རྗེ་བཙུན་བྱམས་པ་མགོན་པོ་ལ་བསྔགས་པའི་ཚིགས་སུ་བཅད་པ་དད་པའི་མེ་ཏོག།
རྗེ་བཙུན་བྱམས་པ་མགོན་པོ་ལ་བསྔགས་པའི་ཚིགས་སུ་བཅད་པ་དད་པའི་མེ་ཏོག་ཅེས་བྱ་བ་བཞུགས་སོ། །ན་མོ་བྷཊྛར་ཀ་མེ་ཏྲི་ནཱ་ཐཱ་ཡ། སྔོན་ཚེ་གསེར་བཟང་འོད་ཀྱི་རྒྱལ་བ་ལས། །རྨད་བྱུང་བྱང་ཆུབ་སེམས་གཉིས་ཡོངས་བཟུང་ནས། །ཐབས་མཁས་འཇུག་པ་བདེ་བའི་ལམ་ཁོ་ནས། །ཀུན་མཁྱེན་རྒྱལ་སར་འཛེགས་མཁས་མ་ཕམ་པ། །བདེ་གཤེགས་རིན་ཆེན་གདུགས་ཀྱི་བསྟན་པ་ལ། །བྱམས་པའི་བདུད་རྩིས་ཡིད་ཅན་གདུང་སེལ་བས། །སྔོན་མེད་ཟླ་གཞོན་གསར་པ་ཁྱོད་ཅིག་ཅེས། །ས་གསུམ་སྙན་པར་གྲགས་སོ་མ་ཕམ་པ། །སླད་ནས་གཉིས་སྐྱེས་གཞོན་ནུའི་རྩེ་དགའ་ལས། །བྱང་ཆུབ་སྤྱོད་པའི་ལང་ཚོ་རྫོགས་གྱུར་ཚེ། །ཕན་བདེས་འཇིག་རྟེན་རྒྱས་པར་འགེངས་མཛད་པའི། །ཡ་མཚན་ཉིན་བཞིན་དྲན་ནོ་མ་ཕམ་པ། །ཤེས་རབ་སྙིང་རྗེའི་ནུས་སྟོབས་རྨད་བྱུང་བས། །དཀའ་བ་མེད་པར་ཡིད་སྲུབས་མཐར་བྱས་ཏེ། །ཐར་པའི་ཟིལ་དངར་བདག་གིར་བཞེས་མཛད་པའི། །རྣམ་ཐར་མཚུངས་པ་མེད་དོ་མ་ཕམ་པ། །འདི་ན་ཉི་མའི་གཉེན་གྱི་བསྟན་པ་ལ། །ཅུང་ཟད་བྱ་བ་བྱས་ཀྱང་ཕྱི་མའི་དུས། །ཁྱོད་ཀྱིས་དབུགས་དབྱུང་མཛད་ཅེས་གང་གསུངས་པའི། །བདེན་ཚིག་སྙིང་ནས་བསྐུལ་ལོ་མ་ཕམ་པ། །ཤིན་ཏུ་སྦྱངས་པའི་ནོར་བུའི་ཕུང་པོ་ནི། །མཚན་དཔེའི་ཉམས་བརྒྱས་རོལ་པ་ཉིད་དམ་ཞེས། །སོམ་ཉིའི་ཕ་མཐར་འགོད་པའི་ཡེ་ཤེས་སྐུ། །
མངོན་སུམ་མིག་སྔར་སྟོན་ཅིག་མ་ཕམ་པ། །ཡན་ལག་དྲུག་ཅུའི་རྒྱུད་མང་དབྱངས་སྙན་པོ། །ཟབ་རྒྱས་ཐེག་པ་མཆོག་གི་གཞུང་ལུགས་ལ། །སྦྱར་བས་མཐའ་གཉིས་གཉིད་ལས་སློང་མཛད་པས། །རྣ་བ་བདུད་རྩིར་མཛོད་ཅིག་མ་ཕམ་པ། །འདི་ཞེས་བརྗོད་པའི་སྤྲོས་པ་བརྟུལ་གྱུར་ཀྱང་། །མཁྱེན་བརྩེའི་གཟིགས་པ་བྱེ་བ་ཕྲག་བརྒྱ་ཡིས། །ཡིད་ཅན་ཀུན་གྱི་རྗེས་སུ་འཇུག་བརྩོན་པས། །བདག་རྒྱུད་བྱིན་གྱིས་རློབས་ཤིག་མ་ཕམ་པ། །མི་ཕྱེད་སྙིང་ནས་དད་པའི་ང་རོ་ཡིས། །རྒྱལ་བའི་སྲས་ཀྱི་རྣམ་ཐར་བསྔགས་པ་དང་། །རྗེས་སུ་སློབ་པའི་སྨོན་པས་མདུན་བདར་ན། །བྱང་ཆུབ་བར་དུ་སྐྱོངས་ཤིག་མ་ཕམ་པ། །བདག་དང་བདག་ལ་བལྟོས་པའི་འགྲོ་བ་ཀུན། །སྲིད་དང་ཞི་ལས་ངེས་པར་འབྱུང་བའི་ལམ། །རྩེ་གཅིག་བསྙེན་ཅིང་དེ་ལས་གཞན་གྱུར་པའི། །ཡིད་བྱེད་མཚན་མ་སོལ་ཅིག་མ་ཕམ་པ། །ཚུལ་ཁྲིམས་དག་ཅིང་ཐོས་བསམ་ཏིང་འཛིན་དང་། །གཟུངས་དང་སྤོབས་པའི་རིན་ཆེན་གྲུར་ཞུགས་ཏེ། །ཉོན་མོངས་ཤེས་བྱ་སྙོམས་འཇུག་ཆུ་གཏེར་ལས། །བརྒལ་བའི་དེད་དཔོན་མཛོད་ཅིག་མ་ཕམ་པ། །ནམ་ཞིག་ཚེ་འདིའི་སྤྱོད་ཡུལ་ནུབ་པའི་ཚེ། །དགའ་ལྡན་ཆོས་ཀྱི་མདུན་ས་ཉམས་དགའ་བར། །འཕགས་པ་དགྱེས་པའི་ཕྱག་གིས་ཡོངས་བཟུང་ནས། །ལུང་བསྟན་དབུགས་དབྱུང་མཛོད་ཅིག་མ་ཕམ་པ། །མདོར་ན་ཁྱོད་
བཞིན་བྱང་ཆུབ་མཆོག་བརྙེས་ནས། །མཁའ་མཐས་གཏུགས་པའི་ཡིད་ཅན་རྒྱ་མཚོ་ཀུན། །ཕན་བདེའི་ལམ་བཟང་འགོད་པའི་ཕྲིན་ལས་ཀྱི། །བསྐལ་པ་བཟང་པོར་སྦྱོར་ཅིག་མ་ཕམ་པ། །ཞེས་པའང་རྒྱལ་ཁམས་ཉུལ་བའི་བྱ་བྲལ་བ་མཁྱེན་བརྩེའི་མིང་གིས་རང་ལོ་ཉེར་གཅིག་པར་བྱང་ཆུབ་སེམས་དཔའ་ཆེན་པོ་གཞོན་ནུ་རྒྱལ་མཆོག་པའི་ཕྲིན་ལས་ལས་བྱུང་བ་རོང་དགའ་ལྡན་བྱམས་པ་གླིང་གི་སྣང་བརྙན་ཆེན་མོའི་མདུན་སར་ཇི་ལྟར་གསོལ་བ་བཏབ་པ་བཞིན། སླད་ནས་ཀྱང་ཡང་ཡང་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། ༈ །།འཆི་མེད་མགོན་པོའི་ལྷ་ཚོགས་ལ། །གུས་པས་ཕྱག་འཚལ་བསྟོད་པའི་མཐུས། །བདག་གི་རྒྱུད་ལ་ངེས་འབྱུང་དང་། །བྱང་ཆུབ་སེམས་གཉིས་རྒྱས་གྱུར་ཅིག །ཚོགས་ཟུང་ཆུ་གཏེར་ལས་འཁྲུངས་པའི། །ཚེ་མཐའ་ཡས་པའི་ལྷ་སྔགས་དང་། །ཏིང་འཛིན་སྣང་བས་གྲུབ་གཉིས་ཀྱི། །པདྨོ་མཆོག་ཏུ་རྒྱས་པར་ཤོག །རྣམ་སྣང་རྡོ་རྗེ་རིན་ཆེན་དང་། །པདྨ་ལས་རིགས་ཡེ་ཤེས་ཀྱི། །བདུད་རྩིའི་རྒྱུན་གྱིས་དབང་བསྐུར་བའི། །སྐལ་བཟང་ལྷག་པར་གྲུབ་གྱུར་ཅིག །སྐྱེ་ཀུན་དུག་ལྔས་བསགས་པ་ཡི། །འཚོ་བ་ཐུང་བའི་སྒྲིབ་བྱང་ནས། །རིགས་ལྔ་ཚེ་དཔག་མེད་མགོན་གྱི། །གོ་འཕང་རྒྱུད་ལ་འཇོག་པར་ཤོག ཀུན་གཟིགས་ཡོན་ཏན་ཡེ་ཤེས་དང་། །མི་གཡོའི་རང་བཞིན་ཟིལ་དངར་གྱིས། །འགལ་རྐྱེན་བཀྲུ་ཞིང་བྱང་བ་དང་། རྡོ་རྗེའི་སྲུང་
བ་མཆོག་གྱུར་ཅིག །བདག་གི་སྙིང་དབུས་པདྨོ་དང་། །སྤྱི་བོར་བཞུགས་པའི་ཡེ་ཤེས་ལྷ། །བདེ་འཐུང་བཅུད་དུ་ཞུ་བ་ཡིས། །ལུས་སེམས་འཆི་མེད་གྲུབ་པར་ཤོག །རིན་ཆེན་བདུན་དང་རྫས་བརྒྱད་སོགས། །སྲིད་ཞིའི་འབྱོར་པས་དགེ་བྱས་མཐུས། །འཇིག་རྟེན་འཇིག་རྟེན་འདས་པ་ཡི། །བཀྲ་ཤིས་སྣང་བ་འབར་གྱུར་ཅིག །མདོར་ན་འདི་ནས་བྱང་ཆུབ་བར། །དཔག་མེད་མགོན་པོས་རྗེས་བཟུང་ནས། །ཚེ་དང་བསོད་ནམས་ཡེ་ཤེས་ཀྱི། །གྲུབ་གཉིས་དགེ་མཚན་འཕེལ་བར་ཤོག །ཅེས་པའི་འདོད་གསོལ་སྨོན་ཚིག་འདིའང་ཤཱཀྱའི་དགེ་སློང་འཇམ་དབྱངས་མཁྱེན་བརྩེའི་དབང་པོས་བྲིས་པ་བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན་པའི་རྒྱུར་གྱུར་ཅིག ། སརྦ་དཱ་ཀ་ལྱཱ་ཎཾ་བྷ་བ་ཏུ། །