ཟབ་མོ་མདོའི་དཀར་ཆག་བཞུགས།
ཨོཾ་དྷརྨ་དྷཱ་དུ་ན་མོ་ན་མཿ ཨོཾ་བླ་མ་ལ་ཕྱག་འཚལ་ལོ། །ཆོས་ཐམས་ཅད་ཀྱིས་ སྟོང་ཞིང་དབེན་ལ་དག་པའི་གཞི། ཆོས་ཉིད་དེ་བཞིན་ཉིད་དང༌། རང་བྱུང་ཡེ་ ཤེས་བདེ་བ་ཆེན་པོ། གཙང་བདག་བདེ་དང་རྟག་པའི་མཐར་ཐུག་པ། ཆ་མེད་ཀུན་འགྲོ་ཁྱབ་པ་པོ། འགལ་འདུས་སྐྱོན་མེད་འཇིག་རྟེན་དཔེ་ལས་འདས་ཤིང༌། རྟེན་འབྲེལ་དང༌། རྟོག་གེ་དང༌། རྣམ་ཤེས་ལས་འདས་པའི་དབྱིངས་དང་ཡེ་ཤེས་གཅིག་ཏུ་འདྲེས་པ། སོ་སོར་རང་རིག་ཡེ་ཤེས་ཀྱི་སྤྱོད་ཡུལ། དོན་དམ་བདེ་གཤེགས་ སྙིང་པོ། པྲ་ཕབ་བརྒྱད་དང་མཚུངས་པ། མཐར་ཐུག་གི་སངས་རྒྱས་དང༌། ཆོས་དང༌། དགེ་འདུན་དང༌། ལྷ་དང༌། སྔགས་དང༌། རྒྱུད་དང༌། དཀྱིལ་འཁོར་དང༌། ཕྱག་རྒྱ་ཐམས་ཅད་འདུས་པ། དུ་མ་རོ་གཅིག །སྲིད་ཞི་དབྱེར་མེད། འཁོར་འདས་དབྱེར་མེད། བདེན་གཉིས་དབྱེར་མེད། བསལ་བཞག་མེད་པའི་རང་བཞིན་འོད་གསལ། རང་བཞིན་ལྷན་སྐྱེས། རང་བཞིན་འགྱུར་མེད། མྱང་འདས་ཆེན་པོ། དབུ་མ་ཆེན་པོ། ཕྱག་རྒྱ་ཆེན་པོ། ཤེར་ཕྱིན་ཟབ་མོ། གཞན་སྟོང་ཆོས་ཀྱི་སྐུ། མཁའ་ཁྱབ་ལ་ཕྱག་འཚལ་ཞིང་སྐྱབས་སུ་མཆིའོ། །
དེ་རྣམས་གསལ་བར་སྟོན་པའི་གསུང་རབ་ཟབ་མོ་རྣམས་ཀྱི་ནང་ནས། འདིར་སྙིང་པོའི་མདོ་ལྔ་ནི། དེ་བཞིན་གཤེགས་པའི་སྙིང་པོའི་མདོ། རྣམ་པར་མི་རྟོག་པ་ལ་འཇུག་པའི་གཟུངས། ལྷ་མོ་དཔལ་ཕྲེང་སེང་གེ་སྒྲའི་མདོ། རྔ་བོ་ཆེ་ཆེན་པོའི་མདོ། སོར་མོའི་ཕྲེང་བ་ལ་ཕན་པའི་མདོ་རྣམས་སོ། །དེ་ཡང་དང་པོ་དང༌། གཉིས་པ་དང༌། བཞི་པ་དང༌། ལྔ་པ་ནི་མདོ་སྡེ་ན་བཞུགས་ལ། གསུམ་པ་ནི་དཀོན་བརྩེགས་ན་བཞུགས་ཤིང༌། གཉིས་པ་ནི་གཟུངས་འབུམ་ནང་ནའང་བཞུགས་སོ། །ཡང་དེ་རྣམས་ཀྱི་སྟེང་དུ། སྟོང་ཉིད་ཆེན་པོའི་མདོ། དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོ། དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པ་བསྟན་པའི་མདོ། སྤྲིན་ཆེན་པོའི་མདོ་རྒྱས་པ། མྱང་འདས་ཆེན་པོའི་མདོ་རྒྱས་བསྡུས་གསུམ་གཅིག་ཏུ་བྱས་པ་སྟེ། དེ་ལྟར་ལྔ་བསྣན་པས་སྙིང་པོའི་མདོ་བཅུར་ཡང་འགྱུར་ཞིང༌། འདི་རྣམས་ཕལ་ཆེར་ནི་མདོ་ན་བཞུགས་ལ། མྱང་འདས་ནི་ཟུར་ན་བྲིས་པའང་སྣང་ངོ༌། །
ཡང་ངེས་དོན་མདོ་ལྔ་ནི། ཤེར་ཕྱིན་ལྔ་བརྒྱ་པ། བྱང་ཆུབ་སེམས་དཔའི་བསླབ་པ་རབ་ཏུ་དབྱེ་བའི་ལེའུ་ཆ་བཅུ་གཉིས་བྱམས་ཞུས་སུའང་གྲགས་པ་གཉིས་གཅིག་ཏུ་བསྡུས་པ། རྒྱན་སྟུག་པོའི་མདོ། རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་གྱི་མདོ། དཀོན་མཆོག་སྤྲིན་གྱི་མདོ་རྣམས་སོ། །དེ་རྣམས་ལས་དང་པོ་ནི། ཤེས་རབ་སྣ་ཚོགས་ན་བཞུགས་ཤིང༌། བྱམས་ཞུས་གཉིས་ནི་ཁྲི་བརྒྱད་སྟོང་པ་དང༌། ཉི་ཁྲི་ལྔ་སྟོང་པ་ན་བཞུགས་ལ། ལྷག་མ་གསུམ་ནི་མདོ་སྡེ་ན་བཞུགས་སོ། །ཡང་དེ་རྣམས་ཀྱི་སྟེང་དུ། གསེར་འོད་དུམ་ཆེན། དགོངས་པ་ངེས་པར་འགྲེལ་པ། ལང་ཀར་གཤེགས་པ། ཡེ་ཤེས་སྣང་བ་རྒྱན་གྱི་མདོ། སངས་རྒྱས་ཕལ་པོ་ཆེ་བསྣན་པས་ངེས་དོན་མདོ་བཅུ་སྟེ། དང་པོ་བཞི་ནི་མདོ་སྡེ་ན་བཞུགས་ཤིང༌། དང་པོ་དང་ཐ་མ་ནི་ཟུར་ནའང་བཞུགས་པས་རབ་ཏུ་གྲགས་སོ། །དེ་ལྟར་སྙིང་པོའི་མདོ་ལྔ། མདོ་བཅུ། ངེས་དོན་མདོ་ལྔ། མདོ་བཅུ་ནི། ཉུང་ངུ་ལ་མོས་པ་རྣམས་ཀྱིས་ཀྱང་གདོན་མི་ཟ་བར་གཟིགས་དགོས་ལ། རྒྱས་པར་ནི་བཀའ་འགྱུར། བསྟན་འགྱུར་མཐའ་དག་གཟིགས་དགོས་ཤིང༌། ཟབ་མོའི་རྣལ་འབྱོར་ཡང་ངེས་པར་བསྒོམ་དགོས་པར་གདའ་བས། སངས་རྒྱས་ཀྱི་བསྟན་པ་རྣམ་དག་ལ། ཐོས་བསམ་སྒོམ་པ་རྣམ་དག་ཡོངས་སུ་རྫོགས་པར་མཛད་པར་ཞུ། ཞེས་ཐལ་མོ་སྦྱར་ནས་གསོལ་བ་ཞེ་ཐག་པ་ནས་འདེབས་པ་ལགས་སོ། །ཞུ་དོན་གནང་བར་མཛད་དུ་གསོལ། རྟོན་པ་བཞི་ལྡན་གྱིས་བཀོད་པ་རྫོགས་སོ།། །།མངྒ་ལཾ། བྷ་ཝནྟུ།