ཕྱག་འཚལ་ཞིང་ཉེ་བར་བསྡུ་བ།

ད་ནི་དེ་དག་ཉིད་ལ་བསྟོད་ཅིང་ཕྱག་འཚལ་བའི་སྒོ་ནས་ཉེ་བར་བསྡུ་བ་བརྗོད་པ། [དུས་འཁོར་རྒྱུད་ཕྱི་མར།]གང་དུ་ཡང་དག་[པའི་མཐའ་]ཡིན་ཞེས་[དོན་དམ་དུ་]བདེན་པ་དཀར་པོ་དགེ་བའི་ཚོགས་རྣམས་རྒྱལ་བ་རྣམས་ཀྱི་ཆོས་ཀྱི་སྐུ། །ཆོས་ལས་ལོངས་སྤྱོད་རྫོགས་པའི་སྐུ་སྟེ་མཐའ་དག་སྐད་ཀྱི་ཚོགས་སོ་མཚན་དང་དཔེ་བྱད་རྣམས་ཀྱི་ནི། །ཕུང་པོ་སྤྲུལ་པའི་སྐུ་སྟེ་མཆོག་ཏུ་མི་འགྱུར་བ་ཡི་བདེ་བ་[ངོ་བོ་ཉིད་སྐུ་ཡིན་གྱི་]ཆོས་སྐུ་མ་ཡིན་དེ་ཡི་ཕྱིར། །སྐུ་[བཞི་]རྣམས་ཀྱི་ནི་མཚན་ཉིད་གང་དེ་འདིར་ནི་བདེ་བར་གཤེགས་དང་འཕགས་པ་ཀླུས་བོད་ཀྱིས་ཀྱང་[གསུངས་པ་]ནི། །[ཆོས་དབྱིངས་]གང་ཞིག་[རྣམ་པ་]གཅིག་མིན་[ངོ་བོ་]དུ་མ་ཡང་མིན་རང་དང་གཞན་ལ་ཕན་པ་ཕུན་ཚོགས་ཆེན་པོའི་གཞིར་གྱུར་པ། །དངོས་མེད་ཉིད་མིན་དངོས་པོ་མ་ཡིན་[པའི་ཕུང་པོ་གསུམ་པ་]ནམ་མཁའ་བཞིན་དུ་རོ་མཉམ་[རྣམ་ཤེས་ཀྱིས་]རྟོགས་པར་དཀའ་བའི་རང་བཞིན་ཅན། །[དྲི་མས་]གོས་པ་མེད་ཅིང་[ངོ་བོ་]རྣམ་[པར་]འགྱུར་[བ་]མེད་པ་ཞི་ཞིང་མི་མཉམ་[པ་སྐྱེད་པའི་ཆ་དང་]མཉམ་[པ་སྡུད་པའི་ཆ་སྟེ་དེ་ལྟར་དངོས་པོ་ཀུན་]ལ་ཁྱབ་པ་རབ་ཏུ་སྤྲོས་མེད་པ། །སོ་སོ་རང་[རིག་ཡེ་ཤེས་མཆོག་]གིས་རིག་བྱ་རྒྱལ་བ་རྣམས་ཀྱི་ཆོས་སྐུ་[འགལ་འདུས་སྐྱོན་མེད་ཡིན་པས་]དཔེ་མེད་དེ་ལ་བདག་ནི་ཕྱག་འཚལ་ལོ། །གང་ཞིག་འཇིག་རྟེན་ལས་འདས་བསམ་གྱིས་མི་ཁྱབ་ལེགས་བྱས་བརྒྱ་ཡི་བདག་ཉིད་འབྲས་བུ་འབྱོར་བ་ནི། །རྣམ་པ་སྣ་ཚོགས་ཆེན་པོ་འཁོར་གྱི་ནང་དུ་བློ་ལྡན་རྣམས་ཀྱི་དགའ་བའི་རྒྱུར་ནི་རྒྱས་མཛད་ཅིང༌། །འཇིག་རྟེན་ཀུན་ཏུ་དམ་པའི་ཆོས་སྒྲ་རྒྱ་ཆེན་རྒྱུན་མི་འཆད་པར་རབ་ཏུ་སྤྲོ་མཛད་སངས་རྒྱས་ཀྱི། །ལོངས་སྤྱོད་རྫོགས་སྐུ་འདིར་ནི་ཆོས་ཀྱི་རྒྱལ་སྲིད་ཆེན་པོར་གནས་པ་དེ་ལ་བདག་ནི་ཕྱག་འཚལ་ལོ། །[སྤྲུལ་པ་]གང་ཞིག་སེམས་ཅན་རྣམས་ནི་སྨིན་པའི་སླད་དུ་འགའ་ཞིག་དག་ཏུ་མེ་བཞིན་འབར་བར་སྣང་བྱེད་ཅིང༌། །གང་ཞིག་རྫོགས་པའི་བྱང་ཆུབ་ཆོས་ཀྱི་འཁོར་ལོ་[བསྐོར་བ་དང་]ལ་ལར་ཡང་ནི་སླར་ཡང་རབ་ཏུ་ཞི་བ་[མྱ་ངན་ལས་འདས་པར་]སྟོན། །སྲིད་པ་གསུམ་གྱི་འཇིགས་པ་འཕྲོག་པ་སྣ་ཚོགས་ཐབས་ཚུལ་རྣམས་ཀྱིས་[གཞན་དོན་ལ་]རྣམ་པ་དུ་མར་རབ་འཇུག་པ། །ཐུབ་པ་རྣམས་ཀྱི་སྤྲུལ་སྐུ་དོན་ཆེན་ཕྱོགས་བཅུ་རྣམས་སུ་རྗེས་སུ་སོན་པ་དེ་ལ་ཕྱག་འཚལ་ལོ། །[ཞེས་པ་སྐུ་གསུམ་ལ་བསྟོད་པ་འཕགས་པ་ཀླུ་སྒྲུབ་ཀྱིས་གསུངས་པའོ།།]འཇིག་རྟེན་གསུམ་གྱི་སྤྱོད་པ་ལས་གྲོལ་ནམ་མཁའ་[དང་རྒྱ་]མཉམ་པར་གནས་པ་དངོས་པོ་ཐམས་ཅད་ཀྱི་[རྣམ་པའི་]རང་བཞིན[ཅན]། །[གདོད་ནས་]དག་པ་ཞི་ཞིང་རྣམ་པར་དབེན་ལ་མཆོག་ཏུ་ཞི་བའི་རང་བཞིན་རྣལ་འབྱོར་རྣམས་ཀྱི་[ཡེ་ཤེས་ཀྱིས་]རྟོགས་བྱ་ཉིད། །[རྣམ་ཤེས་ཀྱིས་]རྟོགས་པར་དཀའ་ཞིང་རྣམ་པར་དཔྱད་དཀའ་རང་དང་གཞན་ལ་ཕན་པ་[བརྟན་གཡོ་ཀུན་ལ་]ཁྱབ་པ་མཚན་མེད་རྣམ་རྟོག་དང༌། །[གདོད་ནས་]བྲལ་བ་[དཔེ་ཟླ་མེད་པས་]གཅིག་པུའི་སྐུ་ནི་རྒྱལ་བ་རྣམས་ཀྱི་མི་མཉམ་[པ་ཤེས་རབ་དང་]མཉམ་པ་[ཐབས་ཏེ་དེ་དག་དབྱེར་མེད་པ་]བདེ་བའི་སྐུ་ལ་ཕྱག་འཚལ་ལོ། །[ཞེས་པ་ངོ་བོ་ཉིད་ཀྱི་སྐུ་ལ་བསྟོད་པ་འདི་ནི་སངས་རྒྱས་ཀྱིས་གསུངས་པའོ། །མདོ་སྡེའི་རྒྱན་དུ།]སེམས་ཅན་རྣམས་ལ་[ཉེ་རིང་མེད་པར་]བརྩེ་བ་ཅན། །[སེམས་ཅན་ཐམས་ཅད་ཕན་བདེ་དང་]ཕྲད་[པར་བཞེད་པ་]དང་[དེའི་མི་མཐུན་ཕྱོགས་]བྲལ་བ[ར་བཞེད་པ]འི་དགོངས་པ་ཅན། །[ཕན་བདེ་དང་]མི་འབྲལ་བ[ར་བཞེད་པ]འི་དགོངས་པ་ཅན[ཏེ]། །[དེ་ལྟར་བཏང་སྙོམས་དང༌། བྱམས་པ་དང༌། སྙིང་རྗེ་དང་དགའ་བ་སྟེ་ཚད་མེད་པ་བཞིས་སེམས་ཅན་ལ་]ཕན་བདེ་དགོངས་ཁྱོད་ལ་ཕྱག་འཚལ། །[ཡང་ན་འགྲེལ་པ་ལྟར་བཤད་དོ།།]ཐུབ་པ་སྒྲིབ་ཀུན་[ལས་]ངེས་པར་གྲོལ[བ་རྣམ་ཐར་དང་]། །འཇིག་རྟེན་ཐམས་ཅད་ཟིལ་གྱིས་གནོན[པའི་སྐྱེ་མཆེད་དང་]། །ཁྱོད་ཀྱི་མཁྱེན་པས་ཤེས་བྱ་ཁྱབ[པ་ཟད་པར་གྱི་སྐྱེ་མཆེད་རྣམས་བརྙེས་པས་དེ་རྣམས་ཀྱི་མི་མཐུན་ཕྱོགས་ལས]། །ཐུགས་གྲོལ་ཁྱོད་ལ་ཕྱག་འཚལ་ལོ། །[ཉོན་མོངས་པ་མེད་པ་ནི་]སེམས་ཅན་དག་ནི་ཐམས་ཅད་ཀྱི། །ཉོན་མོངས་མ་ལུས་ཐམས་ཅད་འདུལ། །ཉོན་མོངས་[སྐྱེས་པ་དེ་དག་གཉེན་པོས་]འཇོམས་མཛད་[སེམས་ཅན་]ཉོན་མོངས་[པ་ཅན་]ལ། །བརྩེར་བཅས་ཁྱོད་ལ་ཕྱག་འཚལ་ལོ། །[སྨོན་ནས་མཁྱེན་པ་ནི།]ལྷུན་གྱིས་གྲུབ[པར་མངོན་སུམ་དུ་གྱུར་]ཅིང་ཆགས[པ]་མི་མངའ་[བར་མངོན་གྱུར་པ་དང་ཤེས་བྱ་ཐམས་ཅད་ལ་]ཐོགས་པ་མི་མངའ་[བ་དང་]རྟག་པར་ནི། །མཉམ་པར་གཞག་ཅིང་འདྲི་ཀུན་གྱི། །ལན་ལྡོན་ཁྱོད་ལ་ཕྱག་འཚལ་ལོ། །[སོ་སོ་ཡང་དག་པར་རིག་པ་བཞི་ལས།]རྟེན་[ཆོས་]དང་བརྟེན་པ་[དོན་ནི་]བཤད་བྱ་[ཡིན་པ་]དང༌། །གསུང་[ངེས་ཚིག་]དང་མཁྱེན་པ་[སྤོབས་པ་ནི་]འཆད་བྱེད་[ཡིན་]ལ། །[སངས་རྒྱས་ཀྱི་]བློ་གྲོས་རྟག་[ཏུ་]ཐོགས་[པ་]མི་མངའ་བ། །ལེགས་སྟོན་ཁྱོད་ལ་ཕྱག་འཚལ་ལོ། །[མངོན་ཤེས་དྲུག་ལས་རྫུ་འཕྲུལ་གྱིས་གདུལ་བྱའི་དྲུང་དུ་]གཤེགས་ནས་[གཞན་སེམས་ཤེས་པས་ཕ་རོལ་གྱི་]སྤྱོད་པ་མཁྱེན་མཛད་དེ། །[ལྷའི་རྣ་བས་སེམས་ཅན་]དེ་དག་[གི་]སྐད་[ཤེས་པ་ཉིད་]ཀྱིས་[སྔོན་གནས་རྗེས་སུ་དྲན་པས་]སེམས་ཅན་[སྔོན་]གྱི[མཐའ་ནས་འདིར]། །འོང་[བ་]དང་[འཆི་འཕོ་དང་སྐྱེ་བ་ཤེས་པས་འདི་ནས་གཞན་དུ་]འགྲོ་[བ་]དང་[ཟག་ཟད་ཤེས་པས་འཁོར་བ་ལས་]ངེས་འབྱུང་ལ[གདམས་ངག]། །ལེགས་འདོམས་ཁྱོད་ལ་ཕྱག་འཚལ་ལོ། །ལུས་ཅན་ཀུན་གྱིས་[མཚན་དཔེས་བརྒྱན་པ་]ཁྱོད་མཐོང་ན། །སྐྱེས་བུ་དམ་པ་ལགས་པར་འཚལ། །མཐོང་བ་ཙམ་གྱིས་[སེམས་]རབ་[ཏུ་]དང་བར། །མཛད་པ་ཁྱོད་ལ་ཕྱག་འཚལ་ལོ། །[ཡོངས་སུ་དག་པ་བཞི་ལས་རྟེན་ཡོངས་སུ་དག་པ་ནི་ལུས་]ལེན་[པ་]དང་གནས་[པ་]དང་གཏོང་བ་[ལ་དབང་བ་]དང༌། །[དམིགས་པ་ཡོངས་སུ་དག་པ་ནི་མེད་པ་]སྤྲུལ་[པ་]དང་[ཡོད་པ་]ཡོངས་སུ་བསྒྱུར་བ་[ལ་དབང་བ་]དང༌། །[ཐུགས་ཡོངས་སུ་དག་ནི་རྣམ་པ་ཐམས་ཅད་དུ་]ཏིང་ངེ་འཛིན་[ལ་དབང་བ་]དང་[ཤེས་རབ་ཡོངས་སུ་དག་པ་ནི་རྣམ་པ་ཐམས་ཅད་དུ་]ཡེ་ཤེས་ལ། །[དབང་བས་དེ་རྣམས་ལ་]མངའ་བརྙེས་ཁྱོད་ལ་ཕྱག་འཚལ་ལོ། །[སྟོབས་བཅུ་ལས་དང་པོས་]ཐབས་[ལ་སླུ་བའི་བདུད་]དང་[གཉིས་པས་]སྐྱབས་[ལ་སླུ་བའི་བདུད་]དང་[བདུན་པས་]དག་པ་[ལ་སླུ་བའི་བདུད་]དང༌། །[ལྷག་མ་རྣམས་ཀྱིས་]ཐེག་ཆེན་[ལམ་གྱིས་]ངེས་པར་འབྱུང་བ་ལ། །སེམས་ཅན་རྣམས་ལ་རབ་སླུ་བའི། །བདུད་འཇོམས་ཁྱོད་ལ་ཕྱག་འཚལ་ལོ། །[མི་འཇིགས་པ་བཞི་ལས་]རང་[དོན་དང་]གཞན་དོན་དུ་[གཉིས་གཉིས་ཏེ་དང་པོ་ནི་]ཡེ་ཤེས་དང༌། །སྤངས་[པ་]དང་[གཉིས་པ་ནི་]ངེས་འབྱུང་[དང་]བགེགས་བྱེད་པ། །སྟོན་[པར་]མཛད་[་པ་ལ་མི་འཇིགས་པ་ཐོབ་པས]་མུ་སྟེགས་གཞན་དག་གིས། །མི་རྫི་ཁྱོད་ལ་ཕྱག་འཚལ་ལོ། །[འཁོར་གྱི་ནང་དུ་]བསྲུང་[བ་]མེད་[པ་གསུམ་དང་དྲན་པ་ཉེར་བཞག་གིས་]བསྙེལ་བ་མི་མངའ་བ[སྟེ]། །[སྲུང་བ་མེད་པས་]འཁོར་གྱི་ནང་ན་བག་བརྐྱང་[སྟེ་]གསུང༌། །[བསྙེལ་བ་མི་མངའ་བས་]ཀུན་ནས་ཉོན་མོངས་[ཆགས་སྡང་]གཉིས་སྤངས་པའི[སྒོ་ནས]། །འཁོར་སྡུད་ཁྱོད་ལ་ཕྱག་འཚལ་ལོ། །[བག་ཆགས་ཡང་དག་བཅོམ་པ་ནི་]ཀུན་མཁྱེན་ཁྱོད་ལ་རྒྱུ་བ་[སྟེ་གཤེགས་པ་]དང༌། །གནས་པ་[སྟེ་བཞུགས་པ་]ཀུན་ལ་རྟག་པར་ནི། །ཀུན་མཁྱེན་མིན་[པའི་]སྤྱོད་[པ་]མི་མངའ་བ། །ཡང་དག་དོན་ལྡན་ཁྱོད་ཕྱག་འཚལ། །[བསྙེལ་བ་མི་མངའ་བ་ནི་]སེམས་ཅན་ཀུན་གྱི་བྱ་བ་ལ། ། ཁྱོད་ནི་དུས་ལས་མི་འདའ་བས། །མཛད་པ་རྟག་ཏུ་དོན་མངའ་བ། །མི་བསྙེལ་ཁྱོད་ལ་ཕྱག་འཚལ་ལོ། །[ཐུགས་རྗེ་ཆེན་པོ་ནི་]འཇིག་རྟེན་ཀུན་ལ་[སུ་ནི་ཉམས་སུ་ནི་འཕེལ། ཞེས་སོགས་ཀྱི་ཚུལ་གྱིས་]ཉིན་[ལན་གསུམ་]མཚན་[ལན་གསུམ་]དུ[གཟིགས་པས]། །ལན་དྲུག་ཏུ་ནི་སོ་སོར་གཟིགས། །ཐུགས་རྗེ་ཆེན་པོ་དང་ལྡན་པ། །ཕན་དགོངས་ཁྱོད་ལ་ཕྱག་འཚལ་ལོ། ། [སངས་རྒྱས་ཀྱི་ཆོས་མ་འདྲེས་པ་]སྤྱོད་པ[ས་བསྡུས་པ་དྲུག་]དང་ནི་རྟོགས་པ[ས་བསྡུས་པ་དྲུག་]དང༌།།ཡེ་ཤེས་[ཀྱིས་བསྡུས་པ་གསུམ་]དང་ནི་འཕྲིན་ལས་ཀྱིས[བསྡུས་པ་གསུམ་སྟེ་དེ་ལྟར་བཅོ་བརྒྱད་ཀྱིས]།།ཉན་ཐོས་རང་སངས་རྒྱས་ཀུན་གྱི[འང་]། །བླ་མ[ར་གྱུར་པས་གཞན་ཐམས་ཅད་ལས་ཆོས་མཆོག་ཏུ་གྱུར་པ་]ཁྱོད་ལ་ཕྱག་འཚལ་ལོ། །[རྣམ་པ་ཐམས་ཅད་མཁྱེན་པ་ཉིད་ནི་]སྐུ་གསུམ་དག་གིས་[རྣམ་པ་ཐམས་ཅད་དུ་]བྱང་ཆུབ་ཆེ[ན་པོའི]། །རྣམ་པ་ཀུན་བརྙེས་[པའི་ཕྱིར་དང་ཤེས་བྱ་ཐམས་ཅད་རྣམ་པ་]ཐམས་ཅད་དུ[མཁྱེན་པའི་ཕྱིར]། །སེམས་ཅན་ཀུན་གྱི་ཐེ་ཚོམ་དག །གཅོད་པ་ཁྱོད་ལ་ཕྱག་འཚལ་ལོ། །[ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པའི་ཚུལ་ནི། ལོངས་སྤྱོད་སོགས་ལ་]འཛིན་པ་མེད་ཅིང་ཉེས་མི་མངའ། །[ཁོང་ཁྲོས་]རྙོག་པ་མེད་ཅིང་[རྟོགས་པ་ངན་ངོན་ཙམ་ལ་]མི་གནས་པ། །[རྣམ་གཡེང་གིས་]མི་གཡོ་[ཞིང་]ཆོས་རྣམས་ཐམས་ཅད་ལ[ལྡོག་པའི]། །སྤྲོས་མེད་[དེ་དེ་ལྟར་གྲངས་བཞིན་དུ་ཕར་ཕྱིན་དྲུག་རྫོགས་པ་]ཁྱོད་ལ་ཕྱག་འཚལ་ལོ། །[སངས་རྒྱས་ཐོབ་པའི་ཚུལ་ནི་]དམ་པའི་དོན་ནི་[དྲི་མ་བྲལ་བས་]གྲུབ་པ་[ངོ་བོ་ཉིད་སྐུ་ཐོབ་པ་]སྟེ། །[དེ་ཡང་]ས་ཀུན་ལས་ནི་ངེས་པར་འབྱུང༌། །སེམས་ཅན་ཀུན་གྱི་མཆོག་ཏུ་གྱུར[ནས]། །སེམས་ཅན་ཐམས་ཅད་རྣལ་གྲོལ་མཛད། །ཡོན་ཏན་མི་ཟད་མཉམ་མེད་[རྣམས་དང་]ལྡན། །འཇིག་རྟེན་[གྱི་ཁམས་སྣ་ཚོགས]་དག་[ཏུ་སྣང་བ་སྤྲུལ་སྐུ་]དང་[འཁོར་གྱི་]དཀྱིལ་འཁོར་ནའང༌། །སྣང་[བ་ལོངས་སྐུ་ཡིན་]ལ་[ཆོས་ཉིད་ངོ་བོ་ཉིད་སྐུ་ནི་ཡེ་ཤེས་མ་སྐྱེས་པའི་]ལྷ་དང་མི་རྣམས་ཀྱིས། །རྣམ་པ་ཀུན་ཏུ་མི་མཐོང་[ཞིང་ཡེ་ཤེས་འབའ་ཞིག་གིས་མཐོང་]བ[སྟེ]། །[དེ་ལྟར་བདེན་པ་གཉིས་ཀྱིས་བསྡུས་པའི་]རྒྱལ་བ་ཀུན་ལ་ཕྱག་འཚལ་ཞིང༌། །མཆོད་སྤྲིན་རྒྱ་མཚོས་མཆོད་པ་དང༌། །བཀའ་བཞིན་སྒྲུབ་པ་རྩེ་གཅིག་ལ། །དུས་རྣམས་ཀུན་ཏུ་བརྩོན་པར་ཤོག །[ཅེས་པ་ཚིགས་བཅད་ཕྱི་མ་འདི་ནི་རང་གི་སྨོན་ལམ་མོ།།] ལམ་གྱིས་དྲི་མ་བྲལ་བ་དང༌། ངོ་བོ་བསྐྱེད་པའི་འབྲས་བུའི་སྐབས་སོ། །།།