དྲུག་པ། ལམ་ནི་ཡོངས་སུ་འཛིན་པ་དང༌།
།ཞེས་ལམ་ཡོངས་སུ་འཛིན་པ་གདམས་པ་ནི། དེ་ནས་ཚེ་དང༌། རྣམ་མཁྱེན་གྱི་ཡེ་ཤེས་ནི་དེ་བཞིན་གཤེགས་པ་ཉིད་ཀྱི་ཡིན་གྱི་བྱང་ཆུབ་སེམས་དཔའི་མ་ཡིན་ནོ། །སྙམ་དུ་བསམ་ནས་བཅོམ་ལྡན་འདས། དེ་ནས་ཕྲེང་གཉིས་ལྷག་ཙམ་ན། ཇེ་གང་ལགས། ཞེས་ཞུས་པ་དང༌། ལྡན་པས་ནི། ཞེས་བྱ་བ་ལ་སོགས་པས་ས་བརྒྱད་པ་ལ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་དེ་ལྟ་བུ་སྐྱེ་བ་དེ་ནི་རང་བཞིན་ཡིན་ཏེ། རྣམ་པར་སྨིན་པའི་ཡེ་ཤེས་སོ་ཞེས་བསྟན་ཏོ། །རྣམ་པར་སྨིན་པའི་ཡེ་ཤེས་ཀྱིས་ནི་ཕ་རོལ་ཏུ་ཕྱིན་པ་ལ་སོགས་པ་ཐམས་ཅད་ཡོངས་སུ་རྫོགས་པར་བྱེད་ཀྱང༌། དེ་དག་ལ་རྩོལ་བའི་ཡིད་བྱེད་པ་མི་འབྱུང་སྟེ། ཡེ་ཤེས་ཏེ་རྣམ་པ་ཐམས་ཅད་མཁྱེན་པ་ཉིད་ཀྱི་རྒྱུ་ཡིན་པའི་ཕྱིར་རྒྱུ་ལ་འབྲས་སུ་གཏག་ནས་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་བྱའོ། །ཞེས་དབུ་མ་པ་གསུངས། དེ་ནས་ཤོག་གུ་གཅིག་དང་ཕྲེང་ཕྱེད་དྲུག་ན། མཉམ་གཞག་ཏུ་ཅིར་ཡང་མི་རྟོག་པས་སངས་རྒྱས་ཀྱི་འདུ་ཤེས་མི་བསྐྱེད་དོ། །དེ་ནས་ཤོག་གུ་གཉིས་ཅུང་མེད་ན། རྗེས་སུ་མི་མཐོང་ངོ༌། །དེ་ལ་མ་ཞེན་པས་ནི་ཡོངས་སུ་ཉམས་པར་མ་འགྱུར་ལ། མི་ངལ་པས་ནི་ཇི་སྲིད་དུ་བགྲོད་པར་བྱ་བར་འགྲོ་བར་འགྱུར་རོ། །ཡེ་ཤེས་ཀྱིས་ཡོངས་སུ་བཟུང་བས་ནི་ལམ་གཞན་དུ་འགྲོ་བ་རིམ་འགྱུར་རོ། །ཞེས་ཉི་ཁྲི་སྣང་བར་གསུངས།