བཞི་པ་ངག་ཀྱལ་པ་ནི།
མཛོད་དུ། ཉོན་མོངས་ཅན་ཀུན་ཀྱལ་པ་ཉིད། །ཅེས་འབྱུང་བ་ལ། གཞི། བསམ། སྦྱོར་བ། ཉོན་མོངས། མཐར་ཐུག་སྟེ་ལྔ་ལས། དང་པོ་རང་ལས་ཐ་དད་པའི་སེམས་ཅན་དུ་གཏོགས་པ། གཉིས་པ་རྫུན་ཕྲ་མ་ཚིག་རྩུབ་མ་གཏོགས་ཉོན་མོངས་ཅན་གྱི་ཚིག་ཐམས་ཅད། གསུམ་པ། ཁ་གསག་གླུ་དང་ཟློས་གར་བཞིན། །བསྟན་བཅོས་ངན་བཞིན་ཞེས་འབྱུང་བ་རྣམས་ངག་གི་ལས་སུ་འདོན་པ། བཞི་པ་གླུ་ལ་སོགས་པའི་འདོད་ཆགས་དང༌། ཕྱི་རོལ་པའི་བསྟན་བཅོས་ངན་པ་ལ་བརྟེན་པའི་གཏི་མུག་གིས་རྫོགས་པའོ། །ལྔ་པ་ཕ་རོལ་པོས་ཐོས་པ་སྟེ། དེ་རྣམས་ཀྱིས་ཀྱལ་པའི་ལས་ལམ་རྫོགས་པའོ། །