དོན་ལ་གནས་པ་བསྟན་པས་ལོག་རྟོག་གཞན་ཡང་སེལ་ཚུལ།
དེ་ལྟ་བས་ན་དོན་དམ་གཟིགས་པའི་ཡེ་ཤེས་མཐར་ཐུག་པ་ནི་ཆོས་ཉིད་[གཤིས་ལ་]ཡོད་པར་མཁྱེན་པ་ལ་དངོས་རྟོགས་[ཚད་མ་]དང་ཆོས་རྣམས་[གཤིས་ལ་]མེད་པར་མཁྱེན་པ་ལ་ཤུགས་རྟོགས་ཚད་མ་ཡིན་པའི་ཕྱིར། ཁ་ཅིག་ཚད་མ་ལ་ཤུགས་རྟོགས་མེད་པར་སྨྲ་བ་ནི་མུན་སྤྲུལ་ཁོ་ན་ཡིན་ཞེས་དཔལ་ལྡན་བླ་མ་ཆོས་ཀྱི་རྒྱ་མཚོ་ལྟ་བུ་རྣམས་གསུང་བ་ཤིན་ཏུ་མད་པར་སྣང་ངོ༌། །[ཚད་མ་རྣམ་འགྲེལ་དུ་ཡང༌། གཅིག་དམིགས་ཉམས་སུ་མྱོང་བ་ལས། །འདི་ནི་དམིགས་སོ་ཞེས་བྱ་དང༌། །མི་དམིགས་སོ་ཞེས་རྟོག་ཅན་གྱི། །བློ་ནི་སྐྱེ་བར་འགྱུར་བ་ཡིན། །ཞེས་དང༌། རང་བཞིན་ཁྱད་པར་ཅན་མྱོང་ལས། །གཞན་བསལ་བ་ནི་གཞན་མ་ཡིན། །དེ་ཕྱིར་དེ་མ་དམིགས་པར་ཡང༌། །དེ་ལས་ཁྱད་པར་ཅན་དམིགས་ཉིད། །ཅེས་དགག་གཞི་དག་པ་སྣང་ནས་དངོས་སུ་རྟོགས་པས་དགག་བྱའི་ཆོས་མེད་པ་ཤུགས་ལ་རྟོགས་པའི་ཕྱིར་རོ། །ཡང་ཁ་ཅིག །]རྒྱལ་བའི་ཡེ་ཤེས་སྐད་ཅིག་གཉིས་པ་ཕན་ཆད་བཅད་ཤེས་དང་ཚད་མིན་དུ་སྨྲ་བ་ཡང་དེ་བཞིན་ནོ། །[གཤིས་ཀྱི་]གནས་ལུགས་ལ་ཆོས་ཉིད་ཡོད་པ་དང་ཆོས་རྣམས་མེད་པ་འདི་ནི་ཆོས་དང་ཆོས་ཉིད་རྣམ་འབྱེད་ལ་སོགས་པ་གཞུང་ལུགས་རྣམ་དག་ཁྱད་པར་འཕགས་པ་མང་པོ་ལས་གསུངས་ཤིང༌། དེ་བཞིན་དུ། དོན་དམ་ཡོད་ལ་ཀུན་རྫོབ་མེད་པ་དང༌། མྱང་འདས་[ཆེན་པོ་]ཡོད་ལ་འཁོར་བ་མེད་པ་དང༌། [དོན་དམ་]འགོག་བདེན་ཡོད་ལ་བདེན་པ་གཞན་གསུམ་མེད་པ་དང༌། ཆོས་ཉིད་ཡོངས་གྲུབ་ཡོད་ལ་རང་བཞིན་གཞན་རྣམས་མེད་པ་དང༌། དེ་བཞིན་ཉིད་ཡོད་ལ་ཆོས་གཞན་རྣམས་མེད་པ་དང༌། ཕྱི་ནང་གློ་བུར་དྲི་མ་མེད་ལ་གཞན་མཆོག་བདེ་གཤེགས་སྙིང་པོ་ཡོད་པ་ལ་སོགས་པ་[གཤིས་ཀྱི་]གནས་ལུགས་ལ་ཡོད་མེད་ཀྱི་དོན་རྒྱ་ཆེར་གསུངས་པའི་དགོངས་པ་ལ་མཁས་ན་ཡོད་མེད་ལེགས་པར་ཕྱེ་སྟེ་ཤེས་པ་ཡིན་ནོ། །