བཀའ་མདོ་རྒྱུད་ཟབ་མོ་ཀུན་གྱི་སྤྱི་འགྲེལ་གཅིག་ཤེས་ཀུན་གྲོལ་ཞེས་བྱ་བ་བཞུགས་སོ། །
ཨོཾ་གུ་རུ་བུདྡྷ་བོ་དྷི་སཏྭེ་བྷྱོ་ན་མོ་ན་མཿ བཀའ་མདོ་རྒྱུད་ཟབ་མོ་ཀུན་གྱི་སྤྱི་ འགྲེལ་གཅིག་ཤེས་ཀུན་གྲོལ་ཞེས་བྱ་བ། དཔལ་ལྡན་བླ་མ་དམ་པ་དང༌། དཔལ་ཡོངས་གྲུབ་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་བཟུང་དུ་གསོལ།
ཀུན་རྫོབ་ཀུན་བཏགས་ཀུན་གྱིས་སྟོང་པའི་གཞི། །དོན་དམ་ཡོངས་གྲུབ་ཆོས་ཀྱི་དབྱིངས་ལ་འདུད། །རྣམ་རྟོག་རྣམ་པ་ཀུན་དང་བྲལ་བའི་གཞི། །རང་བྱུང་ཡེ་ཤེས་འདུས་མ་བྱས་ལ་འདུད། །གཟུགས་ཀྱི་དེ་བཞིན་ཉིད་ནི་ཤེས་གྱུར་ན། །ཆོས་ཀུན་མདོ་དང་རྒྱས་པ་ཤེས་པར་འགྱུར། །རྣམ་མཁྱེན་བར་དུ་དེ་བཞིན་ཉིད་ཤེས་ན་འང༌། །ཆོས་རྣམས་ཀུན་གྱི་མདོ་རྒྱས་ཤེས་པར་འགྱུར། །དེ་ཡང་ཇི་སྐད་དུ། རྒྱལ་བའི་ཡུམ་ལས། གཟུགས་ཀྱི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ། །དེ་བཞིན་དུ། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པའི་དེ་བཞིན་ཉིད་ཤེས་ན་ཆོས་ཐམས་ཅད་ཀྱི་མདོ་དང་རྒྱས་པ་ཤེས་པར་འགྱུར་རོ། །ཞེས་པ་ནས་རྣམ་མཁྱེན་གྱི་བར་སྦྱར་རོ། །མདོ་དང་རྒྱས་པའི་དོན་ཡང་ཡུམ་གསུམ་གྱི་གཞུང་འགྲེལ་གནོད་འཇོམས་སུ། གང་ཚེ་ཡོངས་སུ་གྲུབ་པ་དེ་བཞིན་ཉིད་ཙམ་དུ་ཤེས་པ་དེ་ཚེ་མདོ་ཤེས་པར་འགྱུར་རོ། །གང་གི་ཚེ་གཟུགས་ཀྱི་དེ་བཞིན་ཉིད་དང༌། ཚོར་བའི་དེ་བཞིན་ཉིད་ལ་སོགས་པ་དག་པའི་ཡོངས་སུ་གྲུབ་པར་ཤེས་པ་དེ་ཚེ་རྒྱས་པ་ཤེས་པར་འགྱུར་རོ། །ཞེས་སློབ་དཔོན་དབུ་མ་ཆེན་པོ་དབྱིག་གཉེན་ཞབས་ཀྱིས་གསུངས་པ་ལྟར་དོན་ལ་གནས་ཤིང༌། དཔལ་ལྡན་རྒྱུད་དུ་ཡང༌། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡི། །ལྷ་རྣམས་ཀྱིས་ནི་བརྗོད་པར་བྱ། །ཞེས་བཀའ་སྩལ་པའི་དོན་ཡང་དེ་ཉིད་དེ། འདི་འདྲ་བ་དང༌། འདི་དང་གནད་གཅིག་པའི་ལུང་རྣམ་དག་ཡང་ཤིན་ཏུ་མང་བར་སྣང་ངོ༌། །དེ་བཞིན་ཉིད་ཀྱི་ངོ་བོ་ལ་ཁྱད་པར་མེད་ཀྱང༌། དྲི་བཅས་གཞི་དང༌། དྲི་བྲལ་འབྲས་བུ་ཡིན་པའི་ཕྱིར། དེ་བཞིན་ཤེས་ན་བཀའ་མདོ་རྒྱུད་ཟབ་མོ་ཐམས་ཅད་ཀྱི་གཞི་དང་འབྲས་བུ་ཤེས་པར་འགྱུར་ལ། དྲི་མ་སེལ་བའི་ཐ་བས་རླུང་དང་རྣམ་རྟོག་ངང་གིས་འགགས་པ་རྡོ་རྗེའི་རྣལ་འབྱོར་ཟབ་མོ་ཤེས་ན། བཀའ་མདོ་རྒྱུད་ཟབ་མོ་ཐམས་ཅད་ཀྱི་ལམ་ངེས་དོན་ཟབ་མོ་ཐམས་ཅད་ཤེས་པར་འགྱུར་རོ། །དེ་དག་ཀྱང་གཉིས་སུ་འདུས་ཏེ། གཞི་འབྲས་ཟབ་མོ་དང༌། ལམ་ཟབ་མོའོ། །
དང་པོ་ནི། དེ་བཞིན་ཉིད་ཟབ་མོ་ཤེས་པར་འགྱུར་ལ། གཉིས་པ་ནི། ཤེར་ཕྱིན་ཟབ་མོའི་རྣལ་འབྱོར་ཏེ། མཉམ་པ་ཉིད་ཀྱི་རྣལ་འབྱོར་ཤེས་པས་ཤེས་པར་འགྱུར་རོ། །འདི་ཡང་རྫོགས་ལྡན་ལུགས་སུ། རྒྱལ་ཁམས་པས་བཀོད་པ་སྟེ། གསུམ་ལྡན་མར་བཅད་ཀྱི་ལུགས་ལས་ཆེས་ཁྱད་པར་འཕགས་པའོ།། །།
མངྒ་ལཾ། བྷ་ཝནྟུ། ཤུུ་བྷཾ།
[མ་དཔེ་ནི་འཛམ་ཐང་པར་མ་ཡིན།]