྐོང་བ། །དེ་བཞིན་[དུ་]གདུལ་བྱ[འི་དབང་དང་]སྨོན་ལམ་གྱི། །དབང་གིས་རྒྱལ་བའི་སྐུར་སྣང་ངོ༌། །དཔེར་ན་ནམ་མཁའ་ལྡིང་གི་ནི། །མཆོད་སྡོང་བསྒྲུབས་ནས་[སྒྲུབ་མཁན་]འདས་གྱུར་པ། །[སྒྲུབ་མཁན་]དེ་འདས་[ནས་]ཡུན་རིང་ལོན་ཡང་[མཆོད་སྡོང་]དེ། །དུག་ལ་སོགས་པ་ཞི་བྱེད་བཞིན། །བྱང་ཆུབ་སྤྱོད་པ་རྗེས་མཐུན་པས། །རྒྱལ་བའི་མཆོད་སྡོང་བསྒྲུབས་པ་ཡང༌། །བྱང་ཆུབ་སེམས་དཔའ་མྱ་ངན་ལས། །འདས་ཀྱང་དོན་རྣམས་ཐམས་ཅད་མཛད། །[ལུང་འདི་དག་སངས་རྒྱས་དང་ཡེ་ཤེས་མེད་པའི་ཤེས་བྱེད་དུ་འདྲེན་པ་གང་ཡིན་པ་དེས། ལུང་སྤྱི་བབས་ཀྱི་དོན་མ་གོ་བར་བསྟན་ཏོ།།]སེམས་མེད་པ[འི་མཆོད་རྟེན་སོགས་]ལ་མཆོད་བྱས་པས། །ཇི་ལྟར་འབྲས་བུ་ལྡན་པར་འགྱུར[སྙམ་ན]། །གང་ཕྱིར་[སངས་རྒྱས་མ་གྲོངས་པར་]བཞུགས་པའམ་མྱ་ངན་འདས[ཏེ]། །[གྲོངས་པའི་མཆོད་རྟེན་ལ་མཆོད་ན་བསོད་ནམས་]མཚུངས་པ་ཉིད་དུ་བཤད་ཕྱིར་རོ། །ཞེས་གསུངས་སོ། །