གཉིས་པ་ཆོས་དཀོན་མཆོག་ལ་གདམས་པ་ནི།
ཤཱ་ར་དྭ་ཏིའི་བུ། ཕྱིན་པ་ལ་སྤྱོད་པའི་ཚེ། ཆོས་གང་ལ་ཡང་ཡོད་མེད་ལ་སོགས་པར་མི་རྟོག་ཅིང་མི་དམིགས་ལ་མི་སེམས་པར་སྤྲོས་བྲལ་གྱི་ངང་དུ་འཇོག་དགོས་པའི་ཕྱིར། གཟུགས་འབྱུང་བའམ། དངོས་པོ་གཟུགས་འཇིག་པའམ། དངོས་པོ་མེད། དེ་ནས་ཤོག་གུ་བཞི་དང་ཕྲེང་ཕྱེད་བརྒྱད་ན། ཞེས་བྱ་བར་མི་སྦྱོར་རོ། །ཞེས་བྱ་བས་འབྱུང་བ་དང་འཇིག་པར་སྦྱོར་བ་ཡོངས་སུ་སྤང་བར་བསྟན་ཏོ། །བམ་པོ་བརྒྱད་པ། གཟུགས་རྟག་ཅེས་བྱ་བར་མི་སྦྱོར་རོ། །ཞེས་བྱ་བ་ནི་ལྟ་བའི་དབང་གིས་སོ། །ཞེས་དང༌། མི་རྟག་ཅེས་བྱ་བར་མི་སྦྱོར་རོ། །ཞེས་བྱ་བ་ནི་རྣམ་པར་རྟོག་པའི་དབང་གིས་སོ། །ཞེས་དབུ་མ་པ་གསུངས། དེ་བཞིན་དུ་སྦྱར་ཏེ། དེ་ནས་ཤོག་གུ་བཅུ་གསུམ་དང་ཕྲེང་གཉིས་ཅུང་མེད་ན། གཟུགས་ཞི་ཞེས་བྱ་བར་མི་སྦྱོར་རོ། །ཞེས་བྱ་བ་ནི་ཀུན་བཏགས་པའི་གཟུགས་ལ་སོགས་པ་མྱ་ངན་ལས་འདས་པའི་མཚན་ཉིད་མེད་པའི་ཕྱིར་རོ། །གཟུགས་མི་སྦྱོར་རོ། །ཞེས་བྱ་བ་ནི་ཆོས་ཉིད་ཀྱི་གཟུགས་ལ་སོགས་པ་ལ་འཁོར་བའི་མཚན་ཉིད་མེད་པའི་ཕྱིར་རོ། །ཞེས་དབུ་མ་པ་གསུངས། དེ་ནས་ཤོག་གུ་གསུམ་དང་ཕྲེང་ཕྱེད་དང་བཅུ་གསུམ་ན། མ་ཞི་ཞེས་བྱ་བར་མི་སྦྱོར་རོ། །ཞེས་བྱ་བ་ནི་དེ་ནས་དེ་ལྟ་བུའི་རྟོག་པའི་སྐབས་མེད་པའི་ཕྱིར་རོ། །ཞེས་དབུ་མ་པ་གསུངས། བརྩོན་ཞེས་བྱའོ། །ཞེས་བྱ་བས་ཆོས་ཐམས་ཅད་ལ་རྟག་པ་ལ་སོགས་པར་སྦྱོར་བ་ཡོངས་སུ་སྤང་བར་བསྟན་ཏོ། །སྤྱོད་པའི་ཚེ་རྣམ་པར་རྟོག་པའི་སྐབས་མེད་པའི་ཕྱིར་གཟུགས་སྟོང་དང༌། དེ་ནས་ཤོག་གུ་གསུམ་ཅུང་མེད་ན། བམ་པོ་དགུ་པ། ཕ་རོལ་ཏུ་ཕྱིན་པ་ལ་སྤྱོད་པའི་ཚེ། རྣམ་པར་རྟོག་པའི་སྐབས་མེད་པའི་ཕྱིར། གཟུགས་མཚན་མ་ཡོད། དེ་ནས་ཤོག་གུ་གསུམ་དང་ཕྲེང་ལྔ་ཙམ་ན་སྦྱོར་བའི་ཚེ། རྣམ་པར་རྟོག་པའི་སྐབས་མེད་པའི་ཕྱིར་གཟུགས་སྨོན་པ་ཡོད། དེ་ནས་ཤོག་གུ་གསུམ་དང་ཕྲེང་ལྔ་ཙམ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་ཞེས་བྱའོ། །ཞེས་བྱ་བས་ཆོས་ཐམས་ཅད་རྣམ་ཐར་སྒོ་གསུམ་དང་སྦྱོར་བའི་རྟོག་པ་སྤང་བར་བསྟན་ཏོ། །ཤཱ་ར་དྭ་ཏིའི་བུ། དེ་ནས་ཤོག་གུ་བརྒྱད་དང་ཕྲེང་བཅུ་གཅིག་ན། བརྩོན་ཞེས་བྱའོ། །ཞེས་བྱ་བས་ཆོས་རྣམ་པ་དུས་གསུམ་དང་སྦྱོར་བའི་རྟོག་པ་ཡོངས་སུ་སྤང་བར་བསྟན་ཏོ། །ཤཱ་ར་དྭ་ཏིའི་བུ། དེ་ནས་ཤོག་གུ་བཞི་ན། བམ་པོ་བཅུ་པ། དེ་ནས་ཤོག་གུ་གསུམ་དང་ཕྲེང་གཅིག་ན། དེ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ། རྣམ་པར་རྟོག་པ་རྣམས་ཀྱི་སྐབས་མེད་པས། སྤྱོད་ཅེས་བྱ་བར་རྟོག་པ་མི་དམིགས་སོ། །མི་སྤྱོད་ཅེས་བྱ་བར་རྟོག་པ་མི་དམིགས་སོ།། ཡིན་ཞེས་བྱ་བར་རྟོག་པ་མི་དམིགས་སོ། །མ་ཡིན་ཞེས་བྱ་བར་རྟོག་པ་མི་དམིགས་སོ། །དེ་ནས་ཕྲེང་ཕྱེད་དང་གཉིས་ནས། མི་སྤྱོད་དོ། །ཞེས་བྱ་བ་ནི་ཆོས་ཐམས་ཅད་ཆོས་ཉིད་དུ་ཐ་དད་པ་མེད་པ་ལ་ཐ་དད་དུ་འཛིན་པ་མི་འཐད་པའི་ཕྱིར་ཏེ། ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དུ་ཐ་མི་དད་དོ། །ཞེས་དབུ་མ་པ་གསུངས། ཚུལ་ཁྲིམས་ཀྱི་ཕ། དེ་ནས་ཤོག་གུ་གཉིས་ལ་ཕྲེང་བཞི་ཆད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་ཞེས་བྱའོ། །ཞེས་བྱ་བར་ཆོས་རྣམས་ཐ་དད་པར་སྦྱོར་བའི་རྣམ་རྟོག་ཡོངས་སུ་སྤང་བར་བསྟན་ཏོ། །དེ་ནས་ཕྲེང་ཕྱེད་དང་བཞི་ནས། ལྟ་ག་ལ་འོང༌། ཞེས་བྱ་བས་ནི་མངོན་པར་ཤེས་པ་རྣམས་ཀུན་བཏགས་པའི་ངོ་བོ་ཉིད་ཡིན་པ་དང་ཀུན་བཏགས་པའི་དམིགས་པ་ཡིན་པའི་ཕྱིར། དེ་སྐད་དུ་བཤད་དོ། །བྱ་བའི་འགྲེལ་པ་ལ་ཡང་དེ་བཞིན་དུ་སྦྱར་རོ། །ཞེས་དབུ་མ་པ་གསུངས། བརྩོན་ཞེས་བྱའོ། །ཞེས་བྱ་བས་མངོན་པར་ཤེས་པ་དང་སྦྱོར་བའི་རྟོག་པ་ཡོངས་སུ་སྤང་བར་བསྟན་ཏོ། །ཤཱ་ར་དྭ་ཏིའི་བུ། དེ་ནས་ཤོག་གུ་གཅིག་དང་ཕྲེང་ལྔ་ན། བརྩོན་ཞེས་བྱའོ། །ཞེས་བྱ་བས་མངོན་པར་ཤེས་ཀྱིས་བྱ་བ་དང་སྦྱོར་བའི་རྟོག་པ་ཡོངས་སུ་སྤང་བར་བསྟན་ཏོ། །ད་ནི་དེའི་ཕན་ཡོན་སྟོན་ཏེ། ཤཱ་ར་དྭ་ཏིའི་བུ། དེ་ནས་ཕྲེང་བརྒྱད་ན་འགྱུར་རོ། །ཕན་ཡོན་དེ་ལྟ་བུ་ཐོབ་བོ། །དེ་ཅིའི་ཕྱིར་ཞེ་ན། དེ་ནས་ཤོག་བུ་བཞི་དང༌། ཡིག་ཕྲེང་གསུམ་ན། ཚོགས་མི་ཆེ་བར་སྟེ་འབད་མི་དགོས་པར་མངོན་དུ་འགྱུར་རོ། །དེ་ནས་ཕྲེང་གཉིས་ན། ཕྱིན་པ་ལ་སྤྱོད་ཅིང་མཉམ་པར་འཇོག་པ་ནི། འདུ་བ་འཁོར་བ། འདུ་འབྲལ་བར་འགྱུར་བ། མྱ་ངན་ལས་འདས་པའང༌། འཁོར་བའི་ལས་འཕྲད་པའང་མྱ་ངན་ལས་འདས་ཀྱི་ལས་མི་འཕྲད་པ་དེ་ལྟ་བུ་མི་དམིགས་ཤིང༌། ཡང་དག་བརྩོན་ཞེས་བྱའོ། །ཞེས་བྱ་བས་འདུ་བ་དང་འབྲལ་བའི་རྣམ་པར་རྟོག་པ་ཡོངས་སུ་སྤང་བར་བསྟན་ཏོ། །ཤཱ་ར་དྭ་ཏྀའི་བུ། དེ་ནས་ཕྲེང་དགུ་ན། བརྩོན་ཞེས་བྱའོ། །ཞེས་བྱ་བས་མངོན་པར་རྫོགས་པར་བྱང་ཆུབ་པའི་རྟོག་པ་ཡོངས་སུ་སྤང་བར་བསྟན་ཏོ། །མི་སྦྱོར། ཞེས་བྱ་བ་ནི་གཟུགས་སྟོང་པའི་ངོ་བོ་ཉིད་དང་མི་སྦྱོར་བ་དང༌། གཟུགས་ཞེས་བྱ་བ་སྟོང་པ་ཉིད་ཅེས་བྱ་བའི་མིང་དུ་མི་སྦྱོར་བའོ། །སྟོང་པ་ཉིད་དང་གཟུགས་སུ་མི་སྦྱོར་རོ། །ཞེས་བྱ་བ་ནི་སྟོང་པ་ཉིད་དང་གཟུགས་ཀྱི་རང་བཞིན་དང་མི་སྦྱོར་བ་དང༌། སྟོང་པ་ཉིད་ཅེས་བྱ་བ་གཟུགས་ཀྱི་མིང་ཡིན་ནོ། །ཞེས་མི་སྦྱོར་བའོ། །ཞེས་དབུ་མ་པ་གསུངས། དེ་བཞིན་དུ་སྦྱར་ཏེ། ཚོར་བ་དང༌། སྟོང་དེ་ནས་ཕྲེང་བ་བཅོ་ལྔ་ན། མི་སྦྱོར། ཞེས་བྱ་བས་སྟོང་པ་ཉིད་ལ་སྦྱོར་བའི་རྣམ་པར་རྟོག་པ་སྤང་བར་བསྟན་ཏེ། དེ་ལྟར་མི་རྟོག་པར་སྦྱོར་བའི་ཚུལ་གྱིས་བརྩོན་པ་ནི། ཤེར་ཕྱིན་ལ་བརྩོན་པ་བསྟན་ཏོ། །འདིར་རྟོག་པ་ཐམས་ཅད་སྤང་བྱར་བསྟན་པ་འདིས་ནི་ཁ་ཅིག་རྣམ་རྟོག་ཆོས་སྐུ་ཡིན་པ་སྨྲ་བ་དེ་དག་བོད་ཀྱིས་རང་བཟོར་བྱས་པའི་རྒྱུད་ཀྱིས་མགོ་བསྐོར་བའི་རྣམ་འགྱུར་དུ་བསྟན་པ་ཡིན་ནོ། །དེ་ཅིའི་ཕྱིར། དེ་ནས་ཕྲེང་གསུམ་ན། རྣལ་འབྱོར་ནི། རྣལ་འབྱོར་གང་བས་ཀྱང་ལྷག་པའི་ཕྱིར། རབ་ཅེས་བྱ། གྱ་ནོམ་པ་ཞེས་བྱའོ།། ཞེས་པ་ནི་བཟང་བའི་རྣམ་གྲངས་སོ། །དེ་ནས་ཕྲེང་གཉིས་ན། ཉེ་བར་གྱུར་པའོ།། ཞེས་བྱ་བ་ནི་ས་བརྒྱད་པ་ཐོབ་པའི་ལུང་བསྟན་པར་གྱུར་པའམ། ལུང་བསྟན་པར་འོས་པའི་ཕྱིར། ལུང་བསྟན་པར་ཉེ་བར་གྱུར་པའོ། །ཞེས་དབུ་མ་པ་གསུངས་པ་ནི། ས་བརྒྱད་པ་ལ་ནི་སྐྱེ་བ་མེད་པའི་ཆོས་ལ་བཟོད་པ་ཐོབ་སྟེ། རྣམ་པར་སྨིན་པའི་ཕ་རོལ་ཏུ་ཕྱིན་པ་རྣམས་འབྱུང་ངོ༌། །རྣམ་པར་སྨིན་པའི་ཕ་རོལ་ཏུ་ཕྱིན་པ་རྣམས་བྱུང་བས། ཕ་རོལ་ཏུ་ཕྱིན་པ་རྣམས་ལ་སྤྱོད་པ་དང༌། སེམས་ཅན་ཡོངས་སུ་སྨིན་པར་བྱ་བ་དང༌། སངས་རྒྱས་ཀྱི་ཆོས་ཡོངས་སུ་སྨིན་པར་བྱ་བ་དང༌། སངས་རྒྱས་ཀྱི་ཞིང་ཡོངས་སུ་དག་པར་བྱ་བ་དང༌། མངོན་པར་རྫོགས་པར་བྱང་ཆུབ་པར་བྱ་བ་དང༌། ཆོས་ཀྱི་འཁོར་ལོ་བསྐོར་བར་བྱ་བ་ལ་རྩོལ་པ་དང་བྲལ་ཞིང༌། ལྷུན་གྱིས་གྲུབ་པ་ཉིད་དུ་ཐམས་ཅད་སྒྲུབ་བོ། །ཞེས་དབུ་མ་པ་ཆེན་པོ་གསུངས། དེའི་ཕྱིར་དོན་བྱེད་པ་ལ་སོགས་པའི་ཡོན་ཏན་དེ་ལྟ་བུ་དག་ཡོད་ཀྱང༌། དེ་ནས་ཕྲེང་ཕྱེད་དང་གསུམ་ན། སྙམ་དུ་མི་སེམས་སོ། །དེ་ལྟར་བྱ་བ་རྣམས་ལྷུན་གྲུབ་ཏུ་གནས་པའི་གཏན་ཚིགས། དེ་ཅིའི་ཕྱིར་ཞེ་ན། བྱེ་བྲག་ཏུ་འབྱེད་པའམ་མཚན་མར་བྱེད་པ་མེད་དེ། ཞེས་གསུངས་ཏེ། དེ་ཕན་ཆད་དེ་ལ་ཆོས་ཀྱི་དབྱིངས་མ་གཏོགས་པར་དམིགས་པ་གཞན་ཉེ་བར་མི་གནས་ལ་ཆོས་ཀྱི་དབྱིངས། དེ་ལ་ཡང་མཚན་མར་བྱས་ཏེ་དེ་མི་དམིགས་སོ། །ཞེས་དབུ་མ་པ་གསུངས། དེ་ནས་ཕྲེང་གཅིག་ལྷག་ན། མི་མཐོང་སྟེ། དེ་ལྟ་བུའི་མཚན་འཛིན་པ་དང༌། རློམ་སེམས་མི་འབྱུང༌། དེ་ནས་ཕྲེང་བདུན་ཅུང་མེད་ན། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ཏེ། ཞེས་བྱ་བ་ནི། དེ་ཕན་ཆད་དེའི་སྤྱོད་པ་སེམས་ཅན་ལ་དམིགས་པ་མེད་དོ། །ཞེས་བསྟན་པ་སྟེ། སྙིང་རྗེའི་མཐུས་ཀུན་རྫོབ་ཀྱི་ཤེས་པ་སྐྱེ་སྟེ། དེའི་སེམས་ཅན་རྣམས་ཀྱི་དོན་དུ་སྦྱིན་པ་ལ་སོགས་ཡོངས་སུ་རྫོགས་པར་བྱེད་དུ་ཟིན་ཀྱང་སེམས་ཅན་སྐྱེ་བ་མེད་པ་དང༌། འགག་པ་མེད་པ་དང༌། སེམས་ཅན་སྟོང་པ་ཉིད་དང༌། སེམས་ཅན་དམིགས་སུ་མེད་པ་དང༌། སེམས་ཅན་དབེན་པ་ཉིད་ལ་གནས་པས་དེ་ལྟར་གནས་ཤིང་ཐམས་ཅད་བྱེད་དོ། །ཞེས་བྱའོ། །ཞེས་དབུ་མ་པ་གསུངས། རྣལ་འབྱོར་ཏོ། །ཞེས་པ་འདི་དག་ནི། རྗེ་བཙུན་སྤྱན་རས་གཟིགས་ཀྱིས། བསྐྱེད་པའི་རིམ་པར་གསུངས་པའི་ཧཱུཾ་དང་ནི། །ཕཊ་ཡིག་ལ་སོགས་རྟོག་པ་དང་བྲལ་བ། །རྫོགས་པའི་རིམ་པའི་རྣལ་འབྱོར་དེ་ཉིད་དེ། །དེ་ཉིད་ཀྱི་ནི་སྒྲུབ་ཐབས་གཞན་ཡོད་མིན། །ཞེས་དང༌། ཤིན་ཏུ་རྣམ་དག་རིམ་པར་གཅིག་པུ་ནི། །ཐར་པའི་སླད་དུ་སངས་རྒྱས་རྣམས་ཀྱིས་བསྟན། །ཞེས་གསུངས་པ་དང་དོན་གཅིག་གོ །མ་ཡིན་པའི་རྣལ་འབྱོར། འཇིག་རྟེན་པ་དང༌། ཉན་ཐོས་དང༌། རང་སངས་རྒྱས་ཀྱི་རྣལ་འབྱོར་རྣམས་ཟིལ་གྱིས་ཆེན་པོ་ནི། སེམས་ཅན་དམིགས་སུ་མེད་ཀྱང་སེམས་ཅན་གྱི་དོན་བྱ་བའི་ཕྱིར། དེ་བཞིན་གཤེགས། དེ་ནས་ཕྲེང་ཅིག་ལྷག་ན། འདི་ལ་སྤྱོད་པ་ནི། ཕྱིན་དྲུག་གི་མི་མཐུན་པར་ཕྱོགས་མེད་པའི་ཕྱིར། སེར་སྣའི་སེམས།