འཁྲུལ་བ་ཟད་པའི་ཡེ་ཤེས་ལ་འཁྲུལ་སྣང་འདི་མི་འཆར་བར་བསྟན་པ།

དེ་བཞིན་དུ་གློ་བུར་ཁམས་གསུམ་པའི་ཆོས་འདི་རྣམས་འཁྲུལ་བ་ཟད་པའི་ཡེ་ཤེས་ལ་སྣང་བར་འདོད་པ་ཡང་མི་རིགས་ཏེ། འཁྲུལ་བ་ཟད་པ་ལ་འཁྲུལ་སྣང་མི་སྲིད་པའི་ཕྱིར་དང༌། ཁམས་གསུམ་པའི་སྣང་བ་འདི་ཡང་འཁྲུལ་སྣང་ཉིད་དུ་གསུངས་པའི་ཕྱིར་རོ། །དེ་ཡང་འཕགས་པ་ལྷའི་ཞལ་སྔ་ནས། [བདེ་གཤེགས་སྙིང་པོ་]ཡོད་ལ་མེད་པར་འཁྲུལ་དང་[སྟོང་ཉིད་གང་ཡིན་རྟེན་འབྲེལ་དུ་འདོད་ན་དོན་དམ་ཡང་]མི་རྟག་ཉིད་ལ་[དུ་]འཁྲུལ། །[གང་ཤར་ཆོས་སྐུར་འདོད་ན་ཁམས་གསུམ་འདི་ཡང་ཆོས་སྐུར་ཡོད་དགོས་པས་]མེད་ལ་ཡོད་པར་འཁྲུལ་དང་རྟག་པ་ཉིད་དུ་འཁྲུལ། །[ལྟ་བ་]འཁྲུལ་བས་[གང་ཟག་]འཁྲུལ་བ་བསླུ་ཞིང་བསླུས་པས་[སླར་ཡང་]འཁྲུལ་བ་[ཁམས་གསུམ་འཁོར་བ་]འགྲུབ། །[བློ་]འཁྲུལ་བའི་དབང་གིས་ཡང་དག་དོན་ལ་སེམས་ཅན་འཁྲུལ། །རྒྱུ་ལ་འཁྲུལ་ཏེ་[ལས་ངན་བསགས་པས་]འབྲས་བུ་ངན་སོང་གསུམ་དུ་འཁྲུལ། །ཞེས་དང༌། [སློབ་དཔོན་དེ་ཉིད་ཀྱིས་]འཁྲུལ་བ་ཟློག་པའི་གཏན་ཚིགས་གྲུབ་པར་ཡང༌། དེ་ལ་འཁྲུལ་བའི་དབང་གིས་ཡང་དག་པའི་དོན་ལ་འཁྲུལ་བ་ནི་ཐམས་ཅད་རྟག་པར་རྟོག་པ་བཞིན། ཞེས་སོགས་དང༌། [འཁྲུལ་བའི་དབང་གིས་ཡི་དྭགས་སུ་སྐྱེས་པའི་ཚེ་]ཁབ་མིག་ཁ་དང་རྟ་རྔའི་མགྲིན། །ལྟོ་བ་རི་ཡི་གཏོས་ཙམ་ཉིད། །རྐང་ལག་ཐུར་མ་བཞིན་དུ་ཕྲ། ཤིང་རྟ་འཁྲོལ་འདྲ་དུད་པ་འཐུལ། །ཡིད་དུ་འོང་བའི་ཟས་དང་སྐོམ། །བཀོད་པ་བལྟས་ནས་ལག་[པས་]བརྙབས་ན། །རབ་འཇིགས་སྐྱེས་བུ་གོ་ཆ་ཅན། །མཚོན་རྣོན་[དང་]དབྱིག་པ་ཐོགས་པ་ཡིས། །བརྒྱབ་ནས་རྡུལ་བཞིན་[དུམ་བུ་མང་པོར་]གྱུར་[པ་]མཐོང་ནས།།[ཟས་སྐོམ་ཏེ་]ལེན་པའི་དབང་མེད་བཀྲེས་[པས་]གདུངས་[པར་]འགྱུར། །ལ་ལས་བཟའ་བཏུང་ཁར་བཅུག་པ། །མེ་ལྕེ་འབར་ཞིང་[ཁ་དང་ལུས་ཀུན་]འཚིག་འགྱུར་ཏེ། །ལ་ལར་རྣག་ཁྲག་དྲི་ང་ཡང༌། །མི་རྙེད་ལུས་ལས་བཙགས་ལས་འདོན། །ལ་ལས་བཟའ་བཏུང་མི་མཐོང་ཞིང༌། །མི་ཐོས་ཕྱོགས་བཅུར་རྒྱུག་པར་འགྱུར། །ཞེས་དང༌། [འཁྲུལ་བའི་དབང་གིས་དམྱལ་བར་སྡུག་བསྔལ་བ་ནི་]ཉེས་སྤྱད་རྣམ་སྨིན་མ་ཟད་བར། །དེ་དག་[བསད་ཀྱང་]འཆི་བར་མི་འགྱུར་ཏེ། །[དེ་དག་གི་གཟུགས་]བྲིས་[པ་]མཐོང་[བ་དང་]བཤད་[པ་]ཐོས་[པ་དང་ཡི་གེར་བྲིས་པ་]ཀླགས་[པ་དང་]དྲན་[པ་ལ་]ཡང༌། །འཇིགས་[པ་ཆེན་པོ་]སྐྱེ་[ན་རང་རྒྱུད་ལ་]ཉམས་[སུ་]མྱོང་[བ་ལྟ་]ཅི་ཞིག་སྨོས། །འཇིག་རྟེན་ཁམས་རྣམས་སྡུག་བསྔལ་གང༌། །མཐོང་བའི་ཆོས་ལ་ཡོད་དོ་ཅོག །གཅིག་ཏུ་བསྡུས་པས་དམྱལ་བ་ཡི། །སྡུག་བསྔལ་གང་ཆུང་[བའི་]འབུམ་གྱི་ཆ[ཡང་]། །མི་ཕོད་ཅུང་ཟད་[ཙམ་ཡང་]དེ་[དང་]མི་མཚུངས[པ་དེ་ཙམ་དུ་སྡུག་བསྔལ་བ]། །དེ་ཀུན་མ་རིག་ལྟ་ལས་བྱུང༌། །དེ་ཕྱིར་ངན་སོང་གསུམ་དུ་འཁྲུལ། །ཞེས་དང༌། [སློབ་དཔོན་དེ་ཉིད་ཀྱིས་]རབ་ཏུ་བྱེད་པ་ལག་པའི་ཚད་ལས་ཀྱང༌། །དེ་ཕྱིར་མཁས་པས་[ཁམས་གསུམ་འདི་]འཁྲུལ་བ་ཙམ[དུ་རྟོགས་ཀྱི]། །ཡང་དག་དོན་དུ་མིན་པར་བརྟག །[རྒྱུ་ལ་]འཁྲུལ་ནས་[འབྲས་བུ་]དེ་ཡང་མ་དག་ཕྱིར། །[ཁམས་གསུམ་འདི་]ཇི་ལྟར་སྣང་བ་དེ་ལྟར་[གཤིས་ལ་]མེད། །དོན་ཡོད་[པ་]མ་ཡིན་[བཞིན་དུ་]སྣང་བ་ནི[འཁྲུལ་སྣང་ཡིན་པས]། །ཇི་ལྟར་[དོན་བདེན་པ་]དེ་ཡི་བདག་ཉིད་[དུ་]འགྱུར། །གང་ཞིག་ཞིབ་མོའི་བློ་ཡིས་ནི། །[ཀུན་རྫོབ་]ཐམས་ཅད་བརྟགས་པ་ཁོ་ནར་ཤེས[པའི]། །བློ་ལྡན་དེས་ནི་ཆགས་[པ་]ལ་སོགས། །བདེ་བར་[རྟོག་པ་]སྦྲུལ་གྱིས་སྐྲག་བཞིན་སྤོང༌། །ཞེས་པ་ལ་སོགས་པས་ཁམས་གསུམ་པ་འདི་དག་ཀུན་བརྟགས་པ་དང༌། མ་རིག་པ་ལས་བྱུང་བ་དང༌། འཁྲུལ་བ་ཉིད་དུ་གསུངས་ལ། རིགས་པ་དྲུག་ཅུ་པར་ཡང༌། མ་རིགས་རྐྱེན་གྱིས་འཇིག་རྟེན་ཞེས། །གང་ཕྱིར་རྫོགས་པའི་སངས་རྒྱས་གསུང༌། །དེ་ཕྱིར་འཇིག་རྟེན་འདི་དག་ཀྱང༌། །རྣམ་པར་རྟོག་པར་ཅིས་མི་འཐད། །མ་རིག་འགགས་པར་གྱུར་ན་ནི། །སྐྱེ་བ་གང་རྣམས་འགག་གྱུར་པས། །དེས་ན་[འཇིག་རྟེན་འདི་དག་]མི་ཤེས་[པས་]ཀུན་བརྟགས་པར། །ཅི་ཡི་ཕྱིར་ན་གསལ་མི་འགྱུར། །ཞེས་འཇིག་རྟེན་འདི་དག་མ་རིག་པས་ཀུན་བརྟགས་པའི་འཁྲུལ་སྣང་ཡིན་པར་གསུངས་པའི་ཕྱིར། མ་རིག་པ་དང་ཀུན་བརྟགས་ཟད་པའི་ཡེ་ཤེས་ལ་འདི་དག་སྣང་བར་མི་རིགས་ཏེ། མིག་སྐྱོན་མེད་པར་གྱུར་པ་ལ་སྐྲ་ཤད་འཛག་པ་དང་དུང་སེར་པོ་ལ་སོགས་པར་མི་སྣང་བ་བཞིན་ནོ། །འཕགས་པ་ལྷའི་དབུ་མ་འཁྲུལ་བ་འཇོམས་པར་ཡང༌། གང་གི་ཚེ་བློ་གྲོས་ཀྱི་མིག་བྱེ་བར་གྱུར་ཅིང༌། མ་རིག་པའི་བག་ཆགས་ཀྱི་གཉིད་དང་བྲལ་བ་གྱུར་ནས་སད་པ་དང་འདྲ་བར་བདེ་བར་གཤེགས་པའི་ཡེ་ཤེས་དྲི་མ་མེད་པ་ཤར་བར་གྱུར་པ་དེའི་ཚེ་ན་[ཁམས་གསུམ་]ཅི་ཡང་མི་གཟིགས་ཏེ། དངོས་པོའི་ངོ་བོ་ཉིད་མི་དམིགས་པའི་ཕྱིར་རོ། །ཞེས་དང༌། སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་ཤེས་པའི་ཡང་དག་པའི་ཡེ་ཤེས་ཀྱི་ཉི་མ་ཤར་ནས་མི་ཤེས་པའི་བག་ཆགས་དང་མཚམས་སྦྱོར་བའི་ཉོན་མོངས་པ་ཐམས་ཅད་བསལ་བའི་ཚེ་ན། སེམས་དང་སེམས་ལས་བྱུང་བ་སྤྱོད་ཡུལ་དང་བཅས་པ་རྣམས་དངོས་པོ་དང་ངོ་བོ་ཉིད་དུ་མ་གཟིགས་ཤིང་མི་དམིགས་ཏེ། བླ་ན་མེད་པའི་ཡེ་ཤེས་ཤར་བ་ན་དབུགས་ཕྱིན་པ་ཆེན་པོ་ཐོབ་པའི་ཕྱིར་རོ། །དེ་ལྟར་རིགས་པས་ཀུན་རྫོབ་ཏུ་ཆོས་ཐམས་ཅད་རྨི་ལམ་དང་སྐྲ་ཤད་འཛིངས་པ་དང་མིག་འཕྲུལ་ལྟ་བུར་བསྟན་ལ། དོན་དམ་པར་[ཀུན་རྫོབ་]དེ་དག་[གི་]དངོས་པོ་མེད་པ་དང༌། འོད་གསལ་བ་དང༌། [རྣམ་ཤེས་ལ་]སྣང་བ་མེད་པ་དང༌། སྤྲོས་པ་དང་བྲལ་བར་བསྟན་ནས། དེ་ནི་ལུང་གིས་ཀྱང་དེ་ལྟ་བུར་སྟོན་ཏེ། སློབ་དཔོན་[ཀླུ་སྒྲུབ་]གྱི་ཞལ་སྔ་ནས། རབ་རིབ་བྲལ་བར་གྱུར་པའི་མིག །རྣམ་དག་དྲི་མ་མེད་པ་ལ། །སྐྲ་དང་སྦྲང་བུ་ཟླ་གཉིས་དང༌། །རྨ་བྱའི་མདོངས་དག་མི་སྣང་ལྟར། །མཁས་པ་ཉོན་མོངས་ཤེས་བྱ་ཡི། །སྒྲིབ་མུན་རབ་རིབ་བྲལ་གྱུར་ཅིང༌། །ཡང་དག་མཁྱེན་སྤྱན་དྲི་མེད་ལའང༌། །དེ་བཞིན་[འཁྲུལ་བ་]ཅི་ཡང་སྣང་བ་མེད། །དཔེར་ན་གཉིད་ལོག་གཉིད་དབང་གིས། །བུ་དང་བུད་མེད་གཞལ་མེད་ཁང༌། །གནས་ལ་སོགས་པ་མཐོང་གྱུར་པ། །སད་ནས་དེ་ཡིས་མི་མཐོང་ལྟར། །དེ་བཞིན་ཀུན་རྫོབ་[དང་དེའི་]ཤེས་པ་དག །བློ་གྲོས་མིག་ནི་བྱེ་གྱུར་ཅིང༌། །མི་ཤེས་གཉིད་དང་བྲལ་གྱུར་ནས། །སད་པའི་ཚེ་ན་མི་གཟིགས་སོ། །དཔེར་ན་མཚན་མོ་མུན་ཁྲོད་ན། །འབྱུང་པོ་ཡང་དག་མིན་མཐོང་བ། །ཉི་མ་ཤར་ཅིང་མིག་ཕྱེའི་ཚེ། །སྣང་བར་གྱུར་པ་མ་ཡིན་ལྟར། །དེ་བཞིན་མཁས་པས་ཡང་དག་གི །ཤེས་པའི་ཉི་མས་མི་ཤེས་པའི། །བག་ཆགས་མ་ལུས་བཅོམ་པའི་ཚེ། །སེམས་དང་སེམས་བྱུང་ཡུལ་[དང་བཅས་པ་]མི་གཟིགས། །ཞེས་གཉིད་སངས་པའི་ཚེ་རྨི་ལམ་གྱི་སྣང་བ་ཡལ་བ་དང༌། མིག་རབ་རིབ་དང་བྲལ་བའི་ཚེ་སྐྲར་སྣང་ལ་སོགས་པ་ནུབ་པ་ལྟར། མ་རིག་པའི་གཉིད་སངས་ཤིང་རྣམ་ཤེས་ཀྱི་རབ་རིབ་དང་བྲལ་བའི་ཡེ་ཤེས་ལ། སེམས་དང་སེམས་བྱུང་ཡུལ་དང་བཅས་པ་ལ་སོགས་པ་ཁམས་གསུམ་པའི་ཆོས་རྣམས་མི་སྣང་བར་གསུངས་ཏེ། དེ་ལ་དེ་རྣམས་ས་བོན་དང་བཅས་པ་འགགས་ཤིང་ཟད་ལ་ནུབ་པའི་ཕྱིར་རོ། ། [སྐྱབས་འགྲོ་བདུན་ཅུ་པར་ཡང༌། མ་རིག་གཉིད་ཀྱིས་ལོག་པ་ཡི། །འགྲོ་ལ་གང་གང་སྣང་དེ་དེ། །བརྫུན་ཏེ་རྨི་ལམ་ལྟ་བུར་འདོད། །མ་རིག་གཉིད་ནི་རྒྱུན་ཆད་ཅིང༌།།ཡང་དག་ཡེ་ཤེས་ངེས་འབྱུང་བས། །གང་ཞིག་རྣམ་སད་དེ་སངས་རྒྱས། །སྐྱེས་བུ་གཉིད་སད་ཇི་བཞིན་ནོ། །ཞེས་སོ།།]