ཡེ་ཤེས་དེས་དོན་ལ་མེད་པའི་ཁམས་གསུམ་འདི་གཟིགས་ན་དོན་ལ་གནས་པའི་ཆོས་ཉིད་མི་གཟིགས་པར་ཧ་ཅང་ཐལ་བ།

ཡང་དེ་ཉིད་དུ། གང་ཞིག་[གཤིས་ལ་]ཡོད་པ་[དོན་དམ་]མི་མཐོང་[བར་གཤིས་ལ་]མེད་[པ་ཀུན་རྫོབ་]མཐོང་བ། །འདི་འདྲའི་མུན་ནག་རྣམ་པ་དེ་གང་ཞིག[ཡིན་ཏེ། མུན་པས་ནི་ཡོད་པ་མི་མཐོང་བར་བྱེད་ཀྱང་མེད་པ་མཐོང་བར་མི་བྱེད་པས་སོ།]།ཅེས་དང༌། འགྲོ་བ་དག་ན་[ཆོས་ཉིད་ངོ་བོ་ཉིད་སྐུ་]དེ་ལས་གཞན་ཡང་ཅུང་ཟད་[གཤིས་ལ་]ཡོད་མིན་ལ། །འགྲོ་བ་མ་ལུས་པ་ཡང་[ཆོས་ཉིད་ངོ་བོ་ཉིད་སྐུ་]དེ་ལ་ཀུན་ཏུ་རྨོངས་པའི་བློས། །[གཤིས་ལ་]ཡོད་པ་[ཆོས་ཉིད་ངོ་བོ་ཉིད་སྐུ་]ཀུན་ནས་སྤངས་ཏེ་[གཤིས་ལ་]མེད་[པ་ཀུན་རྫོབ་]ལ་མངོན་ཞེན་གང་ཡིན་པ། །འཇིག་རྟེན་རྨོངས་པའི་རྣམ་པ་ཚབས་ཆེན་འདི་ཀོ་ཇི་ལྟ་བུ། །ཞེས་དོན་ལ་ཡོད་པའི་ཆོས་ཉིད་མི་མཐོང་བར། མེད་པའི་ཆོས་ཁམས་གསུམ་པ་མཐོང་བའི་རྣམ་ཤེས་ནི་མུན་པ་ལྟ་བུ་དང་རྨོངས་ཚབས་ཆེན་པོར་གསུངས་པའི་ཕྱིར། དེ་འགགས་པའི་སངས་རྒྱས་ལ་དེའི་སྣང་བ་ཡང་འགགས་པ་ཉིད་དུ་གྲུབ་བོ། །སངས་རྒྱས་ཕལ་པོ་ཆེར་ཡང༌། རྣམ་པར་རྟོག་ལ་སྤྱོད་པ་ཡི། །མིག་ནི་ཤིན་ཏུ་འཁྲུལ་བ་ཡིན། །འཁྲུལ་བས་མཐོང་བ་ལོག་པ་སྟེ། །སངས་རྒྱས་ལ་ནི་ལོག་མི་མངའ། །ཞེས་འཁྲུལ་སྣང་ཁམས་གསུམ་པ་འདི་སྣང་མི་སྣང་ལ་ལོག་མ་ལོག་ཏུ་གསུངས་ལ། ཆོས་ཀྱི་དབྱིངས་ལ་བསྟོད་པར་ཡང༌། ཡུལ་དྲུག་སྣང་བ་མེད་པར་ནི། །ཡང་དག་ཇི་བཞིན་རིག་གྱུར་པའོ།།ཞེས་ཡང་དག་པའི་མཐའ་མངོན་སུམ་གྱིས་རིག་པའི་ཡེ་ཤེས་ལ་ཀུན་རྫོབ་ཀྱི་ཡུལ་དྲུག་སྣང་བ་མེད་པར་གསུངས་ཤིང༌། [སློབ་དཔོན་ཀ་མ་ལ་ཤཱི་ལས།]དབུ་མ་དེ་ཁོ་ན་ཉིད་སྣང་བར་ཡང༌། ཡེ་ཤེས་སྣང་བ་བྱུང་བ་ན། །མུན་པ་བཞིན་དུ་[འཁྲུལ་བ་]དེ་སྤོང་ངོ༌།།ཞེས་དང༌། [འཁྲུལ་སྣང་]མ་སྤངས་[ན་]ཕྱིན་ཅི་ལོག་གྱུར་ཅིང༌། །སྤངས་པས་རྣལ་འབྱོར་ཅན་དུ་འགྱུར། །ཞེས་དང༌། རྨོངས་བྱེད་སྒྱུ་མའི་མཁན་པོ་འདྲ། །ཞེས་པ་ལ་སོགས་པས། རྨོངས་པ་དག་པའི་ཡེ་ཤེས་ལ་ཁམས་གསུམ་པ་ཕྱིན་ཅི་ལོག་གི་ཆོས་མུན་པ་ལྟ་བུ་འདི་མི་སྣང་བར་གསུངས་སོ། །