དཔལ་རྡོ་རྗེ་ཕྲེང་བའི་དཀྱིལ་འཁོར་གྱི་ལྷ་ཚོགས་རྣམས་ལ་བསྟོད་པ་རྒྱལ་བ་སྲས་བཅས་དགྱེས་པའི་མཆོད་སྤྲིན།
དཔལ་རྡོ་རྗེ་ཕྲེང་བའི་དཀྱིལ་འཁོར་གྱི་ལྷ་ཚོགས་རྣམས་ལ་བསྟོད་པ་རྒྱལ་བ་སྲས་བཅས་དགྱེས་པའི་མཆོད་སྤྲིན་ཅེས་བྱ་བ་བཞུགས་སོ། །རྒྱ་གར་སྐད་དུ། བཛྲ་ཨཱ་བ་ལི་མཎྜ་ལ་དེ་བ་ག་ཎ་ནི་སཱུ་ཏི་ཛ་ཡ་ས་པུ་ཏྲ་ཏེཥཱ་སྱ་པཱུ་ཛ་མེ་གྷ་ནཱ་མ། བོད་སྐད་དུ།
དཔལ་རྡོ་རྗེ་ཕྲེང་བའི་དཀྱིལ་འཁོར་གྱི་ལྷ་ཚོགས་རྣམས་ལ་བསྟོད་པ་རྒྱལ་བ་སྲས་བཅས་དགྱེས་པའི་མཆོད་སྤྲིན་ཅེས་བྱ་བ། བཅོམ་ལྡན་འདས་གསུང་གི་དབང་ཕྱུག་ལ་ཕྱག་འཚལ་ལོ། །རྒྱལ་ཀུན་མཁྱེན་བརྩེ་ནུས་པའི་ངོ་བོ་ཉིད། །རྗེ་བཙུན་བླ་མའི་ཞབས་ལ་གུས་བཏུད་ནས། །གང་གི་ཡེ་ཤེས་རོལ་པ་ལས་བྱུང་བའི། །དཀྱིལ་འཁོར་ལྷ་ཚོགས་ཅུང་ཟད་བསྟོད་པར་བགྱི། །ཟབ་གསལ་གཉིས་མེད་ལྷན་སྐྱེས་གསང་བ་འདུས། །དབང་ཕྱུག་ཡོན་ཏན་བརྒྱད་ཀྱི་རྣམ་རོལ་ཅན། །རིགས་ཀུན་ཁྱབ་བདག་འཇམ་པའི་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་བསྟོད། །དཔལ་ལྡན་སངས་རྒྱས་ཀུན་གྱི་གསང་བ་གསུམ། །རྡོ་རྗེ་མི་ཕྱེད་གསུམ་དུ་འདུས་གྱུར་པ། །དང་པོའི་མགོན་པོ་བཅོམ་ལྡན་མི་བསྐྱོད་པའི། །དཀྱིལ་འཁོར་ལྷ་ཚོགས་རྣམས་ལ༴ སྲིད་འདིར་རྣམ་པ་ཀུན་ཏུ་སྣང་མཛད་པའི། །སྒྱུ་འཕྲུལ་དྲྭ་བ་ཆེན་པོའི་ཚུལ་འཆང་བ། །རྒྱལ་ཀུན་ཡབ་གཅིག་འཇམ་པའི་རྡོ་རྗེ་ཡི། །དཀྱིལ་འཁོར གཟུང་འཛིན་གཉིས་སུ་སྣང་བའི་གཤིན་རྗེའི་གཤེད། །མཐའ་གཉིས་དགྲར་གྱུར་གཉིས་མེད་ནག་པོ་ཆེ། །བཅོམ་ལྡན་འཇམ་དཔལ་གཞོན་ནུ་རབ་ཁྲོས་པའི། །དཀྱིལ་འཁོར་༴ རླུང་རྒྱུད་ཀྱི་གླེང་གཞི་དང་སྦྱར། ཁམས་གནས་གྱུར་འབར་གཡོ་བརྟན་པའི་ཕུལ། །ལྷན་སྐྱེས་ཡེ་ཤེས་ངོ་བོ་ཉིད་ཀྱི་སྐུ། །གསང་གསུམ་དབྱེར་མེད་སྙིང་པོ་
ཀྱེ་རྡོ་རྗེའི། །དཀྱིལ་འཁོར༔ བདུད་རྩི་གནས་གྱུར་མི་རྟོག་འོད་གསལ་དང་། །དགའ་བྲལ་ཡེ་ཤེས་རང་བཞིན་ཆོས་ཀྱི་སྐུ། །གཟུང་འཛིན་སྤྲོས་པ་ཀུན་སྤངས་ཐུགས་རྡོ་རྗེའི། །དཀྱིལ་འཁོར རྩ་ཡིག་གནས་གྱུར་ཟག་མེད་བདེ་བ་ཆེའི། །ཡེ་ཤེས་མཆོག་དགའི་རང་བཞིན་ལོངས་སྤྱོད་རྫོགས། །གཞོམ་མེད་ནཱ་དའི་དབྱངས་སྙན་གསུང་རྡོ་རྗེའི། །དཀྱིལ་འཁོར༴ ལུས་རྩ་གནས་གྱུར་བྱང་ཆུབ་སེམས་ཞུ་བའི། །ཡེ་ཤེས་དགའ་བ་མཐར་སོན་སྤྲུལ་པའི་སྐུ། །ཕུལ་བྱུང་མཚན་དཔེའི་དཔལ་འབར་སྐུ་རྡོ་རྗེའི། །དཀྱིལ་འཁོར༔ སྟོང་ཉིད་སྙིང་རྗེའི་མཁའ་ལ་རབ་འགྲོ་མ། །མི་ཕྱེད་རྡོ་རྗེའི་གུར་ལྟར་ཁྱབ་པའི་བདག །བསམ་ཡས་རིགས་ཀུན་རིགས་ལྔར་གཅིག་བསྡུས་པའི། །དཀྱིལ་འཁོར༔ འོད་གསལ་སྟོང་ཉིད་ཡེ་ཤེས་རྡོ་རྗེ་ཡིས། །བདག་ཏུ་བལྟ་བའི་སྤྲོས་པ་ཀུན་བཅོམ་ནས། །ཟག་མེད་བདེ་ཆེན་སྒྱུ་མའི་གར་མཛད་པའི། །དཀྱིལ་འཁོར༴ རྒྱལ་བ་སྲས་བཅས་འབྱུང་བའི་གནས་གཅིག་པུ། །བདག་མེད་རྡོ་རྗེ་བཙུན་མོའི་མཁའ་དབྱིངས་ནས། །ཡེ་ཤེས་ལྷ་མོ་བཅོ་ལྔའི་སྤྲིན་འཕྲོ་བའི། །དཀྱིལ་འཁོར་དྲན་པ་ཙམ་གྱིས་སྲིད་ཞིའི་ཕུན་ཚོགས་རིགས། དབང་བྱེད་རྗེས་ཆགས་བདེ་ཆེན་གཟི་འབར་བ། །ཐུགས་རྗེ་མྱུར་མ་ཀུ་རུ་ཀུལླེ་ཡི། །དཀྱིལ་འཁོར༔ སྲས་བཅས་རྒྱལ་ཀུན་ཡུམ་གྱུར་རྗེ་བཙུན་མ། །རྡོ་རྗེ་
བཙུན་མོའི་གཟུགས་སུ་ཡོངས་ཤར་བས། །ཡིད་ཅན་ཕོངས་པ་ཀུན་ལས་སྒྲོལ་མཛད་མའི། །དཀྱིལ་འཁོར༔ སྙིང་རྗེ་ཆེ་དང་ཤེས་རབ་ཡང་དག་པར། །མཉམ་སྦྱོར་རྒྱལ་ཀུན་གསང་བ་གསུམ་གྱི་དངོས། །བཅོམ་ལྡན་སྙིང་པོ་དགྱེས་པ་རྡོ་རྗེ་ཡི། །དཀྱིལ་འཁོར༔ དཔལ་ལྡན་སངས་རྒྱས་ཀུན་གྱི་ཐུགས་རྡོ་རྗེ། །གཟུང་འཛིན་སྤྲོས་པའི་མཚན་མ་ལས་འདས་ཀྱང་། །ཡེ་ཤེས་ལུས་ཅན་སྙིང་རྗེའི་གར་མཛད་པའི། །སྤྱི དཀྱིལ་འཁོར༔ དཔལ་ལྡན་སངས་རྒྱས་ཀུན་གྱི་གསུང་རྡོ་རྗེ། །སྒྲ་ཚིག་ལས་འདས་གཞོམ་མེད་ནཱ་དའི་དབྱངས། །ཁ་སྦྱོར་བདེ་བའི་གཟུགས་སུ་རྣམ་འཕྲུལ་བའི། །དཀྱིལ་འཁོར༔ དཔལ་ལྡན་སངས་རྒྱས་ཀུན་གྱི་སྐུ་རྡོ་རྗེ། །བརྟན་གཡོ་ཀུན་ལ་ཁྱབ་པའི་རང་བཞིན་ཉིད། །བཞིན་ལག་མཚན་དཔེའི་སྣང་ཆར་ཡོངས་ཤར་བའི། །དཀྱིལ་འཁོར༔ བདེ་ཆེན་མཆོག་ཏུ་མི་འགྱུར་ཞི་བའི་དབྱིངས། །རྡོ་རྗེ་སྙེམས་མའི་བདག་པོའི་སྐུར་བཞེངས་པ། །སྲིད་གསུམ་རོ་གཅིག་ཉིད་གྱུར་སེམས་དཔའ་ཆེའི། །དཀྱིལ་འཁོར རྩ་རླུང་ཛཱ་ལ་སམྦ་རའི་སྤྱི་དོན་དང་སྦྱར། ཐིག་ལེ་ཚངས་པའི་དྲྭ་བ་ཀུན། །དྷ་ཏི་འོད་གསལ་དབྱིངས་སུ་སྡོམ་མཛད་པ། །ནམ་མཁའི་མདོག་མཚུངས་འཁོར་ལོ་བདེ་མཆོག་གི །དཀྱིལ་འཁོར ཤེས་རབ་སྦས་དོན་དང་སྦྱར། པདྨ་ལས་སྐྱེས་བདེ་བ་མཆོག །ཁ་སྦྱོར་སྐུ་ཅན་ཞལ་གཅིག་ཕྱག་གཉིས་པ། །མཐིང་ཞུན་མདོག་
མཚུངས་དྲྭ་བ་སྡོམ་པ་ཡི། །དཀྱིལ་འཁོར༔ གཉིས་མེད་ཤྲཱི་ཧེ་རུ་ཀའི་ཡིག་དོན་དང་སྦྱར། ཡེ་ཤེས་རྒྱུ་དང་ཚོགས་པ་བྲལ། །སྲིད་ཞིར་མི་གནས་བདེ་བ་མཆོག་གི་གར། །གསེར་བཟང་མདོག་མཚུངས་ཧེ་རུ་ཀ་དཔལ་གྱི། །དཀྱིལ་འཁོར༔ སྟོང་ཉིད་དོན་དང་སྦྱར། རྡོ་རྗེའི་དབྱིངས་ལས་ཕག་མོའི་ཞལ། །བདེ་ཆེན་སྙིང་པོའི་སྐུ་མདོག་དམར་མོར་ཤར། །སོ་བདུན་བདག་ཉིད་རྗེ་བཙུན་རྣལ་འབྱོར་མའི། །དཀྱིལ་འཁོར རྟགས་དང་སྦྱར་གཟུང་འཛིན་གཉིས་སྣང་ཟ་བའི་ཕག་མོའི་གདོང་། །ཆོས་ཉིད་མི་འགྱུར་སྐུ་མདོག་སྔོན་མོར་བཞུགས། །རྒྱལ་ཀུན་སྐྱེད་ཡུམ་རྡོ་རྗེ་བཙུན་མོ་ཡི། །དཀྱིལ་འཁོར༔ སྟོང་ཝཱ་རཱ་ཧཱིའི་ངེས་ཚིག་གི་བཤད་པ། གསལ་རང་རིག་གཞོམ་མེད་ཀུན་འགྲོ་བའི། །རྣམ་འགྱུར་མཆོག་གི་རྡོ་རྗེ་ཕག་མོ་ནི། །ཡེ་ཤེས་རབ་རྒྱས་སྐུ་མདོག་སེར་མོའི་ཚུལ། །དཀྱིལ༴ ཟག་མེད་བདེ་ཆེན་མཆོག་ཏུ་ཁྲོ་བོའི་སྐུར། །ཡོངས་ཤར་བཅོམ་ལྡན་རྡོར་སེམས་ཧེ་རུ་ཀ། །ཧཱུྃ་ཞེས་སྒྲ་ཡིས་བགེགས་ཚོགས་མཐར་མཛད་པའི། །དཀྱིལ་འཁོར༔ བདེ་སྟོང་མཆོག་གི་རང་བཞིན་རྡོ་རྗེ་སེམས། །སངས་རྒྱས་རིན་ཆེན་པདྨ་རྡོ་རྗེ་དང་། །སྣ་ཚོགས་རིགས་ཀྱི་འཁོར་ལོས་སྒྱུར་དྲུག་གི །དཀྱིལ༴ སྤྲོས་ཀུན་ཉེར་རྒྱུད་དོན་དང་རིམ་པར་སྦྱར། ཞི་ཟབ་གསལ་རྡོ་རྗེའི་དབྱིངས། བདེ་ཆེན་བདུད་རྩིའི་ཐིག་ལེར་རབ་སྦྱར་ནས། །སྲིད་ཞི་ཀུན་ལ་ཁྱབ་པར་གར་མཛད་པའི། །
དཀྱིལ༴ རྡོ་རྗེའི་ཡེ་ཤེས་མཆོག་ཏུ་འབར་བའི་སྐུ། །འཕོ་མེད་བདུད་རྩི་ནཱ་དའི་རང་བཞིན་གསུང་། །ཧཱུཾ་གི་ངོ་བོར་སོན་མཛད་ཐུགས་མངའ་བའི། །དཀྱིལ༔ སྟོང་ཉིད་རྡོ་རྗེ་བདེ་ཆེན་བདུད་རྩིའི་མཁར། །མཉམ་པར་སྦྱོར་ལས་ཡང་དག་བྱུང་གྱུར་པའི། །འཇིགས་བྱེད་འཇིགས་མཛད་དཔལ་ཆེན་ཧེ་རུ་ཀའི། །དཀྱིལ་འཁོར༔ རྡོ་རྗེ་ཨ་ཝ་དྷུ་ཏིའི་པདྨོ་རུ། །ཟག་མེད་བདུད་རྩི་གཅིག་ཏུ་འཁྱིལ་བའི་གཟུགས། །དྲན་པ་ཙམ་གྱིས་དངོས་གྲུབ་ཀུན་སྩོལ་བའི། །དཀྱིལ༴ རྒྱུད་ཀྱི་མཚན་དོན་དང་སྦྱར་དཔལ་ལྡན་སངས་རྒྱས་བདེ་ཆེན་རྡོ་རྗེའི་སྐུ། །ཤེས་རབ་ཐོད་པའི་དབུས་སུ་སྙོམས་ཞུགས་ལྷ། །ཉི་ཤུ་རྩ་ལྔའི་སྤྲུལ་པའི་གཟུགས་འཆང་བའི། །དཀྱིལ༴ བདེ་སྟོང་སངས་རྒྱས་ཐོད་པ་སྦྱོར་བའི་གཙོ། །ཕྱག་རྒྱ་དང་བྲལ་རིག་མའི་འཁོར་དང་བཅས། །དཔའ་བོའི་གར་གྱི་ཉམས་དགུས་དགྱེས་རོལ་པའི། །དཀྱིལ༴ དབྱིབས་ལམ་རིམ། སྔགས་ཆོས་ཀྱི་མཐར་སོན་སྒྱུ་མའི་འཕྲུལ། །བདེ་ཆེན་བཙུན་མོའི་ཆུ་སྐྱེས་ལས་བྱུང་བའི། །སྲིད་ཞིའི་ཁྱབ་བདག་མ་ཧཱ་མཱ་ཡཱ་ཡི། །དཀྱིལ༴ ཆོས་རྒྱུད་དོན། དབྱིངས་རྡོ་རྗེའི་གོ་འཕང་བགྲོད་པའི་གདན། བདག་གཞན་སྦྱོར་དང་གསང་བ་རྣམ་པ་བཞི། །མི་ཕྱེད་རྣལ་འབྱོར་ནམ་མཁའི་སྐུ་བརྙེས་པའི། །དཀྱིལ༔ གཉིས་མེད་ཡེ་ཤེས་སྟོང་པ་ཅན་དབང་ཕྱུག །དཔལ་ལྡན་མཁའ་འགྲོ་མ་ཡི་དྲ་བ་སྡོམ། །བཅུ་
ཉེར་བརྒྱད་ཟ། གསུམ་བདག་ཉིད་ཡེ་ཤེས་མཁའ་འགྲོ་ཡི། །དཀྱིལ་འཁོར ཀུན་མཁྱེན་སྐུ་བཞིར་སྦྱར། ཡེ་ཤེས་སྐུ་ཅན་ཉིན་མོར་བྱེད། པདྨ་འདབ་མ་རྒྱས་པའི་སྤྱན་མངའ་བ། །ཕྱི་ནང་གཞན་གསུམ་རོ་གཅིག་དུས་འཁོར་ལོའི། །དཀྱིལ༴ དེ་བཞིན་མཚན་དོན། གཤེགས་པ་སྲས་དང་བཅས་རྣམས་ཀྱི། །སྐུ་གསུང་ཐུགས་ཀྱི་རྡོ་རྗེ་གསང་བའི་དབྱིངས། །ཕྱག་རྒྱ་རྣམ་བཞིའི་ཚུལ་དུ་རབ་སྣང་བའི། །དཀྱིལ༔ རིགས་ཀུན་བདག་པོ་ཤཱཀྱ་སེང་གེ་ཡི། །ཡེ་ཤེས་གཅིག་ཉིད་གཙུག་ཏོར་རྣམ་པ་དགུར། །ཡོངས་ཤར་འགྲོ་ཀུན་ངན་སོང་སྦྱོང་མཛད་པའི། །དཀྱིལ་འཁོར༔ ནམ་མཁའ་ལྟར་དག་དྲི་མ་མེད་པའི་དངོས། །ཆོས་དབྱིངས་ཡེ་ཤེས་རང་བཞིན་བཅོམ་ལྡན་འདས། །གསུང་གི་དབང་ཕྱུག་འཇམ་དཔལ་གཞོན་ནུ་ཡིས། །དཀྱིལ༴ རྒྱལ་ཀུན་མཐུ་སྟོབས་གཅིག་བསྡུས་གསང་བའི་བདག །དཔལ་ལྡན་ཕྱག་ན་རྡོ་རྗེ་འབར་བ་ཡིས། །ས་གསུམ་འབྱུང་པོའི་ཚོགས་རྣམས་འདུལ་མཛད་པའི། །དཀྱིལ༴ ལྷམོ་གང་མཚན་ཐུགས་རྗེའི་འོད་ཟེར་ཅན། །དྲན་པས་བརྒྱད་གཉིས་འཇིགས་པའི་མུན་བསལ་ནས། །ཕན་བདེའི་སྣང་བ་རྒྱས་མཛད་བཅོམ་ལྡན་མའི། །དཀྱིལ༴ གང་གི་བྱིན་རླབས་རྡོ་རྗེའི་གོ་ཆ་ཡི། །མི་མཐུན་ཚོགས་ཀུན་ཞི་ཞིང་སྲུང་བ་དང་། །དངོས་གྲུབ་མཆོག་སྩོལ་རིག་པའི་རྒྱལ་མོ་ལྔའི། །དཀྱིལ༴ གང་སྔོན་ཚོགས་གཉིས་རྒྱ་
མཚོའི་མཐར་སོན་པས། །ཐུགས་རྗེ་ནོར་བུའི་སྤྲིན་ཆེན་རྒྱས་པ་ལས། །འགྲོ་ལ་འདོད་རྒུའི་ཆར་རྒྱུན་འབེབས་མཛད་མའི། །དཀྱིལ༴ འཇིག་རྟེན་ཀུན་ཏུ་ཕན་བདེ་སྤེལ་བའི་ཕྱིར། །ཤེས་རབ་ཕ་རོལ་ཕྱིན་མ་གཟའ་རྣམས་ཀྱི། །ཡུམ་གྱུར་བཅོམ་ལྡན་རིག་པ་ཆེན་མོ་ཡི། །དཀྱིལ བདེ་གཤེགས་རིགས་ཀྱི་གཙུག་ཏོར་ལས་བྱུང་མ། །མི་མཐུན་བདུད་ཀྱི་ཕྱོགས་ལས་རྣམ་རྒྱལ་མ། །དྲན་པས་ཚེ་དང་ཡེ་ཤེས་མཆོག་སྩོལ་མའི། །དཀྱིལ་འཁོར་ལྷ་ཚོགས་རྣམས་ལ་ཕྱག་འཚལ་བསྟོད། །སྤྱིར་སྐུ་དང་ཡེ་ཤེས་ཕྲིན་ལས་གསུམ་གྱི་སྒོ་ནས་བསྟོད་པ། གང་གི་རང་བཞིན་གཟོད་ནས་ཉེར་ཞི་བ། །གློ་བུར་དྲི་མའི་ཚོགས་ལས་རྣམ་གྲོལ་ཞིང་། །རིག་དང་བརྩེ་བ་རྒྱ་མཚོའི་བདག་ཉིད་ཅན། །འོད་གསལ་ཆོས་ཀྱི་སྐུ་ལ་ཕྱག་འཚལ་བསྟོད། །ཐུགས་ནི་གཟུང་འཛིན་སྤྲོས་པ་ལས་འདས་ཀྱང་། །རྣམ་པ་མཚན་དང་དཔེ་བྱད་དཔལ་འབར་བས། །རྒྱལ་སྲས་བྱེ་བའི་དབུས་ནས་མངོན་མཐོ་བའི། །བདེ་ཆེན་ལོངས་སྤྱོད་རྫོགས་ལ༔ གྲངས་མེད་ཞིང་དུ་མཐའ་ཀླས་ཡིད་ཅན་ལ། །གང་འདུལ་གཟུགས་དང་མཚན་གྱི་རྣམ་རོལ་གྱིས། །ཕན་དང་བདེ་བའི་འབྱོར་པ་སྦྱིན་མཛད་པ། །སྣ་ཚོགས་སྤྲུལ་པའི་སྐུ་ལ༔ ཆོས་ཀྱི་དབྱིངས་དང་མེ་ལོང་ལྟ་བུ་ལ། །བརྟེན་ནས་མཉམ་ཉིད་སོ་སོར་ཀུན་རྟོག་དང་། །འབད་རྩོལ་མེད་པར་བྱ་བ་ལྷུན་གྲུབ་པའི། །ཡེ་ཤེས་བསམ་མི་ཁྱབ་ལ༴ བྲལ་དང་རྣམ་པར་
སྨིན་པ་མི་ཟད་པའི། །ཡོན་ཏན་རྒྱ་མཚོའི་དཔལ་ལ་དབང་འབྱོར་པས། །རྟག་ཅིང་ཁྱབ་དང་ལྷུན་གྱིས་གྲུབ་པ་ཡི། །ཕྲིན་ལས་རྒྱུན་མི་ཆད་ལ་ཕྱག་འཚལ་བསྟོད། །དེ་ལྟར་གུས་པས་བསྟོད་ཅིང་གསོལ་འདེབས་ན། །དེང་ནས་བཟུང་སྟེ་བྱང་ཆུབ་སྙིང་པོའི་བར། །བླ་མ་མཆོག་དང་ལྷག་པའི་ལྷ་ཚོགས་ཀྱིས། །འབྲལ་མེད་རྗེས་སུ་བཟུང་བར་མཛད་དུ་གསོལ། །གནས་སྐབས་ནད་གདོན་བར་དུ་གཅོད་པ་དང་། །མི་མཐུན་རྒུད་པའི་གདུང་བ་ཀུན་ཞི་ཞིང་། །ཚེ་དང་བསོད་ནམས་བློ་གྲོས་འབྱོར་པ་སོགས། །ཆོས་མཐུན་ལེགས་ཚོགས་འཕེལ་བར་མཛད་དུ་གསོལ། །ཁྱད་པར་སྨིན་བྱེད་དབང་གིས་རྒྱུད་སྨིན་ཅིང་། །དམ་ཚིག་སྡོམ་པའི་ཀུན་སྤྱོད་རྣམ་པར་དག །ཟབ་མོའི་ལམ་གྱི་རིམ་པ་མཐར་ཕྱིན་ཅིང་། །མཆོག་ཐུན་དངོས་གྲུབ་ཐོབ་པར་མཛད་དུ་གསོལ། །མཐར་ཐུག་དཀྱིལ་འཁོར་གཙོ་དང་དབྱེར་མེད་པའི། །གོ་འཕང་དམ་པ་མྱུར་ཐོབ་ནས། །མཁའ་ཁྱབ་འགྲོ་ཀུན་སྒྲོལ་བའི་ཕྲིན་ལས་པར་མཛད་དུ་གསོལ། །ཅེས་དཔལ་རྡོ་རྗེ་ཕྲེང་བ་དང་ཀྲྀ་ཡ་ས་མུཙྪ་ཟུང་དུ་འབྲེལ་བའི་དཀྱིལ་འཁོར་གྱི་ལྷ་ཚོགས་རྣམས་ལ་མདོར་བསྡུས་ཏེ་བསྟོད་པའི་རབ་ཏུ་བྱེད་པ་འདིའང་། རིགས་དང་དཀྱིལ་འཁོར་ཀུན་གྱི་ཁྱབ་བདག་མཁན་ཆེན་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོའི་ཚད་མེད་པའི་ཐུགས་རྗེ་ཆེན་པོའི་འཇུག་པ་ལ་བརྟེན་ནས། སུམ་ལྡན་རྡོ་
རྗེ་འཛིན་པ་ཆེན་པོ་ཡོངས་རྫོགས་ཐུབ་བསྟན་གསལ་བའི་ཉི་མ་འཇམ་པའི་དབྱངས་ངག་དབང་ལེགས་གྲུབ་སྙན་བརྒྱུད་བསྟན་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་བཀའ་དྲིན་ལས། ཆོས་ཚུལ་འདིའི་སྨིན་བྱེད་ཀྱི་བདུད་རྩིས་སྐལ་བ་བཟང་པོར་བསྒྲུབ་པའི་སྐབས་སུ། ཡོངས་འཛིན་དམ་པ་ཆོས་བཞིན་དུ་སྤྱོད་པ་དུ་མའི་བཀའ་དྲིན་ཁོ་ནས་འཚོ་བའི་ཤཱཀྱའི་དགེ་སློང་རིག་པ་འཛིན་པ་འཇམ་དབྱངས་མཁྱེན་བརྩེའི་དབང་པོས་རབ་བྱུང་བཅུ་བཞི་པའི་ནང་གསེས། ལྕགས་མོ་ཕག་གི་གནམ་ལོ་གསར་དུ་འཆར་བའི་ཆོ་འཕྲུལ་གྱི་ཟླ་བའི་དཀར་ཕྱོགས་ཀྱི་དགའ་བ་དང་པོ་དུས་ཀྱི་དགེ་མཚན་ཕུན་སུམ་ཚོགས་པའི་ཉི་ཤར་ལ་ཡོན་ཏན་རིན་པོ་ཆེ་དུ་མའི་འབྱུང་གནས་དཔལ་ཨེ་ཝཾ་ཆོས་ལྡན་གྱི་བླ་བྲང་ཐར་པ་རྩེར་རྩེ་གཅིག་གུས་པའི་ཡིད་ཀྱིས་གསོལ་བ་བཏབ་པའོ། །འདིས་ཀྱང་བསྟན་པ་དང་སེམས་ཅན་ཐམས་ཅད་ལ་ཕན་པ་རྒྱ་ཆེན་པོ་འབྱུང་བའི་རྒྱུར་གྱུར་ཅིག། །།སརྦ་དཱ་ཀ་ལྱཱ་ཎཾ་བྷ་བ་ཏུ།། །།