གཉིས་པ་འབྲས་བུའི་ཁྱད་པར་ལ།
མཛོད་དུ། ཐམས་ཅད་བདག་པོ་རྒྱུ་མཐུན་དང༌། །རྣམ་སྨིན་འབྲས་བུས་འབྱིན་པར་འདོད། །ཅེས་འབྱུང་བའི་ཕྱི་མ་རྣམ་པར་སྨིན་པའི་འབྲས་བུ་ལ། བི་སཱ་ཀ་ཞེས་པའམ། རྣམ་པར་སྨིན་པའམ། ཁྱད་པར་དུ་སྨིན་པ། ཡང་ན་བི་ཤེ་ཥ་སཱ་ཀ་ཞེས་པ། ཡི་གེ་བསྣན་པའི་ངེས་ཚིག་གིས་མི་འདྲ་བར་སྨིན་པ་ཞེས་ཏེ། རྒྱུ་ཆུང་ངུ་སྤྱད་པ་ལས་འབྲས་བུ་ཆེས་ཆེན་པོ་སྨིན་པ་སྟེ། རྒྱུ་དེས་འབྲས་བུའི་ཆ་ཙམ་ཡང་མཚོན་མི་ནུས་པར་སྨིན་པ་ལས་དེ་སྐད་ཅེས་བྱའོ། །དེ་ལྟར་ཤེས་པར་བྱས་ནས། ཀུན་སློང་དྲག་པོས་འཕངས་པའི་ལས་མི་དགེ་བ་དེ་དང་དེ་ཆེན་པོར་སྤྱད་པ་ལས་འབྲས་བུ་དམྱལ་བ། འབྲིང་དུ་སྤྱད་པས་ཡི་དྭགས། ཆུང་དུ་སྤྱད་པས་དུད་འགྲོར་འཕེན་པར་བྱེད་ལ། གདགས་པ་ལས་ཡི་དྭགས་དང་དུད་འགྲོ་གོ་བཟློག་ཏུའང་བཤད་དོ། །