གཉིས་པ་བདེན་པ་ལ་གདམས་པ་ནི།

བདེན་པ་རྣམས་དང་ནི། །ཞེས་པ་ལ་བཞི་ལས། དང་པོ་སྡུག་བསྔལ་གྱི་བདེན་པ་ལ་གདམས་པ་ནི། གསོལ་པ། བརྩོན་ཞེས་བགྱི་བའི་གྲངས་སུ་ཆུད་པ་ལགས། དེ་ནས་ཕྲེང་ཕྱེད་དང་བཅུ་དགུ་ན། དེ་ཕུང་པོ་སྟོང་པ་ཉིད་དང༌། ཁམས། སྐྱེ་མཆེད་འཕགས་པའི་བདེན་པ་རྟེན་འབྲེལ་འདུས་བྱས་ཀྱི་ཆོས། འདུས་མ་བྱས་ཀྱི་ཆོས་སྟོང་པ་ཉིད་དེ། སྟོང་པ་ཉིད་བྱེད་ཀྱང༌། དེ་ཙམ་གྱིས་བརྩོན་པར་བྱ་བ་ཡོངས་སུ་རྫོགས་པར་བྱ་བ་མ་ཡིན་པས། བརྩོན་ཞེ་འམ། བརྩོན་པར་བྱ་བ་བརྩམས་པས། མི་བརྩོན་ཞེས་མི་བརྗོད་དེ། བརྩོན་པར་བྱེད་པ་ཡོད་དོ། །སྙམ་དུ་རྟོག་པ་བཟློག་གོ །དེ་ནས་ཕྲེང་གཉིས་ན་མི་མཐོང་ངོ༌།།