ལྷག་མཐོང་ཡོད་མེད་ཀྱི་སྣང་ཚུལ་ཡང་མི་གཅིག་པར་བསྟན་པ།
སངས་རྒྱས་ཕལ་པོ་ཆེར་ཡང༌། ལྷག་མཐོང་མེད་པར་མཐོང་བ་ནི། །ཆོས་རྣམས་ངན་པར་[ཏེ་ངན་པའི་ཆོས་རྣམས་]མཐོང་བ་སྟེ། །ལྷག་མཐོང་གིས་ནི་[ཆོས་ཉིད་]མཐོང་གྱུར་ན། །[ཁམས་གསུམ་པ་]ཐམས་ཅད་མཐོང་བ་མེད་པ་ཡིན། །ཞེས་ལྷག་མཐོང་ཡོད་མེད་ལ་སྣང་བ་བཟང་ངན་དང༌། ལྷག་མཐོང་མེད་པ་ལ་སྣང་བ་དེ་ལྷག་མཐོང་ལ་མི་སྣང་བར་གསུངས་པའི་ཕྱིར་དང༌། རྒྱལ་བའི་ཡེ་ཤེས་ནི་ལྷག་མཐོང་གི་མཐར་ཐུག་པ་ཡིན་པའི་ཕྱིར་དེ་ལ་ཁམས་གསུམ་པ་འདི་མི་སྣང་བར་གྲུབ་སྟེ་འདི་ནི་ལྷག་མཐོང་མེད་པ་ལ་སྣང་བའི་ཕྱིར་རོ། །