བསྟོད་ཚོགས་གསོལ་འདེབས་སྲས་བཅས་རྒྱལ་བ་དགྱེས་པའི་རོལ་མོ་ཡོན་ཏན་རྒྱ་མཚོ་མཐའ་ཡས་པའི་སྤྲིན།
འཇམ་དཔལ་སྨྲ་བའི་སེང་གེ་ལ་བསྟོད་པ་ཨུཏྤལ་དམར་པོའི་དོ་ཤལ།
བསྟོད་ཚོགས་གསོལ་འདེབས་སྲས་བཅས་རྒྱལ་བ་དགྱེས་པའི་རོལ་མོ་ཡོན་ཏན་རྒྱ་མཚོ་མཐའ་ཡས་པའི་སྤྲིན་ཞེས་བྱ་བ་བཞུགས་སོ། །
འཇམ་དཔལ་སྨྲ་བའི་སེང་གེ་ལ་བསྟོད་པ་ཨུཏྤལ་དམར་པོའི་དོ་ཤལ་ཞེས་བྱ་བ། ན་མཿཨཱརྱ་མཉྫའི་ཡེ༔ དངོས་པོར་གྱུར་པའི་ཆོས་རྣམས་ཀུན། །བདེ་སྟོང་དྲྭ་བར་བསྡམས་པ་ལས། །རྣམ་པ་ཀུན་གྱི་མཆོག་ལྡན་གར། །འཇམ་དཔལ་ཁྱོད་ལ་བདག་འདུད་དོ། ༡ །པདྨ་རཱ་གའི་ཆུན་པོ་ལ། །འཆར་ཀའི་ཉི་གཞོན་གྱིས་འཁྱུད་པའི། །མཚན་དཔེའི་འཇོ་སྒེག་གར་རོལ་པ། །ལྟ་ན་ལྷུན་སྟུག་སྐུ་ལ་འདུད། ༢ །སིམ་པ་མཆོག་སྟེར་གསུང་གི་རྒྱུན། །འཆི་མེད་ཀཏྤར་དབང་པོའི་རྡུལ། །ཐོས་འཛིན་ཀུནུར་འཇོ་བ་ལས། །ཕན་བདེའི་འཛུམ་ཕྲེང་གྲོལ་ལ་འདུད། ༣ །གཟུང་འཛིན་རྟོག་པའི་དྲི་བཞོན་ཀུན། །སྤྲོས་བྲལ་མཁའ་དབྱིངས་ལ་རོལ་པས། །མཁྱེན་བརྩེའི་སྣང་བའི་འོད་ཕྲེང་གིས། །ཐར་མཆོག་པདྨོ་
བཞད་ལ་འདུད། ༤ །རྒྱལ་བ་ཀུན་གྱི་ཐུགས་རྗེའི་གཏེར། །གཅིག་ཏུ་བཟླུམས་པའི་ཡེ་ཤེས་སྐུའི། །རྟག་པ་རྒྱུན་གྱི་འཁོར་ལོ་རུ། །གང་འདུལ་འགྲོ་རྣམས་སྒྲོལ་ལ་འདུད། ༥ །མདོར་ན་སྲས་བཅས་འདྲེན་པ་ཡི། །སྤངས་རྟོགས་ཡོན་ཏན་ཐམས་ཅད་ཀུན། །རྡོ་རྗེ་གསུམ་གྱི་རོལ་པ་རུ། །ཉེ་བར་སྡུད་ལ་ཕྱག་འཚལ་ལོ། ༦ ། སྲིད་དང་ཞི་བའི་ཁམས་ཀུན་ན། །བླ་ན་ཡོད་མེད་མཆོད་པའི་སྤྲིན། །བདག་ཏུ་བཟུང་དང་མ་བཟུང་བ། །ལྷན་སྐྱེས་བློ་ཡིས་དྭངས་པས་མཆོད། ༧ །གང་གི་རྣམ་ཐར་རྒྱ་ཆེ་བ། །དཔག་པར་ནུས་མིན་དེ་ལྟ་ནའང་། སྙན་ངག་གླུ་རུ་འཇོ་བ་ཡིས། །བློ་ལྡན་རྣམས་ཀྱིས་བསྟོད་པར་བགྱི། ༩ །རྨོངས་གྱུར་འཁོར་བའི་མུན་པ་ཀུན། །འགྱོད་
སེམས་སྐྱ་རེངས་ཀྱིས་དྲངས་པའི། །སྟོབས་བཞིའི་ཉིན་བྱེད་གཞོན་ནུ་ཡིས། །ལྷན་ཅིག་མཛའ་བར་ཡང་མི་བགྱིད། ༡༠ །གང་དག་ལེགས་བྱས་ཟླ་བའི་གཟུགས། །གྲགས་པའི་ཟེར་གྱིས་བསུས་པ་ལས། །ཡི་རང་ཀུནྡའི་འདབ་མའི་ཁ། །དུས་རྣམས་ཀུན་ཏུ་དབྱེ་བར་བགྱི། ༡༡ །འཁོར་བའི་ཚ་གདུང་གིས་མནར་བའི། །མྱ་ངམ་ཐང་དུ་འཁྱམས་པའི་འགྲོར། །བདེན་གཉིས་སྤྲིན་གྱི་མེ་ཏོག་གིས། །རྟག་པར་ངལ་བསོར་བསྐུལ་མ་འདེབས། ༡༢ །ཞི་བར་དགྱེས་པའི་རྒྱལ་རྣམས་ཀུན། །གསང་གསུམ་མི་བཟད་རྒྱན་འཁོར་ལོར། །དུས་ཀུན་གཡོ་བར་མི་བགྱིད་པར། །གདུལ་བྱའི་ཁམས་ལ་བརྩེ་བར་གསོལ། ༡༣། །དེ་ལྟར་བདག་གིས་འཇམ་དཔལ་མགོན། །བསྟོད་པ་འདིས་མཚོན་ཚོགས་གཉིས་འབྲས། །རྣམ་མཁྱེན་ཞིང་དུ་བཏབ་པ་ཡིས། །ཕན་བདེའི་གེ་སར་རྒྱས་པར་ཤོག ༡༤ །གང་ཞིག་འཆད་ཉན་བསམ་པ་དང་། །ཁ་ཏོན་ཚུལ་བཞིན་བསྒོམ་པ་སོགས། །བདག་གཞན་དོན་དུ་བགྱི་བ་ཡང་། །གེགས་མེད་མྱུར་དུ་འགྲུབ་པར་ཤོག ༡༥ །གང་གི་གསང་གསུམ་སྣང་བ་ཀུན། །སྒོ་གསུམ་ངང་དུ་རོ་གཅིག་པས། །དག་རྫོགས་སྨིན་གསུམ་མངོན་གྱུར་ནས། །སྐུ་གསུམ་མཆོག་ལ་གནས་པར་ཤོག ༡༦ །ནམ་ཞིག་འཆི་བའི་དུས་ཀྱི་ཚེ། །དཔའ་བོ་ཌཱ་ཀིའི་མདུན་བདར་ནས། །འཕགས་པ་ཉིད་ཀྱི་ཞབས་པད་དུ། །ལུང་བསྟན་དབུགས་
དབྱུང་ཐོབ་པར་ཤོག ༡༧ །འདི་ནས་སྐྱེ་བ་ཐམས་ཅད་དུ། །སྨྲ་བའི་ཟླ་བས་རྗེས་བཟུང་ནས། །ཐོས་བསམ་སྒོམ་པའི་ཨུཏྤལ་དཀར། །རབ་རྒྱས་བསྟན་འགྲོར་སྨན་ནུས་ཤོག ༡༨ །མཐར་ཐུག་ས་བཅུ་ལམ་ལྔ་སོགས། །སྤངས་རྟོགས་ཡོན་ཏན་ཡོངས་རྫོགས་པའི། །བྱང་ཆུབ་སྙིང་པོ་ལ་གཤེགས་ཏེ། །མངོན་པར་རྫོགས་སངས་རྒྱས་གྱུར་ཅིག ༡༩ །དེ་ལས་སླར་ཡང་འགྲོ་ཀུན་གྱི། །གདུལ་བྱ་དུས་ལས་མི་ཡོལ་བར། །རྗེས་སུ་འཛིན་མཛད་སྤྲུལ་པའི་གར། །སྲིད་མཐའི་བར་དུ་བསྒྱུར་བར་ཤོག ༢༠ །མདོར་ན་མཁྱེན་དང་བརྩེ་བ་ཡི། །ཡེ་ཤེས་མཚུངས་པ་མེད་འཛིན་པས། །རྒྱལ་བ་ཀུན་གྱིས་རབ་བསྔགས་པའི། །འཇམ་དཔལ་ཇི་བཞིན་བདག་འགྱུར་ཤོག ༢༡ །དེ་ལྟར་འཇམ་དཔལ་དམར་པོ་སྨྲ་བའི་སེང་གེ་ལ་བསྟོད་པའི་རབ་བྱེད་ཉུང་ངུ་འདིའང་གཞོན་ནུ་ཨ་བྷཱ་ཡས་གང་ཤར་དུ་གསོལ་བ་བཏབ་པའོ། །
འཇམ་དཔལ་གཞོན་ནུ་ལ་བསྟོད་པ་བློ་མཆོག་གུར་གུམ་གསར་པའི་ཕྲེང་མཛེས།
འཇམ་དཔལ་གཞོན་ནུ་ལ་བསྟོད་པ་བློ་མཆོག་གུར་གུམ་གསར་པའི་ཕྲེང་མཛེས་ཞེས་བྱ་བ། ན་མཨཱརྱ་མཉྫཤྲཱི་ཀུ་མཱ་རཱ་ཡ། ཀ་ལ་པིངྐ་སྒོ་ངར་གནས་བཞིན་ཡིད་འོང་སྒྲ་སྐད་སྙན་སྒྲོགས་ལྟར། །ཁ་ན་མ་ཐོའི་སྦུབས་སུ་ཞུགས་ཀྱང་བྱང་ཆུབ་སེམས་དཔའི་མྱུ་གུ་ནི། །ག་བུར་འཛིན་པའི་བསིལ་བའི་འོད་ལྟར་རྣམ་ཐར་བཞི་ལྡན་དམ་ཆོས་དབྱངས། །ང་བདག་ཚ་གདུང་བསལ་ཕྱིར་འབེབས་ཞེས་བདེན་པར་དམ་ཆོས་པད་དཀར་ལས་གསུངས་དེར་བདག་ཅག་དད། ༡ །ཅ་ཅོ་བྲལ་
བའི་གུར་གུམ་གཞོན་ནུའི་རྡུལ་གྱིས་བྱུག་རྣམ་ཐར་གསུམ་གྱི་སྟེང་མངོན་པར་འདུ་བྱ་བ་མེད་པས་བསྣན་པའི་ཁྱད་པར་རོ། །པའི་ཡེ་ཤེས་སྐུ། །ཆ་བྱད་མཚན་དཔེའི་འཇོ་སྒེག་ལ་རོལ་བཅུ་དྲུག་ལང་ཚོའི་སྣང་བ་ཅན། །ཇ་ཧོང་དམར་སེར། ལྟར་གཡོ་སྣ་ཚོགས་འོད་ཟེར་སྤེལ་ལེགས་ཕྲེང་བས་ལེགས་འཁྱུད་པའི། །ཉ་རྒྱས་ཤར་གྱི་ཐིག་ལེ་ཇི་བཞིན་རྙོག་པ་བྲལ་དེར་དྭང་བས་འདུད། ༢ །ཏ་ཐཱ་ག་ཏས་ལེགས་པར་གསུངས་པའི་བདེན་པ་གཉིས་ཀྱི་དམ་ཆོས་དབྱངས། །ཐ་དད་ཉིད་དུ་རྣམ་པར་བཀྲ་ལས་སླར་ཡང་གསལ་བར་མཛད་པའི་གཉེན། །ད་གཟོད་ཁྱོད་ལས་གཞན་དུ་རྙེད་མིན་གལ་ཏེ་མངའ་ཡང་ཁྱེད་ཀྱི་མཐུ། །ན་མ་སྤོབས་པའི་ཤེས་རབ་མཆོག་འཛིན་བྱང་སེམས་ཁྱུ་མཆོག་དེ་ལ་འདུད། ༣ །པ་སངས་སྤྲིན་བྲལ་མཁའ་ལ་སྒེག་པའི་འོད་ཟེར་འཛུམ་ཕྲེང་གཡོ་བ་ལྟར། །ཕ་མཐའ་མི་མངོན་གཟུངས་དང་བློ་གྲོས་རྟོགས་པའི་ཡེ་ཤེས་གཏེར་གྱུར་དེས། །བ་མཆོག་ཙིནྟ་མ་ཎི་ལས་ལྷག་ཤེས་བྱའི་བློ་མིག་གྲོལ་བ་ལ། །མ་རིག་རྨོངས་པའི་མུན་པ་བསལ་མཛད་ཚད་མེད་ཐུགས་རྗེའི་གཏེར་ལ་འདུད། ༤ །ཙ་ཀོ་ར་ཚོགས་སྤྲིན་བཞིན་འདུ་བའི་ཨུཏྤལ་གཞོན་ནུ་འཇོ་སྒེག་ཕྱག །ཚ་ཟེར་ཅན་གྱིས་ཀུན་གསལ་བཞུ་འདྲའི་འོད་སྣང་གཡོ་བའི་རལ་གྲི་དང་། །ཛཱ་ཏིའི་མེ་ཏོག་གསར་པ་ལྟར་སྡུག་རབ་མཛེས་གླེགས་བམ་ཟུང་འཛིན་པས། །ཝ་ལྟར་ཉུལ་བའི་རྟོག་པའི་རྒྱུན་
གཅོད་སོར་རྟོག་ཤེས་རབ་སྟེར་ལ་འདུད། ༥ །ཞྭ་ཐོད་ཀུན་སྤངས་ཨུཏྤལ་ལྟར་གནག་རལ་པའི་གདེངས་ཀ་མཛེས་པའི་རྩེར། །ཟ་མ་ཏོག་བཞིན་སྣ་ཚོགས་རིན་ཆེན་པདྨོས་མཚན་པའི་འཛུམ་ཞལ་དུ། །འ་ཅག་འགྲོ་ཀུན་རྗེས་སུ་བཟུང་ཕྱིར་རིགས་ཀྱི་བདག་པོ་འོད་མཐའ་ཡས། །ཡ་བྲལ་ཙམ་མིན་རྟག་ཏུ་བསྙེན་པའི་ངོ་མཚར་དཔག་ཡས་དེ་ལ་འདུད། ༦ །རྭ་ཡི་གཞུ་ཅན་ངང་པའི་ཤིང་རྟ་སྤྲིན་ཞོན་མི་བཟད་མིག་ལ་སོགས། །ལ་ལ་ཙམ་མིན་འཇིག་རྟེན་ཆེད་དགུའི་ཐོར་ཚུགས་རིན་ཆེན་ཟུར་ཕུད་རྩེར། །ཤ་ཁྲག་ལས་འདས་སྣང་སྟོང་མཚན་དཔེའི་ཞབས་རྡུལ་བཀོད་ལ་ངོ་མཚར་ཅི། །ས་བཅུའི་ཀློང་དུ་སྙིང་རྗེའི་ངལ་བསོའི་རྒྱལ་ཀུན་ཡབ་ཏུ་གྱུར་དེར་འདུད། ༧ །ཧ་རིའི་ཙནྡན་བསིལ་ངད་ལས་ལྷག་ཐུགས་རྗེའི་ཟླ་ཤེལ་གསར་པ་ནི། །རྟག་ཏུ་གུས་པའི་བདེ་འབྱུང་རལ་རྩེར་བྲལ་ཐོབ་སྤངས་པར་སོན་པ་ལས། །ཨཱ་དན་ལྟར་རྙོག་པ་བྲལ་བའི་བློ་མཆོག་ཀུནྡྲའི་འདབ་མའི་ཁ། །ཡིད་འོང་དབྱེ་བའི་བྱེད་པོ་གཅིག་གྱུར་ཁྱོད་ཀྱི་ཐུགས་རྗེས་རྟག་ཏུ་སྐྱོངས། ༨ །བྱང་ཆུབ་སྤྱོད་མཆོག་བདུད་རྩིའི་བཏུང་བས་རྨད་བྱུང་ལང་ཚོ་ཆེར་རྒྱས་པའི། ཨཱརྱ་དེ་ཝ་ནགས་ཚལ་དབུས་སུ་མངོན་སུམ་རྗེས་སུ་བཟུང་བ་དང་། །ཙནྡྲ་གོ་མིའི་བསྔགས་པའི་རྒྱུད་མང་རབ་སྙན་གཡོ་བས་ཁྱོད་ཀྱི་ཐུགས། །ཀུན་ནས་དགྱེས་གྱུར་གསུང་གིས་དབུགས་དབྱུང་སྩལ་པ་ཇི་
བཞིན་བདག་ཀྱང་ཟུངས། ༩ །གང་གི་མཁྱེན་བརྩེའི་ཀུན་ཕན་རྡུལ་ཕྲན་ལན་གཅིག་སྙིང་གར་སོན་པ་ལས། །བརྒྱད་གཉིས་འཇིགས་བཅས་ཚ་གདུང་བཅིལ་དང་རྨོངས་པའི་མུན་པ་རྣམ་པར་འཕྲོག །རིག་པའི་གཞུང་ལུགས་ཨུཏྤལ་དཀར་པོའི་འདབ་བརྒྱ་འབྱེད་དང་ལྷན་ཅིག་པར། །ཐམས་ཅད་མཁྱེན་པའི་གེ་སར་མཛེས་འཛིན་དོན་གཉིས་ཡོངས་སུ་འགྲུབ་གྱུར་ཅིག༡༠ །དེ་ལྟར་བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་བསྟོད་པའི་རབ་བྱེད་འདིའང་མི་ཕྱེད་པའི་དད་པས་མཚམས་སྦྱར་ཏེ་གཞོན་ནུ་ཨ་བྷཱ་ཡས་ཁྱུ་མཆོག་ཅན་གྱི་ཟླ་བའི་རྒྱལ་བ་གཉིས་པའི་གྲལ་ཚེས་དགེ་བར་གང་ཤར་གསོལ་བ་བཏབ་པ་ཛ་ཡནྟུ། །
འཇམ་དཔལ་སྨྲ་བའི་སེང་གེ་ལ་རྩ་སྔགས་ཀྱི་སྒོ་ནས་བསྟོད་པ་མཚོ་བྱུང་བཞད་པའི་དབྱངས་སྙན།
འཇམ་དཔལ་སྨྲ་བའི་སེང་གེ་ལ་རྩ་སྔགས་ཀྱི་སྒོ་ནས་བསྟོད་པ་མཚོ་བྱུང་བཞད་པའི་དབྱངས་སྙན་ཅེས་བྱ་བ་བཞུགས་སོ། །རྒྱ་གར་སྐད་དུ། མཉྫ་ཤྲཱི་བཱ་དི་སི་ཧེ་སཱུ་ཏི་སྭ་ར་སྭ་ཏཱི་ཧ་ས་མྱ་སཾ་རྭ་བ་སཱནྟ་ནཱ་མ། བོད་སྐད་དུ། འཇམ་དཔལ་སྨྲ་བའི་སེང་གེ་ལ་བསྟོད་པ་མཚོ་བྱུང་བཞད་པའི་དབྱངས་སྙན་ཅེས་བྱ་བ། བཅོམ་ལྡན་འདས་གསུང་གི་རྡོ་རྗེ་ལ་ཕྱག་འཚལ་ལོ། །ཨོཾ་གྱི་ངོ་བོ་སྲིད་ཞིའི་མཆོག་སྦྱིན་མི་ཕྱེད་རྡོ་རྗེའི་བདག་ཉིད་མཆོག །ཧཱིཞེས་ཡང་དག་ཤེས་རབ་མཐའ་གྱུར་རྣམ་མེད་དཔལ་མོར་སྙོམས་འཇུག་བཞིན། །དྷིཡིག་རྣམ་བཅས་སྟོང་ཉིད་ལས་བྱུང་སངས་རྒྱས་བྱང་ཆུབ་ཆེན་པོའི་ཚུལ། །ཕྲ་ཕབ་ལྟ་བུའི་མེ་ལོང་ཡེ་ཤེས་འཇམ་པའི་རྡོ་རྗེར་ཕྱག་འཚལ་འདུད། །མ་མེ་ལྷག་པའི་མགོན་པོ་གཅིག་
པུ་སྒྲིབ་གཉིས་མུན་སངས་མཁྱེན་པ་རྒྱས། །དཱི་པཾ་ལྟ་བུར་ཤིན་ཏུ་འོད་གསལ་གཉུག་མའི་ཡུལ་ལ་མངོན་པར་ཆགས། །མཉྫ་རྟོག་པའི་རྩུབ་རེག་སྤངས་པར་ཟག་མེད་འདོད་པས་དགྱེས་རོལ་པ། །རང་བཞིན་དག་པ་ཆོས་དབྱིངས་ཡེ་ཤེས་འཇམ་པའི་དཔལ་ཁྱོད་ཕྱག་འཚལ་འདུད། །བྲི་ཞེས་གཉིས་མེད་གཟིགས་པའི་མཐར་སོན་སངས་རྒྱས་ཀུན་དང་རོ་གཅིག་པས། །མྱི་ཡིག་སྟོང་གཟུགས་ཕྱག་རྒྱ་ཆེན་མོར་འཛུམ་ཞི་དགའ་བས་རབ་བཞད་པ། །ཧཱིཝསྒྲ་མི་འགྱུར་ནཱ་དའི་གསུང་དང་དེ་ཁོ་ན་ཉིད་རོ་གཅིག་ཐུགས། །འདུ་ཤེས་ཅན་མིན་སོར་རྟོག་ཡེ་ཤེས་འཇམ་པའི་དབྱངས་ལ་ཕྱག་འཚལ་འདུད། །པྲཛྙཱ་སྒྲིབ་བྲལ་མཚན་མ་མེད་པ་མི་འགྱུར་སྟོང་ཉིད་ལས་བྱུང་བའི། །ཝཌྷ་ནི་ཞེས་སངས་རྒྱས་སྲས་བཅས་འབྱུང་དང་འཕེལ་བའི་གཞི་གཅིག་པུ། །ནམ་མཁའ་ལས་བྱུང་སྟོང་པའི་གཟུགས་བརྙན་སློབ་པ་མིན་པའི་ཡེ་ཤེས་ལས། །རང་བྱུང་དངོས་ཀུན་མཉམ་པ་ཉིད་གྱུར་འཇམ་དཔལ་གཞོན་ནུར་ཕྱག་འཚལ་འདུད། །ཧཱུྃཞེས་ཤེས་རབ་སྒྱུ་མའི་རྣམ་འཕྲུལ་སྤྲུལ་པའི་དྲྭ་བ་སྣ་ཚོགས་འཆང་། །དྷཱིཙྩཡིག་དམར་སེར་སྣང་བ་ལས་འཁྲུངས་སངས་རྒྱས་རོལ་མོ་ཅིར་ཡང་སྟོན། །སྭཱ་ཧཱ་དགེ་ལེགས་ཐམས་ཅད་སྦྱིན་མཛད་དངོས་པོ་ཐམས་ཅད་རྗེས་འགྲོ་བ། །ཀུན་ཁྱབ་བྱ་གྲུབ་ཡེ་ཤེས་སྐུ་ཉིད་འཇམ་དཔལ་དཔའ་བོར་ཕྱག་འཚལ་འདུད། །ཨེ་མ་ཕྱོགས་
བཅུའི་རྣམ་འདྲེན་ཡོངས་ཀྱི་མཁྱེན་རབ་ཕུང་པོ་གཅིག་བསྡུས་པ། །སྨྲ་བའི་སེང་གེ་འཇམ་པའི་དབྱངས་ཞེས་འཇིག་རྟེན་གསུམ་ན་གྲགས་འབར་གང་། །དེང་འདིར་བདག་ལ་ཐུགས་བརྩེར་མཛད་ནས་རྡོ་རྗེའི་སྐུ་གསུང་ཐུགས་གསང་བས། །མངོན་སུམ་བྱིན་རླབས་ཟིལ་དངར་སྩལ་ནས་ཕན་བདེའི་པདྨོ་རྒྱས་མཛོད་ཀྱེ། །ཤེས་པ་ཟབ་མོའི་ཚུལ་དང་མི་ཕྱེད་མཐའ་ཡས་ཤེས་བྱའི་དེ་ཉིད་མཐོང་། །གཟུངས་དང་སྤོབས་པའི་ཆོས་ཀྱི་སྤྲིན་ལས་ཞི་བསིལ་བདུད་རྩིའི་ཆར་ཆེན་འབེབས། །མཐོང་ཐོས་དྲན་རེག་བྱང་ཆུབ་ལ་འགོད་རྒྱལ་དང་རྒྱལ་སྲས་བྱེ་བའི་གཙོ། །ཡེ་ཤེས་ལུས་ཅན་རྣམ་ཐར་རྒྱ་མཚོར་འགྲོ་ཀུན་རྟག་ཏུ་འཇུག་གྱུར་ཅིག ། ཅེས་རྗེ་བཙུན་འཇམ་པའི་དབྱངས་སྨྲ་བའི་སེང་གེ་ལ་རྩ་སྔགས་ཀྱི་ངེས་པ་དང་། འཇམ་དཔལ་སྒྱུ་འཕྲུལ་དྲྭ་བའི་རྒྱུད་ཀྱི་རྒྱལ་པོ་ཆེན་པོའི་བསྟོད་པའི་ལེའུའི་ངེས་དོན་འགྲེལ་ཆེན་དྲི་མ་མེད་པའི་འོད་ཀྱི་དགོངས་པ་དང་མཐུན་པར་ཟུང་དུ་འབྲེལ་བའི་སྒོ་ནས་ཅུང་ཟད་བསྔགས་པའི་ཚིགས་སུ་བཅད་པ་འདི་ཡང་གྲུབ་པ་མཆོག་གི་དེད་དཔོན་དམ་པ་སངས་རྒྱས་ཀྱི་གཞུང་ལ་བརྟེན་ནས་བསྙེན་སྒྲུབ་ཀྱི་མཐར་དངོས་གྲུབ་བླང་བའི་ཆེད་ཐུགས་དམ་བསྐུལ་བའི་ཚུལ་དུ་ཤཱཀྱའི་དགེ་སློང་འཇམ་དབྱངས་མཁྱེན་བརྩེའི་དབང་པོས་གསོལ་བ་བཏབ་པ་སིདྡྷིར་སྐུ། །
འཇམ་དཔལ་དཀར་པོ་ལ་བསྟོད་པ་བློ་གྲོས་སྣང་སྟེར།
འཇམ་དཔལ་དཀར་པོ་ལ་བསྟོད་པ་བློ་གྲོས་སྣང་སྟེར་ཅེས་བྱ་བ། ན་མོ་མཉྫགྷོ་ཥཱ་ཡ། ཆུ་གཏེར་ལས་སྐྱེས་ཟླ་བ་དང་། །ཁ་བའི་རྡུལ་བརྩེགས་གངས་ཀྱི་རིའི། །མཚུངས་པ་མ་ཡིན་ཁྱོད་ཀྱི་སྐུ། །ཕུན་ཚོགས་མཚན་དཔེའི་འོད་ཟེར་
འཕྲོ། ༡ །ཉི་མའི་ཟེར་གྱིས་མ་སྨིན་ཞིང་། །པདྨའི་མངལ་དུ་བསྐྲུན་མིན་ཡང་། །ཁྱོད་གསུང་ལེགས་བཤད་སྦྲང་རྩི་ཡིས། །ཐར་པ་མཆོག་གི་བཅུད་ལེན་སྦྱིན། ༢ །སྤྲིན་བྲལ་དག་པའི་ཀུན་གསལ་དང་། །ཟླ་བས་འཕེལ་བའི་གཏིང་རུམ་ལས། །ཟབ་ཅིང་རྒྱ་ཆེའི་ཡེ་ཤེས་ཐུགས། །ཚངས་པའི་བློས་ཀྱང་གཞལ་དུ་མེད། ༣ །ནོར་བུའི་འཁྲི་ཤིང་གཡོ་བ་དང་། །ས་ཀུན་བདག་པོའི་དཔལ་འབྱོར་གྱིས། །ཁྱོད་ཀྱི་མི་བཟད་ཡོན་ཏན་མཆོག །ཕྲིན་ལས་མངའ་བའི་ཟླར་མི་རུང་། ༤ །དེས་ནི་དཔེ་ལས་རབ་འདས་པའི། །གསང་བ་མི་ཟད་རྒྱན་འཁོར་ལོ། །དྲན་པ་ཙམ་གྱིས་སྙིང་གི་མུན། །འཕྲོག་བྱེད་ཡེ་ཤེས་ལྡན་མིན་ནམ། ༥ །མཚོན་པ་མིན་ལ་མཚོན་བྱེད་ཀྱི། །བསྟོད་ཚིག་གཉིས་སྐྱེས་གཞོན་ནུ་ཡིས། །བློ་མཆོག་སྤོབས་པའི་ཀུནྡྲའི་ཁ། །ཡིད་འོང་ཀུན་ཏུ་དབྱེ་བར་ཤོག ༦ །ཐོས་དང་བསམ་དང་སྒོམ་པ་དང་། །འཆད་དང་རྩོད་དང་རྩོམ་པ་དང་། །མཁྱེན་བརྩེ་ནུས་པའི་ཡོན་ཏན་སོགས། །འཇམ་དཔལ་ཇི་བཞིན་བདག་འགྲུབ་ཤོག ༧ །མདོར་ན་སྲིད་དང་ཞི་བ་ཡི། །མངོན་མཐོ་ངེས་ལེགས་ཐེམ་སྐས་ལ། ། རྟག་ཏུ་འགྲོ་རྣམས་སྒྲོལ་བྱེད་པའི། །ཁྱོད་ཀྱི་དགོངས་པ་འཛིན་གྱུར་ཅིག །སརྦ་པྲ་ཛྙཱ་མ་ཏི་པྲ་ཏི་བྷ་ན་བི་སྟ་ར་བྷ་ཝ། །
འཇམ་དཔལ་རྡོ་རྗེ་ལ་བསྟོད་ཅིང་སྨོན་ལམ་གདབ་པའི་རིམ་པ་བློ་གྲོས་དཔལ་སྦྱིན་ནོར་བུའི་འཁྲི་ཤིང་།
འཇམ་དཔལ་རྡོ་རྗེ་ལ་བསྟོད་ཅིང་སྨོན་ལམ་གདབ་པའི་རིམ་པ་བློ་གྲོས་དཔལ་སྦྱིན་ནོར་བུའི་འཁྲི་ཤིང་ཞེས་བྱ་བ། ན་མ་མཉྫཤྲཱི་ཡེ། སྣང་དང་མི་སྣང་ཕྱེད་སྣང་སྤྲུལ་པའི་གྲོང་ཁྱེར་ཀུན་ཏུ་ཁྱོད་གཅིག་ཐོར་ཚུགས་རྒྱན་དུ་རོལ་པས་ཅི་ཞིག་སྟེ། །སྲས་བཅས་འདྲེན་པ་ཡོངས་ཀྱི་ཡབ་ཏུ་གཟོད་ནས་རྣམ་པར་རོལ་པའི་འཁོར་ལོར་ཡོངས་སུ་བསྒྱུར་བ་དེ་ལྟ་ནའང་། །དེང་འདིར་བཅུ་དྲུག་ལང་ཚོ་འབར་བས་མིག་དང་སྙིང་ལ་སིམ་པ་ཇི་སྙེད་བགྲང་བར་མི་ནུས་སྟེར་བའི་བྱེད་པོར་གཅིག་གྱུར་པས། །སྲིད་ཞི་གཉིས་ཀྱི་མཐའ་རུ་མ་ལྷུང་ཟུང་འཇུག་རྣམ་ཀུན་མཆོག་ལྡན་འཇོ་སྒེག་སྟུག་པོར་རོལ་དེར་དྭང་བས་འདུད། ༡ །མི་ཤིགས་སྟོང་པ་ཉིད་ཀྱི་ཐིག་ལེ་ནི། །བརྩེ་ཆེན་སྙིང་རྗེའི་དཔྱིད་དང་རོ་གཅིག་པས། །རྣམ་པ་ཀུན་ཏུ་སྐུ་གསུང་ཐུགས་རྡོ་རྗེ། །གང་འདུལ་སྒྱུ་མའི་རོལ་པར་ཡོངས་སུ་བཞེངས། ༢ །ཁྱོད་སྐུ་ཉི་གཞོན་བཅུད་འཐུང་གུར་གུམ་དང་། །རྣམ་པར་མཚུངས་ཀྱང་ལྟ་ན་ལྷུན་སྡུག་པའི། །འོད་ཟེར་དྲྭ་བས་གཏམས་པའི་སྣང་བ་ཡིས། །ཆོས་ཉིད་དོན་ལ་མི་གནས་སྒྲིབ་མུན་འཇིལ། ༣ །ཤེས་རབ་རལ་གྲིའི་གདེངས་ཀས་མཚན་པའི་ཕྱག །རྨོངས་པའི་དྲྭ་བ་བཀྲལ་དང་ཆབ་གཅིག་པར། །བློ་མཆོག་སྤོབས་པའི་གཏེར་མཛོད་གྲོལ་བའི་ཕྱིར། །ལམ་འདི་གཅིག་ཏུ་འཛིན་བཟོད་ཕུལ་བྱུང་གཏམ། ༤ །རྒྱལ་ཀུན་གསུང་གི་གསང་བ་གླེགས་བམ་གཟུགས། །པདྨ་གཞོན་ནུའི་སྲོག་ཏུ་རོ་གཅིག་པས། །ལུང་རྟོགས་དམ་ཆོས་བདུད་རྩིའི་བགོ་བཤར་ནི། །
སྐལ་བཟང་འགྲོ་བའི་དཔྱིད་དུ་ལྷགས་པ་བཞིན། ༥ །མཆུ་སྒྲོས་པུཎྜ་རཱི་ཀའི་འཛུམ་དཀར་ལས། །ལེགས་འོངས་ལམ་བདེན་སྦྲང་རྩིའི་དྲི་བསུང་གིས། །འཕགས་དང་སོ་སྐྱེའི་རཡིག་གཉིས་པའི་སྤྲིན། །དབང་མེད་འགུགས་དེ་གསུང་གི་གསང་བར་རྫོགས། ༦ །གཟོད་ནས་རྡུལ་བྲལ་དག་པའི་ཡེ་ཤེས་ནི། །སྤྲོས་པའི་མཐའ་དང་མཛའ་བ་མ་ཡིན་ཀྱང་། །ཇི་ལྟ་ཇི་སྙེད་མཁྱེན་གཉིས་རོལ་སྒེག་གིས། །སོ་སོར་ཡང་དག་རིག་པའི་མངོན་རྟོགས་ངོམས། ༧ །དེས་ན་དཔག་ཡས་རྣམ་པར་ཀུན་གསལ་ཁམས། །ཚངས་དང་ཕུར་བུའི་བློས་ཀྱང་གཞལ་ནུས་ཀྱི། །སྤོབས་པ་བྲལ་ཕྱིར་གནག་སྣུམ་རལ་པའི་རྩེའི། །ཞབས་མཐིལ་པདྨོར་བསྟི་སྟང་བསྟབས་པ་བཞིན། ༨ །ཁྱོད་སྐུ་དངོས་སུ་མཐོང་བའི་སྐལ་བཟང་གིས། །ལུང་རྟོགས་སྤོབས་པ་གྲོལ་ལ་ངོ་མཚར་ཅི། །མཚན་གྱི་ནོར་བུ་སྤྱི་བོར་ལྷུང་ཙམ་གྱིས། །སྐྱེ་ཀུན་ཤེས་བྱའི་འབྱོར་པས་ཕྱུག་མིན་ནམ། ༩ །ཚུལ་དེའི་ཕྱིར་ན་བདག་ཡིད་རབ་དད་པའི། །ཆར་གྱིས་བརླན་གྱུར་ཐལ་མོའི་སྟེང་འཐུང་དཀར། །སྤྱི་ཏོལ་རྩེ་མོར་བཀོད་པའི་བསྟི་སྟང་གིས། །གང་ཞབས་ཤར་གྱི་ཐིག་ལེར་རྟག་ཏུ་བསྙེན། ༡༠ །བླ་ན་ཡོད་དང་མེད་པའི་མཆོད་སྤྲིན་ཀྱང་། །ཏིང་འཛིན་བྱེད་པོས་གཅིག་ཏུ་བཟླུམས་བྱས་ཏེ། །ཡོན་གནས་ཐུགས་རྗེ་མཆོག་གི་མངའ་བདག་ལ། །གུས་པས་སྟོབ་པའི་རྫུ་
འཕྲུལ་ཅིར་ཡང་གཡོ། ༡༡ །ཐོག་མ་མེད་ནས་བསགས་པའི་སྒྲིབ་གཉིས་མུན། །སྟོབས་བཞིའི་ཟླ་ཤེལ་གཞོན་ནུའི་འཛུམ་ཟེར་གྱིས། །རེག་པའི་མོད་ལ་ཡོངས་སུ་གཞིལ་བྱས་ཏེ། །མགོན་པོ་དགྱེས་པའི་ དམ་བཅའ་སླར་ཡང་བཟུང་། ༡༢ །སློབ་དང་མི་སློབ་ཉན་རང་སོ་སྐྱེ་ཡི། །ལེགས་བྱས་འོད་སྣང་སྤྲོ་བའི་པདྨོའི་བཤེས། །ཕན་བདེའི་སྣང་བ་སྟེར་བའི་བྱེད་པོ་དེར། །ཡི་རང་ཨུཏྤལ་འདབ་བརྒྱ་སྙིང་དབུས་གྲོལ། ༡༣ །སྲིད་པའི་སྡུག་བསྔལ་ཁོང་བུར་འཁྱམས་པའི་འགྲོ། །བདེན་པ་གཉིས་ཀྱི་ཐེམ་སྐས་ལ་འཛེགས་ཏེ། །རྣམ་མཁྱེན་ཁང་བཟང་དམ་པར་དབུགས་འབྱིན་ཕྱིར། །རྟག་ཏུ་ལུང་གི་ཆོས་འཁོར་བསྐོར་ཟློ བར་བསྐུལ། ༡༤ །གང་དག་ཕྱོགས་བཅུའི་ཞིང་བཞུགས་བདེར་གཤེགས་རྣམས། །མྱ་ངན་འདས་ལ་དགྱེས་པའི་སྐབས་དབྱེ་ཚེ། །སྙིང་རྗེའི་སྲིད་པར་དགའ་བའི་ཏམྦུ་རས། །རྟག་ཏུ་བཞུགས་པའི་གསོལ་འདེབས་དབྱངས་སུ་ལེན། ༡༥ །དེ་ལྟར་བསགས་པའི་དགེ་ཚོགས་གངྒཱའི་རྒྱུན། །རྣམ་པ་ཐམས་ཅད་མཁྱེན་པའི་ཆུ་གཏེར་ཆེར། །རོ་གཅིག་ཉིད་དུ་བསྔོས་པའི་མཐུ་དཔལ་གྱིས། །དོན་གཉིས་གདེངས་ཅན་ཚོགས་རྣམས་འཕེལ་གྱུར་ཅིག ༡༦ །གནས་སྐབས་སུ་ཡང་སྣོད་བཅུད་བ་ལ། །ལེགས་སྤྱོད་མཛེས་མའི་སོར་རྩེས་བསྣུན་པ་ལས། །རྫོགས་ལྡན་གསར་དུ་འགུགས་པའི་འཛུམ་དཀར་གྱིས། །ལྷར་བཅས་
འགྲོ་ཀུན་དགའ་བས་རྩེན་གྱུར་ཅིག ༡༧ །གཟུགས་སྣང་འཇམ་དཔལ་གཞོན་ནུར་མངོན་གྱུར་ཅིང་། །སྒྲ་གྲགས་གསང་སྔགས་འཁོར་ལོ་ཡོངས་སུ་སྨིན། །རྟོག་ཚོགས་བདེ་སྟོང་དྲ་བར་བསྡམས་པ་ཡིས། །སྐུ་གསུང་ཐུགས་དང་དབྱེར་མེད་འགྲུབ་པར་ཤོག ༡༨ །འཆི་འཕོས་ཚེ་ན་བཅོམ་ལྡན་འཇམ་དཔལ་དབྱངས། །རྒྱལ་བའི་སྲས་ཀྱིས་བསྐོར་བ་དེ་མཐོང་ཞིང་། །བདེ་བ་ཅན་སོགས་དག་པའི་ཞིང་མཆོག་ཏུ། །ཁྲིད་ནས་ལུང་བསྟན་དབུགས་དབྱུང་མཆོག་བརྙེས་ཤོག ༡༩ །མཐར་ཐུག་སྟོབས་བཅུ་མི་འཇིགས་རྣམ་པ་བཞི། །མ་འདྲེས་བཅོ་བརྒྱད་ལ་སོགས་སྤངས་རྟོགས་ཀྱི། །ཆ་ཤས་ཡོངས་སུ་རྫོགས་པའི་རི་དྭགས་མཚན། །ཆོས་དབྱིངས་དག་པའི་མཁའ་ལ་རོལ་གྱུར་ཅིག ༢༠ །དེ་ལས་སླར་ཡང་སྤྲུལ་པའི་ཟློས་གར་ནི། །རྙོག་བྲལ་མོས་པའི་ཆུ་གཏེར་ལ་འཆར་བས། །གྲངས་མེད་སྲིད་ལས་སྒྲོལ་བའི་ཐུགས་བསྐྱེད་མཐུ། །མགོན་པོ་གང་དང་དབྱེར་མེད་འགྲུབ་པར་ཤོག ༢༡ །དེ་ལྟར་བཅོམ་ལྡན་འདས་མགོན་པོ་འཇམ་པའི་དབྱངས་ལ་བསྟོད་པའི་རབ་བྱེད་ཡན་ལག་བདུན་པ་དང་འབྲེལ་བའི་ཚིགས་སུ་བཅད་པ་ཉུང་ངུ་འདི་ཡང་གཞོན་ནུ་ཨ་བྷཱ་ཡས་རང་ལོ་བཅུ་དྲུག་པར་གསོལ་བ་བཏབ་པ་དེ་ཁོ་ན་ཉིད་དུ་འགྲུབ་པར་གྱུར་ཅིག། །།འཇིག་རྟེན་དབང་ཕྱུག་སྙིང་རྗེ་ཆེན་པོ་ལ་སྨྲེ་སྔགས་སུ་གསོལ་བའི་ཚིག་གི་ཨུཏྤལ་དྲང་སྲོང་གྲུབ་པའི་རྣ་རྒྱན་ཅེས་བྱ་བ། །ཨོཾ་སྭ་སྟི་སིདྡྷཾ། བྱང་ཆུབ་ཆུ་གཏེར་བསྲུབས་སྐྱེས་ཟླ་
བ་ཉིད་ནི་སྙིང་རྗེའི་ཕྱི་བཞིན་འགྲོ། །རིག་པའི་གཟི་ལྡན་ཉིན་མོར་བྱེད་པའང་ཕན་བདེའི་སླད་དུ་སྟེ། །དྲི་མེད་མཚན་གྱི་དཔག་བསམ་རྐང་པས་འཐུང་བ་འཇིག་རྟེན་དགེ་མཛད་པ། །བསོད་ནམས་ས་གཞིར་ལན་གཅིག་མིན་འཁྲུངས་དེ་ཉིད་རྟག་ཏུ་བསམ་པར་རིགས། །གང་ན་མགོན་པོ་འོད་མཐའ་ཡས་པ་ཡི། །ཞིང་ཁམས་གཟུགས་ཅན་བཞིན་དུ་སར་འཕོས་པ། །ཡིད་འཕྲོག་ལྷ་དང་གྲུབ་པའི་སྨན་ལྗོངས་ནི། །དཔལ་ལྡན་གྲུ་འཛིན་རི་ཞེས་བྱ་བ་ཡོད། །དེར་ནི་ཕྱག་ན་པདྨོ་ཅན། །ནམ་ཡང་སྤྱན་རས་མི་ཟུམ་པའི། །མདུན་སར་ཡིད་ཅན་ཀུན་བཀོད་ནས། །ཇི་ལྟར་དབུགས་འབྱིན་མཛད་ཅེས་དགོངས། །གཞན་ཡང་ཞལ་གྱི་ཆུ་སྐྱེས་ལས། །འཁྲུངས་པའི་མྱུར་མ་དཔའ་མོ་སོགས། །བྱང་ཆུབ་སེམས་དཔའ་སྙིང་སྟོབས་ཆེ། །བྱེ་བ་ཕྲག་བརྒྱས་ལྷག་པར་བསྟེན། །མགོན་དེའི་རིགས་ཀྱི་ནུས་པ་ནི། །ཐུབ་པ་ཡེ་ཤེས་ཏོག་གི་མཐུས། །དང་པོར་སད་པའི་ཛམྦུའི་འབྲས། །བསྔགས་འོས་ཆུ་ཡིས་སྐྱེད་བསྲིངས་པས། །ཕྱི་ནས་འོད་ཟེར་ཀུན་འཕགས་པ། །དཔལ་བརྩེགས་རྒྱལ་པོ་ཞེས་བྱ་བའི། །ཐམས་ཅད་མཁྱེན་པའི་ཡོན་ཏན་དབྱིག །རིན་ཆེན་རིན་ཐང་མེད་པ་བརྙེས། །དེ་ལྟར་ན་ཡང་དབྱིབས་བསྔགས་དང་། །བསམ་གཏན་གཞན་ལྟ་ཅི་སྨོས་ཏེ། །མིང་གི་ཨུཏྤལ་རྣ་བ་ལ། །ལན་གཅིག་ཙམ་ཞིག་ལྷུང་བས་ཀྱང་། །ངན་འགྲོའི་འཇིགས་མིན་མི་
ཁོམས་མིན། །གཤིས་ངན་གུམ་པར་མི་འགྱུར་ཞིང་། །བསོད་ནམས་འབའ་ཞིག་བསྟེན་པའི་མཐའ། །བདེ་བ་ཅན་དུ་དབུགས་དབྱུང་ཞེས། །ཡང་ཡང་དམ་བཅའི་སྤྲིང་ཡིག་གིས། །འགྲོ་འདི་འཁྱུད་། པ་ལྟར་གྱུར་པ། །སྤྱན་རས་གཟིགས་ཞེས་སློབ་པའི་ཚུལ། །སྲས་བཅས་རྒྱལ་བའི་སྙིང་རྗེས་བསྐྲུན། །མཐོང་དང་མ་མཐོང་ཕུན་ཚོགས་ཀྱིས། །ཞི་བའི་ངལ་འཚོ་སྦྱིན་ལ་དེ། །བསིལ་བར་བྱེད་པའི་གཟུགས་བརྙན་ཅན། །རྟག་ཏུ་ཚུར་མཐོང་མཁའ་འདིར་འཆར། །རབ་དཀར་བདུད་རྩིའི་དོག་པ་ཡིས། །ཕྱོགས་ཀྱི་བུ་མོའི་དད་པའི་མིག །ཀུ་མུད་ལྟ་བུར་རྒྱས་མཛད་པ། །འོད་མཐའ་ཡས་པའི་ཅོད་པན་འཆང་། །རང་དང་གཞན་གྱི་སྨྲ་བའི་མཆོག །ཇི་སྙེད་བསམ་པའི་རྗེས་འགྲོ་བར། །སྣ་ཚོགས་གཟུགས་ཀྱི་སྐུར་སྟོན་པས། །དེ་དང་དེ་ལ་མོས་རྣམས་འདུལ། །ཟླ་ལྟར་རྒྱས་པའི་དཔྲལ་བ་ནས། འདི་རྣམས་མ་ཧཱ་པཎྜི་ཏ་ནགས་ཀྱི་རིན་ཆེན་གྱི་གསུང་དང་མཐུན་པར་བཀོད་པའོ། །མི་ཟད་ཞི་བའི་རྣམ་འཕྲུལ་གྱིས། །སྐྱེ་བོ་ཚུ་རོལ་སྨྲ་བ་རྣམས། །རབ་ཏུ་སད་ཅིང་འདུལ་བར་མཛད། །དེ་བཞིན་ཕྲག་པའི་ས་འཛིན་ལས། །གསེར་གྱི་མངལ་ཅན་སྣང་བའི་མཛོད། །ཤར་བས་པདྨའི་སྐྱེ་གནས་པ། །པུཎྜ་རཱི་ཀའི་སྙེམས་པ་འཆང་། །དཔལ་གྱི་བེའུའི་རི་མོ་ཡིས། །མཚན་པའི་བཀྲ་ཤིས་དཔྱིད་ཀ་ལས། །སྲིད་སྒྲུབ་མེ་ཏོག་དགོད་པ་ན། །ཁྱབ་འཇུག་པ་རྣམས་
ཐོད་དུ་གྱུར། །སྤྱན་ཟུང་བདུད་རྩིའི་ཆུ་གཏེར་ལས། །ཉིན་མོར་བྱེད་དང་ཟླ་བ་དག །དེ་ལ་མོས་པའི་ཡིད་ཅན་རྣམས། །སད་དང་མུན་པ་འཇོམས་ཕྱིར་རྒྱུ། །ཚེམས་དཀར་སྭ་ར་སྭ་ཏིའི་དབྱངས། །མཚན་བཟང་ཟོལ་དུ་འཁྲུངས་ཙམ་གྱིས། །དཔལ་མོར་གུས་རྣམས་ཡི་རང་ཞིང་། །ས་གསུམ་རྨོངས་པའི་རབ་རིབ་འཕྲོག །འཛུམ་པའི་ཞལ་གྱི་ཨུཏྤ་ལས། །གཡོ་བའི་རང་བཞིན་བསྐྱེད་མཛད་པས། །རླུང་ཡོ གི་སྐྱེ་བ་ས་རྣམས་ནི། །གུས་བཅས་མི་ཟད་ལམ་ལ་སྦྱར། །ཆུ་ལྷ་པ་རྣམས་གདུལ་བ་དང་། །ཡང་དག་ཁོང་དུ་ཆུད་པའི་ཕྱིར། །ལྟོ་བ་ལས་ནི་མཆོག་སེམས་པ། །དྲི་མེད་དག་པའི་ཚུལ་གྱིས་འོངས། །འདོད་སྟེར་བཅོམ་ལྡན་ནོར་འཛིན་མ། །ཞབས་ཀྱི་ས་གཞི་ལས་བསྐྲུན་པས། །འགྲོ་རྣམས་དཔག་བསམ་ལྗོན་པ་ལ། །གུས་པའི་ངལ་བ་རིང་དུ་བཏང་། །ཁྱད་པར་ཕྲིན་ལས་ཟིལ་དངར་གྱིས། །བྲན་པས་བྱེ་བའི་པདྨོ་ནི། །འཕགས་མར་གྲགས་པའི་མཚན་ཙམ་ཡང་། །བསོད་ནམས་ས་བོན་གཅིག་ཏུ་གྱུར། །བསྐལ་བཟང་སྒྲོན་མེ་ཇི་སྙེད་ཀུན། །ཐུགས་རྗེའི་སྤྱན་རས་ལས་བྱུང་ན། །བདེ་བར་གཤེགས་པ་ཐམས་ཅད་ཀྱི། །འབྱུང་གནས་ཁྱོད་ལ་སུ་མི་གུས། །ཤིན་ཏུ་བྱམས་པའི་དཔལ་གྱི་དུམ། །ཡིད་སྲུབས་སྙིང་ལ་གདུང་བའི་ཚུལ། །བཅོམ་ལྡན་པདྨ་གར་དབང་སོགས། །གང་འདུལ་མཚན་དང་གཟུགས་སུའང་སྣང་། །
གཞན་ཡང་རྣམ་པར་འཕྲུལ་པ་ནི། །འཕགས་པའི་ཡུལ་དུ་གང་བྱུང་དང་། །དེ་བཞིན་བསིལ་ལྡན་རི་བོའི་ཁོངས། །དུས་གསུམ་ཀུན་ཏུ་ཁྱབ་འཇུག་པས། །ཕལ་ཆེར་ས་ཡི་བདག་པོ་དང་། །ལ་ལར་བཤེས་གཉེན་མཆོག་གི་ཚུལ། །ཁ་ཅིག་ཐ་མལ་ཟོལ་གྱིས་འདིར། །ཕན་པ་སྒྲུབ་པའི་ངོ་མཚར་སྟོན། །དམ་པའི་གྲིབ་བསིལ་སྣུམ་པོ་ཅན། །སཱ་ལའི་ཤིང་ཆེན་རྒྱས་པ་ན། །ཐབས་མཁས་ཡལ་ག་སྐྱེ་ཀུན་ལ། །གདུང་སེལ་སྦྱིན་པའི་མཐའ་མི་མངོན། །ཚངས་པ་དགྱེས་པའི་ཡིད་མཚོའི་རླབས། །སྲིད་འདིའི་སྙན་པ་གཞན་ཡིན་ཏེ། །ཟབ་མོའི་རྒྱུད་དུ་འཕོས་པའི་དབྱངས། །རྒྱ་ཆེའི་ལེགས་བྱས་འདྲ་བ་མེད། །མཐའ་གཉིས་བཅོམ་པའི་རྩོམ་བྱེད་ནི། །གང་གསུང་ཅུང་ཟད་ཐོབ་པའི་མོད། །སླད་ནས་འཕེལ་དང་མངོན་གྱུར་པའི། །ཕན་པ་འབའ་ཞིག་སྒྲུབ་པའང་ལགས། །ཇི་སྙེད་ཤེས་བྱ་ཐམས་ཅད་དང་། །ཤེས་པ་རོ་གཅིག་ཉིད་གྱུར་པས། །འདི་ནི་མཁྱེན་པའི་ཡུལ་མིན་ཞེས། །ཕྲ་མོ་ཙམ་ཡང་མ་དམིགས་ཕྱིར། །སྤྲོས་པའི་སྦྱོར་བས་མི་བཟོད་པའི། །སྤྲོས་པ་དུ་མའི་སྒེག་འཆང་བས། །སྤྲོས་པའི་ཁྱོགས་ལ་བསྟེན་པ་རྣམས། །སྤྲོས་བྲལ་ལམ་དུ་བདེར་འཇུག་མཛད། །བསམ་ཀུན་ཡོངས་སུ་རྫོགས་མཛད་པ། །ཡོན་ཏན་ལྗོན་པ་ཁྱོད་བཞུགས་བཞིན། །རྨོངས་པས་བཅོམ་པའི་སློང་བ་པ། །ཕལ་ཆེར་གཞན་དུ་རེ་བས་བསླུས། །
རིགས་ཀྱིས་དགེ་བའི་སྐལ་བཟང་ལ། །རབ་དགྱེས་འབྲས་བུས་འབྱོར་པའི་ཕུལ། །ཡིད་བཞིན་ནོར་བུའི་མཚན་གྱིས་ཀྱང་། །མཆོག་ཏུ་མཛེས་པར་བྱས་པ་བཞིན། །སྨན་མཛད་ཁ་བའི་འཛུམ་ལྡན་པའི། །རྟག་པ་དམ་པའི་གངྒཱ་ཡི། །ཕྲིན་ལས་འགྲོ་གསུམ་ཉོན་མོངས་ཀྱི། །གདུང་བ་བསལ་སླད་ཡུན་རིང་རྒྱུ། །འཇུག་ངོགས་མཆོག་དེར་ཞུགས་པ་རྣམས། །རྙོག་པའི་དྲི་མ་རབ་བཀྲུས་ནས། །འདི་དང་གཏན་དུ་བདེ་བ་ཡི། །ལང་ཚོའི་མཚར་སྡུག་ཅིར་ཡང་དར། །མདོར་ན་རྡུལ་བྲལ་སྟོང་པའི་བཞིན། །སྙིང་རྗེའི་ཆགས་ཚོན་འཛིན་མཛད་པའི། །སྒྱུ་འཕྲུལ་དྲྭ་བའི་མིག་འཕྲུལ་ཚུལ། །མཐའ་དག་སུ་ཡིས་བརྗོད་པར་ནུས། །འོན་ཀྱང་རབ་དྭངས་སྙན་ངག་མཁན། །བྱེ་བ་ཕྲག་བརྒྱའི་བསྟོད་ཚིག་གི །ཆུ་ཀླུང་བར་མེད་འཐུང་བཟོད་པ། །ཁྱོད་ཀྱི་རྣམ་ཐར་རྒྱ་མཚོར་མཚུངས། །ཚངས་དབང་བིཥྛ་དྲག་པོ་ལ་སོགས་སྲིད་ན་ཆེ་རྒུའི་ཚོགས་རྣམས་ཀྱིས། །འདར་བཅས་ཐོར་ཚུགས་དུད་པའི་ཕྱག་གིས་ཞབས་ཀྱི་པདྨོ་མཆོད་བྱེད་ཅིང་། །སྟོབས་བཅུ་མངའ་བ་སྲས་དང་བཅས་པ་གཅིག་ཏུ་དགྱེས་པའི་དཔྱིད་དཔལ་ལས། །བསྔགས་བརྗོད་མེ་ཏོག་སར་པའི་གྲུ་ཆར་ཉིན་བཞིན་འབེབས་པའི་ངོ་མཚར་བཟུང་། །དེ་ལྟའི་གྲགས་དཀར་ནོར་བུའི་ལྡིང་། །རིང་ནས་རྣ་བའི་རྒྱན་གྱུར་པ། །གུས་བཅས་དོན་མཐུན་གཞོན་ནུ་ཞིག །ཡང་དང་ཡང་དུ་འདི་ལྟར་
རྟོག །ཀྱེ་མ་འཇིག་རྟེན་ཐམས་ཅད་ཀྱི། །ཡབ་གཅིག་ལྷག་པར་གངས་ཅན་འགྲོར། །སྡུག་པའི་བུ་ལ་མ་ཡིས་བཞིན། །མགོན་ཁྱོད་བརྩེ་བས་ཐུགས་རབ་བརླན། །དེ་ལྟ་ལགས་ན་རང་ཉིད་དང་། །རྗེས་སུ་མཐུན་པ་གཞན་ཡང་རུང་། །ཤིན་ཏུ་ཉམ་ཐག་འཁོར་བའི་མཚོར། །ཕ་མཐའ་མེད་པར་འཁྱམས་པ་ཡིས། །ཅུང་ཟད་སྐྲག་པས་བཞིན་གྱི་མདངས། །ཉི་མས་བཅོམ་པའི་ཀུ་མུད་བཞིན། །འཕགས་པ་འཕགས་པ་དགོངས་མཛོད་ཅེས། །སྨྲེ་སྔགས་ཙམ་ཞིག་ལྷག་མར་ལུས། །སླར་ལ་ཡིད་ཀྱི་རྡོ་བའི་ངོས། །དྲན་པའི་གཟོང་གིས་བཀོད་བྱས་པའི། །རི་མོ་འགའ་ཞིག་མི་ཕྱེད་པས། །ཤུགས་རིང་དང་བཅས་འདི་སྐད་སྨྲེངས། །དེང་ཚེ་སྙིགས་མར་གྱུར་པ་རྣམས། །ཚུལ་མིན་ལས་ལ་ཞུགས་པ་ནི། །ཡིད་སྲུབས་རྣམ་འཕྲུལ་རྒྱས་པ་ཡི། །དཔྱིད་ཀྱིས་བཟུང་བའི་འཇུག་ངོགས་བཞིན། །སླ་ཡང་དམ་པའི་སྤྱོད་པ་མིན། །༤ ངལ་བར་བཅས་ཀྱང་སྡིག་པའི་ཁུར། །དཀའ་ཐུབ་ལྟ་བུར་བསྟེན་པ་ཡིས། །ཕལ་ཆེར་ཉིན་དང་མཚན་དུ་གཡེངས། །འགའ་ཞིག་ཁྱིམ་གྱི་སྲེད་པས་ཏེ། །ལ་ལ་ཆོས་ལྟར་བཅོས་པས་བསླུས། །གཞན་དག་ཅི་ཡང་མ་ཡིན་པའི། །སྙོམས་ལས་ཁོ་ནའི་མལ་དུ་མནལ། །འབྱོར་ན་དྲེགས་པས་རབ་ཏུ་ཁེངས། །དབུལ་ཚེ་ཞུམས་པས་སྐབས་མི་དབྱེ། །བར་མ་ཙམ་དུ་བདེར་གནས་ཀྱང་། །ཆོག་ཤེས་མེད་པས་རང་
ཉིད་བཅོམ། །སྙན་པ་སྒྲོགས་ན་ང་རྒྱལ་སྐྱེ། །སྨད་ན་ཁྲོ་བའི་མེ་ཆེན་འབར། །མ་སྨྲས་བསམ་པ་ཚིམ་མིན་ཕྱིར། །ཁྱོད་ལ་དགའ་བ་ཇི་ལྟར་སྐྱེ། །མཛའ་བར་གྱུར་ན་ཆགས་པ་དང་། །མཁོན་ལ་སྡང་བས་ཡིད་མྱོས་ཤིང་། །བཏང་སྙོམས་ཚུལ་གྱིས་གནས་པ་ཡང་། །རྨོངས་པའི་རྒྱ་ལས་འདའ་བ་མེད། །ཐོས་བརྩོན་སྦྱིན་པ་སྲོག་བཞིན་བསྲུང་། །ཚུལ་ཁྲིམས་བཟོད་པ་རྩྭ་ལྟར་བཏང་། །བསམ་གཏན་ཤེས་རབ་ད་དུང་ཚུལ་འཆོས་ཁོ་ནས་སྙེམས། །དམན་ལས་དམན་པའི་བྱིས་པ་དང་། །ཁྱད་པར་ཅུང་ཟད་མ་བྱས་བཞིན། །བདག་ཉིད་ཁོ་ན་མཆོག་འདོད་པའི། །རློམ་སེམས་ཚངས་པ་ལ་ཡང་ཅི། ཟློ མདོར་ན་འཕགས་པ་དགྱེས་པའི་ཡུལ། །མཐའ་དག་བདག་ལ་ཁྲོ་བ་ཡིས། །རྨི་ལམ་དུ་ཡང་མི་མཛའ་ན། །ད་ནི་ཇི་ལྟར་འགྱུར་ཞེ་ན། །གློག་གི་ཐག་པ་གཡོ་བ་ལས། །ཆེས་ག་མྱུར་བའི་འཚོ་བའི་རྒྱུན། །ནམ་ཞིག་ཆད་པའི་དེ་མ་ཐག །དམྱལ་མེ་བཟོད་དཀས་ངེས་པར་བསྲེགས། །དེ་ཚེ་བདག་གི་མགོན་པོ་ཁྱོད། །འབྲས་བུའི་ཆུ་ཀླུང་ཟློག་པ་ལས། །ད་ལྟ་སྡིག་པའི་ས་བོན་འདི། །ཉམས་པར་མཛད་ན་ཅི་མ་རུང་། །འོན་ཀྱང་ལས་ལ་དགོངས་མཛད་ན། །ལས་དང་བྲལ་ཚེ་བདག་ལ་ཅི། །གལ་ཏེ་བཏང་སྙོམས་མཛད་སྲིད་ན། །ཐུགས་རྗེ་ཆེ་ཞེས་མིང་ཙམ་ཟད། །དེ་འདྲའི་རྟོག་པས་བསྣུན་པ་བདག །སྐྱབས་གཞན་
འཚོལ་ན་རང་ཉིད་བརླག །གང་ཕྱིར་ངེས་པར་ཁྱོད་མཁྱེན་ཅེས། །གསོལ་བ་འདེབས་ལས་མ་མཆིས་པས། །དེ་སླད་གདུང་བས་རྐང་སེན་ནི། །དཔག་བསམ་དབང་པོ་ཁྱོད་ཀྱི་ཕྱོགས། །མི་ནུས་བཞིན་དུ་འཛེགས་པ་ལ། །སློང་བའི་མཆོག་འདི་སྦྱིན་པར་འོས། །ཐོག་མར་བྱིན་རླབས་བེཟླུརླས། །བློ་མཚོའི་རྙོག་མ་ཀུན་བགྲུངས་ནས། །དད་དང་ངེས་པར་འབྱུང་བ་ཡི། །གཟུགས་བརྙན་འཆར་རུང་གནས་སུ་སྒྲུབས། །གང་ན་ཚུལ་ལ་འཇུག་པའི་ཁྲིམས། །སྙིང་པོས་གལ་ཏེ་མ་བཟུང་ན། །འཚོ་བ་ཙམ་ཡང་དོན་མེད་ཕྱིར། །བསླབ་གཞིའི་དབྱིག་གིས་ལྕི་བ་དང་། །དེ་ཡི་འགྲམ་ངོགས་ཡིད་དགའ་བར། །མང་དུ་ཐོས་པའི་སཱ་ལའི་ཚལ། །བསམ་བྱུང་འཁྲུལ་མེད་མེ་ཏོག་གིས། །འཁྱུད་པའི་གནས་སྐབས་ཐོབ་པར་མཛོད། །སྔོན་ཆད་རང་གི་ཆེད་དུ་ཡང་། །མ་མྱོང་རིན་ཆེན་བྱང་ཆུབ་སེམས། །ད་ནི་མཁའ་མཐས་གཏུགས་པ་ཡི། །འགྲོ་རྣམས་བསྒྲལ་སླད་བདག་ལ་འཚལ། །དེ་བཞིན་ཕུན་སུམ་ཚོགས་པའི་ཕུལ། །བཏང་བའི་སྙིང་སྟོབས་རབ་རྫོགས་པའི། །ནོར་བུའི་རྔ་ཡབ་གཡོབ་པ་ཡིས། །ཡིད་ཅན་དབུགས་འབྱིན་བགྱིད་པའང་སྩོལ། །ཉེས་སྤྱོད་རྡུལ་དང་མི་མཛའ་བའི། །རྣམ་དཀར་དཔྱིད་ཀྱི་རླབས་འཐུང་སྟེ། །གཞན་ཕན་པདྨོ་དར་བབས་པའི། །སྐལ་བཟང་མངོན་སུམ་ཉིད་གྱུར་ཅིག །ཡུལ་གྱི་ཁྲོ་བ་ནམ་མཁའ་
བཞིན། །ཕ་མཐའ་གཞལ་གྱིས་ག་ལ་ལང་། །དེ་སླད་ཡུལ་ཅན་རང་གི་སེམས། །བཟོད་པའི་བདུད་རྩིས་བརླན་པར་མཛོད། །ཤིན་ཏུ་རྙེད་དཀའི་གོ་འཕང་མཆོག །བརྩོན་ལྡན་ལག་པའི་མཐིལ་དུ་གནས། ། འདི་ལྟར་རྟོགས་ནས་རྣམ་ཀུན་ཏུ། །བྱང་ཆུབ་བསྒྲུབ་ལས་ཉམས་མ་གྱུར། །ཐུབ་པས་བསྟེན་པའི་ནགས་ཚལ་དུ། །བསམ་གཏན་མྱ་ངན་མེད་པའི་དཔལ། །ཡིད་སྲུབས་མཚོན་གྱིས་མི་འཁྲུགས་པས། ། གཟུགས་དང་མངོན་ཤེས་མཚར་སྡུག་རྫོགས། །དེ་ཚེ་ཆོས་རབ་རྣམ་འབྱེད་ཀྱིས། །གཟུང་འཛིན་སྤྲོས་པ་བཏང་གྱུར་ཀྱང་། །སྙིང་རྗེས་གཞན་དབང་མི་བཏང་བ། །འཕགས་པ་ཁྱོད་བཞིན་མཛད་དུ་གསོལ། །བདག་གི་ལེགས་སྤྱད་ཅི་མཆིས་པ། །ཡིད་ཅན་རྣམས་ཀྱི་ཉེར་འཚོར་གྱུར། །དེ་དག་ཉེས་ཀུན་བདག་སྨིན་པས། །ཡེ་ཤེས་གཟིགས་ལའང་འཇུག་པར་མཛོད། །ཇི་ལྟར་བཙུན་པ་ཟླ་བ་སོགས། །མངོན་སུམ་ཉིད་དུ་རྗེས་བཟུང་བ། །དེ་བཞིན་འདིར་ཡང་བསོད་ནམས་ཀྱི། །དགེ་མཚན་རྫོགས་པའི་བཀའ་དྲིན་སྩོལ། །གཞན་ཡང་དད་པས་འདུད་པའམ། །གཤེའམ་མི་སྙན་བརྗོད་ཀྱང་རུང་། །འབྲེལ་བས་བསྡུས་པ་ཇི་སྙེད་ཀུན། །བྱང་ཆུབ་སྙིང་པོར་སྟན་གཅིག་ཤོག །ཅེས་འདི་ངེས་པར་བདག་གི་བློ། །མ་སྤྱངས་སྨྲ་བར་མི་འོས་ཤིང་། །འགྲོ་ཀུན་གནས་སྐབས་ཇི་ལྟ་བར། །ཁྱོད་ཀྱིས་གཟིགས་ལ་སྒྲིབ་མེད་ཀྱང་། །
རང་ཉིད་རང་གི་སྤྱོད་ཚུལ་ལ། །ཤིན་ཏུ་ཡིད་འབྱུང་རྒྱས་པའི་ཚིག །གདུང་བས་ཉེན་ལ་ཙནྡན་ཆུས། ཕན་པ་བསྒྲུབས་པའི་རྗེས་སུ་འགྲོ། །དེ་སླད་ཅུང་ཟད་ཙམ་ཞིག་གསོལ་བ་ལ། །སྙིང་རྗེའི་བདུད་རྩིས་བརླན་པའི་སྤྱན་རས་ཀྱིས། །རྟག་ཏུ་གཡོ་བ་མེད་པར་རིང་གཟིགས་ནས། །བྱང་ཆུབ་བར་དུ་དགེ་བའི་བཤེས་སུ་མཛོད། །ཇི་སྲིད་སྲོག་དང་བཅས་པའི་ཚེ་ན་འཕགས་རྣམས་བསྔགས་འོས་བསོད་ནམས་སྒྲུབ་པ་དང་། །འཇིག་རྟེན་མགོན་པོའི་རྣམ་པར་ཐར་པ་ཡང་ཡང་ཡིད་ལ་གོམས་པའི་ལེགས་བྱས་ཀྱིས། །ནམ་ཞིག་དུས་ཀྱིས་བཟུང་བའི་མོད་ནས་གྲུ་འཛིན་ཚལ་གྱི་གྲིབ་བསིལ་ཉམས་དགའ་བར། །རྒྱལ་བའི་སྲས་ཀྱི་མེ་ཏོག་གསར་དུ་དགོད་པའང་ས་གསུམ་སྨན་སླད་ཉིད་གྱུར་ཅིག །འདི་ལྟར་འཕགས་པའི་ཡོན་ཏན་ལ་སྙིང་ཐག་པ་ནས་དད་ཅིང་། རང་གཞན་གྱི་སྙིགས་མའི་སྤྱོད་ཚུལ་ལ་ཡིད་ངེས་པར་འབྱུང་བའི་བདུད་རྩིས་བརླན་པའི་ཚིག་གི་ཨུཏྤལ་ཅུང་ཟད་ཅིག་གང་ཤར་གྱི་སོར་མོས་མགྱོགས་པར་བཏུས་ཏེ་གྲུ་འཛིན་རི་བོའི་བདག་པོ་མངོན་སུམ་བཞིན་ཡིད་ལ་བཀོད་ནས་ཞབས་ཀྱི་པདྨོར་གཏོར་བས་དྲང་སྲོང་གྲུབ་པའི་རྣ་རྒྱན་དུ་གྱུར་ཏེ་དེ་དེ་བཞིན་དུ་གྱུར་ཅིག་ཅེས་རྗེས་སུ་དགོངས་པར་མཛད་པས་འཇིག་རྟེན་ཐམས་ཅད་ཕན་པ་དང་བདེ་བའི་ཉེར་འཚོ་བླ་ན་མེད་པར་སིདྡྷིར་སྐུ། །ཞེས་འཇམ་དཔལ་དབྱངས་མཁྱེན་བརྩེའི་དབང་པོས་སོ། །སརྦ་ད་ཀ་ལྱཱ་ཎཾ་བྷ་བ་ཏུ།། །།འཇིག་རྟེན་དབང་ཕྱུག་སྙིང་རྗེའི་ཟླ་བ་ལ་གསོལ་བའི་ཚིགས་སུ་བཅད་པ་བདུད་རྩིའི་
པདྨོ་ཞེས་བྱ་བ། ན་མོ་ལོ་ཀ་ནཱ་ཐཱ་ཡ། དགེ་ལེགས་བདུད་རྩིའི་སྣང་བ་ཡིས། །ཕན་བདེའི་ཆུ་གཏེར་རྒྱས་མཛད་པ། །འཕགས་མཆོག་སྙིང་རྗེའི་ཟླ་བ་ཡིས། །རྟག་ཏུ་ཤིས་པ་སྦྱིན་གྱུར་ཅིག ༡ །སྤྱན་རས་གཟིགས་ཞེས་མཚན་ཙམ་གྱི། །རིན་ཆེན་གང་གིས་འཆང་བ་ཡང་། །སྲིད་ཞིའི་དབུལ་བ་མཐར་མཛད་པས། །བྱང་ཆུབ་བར་དུ་དགྱེས་པས་སྐྱོངས། ༢ །ཐར་པའི་མཆོག་དང་རྣམ་དཔྱོད་བློ། །རིང་འཚོའི་ཚེ་དང་འབྱོར་པའི་ཕུལ། །སྐལ་བཟང་ཀུན་དགའི་འདོད་འཇོ་བ། །ཕྱག་ན་པདྨོས་བཟུང་གྱུར་ཅིག ༣ །སུ་ཞིག་ངན་སོང་འཁོར་བ་ལས། །མཐོ་རིས་མྱང་གྲོལ་ལ་འགོད་ཅེས། །དུས་གསུམ་ཐུགས་རྗེས་དགོངས་པའི་གཉེན། །སྤྱན་རས་གཟིགས་དབང་འགྲུབ་པར་ཤོག ༤ །དེ་མཐུས་བདག་དང་མཁའ་མཉམ་གྱི། །ཡིད་ཅན་རྒྱ་མཚོའི་རྡུལ་སྙེད་ཀུན། །འཕགས་པའི་ཐུགས་རྗེའི་ཕྱག་བརྐྱངས་ཏེ། །བདེ་ཆེན་ཞིང་དུ་འཁྲིད་གྱུར་ཅིག ༥ །དེར་ནི་འོད་མཐའ་ཡས་པ་དང་། །འཕགས་མཆོག་དགྱེས་པས་བཤེས་མཛད་ནས། །སྐད་ཅིག་རེར་ཡང་བསམ་ཡས་ཀྱི། །གཟུངས་དང་ཏིང་འཛིན་ཐོབ་པར་ཤོག ༦ ། འཁོར་བའི་ཚུ་རོལ་མི་གནས་ཤིང་། །མྱང་འདས་ཕ་རོལ་གཞོལ་མིན་པར། །དབུ་མའི་ལམ་ནས་འཇིག་རྟེན་གྱི། །མགོན་པོ་མྱུར་དུ་འགྲུབ་གྱུར་ཅིག ༧ །འཕགས་པ་འཇིག་རྟེན་དབང་ཕྱུག་སྙིང་རྗེའི་ཟླ་བ་ལ་གསོལ་བའི་ཚིགས་སུ་བཅད་པ་འདིའང་། མ་ཎི་བ་མཉྫ་གྷོ་ཥས་གྲུ་འཛིན་བདག་པོ་དྲན་པའི་སྐད་ཅིག་ལ་བྲིས་ཏེ་གསོལ་བ་བཏབ་པ་སིདྡྷི་རསྟུ། །
འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པ་གཞན་ཕན་ཀུནྡའི་ཕྲེང་བ།
འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པ་གཞན་ཕན་ཀུནྡའི་ཕྲེང་བ་ཞེས་བྱ་བ། ན་མོ་མ་ཧཱ་བོ་དྷི་ས་ཏཱ་ལོ་ཀཱི་ཤྭ་རཱ་ཡ། ཀ་ཀུ་བྷ་ཡི་འདབ་མ་ཇི་བཞིན་མཁྱེན་བརྩེའི་སྤྱན་རས་རབ་བཀྲ་བས། །ཁ་བ་ཅན་ལྗོངས་འགྲོ་ལ་རྟག་གཟིགས་ལྷན་ཅིག་མཚན་དཔེའི་དཀྱིལ་འཁོར་ཀྱང་། །ག་བུར་འཛིན་པ་གསར་པའི་ལང་ཚོས་ཐར་པའི་ཀུ་མུད་བཞད་པ་དང་། །ང་བདག་གཟུང་འཛིན་འཁྲུལ་པའི་ཆུ་སྐྱེས་ཟུམ་པར་བྱས་ཏེ་དྭང་བས་འདུད། ༡ །ཅ་ཅོ་རྣམ་སྤངས་འགོག་བདེན་དོན་དམ་གདོད་མའི་ནགས་སུ་ཉེར་གཟིམས་ཀྱང་། །ཆ་མེད་སྡུག་བསྔལ་གསུམ་གྱིས་གཟིར་ལ་སྙིང་རྗེ་ཆེན་པོས་རབ་གཟིགས་ཏེ། །ཇ་ཧོང་ལས་ལྡོག་རྣམ་པར་དཀར་བའི་ལམ་བདེན་མུ་ཏིག་དོ་ཤལ་མཆོག །ཉ་ལྕིབས་ཇི་བཞིན་གསུང་གསང་བརྗོད་བྲལ་ནཱ་དའི་ཁམས་ཀྱིས་སྦྱིན་དེར་འདུད། ༢ །ཏཱ་ལའི་ཕྲེང་བས་ཡོངས་སུ་བསྐོར་བའི་གྲུབ་པའི་ས་འཛིན་པོ་ཏ་ལ། །ཐ་གྲུ་མི་མངོན་གཞལ་དཀའི་རྒྱན་གྱིས་རྣམ་པར་མཛེས་པའི་ཕོ་བྲང་དབུས། །ད་དུང་ཆགས་པའི་རྩེ་དགའ་མིན་ཀྱང་རིག་འཛིན་ཌཱ་ཀི་བྱེ་བ་ཡིས། །ན་མར་ཁྱོད་ཞབས་པདྨོའི་གེ་སར་ཐོར་ཚུགས་རྒྱན་དུ་རོལ་དེར་འདུད། ༣ །པ་སངས་གསར་པའི་འོད་ཀྱིས་མ་བཏབ་བྱང་ཆུབ་སེམས་མཆོག་བདུད་རྩི་ཡིས། །
ཕ་རོལ་ཕྱིན་ལམ་སྤྱོད་པ་རྒྱ་མཚོའི་ཡོངས་འདུས་དབང་པོར་བྲན་གྱུར་པས། །བ་ཀུ་ལ་ཡི་འདབ་རྒྱ་ཇི་བཞིན་བྱང་སེམས་པདྨོ་བཞད་པ་ལས། །མ་དཱ་ན་ལྟར་ཐུགས་རྗེའི་རོ་ཡིས་ཐར་མཆོག་ལང་ཚོ་སྦྱིན་དེར་འདུད། ༤ །ཙ་མ་ར་ལྟར་ཁེངས་དང་དྲེགས་ལྡན་འཇིག་རྟེན་བྱེད་པོ་སྦྲང་རྩིའི་བུ། །ཚ་གྲང་དཔལ་གྱིས་གཞན་སྲོག་གཅོད་བྱེད་འབོད་སྒྲོགས་འབྱུང་པོའི་སྡེ་ཚོགས་ཀྱང་། །ཛཱ་ཏིའི་པདྨོ་གསར་པ་བཞད་ལྟར་ཀུན་ཏུ་ཞི་བའི་སྙིང་རྗེའི་མཐུས། །ཝ་བཞིན་རབ་ཞུམས་ཁྱོད་ཀྱི་ཞབས་སེན་ཐོར་ཚུགས་རྒྱན་དུ་རོལ་དེར་འདུད། ༥ །ཞྭ་ཐོད་དར་གྱི་ཕོད་སྲོང་བཙན་སྒམ་པོ། ཀ་དཀྲིས་པའི་འཇོ་སྒེག་སྟུག་པོར་ཆགས་མིན་ཡང་། །ཟ་མ་ཏོག་ལྟར་ཤེས་བྱ་ཀུན་བསྡོམས་བརྩེ་ཆེན་སྣང་བའི་མུ་ཁྱུད་ནི། །འ་ཅག་སྐྱེ་བའི་འཁྲི་ཤིང་བཟུང་གནས་གངས་ཅན་གླིང་དུ་བསྐོར་བའི་ཚེ། །ཡ་བྲལ་དགེ་སྡིག་འཆོལ་བར་སྤྱོད་པའི་མུན་པའི་དཔུང་ཚོགས་སྨད་དེར་འདུད། ༦ །རྭ་ལྟར་རྡུལ་བྲལ་རྟག་ཆད་སྤྲོས་པའི་མཐའ་དང་མི་མཛའ་སྟོང་པ་ཉིད། །ལ་ལ་ཙམ་མིན་ཀུན་ཁྱབ་སྙིང་རྗེའི་ལང་ཚོ་མཆོག་དེར་རབ་ཆགས་པས། །ཤ་ཀུ་ན་ཚོགས་མཁའ་ལ་རོལ་བཞིན་འགྲོ་དོན་ཐོགས་མེད་རྟག་སྤྱོད་ཕྱིར། །ས་བཅུར་ངལ་བསོའི་བྱང་སེམས་ཚུལ་འཛིན་རྒྱལ་རྣམས་ཀུན་པདྨ་དཀར་པོ་སོགས་ཀྱིས་གསལ་ལོ། །གྱིས་བསྔགས་དེར་འདུད། ༧ །ཧ་རིའི་ཙནྡན་རེག་བྱས་མི་མཚོན་ཁྱོད་མཚན་
ཀཏཱུར་དབང་པོའི་རྒྱུན། །ལུས་ཅན་གང་ཞིག་ཐོས་པ་འཛིན་པའི་ཀུནྡའི་བཏུང་བར་འཇོ་ཙམ་གྱིས། །བརྒྱད་གཉིས་འཇིགས་བཅས་ཚ་གདུང་བསལ་པད་དཀར་ལས་བསྟན། དང་བདེ་བའི་ལང་ཚོ་ལ་སྦྱར་ན། །ཨ་ལ་ལ་ཞེས་ངོ་མཚར་བཞད་སྒྲས་ནོར་འཛིན་ཁམས་འདིའང་གཡོ་བ་བཞིན། ༨ །དེས་ན་རྟག་ཏུ་ཁྱོད་ལ་རབ་དད་དྲི་བཞོན་གཡོ་བའི་ཕོ་ཉ་ཡིས། །གང་ཐུགས་སྙིང་རྗེའི་སྤྲིན་དཀར་བསྲུབས་ལས་མཁྱེན་བརྩེའི་བདུད་རྩིའི་གྲུ་ཆར་གྱིས། །སྡུག་བསྔལ་མེ་ཚོགས་མཐའ་དག་མནལ་དང་ཆབ་གཅིག་མངོན་མཐོའི་ཨུཏྤ་ལ། །ཡིད་འོང་འགུགས་པས་འགྲོ་ཀུན་བདེ་བའི་དགའ་སྟོན་མཆོག་ལ་སྦྱོར་གྱུར་ཅིག ༩ ། ཁྱད་པར་སྲོག་ཀྱང་གཞན་དོན་ལ་དོར་གཅིག་ཏུ་བརྟན་པའི་དམ་བཅའ་ཡིས། །ཞི་བའི་གོ་ཆས་འཛམ་བུའི་གླིང་དུ་ཁྱོད་འདྲེན་མཉེས་པར་བགྱིད་བཞིན་དུ། །བདག་ཀྱང་སྐྱེ་ཀུན་འགྲོ་བ་སྒྲོལ་བའི་དམ་བཅའ་གཡོ་མེད་བརྟན་གྱུར་པས། །འཕགས་པ་དགྱེས་པའི་འཛུམ་ཞལ་གཡོ་བས་ལུང་བསྟན་དབུགས་དབྱུང་ཐོབ་གྱུར་ཅིག ༡༠ །ཤིན་ཏུ་དབེན་པའི་ཤིང་དྲུང་དག་ཏུ་མི་སྨྲ་ཙོག་པུར་འདུག་བྱས་ཏེ། །དག་བྱེད་རྒྱུན་གྱི་ཁྲུས་ལ་འཇུག་ཅིང་ཀུ་ཤ་གསར་པའི་གདན་དང་བཅས། །དཀའ་ཐུབ་དྲག་པོའི་ཕོ་ཉས་བཏབ་པས་ལུས་ཀྱི་འཁྲི་ཤིང་ཉམས་གྱུར་པའི། །དྲང་སྲོང་ཇི་བཞིན་འདིར་ཡང་བྱང་ཆུབ་སྤྱོད་པའི་མཆོག་ལ་འཇུག་
པར་ཤོག ༡༡ །འདོད་པའི་མཛེས་སྡུག་ཨུཏྤལ་དཀར་པོའི་དཔལ་ལ་འགོངས་པའི་ཆུ་ཤེལ་དབང་། །གདུང་སེལ་གངྒཱའི་རྒྱུན་གྱིས་མ་བཀྲུས་རི་དྭགས་གཟུགས་ཀྱིས་སྤུད་པའི་ཟེར། །ཟུར་མིག་བཀྲ་བའི་མཛེས་མས་མ་བཀུག་སྙིང་གི་ཀུ་མུད་ལ་ཆགས་པས། །བདུད་རྩིའི་འགོ་བཤར་ཐིག་པས་བྲན་ལས་འཛུམ་ཕྲེང་དགོད་པའང་ཐོབ་གྱུར་ཅིག ༡༢ །དེ་ལྟར་གུས་པའི་ཡིད་ལས་རབ་སྐྱེས་གསོལ་འདེབས་ཚིག་གི་དར་ཤམ་རྩེར། །རྣམ་པར་དགེ་བའི་ཙིནྟ་མ་ཎི་འོད་ཟེར་ཕུང་པོ་རབ་འབར་བས། །གནས་སྐབས་མཐར་ཐུག་ཕན་དང་བདེ་བའི་འབྱོར་པའི་དབྱིག་གིས་ཕྱུག་གྱུར་ཏེ། །བླ་ན་མེད་པའི་བྱང་ཆུབ་མཆོག་གི་གྲིབ་བསིལ་མཆོག་ཏུ་བསྟི་བར་ཤོག ༡༣ །དེ་ལྟར་འཕགས་པ་སྤྱན་རས་གཟིགས་དབང་ཕྱུག་ལ་བསྟོད་པའི་རབ་ཏུ་བྱེད་པ་ཡི་གེའི་མ་མོ་ལ་སྤེལ་བ་འདི་ཡང་གཞོན་ནུ་ཨ་བྷཱ་ཡས་ཆོ་འཕྲུལ་ཟླ་བའི་ཐུན་མཚམས་ལ་གསོལ་བ་བཏབ་པ་ཛ་ཡནྟུ། །
གསང་བའི་བདག་པོ་ལག་ན་རྡོ་རྗེ་ལ་བསྟོད་པ་གྲུབ་གཉིས་ཕན་བདེའི་དཔལ་སྟེར་ནོར་བུའི་ཕྲེང་བ།
གསང་བའི་བདག་པོ་ལག་ན་རྡོ་རྗེ་ལ་བསྟོད་པ་གྲུབ་གཉིས་ཕན་བདེའི་དཔལ་སྟེར་ནོར་བུའི་ཕྲེང་བ་ཞེས་བྱ་བ། །ན་མོ་བུདྡྷ་གུ་ཧྱ་བཛྲ་པཱ་ཎི་ཡེ། ཀཱ་ཧ་ཀཱ་ཧ་དགོད་པའི་སྟོབས་ཅན་འབྱུང་པོ་ཀུན་ལ་ཆེར་ཁྲོས་ཞལ། །ཁ་ཙམ་མ་ཡིན་གུས་པས་རབ་བསྒྲུབས་རྗེས་སུ་ཞུགས་པའི་རྣལ་འབྱོར་ལ། །ག་བུར་དབང་པོའི་རྡུལ་ཕྲེང་ལས་ལྷག་གྲུབ་གཉིས་བདུད་རྩིའི་བགོ་བཤར་གྱིས། །ང་བདག་གཟུང་འཛིན་ཚ་གདུང་ཀུན་བཅིལ་མཆོག་གི་བཅུད་ལེན་སྦྱིན་དེར་
འདུད། ༡ །ཅུ་རེ་འདྲེན་བྱེད་ཕལ་གྱིས་ལྟ་བར་བཟོད་པར་མི་ནུས་གཟུགས་ཀྱི་སྐུ། །ཆ་ཡིས་ཆ་ཡང་གཞལ་བར་རབ་དཀའ་གནམ་སྔོན་བཞུ་བའི་ལང་ཚོ་ཅན། །ཇ་རིལ་སྐྲ་ཅན་ཚོགས་ཀྱང་འཇིགས་མཛད་རྡོ་རྗེ་དྲིལ་བུས་མཚན་པའི་ཕྱག །ཉ་རྒྱས་ཟླ་བའི་དཔལ་ཡོན་འཕྲོག་ལྟའི་གཟི་བྱིན་མཚུངས་མེད་ལྡན་དེར་འདུད། ༣ །ཏ་ཐཱ་ག་ཏས་ལེགས་པར་གསུངས་པའི་སྡེ་སྣོད་གསུམ་དང་རྒྱུད་དོ་ཅོག །ཐ་དད་མོས་པའི་རྗེས་སུ་འགྲོ་བས་བསམ་གྱིས་མི་ཁྱབ་གསང་བ་ཀུན། །ད་ལྟ་མ་འོངས་འདས་པའི་དུས་ནི་ཁྱོད་ཀྱི་སྒྱུ་འཕྲུལ་ཁོ་ན་ཡིན། །ན་མར་སྡུད་པའི་མཐུ་སྟོབས་མངའ་ཞེས་བདེན་པར་ལག་ན་རྡོ་རྗེའི་དབང་བསྐུར་བའི་རྒྱུད་སོགས་ནས་བསྟན། གསུངས་དེར་རབ་ཏུ་འདུད། ༤ །པ་ར་མི་ཏ་ཀུན་གྱི་དེ་ཉིད་རྣམ་ཐར་སྒོ་གསུམ་ཡེ་ཤེས་ནི། །ཕ་རོལ་ཚུ་རོལ་མཐའ་ལ་མི་གནས་བསམ་སྤྱོད་ལས་འདས་སྤྲོས་བྲལ་དོན། །བ་མཆོག་དགོས་འབྱུང་གཏེར་ལས་ལྷག་པའི་མཁྱེན་བརྩེའི་རང་གཟུགས་དང་འགྲོགས་པས། །མ་ལུས་རྒྱལ་ཀུན་ཐུགས་ཀྱི་ཐིག་ལེར་རོ་གཅིག་བཟླུམས་པ་ཁྱོད་ལ་འདུད། ༥ །ཙ་མ་ར་ལྟར་ཁེངས་པའི་སེམས་ལྡན་སྣ་ཚོགས་གནོད་སྦྱིན་འབྱུང་པོའི་སྡེ། །ཚ་ཟེར་ཅན་བཞིན་སྲིད་འདིར་རབ་གྲགས་ཚངས་དབང་བདེ་འབྱུང་གོ་བིན། །ཛཱ་ཏིའི་མེ་ཏོག་གཞོན་ནུ་ལྟར་སྡུག་ཡིད་སྲུབས་སྒེག་མོའི་ཚོགས་རྣམས་ཀྱང་། །ཝ་ལྟར་རབ་
ཞུམ་ཞབས་ཀྱི་འཁོར་ལོར་སྤྱི་བོའི་བསྟི་སྟང་བསྟབ་ལ་འདུད། ༦ །ཞ་རེངས་དུཝཁའི་འབིགས་བྱེད་རབ་གཡོ་ལག་འགྲོའི་གདེངས་ཀ་ཅན་ལ་སོགས། །ཟ་ལྟར་རྩུབ་པའི་བསམ་སྦྱོར་གདུག་པས་ལུས་ཅན་འཆིང་བའི་དཔལ་ཡོན་གྱིས། །འ་ཅག་འགྲོ་རྣམས་སྡུག་བསྔལ་ལ་སྦྱར་འབར་བའི་སྤྱན་གྱིས་ལྟ་སྟང་གིས། །ཡ་མཚན་མྱུར་དུ་བསྲེག་པར་མཛད་པའི་ཧེ་རུ་ཀ་དཔལ་ཁྱོད་ལ་འདུད། ༧ །རཱ་མ་ཎ་ཡི་ཉག་ཕྲན་སྦྱོར་བས་ལངྒའི་དབང་ཕྱུག་འཇོམས་པ་དེར། །ལ་ལ་ངོ་མཚར་ཆུ་གཏེར་འཕྱུར་ཡང་འདིར་ནི་ཁྱོད་ཀྱི་ཐུགས་རྗེའི་མདས། །ཤ་ཁྲག་བྲལ་བའི་གཟུང་འཛིན་འབོད་སྒྲོགས་འོད་གསལ་དབྱིངས་སུ་བསྒྲལ་བྱས་ཏེ། །ས་བཅུའི་སི་ཏཱ་རྩེ་དགར་རོལ་པའི་རྨད་བྱུང་མཛད་པ་མཆོག་དེར་འདུད། ༨ །ཧྭ་ལའི་ཙནྡན་འཁྲི་ཤིང་གཞོན་ནུའི་ལང་ཚོ་མཛེས་པའི་མཚར་སྡུག་གིས། །བྲལ་བས་ཉེན་པའི་འགྲོན་པོ་དག་ལ་ཀུན་ཏུ་གདུང་བས་བསྐྱེད་པ་ལྟར། །ཨཱ་དན་ལྟར་རབ་དྭངས་སྙིང་རྗེའི་འཛུམ་དཀར་ངོམ་པའི་ཁྱོད་ཐུགས་ཀྱང་། །མི་སྲུན་རྣམས་ལ་འབར་བའི་ཉམས་ཅན་སྣ་ཚོགས་སྒྱུ་འཕྲུལ་རོལ་པར་འདུད། ༩ །འདི་ན་ཚད་མེད་རྟོག་པའི་རྗེས་མཐུན་ལས་ཀྱི་ཆུ་གཏེར་རབ་གཡོ་བར། །བརྒྱད་གཉིས་འཇིགས་པའི་སྣང་ཚུལ་མི་བཟད་ཐུགས་རྗེའི་གྲུ་བོས་བསྒྲལ་ནས་ཀྱང་། །ཚེ་བསོད་དཔལ་འབྱོར་ཤེས་རབ་ལ་སོགས་མངོན་མཐོའི་ནོར་
བུའི་འབྱོར་པ་ཡིས། །རེ་བའི་ཡོལ་གོ་ཕྱུར་བུར་འགེངས་བྱེད་ཐུན་མོང་གྲུབ་པའི་དགའ་སྟོན་སྩོལ། ༡༠ །ཁྱད་པར་སྐལ་བཟང་ཟ་མ་ཏོག་གྱུར་བྲམ་ཟེ་ཆེན་པོ་མདའ་བསྣུན་ཞབས། །མངོན་སུམ་རྗེས་བཟུང་གསང་རྒྱུད་རྒྱ་མཚོའི་དབུགས་དབྱུང་སྩལ་བའི་དེ་མ་ཐག །ཟུང་འཇུག་མཆོག་གི་གོ་འཕང་རོལ་བཞིན་བདག་ཀྱང་ཐུགས་རྗེས་རབ་བསྐྱངས་ནས། །རྟག་ཏུ་ཞལ་གྱི་བདུད་རྩིས་ཉེར་གསོས་སྐུ་བཞིའི་ལང་ཚོ་རྒྱས་མཛོད་ཀྱེ། ༡༡ །དེ་ལྟར་དཔལ་གསང་བ་འཛིན་པའི་བདག་ཉིད་ལག་ན་རྡོ་རྗེ་འཆང་བ་ལ་བསྟོད་པའི་རབ་ཏུ་བྱེད་པ་འདི་ནི་གཞོན་ནུ་ཨ་བྷཱ་ཡས་རང་གཞན་གྱི་དོན་དུ་ཉེ་བར་དམིགས་ཏེ་གང་ཤར་མྱུར་དུ་སྦྱར་བ་ཛ་ཡནྟུ།། །།
རྗེ་བཙུན་སྒྲོལ་མ་ཉེར་གཅིག་ལ་བསྟོད་པ་ཕན་བདེའི་ཨུཏྤལ་གསར་པའི་དོ་ཤལ།
རྗེ་བཙུན་སྒྲོལ་མ་ཉེར་གཅིག་ལ་བསྟོད་པ་ཕན་བདེའི་ཨུཏྤལ་གསར་པའི་དོ་ཤལ་ཞེས་བྱ་བ། ན་མོ་ཨཱརྱ་ཏཱ་ར་ཡེ། སྲས་བཅས་རྒྱལ་བའི་སྤངས་རྟོགས་ནོར་བུའི་མཛོད། །གང་གི་གསང་གསུམ་ཆུ་གཏེར་ལ་ཆགས་པས། །ཕན་བདེའི་འདོད་པ་ཡོངས་སུ་འཇོ་བའི་གཉེན། །རྗེ་བཙུན་སྒྲོལ་མར་བསྟོད་པའི་མེ་ཏོག་འབུལ། ༡ །བྱང་ཆུབ་སྤྱོད་པའི་རིན་ཆེན་གྲུ་བོ་མཆོག །ཚད་མེད་སྙིང་རྗེའི་ཟུར་ཕུད་དང་འགྲོགས་པས། །འགྲོ་རྣམས་སྡུག་བསྔལ་གསུམ་གྱི་འཁོར་མཚོ་ལས། །བསྒྲལ་བར་མཛད་པའི་དེད་དཔོན་སྤྱི་བོར་བསྟེན། ༢ །བེ་ཌཱུར་ལྷུན་པོར་འཁུ་བའི་མཚན་དཔེའི་དཔལ། །གང་གི་དྲན་པ་ཙམ་ནས་བརྒྱད་གཉིས་ཀྱི། །འཇིགས་པའི་མུན་པ་འཕྲོག་བྱས་ངེས་
ལེགས་ཀྱི། །ཐེམ་ཨུཏྤལ། སྐས་དམ་པར་དབུགས་འབྱིན་སྩལ་ལ་འདུད། ༣ །བྱེ་རུ་ཞུན་མའི་རྡུལ་ལྟར་དམར་བའི་སྐུའི། །རབ་གཡོའི་སྤྱན་གྱིས་སྙན་གྲགས་སྤྲིང་ཡིག་གིས། །ས་གསུམ་ཁམས་ཀུན་མཛེས་པར་སྒྲོག་པའི་དཔལ། །སྦྱིན་མཛད་རབ་གཡས་འཁྱིལ་དུང་། ཞི་མྱུར་མ་དཔའ་མོར་འདུད། ༤ །གང་ན་རྨོངས་པའི་མུན་པ་བཟའ་བ་ལ། །ཀུན་ནས་ཆས་པའི་མཚན་དཔེའི་ཟླ་སྣང་གིས། །བློ་མཆོག་ཨུཏྤལ་དཀར་པོའི་འདབ་མའི་ཁ། །གཅིག་ཅར་འབྱེད་མཁས་མེ་ལོང་གི་མཚན། སྒྲ་དབྱངས་ལྷ་མོར་འདུད། ༥ །འཛམ་བུའི་སྙེ་མ་སྨིན་པའི་མདོག་ལྡན་སྐུར། །སྟོང་ཕྲག་ཉི་གཞོན་འཆར་ཀས་འཁྱུད་པའི་འོད། །རབ་གུས་ཆུ་ཟློསྐྱེས་གཞོན་ནུར་ངལ་བསོས་པས། །བསོད་ནམས་མཆོག་གི་འཛུམ་ཕྲེང་སྟེར་ལ་འདུད། རིན་ཆེན། ༦ །མདོག་བཟང་ལྷུན་པོའི་དཔལ་འཛིན་པདྨོའི་ཕྱག །འཆི་མེད་བཅུད་ཀྱིས་གཏམས་པའི་ཀ་ལ་ཤས། །མཚན་པས་བརྟན་གཡོའི་ཚེ་དཔལ་མྱུར་སྡུད་ནས། །སྒྲུབ་ལ་སྦྱིན་མཛད་རྣམ་པར་རྒྱལ་མར་འདུད། ༧ །དམར་སེར་མཚར་སྡུག་སྤྱན་གྱི་ཉི་གཞོན་གྱིས། །དྲེགས་ལྡན་ཨུཏྤལ་གདེངས་ཀར་དམ་འཁྱུད་པས། །ཁམས་གསུམ་ཡིད་དབང་འགུགས་པའི་འཛུམ་ཕྲེང་གིས། །འདོད་དགུའི་དཔལ་སྟེར་རིག་བྱེད་སྒྲོལ་མར་འདུད། ༨ །ཁྲོས་པའི་ཉམས་བརྒྱས་རབ་སྒེག་དམར་ནག་ཞལ། །ཡེ་ཤེས་མེ་དང་མཉམ་པར་སྦྱོར་བའི་
གཟིས། །སྨྱོ་བརྗེད་ཤ་ཟ་གྲིབ་གནོན་འབྱུང་པོའི་གདོན། །ཀུན་ནས་བསྲེག་མཛད་འཇིགས་བྱེད་ཕུར་བུ། ཆེན་མོར་འདུད། ༩ །ཆར་སྤྲིན་ལྟར་གནག་ཆེས་ཆེར་ཁྲོས་པའི་ཕྱག །འབར་བའི་རལ་གྲིས་མཚན་པའི་གཡུལ་ངོ་རུ། །ཆུ་འཁྲིག་གནམ་ལྕགས་མཚོན་ཆའི་འཁྲུལ་འཁོར་དཔུང་། །ཡོངས་སུ་ཕམ་མཛད་གཏུམ་མོ་ཆེན་མོར་འདུད། ༡༠ །རབ་དམར་མིག་སྨན་མདོག་གིས་མདངས་པའི་ཞལ། །ཚ་ཞིང་རྩུབ་པའི་རྡོ་རྗེའི་འོད་ཕྲེང་དང་། །འགྲོགས་པས་ཉོན་མོངས་བདུད་དགྲའི་ཚང་ཚིང་ཀུན། །མྱུར་དུ་བསྲེག་མཛད་གཞན་མི་རྒྱལ་མར་འདུད། ༡༡ །མ་རྒད་རི་བོའི་མདངས་འཛིན་མཛེས་ཞལ་དང་། །རབ་འགྲོགས་རིན་ཆེན་འཁོར་ལོ་གཡོ་བའི་དཔུང་། །ཁྲག་ཁྲིག་འོད་ཟེར་སྣང་བས་འཇིགས་པའི་ཚོགས། །བསལ་མཛད་སེང་ལྡེང་ནགས་ཀྱི་སྒྲོལ་མར་འདུད། ༡༢ །པདྨ་རཱ་གའི་རྡུལ་གྱིས་བྱུག་པའི་སྐུ། །རྒྱལ་མཚན་འཛུམ་ཕྲེང་གཡོ་བས་མཚན་པ་དང་། །ལྷན་ཅིག་བཞད་པ་བརྒྱད་ལྡན་སྔགས་ཀྱི་སྒྲས། །འཇིག་རྟེན་གསུམ་ལས་རྣམ་པར་རྒྱལ་ལ་འདུད། ༡༣ །དམར་སེར་ཞལ་ཅན་གཏེར་གྱི་བུམ་མཚན་ཕྱག །འདོད་དོན་ཅི་དགར་འཇོ་བའི་ཕྲིན་ལས་མཐའ། །ནོར་བུའི་འཁྲི་ཤིང་ལས་ལྷག་སྩོལ་མཛད་པས། །དབུལ་བ་སེལ་མཛད་ནོར་གཏེར་སྒྲོལ་མར་འདུད། ༡༤ །འཛམ་བུ་ནཱ་ད་ཞུན་མའི་མཚན་དཔེའི་འོད། །གང་ལ་
རེག་ན་རྒུད་པའི་མུན་བཅོམ་ནས། །དགེ་མཚན་རྫོགས་ལྡན་གསར་པའི་དཔལ་བེའུའི། །སྣོད་བཅུད་ཕྱུག་མཛད་བཀྲ་ཤིས་སྒྲོལ་མར་འདུད། ༡༥ །དུས་མཐའི་མེ་ལྟར་འབར་ཞིང་རྡོ་རྗེའི་མཚོན། །གདེངས་པ་ཙམ་ནས་ཕས་རྒོལ་རི་བོའི་རྐང་། །མྱུར་བཅོམ་འཆི་མེད་གྲུབ་པའི་ཁང་བཟང་དབུས། །རང་སྡེ་སྲུང་མཛད་མེ་འབར་ཁྲོས་མར་འདུད། ༡༦ །སྲོད་མུན་འཁྲིགས་པའི་མདངས་ལྟར་གནག་པའི་ཞལ། །མེ་འབར་ལོག་འདྲེན་ཚོགས་ལ་དཔའ་བའི་ཁུར། །རྡོ་རྗེའི་གཏུན་ཤིང་གཡོ་བས་སླར་འཇོམས་པའི། །དྲག་ཤུལ་མཆོག་ལྡན་ཁྲོ་གཉེར་ཅན་ལ་འདུད། ༡༧ །ཆུ་གཏེར་རླབས་ཕྲེང་འཕྱུར་བའི་སིམ་པ་འབུམ། །གཅིག་བསྡུས་ཟླ་ཤེལ་གསར་པའི་འཛུམ་རླབས་ཅན། །རབ་ཏུ་ཞི་བའི་ཀུཎྜིའི་སྤྱི་བླུགས་ཆུ་གཏེར་གྱིས། །སྒྲིབ་གཉིས་དྲི་མ་འཁྲུད་མཛད་དེ་ལ་འདུད། ༡༨ །དུས་མཐའི་མེ་ལྟར་རབ་ཏུ་འབར་བའི་སྐུ། །སྣ་ཚོགས་རྡོ་རྗེས་མཚན་པའི་འོད་ཟེར་གྱིས། །ཕས་རྒོལ་རིག་སྔགས་ནུས་པའི་སྟོབས་འཆིངས་ནས། །གཞོམ་མེད་སྲུང་མཛད་འབར་བའི་འོད་ལ་འདུད། ༡༩ །གུར་གུམ་གེ་སར་རྒྱས་པའི་འཇོ་སྒེག་ལ། །ངོ་མཚར་མཆོད་རྟེན་དཔལ་གྱིས་མཚན་པའི་ཞབས། །གཡོ་བས་བདུད་དགྲ་འབྱུང་པོའི་དཔུང་ཚོགས་ཀུན། རྣམ་པར་འཆིང་མཛད་དཔག་མེད་རྣོན་མར་འདུད། ༢༠ །བརྟན་གཡོའི་འབིགས་བྱེད་གཡོ་བའི་དུཝཁ་ནི། །རབ་དཀར་
ཐུགས་རྗེའི་སྨན་གྱིས་ཞི་མཛད་ཕྱིར། །རང་ཏོགས་བདུད་རྩི་སྤྲོ་བའི་རི་དྭགས་ཅན། །ནམ་ཡང་འབྲལ་མེད་རྨ་བྱ་ཆེན་མོར་འདུད། ༢༡ །ཀུནྡཱའི་དཔལ་འཛིན་གཟུགས་སྐུའི་འཁྲི་ཤིང་ལ། །མཁྱེན་བརྩེའི་གདུགས་དཀར་གཡོ་དང་ལྷན་ཅིག་པར། །སྣ་ཚོགས་རྡོ་རྗེའི་ཏོག་གི་ཚྭ་ཚྭ་ཡིས། །འགལ་རྐྱེན་བཅོམ་མཛད་མི་ཕམ་རྒྱལ་མོར་འདུད། ༢༢ །དམར་སེར་ཟ་མ་ཏོག་གིས་མཚན་པའི་ཕྱག །ཧ་རིའི་ཙནྡན་ཚལ་དུ་གཡོ་བའི་འོད། །ཐུགས་རྗེའི་ག་བུར་གཞོན་ནུའི་བསིལ་ཡབ་ཀྱིས། །མི་ངལ་གདུང་འཕྲོག་རི་ཁྲོད་ལྷ་མོར་འདུད། ༢༣ །ཟླ་བ་ཞུན་མའི་ལང་ཚོའི་མཛེས་པའི་ཕྱག །གསེར་མདོག་གོ་ཆ་ལྡན་པས་མཚན་པའི་འོད། །གང་ལ་རེག་ན་འབྱུང་པོའི་བླ་དང་ཚེ། །འཕྲོགས་པའི་དཔལ་བཅོམ་འོད་ཟེར་ཅན་ལ་འདུད། ༢༤ །གཞན་ཡང་གང་འདུལ་གཟུགས་སྐུའི་གཉིས་སྐྱེས་དབང་། །གྲངས་མེད་མོས་པའི་ཆུ་གཏེར་ལ་འཆར་བས། །འགྲོ་ཀུན་དགའ་དང་གཏན་བདེའི་འཛུམ་ཟེར་གྱིས། །སིམ་པ་སྟེར་མཛད་ཀུན་ལ་དྭང་པས་འདུད། ༢༥ །དེ་ལྟར་རབ་ཏུ་བསྔགས་པའི་ཆུ་གཏེར་རླབས་ཕྲེང་སྲིད་རྩེར་འཕྱུར་བ་ལས། །འཕགས་མ་དགྱེས་པའི་ཤར་གྱི་ཐིག་ལེ་གཙུག་ཏོར་རྩེ་མོར་ངལ་བསོའི་མཐུས། །ཐུགས་རྗེའི་ག་བུར་འོད་རྡུལ་ལྷུང་བ་བརྒྱད་གཉིས་འཇིགས་པའི་ཚ་གདུང་ཀུན། །ཡོངས་སུ་བཅོམ་ནས་རྣམ་མཁྱེན་ཀུནྡྲའི་
འཛུམ་དཀར་གྲོལ་བའི་དཔལ་ཐོབ་ཤོག ༢༦ །དེ་ལྟར་རྗེ་བཙུན་འཕགས་མ་ཉེར་གཅིག་གི་སྒྱུ་འཕྲུལ་ལ་བསྟོད་པ་ཕན་བདེའི་ཨུཏྤལ་གསར་པའི་དོ་ཤལ་ཅེས་བྱ་བ་འདི་ཡང་དད་པ་དང་མོས་གུས་ཁོ་ནས་མཚམས་སྦྱར་ཏེ་གཞོན་ནུ་ཨ་བྷཱ་ཡས་མྱུར་དུ་བཀོད་པའོ། ། གོང་གི་མཆན་བུ་རྣམས་ཕྱག་མཚན་གྱི་མངོན་རྟོགས་སོ།།
རྗེ་བཙུན་སྒྲོལ་མ་ལ་བསྔགས་པ་འདོད་དོན་འགྲུབ་པའི་ཤིས་བརྗོད།
རྗེ་བཙུན་སྒྲོལ་མ་ལ་བསྔགས་པ་འདོད་དོན་འགྲུབ་པའི་ཤིས་བརྗོད་ཅེས་བྱ་བ་བཞུགས་སོ། །།ན་མས་ར་ཡེ། ཁྱོད་མཚན་ཐོས་པ་ཙམ་གྱིས་ཀྱང་། །འགྲོ་རྣམས་འཁོར་མཚོ་ལས་སྒྲོལ་བའི། །ངོ་མཚར་ཁོ་ནར་ཡིད་ཆགས་པས། །རྩེ་གཅིག་གུས་པས་གསོལ་འདེབས་ན། །རབ་མཛེས་མརྒད་བྱེ་བའི་རྡུལ། །གཅིག་ཏུ་སྤུངས་པའི་དགེ་མཚན་ཅན། །མཛེས་སྐུ་བདག་གི་མིག་ལམ་དུ། །ཞི་འཛུམ་ཟློ ཉམས་བརྒྱས་རོལ་པར་མཛོད། །འཇིག་རྟེན་འཇིག་རྟེན་འདས་པ་ཡི། །དངོས་གྲུབ་རིན་ཆེན་རྒྱ་མཚོའི་དབྱིག །རིག་པའི་གསང་སྔགས་གྲུབ་པ་ལས། །ས་གསུམ་ཕན་བདེ་སྦྱིན་གྱུར་ཅིག །ཟབ་ཅིང་མཆོག་ཏུ་ཞི་བའི་དབྱིངས། །ཕྱོགས་དང་ཆ་ལས་རྣམ་གྲོལ་བས། །བྱིན་གྱིས་བརླབས་པའི་སྐད་ཅིག་ལ། །གཟུང་འཛིན་དབུ་མར་ཐིམ་མཛད་གསོལ། །ཁྱད་པར་སྙིགས་ལས་ཆེར་སྙིགས་པའི། །དུས་ཀྱི་རྒུད་པས་རབ་སྐྲག་རྣམས། །ཉིན་མཚན་མེད་པར་རྒྱལ་བའི་ཡུམ། །ཁྱོད་ལས་སྐྱབས་གཞན་སེམས་པ་བྲལ། །དེ་སླད་ཐུགས་རྗེའི་ཕྱག་བརྐྱངས་ནས། །འཇིགས་པ་མཐའ་དག་བསལ་བ་དང་། །ཀུན་དགའི་གནས་སུ་དབུགས་
དབྱུང་བའི། །སྐལ་པ་བཟང་པོ་གྲུབ་པར་མཛོད། །སླར་ལ་གནས་སྐབས་སྡེ་བཞི་ཡི། །ཡོན་ཏན་མེ་ཏོག་མཛེས་འབར་བར། །མཐར་ཐུག་སྐུ་གསུམ་མི་ཕྱེད་པའི། །ཟུང་འཇུག་སྙེ་མ་དུད་མཛད་གསོལ། །མདོར་ན་འདི་ནས་བྱང་ཆུབ་བར། །འཕགས་མ་དགྱེས་པའི་སྤྱན་ཟུར་དང་། །ནམ་ཡང་མི་འབྲལ་འགྲོགས་པ་ལས། །འདོད་དགུའི་རེ་ཁཱ་རྫོགས་གྱུར་ཅིག །ཅེས་པའང་དུས་ཀྱི་རྒུད་པས་སྐྲག་པའི་ཡིད་ཅན་རྣམས་དབུགས་དབྱུང་བའི་སླད་དུ་གསོལ་འདེབས་ཤིས་བརྗོད་ཀྱི་མེ་ཏོག་ཅུང་ཟད་འཐོར་བ་པོ་ནི་རིག་པ་འཛིན་པ་མཉྫགྷོ་ཥ་སྟེ་ཇི་ལྟར་སྨོན་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །སརྦ་དཱ་ཐེ་ཡོ་བྷ་བ་ཏུ། །
འཕགས་མ་སྒྲོལ་མ་ལ་རྩ་སྔགས་དང་སྦྱར་བའི་སྒོ་ནས་གསོལ་བ་འདེབས་པ་དོན་ཀུན་གྲུབ་པའི་དབྱངས་སྙན།
འཕགས་མ་སྒྲོལ་མ་ལ་རྩ་སྔགས་དང་སྦྱར་བའི་སྒོ་ནས་གསོལ་བ་འདེབས་པ་དོན་ཀུན་གྲུབ་པའི་དབྱངས་སྙན་ཞེས་བྱ་བ་བཞུགས་སོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། །ཨོཾ་གྱིས་ཐར་དང་འདོད་རྒུའི་ནོར་སྟེར། །དཔལ་དང་གཡང་སོགས་སྐལ་པ་བཟང་པོས། །སྲིད་ཞིར་སྨན་མཛད་གསང་མི བ་གསུམ་བདག །མཆོག་སྦྱིན་འཕགས་མ་ཡུམ་ལ་འདུད་དོ། །ཏཱ་རེ་ཐུགས་བསྐྱེད་རིན་ཆེན་གྲུ་བོས། །འཁོར་བ་ངན་སོང་སྡུག་བསྔལ་མཚོ་ལས། །མཁའ་མཉམ་ཡིད་ཅན་རྟག་ཏུ་སྒྲོལ་བའི། །རྗེ་བཙུན་སྒྲོལ་མ་ཡུམ་ལ་འདུད་དོ། ཏྟཱརེཞེས་བྱིན་རླབས་བདུད་རྩིས། །འཇིགས་བཅས་རྒུད་པའི་ཚ་གདུང་བསལ་ནས། །ཕན་བདེའི་པདྨོ་རྒྱས་པར་མཛད་པའི། །གདུང་བ་སྐྱོབ་མ་ཡུམ་ལ་འདུད་དོ། །ཏུ་རེ་ཁྱོད་ཞབས་
དྲན་པའི་མོད་ནས། །གང་འདུལ་མཚན་དང་སྐུ་ཡི་བཀོད་པས། །བདག་ལྟའི་ཕོངས་པ་ཀུན་ལས་སྲུང་བའི། །ཐུགས་རྗེ་མྱུར་མ་ཡུམ་ལ་འདུད་དོ། །སྭཱ་ཧཱ་ཕྲིན་ལས་རྫོགས་ལྡན་སྤྲིན་གྱིས། །དགེ་ལེགས་ནོར་བུའི་གྲུ་ཆར་འབེབས་པས། །ཁམས་གསུམ་འགྲོ་ཀུན་དབུགས་འབྱིན་སྩོལ་བའི། །ཡིད་བཞིན་འཁོར་ལོ་ཡུམ་ལ་འདུད་དོ། །མདོར་ན་སྲས་བཅས་རྒྱལ་བ་ཡོངས་ཀྱི། །ཡེ་ཤེས་གཅིག་བསྡུས་འཕགས་མ་ཁྱོད་ལ། ། སྙིང་ནས་གུས་པས་གསོལ་བ་འདེབས་སོ། །བྱང་ཆུབ་བར་དུ་རྗེས་སུ་ཟུངས་ཤིག །དམ་ཆོས་སྒྲུབ་པའི་འགལ་རྐྱེན་ཞི་ཞིང་། །ཚེ་བསོད་དཔལ་འབྱོར་རིག་དང་བརྩེ་བའི། །མཐུན་རྐྱེན་མ་ལུས་ཕུན་སུམ་ཚོགས་པས། །དོན་གཉིས་འགྲུབ་པར་བྱིན་གྱིས་རློབས་ཤིག །ཅེས་པའང་ལྷག་པའི་ལྷ་མོ་འདི་ཉིད་ལ་གཅིག་ཏུ་གུས་པ་འཇམ་དབྱངས་མཁྱེན་བརྩེའི་དབང་པོས་གསོལ་བ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག།
འཕགས་མ་སྒྲོལ་མ་ཡིད་བཞིན་འཁོར་ལོ་ལ་ཕྱག་འཚལ་བའི་ཚིགས་སུ་བཅད་པ་དོན་ཀུན་གྲུབ་པ་བི་ཝའི་ལྗོན་བཟང་།
འཕགས་མ་སྒྲོལ་མ་ཡིད་བཞིན་འཁོར་ལོ་ལ་ཕྱག་འཚལ་བའི་ཚིགས་སུ་བཅད་པ་དོན་ཀུན་གྲུབ་པ་བི་ཝའི་ལྗོན་བཟང་ཞེས་བྱ་བ་བཞུགས་སོ། །ན་མོ་ཨཱར་ཏཱ་ར་ཡེ། གང་གི་ཐུགས་རྗེ་རྡུལ་བྲལ་རིན་ཆེན་གྲུས། །སྲིད་དང་ཞི་བའི་ཆུ་གཏེར་ལས་བསྒྲལ་ནས། །བྱང་ཆུབ་སྙིང་པོའི་གྲོང་དུ་དབུགས་འབྱིན་པའི། །འཕགས་མ་ཡིད་བཞིན་འཁོར་ལོར་ཕྱག་འཚལ་ལོ། ༡ །ཚོགས་ཟུང་རྒྱ་མཚོ་བསྲུབས་པའི་སྙིང་པོའི་ཕུལ། །མཚན་དཔེའི་ཟླ་སྣང་ཡིད་ལ་ཤར་ཙམ་གྱིས། །ཚེ་དང་ཡེ་ཤེས་ངལ་
འཚོ་སྟེར་མཛད་པའི། །འཕགས་མ་ཡིད་བཞིན་འཁོར་ལོར་ཕྱག་འཚལ་ལོ། ༢ གསུང་གསང་བེ་ཌཱུར་རྒྱུད་མང་གཅིག་པུ་ལས། །དབྱངས་ཀྱི་ཡན་ལག་རྒྱ་མཚོའི་རོལ་མོ་ནི། །ཆོས་ཕུང་བྱེ་བའི་གདངས་སུ་ཡོངས་ཤར་བ། །འཕགས་མ་ཡིད་བཞིན་འཁོར་ལོར་ཕྱག་འཚལ་ལོ། ༣ །གང་ཐུགས་གཉིས་སུ་མེད་པའི་ཡེ་ཤེས་དབྱིངས། །གཟུང་འཛིན་སྤྲོས་པའི་འཇུག་ལྡང་བརྟུལ་གྱུར་ཀྱང་། །རིག་དང་བརྩེ་བའི་གཟི་བརྗིད་མཐའ་ཡས་པ། །འཕགས་མ་ཡིད་བཞིན་འཁོར་ལོར་ཕྱག་འཚལ་ལོ། ༤ །བྲལ་དང་རྣམ་པར་སྨིན་པ་མི་ཟད་པའི། །ཡོན་ཏན་དྲུག་ཅུ་རྩ་བཞིའི་སྒེག་འཆང་བས། །སྲས་བཅས་རྒྱལ་ཀུན་བརྟན་པ་འཕྲོག་པའི་ཡུམ། །འཕགས་མ་ཡིད་བཞིན་འཁོར་ལོར་ཕྱག་འཚལ་ལོ། ༥ །རྒྱུན་གྱིས་རྟག་ཅིང་མཁའ་མཐར་ཁྱབ་པ་དང་། །ལྷུན་གྲུབ་འདུ་མི་མཛད་པའི་ཕྲིན་ལས་ཀྱིས། །གདུལ་བྱའི་རེ་བ་སྐོང་མཛད་དཔག་བསམ་དབང་། །འཕགས་མ་ཡིད་བཞིན་འཁོར་ལོར་ཕྱག་འཚལ་ལོ། ༦ །མདོར་ན་སྟོབས་བཅུ་མངའ་བ་ཐམས་ཅད་ཀྱི། །ཐུགས་བསྐྱེད་དམ་བཅའ་ཡོངས་སུ་རྫོགས་པའི་ཕྱིར། །འགྲོ་འདུལ་མཛད་པ་བསམ་གྱིས་མི་ཁྱབ་པའི། །འཕགས་མ་ཡིད་བཞིན་འཁོར་ལོར་ཕྱག་འཚལ་ལོ། ༧ །དེ་ལྟར་གུས་པས་ཕྱག་འཚལ་གསོལ་འདེབས་ན། །ཡེ་ཤེས་གཟིགས་པའི་རྫོགས་ལྡན་སྤྲིན་ཆེན་ལས། །དངོས་གྲུབ་འདོད་
རྒུའི་གྲུ་ཆར་རབ་གཡོ་བས། །ཕན་བདེའི་དགའ་སྟོན་རྒྱས་པར་བྱིན་གྱིས་རློབས། ༨ །ཞེས་པའང་མང་དུ་གཟིགས་པའི་སྤྱན་ཡངས་འགྱུར་མེད་རྣམ་དག་གི་ཆེད་དུ། འཇམ་དབྱངས་མཁྱེན་བརྩེའི་དབང་པོས་འཕགས་མ་སྙིང་རྗེའི་ཟླ་བ་ལ་ཚིགས་སུ་བཅད་ལྟ པ་བཀྲ་ཤིས་པའི་གྲངས་ཀྱིས་ཕྱག་བཙལ་ཞིང་གསོལ་བ་བཏབ་པ་སིདྡྷི་རསྟུ། །
རྗེ་བཙུན་རིགས་བྱེད་མ་ལ་བསྟོད་པ་ཡིད་འཕྲོག་རྫོགས་ལྡན་གཞོན་ནུའི་ཆར་སྤྲིན།
རྗེ་བཙུན་རིགས་བྱེད་མ་ལ་བསྟོད་པ་ཡིད་འཕྲོག་རྫོགས་ལྡན་གཞོན་ནུའི་ཆར་སྤྲིན་ཞེས་བྱ་བ་བཞུགས་སོ། །རྒྱ་གར་སྐད་དུ། བྷཊུ་ར་ཀ་ཀུ་རུ་ཀུལླེ་སཱུ་ཏི་མ་ནོ་ཧ་ར་སཾ་ཡུ་ག་ཀུ་མཱ་ར་སྱ་བྲིཏྟ་མེ་གྷ་ནཱ་མ། བོད་སྐད་དུ། རྗེ་བཙུན་རིགས་བྱེད་མ་ལ་བསྟོད་པ་ཡིད་འཕྲོག་རྫོགས་ལྡན་གཞོན་ནུའི་ཆར་སྤྲིན་ཞེས་བྱ་བ། བཅོམ་ལྡན་འདས་གསུང་གི་རྡོ་རྗེ་ལ་ཕྱག་འཚལ་ལོ། །ཕུལ་བྱུང་རིག་དང་བརྩེ་བ་མི་ཕྱེད་བྱང་ཆུབ་སེམས་གཉིས་འཇོ་སྒེག་དང་། །ལྷ་སྔགས་ཡེ་ཤེས་མཉམ་པ་ཉིད་གྱུར་འབར་གཡོ་བརྟན་པའི་ཕྱག་རྒྱ་ཆེས། །ཕུན་ཚོགས་སྲིད་ཞིའི་དངོས་ཀུན་དབང་མཛད་བདེ་སྟོང་སྙིང་རྗེ་གཟི་། འབར་བ། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༡ །གང་ཞིག་གཟོད་ནས་གཟུགས་ལས་འདས་ཀྱང་བརྟན་གཡོ་ཁྱབ་པའི་སྐུར་སྟོན་ཅིང་། །སྒྲ་དང་ཚིག་གི་ཕ་མཐར་མི་གནས་བརྗོད་པ་ཀུན་གྱི་རྗེས་སུ་འགྲོ། །སྤྲོས་པའི་མཚན་མ་གཞར་ཡང་དབེན་མོད་མཁྱེན་བརྩེའི་ཉམས་འགྱུར་མཐའ་ཡས་པ། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༢ །ཅི་
འདི་པདྨ་རཱ་གའི་ལྷུན་པོར་ཉི་གཞོན་བྱེ་བས་འཁྱུད་པའམ། །ཡིད་འཕྲོག་རིགས་བྱེད་དཔལ་མོའི་ཞལ་སྐྱིན་མིག་གི་བདུད་རྩིར་འཆར་བ་གང་། །བརྒྱད་གཉིས་ལང་ཚོར་མཚན་དཔེས་མཛེས་ཕྱིར་ཁྱོད་སྐུའི་སྣང་བར་ངེས་རྙེད་པའི། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༣ །རྒྱ་སྐྱེགས་མེ་ཏོག་སར་པའི་མཚར་སྡུག་ཆེས་ཆེར་དར་བའི་ཕོན་པོ་ལ། །ལྷར་བཅས་བརྟན་པ་གཅིག་ཅར་དུད་བྱེད་ཁྲོ་ཆགས་སྒེག་པའི་ཉམས་ལྡན་ན། །ཁྱོད་ཞལ་དག་པའི་དཔེ་ཟླར་འོས་ཅེས་ཕལ་ཆེར་ག་ཞའི་ཚིག་འབྱིན་པ། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༤ །མཆུ་སྒྲོས་པདྨའི་འདབ་རྒྱ་བྱེ་བར་ཚེམས་དཀར་ཟེའུ་འབྲུའི་ཕྲེང་བ་དགོད། །རོ་འཛིན་རཡིག་གཉིས་པའི་འཕུར་ལྡིང་གློག་གི་ཐག་པ་ལྟར་གཡོ་བས། །ཏམྦུ་ར་ཅན་ཁེངས་པ་སྙིལ་བྱེད་སྒྲ་དབྱངས་རྒྱ་མཚོའི་དཔལ་འཛིན་པ། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༥ །སྤྱན་གསུམ་ཟུར་གྱིས་གཟིགས་པ་ཁོ་ནས་ཆུ་སྐྱེས་འཛུམ་སྒྲོས་ལྷུང་མིན་ཡང་། །སྨིན་མའི་འོད་རིས་སྟུག་པོ་ཡིས་ཀྱང་དེ་དེར་འཁྲུལ་པ་སྐྱེད་བྱེད་པས། །ཕ་རོལ་གང་ལ་ཐེབས་པ་ཙམ་ནས་འདོད་པའི་བུང་བ་གཡོ་ལྡན་པ། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༦ །ཕྱག་གི་འཁྲི་ཤིང་དང་པོ་གཉིས་ཀྱིས་
ཨུཏྤལ་མདའ་གཞུ་འཛིན་པ་ཡིས། །རྩུབ་པའི་རེག་བྱ་བཟུང་བ་མིན་ཡང་ས་བདགས་སྐྱོངས། ༩ །མི་འགྱུར་མཆོག་ཏུ་བདེ་བའི་རོས་གང་དཀར་འཛིན་ཟུང་གི་མྱོས་བུམ་མཁྲེག །དྲན་པས་ལྷན་ཅིག་སྐྱེས་དགའི་སིམ་སྟེར་གསང་བའི་པདྨོ་ལྷག་པར་རྒྱས། །གཟུང་འཛིན་སྤྲོས་པའི་ཚུལ་དང་མི་མཛའ་སྟག་ལྤགས་སར་པའི་ཤམ་ཐབས་ཅན། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༡༠ ། སྲིད་དང་ཞི་བར་ཡོང་ཡེ་མི་གནས་ཞབས་གཉིས་བརྐྱང་བསྐུམ་གར་གྱི་ཚུལ། །པད་ཉི་བམ་རོའི་སྙིང་གར་རོལ་ཞིང་ས་གསུམ་ཁྱབ་པའི་འོད་འཕྲོ་བས། །ཚུལ་མིན་རྒུད་པའི་མུན་པ་ཀུན་བཅིལ་ཕུན་ཚོགས་ཕན་བདེའི་སྣང་སྟེར་བ། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༡༡ །གསུང་གི་གསང་བ་འཇུག་ལྡང་ལས་འདས་ནཱ་དའི་ངོ་བོར་སོན་གྱུར་ཀྱང་། །གང་གི་བློ་གྲོས་བགོ་སྐལ་ལས་མཚུངས་ཞི་བསིལ་ཟིལ་དངར་འཇོ་བའི་སླད། །ཡན་ལག་དྲུག་ཅུའི་རྒྱུད་མང་ལེན་པས་གྲུབ་པའི་སྐལ་བཟང་སྦྱིན་མཁས་པ། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༡༢ །གལ་ཏེ་འཆི་མེད་རྫིང་རིང་ཕ་མཐར་མཁྱེན་གཉིས་སྣང་བ་རབ་འབར་བས། །སྒྲིབ་གསུམ་མུན་སྟུག་ཀུན་ནས་བསལ་ཏེ་ཐར་བདེའི་ལམ་བཟང་མཚོན་ནུས་ནས། །ཁྱོད་ཐུགས་བརྩེ་དང་གཉིས་སུ་མི་ཕྱེད་སྟོང་པ་ཉིད་
ཀྱི་རྗེས་འགྲོ་བ། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༡༣ །འགའ་ཞིག་འདོད་པ་ཅུང་ཟད་འཇོ་བ་ཡིད་བཞིན་ནོར་བུའི་གྲགས་སྐམ་ལ། །ཆགས་པས་རྒྱ་མཚོའི་མཇིངས་ཟབ་བརྒལ་ཡང་ཁོ་བོས་ཁྱོད་ཀྱི་ཡོན་ཏན་མཐུ། །དྲན་པའི་མོད་ནས་འདོད་དགུ་སྦྱིན་སླད་རེ་བའི་ཤིང་རྟ་དེར་དྲངས་པས། །བཅོམ་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༡༤ ། གང་གི་ཐུགས་རྗེའི་ཟེག་མ་རེས་ཀྱང་བརྒྱད་གཉིས་འཇིགས་པ་ཀུན་ཞི་ཞིང་། །ཚེ་དཔལ་འབྱོར་པའི་ཕུན་ཚོགས་རབ་རྒྱས་ཁམས་གསུམ་དབང་དུ་འདུ་བ་དང་། །ཕས་རྒོལ་སྡེར་བཅས་ལྷག་མེད་འཇིལ་ནུས་ཕྲིན་ལས་མཁའ་དང་སྙོམས་འཇུག་པ། །བཅོས་ལྡན་འདས་མ་ཀུ་རུ་ཀུལླེ་དེ་རིང་བདག་ལ་བརྩེ་དགས་སྐྱོངས། ༡༥ །དེ་ལྟར་ཁྱོད་ཀྱི་བསྔགས་འོས་ཆ་ཤས་ཕྱོགས་གཅིག་ཁོ་ནའི་ངོ་མཚར་ལ། །ཅུང་ཟད་བསྟོད་པའི་ཚིག་སྦྱོར་ཡིད་འཕྲོག་རྫོགས་ལྡན་གཞོན་ནུའི་ཆར་སྤྲིན་གསར། །དད་བརྒྱའི་འདུན་སར་རྒྱས་པར་དཀྲིགས་ནས་སྨོན་པའི་གནས་འགའ་གསོལ་བགྱིད་ན། །སྲས་བཅས་རྒྱལ་བའི་ཡུམ་གྱུར་གཅིག་པུ་རྗེས་བརྩེའི་སྤྱན་རས་འདིར་གཏོད་ཀྱེ། ༡༦ །སུ་ཞིག་ངེས་འབྱུང་སྙིང་རྗེའི་དབང་སོང་རླབས་ཆེན་གཞན་ཕན་དོན་གཉེར་ཚེ། །འཕགས་མ་དགྱེས་པའི་སྔགས་རིག་འཛིན་པ་གཙུག་གི་ནོར་བུར་གུས་བསྟེན་
ནས། །སྨིན་གྲོལ་བདུད་རྩིའི་རྒྱུན་བཟང་བཏུང་བས་དངོས་གྲུབ་རྒྱ་མཚོའི་སྣོད་གྱུར་ཏེ། །དམ་ཚིག་སྡོམ་པ་སྲོག་བཞིན་སྲུང་བའི་བརྟུལ་ཞུགས་ཉམས་པ་མེད་པར་ཤོག ༡༧ །མྱ་ངན་མེད་པའི་གྲིབ་བསིལ་སྣུམ་པོར་མཚན་དཔེའི་ཞལ་སྐྱིན་མདུན་བཀོད་དེ། །ཇི་སྐད་བཤད་པའི་སྤྱོད་ལམ་དང་བཅས་ཚོགས་ཟུང་སྦྱོར་བས་རྒྱུད་སྦྱངས་ཤིང་། །བཅོམ་ལྡན་འདས་མའི་གཟུགས་སྐུའི་ཉམས་འགྱུར་དྭང་བའི་ཡིད་མཚོར་བསྙེན་པ་ན། །ང་རྒྱལ་རྣམ་པའི་གསལ་སྣང་རབ་རྫོགས་རིམ་པ་དང་པོའི་མཐར་ཕྱིན་ཤོག ༡༨ །རྩ་གསུམ་འཁོར་ལོའི་དབུས་སུ་སོན་པའི་ཧྲི༔ཡིག་འབར་བའི་འོད་རྣོན་པོ། །ཨུཏྤལ་མདེའུའི་རྩེ་མོ་ལས་ཐོན་བརྟན་གཡོའི་དྭངས་བཅུད་ཀུན་བསྡུས་ནས། །གང་གི་སྙིང་གར་སིམ་པའི་མོད་ལ་གྲུབ་པ་མཆོག་གི་གཟི་འབར་བས། །ས་གསུམ་དྲེགས་ལྡན་བྱེ་བའི་ཚོགས་རྣམས་འདར་བཅས་ཐོར་ཚུགས་དུད་པར་ཤོག ༡༩ ། ཁྱད་པར་རླུང་དང་གཏུམ་མོའི་རེག་བྱས་འཕགས་རྣམས་ཡེ་ཤེས་བདུད་རྩི་དང་། །ཧཾ་ཡིག་ག་བུར་བཞུ་བའི་རྒྱུན་གྱིས་དགའ་བཞིའི་ལྷན་སྐྱེས་གསོས་བཏབ་པས། །ཐོག་མ་དབུས་དང་འཁོར་འདས་མ་དམིགས་མཆོག་ཏུ་མི་འགྱུར་བདེ་བ་ཆེ། །དོན་དམ་བདག་མེད་སྒྱུ་མའི་དཔལ་མོས་སྙིང་ལ་རྟག་ཏུ་འཁྱུད་པར་ཤོག ༢༠ །བདུན་གྱི་བདུན་པའི་དཀྱིལ་འཁོར་ལ་གནས་རྡོ་རྗེའི་སྔགས་ཀྱི་ཡི་གེ་ལས། །རབ་དམར་འོད་
ཕྲེང་བ་སྤྲོ་བསྡུས་སྲིད་ཞིའི་ཕུན་ཚོགས་ཇི་སྙེད་རྣམས། །པུཎྜ་རི་ཀ་རྒྱས་པའི་ཚལ་དུ་བུང་བའི་ཚོགས་ཀྱི་མགྲོན་གཉེར་བཞིན། །ཐོགས་པ་མེད་པར་ངང་གིས་འདུ་བའི་སྙན་པས་ས་ཀུན་ཁྱབ་པར་ཤོག ༢༡ །སླར་ལ་ཁྱོད་སྐུ་མངོན་སུམ་གསལ་བའི་སྤྱན་སྔར་རྩེ་གཅིག་གུས་བཏུད་ནས། །ནུས་ལྡན་སྔགས་ཀྱི་གོ་ཆ་འཆང་ཞིང་རྟེན་འབྲེལ་རྫས་ཀྱི་འཁྲུལ་འཁོར་བཅས། །འཕགས་མའི་ཐུགས་དམ་བདེ་འཐུང་སྤྲིན་ཆེན་ཐུན་བཞིར་བསྐུལ་བའི་སྒྲུབ་པ་ཡིས། །བྱིན་རླབས་ཟིལ་དངར་སྙིང་དབུས་སོན་ལས་གང་དང་དབྱེར་མེད་མཐུ་ཐོབ་ཤོག ༢༢ །དེ་ཚེ་བསམ་གཏན་ཁོ་ནའི་མཆིལ་པས་ལྷར་བཅས་ཡིད་ཀྱི་བརྟན་པ་འཕྲོག །མཚན་མའི་རྟེན་དང་རྫས་ཀྱི་སྦྱོར་བས་བརྟན་གཡོའི་ཕུན་ཚོགས་བདག་གིར་འདུ། །ལས་ཀུན་མྱུར་འགྲུབ་སྲེག་བླུགས་ཆོ་གས་རབ་འབྱམས་ལས་ཀྱི་མཐར་སོན་པའི། །རིག་སྔགས་འཆང་བའི་འཁོར་ལོས་སྒྱུར་བ་ཡིད་སྲུབས་ཕྱོགས་ལས་རྣམ་རྒྱལ་ཤོག ༢༣ །མདོར་ན་རིང་འཚོའི་དཔག་བསམ་རྒྱས་པར་ཆོས་མཐུན་འདོད་དགུས་འབྱོར་པ་དང་། །ཤེས་རབ་གསུམ་གྱི་མེ་ཏོག་མཛེས་འབར་ཐར་བདེའི་སྙེ་མ་གཡུར་ཟ་བས། །ཐུན་མོང་ལས་ཀྱི་སྒྱུ་མས་བསྐྲུན་པའི་མངོན་མཐོའི་ཐེམ་སྐས་ལ་འཛེགས་ཏེ། །ཟུང་འཇུག་མཆོག་གི་ཁང་བཟང་ཉམས་དགར་ཚེ་འདི་ཉིད་ལ་ཕྱིན་པར་ཤོག ༢༤ །གཞན་ཡང་གནས་
སྐབས་བསྟན་འཛིན་ཞབས་བརྟན་བཤད་སྒྲུབ་བསྟན་པ་ཕྱོགས་བཅུར་དར། །འགྲོ་ཀུན་རྫོགས་ལྡན་དུས་སྟོན་ལ་ཆགས་དགེ་བཅུའི་ཚུལ་ལ་ངང་གིས་སྤྱོད། །མཐར་ཐུག་སྐུ་དང་ཡེ་ཤེས་དབྱེར་མེད་རྡོ་རྗེ་བཙུན་མོའི་དཔལ་ཐོབ་ནས། །རང་གཞན་དོན་གཉིས་ཡིད་བཞིན་འཇོ་བའི་ཤིས་པའི་པདྨོ་རྒྱས་གྱུར་ཅིག ༢། །དེ་ལྟར་ཤེས་དང་ཤེས་བྱ་ཡང་དག་པར་བསྡམས་པ་ཡེ་ཤེས་ཀྱི་སྐུ་ཅན། གཉིས་སུ་འཛིན་པའི་བློས་ནམ་ཡང་བརྟག་པར་བྱ་བ་ལས་འདས་པ། བདེ་ཆེན་རྡོ་རྗེ་བཙུན་མོ་ཀུ་རུ་ཀུལླེ་ཞེས་བྱ་བ་དྲན་པ་ཙམ་གྱིས་རྒྱུ་དང་མི་རྒྱུའི་དངོས་པོ་ཉེར་ལེན་དང་བཅས་པ་མཆོག་ཏུ་མི་འགྱུར་བའི་དེ་ཁོ་ན་ཉིད་ཀྱི་ཕྱག་རྒྱར་དབང་དུ་མཛད་པ་གང་དེའི་ཞབས་ཀྱི་པདྨོ་ལ་བསྔགས་པའི་མེ་ཏོག་ཕྲ་མོ་ཐུན་མོང་མ་ཡིན་པའི་ལམ་རིམ་སྨོན་ལམ་དང་བཅས་པ་འདིའང་། རིགས་ཀུན་ཁྱབ་བདག་རྡོ་རྗེ་འཆང་བྱམས་པ་ཀུན་དགའ་བསྟན་འཛིན་སོགས་ཡོངས་འཛིན་དམ་པ་རྣམས་ལས་ཆོས་ཚུལ་འདིའི་སྐལ་བཟང་མང་དུ་ཐོབ་པའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་དཔྱིད་ཟླ་ར་བའི་དཀར་པོའི་ཕྱོགས་ཀྱི་རྒྱལ་བ་གཉིས་པའི་དུས་ཀྱི་དགེ་མཚན་ཕུན་སུམ་ཚོགས་པའི་ཉིན་གང་ཤར་གསོལ་བ་བཏབ་པ་སྟེ། དགེ་བས་བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན་ཅིང་ཕྲིན་ལས་མཐའ་ཡས་པ་དང་། འགྲོ་ཀུན་ཕན་བདེའི་དཔལ་གྱིས་དུས་རྟག་ཏུ་འཚོ་བའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། །
རྗེ་བཙུན་རིགས་བྱེད་ཌ་ཀི་ལ་བསྟོད་པ་ཡིད་འཕྲོག་མཚམས་སྤྲིན་གཞོན་ནུའི་ཕྲེང་བ།
རྗེ་བཙུན་རིགས་བྱེད་ཌ་ཀི་ལ་བསྟོད་པ་ཡིད་འཕྲོག་མཚམས་སྤྲིན་གཞོན་ནུའི་ཕྲེང་བ་ཞེས་བྱ་བ། །ན་མོ་ཨཱརྱ་ཏཱ་རེ་ཀུ་རུ་ཀུལླེ་ཡེ། གཟོད་ནས་འགྱུར་མེད་རྣམ་ཐར་གསུམ་ལྡན་དབྱིངས། །
ཡོངས་གྲུབ་སྤྲོས་པ་ལས་འདས་ཡེ་ཤེས་ཀྱང་། །ཚུར་མཐོང་སྣ་ཚོགས་རྟོག་པའི་ཆོས་ཉིད་ངང་། །རྗེས་མཐུན་སྙིང་རྗེའི་རོལ་པར་ཅིར་ཡང་སྣང་། ༡ །མཁའ་དབྱིངས་བཞུ་བའི་རྡུལ་གྱིས་བྱུག་མིན་ཀྱང་། །ཨུཏྤལ་གསར་པའི་འདབ་མཚུངས་ཆུ་གཏེར་དབུས། །སྲིད་ཞིའི་སྐྱོན་བྲལ་ཐིག་ལེའི་མཆོག་མ་ཡི། །མཚར་སྡུག་བརྟན་པ་རབ་འཕྲོག་ཆུ་སྐྱེས་རྩེར། ༢ །ཁམས་གསུམ་རྣམ་པར་གནོན་པའི་སྤྲིང་ཡིག་གིས། །བསྔགས་པའི་འོད་ཟེར་རབ་འབར་ཉིན་མོར་བྱེད། །དབུགས་བྲལ་བམ་རོའི་འཁྲི་ཤིང་ལ་ཆགས་ཏེ། །ཁྱོད་ཀྱི་ཞབས་ཀྱི་འཁོར་ལོའི་འབབས་སྟེགས་གྱུར། ༣ །རྒྱ་སྐྱེགས་གསར་པའི་པདྨོའི་གེ་སར་དང་། །བྱེ་རུའི་ཕུང་པོ་བཞུ་བས་གང་གི་ཞལ། །མཚོན་པ་མ་ཡིན་ཆགས་ཆེན་སྒྱུ་མ་ཡིས། །བཅུ་དྲུག་ལང་ཚོའི་འཇོ་སྒེག་ལ་རོལ་ཕྱིར། ༤ །དམར་སེར་ལི་ཁྲིའི་རྡུལ་གྱིས་བྱུག་པ་ལྟའི། །དབུ་སྐྱེས་ཆུན་པོར་གཡོ་བའི་ཕང་ཕུང་རྩེར། །ཀེ་ལ་ཤ་ལྟར་རབ་བརྗིད་ཐོད་སྐམ་གྱི། །མེ་ཏོག་རིགས་ལྔའི་རྒྱལ་བའི་ནགས་སུ་འཁྲིགས། ༥ །རྣམ་ཐར་བཞི་ལྡན་ཕྱག་གི་འཁྲི་ཤིང་ན། །ངུར་པ་སྒྲ་འབྱིན་གེ་སར་ཕྲེང་བ་ཡིས། །རབ་མཛེས་མདའ་གཞུ་སྟན་གྱི་དཀྱིལ་འཁོར་དུ། །བཞད་པས་ཁམས་གསུམ་འགྲོ་བའི་ཡིད་དབང་སྡུད། ༦ །ཆགས་ཆེན་སྒྱུ་མའི་མདེའུ་རྣོན་པོ་ཉིད། །གང་ལ་དམིགས་པའི་སྙིང་གར་བསྣུན་པ་ལས། །རབ་
མྱོས་ཁྲག་གི་རྦ་རླབས་འཕྱོ་བ་དང་། །ལྷན་ཅིག་བསྟོད་བསྔགས་ངུད་མོས་ལྷུ་ཕྲེང་འཁྲིགས། ༧ །བནྡྷ་ཀ་ཡི་རྡུལ་ཕྲེང་བགོས་པ་ལྟའི། །ཉིན་བྱེད་འོད་ཀྱིས་རབ་སྨིན་ཨུཏྤལ་དམར། །ཕན་བདེའི་སྦྲང་རྩི་འཇོ་བའི་དགའ་སྟོན་གྱིས། །རྣལ་འབྱོར་གེ་སར་འཛིན་རྣམས་ཚིམ་པར་མཛད། ༨ །གང་ཐུགས་སྙིང་རྗེ་ཆེན་པོའི་མཛའ་ན་མོ། །མཁའ་ཁྱབ་སྲིད་པའི་གྲོང་དུ་རྐང་བཀོད་ནས། །ཟུར་མིག་ཡོན་པོར་གཟིགས་པའི་མཆིལ་པ་ཡིས། །སྐྱེ་རྒུའི་ཡིད་ཀྱི་བརྟན་པ་དབང་མེད་འཕྲོག ༩ །བྲང་སྐྱེས་མཁྲེག་ཅིང་གཞོན་ཤ་ཆགས་པའི་ཉམས། །ཐབས་ཤེས་ཨེ་ཝཾ་འཁོར་ལོའི་གང་བཟང་དུ། །འགྱུར་མེད་བདེ་སྟོང་བདུད་རྩིས་རབ་གཏམས་པས། །གྲུབ་པ་གཉིས་ཀྱི་དགའ་སྟོན་མཆོག་ལ་སྦྱོར། ༡༠ །རྣམ་ཐར་གསུམ་གྱི་ཆུ་སྐྱེས་གསར་པ་ནི། །བདེ་སྟོང་དགའ་བཞིའི་ལང་ཚོ་དང་འགྲོགས་པས། །ཟུང་འཇུག་ཐེམ་སྐས་ལ་འཛེགས་སྐལ་བཟང་ལ། །ས་བཅུ་ལམ་ལྔའི་གོ་འཕང་ཡུད་ཀྱིས་སྦྱིན། ༡༡ །ཞབས་གཉིས་པདྨའི་འཁྲི་ཤིང་གཡོ་བ་ཡང་། །བརྐྱང་བསྐུམ་གར་གྱིས་གདན་ལ་རྣམ་རོལ་པས། །སྲིད་ཞི་གཉིས་ཀྱི་མཐའ་རུ་ལྷུང་མིན་པར། །རྣམ་ཀུན་མཆོག་ལྡནུ་ངལ་བསོ་བསྟེན་པ་བཞིན། ༡༢ །འདུ་བྱེད་སྲོག་དང་ལྷན་ཅིག་མི་གནས་པའི། །བཅུ་ཕྲག་ལྔ་ཡིས་ཉེར་མཚོན་མགོ་བོའི་ཕྲེང་། །གདུལ་བྱར་རྗེས་ཆགས་ཁྲག་
གི་ར་རི་ཡིས། །དོགས་པས་གཏམས་བཞིན་ཁྱོད་ཀྱི་སྐུ་ལ་མཛེས། ༡༣ །སྟོང་ཉིད་དབྱིངས་ལས་རབ་འབར་བསྲེག་ཟའི་ཁྲོད། །བྱམས་པའི་གདུང་སེལ་བདུད་རྩི་འབུམ་འཛག་པས། །ཞི་དང་ཁྲོ་ཆགས་བདེ་བའི་རོལ་པར་གྱིས། །འགྲོ་འདི་སྐལ་བཟང་དཔྱིད་དུ་གས་པ་བཞིན། ༡༤ །འཆི་མེད་ལྷ་ཡི་ཡུལ་ལས་མ་འོངས་ཤིང་། །དབང་པོའི་གཞུ་ཡི་ཆ་ཤས་འཕྲོག་མིན་པར། །ལྕིད་ཀྱིས་ནོན་སྤངས་རེག་ན་བདེ་བའི་གོས། །འདིས་ནི་ཁྱོད་སྐུའི་ཁེངས་པ་འཕྲོག་ལ་གྲང་། ༡༥ །པུཎྜ་རཱི་ཀའི་མཚར་སྡུག་འཕྲོག་མིན་ཀྱང་། །འཚོ་བའི་བརྟན་པ་རབ་བྲལ་རུས་གང་གི །དུ་བས་རྣམ་པར་སྦྲེལ་བའི་རྒྱན་ཆ་ནི། །ཕ་རོལ་ཕྱིན་མཚོན་ཁྱོད་ཀྱི་སྐུ་ལ་འཁྲིལ། ༡༦ །ཆོས་བརྒྱད་ཁེངས་པའི་རི་མོ་རབ་བཀྲ་ཞིང་། །ཚུལ་མིན་རྨོངས་པའི་སྟོབས་ལྡན་ཤརླུ་ལ། །རབ་ཁྲོས་སྙིང་རྗེའི་མཚོན་གྱིས་གཟིར་བྱས་ཏེ། །སླར་ཡང་གང་སྐུར་དཔྱད་འདི་འོས་སམ་ཅི། ༡༧ །འོད་མཚན་སྟོང་དུ་འབར་བའི་ཉིན་བྱེད་ཡང་། །ཐོར་ཚུགས་ཆུ་སྐྱེས་སར་པ་ལ་ཆགས་ན། །བདེ་ལྡན་ཞིང་གི་བཀོད་པ་མི་བསྐྲུན་པར། །གནས་ཡུལ་ཌཱ་ཀིའི་གྲོང་དུ་ཅི་ཕྱིར་རྒྱུ། ༡༨ ། ཐུགས་སྲོག་འོད་སྲུངས་རྒྱུད་ཀྱི་འཛུམ་ཟེར་གྱིས། །ཉེར་བསུས་ཐུན་མཚམས་མཚན་དཔེའི་འཇོ་སྒེག་ཅན། །གང་སྐུའི་སྣང་བ་ཡིད་ལ་དྲན་ཙམ་གྱིས། །སྲིད་ཞིའི་དགེ་ལེགས་འགུགས་ལ་སོམ་ཉི་ཅི། ༡༩ །
ཆོས་ཀྱི་འཁོར་ལོ་བཞད་པའི་ཨུཏྤ་ལར། །ཧཱུཾ་མཐར་གསང་སྔགས་འབྲུ་བརྒྱད་འཁོར་བ་ཡིས། །གེ་སར་དྲི་བསུང་མངར་པོས་སྲིད་དང་ཞིའི། །ཕུན་ཚོགས་རཡིག་གཉིས་པ་སྤྲིན་ལྟར་འདུ། ༢༠ །ཁྱོད་ཀྱི་ཐུགས་རྗེའི་འཇུག་པ་སྨོས་ཅི་འཚལ། །མཚན་གྱི་སྤྲིང་ཡིག་རྣམ་པར་དཔྱངས་པས་ཀྱང་། །ཚངས་དབང་བདེ་འབྱུང་སྤྱི་བོས་རབ་བསྟེན་ཏེ། །ཁམས་གསུམ་སྡུད་པའི་ཚུལ་ལ་སོམ་ཉི་ཅི། ༢༡ །དེས་ན་སྙིང་རྗེའི་རོལ་མཚོའཕྱུར་བ་ལས། །དགེ་མཚན་ཟེར་གྱིས་སྤུད་པའི་ཟླ་ཤེལ་གྱིས། །བརྒྱད་གཉིས་འཇིགས་པའི་ཆུ་སྐྱེས་ཟུམ་བྱས་ཏེ། །དགའ་བདེའི་ཀུནྡའི་འཛུམ་ཕྲེང་དགོད་པར་ཤོག ༢༢ །འཇིག་རྟེན་ཆེ་དགུའི་ཐོར་ཚུགས་ཆུ་གོས་རྩེར། །རྣམ་པར་བཀོད་པའི་གང་ཞབས་རིན་ཆེན་ལས། །བསོད་ནམས་ཡེ་ཤེས་འདོད་པ་རབ་འཇོ་བས། །ལེགས་ཚོགས་འབྱོར་པའི་ཆུ་གཏེར་རྒྱས་གྱུར་ཅིག ༢༣ །སྤྱན་རས་ཆུ་འཛིན་ཕུང་པོ་རབ་གཡོ་བར། །སྨིན་མ་གློག་ཕྲེང་གཞོན་ནུའི་དོ་ཤལ་དང་། །ལྷན་ཅིག་ཆགས་བྲལ་སྤྲིན་སྒྲའི་ཞགས་པ་ཡིས། །སྲིད་གསུམ་གཉིས་སྐྱེས་ཚོགས་རྣམས་སྡུད་པར་ཤོག ༢༤ །སྤྲོས་བྲལ་འཆི་མེད་གྲུབ་པའི་ཁང་བཟང་དབུས། །སྟོང་ཉིད་སྙིང་རྗེར་རོལ་པའི་ལྷ་དབང་ཆེའི། །དྲག་ཤུལ་རྡོ་རྗེའི་མེ་བོ་ཆེ་སྤྲོས་པས། །ཕས་རྒོལ་རི་བོའི་རྐང་པ་འཇོམས་གྱུར་ཅིག ༢༥ །དངོས་ཀུན་བདེ་བ་ཆེར་བསྡམས་ཀཱ་ལ་
ཤར། །གྲུབ་གཉིས་བདུད་རྩིས་གཏམས་པའི་བགོ་བཤར་གྱིས། །ཟུང་འཇུག་མཆོག་གི་ལང་ཚོ་རབ་རྒྱས་ནས། །བྲལ་སྨིན་ཡོན་ཏན་རྒྱ་མཚོར་དབང་འབྱོར་ཤོག ༢༦ །རྨི་ལམ་ཙམ་དུའང་ཁྱོད་ཞལ་མཐོང་གྱུར་ཏེ། །ཐུགས་རྗེའི་རྭ་བ་གཅིག་ཏུ་བཟླུམས་པ་ཡིས། །གེགས་བྱེད་ཉེར་འཚོའི་དཔུང་ཚོགས་དམ་བཅིངས་ཏེ། །རེ་བའི་ཤིང་རྟ་གཡོ་མེད་འགེངས་གྱུར་ཅིག ༢༧ །དེ་ལྟར་རྗེ་བཙུན་མྱུར་མཛད་སྒྲོལ་མ་རིགས་བྱེད་ཊཱ་ཀི་ལ་བསྟོད་པའི་རབ་ཏུ་བྱེད་པ་འདི་ནི། དུས་ཀྱི་ཁྱད་པར་བླ་ན་མེད་པའི་སྒོ་འཕར་གསར་དུ་དབྱེ་བའི་ཚེ་གཞོན་ནུ་ཨ་བྷ་ཡས་རང་ལོ་བཅུ་བདུན་པར་སྣང་གསལ་གྱི་ངོགས་སུ་ཤར་མར་བཀོད་པ་ཛ་ཡནྟུ།།
ཀུ་རུ་ཀུལླེ་དཀར་མོ་ལ་བསྟོད་པ་བློ་གྲོས་ཀུནྡའི་དོ་ཤལ།
ཀུ་རུ་ཀུལླེ་དཀར་མོ་ལ་བསྟོད་པ་བློ་གྲོས་ཀུནྡའི་དོ་ཤལ་ཞེས་བྱ་བ། ན་མོ་ཀུ་རུ་ཀུལླེ་པྲཛྙཱ་སིནཾ། གང་ཞིག་འཕོ་འགྱུར་བྲལ་བའི་ཡེ་ཤེས་ནི། །བདེ་སྟོང་གཟུགས་ཀྱི་འཁོར་ལོར་བཞེངས་པའི་གར། །ཀེ་ལ་ཤ་རིའི་ཕྲེང་བ་ལྟར་མཛེས་པའི། །ཁྱོད་ཞལ་ཟླ་བ་གསར་པའི་དཔལ་ཡོན་ཅན། ༡ །མཆུ་སྒྲོས་བིམ་པའི་མདོག་ལྟར་གཡོ་བའི་དབུས། །ཚེམས་དཀར་ཀུནྡའི་ལང་ཚོ་སྤུངས་པ་དེར། །རོ་འཛིན་སྦྲང་རྩིའི་ཟས་ཅན་ཆགས་གྱུར་ཏེ། །ཤེས་རབ་ཆོས་ཕུང་གྲགས་སྟོང་དབྱངས་སུ་འཚེར། ༢ །ཕྱག་གི་ལྕུག་ཕྲན་གཞོན་ནུའི་དོ་ཀེར་རྩེར། །ཆུ་སྐྱེས་མཚར་སྡུག་འཕྲོག་པའི་རྡུལ་ཕྲེང་གིས། །འཇོ་སྒེག་སྟུག་པོར་གཡོགས་དེས་ལྷ་དང་མིའི། །ཡིད་དབང་བརྟན་པ་འཕྲོག་པའི་བྱེད་པོར་
གྱུར། ༣ །གང་ཐུགས་སྤྲོས་པའི་མཐའ་ལས་འདས་གྱུར་ཀྱང་། །སྙིང་རྗེས་སྲིད་པར་རོལ་པའི་ཟུར་མིག་གིས། །ཤེས་དང་ཤེས་བྱའི་ཡོན་ཏན་དབང་མཛད་པས། །ཐམས་ཅད་མཁྱེན་པའི་གོ་འཕང་འཐོབ་མིན་ནམ། ༤ །དེ་ཕྱིར་མཚན་གྱི་ཟླ་བའི་རྡུལ་ཕྲེང་གིས། །སྲིད་པའི་ར་རི་བཅིལ་དང་ཆབ་གཅིག་པར། །བློ་མཆོག་ཨུཏྤལ་རོལ་སྒེག་དབྱེ་མཛད་ན། །ཁམས་གསུམ་ལེགས་ཚོགས་འགུགས་ལ་སོམ་ཉི་ཅི། ༥། ཁྱོད་སྐུ་ཧྲི༔ཡིག་ལས་སྐྱེས་གདན་གསུམ་གང་། །སྣང་སྟོང་ཕྱག་རྒྱ་བཞི་རུ་རོལ་པའི་མོད། །ཡོངས་གྲུབ་ལྷན་སྐྱེས་ཆེན་པོའི་དཀྱིལ་འཁོར་དུ། །གློ་བུར་འཁྲུལ་རྟོག་གཡོ་མེད་བསྡམ་པར་ཤོག ༦ །དཔལ་གོས་ལོ་འདབ་གཡོ་བའི་ཁང་བཟང་དབུས། །ཤེས་རབ་ཌ་ཀི་བཞད་པའི་ཞལ་མཐོང་ནས། །བདེ་སྟོང་འཁྱུད་རྒྱས་སྐྱོང་བའི་དེ་མ་ཐག །བྱང་ཆུབ་མཆོག་གི་ལང་ཚོ་རྒྱས་གྱུར་ཅིག ༧ །སྟེང་འཐུང་དཀར་པོར་ཆགས་པའི་གཉིས་སྐྱེས་དབང་། །འོད་ཟེར་ཕུང་པོར་རབ་འབར་ལྟེ་བ་རུ། །ཧཱིམཐར་གསང་སྔགས་འཁོར་ལ་ཡིད་བཅིངས་པས། །རླུང་སེམས་དབུ་མའི་མཁའ་རུ་སྡུད་པར་ཤོག ༨ །ཟག་བཅས་དགའ་བ་གསུམ་གྱིས་རབ་བསྐྱེད་པའི། །ཟག་མེད་ལྷན་ཅིག་སྐྱེས་པའི་བདུད་རྩི་ཡིས། །ཟག་བྲལ་དྭངས་མའི་བཅུད་དུ་སྨིན་པའི་མཐུས། །ཟག་པའི་བག་ཆགས་འཁྲུལ་པ་ཀུན་སྤོང་ཤོག ༩ །ཁྱད་པར་ཐོས་པའི་ཟླ་ཤེལ་བཞུ་
བ་ཡིས། །བསམ་བྱུང་ཀུ་མུད་འཛུམ་དཀར་གྲོལ་བ་དང་། །འཆད་རྩོད་རྩོམ་པའི་དྲི་བསུང་རིང་འཐུལ་ཞིང་། །སྒོམ་སྤང་བཅུད་ལེན་རྟག་ཏུ་འགྲུབ་པར་ཤོག ༡༠ །འདི་ནས་བཟུང་སྟེ་ཇི་སྲིད་ལས་འབྲས་ཀྱི། །སྐྱེ་བའི་འཁྲི་ཤིང་འཛིན་པ་ཐམས་ཅད་དུ། །སྐྱེས་ཐོབ་སྦྱོར་བྱུང་ཤེས་རབ་པད་དཀར་གྱིས། །བསྟན་འགྲོའི་དགའ་བ་རྒྱས་པའི་མཐུ་ཐོབ་ཤོག ༡༡ །རྟག་ཏུ་གུས་པའི་བདེ་འབྱུང་རལ་རྩེ་རུ། །སྨྲ་བའི་ཟླ་བ་དབྱེར་མེད་ཡེ་ཤེས་ལྷ། །ཞབས་པད་འགོད་པའི་ངོ་མཚལ་བདུད་རྩི་ཡིས། །བློ་མཆོག་སྤོབས་པའི་སིམ་པ་ཐོབ་གྱུར་ཅིག ༡༢ །གཞན་ཡང་གནས་སྐབས་བརྒྱད་གཉིས་འཇིགས་བཅས་ཀྱི། །སྡུག་བསྔལ་མུན་པ་བཟའ་དང་ཆབ་གཅིག་པར། །མཐར་ཐུག་ཐམས་ཅད་མཁྱེན་པའི་སྣང་བ་མཆོག །རིང་མིན་འགྲུབ་པའི་ཤིས་པས་སྐྱོང་གྱུར་ཅིག ༡༣ །དེ་ལྟར་རྗེ་བཙུན་ཤེས་རབ་ཀྱི་ལྷ་མོ་ཀུ་རུ་ཀུལླེ་དཀར་མོ་ལ་བསྟོད་ཅིང་སྨོན་ལམ་གདབ་པའི་ཚུལ་ཉུང་ངུ་འདིའང་། གཞོན་ནུ་ཨབྷཱ་ཡས་གང་ཤར་ལྷུག་པར་སྦྱར་བ་ཛ་ཡནྟུ། །
བཅོམ་ལྡན་འདས་མ་ཀུ་རུ་ཀུལླེ་ལ་བསྟོད་པ་དབང་མཛད་དཔལ་མོ་དགྱེས་པའི་མཆོད་སྤྲིན།
བཅོམ་ལྡན་འདས་མ་ཀུ་རུ་ཀུལླེ་ལ་བསྟོད་པ་དབང་མཛད་དཔལ་མོ་དགྱེས་པའི་མཆོད་སྤྲིན་ཅེས་བྱ་བ། ན་མོ་ཀུ་རུ་ཀུལླེ་པཱ་དཱ་ཧཱུཾ། པདྨ་ལས་བྱུང་བཅུ་དྲུག་ལོན་ཚུལ་འཆང་། །གཡས་བརྐྱང་གཡོན་བསྐུམ་ཨུཏྤལ་སྐྱབས་སྦྱིན་མཛད། །ཐུགས་རྗེའི་འོད་ཀྱིས་ཁམས་གསུམ་དབང་དུ་སྡུད། །ཕྲིན་ལས་ལྷུན་གྲུབ་སྒྲོལ་མའི་ཞབས་ལ་འདུད། །དེ་ཉིད་འགྲོ་ལ་བརྩེ་བས་རྗེས་
ཆགས་ཀྱི། །ཡེ་ཤེས་སྣང་བ་རྒྱས་པའི་རོལ་མོ་ནི། །གང་འདུལ་ཅིར་ཡང་འཆར་བའི་ཟློས་གར་གྱིས། །འགྲོ་ཀུན་ཡིད་ཀྱི་བརྟན་པ་འཕྲོག་ལ་འདུད། །རབ་དམར་བྱེ་རུའི་རྡུལ་བརྩེགས་ལྷུན་པོ་ལ། །ཉི་གཞོན་འོད་ཀྱིས་འཁྱུད་པའི་མཚར་སྡུག་དཔལ། །མཚན་དཔེའི་ཉམས་འགྱུར་བྱེ་བའི་རོལ་སྒེག་ཅན། །བཅུ་དྲུག་དགའ་བའི་ལང་ཚོ་རྒྱས་ལ་འདུད། །ཆོས་སྐུའི་ཞལ་གཅིག་ཚད་མེད་བཞི་ཡི་ཕྱག །བདེ་ཆེན་གཟི་འབར་ཁྲོ་ཆགས་སྒེག་པའི་ཉམས། །རྣམ་ཐར་གསུམ་ལྡན་སྤྱན་གསུམ་གཡོན་དུ་གཟིགས། །བདེན་གཉིས་ཞབས་ཟུང་གར་གྱིས་འགྱིང་ལ་འདུད། །རྩ་བའི་ཕྱག་གཉིས་མ་རིག་འབིགས་བྱེད་པའི། པདྨའི་མདའ་གཞུ་སྙན་གྱི་ཐད་ཀར་འགེངས། །ལྷག་མ་ལྕགས་ཀྱུ་ཨུཏྤལ་བསྣམས་པ་ཡིས། །སྲིད་ཞིའི་དགེ་མཚན་ཐོགས་མེད་འགུགས་ལ་འདུད། །ཐོད་སྐམ་དབུ་རྒྱན་རློན་པའི་དོ་ཤལ་དང་། །རུས་པའི་རྒྱན་སྤྲས་༴ ཡོན་ཏན་ཡོངས་སུ་རྫོགས། །པད་ཟླའི་སྟེང་དུ་འོད་དམར་བྱེ་བའི་དབུས། །མཁའ་འགྲོའི་ཚོགས་ཀྱིས་བསྟེན་པ་ཁྱོད་ལ་འདུད། །དེ་ལྟར་བདག་བློ་རྩེ་གཅིག་དད་པ་ཡིས། །བསྟོད་དབྱངས་སྙན་པའི་རྒྱུད་མང་བསྒྲེང་བ་ལ། །ཡེ་ཤེས་གཟིགས་པའི་བདུད་རྩིས་དགེ་བྱས་མཐུས། །ཕན་བདེའི་པདྨོ་རྟག་ཏུ་རྒྱས་མཛད་གསོལ། །རྒྱུད་སྦྱང་དམ་ཚིག་དག་པའི་སྒྲུབ་པ་པོས། །དམིགས་པའི་རྟེན་གྱི་སྦྱར་བ་སྔོན་འགྲོ་བས། །
མྱུར་མ་དཔའ་མོའི་ལྷ་སྔགས་ཡེ་ཤེས་ཀྱི། །བསྙེན་པའི་རྣལ་འབྱོར་འགྲུབ་པར་བྱིན་གྱིས་རློབས། །འཁོར་འདས་དབང་བསྒྱུར་རྗེ་བཙུན་རིགས་བྱེད་མའི། །སྒྲུབ་པ་ཟབ་མོས་ལེགས་བྲིས་བཏུད་པ་ཡིས། །རྡོ་རྗེའི་ནུས་པའི་ལང་ཚོ་ཆེས་འབར་བས། །བརྟན་གཡོ་ཟིལ་གྱིས་གནོན་པར་བྱིན་གྱིས་རློབས། །མི་དང་མི་མིན་འབྱོར་པ་ངང་གིས་འདུ། །དྲག་ཤུལ་སྦྱོར་བས་གདུག་པའི་རྒྱུན་ལུགས་བཅད། །ལོངས་སྤྱོད་རྫས་ཀྱིས་འདོད་རྒུའི་ཆར་ཆེན་འབེབས། །རབ་འབྱམས་ཕྲིན་ལས་འགྲུབ་པར་བྱིན་གྱིས་རློབས། །མདོར་ན་དབང་མཛད་དཔལ་མོའི་ཡེ་ཤེས་ཀྱིས། །བདག་གི་སྒོ་གསུམ་བྱིན་གྱིས་བརླབས་པ་ལས། །མཆོག་དང་ཐུན་མོང་དངོས་གྲུབ་རབ་འབྱམས་ཀྱིས། །རང་གཞན་དོན་གཉིས་ཡིད་བཞིན་འགྲུབ་པར་ཤོག །ཅེས་རྗེ་བཙུན་མ་ཀུ་རུ་ཀུལླེ་དཔལ་མོ་སྙིང་གི་གསེར་ཐག་ཅན་དུ་གྲགས་པ་ལ་བསྟོད་ཅིང་གསོལ་བ་འདེབས་པའི་ཚིགས་སུ་བཅད་པ་བློ་ཀ་དང་པོ་ཡིག་རྙིང་ལས་བྱུང་བ་ལ་འཕྲོ་མཐུད་དེ་རིག་པ་འཛིན་པ་མཉྫགྷོ་ཥས་བྲིས་པ་དགེ།
བཅོམ་ལྡན་འདས་འཇམ་པའི་རྡོ་རྗེའི་སྒོ་ནས་ཤིས་པར་བརྗོད་པའི་ཚིགས་སུ་བཅད་པ་མེ་ཏོག་གཞོན་ནུའི་དོ་ཤལ།
བཅོམ་ལྡན་འདས་འཇམ་པའི་རྡོ་རྗེའི་སྒོ་ནས་ཤིས་པར་བརྗོད་པའི་ཚིགས་སུ་བཅད་པ་མེ་ཏོག་གཞོན་ནུའི་དོ་ཤལ་ཅེས་བྱ་བ་བཞུགས་སོ། །ན་མཿཤྲཱི་གུ་ར་ཝེ། གང་གི་མཚན་ཙམ་ལན་གཅིག་དྲན་པས་ཀྱང་། །གཟུང་འཛིན་སྙིང་གི་མུན་པ་ཀུན་གསལ་ནས། །བློ་གྲོས་པདྨོ་མཆོག་ཏུ་རྒྱས་མཛད་པ། །བླ་མ་འཇམ་དཔལ་གཞོན་ནུས་ཤིས་པར་མཛོད། །དམར་སེར་མཛེས་སྐུའི་
སྣང་བརྙན་མངོན་སུམ་དུ། །སྐལ་བཟང་མིག་གི་བདུད་རྩི་བཏུང་བ་དང་། །ལྷན་ཅིག་རྡོ་རྗེའི་གསུང་གིས་དབུགས་དབྱུང་བའི། །དགེ་མཚན་མཆོག་གིས་རྟག་ཏུ་སྐྱོངས་གྱུར་ཅིག །གཟོད་ནས་མཐའ་བཞིའི་སྤྲོས་པ་ལས་འདས་པའི། འོད་གསལ་སེམས་ཀྱི་རྡོ་རྗེ་འཇམ་པའི་དབྱངས། །སྙིང་དབུས་ཐིག་ལེར་སད་པའི་སྣང་བ་ཡིས། །སྲིད་ཞིའི་རྒུད་པ་མཐའ་དག་སེལ་བར་ཤོག །དེ་ཚེ་ཐ་མལ་འཁྲུལ་པའི་རྟོག་ཚོགས་ཀུན། །འཇམ་དཔལ་ཡེ་ཤེས་སེམས་དཔས་བྱིན་བརླབས་པས། །སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི། །དག་པའི་རྣམ་རོལ་གཅིག་ཏུ་འཆར་གྱུར་ཅིག །མཐར་ཐུག་སངས་རྒྱས་ཀུན་གྱི་ཡེ་ཤེས་སྐུ། །བཅོམ་ལྡན་རྡོ་རྗེ་རྣོན་པོའི་གསང་གསུམ་དང་། །དབྱེར་མེད་རྣམ་པ་ཉི་ཤུས་བྱང་ཆུབ་པའི། །སྒྱུ་འཕྲུལ་དྲྭ་བའི་གོ་འཕང་མཉེས་པར་ཤོག །ཅེས་པའང་ཤཱཀྱའི་བཙུན་པ་འཇམ་དབྱངས་མཁྱེན་བརྩེས་གང་ཤར་བྲིས་པ་བི་སཇིཥཱ་ཀ་ལྱཱ་ཎཾ་བྷ་བ་ཏུ།
འཕགས་མ་རྡོ་རྗེ་དབྱངས་ཅན་མ་ལ་བསྟོད་པ།།
རྒྱ་གར་སྐད་དུ། ཨཱརྱ་བཛྲ་སྭ་ར་སྭ་སྟི་སཱུ་ཏི། བོད་སྐད་དུ། འཕགས་མ་རྡོ་རྗེ་དབྱངས་ཅན་མ་ལ་བསྟོད་པ། བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །གང་གིས་སྲིད་པའི་འཆིང་བ་ཀུན། །ལྷ་མོ་ཁྱོད་དྲན་གུས་བཟླས་པས། །སྐད་ཅིག་ཉིད་ལ་འཇོམས་མཛད་པའི། །རྒྱལ་བ་ཀུན་གྱི་ཡུམ་ལ་འདུད། །མ་རིག་མ་རིག་ལས་བྱུང་བ། །ཡེ་ཤེས་ཡེ་ཤེས་མཆོག་མངའ་བས། །
མྱུར་བ་མྱུར་བར་གཅོད་མཛད་པའི། །ལྷ་མོའི་ལྷ་མོ་ཁྱོད་ལ་འདུད། །བློ་གྲོས་མཆོག་ཀུན་སྩོལ་མཛད་ཅིང་། །བློ་གྲོས་མཐའ་ཡས་སྟེར་མཛད་པ། །བློ་གྲོས་ཤེས་རབ་ཕ་རོལ་ཕྱིན། །བློ་གྲོས་མི་ཟད་གཏེར་གྱུར་འདུད། ཞལ་སྐོང་། །འཕགས་མ་ཁྱོད་ལ་གསོལ་བཏབ་པའི། །ལེགས་བྱས་ཟླ་བའི་འོད་སྣང་གིས། །རྨོངས་པའི་མུན་པ་ཀུན་བསལ་ནས། །བློ་གྲོས་ཆུ་གཏེར་རྒྱས་པར་ཤོག །ཚོགས་ཟུང་ཡེ་ཤེས་མེ་ལོང་ལས། །སྒྲ་དབྱངས་ལྷ་མོར་ཡོངས་ཤར་བའི། །ལྷ་སྔགས་ཏིང་འཛིན་རོལ་པའི་གཟིས། །དངོས་གྲུབ་རྣམ་གཉིས་འགྲུབ་གྱུར་ཅིག །ངག་གི་དཔལ་མོའི་གསང་གསུམ་གྱི། །བྱིན་རླབས་བདུད་རྩིའི་རྒྱུན་བཟང་པོས། །སྒྲིབ་གསུམ་དྲི་མ་ཀུན་སྦྱངས་ནས། །མཁྱེན་གཉིས་ངལ་འཚོ་བསྟེན་པར་ཤོག །མདོར་ན་འདི་ནས་བྱང་ཆུབ་བར། །འཕགས་མ་ཁྱོད་ཀྱིས་རྗེས་བཟུང་ནས། །ཤེས་རབ་ཕ་རོལ་ཕྱིན་མའི་དབྱིངས། །ཁམས་གསུམ་དབུགས་འབྱིན་སྩལ་གྱུར་ཅིག །ཅེས་འཕགས་མ་དབྱངས་ཅན་མ་དམར་མོའི་བསྟོད་པ་གསང་སྒྲུབ་ཀྱི་ཡི་གེ་རྙིང་པ་ལས་བྱུང་བ་ལ། འདོད་དོན་གསོལ་བའི་སྨོན་ལམ་གྱི་ཚིགས་སུ་བཅད་པའི་ཞལ་སྐོང་འདིའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གཞུང་དང་མཐུན་པར་བྲིས་པ་དགེ། ན་མཿསྭ་ར་སྭ་སྟེ། མཚོ་བྱུང་དབྱངས་ཅན་དང་ཟླ་བ། དཀར་དམར་གནག་པ་ལ། །རི་དྭགས་མཚན་མས་ཉེར་མཛེས་པ། །ཆེ་དགུའི་རལ་རྩེར་མི་ཕྱེད་བཞིན། །དབེན་པའི་གནས་སུ་རྟག་པར་འཇུག །ཅེས་ཀྱང་སྨྲས་སོ། །
སྒྲ་དབྱངས་ལྷ་མོ་དབྱངས་ཅན་མ་དམར་པོ་ལ་བསྟོད་ཅིང་གསོལ་བ་འདེབས་པ་བློ་གྲོས་མཆོག་སྩོལ།
སྒྲ་དབྱངས་ལྷ་མོ་དབྱངས་ཅན་མ་དམར་པོ་ལ་བསྟོད་ཅིང་གསོལ་བ་འདེབས་པ་བློ་གྲོས་མཆོག་སྩོལ་ཅེས་བྱ་བ་བཞུགས་སོ། །ན་མཿཤྲཱི་མཱི་གུ་རུ་སྭ་ར་སྭ་སྟེ། ཕུལ་བྱུང་ལེགས་བྱས་བྱེ་བའི་ཚོན་རིས་ཀྱིས། །ཚོགས་གསུམ་ལང་ཚོའི་མཚར་སྡུག་ཡོངས་གང་བ། །བཅོམ་ལྡན་འདས་མ་སྭ་ར་སྭ་སྟི་ཡིས། །བདག་གི་ཡིད་ལ་བློ་ཡི་མཆོག་སྦྱིན་མཛོད། །རྣམ་པ་ཀུན་ལྡན་འཆི་མེད་ལམ་ཡངས་པོར། །ཟུང་འཇུག་བརྒྱ་བྱིན་མཛུབ་རྩེས་བྲིས་པ་ཡི། །མཚན་བཟང་བྱེ་རུའི་རྡུལ་མང་བརྩེགས་པའི་གཟུགས། །བདག་གི་མིག་ལ་མངོན་སུམ་བསྟན་དུ་གསོལ། །རྟག་ཏུ་བརྗོད་པའི་ཕ་རོལ་ལས་བརྒལ་ཀྱང་། །རིག་སྔགས་ནོར་བུའི་རྒྱུད་མང་བརྡུངས་བའི་སྒྲས། །འགྲོ་མང་མ་རིག་གཉིད་ལས་སློང་བའི་དབྱངས། །བདག་གི་ངག་ལ་མངོན་སུམ་ཞུགས་པར་མཛོད། །སྤྲོས་བྲལ་འཆི་མེད་ལམ་གྱི་ཕ་མཐའ་ཡིས། །མཚོན་མིན་མཁྱེན་བརྩེའི་ཉམས་བརྒྱས་རོལ་པ་པོ། །དོན་དམ་རྡོ་རྗེ་སྒྲ་དབྱངས་ལྷ་མོའི་ཞལ། །བདག་གི་སྙིང་ལ་མངོན་སུམ་ཤར་བར་མཛོད། །དེ་ལྟར་ཐ་མལ་འཁྲུལ་པའི་སྒོ་གསུམ་པོ། །སྐུ་གསུང་ཐུགས་ཀྱི་རྡོ་རྗེར་བྱིན་བརླབས་པས། །རིག་བྱེད་སྨྲ་དབང་བྱེ་བའི་གཙུག་ཏོར་རྩེར། །རྐང་སེན་ཨུཏྤལ་དལ་གྱིས་འགོད་མཁས་ཤོག །ཅེས་པའང་བསིལ་ལྡན་ལྗོངས་ཀྱི་སྙན་ངག་སྨྲ་བ་སྒྲ་དབྱངས་ལྷ་མོ་དགྱེས་པའི་འབངས་ཀྱིས་གང་ཤར་ཡུད་ཙམ་ལ་བརྗོད་པ་དེ་དེ་བཞིན་དུ་འགྲུབ་པར་གྱུར་ཅིག །སརྦ་དཱ་མངྒ་ལཾ།། ༈ །།
བཅོམ་ལྡན་རྟ་མཆོག་རོལ་པ་ལ་བསྟོད་པ་གྲུབ་གཉིས་རོལ་མོ།
བཅོམ་ལྡན་རྟ་མཆོག་རོལ་པ་ལ་བསྟོད་པ་གྲུབ་གཉིས་རོལ་མོ་ཞེས་བྱ་བ་བཞུགས་སོ། །གང་ཞིག་བསམ་གྱིས་མི་ཁྱབ་ཆོས་ཉིད་ནི། །གཟུང་འཛིན་ཡུལ་དང་མཛའ་བ་མ་ཡིན་ཀྱང་། །སྣ་ཚོགས་རྟོག་པའི་རྗེས་མཐུན་སྒྱུ་འཕྲུལ་གར། །འདི་ན་དྲག་ཤུལ་ཆོ་གའི་བྱེད་པོར་དབྱེ། ༡ །རབ་འབར་ཉི་གཞོན་འཆར་ཀའི་ལང་ཚོ་ལ། །གར་དགུའི་ཕྱག་རྒྱས་དཔའ་བའི་ཡེ་ཤེས་སེམས། །མཚན་དཔེའི་སྣང་བརྙན་མཐོང་བའི་དགའ་སྟོན་གྱིས། །གྲུབ་གཉིས་བདུད་རྩིའི་དཔལ་སྟེར་ཁྱོད་ལས་སུ། ༢ །གཙུག་ཏོར་ནོར་བུའི་འཁྲི་ཤིང་ལ་མཚན་པའི། །མགྱོགས་འགྲོའི་བཞད་ཞལ་གཡོ་བའི་བརྟུལ་ཞུགས་དང་། །རབ་འགྲོགས་ཧ་ཧིའི་གད་རྒྱང་སྒྲོག་པ་ཡིས། །ཚར་གཅོད་རྗེས་འཛིན་ཕྲིན་ལས་དུས་གཅིག་སྦྱིན། ༣ །གདོད་ནས་ཀུན་རྟོག་ཚུལ་ལས་རིང་འདས་པའི། །རྣམ་ཐར་གསུམ་ལྡན་སྟོང་ཉིད་མཛའ་ན་མོ། །རབ་འབར་སྙིང་རྗེའི་ལང་ཚོ་ལ་ཆགས་ན། །ཕན་བདེའི་སྣང་བ་འགུགས་པའི་བྱེད་པོར་གྲུབ། ༤ །བྱང་སེམས་ཤར་གྱི་ཐིག་ལེས་དཀྲིས་པའི་འོད། །ཀུན་ཏུ་ཞི་བའི་དཔལ་གྱི་དུམ་བུ་ཡང་། །དབང་དྲག་བྱིན་ཟས་འཁྱུད་པའི་མངོན་རྟོགས་ཀྱིས། །ལོག་འདྲེན་ཚོགས་ཀུན་བསྲེགས་པ་འདི་ཅི་ཞིག ༥ །ཤིན་ཏུ་དཔག་དཀའི་ཡོན་ཏན་ཀུན་གསལ་མཐའ། །གསེར་གྱི་མངལ་ཅན་བློས་ཀྱང་
འཆིང་ནུས་ཀྱི། །གོ་སྐབས་གཞན་དུ་གྱུར་པའི་གནས་མཐོང་ན། །གྱི་ནའི་རྟོག་པས་གཞལ་བར་སྨོས་ཅི་འཚལ། ༦ །གང་ཞིག་སྣ་ཚོགས་འཁྲུལ་པའི་རླབས་ཕྲེང་ནི། །བསམ་གྱིས་མི་ཁྱབ་གཡོ་བའི་རོལ་མཚོ་ཆེར། །སྡུག་བསྔལ་གསུམ་གྱི་ཆུ་སྲིན་གྱིས་བཅིངས་པ། །ཁྱོད་མཚན་ནོར་བུའི་གདེངས་ཀས་ཡོངས་སུ་བཅིལ། ༧ །དེ་ན་ཁྱེད་ཤེས་དད་པའི་དྲི་བཞོན་གྱིས། །རྣམ་པར་རྩེན་པའི་ཐུགས་རྗེའི་ཆུ་ཁུར་ལས། །མཆོག་ཐུན་ཟླ་བའི་བདུད་རྩི་ཞུ་བ་ཡིས། །གཟུང་འཛིན་མེ་ལྕེའི་དོ་ཤལ་མནལ་གྱུར་ཅིག ༨ །ཅེས་ལྷག་པའི་ལྷ་མཆོག་གར་གྱི་དབང་ཕྱུག་ལ་བསྔགས་པའི་མེ་ཏོག་ཕྲ་མོ་འདིའང་གཞོན་ནུ་ཨ་བྷཱ་ཡས་རང་ལོ་བཅུ་བཞི་པར་འཐོར་བ་ཛ་ཡནྟུ།། ༈ །།བཅོམ་ལྡན་འདས་རྡོ་རྗེ་སེམས་དཔའ་ལ་བསྟོད་པ་ཀུནྡའི་དོ་ཤལ་ཅེས་བྱ་བ། ན་མོ་བཛྲ་སཏྭཱ་ཡ། གང་སྐུ་ཟླ་བའི་རྡུལ་གྱིས་བྱུགས་པ་ལྟའི། །མཚན་གྱི་སྤྲིང་ཡིག་འཛུམ་ཟེར་ལྷུང་ཙམ་གྱིས། །སྒྲིབ་གཉིས་མུན་པ་བཟའ་བའི་དཔལ་ཡོན་ཅན། །བཅོམ་ལྡན་རྡོ་རྗེ་སེམས་ལ་ཕྱག་འཚལ་ལོ། ༡ །ཁྱོད་གསུང་ཐབས་ཤེས་ཨཱ་ལི་ཀཱ་ལིའི་སྒྲ། །ལོངས་སྤྱོད་ཡོངས་རྫོགས་འཁོར་ལོར་འདུས་པ་ལས། །གསང་སྔགས་ཡི་གེ་བརྒྱ་པའི་རླབས་ཕྲེང་ཅན། །ལས་ཉོན་རྒྱུར་བཅས་འཁྲུད་ལ་ཕྱག་འཚལ་ལོ། ༢ །ཁྱོད་ཐུགས་གཟུང་འཛིན་སྒྲ་གཅན་ལས་གྲོལ་ཀྱང་། །སྙིང་རྗེས་ཞི་ལ་མི་གནས་ཉིན་མོར་བྱེད། རྟག་པར་གཟུགས་སྐུའི་མཁའ་དབྱིངས་
ལ་རོལ་པས། མཁྱེན་བརྩེའི་འོད་ཟེར་སྟུག་པོ་སྤྲོ་ལ་འདུད། ༣ །གསང་གསུམ་མི་ཟད་རྒྱན་གྱི་འཁོར་ལོ་ཆེ། །རབ་འབྱམས་སྒྱུ་འཕྲུལ་དྲྭ་བའི་རོལ་མོ་རུ། །ཁ་སྦྱོར་ཡན་ལག་བདུན་ལྡན་དཀྱིལ་འཁོར་གཙོ། །རྣམ་པ་ཀུན་གྱི་མཆོག་དང་ལྡན་ལ་འདུད། ༤ །གཙུག་ཏོར་ནོར་བུའི་གདེངས་ཀ་གཡོ་བའི་འོད། །གང་ལ་རེག་ན་སྒྲིབ་པའི་མུན་འཕྲོག་ནས། །ཕན་བདེའི་འབྱོར་པའི་དཔལ་གྱིས་ཕྱུག་མཛད་ཕྱིར། །སངས་རྒྱས་ཀུན་གྱིས་བསྔགས་པ་ཁྱོད་ལ་འདུད། ༥ །གང་ཡང་ལན་གཅིག་དྲན་པའི་མདུན་ས་རུ། །སྡིག་ཏོའི་གཡུལ་གྱི་ཕྲུ་མ་མི་གནས་ན། །ཤིན་ཏུ་གུས་པའི་གསོལ་འདེབས་ལྕགས་ཀྱུ་ཡིས། །ཕན་བདེའི་དགེ་མཚན་འགུགས་ལ་སོམ་ཉི་ཅི། ༦ །དེ་ཕྱིར་མཆོག་ཏུ་དད་པའི་ཆུ་རྡུལ་གྱིས། །རབ་བརླན་བྱང་ཆུབ་སྤྱོད་པའི་སྟེང་འཐུང་དཀར། །ཐར་པའི་ཕྱོགས་སུ་གྲོལ་བའི་འཛུམ་ཕྲེང་དེས། །ཀུན་ཡིད་དགའ་བའི་སིམ་པ་ཐོབ་གྱུར་ཅིག ༧ ། དཀར་མིན་ལས་ཀྱིས་འཁོར་བར་དམ་བཅིངས་པའི། །སྡུག་བསྔལ་གསུམ་གྱི་ཞགས་པས་མནར་བ་ཀུན། །ཐུགས་རྗེའི་ཕྱག་གིས་དཀྲོལ་ནས་མངོན་མཐོ་དང་། ། ངེས་ལེགས་ཐེམ་སྐས་མཆོག་ལ་འཛེགས་གྱུར་ཅིག ༨ །ཁྱད་པར་བསླབ་གསུམ་ཉིན་མོའི་རྡུལ་ཕྲེང་གིས། །རིག་གྲོལ་ཨུཏྤལ་འདབ་བརྒྱ་འབྱེད་པའི་མོད། །ཁ་ན་མ་ཐོའི་མུན་པ་ལས་རྒྱལ་ཏེ། །ཡང་དག་
ལམ་གྱི་སྦྲང་རྩིས་འཁྱུད་པར་ཤོག ༩ །དེ་ལྟར་བདག་གི་བཅོམ་ལྡན་རྡོ་རྗེ་སེམས། །རབ་ཏུ་གུས་པས་བསྟོད་པའི་ཟླ་ཤེལ་གྱིས། །ཉོན་ཡིད་ཤེས་བྱའི་བག་ཆགས་མུན་བཅོམ་སྟེ། །སྐུ་བཞིའི་ཀུནྡའི་ཕྲེང་བ་བཞད་གྱུར་ཅིག ༡༠ །ཅེས་བཅོམ་ལྡན་འདས་རྡོ་རྗེ་སེམས་དཔའ་ལ་བསྟོད་པ་ཉུང་དུ་འདིའང་གཞོན་ནུ་ཨབྷཱ་ཡས་ལྷག་པའི་ལྷ་འདི་ཉིད་ཀྱི་ཉམས་ལེན་ལ་བརྩོན་སྐབས་གསོལ་བ་བཏབ་པ་ཛ་ཡནྟུ།། ༈ །།ལྷག་པའི་ལྷ་མཆོག་རྡོ་རྗེ་གཞོན་ནུ་ལ་བསྟོད་པ་བདུད་དཔུང་འདུལ་བའི་གད་རྒྱང་ཞེས་བྱ་བ། རྒྱ་གར་སྐད་དུ། བྷ་ག་ཝ་ཏེ་བཛྲ་ཀུ་མཱ་ར་སྟོཏྟཾ་ནཱ་མ། །བོད་སྐད་དུ། བཅོམ་ལྡན་འདས་རྡོ་རྗེ་གཞོན་ནུ་ལ་བསྟོད་པ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གང་གི་རང་བཞིན་གདོད་ནས་སྤྲོས་བྲལ་ནམ་མཁའི་རྡོ་རྗེའི་རོལ་མོ་ནི། །རྣམ་པ་ཀུན་གྱི་མཆོག་དང་ལྡན་པའི་གར་དགུས་དཔའ་བའི་ཡེ་ཤེས་སྐུ། །ལན་གཅིག་སྣང་ཆར་འཛུམ་པའི་མོད་ནས་གྲུབ་པ་གཉིས་ཀྱི་དཔལ་སྟེར་བའི། །ཧེ་རུ་ཀ་དཔལ་རྡོ་རྗེ་ཁྲོས་པ་དེ་རིང་བདག་ལ་རྩེ་དགས་སྐྱོངས། ༡ །ཨེ་དབྱིངས་འགྱུར་མེད་བདེ་བ་ཆེན་པོའི་འཇོ་སྒེག་གཡོ་བའི་དཀྱིལ་འཁོར་དེར། །ཝཾ་ཡིག་སྤྲོས་པའི་མཐའ་དང་མི་མཛའ་རྡོ་རྗེ་བཙུན་མོས་འཁྱུད་པ་ལས། །ཟུང་འཇུག་ཁ་སྦྱོར་ཡན་ལག་བདུན་ལྡན་སྣང་སྟོང་མཚན་དཔེར་ཤར་བའི་གཟུགས། །བདུད་ཀྱི་དགྲར་གྱུར་རྣལ་འབྱོར་ལ་བརྩེ་རབ་འབར་ཐུགས་རྗེའི་
དཔལ་ལ་བསྟོད། ༢ །གང་དུ་འཇུག་ན་ཐར་པ་ཆེན་པོའི་གཞལ་ཡས་ཀུན་གསལ་བཞུ་བའི་རྒྱུན། །མངོན་པར་བགོས་ལྟའི་འཇིགས་རུང་སྲིན་པོའི་གྲོང་ཁྱེར་གཅིག་ཏུ་འཁྱིལ་བའི་དབུས། །སྲབ་འཇམ་མཉེན་ལྕུག་ཀུན་ནས་ཡིད་འོང་ཨུཏྤལ་འཛུམ་དཀར་གཡོ་བའི་རྩེར། །སྲིད་གསུམ་གནོན་པའི་སྤྲིང་ཡིག་སྤྲོ་ཕྱིར་སྣང་བྱེད་ཟུང་གི་གེ་སར་མཛེས། ༣ །དེ་ན་ཞབས་མཐིལ་འཁོར་ལོ་བཀོད་པའི་ཡེ་ཤེས་སྐུ་ཅན་ཁྲོ་བོའི་རྒྱལ། །ཆེ་བའི་ཆེ་མཆོག་རིན་ཆེན་མཐོན་ཀའི་ལྷུན་པོ་ཇི་བཞིན་བརྗིད་པའི་སྐུ། །མ་ཟླུམ་འོད་ཟེར་སྟོང་ཕྲག་གིས་འཁྱུད་གྲོང་ཁྱེར་གསུམ་གྱི་ཐོར་ཚུགས་རྩེའི། །འབབས་སྟེགས་གྱུར་ལ་ངོ་མཚར་ཅི་ཞིག་སྲིད་ཞིའི་སྤྱི་དཔལ་དེ་ལ་འདུད། ༤ །རྩ་བའི་ཞལ་ནི་ཨིནྡྲ་ནཱི་ལའི་ཕུང་པོ་ཇི་བཞིན་དཔའ་བའི་གཟུགས། །གཡས་པ་ཟླ་ཤེལ་གསར་པའི་མདོག་མཚུངས་ཀུན་ཏུ་འཇོ་སྒེག་ཚུལ་དང་ལྡན། །གཅིག་ཤོས་པདྨ་རཱ་གའི་འོད་ལྟར་འཇིགས་སུ་རུང་བའི་སྣང་བྱེད་ཅན། །གང་གིས་མཐོང་ན་གྲུབ་གཉིས་དཔལ་སྟེར་ནོར་བུའི་འཁྲི་ཤིང་ཁྱོད་ལ་བསྟོད། ༥ །ཕྱག་གི་དཀྱིལ་འཁོར་དྲུག་གི་གཡས་པར་ཐེག་དགུ་ཡོངས་རྫོགས་རྡོ་རྗེ་དང་། །དེ་བཞིན་རྒྱུད་ལྔའི་འགྲོ་རྣམས་སྒྲོལ་མཛད་ཡེ་ཤེས་མཆོག་གི་རྭ་ལྡན་པ། །གཞན་དུ་དུག་གསུམ་རྟོག་ཚོགས་སྲེག་མཛད་རྣམ་ཐར་གསུམ་ལྡན་མཚོན་ཆའི་དབལ། །མཐའ་གཉིས་གཟུང་
འཛིན་འཁྲུལ་པའི་སྙིང་འབིགས་ཀཱི་ལ་ཡ་ཡིས་མཚན་ལ་འདུད། ༦ །བིནྡྷ་ར་ལྟར་དམར་བའི་སྤྱན་གསུམ་གཡོན་དུ་གཡོ་བས་གཟིགས་པའི་མོད། །ཡེ་ཤེས་མེ་དང་མཉམ་པར་སྦྱོར་དེས་ཉམས་པའི་བདུད་དགྲ་སྲེག་མཛད་ཅིང་། །ཆར་སྤྲིན་སྟུག་པོ་རབ་ཏུ་གནག་བཞིན་ཀུན་ནས་སྒེག་པའི་སྨིན་མ་ལས། །སྣ་ཚོགས་འོད་ཟེར་ཞགས་པ་འཕྲོ་བས་སྲིད་ཞིའི་དཔལ་ཡོན་སྡུད་ལ་འདུད། ༧ །གང་ཞིག་ནགས་ཚལ་བསྲེག་ཟས་འཁྱུད་ལས་རབ་གཡོ་མིག་སྨན་མདོངས་འཛིན་པ། །སྤྲིན་གྱི་བཞོན་པས་མཁའ་དབྱིངས་ཁེངས་ལྟར་གྱེན་དུ་བསྒྲེང༨ པའི་རལ་པ་ནི། །ས་བླའི་ལྷ་ཡང་བསྲེག་པ་བཞིན་བྱེད་ཐུར་དུ་འཁྱིལ་བའི་འོད་ཟེར་དཔལ། །ཤིན་ཏུ་འབར་འཁྲུགས་ལོག་འདྲེན་སྟོབས་འཕྲོག་འབར་བའི་སྐུ་ཅན་དེ་ལ་འདུད། ༨ །གང་དེ་ལག་འགྲོའི་ཞགས་པས་འཆིང་བའི་ཟུར་ཕུད་རབ་གཡོའི་རྩེ་མོ་རུ། །ཀུནྡའི་འདབ་རྡུལ་རྣམ་པར་བྱུགས་ལྟའི་བྷན་ཁ་སྦྱོར་གཞལ་ཡས་དབུས། །རིགས་ཀྱི་བདག་པོ་སྟངས་དཔྱལ་མཉམ་སྦྱོར་བདེ་སྟོང་ལང་ཚོའི་འཇོ་སྒེག་ཅན། །མཆོག་གི་གྲུབ་པའི་དགའ་སྟོན་སྦྱིན་ཕྱིར་ནོར་བུའི་གདེངས་ཀས་མཚན་ལ་འདུད། ༩ །གཏི་མུག་མཁྱེན་པའི་སྟོབས་ཀྱིས་བཅོམ་ཕྱིར་གཉིས་འཐུང་སྟོད་གཡོགས་སར་པས་མཛེས། །ལས་ཀྱི་ཞེ་སྡང་ཡེ་ཤེས་ཀྱིས་འཕྲོག་ཤརྒྱུ་ལ་ཡི་ཤམ་ཐབས་དང་། །འདོད་ཆགས་བདེ་ཆེན་ལང་ཚོ་རབ་འཇོམས་ཞིང་
ཆེན་པགས་པའི་བླ་གོས་ཅན། །འདུ་བྱེད་ལྔ་བཅུའི་མགོ་བོའི་ཕྲེང་བ་རྣམ་ལྔའི་སྦྲུལ་གྱིས་སྤུད་ལ་འདུད། ༡༠ །དཔྲལ་བར་ཐལ་ཆེན་ཚོམ་བུ་གཡོ་ཞིང་སྨིན་དཔྲག་རཀྟའི་ཐིག་ལེས་བརྒྱན། །ཨོས་ཀོར་ཞག་གི་ཟོ་རིས་ཀྱིས་མཛེས་རྣམ་པར་ཐར་པའི་སྤྱན་གསུམ་འབར། །སྐྱེ་བ་རྣམ་བཞི་རྩད་ནས་གཅོད་བྱེད་གངས་རིའི་དཔལ་ལྟར་སྣང་བའི་ཚེམས། །སྣ་ཚོགས་རུས་པའི་རྒྱན་ཆས་རབ་སྒེག་དར་གྱི་འཕྱང་འཕྲུལ་དཔྱོངས་ལ་འདུད། ༡༡ །བསྐལ་པ་འཇིག་པའི་དུས་ཀྱི་འཁྱོག་འགྲོ་ཀུན་ཏུ་གཡོ་བའི་ཕུང་པོ་ལས། །གདུག་པ་ཅན་རྣམས་ཚར་གཅོད་རྗེས་བཟུང་ཕྲིན་ལས་མཆོག་གིས་ལྷག་གྱུར་ཅིང་། །ཡེ་ཤེས་ལྔ་དང་མཉམ་པར་སྦྱོར་བའི་ཚོན་རིས་སྟུག་པོས་བཀྲ་བའི་དབུས། །འགྱིང་བཅས་ཚུལ་གྱིས་གཟུགས་སྐུ་རོལ་པས་མཐོང་ན་སྐྲག་མཛད་ཁྱོད་ལ་འདུད། ༡༢ །འདི་ན་ཐོག་མེད་འཁོར་བའི་དུས་ནས་གཟུང་འཛིན་དྲྭ་བས་བཅིངས་པ་ལས། །སླར་ཡང་མངོན་པའི་ང་རྒྱལ་གྱིས་འཁྱུད་འབར་ཞིང་རྩུབ་པའི་སྣང་ཚུལ་ནི། །མི་སྡུག་ཁྲོས་པའི་བདུད་དགྲའི་སྡེ་ཚོགས་ཁྱོད་མཚན་ལན་གཅིག་ཐོས་པས་ཀྱང་། །སྲོག་གི་རྒྱུ་བ་ཉེ་བར་འགགས་ཏེ་ཞབས་མཐིལ་སོར་མོ་བསྟེན་པ་བཞིན། ༡༣ །རྗེས་སུ་ཆགས་པའི་ཡེ་ཤེས་ཀྱིས་རོལ་རྡོ་རྗེ་སྙེམས་མ་བདེ་བའི་བདག །མཐོན་མཐིང་ལྟར་གནག་ཆགས་བྲལ་པདྨ་དགའ་བཞིའི་བདེ་སྐྱོང་ལ་འཁྱུད་
པས། །ཁྱོད་ཀྱི་སྐུ་ལ་བདེ་བར་འཁྲིལ་ཞིང་ཕྱིན་དྲུག་རུས་པའི་རྒྱན་ཆ་དང་། །བྱེ་རུའི་ཐིག་ལེའི་མཆོག་མ་གཡོ་བའི་སྨད་དཀྲིས་གསར་པས་མཛེས་དེར་འདུད། ༡༤ །གཞན་ཡང་གང་གི་གསང་གསུམ་ངོ་བོ་རྡུལ་གྱི་ཐིག་ལེའི་འཇོ་སྒེག་ལས། །གྲངས་མེད་མོས་པའི་ཆུ་གཏེར་རྙོག་བྲལ་ཐ་དད་ཀུན་ཏུ་འཛིན་པའི་གཟུགས། །སྣ་ཚོགས་སྒྱུ་འཕྲུལ་དཔག་ཡས་རོལ་གར་རིགས་ལྔ་ཧེ་རུ་ཀ་དཔལ་བཅུ། །འཆོལ་བའི་འཇིགས་གཟུགས་ཕྲིན་ལས་སྣ་ཚོགས་བསམ་མི་ཁྱབ་པ་དེ་ལ་འདུད། ༡༥ །དབྱིངས་ནས་ཞི་བའི་ཡེ་ཤེས་ཆེན་པོ་དཔལ་གྱི་དུམ་བུའི་བསིལ་ངད་ལྟར། །ཁྲོ་བ་མེད་ཀྱང་རྗེས་ཆགས་སྙིང་རྗེའི་མེ་ལྕེ་གཡོ་བས་འཁྱུད་པ་ལས། །དེང་འདིར་རྡོ་རྗེ་སྲིན་པོའི་སྐུར་བསྟན་བརླང་པོར་སྤྱོད་ལ་གདུང་བའི་ཚུལ། །བསམ་གྱིས་མི་ཁྱབ་སྒྱུ་འཕྲུལ་དྲྭ་བའི་རོལ་གར་རྣམ་པར་སྟོན་ལ་འདུད། ༡༦ །གཟུང་འཛིན་ཡུལ་དང་མཛའ་བ་མ་ཡིན་ཟབ་ཞི་སྤྲོས་བྲལ་ཆོས་ཀྱི་སྐུ། །ཁ་སྦྱོར་བཞི་ལྡན་སྣང་སྟོང་ཟུང་འཇུག་བདེ་བ་ཆེན་པོ་ལོངས་སྤྱོད་རྫོགས། །གང་འདུལ་མོས་པའི་རྗེས་འགྲོའི་སྐུར་སྣང་སྣ་ཚོགས་སྤྲུལ་པའི་སྒྱུ་འཕྲུལ་གར། །སྐུ་གསུམ་དབྱེར་མེད་ཁྱབ་བདག་རྡོ་རྗེ་ཁྲོས་པའི་དཔལ་ལ་སྙིང་ནས་འདུད། ༡༧ །ཁྱོད་ཀྱི་ཡོན་ཏན་རྗེས་སུ་སྒྲུབ་པའི་རྣལ་འབྱོར་ཅན་ལ་དངོས་གྲུབ་སྟེར། །རྣམ་པར་འགལ་བའི་མ་རུངས་ཐམས་ཅད་འགུགས་ཤིང་
འཐག་གཅོད་རོལ་པར་མཛད། །ཕྱོགས་ལྷུང་བྲལ་བའི་ཐུགས་རྗེ་ཉིད་ནི་ཅིར་ཡང་བསྒྱུར་བའི་མངའ་བདག་ཅན། །ཡིད་བཞིན་རོལ་པར་སྣང་བར་མཛད་པའི་ཁྲོ་བོའི་རྒྱལ་པོར་བདག་འདུད་དོ། ༡༨ ། དེ་ལྟར་ཕྱི་ནང་གཞན་གསུམ་ངོ་བོ་དག་པའི་བདག་ཉིད་བཅོམ་ལྡན་འདས། །རྟེན་དང་བརྟེན་པའི་དཀྱིལ་འཁོར་འཁོར་ལོར་གུས་པའི་བསྔགས་བརྗོད་མནྡཱ་ར། །དོན་ལྡན་ཚིག་གི་སྲད་བུར་སྤེལ་བ་གང་ཞིག་འཐོབ་བའི་སྐལ་བཟང་རྣམས། །ཐུན་མོང་མཆོག་གི་འཇོ་སྒེག་ལ་རོལ་དོན་གཉིས་ལྷུན་གྱིས་འགྲུབ་པར་མཛོད། ༡༩ །གནས་སྐབས་ཀུན་ཏུ་གདུང་བའི་དཔལ་སྟེར་ཤ་ཟ་ཁྲོས་པའི་གདོང་པ་ལྟར། །མཐོང་བས་ཡིད་ཀྱི་སྐྱེས་བུ་འཆིང་བྱེད་བརྒྱད་གཉིས་འཇིགས་པའི་ཆུ་གཏེར་ལས། །གང་གི་ཐུགས་རྗེའི་རིན་ཆེན་གྲུ་བོའི་ཕ་མཐར་བརྒལ་དང་ཆབས་གཅིག་པར། །མཐོ་རིས་ཡོན་ཏན་བདུན་གྱི་འབྱོར་བས་རེ་བའི་ཤིང་རྟ་འགེངས་གྱུར་ཅིག ༢༠ །དུས་རྣམས་ཀུན་ཏུ་བདག་ཅག་གུས་པས་ཁྱོད་སྐུ་ཕྱག་རྒྱ་བཞིར་བསྒོམས་ཤིང་། །འགྲོ་འོང་དྲི་ཡི་བཞོན་པ་མ་ལུས་རིག་པའི་གསང་སྔགས་ལ་སྦྱར་ཏེ། །རྩེ་གཅིག་ཟབ་མོའི་ཏིང་འཛིན་མཆོག་ལ་མངོན་སུམ་རྟག་ཏུ་གཞོལ་བའི་མཐུས། །ཐུགས་རྗེ་ཆེན་པོའི་འཁྱུད་རྒྱས་བསྐྱངས་ནས་འགལ་བའི་རྐྱེན་རྣམས་གཞོམ་པར་མཛོད། ༢༡ །རྟོག་ཚོགས་བདེ་སྟོང་དྲྭ་བར་བསྡོམས་པའི་གདན་
གསུམ་དབྱེར་མེད་ཧེ་རུ་ཀ །ཨིནྡྲ་ནཱི་ལའི་ཞལ་བཟང་གཡོ་ཞིང་ཉིན་མོར་བྱེད་པའི་གཟི་བྱིན་ཅན། །མངོན་སུམ་མིག་གི་ཨུཏྤལ་གཞོན་ནུའི་བཏུང་བར་འཇོ་དང་ལྷན་ཅིག་ཏུ། །གསུང་གི་རྡུལ་ཕྲེང་རྣ་བར་སོན་ལས་ཕན་བདེའི་ལང་ཚོ་བཞད་གྱུར་ཅིག ༢༢ །ཁྱད་པར་ལྔ་བརྒྱའི་ཐ་མར་སྐྱེས་པས་རྣལ་འབྱོར་ལ་བརྩོན་དཔག་བསམ་དབང་། །བར་ཆད་རྐྱེན་གྱི་འཐོར་རླུང་གིས་བསྐྱོད་རྣལ་དུ་གནས་མིན་དེ་ཡི་ཚེ། །ཚད་མེད་ཐུགས་རྗེའི་ར་བར་བཟླུམས་ལས་སྒྲུབ་པའི་གྲོག་མཁར་གཡོ་མེད་དུ། །ཚུགས་པའི་མོད་ནས་ཕན་དང་བདེ་བའི་འབྲས་བུའི་ཁུར་གྱིས་ལྕི་བར་ཤོག ༢༣ །སྣང་སྟོང་ཁ་སྦྱོར་མཚན་དཔེའི་ལང་ཚོ་སྐུ་ཡི་རྡོ་རྗེར་མངོན་འགྲུབ་ཅིང་། །གྲགས་སྟོང་བདེ་ཆེན་ཡི་གེའི་རོལ་མོ་ངག་གི་དབྱིངས་སུ་སིམ་པ་དང་། །རིག་སྟོང་ལྷན་སྐྱེས་གཉུག་མར་རོལ་པས་གློ་བུར་འཁྲུལ་རྟོག་ཀུན་བསྡོམས་ཏེ། །བདེ་སྟོང་དཔྱིད་དང་ཐིག་ལེ་རོ་གཅིག་རྣམ་ཀུན་མཆོག་ལྡན་འགྲུབ་པར་ཤོག ༢༤ །དེ་ལྟར་དུག་གསུམ་དྲྭ་བ་གཅོད་མཛད་ཡེ་ཤེས་ཆེན་པོའི་འཁོར་ལོ་ཅན། །ཨེ་ཝཾ་མཱ་ཡཱ་གཉིས་མེད་རོལ་པའི་ཧེ་རུ་ཀ་དཔལ་ལ་བསྟོད་མཐུས། །གནས་ཡུལ་གྲོང་དུ་སྤྲུལ་པའི་གར་བསྒྱུར་རྒྱུ་དང་མི་རྒྱུའི་འགྲོ་བ་ཀུན། །ལྷན་ཅིག་བདེ་སྟོང་མཆོག་གི་གར་རོལ་འོག་མིན་ཞིང་དུ་འགྲོད་གྱུར་ཅིག ༢༥ །དེ་ལྟར་བཅོམ་ལྡན་འདས་ཁྲོ་བོའི་རྒྱལ་པོ་ཕྲིན་ལས་ཀྱི་བདག་ཉིད་ལྷག་པའི་ལྷ་མཆོག་
རྡོ་རྗེ་གཞོན་ནུ་ལ་བསྟོད་པ་བདུད་དཔུང་འདུལ་བའི་གད་རྒྱང་ཞེས་བྱ་བ་འདི་ནི། གསང་སྔགས་ལ་མོས་པར་སྤྱོད་པ་ཀུན་གྱི་གྲལ་མཐར་སོན་པའི་གཞོན་ནུ་ཨ་བྷཱ་ཡ་ཞེས་བགྱི་བས་གང་ཤར་གསོལ་བ་བཏབ་པ་བདག་དང་འགྲོ་བ་ཐམས་ཅད་བར་ཆད་ཀྱི་བདུད་དགྲ་ལས་རྒྱལ་ཏེ་གྲུབ་པ་གཉིས་ཀྱི་དགའ་སྟོན་ལ་ལོངས་སུ་སྤྱོད་པའི་རྒྱུར་གྱུར་ཅིག།
ཨོ་རྒྱན་སངས་རྒྱས་གཉིས་པ་ལ་བསྟོད་པ་དད་གསུམ་ཆུ་སྐྱེས་འཛུམ་ཕྲེང་།
ཨོ་རྒྱན་སངས་རྒྱས་གཉིས་པ་ལ་བསྟོད་པ་དད་གསུམ་ཆུ་སྐྱེས་འཛུམ་ཕྲེང་ཞེས་བྱ་བ། ན་མཔདྨ་ཀ་རཱ་ཡ། རྒྱལ་བ་སྲས་བཅས་སྤངས་རྟོགས་ནོར་བུའི་མཛོད། །གང་སྐུའི་ཟ་མ་ཏོག་ཏུ་རོ་གཅིག་པས། །བྲལ་སྨིན་ཡོན་ཏན་བྱེ་བའི་འཁྲི་ཤིང་གིས། །གདུལ་བྱའི་རེ་བའི་ཤིང་རྟ་འགེངས་ལ་འདུད། ༡ །ཁྱོད་སྐུ་བདེ་ཆེན་པདྨའི་ཁང་བཟང་དབུས། །མཚན་དཔེའི་གཟི་འོད་འབར་བའི་ཡེ་ཤེས་ཀྱིས། །མཐོང་ན་མི་མཐུན་མེད་པའི་དཔལ་སྦྱིན་ཕྱིར། །སྲིད་ཞི་ཡོངས་ཀྱིས་བསྔགས་པའི་རོལ་མོ་འཁྲོལ། ༢ །གང་གསུང་སྲིད་པའི་རླུང་བཅུའི་རྟེན་འབྲེལ་ཀུན། །འཕོ་མེད་ཞུ་བདེའི་དབྱིངས་སུ་རོལ་པ་ལས། །བདེ་སྟོང་འབར་འཛག་དགའ་བཞིའི་ཏམྦུ་རས། །སྒྲ་ཚིག་ལས་འདས་ཟབ་མོའི་དོན་མཆོག་སྟོན། ༣ །ཤེས་དང་ཤེས་བྱའི་ཆོས་རྣམས་མ་ལུས་ཀུན། །གཉུག་མའི་ལང་ཚོའི་ཕྱག་རྒྱར་རོ་གཅིག་པས། །འོད་གསལ་རྣམ་ཀུན་མཆོག་ལྡན་ཐུགས་རྗེའི་གཟུགས། །ལྷུན་གྲུབ་རིག་འཛིན་དབྱིངས་སུ་ངལ་བསོ་བསྟེན། ༤ །གཟུང་འཛིན་ཉི་ཟླའི་འགྲོས་ཀྱི་རྟོག་ཚོགས་ཀུན། །དབུ་མ་སྒྲ་ཅན་མཁའ་རུ་རོལ་
པའི་མོད། །ལྷན་སྐྱེས་བདེ་མཆོག་རྟག་པའི་བདུད་རྩི་ཡིས། །འཆི་མེད་འཇའ་ལུས་རྡོ་རྗེའི་སྐུ་རུ་གྱུར། ༥ །བྱིན་རླབས་མཆོག་སྟེར་འཁོར་ལོའི་མགོན་པོ་སྟེ། །དངོས་གྲུབ་འདོད་རྒུའི་སྒྱུ་འཕྲུལ་ཧེ་རུ་ཀ །བདེ་སྟོང་ཕྲིན་ལས་དཔལ་སྦྱིན་ཌཀྐི་རུ། །གྱུར་ཕྱིར་རྩ་གསུམ་ཀུན་འདུས་ཡེ་ཤེས་སྐུ། ༦ །མདོར་ན་སྲས་བཅས་རྒྱལ་བའི་མཁྱེན་ནུས་བརྩེའི། །བྲལ་སྨིན་ཡོངས་སུ་རྫོགས་པའི་འཛུམ་དཀར་གྱིས། །སྐལ་བཟང་འགྲོ་ཀུན་རྗེས་སུ་བཟུང་ནས་སླར། །སྨིན་གྲོལ་གདམས་པའི་བདུད་རྩིས་ངལ་བསོ་སྟེར། ༧ །དེ་ཕྱིར་རྨི་ལམ་ཙམ་དུའང་ཁྱོད་ཞབས་ལ། །བསྟོད་བསྔགས་མེ་ཏོག་ཆལ་ཆིལ་བསྙིལ་བའི་མཐུས། །སྐྱེ་ཀུན་གང་གི་ཐུགས་རྗེའི་གྲིབ་བསིལ་དུ། །དབུགས་འབྱིན་མཛད་པའི་དགའ་སྟོན་རོལ་པར་ཤོག ༨ །ཐབས་དང་ཤེས་རབ་མི་ཕྱེད་མཉམ་རོལ་པའི། །སྒྱུ་འཕྲུལ་དྲྭ་བའི་དངུལ་ཆུས་ཀུན་བརྟགས་ཁམས། །བསྡམས་པའི་གྲུབ་གཉིས་རྣལ་འབྱོར་སུ་ཝ་ཎས། །རང་གཞན་ཕན་བདེའི་དཔལ་གྱིས་འཚོ་བར་ཤོག ༩ །རྡོ་རྗེ་ལུས་ཀྱི་གནས་ཡུལ་ཉེར་བཞིའི་གྲོང་། །དཀར་དམར་རིག་འཛིན་ཌཱ་ཀིས་འཁྱུད་པ་ལས། །བདེ་ཆེན་དགའ་བཞིས་མྱོས་པའི་ལང་ཚོ་ཡིས། །ཀུན་བརྟགས་འཁྲུལ་པའི་ཚོགས་ཀུན་འཆིང་གྱུར་ཅིག ༡༠ །ཤིན་ཏུ་དག་པ་གཟོད་པའི་ཡེ་ཤེས་ནི། །རྣམ་ཐར་སྒོ་གསུམ་འདུ་འབྲལ་མེད་པའི་ཞལ། །རང་རིག་
གཉུག་མའི་ངང་དུ་མཉམ་རོལ་པས། །འགྱུར་མེད་རྣམ་ཀུན་མཆོག་ལྡན་འགྲུབ་པར་ཤོག ༡༡ །ཁྱད་པར་ག་བུར་རྡུལ་བརྩེགས་ས་འཛིན་ཁྲོད། །སྡུག་བསྔལ་ཞགས་པས་བཅིངས་པའི་ལུས་ཅན་ཀུན། །ཐུགས་རྗེའི་ཕྱག་གིས་བཀྲོལ་ནས་ཕན་དང་བདེའི། །ཐེམ་སྐས་ཡིད་འོང་མཆོག་ལ་འཛེགས་གྱུར་ཅིག ༡༢ །འདི་ནས་བཟུང་སྟེ་ཇི་སྲིད་ལས་འབྲས་ཀྱིས། །སྐྱེ་བའི་འཁྲི་ཤིང་འཛིན་པ་ཐམས་ཅད་དུ། གང་གི་མཁྱེན་བརྩེའི་ཟེར་གྱིས་རབ་བསྐྱངས་པས། །དོན་གཉིས་ཨུཏྤལ་འདབ་བརྒྱ་བཞད་པར་ཤོག ༡༣ །ནམ་ཞིག་འཕོས་ཚེ་དྷཱུ་ཏིའི་གྲོང་ཁྱེར་དབུས། །ཚོགས་བརྒྱད་རྣམ་དག་ཟངས་མདོག་དཔལ་རི་རུ། །རིག་སྟོང་མཚོ་སྐྱེས་རྡོ་རྗེའི་ཞལ་མཐོང་ནས། །གློ་བུར་འཁྲུལ་རྟོག་གཡོ་མེད་སྡོམ་གྱུར་ཅིག ༡༤ །རྟག་ཏུ་གུས་པའི་དྲི་བཞོན་གཡོ་བ་ཡིས། །ཐུགས་རྗེའི་སྤྲིན་དཀར་འཇོ་སྒེག་ལ་རོལ་པས། །རྗེས་སུ་བརྩེ་བའི་བདུད་རྩིའི་ཐིག་ཕྲེང་གིས། །བྱང་ཆུབ་མཆོག་གི་ཆུ་སྐྱེས་བཞད་པར་ཤོག །ཅེས་དུས་གསུམ་ཀུན་མཁྱེན་སངས་རྒྱས་གཉིས་པ་པདྨ་ཀར་ལ་གསོལ་བ་འདེབས་པའི་ཚུལ་ཉུང་ངུ་འདིའང་དཀར་ཕྱོགས་ཀྱི་དགའ་བ་གསུམ་པའི་ཚེས་བཅུ་ལ་གང་ཤར་མྱུར་དུ་སྦྱར་བ་ཛ་ཡནྟུ། །
སྤྲུལ་པའི་སྐུ་མཚན་བརྒྱད་ལ་བསྟོད་པ་ཨུཏྤལ་གཞོན་ནུའི་དོ་ཤལ།
སྤྲུལ་པའི་སྐུ་མཚན་བརྒྱད་ལ་བསྟོད་པ་ཨུཏྤལ་གཞོན་ནུའི་དོ་ཤལ་ཅེས་བྱ་བ། འོད་སྣང་མཐའ་ཡས་མཚན་དཔེའི་ཉིན་མོར་བྱེད། །སིནྡྷུའི་པདྨའི་འཁྲི་ཤིང་ལ་ཆགས་པས། །ཟུང་འཇུག་འཆི་མེད་གྲུབ་
པའི་ལང་ཚོ་ཅན། །མཚོ་སྐྱེས་རྡོ་རྗེའི་ཞབས་རྡུལ་སྤྱི་བོས་མཆོད། ༡ །གཟུང་འཛིན་ཡུལ་དང་མཛའ་བའི་ཆོས་ཉིད་ཀྱིས། །ལོག་རྟོག་མེ་ལྕེའི་དོ་ཤལ་གཡོ་བ་ཡང་། །སྙིང་རྗེའི་ཆུ་གཏེར་འཕྱུར་བས་སྨྲ་ཕབ་པས། །པདྨ་སཾ་བྷར་གྲགས་པའི་བ་དན་མཛེས། ༢ །རྒྱལ་ཀུན་མཁྱེན་རབ་ཉི་མ་གཞོན་ནུའི་བཅུད། །ཁྱོད་ཐུགས་གུར་གུམ་གསར་པས་བཏུང་བ་ལས། །བློ་ལྡན་ལང་ཚོའི་འཇོ་སྒེག་གཡོ་བ་ཡིས། །མཆོག་ཏུ་སྲེད་པར་དགའ་བའི་བཅུད་ལེན་སྦྱིན། ༣ །པདྨའི་དོ་ཤལ་བཟུང་བའི་རོལ་མཚོ་ཆེར། །མཚན་དཔེའི་ངོ་མཚར་གསར་པའི་འཛུམ་ཟེར་གྱིས། །ཨོ་རྒྱན་ས་སྤྱོད་རྒྱལ་པོའི་བ་གམ་རྩེར། །གཅིག་ཏུ་མཛེས་པའི་སྤྲིང་ཡིག་སྤྲོ་མིན་ནམ། ༤ །བསླབ་པ་གསུམ་གྱི་ཐེམ་སྐས་ལ་བགྲོད་ཕྱིར། །ཤཱཀྱའི་རིགས་འཁྲུངས་མཆོག་གི་མཚུངས་ཟླ་རུ། །བོས་པའི་མོད་ནས་ཡིད་སྲུབས་གཉིས་འཐུང་སྡེར། །རྣམ་པར་རྒྱལ་བའི་སེང་གེའི་ཁྲི་ལ་འཛེགས། ༥ །ཀུན་འབྱུང་མུན་པ་སྟུག་པོར་འཁྱམས་པའི་འགྲོ། །གཡུལ་གྱི་དཔུང་པས་བཞར་བར་མི་ནུས་ཀྱང་། །མཁྱེན་བརྩེའི་ཉི་མ་གཞོན་ནུའི་འོད་ཟེར་གྱིས། །ཡོངས་སུ་བཅོམ་པའི་ངང་ཚུལ་འདི་ཅི་ཞིག ༦ །བདག་མེད་སྙིང་རྗེའི་རྩེ་བརྒྱ་གདེངས་པ་དང་། །ཆབ་གཅིག་དྲག་ཤུལ་སེང་གེའི་སྒྲ་སྒྲོགས་པས། །འཇིག་ཚོགས་ལྟ་བའི་རི་བོ་དྲུང་འབྱིན་པའི། །བྱེད་པོ་གང་དེའི་ཕྲིན་ལས་ཕུལ་བྱུང་གཏམ། ༧ །
ལོག་རྟོག་ཆང་གིས་མྱོས་པའི་གཉིས་འཐུང་སྡེ། །མཐུ་སྟོབས་ལྕགས་ཀྱུའི་དབང་གིས་བགྱིད་ནས་སླར། །བཀའ་རྟགས་ཕྱག་རྒྱའི་དྲྭ་བར་བཅུག་མཛད་པའི། །བརྟུལ་ཞུགས་གྲུབ་པ་རྡོ་རྗེ་གྲོ་ལོད་། རྩལ། ༨ །གང་ཡང་རྒྱལ་ངས་རྟོགས་མཉམ་ཡང་ཁ་བའི་རྡུལ་བརྩེགས་ཁྲོད། །འཕྱན་པའི་འགྲོ་ལ་ལྷག་པར་ཕྲིན་ལས་མཐུ། །རྨད་བྱུང་པདྨ་ཀ་ར་ལས་གཞན་སུ། ༩ །སྤུ་དེ་ན་མཆོག་ཏུ་གུས་པའི་དབང་གྱུར་ཡིད། །ཆུ་སྐྱེས་ལ་ཐོད་བཞད་པའི་གདེངས་ཀ་རུ། །ཞབས་སེན་རྟག་ཏུ་རྩེན་ཕྱིར་བསྔགས་བརྗོད་ཀྱི། །ཨུཏྤལ་གསར་པའི་དོ་ཤལ་འདི་ཡང་ཕྱེས། ༡༠ །སརྦ་སིདྡྷནྟུ། །
སློབ་དཔོན་བློ་ལྡན་མཆོག་སྲེད་ལ་བསྟོད་པ་དཔྱིད་ཀྱི་དཔལ་མོའི་གླུ་དབྱངས།
སློབ་དཔོན་བློ་ལྡན་མཆོག་སྲེད་ལ་བསྟོད་པ་དཔྱིད་ཀྱི་དཔལ་མོའི་གླུ་དབྱངས་ཞེས་བྱ་བ། བླ་མ་དང་གཉིས་སུ་མེད་པའི་འཇམ་དཔལ་སྨྲ་བའི་སེང་གེ་ལ་ཕྱག་འཚལ་ལོ། །ཀ་ཀུ་བྷ་ཡི་འཛུམ་ཕྲེང་དགོད་པའི་རྩེར། །ཁ་དོག་ཆུ་ཤེལ་ཞུན་མ་བཞུ་བའི་རྡུལ། །གུ་ལ་བ་དེར་ཆགས་འདྲའི་ལང་ཚོའི་དཔྱིད། །ང་བདག་འཛིན་བྲལ་སྣང་སྟོང་ཕྱག་རྒྱའི་སྐུ། ༡ །ཅ་ག་མཚན་དཔེའི་འཇོ་སྒེག་ལ་རོལ་ཞིང་། །ཆ་བྱད་རིན་ཆེན་དྲྭ་བས་རྣམ་པར་མཛེས། །ཇ་རིལ་སྐྲ་ཅན་གཤེད་པོར་བསྟན་ཙམ་ན། །ཉ་རྒྱས་ཟླ་བའི་དཔལ་ཡོན་འཕྲོག་པ་བཞིན། ༢ །ཏཱ་རེ་འཕགས་མའི་རྣམ་སྤྲུལ་སྒྲ་དབྱངས་ལྷ། །ཐ་དད་མ་དམིགས་ཁྱོད་མགྲིན་ཆུ་སྐྱེས་རྩེར། །ད་གཟོད་ཙམ་
མིན་རྟག་ཏུ་ངལ་བསོས་ཕྱིར། །ན་མར་ལུང་རྟོགས་ཆོས་ཀུན་འབད་མེད་སྩོལ། ༣ །པ་སངས་སྤྲིན་བྲལ་མཁའ་ལ་སྒེག་པ་ལྟའི། །ཕ་མཐའ་མི་མངོན་ཁྱོད་སྐུའི་ཟ་མ་ཏོག །བ་མཆོག་ཙིནྟ་མ་ཎི་ལས་ལྷག་པར། །མ་ལུས་རིག་འཛིན་ཌཱ་ཀིའི་སྤྱི་བོར་མཛེས། ༤ །ཙ་མ་ར་ལྟར་ཁེངས་དང་རྨོངས་པའི་བློ། །ཚ་ཟེར་ཅན་གྱིས་ཀུ་མུད་བཅིངས་པ་བཞིན། །ཛ་ཏིའི་མེ་ཏོག་ལྟར་སྡུག་ཞལ་འོད་ཀྱིས། །ཝ་བཞིན་ཉུལ་བའི་རླུང་སེམས་དབུ་མར་བཅིལ། ༥ །ཞྭ་ཐོད་རཏྣ་ཨུཏྤལ་ཆུན་པོས་མཛེས། །ཟ་འོག་དར་དང་སྣ་ཚོགས་རྒྱན་གྱིས་སྤྲས། །འ་འུར་སྤངས་པའི་ཕྱག་གི་འཁྲི་ཤིང་ནི། །ཡ་བྲལ་ཟུང་འཇུག་རིན་ཆེན་སྣོད་ཀྱིས་མཛེས། ༦ །རྭ་ལྟར་རེངས་པའི་གནོད་སྦྱིན་འབྱུང་པོ་དང་། །ལ་ཀླུང་ཉུལ་ནས་འཚེ་བའི་བསམ་སྦྱོར་ཅན། །ཤ་ཁྲག་བྲལ་བའི་འོད་གསལ་ཆེར་བསྡམས་ཏེ། །ས་བཅུའི་བཀའ་རྟགས་སར་པ་སྦྱིན་ལ་བྲེལ། ༧ །ཧྭ་རིའི་ཙནྡན་ནགས་ཀླུང་གསར་པ་ལྟར། །འབར་འཛག་བདེ་བས་མྱོས་པའི་བསུང་ཞིམ་དང་། །ཨ་དར་ལྟར་མཁྱེན་བའི་ཡེ་ཤེས་ནི། །ཇི་ལྟ་ཇི་སྙེད་མཁྱེན་པའི་མཆོག་ཏུ་གྱུར། ༨ །འཇམ་དཔལ་དཔའ་བོ་སྙིང་ལ་ཉལ་བའི་དཔྱིད། །ཉི་མ་གཞོན་ནུར་བརྫུ་བའི་རྫུ་འཕྲུལ་གྱིས། །ཐུན་མོང་ཐུན་མིན་པུཎྜ་རཱི་ཀའི་ཚལ། །ལྷག་པར་ཕྱེ་འདི་སྟོན་པ་གཉིས་པ་ཡིན། ༩ །དེས་ན་མགོན་ཁྱོད་ཞབས་མཐིལ་
ཐོར་ཚུགས་རྩེར། །རྟག་པར་གསོལ་བཏབ་མཚན་གྱི་ནོར་བུའི་ཕྲེང་། །རྣ་ལུང་དཔྱངས་པའི་སྐལ་བཟང་དམ་པ་ནི། །དཔག་བསམ་དབང་པོའི་ངང་ཚུལ་དག་ལས་སྦོམ། ༡༠ །རྨི་ལམ་ཙམ་དུའང་སྐྱབས་གཞན་སྤངས་བྱས་ཏེ། །བླ་མ་མཆོག་དང་དབྱེར་མེད་གསོལ་བཏབ་པས། །བརྩེ་བའི་ཕྱག་གིས་ཡོངས་བཟུང་ཉོན་མོངས་པའི། །འཁོར་བའི་ཆུ་གཏེར་དག་ལས་དབུགས་འབྱིན་གསོལ། ༡༡ ། སྣང་སྟོང་ཕྱག་རྒྱ་བཞི་རུ་དགྱེས་རོལ་ཅིང་། །གྲགས་སྟོང་མི་ཕྱེད་ནཱ་དའི་དབྱིངས་སུ་བསྡོམས། །རིག་སྟོང་རྣམ་ཀུན་མཆོག་ལྡན་ལ་ཐིམ་པས། །བདེ་སྟོང་འོད་གསལ་ཐིག་ལེར་རོ་གཅིག་ཤོག ༡༢ །ཅེས་སློབ་དཔོན་བློ་ལྡན་མཆོག་སྲེད་ལ་བསྟོད་པ་དཔྱིད་ཀྱི་དཔལ་མོའི་གླུ་དབྱངས་འདིའང་གཞོན་ནུ་ཨབྷཱ་ཡས་སོ།། ༈ །།
གུ་རུ་པདྨ་རྒྱལ་པོ་ལ་བསྟོད་ཚིག་ཡིད་འཕྲོག་ཨཏྤལ་དམར་པོའི་ཆུན་པོ།
གུ་རུ་པདྨ་རྒྱལ་པོ་ལ་བསྟོད་ཚིག་ཡིད་འཕྲོག་ཨཏྤལ་དམར་པོའི་ཆུན་པོ་ཞེས་བྱ་བ། ཀ་མ་ལ་ཡི་གེ་སར་བཞད་པའི་རྩེར། །ཁ་དོག་མཚམས་སྤྲིན་གསར་བ་། བཞུ་བའི་རྡུལ། །ག་ལ་བ་དེར་ཆགས་འདྲའི་ལང་ཚོ་ནི། །ང་རྒྱལ་འདོད་ཆགས་འཇོམས་ཕྱིར་ཁྲོ་ཞིང་སྒེག ༡ །ཅ་ཅོ་བྲལ་ཡང་དགྱེས་པའི་ཞལ་འོད་ཀྱིས། །ཆ་བྱད་གནས་རིགས་སྣ་ཚོགས་སྐྱེ་འགྲོ་དང་། །ཇ་དར་གསེར་དངུལ་ལ་སོགས་འདོད་དགུའི་གཏེར། །ཉ་རྒྱས་ཀུན་འཛུམ་བཞིན་འགུགས་པར་མཛད། ༢ །ཏཱ་རེ་དབང་མཛད་ཌཱ་ཀི་དགྱེས་རོལ་ཅིང་། །ཐ་དད་གནས་ཡུལ་མཁའ་འགྲོའི་གཙོ་བོར་བཞེངས། །
ད་གཟོད་ཆོས་སྐུ་སྒོམ་པའི་རྣལ་འབྱོར་ལ། །ན་མར་གྲུབ་གཉིས་འབྲས་བུས་ལྕི་བར་མཛད། ༣ །པཱ་ར་མི་ཏའི་བདུན་པ་ཐབས་ཀྱི་ལམ། །ཕ་རོལ་ཆགས་པས་འཆིང་བྱེད་དབང་གི་ལས། །བ་མཆོག་འདོད་འཇོའི་ཙིནྟ་མ་ཎི་ལྟར། །མ་ལུས་ཁྱོད་ཀྱི་རིག་སྔགས་ཉིད་ལས་བྱུང་། །ཙ་རི་ཏྲ་དང་ཛ་ལནྡྷ་ར་སོགས། །ཚ་ཟེར་ཅན་འདྲའི་ཁྱོད་སྐུ་གསང་བར་རྫོགས། །ཛ་ཧུའི་རླབས་ཕྲེང་ལྟ་བུའི་ཕྱག་རྒྱ་ཡིས། །ཝ་བཞིན་ཝཱ ཉུལ་བའི་འབྱུང་པོའི་ཡིད་ཀྱང་འཆིང་། ༥ །ཞྭ་ཐོད་ཕོད་ཁ་དམར་པོས་རབ་དཀྲིས་ཤིང་། །ཟ་འོག་གོས་དང་རུས་པའི་རྒྱན་དྲུག་གསོལ། །འ་ཅག་གསོལ་བ་བཏབ་པའི་སྐལ་ལྡན་ལ། །ཡ་བྲལ་ལས་འདས་མཆོག་གི་དངོས་གྲུབ་སྟེར། །ར་ས་ནཱ་ཞེས་ཐབས་དང་གཅིག་ཤོས་ནི། །ལ་ལ་ན་སྟེ་ཟུང་འཇུག་དབུ་མར་རོལ། །ཤ་ཁྲག་བྲལ་བའི་འཕོ་ཆེན་འོད་གསལ་སྐུར། །ས་བཅུའི་མངོན་པར་རྟོགས་པ་ཡོངས་སུ་རྫོགས། ༧ །ཧེ་རུ་ཀ་དཔལ་ཁྱོད་ཉིད་བདག་བསྒོམས་ཏེ། །ཨ་ཧཾ་ཟུང་འཇུག་བདེ་སྟོང་བཟླས་པར་རོལ། །འོད་གསལ་སྤྲོས་བྲལ་དགོངས་པར་མཉམ་བཞག་པས། །ཕན་དང་བདེ་བའི་དཔལ་གྱིས་འཁྱུད་གྱུར་ཅིག ༨ །གང་ན་རིག་འཛིན་ཌཱ་ཀིའི་ཐོར་ཚུགས་ཀྱིས། །ཁྱོད་ཞབས་སྤྱི་བོར་བསྟེན་པའི་ངོ་མཚར་དཔལ། །མངོན་སུམ་མིག་གི་བདུད་རྩིར་གྱུར་ནས་ཀྱང་། །སྣང་སྟོང་སྐུ་ཡིས་བྱིན་གྱིས་བརླབ་ཏུ་
གསོལ། ༩ །ཐབས་ཤེས་གསང་བ་སྔགས་ཀྱི་དེ་ཁོ་ནར། །རྟག་ཏུ་བཟླས་བརྗོད་བགྱིས་པའི་དགེ་མཚན་ལས། །སྒྲ་ཚིག་རྣམ་སྤངས་སྤྲོས་བྲལ་ནཱ་དའི་ངང་། །གྲགས་སྟོང་གསུང་གིས་བྱིན་གྱིས་བརླབ་ཏུ་གསོལ། ༡༠ །ཆོས་ཀུན་རང་བཞིན་ཟབ་གསང་མཆོག་གི་ལམ། །འོད་གསལ་ཕྱག་རྒྱ་ཆེན་པོར་མཉམ་བཞག་པས། །དཔྱིད་དང་ཐིག་ལེ་རོ་གཅིག་གྱུར་པ་ཡི། །རིག་སྟོང་ཐུགས་ཀྱིས་བྱིན་གྱིས་g་བརླབ་ཏུ་གསོལ། ༡༡ །གནས་སྐབས་འོད་དམར་རཱ་གའི་ཞགས་པ་ཡིས། །ཁམས་གསུམ་ཆགས་པའི་ཕྱག་རྒྱར་འཆིང་བྱས་ཏེ། །འདོད་དགུའི་མཚར་སྡུག་རྫོགས་པའི་ཨུཏྤ་ལ། །འཛུམ་ཕྲེང་དགོད་པའི་དངོས་གྲུབ་མཆོག་ཐོབ་ཤོག ༡༢ །ཅེས་སྤྲུལ་པའི་སྐུ་མཚན་བརྒྱད་དུ་སྟོན་པའི་ནང་ཚན་སློབ་དཔོན་པདྨ་རཱ་ཛ་ལ་བསྟོད་ཚིག་ཨུཏྤལ་དམར་པོའི་ཕྲེང་བ་འདིའང་འཇིགས་མེད་སྒེག་པའི་ལང་ཚོས་སྦྱར་བའོ།།
མཚོ་སྐྱེས་བླ་མ་ལ་ཤིས་པར་བརྗོད་པའི་ཚུལ་གྱིས་བསྔགས་པ་དད་པའི་ཨུཏྤལ།
མཚོ་སྐྱེས་བླ་མ་ལ་ཤིས་པར་བརྗོད་པའི་ཚུལ་གྱིས་བསྔགས་པ་དད་པའི་ཨུཏྤལ་ཅེས་བྱ་བ་བཞུགས་སོ། །ན་མོ་གུ་རུ་པདྨ་ཀ་རཱ་ཡ། འཆི་མེད་གྲུབ་པའི་ཟླ་ཤེལ་ཞུ་བའི་བཅུད། །སྐལ་བཟང་ཡིད་ཀྱི་སྟེང་འཐུང་དཀར་པོ་ལ། །རེག་པས་ཕན་བདེའི་འཛུམ་ཕྲེང་དབྱེ་བའི་དཔྱིད། ། མཚོ་སྐྱེས་བླ་མས་དེང་འདིར་ཤིས་པར་མཛོད། ཡིད་འོང་མཚན་དཔེའི་ཉམས་འགྱུར་རེ་རེས་ཀྱང་། །སྲིད་ཞིའི་མཚར་སྡུག་ཀུན་གྱི་ཁེངས་པའི་ཕུལ། །ལྷག་མ་མེད་པར་འཕྲོག་པའི་ངོ་མཚར་ཅན། །མཚོ་སྐྱེས་
བླ་མས་དེང་འདིར་ཤིས་པར་མཛོད། །གང་གསུང་རྣམ་པ་ཀུན་ལྡན་ནཱ་དའི་སྒྲ། །རིག་པ་འཛིན་པའི་རྒྱུད་དུ་བརྡུང་ཙམ་གྱིས། །ཡིད་ལ་གྲུབ་པའི་ངལ་འཚོ་རབ་འཕེལ་བ། །མཚོ་སྐྱེས་བླ་མས་དེང་འདིར་ཤིས་པར་མཛོད། །རྣམ་མང་རྡུལ་དང་ཤེས་བྱའི་སྤྲོས་པ་ཡི། །ཕ་རོལ་སོན་པའི་སྟོང་ཉིད་མཛེས་མ་ནི། །སྙིང་རྗེའི་འཛུམ་དཀར་གཡོ་བས་དགེ་བྱས་པ། །མཚོ་སྐྱེས་བླ་མས་དེང་འདིར་ཤིས་པར་སྩོལ། །མདོར་ན་རྨི་ལམ་ཙམ་དུའང་སྐྱབས་གནས་གཞན། །མ་མཆིས་ཁྱོད་ཉིད་ཁོ་ནར་གསོལ་འདེབས་ན། །ཤིས་བརྗོད་སྤྲིན་གྱི་རྔ་གསང་རོལ་པ་ཡིས། །ཕུན་ཚོགས་མདོངས་མཐའི་མངལ་ཁུར་ལྕི་བར་མཛོད། །གང་ཞིག་སྐྱོན་གྱི་རྣམ་པ་རིང་བཅད་ཅིང་། །ཡོན་ཏན་ཟད་མེད་ཡིད་བཞིན་ཆུ་གཏེར་ཆེ། །དད་པས་བསྙེན་ན་འདོད་དོན་མཆོག་སྩོལ་བ། །མཚོ་སྐྱེས་བླ་མར་སླར་ཡང་ཕྱག་བགྱིའོ། །འཇམ་མགོན་བླ་མའི་བྱིན་རླབས་ཀྱིས། །རྗེས་སུ་བཟུང་བའི་དཔྱིད་ཀ་ལས། །ཚིག་གི་མེ་ཏོག་དགེ་འདི་ཡང་། །གཟུར་གནས་མགྲིན་པའི་རྒྱན་གྱུར་ཅིག །ཅེས་པའང་གཞོན་ནུ་སྨྲ་བའི་ཉི་མས་གསོལ་བ་བཏབ་པ་སིདྡྷི་རསྟུ། །༈ །བདེ་བ་ཅན་གྱི་ཞིང་ཁམས་རྟེན་དང་བརྟེན་པར་བཅས་པ་ལ་བསྟོད་པ་དད་པའི་ཆུ་སྐྱེས་ཞེས་བྱ་བ། ན་མོ་ཨ་མི་ཏ་བྷཱ་ཡ། གང་ཞིག་སློབ་དང་མི་སློབ་འཕགས་པ་དང་། །ཉན་རང་སོ་སྐྱེའི་ཚོགས་ཀྱི་སྤྱི་བོ་ཡིས། །མཛེས་པར་བཏེག་པའི་གདེངས་ཀ་དམ་པ་ནི། །ཕུལ་བྱུང་
བསྔགས་འོས་རྣམ་ཐར་བརྗོད་མི་ལང་། ༡ །འཇིག་རྟེན་དབང་ཕྱུག་ཐུགས་རྗེའི་བདུད་རྩི་དང་། །ཆོས་ཀྱི་འབྱུང་གནས་སྨོན་པའི་གྲུ་ཆར་གྱིས། །གནས་ངན་ལེན་གྱི་རྡུལ་ཕྲན་བཀྲུས་པའི་ཞིང་། །ཡོན་ཏན་བཀོད་པ་མཐའ་ཀླས་དགའ་ཚལ་ཆེར། ༢ །ལག་མཐིལ་གཞོན་ཤ་ཆགས་པའི་འཇོ་སྒེག་ལྟར། །སྣ་ཚོགས་རིན་ཆེན་གཅལ་དུ་བཀྲམ་པའི་གཞི། །མཉམ་པར་བརྡལ་བའི་བཞིན་རས་མན་རས། །མངོན་བསྲུངས་མནན་ནེམ་བཏེགས་ན་འཕར་བའི་ཉམས། ༣ །རྫིང་བུ་ཡན་ལག་བརྒྱད་དང་ལྡན་པ་ཡང་། །སྙིང་པོའི་དབེན་པ་མ་ཡིན་ལུང་རྟོགས་ཀྱི། །དམ་ཆོས་ཇི་སྙེད་སྟོན་པའི་དམ་བཅའ་ནི། །རྒྱལ་ཀུན་གསུང་གི་གསང་བ་བྱིན་པ་བཞིན། ༤ །དེ་ན་རིན་ཆེན་སྣ་ཚོགས་ལྗོན་པ་ཆེ། །ལྟ་ན་ལྷུན་སྡུག་མཛེས་པའི་རོལ་སྒེག་གིས། བསླབ་གསུམ་མངོན་རྟོགས་ངོམས་པའི་བཞིན་རས་མཆོག །ལོ་འདབ་མེ་ཏོག་འབྲས་བུ་དུད་པས་སྟོན། ༥ །ཡལ་གའི་ལྕུག་ཕྲན་གཞོན་ནུའི་སོར་མོ་ཡིས། །ཉེར་བཟུང་ཛམྦུ་ནཱ་དའི་དྲ་བའི་ཕྲེང་། །དྲི་བཞོན་ཕོ་ཉས་བསྐུལ་བའི་རོལ་མོའི་སྒྲ། །ཆོག་མི་ཤེས་པ་ཀུན་ཏུ་སྒྲོག་པར་བྱེད། ༦ །དེ་ན་བསྟི་བའི་གཉིས་སྐྱེས་འཁོར་ལོའི་ལག །མ་རྒད་གཤོག་ཅན་ཤཱ་རི་ཀ་ནི་སོགས། །ཀུན་ཏུ་སྒེག་ལྡན་འདབ་ཆགས་གཞོན་ནུའི་ཚོགས། །ཕན་ཚུན་ཆོས་ཀྱི་རོས་ཚིམས་གར་སྟབས་བསྒྱུར། ༧ །ཕྱོགས་རྣམས་མེ་
ཏོག་འབྲས་བུ་མཛེས་གྱུར་པའི། །ལྷུན་སྡུག་ཁང་བཟང་ཡིད་འོང་སྐྱེད་ཚལ་ལས། །བསྟི་གནས་ཕལ་པའི་སྣང་བ་ཟད་པའི་ཕྱིར། །སྙིང་དང་མིག་ལ་དགའ་བ་མི་བཟད་སྟེར། །རཏྣའི་བ་གམ་བརྩེགས་པའི་གཞལ་ཡས་ཁང་། །སྣ་ཚོགས་བཀོད་པས་ཁྱད་པར་འཕགས་པ་སོགས། །ཡིད་འོང་འདོད་པའི་ཆོ་ག་འབད་མེད་པར། །བསྒྲུབ་པའི་ངང་ཚུལ་གཞན་གྱིས་བསྐྲུན་ནུས་མིན། ༩ །ཐོས་འཛིན་བཅུད་དུ་གཡོ་བའི་ཇི་སྙེད་སྒྲ། །ཚད་མེད་བཞི་དང་ཕ་རོལ་ཕྱིན་པ་དྲུག །རྣམ་པར་ཐར་པ་གསུམ་སོགས་ལུང་རྟོགས་ཀྱི། །དམ་ཆོས་རྒྱ་མཚོའི་གན་མཛོད་གཅིག་ཏུ་གྱུར། ༡༠ །གང་ན་འཚོ་གཞེས་བརྟན་པའི་རྒྱལ་བ་ནི། །རབ་དམར་བྱེ་རུའི་ཕུང་པོ་བཞུ་བའི་རྡུལ། །སྟོང་ཕྲག་ཉི་གཞོན་འཆར་ཀས་འཁྱུད་པ་ཡིས། །མཚུངས་ཟླར་མི་འོས་མཚན་དཔེའི་འཛུམ་ཕྲེང་དགོད། ༡༡ །གངྒཱའི་ཀླུང་རྒྱུན་གྱིས་འདྲེན་བྱེ་སྙེད་ཀྱི། །རབ་འབྱམས་དེ་བཞིན་གཤེགས་པའི་གཙུག་ཏོར་ནི། །མཐོན་མཐིང་ཟོལ་དུ་གཡོ་བས་བསྟེན་བྱས་ཏེ། །རྟག་ཏུ་བསྔགས་པའི་རོལ་མོ་རྣམ་པར་དཀྲོལ། ༡༣ །འདི་ན་གཞན་ཕན་རྗེས་སོང་དམ་བཅའི་ཁུར། །སློབ་པ་ལམ་གྱི་གནས་སྐབས་འཛིན་པའི་གཟུགས། །མིག་མི་འཛུམ་དང་གསང་བ་འཛིན་པ་སོགས། །བྱང་ཆུབ་སེམས་དཔའི་ཁྱུ་མཆོག་ཡོངས་ཀྱིས་བསྟེན། ༡༣ །སྡུག་བསྔལ་དྲྭ་བ་བཀྲལ་ནས་འགོག་པའི་དབྱིངས། །
སྙོམས་འཇུག་དགྲ་བཅོམ་ཚོགས་ཀྱང་ཐེག་ཆེན་གྱི། །བདུད་རྩིའི་བགོ་བཤར་འགྱེད་པའི་དེ་མ་ཐག །བླ་མེད་བྱང་ཆུབ་གོ་འཕང་ལ་རེག་འགྱུར། ༡༤ །མཚན་དཔེའི་འོད་ཟེར་བྱེ་བ་བརྒྱ་ཕྲག་གིས། །གང་ལ་རེག་ན་རྨོངས་པའི་མུན་པ་ཀུན། །ཡོངས་སུ་བཅོམ་སྟེ་ཕན་བདེའི་སྣང་བ་ཡིས། །ངེས་ལེགས་གྲོང་ཁྱེར་མཆོག་ཏུ་དབུགས་རབ་འབྱིན། ༡༥ །གང་སྐུ་དངོས་སུ་མཐོང་བ་ལྟ་ཞོག་གི །མཚན་གྱི་ནོར་བུ་རྣ་བར་དཔྱངས་པས་ཀྱང་། །བརྒྱད་གཉིས་འཇིགས་པའི་དབུལ་བ་བསལ་བྱས་ཏེ། །ཕན་བདེའི་དགའ་སྟོན་སྤྲོ་ལ་རྣམ་པར་བྲེལ། ༡༦ །ཁྱད་པར་ལན་གཅིག་ཡོན་ཏན་ཉི་གཞོན་ལ། །དད་གསུམ་ཨུཏྤལ་འཛུམ་པའི་ཟུར་མིག་གིས། །ཚད་མེད་བདེ་ལྡན་ཞིང་གི་ཀེ་ས་ར། མཛའ་བར་བགྱིད་པའི་དཔལ་སྦྱིན་གང་ལས་སུ། ༡༧ །ཕྱག་མཐིལ་འཁོར་ལོའི་རེ་ཁཱས་མཚན་པའི་རྡུལ། །སྤྱི་བོར་རེག་པ་ཙམ་ནས་ཚོགས་གཉིས་ཀྱི། །དཔུང་པས་བོས་པའི་རྫོགས་པའི་སངས་རྒྱས་ཀྱང་། །མྱུར་དུ་སྦྱིན་པའི་སྐལ་བཟང་མཆོག་ལ་སྦྱོར། ༡༨ །ཞལ་གྱི་ཆུ་སྐྱེས་འཛུམ་པའི་འོད་རླབས་ལས། །སྐད་ཅིག་རེར་བསྟན་ལུང་རྟོགས་བདུད་རྩིའི་བཅུད། །བགྲང་བར་མི་བཟོད་སྒོ་འཕར་དབྱེ་བ་ཡིས། །གྲངས་མེད་ཏིང་འཛིན་མཆོག་ལ་དབུགས་དབྱུང་མཛད། ༡༩ །མདོར་ན་དག་པའི་ཡེ་ཤེས་ཀྱིས་སྦྱངས་པའི། །རྡུལ་བྲལ་ཀུན་མཁྱེན་སྤྱན་
གྱིས་བཙལ་བྱས་ཀྱང་། །མཚུངས་ཟླས་དབེན་པའི་ཡོན་ཏན་མཆོག་གཟིགས་ནས། །རབ་ཏུ་བསྔགས་པའི་མེ་ཏོག་འཐོར་ལ་ལྟོས། ༢༠ །དེ་ཕྱིར་སོ་སྐྱེའི་བློ་ལས་རིང་འདས་པའི། །རྨད་བྱུང་ཐུགས་རྗེའི་ཙིནྟཱ་ མ་ཎི་མཆོག །དད་གུས་གདུགས་དཀར་རྩེ་མོས་འཐོབ་པའི་མོད། །གྲངས་མེད་བསྐྲུན་འོས་འབྱོར་པས་ལྷག་ཅིག་བསྩལ། ༢༡ །གང་མཚན་དཔལ་གྱི་དུམ་བུ་སིམ་པ་ལས། །རབ་ལྷག་ཟླ་ཤེལ་བཞུ་བའི་འོད་ཆེས་ནི། །སྙིང་དབུས་ཀུནྡའི་བཅུད་ལེན་ལ་བཏུད་ནས། །ཕན་བདེའི་འདབ་མའི་འཛུམ་ཕྲེང་གྲོལ་བར་ཤོག ༢༢ །གནས་སྐབས་སྡེ་བཞིའི་བསིལ་བའི་རེག་བྱ་དང་། །རབ་འགྲོགས་ནོར་བུའི་རྔ་ཡབ་། གཡོབ་པ་ཡིས། །ཚེ་དཔལ་འབྱོར་བའི་ངལ་བསོ་བསྟེན་གྱུར་ནས། །ཕུན་ཚོགས་ལང་ཚོའི་མཛེས་པ་ཐོབ་གྱུར་ཅིག ༢༣ །ནམ་ཞིག་འཚོ་བའི་འདུ་བྱེད་བཏང་བའི་ཚེ། །གང་གི་ཐུགས་རྗེའི་དཔྱང་ཐག་ལ་བརྟེན་ནས། །དག་པའི་ཞིང་དུ་དབུགས་འབྱིན་ཐོབ་པའི་མོད། །མགོན་པོ་དགྱེས་པའི་ཞལ་བཟང་མཐོང་བར་ཤོག ༢༤ །མཐར་ཐུག་སྟོབས་བཅུ་མི་འཇིགས་རྣམ་པ་བཞི། །མ་འདྲེས་བཅོ་བརྒྱད་ལ་སོགས་སྤངས་རྟོགས་ཀྱི། །ཆ་ཤས་ཡོངས་སུ་གང་བའི་གཉིས་སྐྱེས་དབང་། །བྱང་ཆུབ་མཆོག་གི་མཁའ་ལ་རོལ་གྱུར་ཅིག ༢། །དེ་ལྟར་བདེ་བ་ཅན་གྱི་ཞིང་གི་བཀོད་པ་རྟེན་དང་བརྟེན་པར་བཅས་པ་ལ་བསྔགས་བརྗོད་ཉུང་ངུར་བསྡུས་པ་འདིའང་གཞོན་ནུ་ཨ་བྷཱ་ཡས་རང་ལོ་བཅུ་དྲུག་པར་གང་ཤར་བརྗོད་པ་ཛ་ཡནྟུ། །
བཀའ་གདམས་ལྷ་བཞི་ལ་བཀའ་བ་ཅན་གྱི་སྦྱར་བའི་ཚིག་རྒྱན་གྱི་སྒོ་ནས་བསྔགས་པ་པུཎྜ་རཱི་ཀའི་ཆུན་པོ།
བཀའ་གདམས་ལྷ་བཞི་ལ་བཀའ་བ་ཅན་གྱི་སྦྱར་བའི་ཚིག་རྒྱན་གྱི་སྒོ་ནས་བསྔགས་པ་པུཎྜ་རཱི་ཀའི་ཆུན་པོ་ཞེས་བྱ་བ་བཞུགས་སོ། །ན་མཤྲཱི་ཛ་ཡ་ཤཱ་ཀྱ་སི་ཧཱ་ཡ། སངས་རྒྱས་དང་དབང་ཕྱུག་སྦྱར། ཀུན་མཁྱེན་ཁྱོད་ཀྱིས་འདོད་ཆགས་ཀྱི། །བདུད་ཟམ་པ་མཐའ་དག་རིང་བཅོམ་ན། །སྲིད་ན་རྗེས་སུ་འགྲོ་ལ་སྙིང་རྗེ་དང་ཨུ་མ་ལ་སྲེད་པ་ཆགས་པའི་མཐུ། །ཕུལ་དུ་བྱུང་བར་སྒྲོགས་འདི་ཅི། །དཔལ་རྒྱལ་བ་ཤཱཀྱ་སེང་གེ་ལ་བསྔགས་པའོ། ༡ །ན་མོ་ཉརླུ་པ་ཁོ་པདྨ་ཡ། སྤྱན་རས་གཟིགས་དང་ལྷ་སྤྱི་མིག་མི་འཛུམ་པའི་དཔལ་འབྱོར་ལ། །ཀུན་གྱིས་བསྟོད་བསྔགས་ཡི་གེས་མཆོད། །འོན་ཀྱང་བཅུད་མེད་ལྷ་མིན་ཡིད་ཅན་ཏེ་ལོག་ལྟ་ཅན་དང་ལྷ་མིན་གྱི་འགྲོ་བ་སྤྱི། ཡིད་ཅན་རྣམས། །བཟོད་དཀའི་ཕྲག་དོག་སྙིང་ལ་འཆང་། །འཕགས་མཆོག་ཕྱག་ན་པདྨོ་ལ་བསྔགས་པའོ། ༢ །ན་མོ་བྷཊྛཱ་ར་ཀཱ་ཏཱ་ར་ཡེ། དཔལ་ལྡན་རལ་པ་སྤྱན་རས་གཟིགས་དབང་ཕྱུག་གཉིས་ཀར་འཇུགའཛིན་གྱི་ཡུམ། །རྒྱལ་བ་སྒྲོལ་མ་དང་ཨུ་མ། ཁྱོད་ཞལ་མཐོང་ཙམ་གྱིས། །ལྷར་བཅས་ཀུན་ཏུ་དགའ་བ་དང་། །ཡིད་སྲུབས་ཅན་རྣམས་གདུང་བར་གྱུར། །རྗེ་བཙུན་སྒྲོལ་མ་ལ་བསྔགས་པའོ། ༣ །ན་མོ་ཉརླ་ཙ་ལཱ་ཡ། མི་མི་གཡོ་བ་དང་ནམ་མཁའ། གཡོའི་རང་བཞིན་དངོས་ཀུན་ལ། །རྟག་ཏུ་ཁྱབ་པར་རབ་འཇུག་ཀྱང་། །རྡུལ་དང་མཚན་མའི་དངོས་པོ་ལས། །རིང་དུ་དབེན་པའི་ངོ་མཚར་
མཐོང་། །འཕགས་པ་མི་གཡོ་བ་ལ་བསྔགས་པའོ། ༤ །དེ་ལྟར་ཅུང་ཟད་བསྟོད་པ་ཡི། །ལེགས་བྱས་འདི་མཐུས་སྐྱེ་བ་ཀུན། །ཐུབ་མཆོག་རྣམས་ཀྱི་ཡོན་ཏན་ལ། །རྟག་ཏུ་བསྔགས་པ་སྒྲོགས་གྱུར་ཅིག །ཅེས་པའང་ཤཱཀྱའི་དགེ་སློང་རིག་པ་སྨྲ་བ་མཉྫ་གྷོ་ཥའི་བློ་མཚོ་ལས་བྱུང་བའི་ཚིག་གི་མེ་ཏོག་ཕྲ་མོ་སྟེ། རྒྱལ་ཟླའི་དམར་ཕྱོགས་ཀྱི་དགའ་བ་དང་པོ་ལའོ།། །།
བདེ་བར་གཤེགས་པའི་མཆོད་རྟེན་རྣམ་པ་ཐམས་ཅད་དུ་རྫོགས་པ་བརྒྱད་ལ་བསྔགས་པ་ནོར་བུའི་དོ་ཤལ།
བདེ་བར་གཤེགས་པའི་མཆོད་རྟེན་རྣམ་པ་ཐམས་ཅད་དུ་རྫོགས་པ་བརྒྱད་ལ་བསྔགས་པ་ནོར་བུའི་དོ་ཤལ་ཅེས་བྱ་བ་བཞུགས་སོ། ༈ །པདྨ་སྤུངས་པ། ལྔ་བརྒྱའི་གཏེར་གྱིས་སྤུད་པའི་དགེ་མཚན་རྩེར། །པདྨ་གཞོན་ནུའི་ཟུར་ཕུད་གཡོ་བ་ཡིས། །ཞབས་མཐིལ་འཁོར་ལོའི་རེ་ཁཱར་བསྟི་སྟང་གི །གྲགས་པ་ལུམྦིའི་ཚལ་དུ་རྣམ་པར་སྤུངས། །བྱང་ཆེན། གང་དུ་གཤེགས་ན་བྱང་ཆུབ་ཤིང་གི་དྲུང་། །སྙིང་རྗེའི་ཀུན་ཕན་གཞོན་ནུས་དཀྲིས་པའི་ཟེར། །སྡེར་བཅས་བདུད་སྡེའི་མུན་པ་ཕམ་བྱས་ཏེ། །ས་ལམ་ཆ་ཤས་ཡོངས་སུ་རྫོགས་པར་མཚོན། །བཀྲ་ཤིས་སྒོ་མང་། དང་པོའི་ཆོས་འཁོར་བདེན་བཞིའི་དོ་ཤལ་གྱིས། །ལྔ་སྡེ་བཟང་པོའི་བསླབ་པ་དོན་ཡོད་དུ། །སྦྱར་བའི་ངོ་མཚར་རྣམ་ཐར་རྟེན་འགྱུར་གི། །སྒོ་འཕར་གསར་པའི་ཆོ་གས་དབྱེ་བ་བཞིན། །ཆོ་འཕྲུལ། ཇི་སྙེད་ས་ལམ་བང་རིམ་རྩེར་འཛེགས་པའི། །སྟོབས་བཅུའི་ཆོ་འཕྲུལ་རྡོ་རྗེ་གདེངས་པའི་མེས། །ཕས་རྒོལ་རི་བོའི་རྐང་པ་མྱུར་བཅོམ་ཚེ། །མཉན་ཡོད་ཚོགས་རྣམས་སྐྲག་དང་གུས་པས་བཏུད། །ལྷ་བབས། དྲིན་ལ་
ལན་དུ་ལྡོན་པའི་མངོན་རྟོགས་ཀྱིས། །འཆི་མེད་གྲུབ་པའི་གྲོང་ཁྱེར་ལ་གཤེགས་ནས། །ཞི་བསིལ་བདུད་རྩིས་ཚིམ་བྱས་གསལ་ལྡན་བུ། །འབབ་སྟེགས་ཐེམ་སྐས་མཛེས་པས་བོས་པ་བཞིན། །དབྱེན་འདུམས། དགེ་འདུན་ཁྱུ་མཆོག་འདུས་པའི་རོལ་སྒེག་ནི། །ཀུན་མྱོས་གཉིས་འཐུང་དྲེགས་པས་དབྱེ་བའི་ཚེ། །དགྲ་བཅོམ་རྫུ་འཕྲུལ་ཆོ་གའི་ལྕགས་ཀྱུ་ཡིས། །དབང་ཕྱུག་རྣམ་པར་འདུམས་པའི་གྲགས་པ་འབར། །རྣམ་རྒྱལ། མེ་ཏོག་མདའ་ཅན་ཀུན་ཏུ་དགའ་བྱའི་ཕྱིར། །རྫུ་འཕྲུལ་རྐང་པའི་ཡོན་ཏན་སྦ་བྱས་ཀྱང་། །ཙནྡའི་གསོལ་འདེབས་ཐལ་མོའི་གདེངས་ཀ་རུ། །འཚོ་བའི་འདུ་བྱེད་བྱིན་རླབས་རྣམ་པར་རྒྱལ། །མྱང་འདས། གཟུགས་སྐུའི་གདུལ་བྱ་ཡོལ་བའི་འགྲོ་བ་ཀུན། །སྐྱོ་སླད་ཆོས་དབྱིངས་སྤྲོས་བྲལ་ལ་ཐིམ་ཚེ། །མཚན་དཔེའི་ཟློས་གར་རིང་བསྲེལ་ཟ་མ་ཏོག །རྩྭ་ཅན་འགྲོ་བའི་དཔྱིད་དུ་ལྷག་པར་བཞེངས། །ཞེས་དེ་བཞིན་གཤེགས་པའི་མཛད་པ་དང་མཐུན་པར་བཞེངས་པའི་མཆོད་རྟེན་བརྒྱད་ལ་བསྔགས་བརྗོད་ཀྱི་མེ་ཏོག་ཕྲ་མོ་འདིའང་གཞོན་ནུ་ཨ་བྷཱ་ཡས་འཐོར་བའོ།། །།
དཔལ་ལྡན་ལྷ་མོ་རྡོ་རྗེ་རབ་བརྟན་མ་ལ་བསྟོད་པ་ནང་གི་དེ་ཉིད་བརྗོད་པ།
༈ དཔལ་ལྡན་ལྷ་མོ་རྡོ་རྗེ་རབ་བརྟན་མ་ལ་བསྟོད་པ་ནང་གི་དེ་ཉིད་བརྗོད་པ་ཞེས་བྱ་བ། ན་མཤཱི་མཱི་བཛྲ་པྲ་ཏིཥྛ ཤྲཱི་དེ་བྱེ། གང་ཞིག་སྲིད་པ་རྣམ་གསུམ་གྱི། །སྤྲུལ་པའི་འཁོར་ལོར་སོན་གྱུར་པ། །མཚུངས་པ་མེད་པའི་གཟི་འོད་ཀྱིས། །ནང་གི་མུན་པ་སེལ་ལ་འདུད། ༡ །གཉིས་སུ་མེད་པའི་ཡེ་ཤེས་ཀྱིས། །
དཔལ་ལྡན་བདེ་ཆེན་ལྷན་ཅིག་སྐྱེས། །ཤིན་ཏུ་རྣམ་པར་དག་པ་ཡི། །ཆོས་ཀྱི་སྐུ་ཅན་ཁྱོད་ལ་འདུད། ༢ །ཨེ་ཝཾ་རོ་མཉམ་མཁའ་དབྱིངས་ལས། །བདེ་ཆེན་རྟག་པའི་གཟུགས་གཞན་ལ། །ཁྲོ་ཆགས་སྒེག་ལྡན་ལྷ་མོའི་ཚུལ། །ལོངས་སྤྱོད་རྫོགས་སྐུ་ཁྱོད་ལ་འདུད། ༣ །རྡོ་རྗེའི་ལུས་ནི་གཅིག་པུ་པ། །སྣ་ཚོགས་མཚན་དང་ཁ་དོག་གིས། །སྲིད་ཞིའི་འཇིགས་པ་མཐར་མཛད་པ། །སྤྲུལ་པའི་སྐུ་ཅན་ཁྱོད་ལ་འདུད། ༤ ། ཕྱི་དང་ནང་གི་ཁམས་གསུམ་པོ། །སྐུ་གསུམ་གྲོང་ཁྱེར་མཆོག་ཏུ་ཐིམ། །གཉིས་སུ་མེད་པར་རབ་བརྟན་མ། །ངོ་བོ་ཉིད་སྐུ་ཁྱོད་ལ་འདུད། ༥ །བདུད་སྡེའི་བུད་ཤིང་བསྲེགས་པ་ཡི། །དུད་པའི་སོལ་བས་བྱུགས་པ་ན། །འཕོ་བའི་མཚན་མ་ཟིལ་གནོན་པ། །འཆི་མེད་གཉུག་མ་ཁྱོད་ལ་འདུད། ༦ །བདག་མེད་རྟོགས་པའི་རལ་གྲི་ཡིས། །སྒྲིབ་གསུམ་ཆ་བཅས་སྲོག་འཕྲོག་ནས། །བདེ་མཆོག་རྟག་ཏུ་སྐྱོང་བའི་སྣོད། སྙིང་གར་བཞག་པ་ཁྱོད་པ་འདུད། ༧ །ཞི་བ་ཁྱོད་ལ་འཁྲུགས་པ་ཡི། །ཀུན་དཀྲིས་སྨོས་ཀྱང་ཅི་ཞིག་འཚལ། །ཚུ་རོལ་བརླང་པོར་སྤྱོད་པའི་ཆེད། །རབ་གཏུམ་མིག་འཕྲུལ་འཆང་ལ་འདུད། ༨ །དེ་ཚེ་དེ་དང་རྗེས་མཐུན་པའི། །རྣམ་འགྱུར་ཆ་ལུགས་རབ་འབར་ཞིང་། །མཐའ་གཉིས་ཕ་རོལ་སོན་པ་ཡི། །ཆིབས་ཀྱིས་བཏེགས་པ་ཁྱོད་ལ་འདུད། ༩ །གང་ཞིག་བསམ་པའི་དཔག་བསམ་གྱིས། །འཇིག་རྟེན་
གསུམ་གྱི་རྒུད་པ་འཕྲོག །མཆོག་གི་འབྱོར་པ་ལ་སྦྱོར་བའི། །ཕུན་ཚོགས་འབྱུང་གནས་ཁྱོད་ལ་འདུད། ༡༠ །ཨེ་མ་མང་དུ་སྨོས་ཅི་སྟེ། །ཆོས་ཀྱི་དབྱིངས་འདི་ཆོས་རྣམས་ལ། །སྙོམས་ཞུགས་དེ་དང་ཁྱོད་ཀྱི་ཐུགས། །དབྱེར་མེད་བརྟན་གཡོ་ཀུན་ལ་ཁྱབ། ༡༡ །དེ་ལས་སློབ་དང་མི་སློབ་དང་། །སྲིད་པ་སྐྱོང་བ་ཇི་སྙེད་པ། །རྨི་ལམ་སྒྱུ་མ་མིག་འཕྲུལ་བཞིན། །རྟེན་འབྱུང་རོལ་མོ་ཅིར་ཡང་འཆར། ༡༢ །ཡུན་རིང་དུས་ནས་དུབ་པ་ཡི། །ཡིད་ཅན་ངལ་འཚོར་བགྱིད་པ་ལ། །དཔེ་ཟླ་མེད་པ་མ་འཚལ་བས། །ཁྱོད་ནི་ཁྱོད་དང་མཚུངས་པར་རྟོགས། ༡༣ །ཚུལ་དེར་ཡིད་རབ་གཏོད་པ་ཡིས། །གདུང་བའི་ངག་གི་ཏམྦུ་རས། །ཡེ་ཤེས་གཟིགས་པ་དང་འགལ་བའི། །ནོངས་པ་ཅི་མཆིས་མཐོལ་བཤགས་ཤིང་། ༡༤ །ཏིང་འཛིན་བྱེད་པོས་རབ་བཟུང་བའི། །མཆོད་པའི་སྤྲིན་དང་དེ་ལས་གཞན། །བསྟན་ལ་གུས་པས་ཁྱོད་མཆོད་ན། །དོན་གཉིས་གྲུབ་པའི་བཀྲ་ཤིས་སྩོལ། ༡༥ །ཁྱད་པར་ཐམས་ཅད་གཟིགས་པའི་ཁྲིར། །མཁས་ཚུལ་རིན་ཆེན་རྣམ་བདུན་གྱིས། །མདུན་བདར་གྲུབ་པའི་འཁོར་ལོས་སྒྱུར། །གང་གི་གསུང་གསང་བདུད་རྩི་ནི། ༡༦ །རྫོགས་པར་འཐུང་བའི་སྐལ་བཟང་གི། །པདྨོ་ཡིད་འོང་རྒྱས་པ་ལས། །བཤད་སྒྲུབ་བསྟན་པའི་ངལ་འཚོ་ནི། །བསྐལ་པ་རྒྱ་མཚོར་འབར་གྱུར་ཅིག ༡༧ །
མཆོག་ཏུ་མི་འགྱུར་བདེ་བ་ཆེན་པོ་སྤྲོས་པའི་མཐའ་དང་མི་མཛའ་བ། །དཔལ་ལྡན་ཆོས་དབྱིངས་ལྷན་ཅིག་སྐྱེས་མ་རྡོ་རྗེའི་ཆོས་སྲུང་རྒྱ་མཚོ་ཡི། །ཐུགས་ཀྱི་ཐིག་ལེར་རབ་ཏུ་བརྟན་པས་རབ་མཆོག་ལྷ་དང་མི་རྣམས་ཀྱི། །འཇིགས་པ་མཐའ་དག་འཕྲོག་པའི་ཐ་མས་རྟག་ཏུ་དགེ་ལེགས་སྦྱིན་མཛོད་ཀྱེ། ༡༨ །ཞེས་གཉིས་སུ་མེད་པའི་ཡེ་ཤེས་འབར་གཡོ་བརྟན་པའི་ཐ་མར་རྡོ་རྗེའི་བརྟུལ་ཞུགས་ཀྱི་མཐུ་གྲུབ་པས་སྒྱུ་འཕྲུལ་དྲྭ་བ་ཆེན་པོའི་མིག་འཕྲུལ་བསྟན་པ་སྐྱོང་བའི་གཙོ་མོར་ཤར་བ་གང་དེའི་གནས་ལུགས་དང་། སྣང་ཚུལ་གྱི་དེ་ཁོ་ན་ཉིད་ལ་བརྩམས་ཏེ་བསྔགས་པའི་མེ་ཏོག་འཐོར་བས་གསར་ལམ་མཛེས་པར་བྱས་ཏེ་འདོད་པའི་དོན་ལ་དབུགས་འབྱིན་པར་གསོལ་བའི་ཚིགས་སུ་བཅད་པ་འདིའང་། ཡེ་ཤེས་ཀྱི་སྐུ་ཐ་མལ་པའི་གཟུགས་ཀྱི་ཟ་མ་ཏོག་ཏུ་རྒྱས་བཏབ་སྟེ། རྡོ་རྗེ་ནཱ་ད་མི་ཤིགས་པའི་སྒྲ་དབྱངས་ཚུ་རོལ་མཐོང་བ་རྣམས་ཀྱི་རྣ་བའི་སྤྱོད་ཡུལ་དུ་ལེན་པ། རིན་ཆེན་གྲུབ་པའི་རྒྱལ་ཚབ། བློ་གསལ་གྱི་གདུལ་བྱ་དང་བཤད་སྒྲུབ་ཀྱི་བསྟན་པ་ཆབ་གཅིག་སྐྱོང་བ་གང་གི་ཞབས་པད་སྲིད་ཞིའི་འཇིགས་འཕྲོག་ཚངས་གནས་སུ་རེག་པ། སའི་ཆ་གཉིས་འཐུང་དྲེགས་པས་བསྒྱིངས་པའི་སྤྱི་གཙུག་ལྟར་མཐོ་བ་ཤར་མདོ་ཁམས་ཀྱི་ཡུལ་དུ་སྐྱེས་པའི་ད་རི་དྭ་མཉྫགྷོ་ཥས་དཔལ་ཞྭ་ལུ་རི་ཕྲུག་གི་སྒྲུབ་ཁང་རྣམ་གྲོལ་ཡང་རྩེར་གང་ཤར་བྲིས་པ་སིདྡྷི་རསྟུ། །
བླ་མ་འཇམ་པའི་དབྱངས་ལ་བྱ་དཀའ་བའི་རྒྱན་དང་ཡི་གེའི་མ་མོ་སྤེལ་བའི་བསྟོད་པ་རབ་བསྔགས་ནོར་བུའི་རྒྱུད་མང་།
བླ་མ་འཇམ་པའི་དབྱངས་ལ་བྱ་དཀའ་བའི་རྒྱན་དང་ཡི་གེའི་མ་མོ་སྤེལ་བའི་བསྟོད་པ་རབ་བསྔགས་ནོར་བུའི་རྒྱུད་མང་ཞེས་བྱ་བ་བཞུགས་སོ། །ན་མོ་གུ་རུ་མཉྫགྷོ་ཥཱ་ཡ། ཀ་མ་ལ་དང་ཟླ་བ་རྒྱས་པ་དང་། །ཁུ་བ་ལྟར་དཀར་མཚན་བཟང་དཔལ་འབར་བ། །ག་ནས་བསམས་
ཀྱང་རྒྱལ་སྲས་གཞན་ལས་འཕགས། །ང་ཅག་སྐྱབས་གནས་འཇམ་དབྱངས་བླ་མར་བསྔགས། ༡ །ཅུ་ག་རབ་མཚར་ལྷར་བཅས་དྭང་བས་དད། །ཆ་ཤས་དབྱངས་ལས་ཟབ་རྒྱས་སྣང་མཛད་པས། །ཇ་ཆང་ལས་འདས་ཐར་ལམ་རབ་མངར་བ། །ཉི་ཟླ་ལྟར་གསལ་འཇམ་དབྱངས་བླ་མར་བསྔགས། ༢ །ཏ་ཐཱ་ག་ཏ་སྲས་བཅས་ཐམས་ཅད་དང་། །ཐ་དད་མ་འཚལ་གཞན་ཕན་མཛད་པ་ཅན། །ད་ལྟ་བདག་ཅག་རྣམས་ལ་ལྷག་པར་ཡང་། །ན་མར་སྨན་མཛད་འཇམ་དབྱངས་བླ་མར་བསྔགས། ༣ །པ་སངས་ལྟར་དཀར་དམ་བཅའ་རྩ་བ་བརྟན། །ཕ་མཐའ་མཁའ་ཁྱབ་ཐར་ལམ་ཡང་དག་བཞག །བ་ལང་དང་མཉམ་དམན་ལ་ཁྱད་པར་བཅས། །མ་ལྟར་བྱམས་མཛད་འཇམ་དབྱངས་བླ་མར་བསྔགས། ༤ །ཙ་ཀྲས་མཚན་པ་གང་ཞབས་དྲན་ཙམ་ནས། །ཚ་གྲང་དམྱལ་བར་གནས་ཀྱང་ལམ་བཟང་དྲངས། །ཛ་ཡ་ལ་སྡང་རྟག་ཆད་སྨྲ་བ་དག །ཝ་ལྟར་ཕམ་མཛད་འཇམ་དབྱངས་བླ་མར་བསྔགས། ༥ །ཞྭ་ལྟར་བླ་ན་འཕགས་པ་མན་ཆད་ནས། །ཟླ་ཐང་དམན་པར་ཆགས་པ་ཡན་ཆད་བཅས། །འ་ཅག་ཕ་དང་མ་ལྟར་བསྐྱབ་མཛད་པ། །ཡ་མཚན་བསམ་འདས་འཇམ་དབྱངས་བླ་མར་བསྔགས། ༦ །ར་བ་ཁ་བས་མཚན་པ་ཐམས་ཅད་ན། །ལ་ལ་མ་ལགས་དམ་པ་མཐའ་དག་ཀྱང་། །ཤུ་ཤ་དྷ་རས་ཁྱབ་ལྟར་མཁས་པ་དང་། །
ས་ལམ་རྒྱས་མཛད་འཇམ་དབྱངས་བླ་མར་བསྔགས། ༧ །ཧུ་ལ་དང་མཉམ་སྤང་བྱ་ཆ་བཅས་བསལ། །འཕགས་པས་མཐར་མཛད་བླང་བྱ་མཐའ་ཡས་ལྡན། །ཨ་ར་པ་ཙ་གསང་སྔགས་དབྱངས་སྙན་པས། །མཁའ་ཁྱབ་སད་མཛད་འཇམ་དབྱངས་བླ་མར་བསྔགས། ༨ །སྲིད་ཞིའི་མིག་གཅིག་རིག་པའི་གཟི་བརྗིད་ཀྱིས། །ཕུལ་བྱུང་ནུས་མཐུས་བདུད་བཏུལ་སྐུ་གསུམ་གྲུབ། །མཁྱེན་བརྩེ་ཡེ་ཤེས་དཔེ་མེད་ཆེས་ཆེར་བརྙེས། །མགོན་ཁྱོད་བསྟོད་དོ་བློ་གྲོས་མཆོག་སྩོལ་མཛོད། །ཅེས་པའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གསོལ་བ་བཏབ་པ་དགེ་ལེགས་སུ་གྱུར་ཅིག། ༈ །།འཕགས་མ་སྒྲོལ་མ་དཀར་མོ་ཡིད་བཞིན་འཁོར་ལོ་ལ་བྱ་དཀའ་བའི་རྒྱན་དང་ཡི་གེའི་མ་མོ་སྤེལ་བའི་བསྟོད་པ་རབ་བསྔགས་འཆི་མེད་གྲུབ་པའི་རྒྱུད་མང་ཞེས་བྱ་བ་བཞུགས་སོ། །ན་མོ་གུ་རུ་ཨཱརྨ་ཏཱ་ར་ཡེ། ཀ་དམྤ་ཅན་རྣམ་པར་དག་པ་དང་། །ཁ་བ་པད་རྩ་ལྟར་དཀར་མཚན་བཟང་ལ། །ག་ཤལ་རཏྣ་ཀ་མ་ལས་བརྒྱན་པ། །ང་ཅག་སྨན་མཛད་ཨཱརྱ་ཏཱ་རཱར་བསྔགས། ༡ །ཅུ་ག་ལྷ་རྫས་རས་བཟང་ཤམ་ཐབས་འཆང་། །ཆ་བྱད་རབ་བཀྲ་རྣམ་མང་ཚར་དངར་བས། །ཇ་དར་ལས་ལྷག་ཡ་མཚན་མཐའ་ཡས་ལྡན། །ཉ་རྒྱས་ཟླ་སྣང་ཨཱརྱ་ཏཱ་རཱར་བསྔགས། ༢ །ཏ་ཐཱ་ག་ཏ་སྲས་བཅས་དགའ་མཛད་གང་། །ཐ་དད་ཁམས་དབང་བསམ་པ་དང་འཚམས་པར། །ད་ལྟ་དྲན་པས་བར་ཆད་མཐའ་དག་དང་། །ན་རྒ་བསལ་མཛད་
ཨཱརཱ་ཏཱ་རཱར་བསྔགས། ༣ །པ་ལ་ཤ་ལྟར་རབ་འཇམ་ཕྱག་གཡས་རྒྱས། །ཕ་མཐའ་བསམ་འདས་བདག་གཞན་རབ་བསྐྱངས་ནས། །བ་ལང་དང་མཉམ་ཉམ་ཐག་བསྐྱབ་མཛད་པ། །མ་མ་ཟླ་བྲལ་ཨཱརྨ་ཏཱ་རཱར་བསྔགས། ༤ །ཙ་ཀྲས་རབ་མཚན་པདྨ་དང་བཅས་ཕྱག །ཚ་བ་བསལ་སླད་དཔག་བསམ་ལྟར་རྒྱས་པས། །ཛ་ཡར་དད་རྣམས་རྒྱལ་དང་མ་བདུད་ན། །ཝ་ལྟར་མཐར་མཛད་ཨཱརྨ་ཏཱ་རཱར་བསྔགས། ༥ ། ཞྭ་ལྷམ་སྐད་དང་བསམ་པ་ཐ་དད་པ། །ཟ་ཐང་རབ་དང་ཉམ་ཐག་གང་ལ་ཡང་། །འ་ཅག་འབངས་ལྟར་གཞན་ཕན་མཉམ་པ་ཅན། །ཡ་མཚན་མཁའ་ཁྱབ་ཨཱརྱ་ཏཱ་རཱར་བསྔགས། ༦ །རྭ་ལྟར་རྟག་ཆད་ཐ་དད་མཐའ་ལས་འདས། །ལ་ལ་མ་ལགས་མཚན་མ་ཆ་བཅས་སྤངས། །ཤུ་སྟག་གཞན་ཕན་མཛད་པ་བསམ་ཡས་པས། །ས་ལ་འགྲན་བྲལ་ཨཱརྱ་ཏཱ་རཱར་བསྔགས། །ཧ་ཧཱར་བཞད་པ་བརྒྱད་ལྡན་གསང་སྔགས་དང་། །འཕགས་མ་གང་མཚན་རྣ་བར་གྲགས་པས་ཀྱང་། །ཨ་མཱ་ར་ཎ་སྐལ་བཟང་མཐའ་དག་ལ། །རྟག་པར་སྩལ་མཛད་ཨཱརཱ་ཏཱ་རཱར་བསྔགས། ༨ །སྲིད་པའི་འཇིགས་བཅིལ་ཞི་བའི་གཟི་བརྗིད་ཀྱིས། །ཀུན་ཏུ་ཕུལ་བྱུང་སྐུ་གསུམ་ཐུགས་སུ་གྲུབ། །ཡེ་ཤེས་ཆེ་བརྙེས་དགེ་ལེགས་གཏེར་ཆེན་དེས། །འཁོར་མཚོ་ཡོངས་སྒྲོལ་འདོད་དོན་མཆོག་སྩོལ་མཛོད། །ཅེས་པའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོའི་བློ་གྲོས་ཀྱི་སོར་མོས་བསྒྲེང་བའི་འཆི་མེད་གྲུབ་པའི་ཏམྦུ་ར་བློ་གསལ་རྣ་བའི་རྒྱན་དུ་བཀོད་པ་དགེ་ལེགས་སུ་གྱུར་ཅིག། །།
འཕགས་མ་དབྱངས་ཅན་མ་ལ་བྱ་དཀའ་བའི་རྒྱན་དང་ཡི་གེའི་མ་མོ་སྤེལ་བའི་བསྟོད་པ་རབ་བསྔགས་བཻཌཱུཪྻའི་རྒྱུད་མང་།
༈ འཕགས་མ་དབྱངས་ཅན་མ་ལ་བྱ་དཀའ་བའི་རྒྱན་དང་ཡི་གེའི་མ་མོ་སྤེལ་བའི་བསྟོད་པ་རབ་བསྔགས་བཻཌཱུཪྻའི་རྒྱུད་མང་ཞེས་བྱ་བ་བཞུགས་སོ། །ན་མོ་གུ་པ་ཏེ། ཀ་མ་ལ་ལྟར་གཞན་ཕན་སྤྱན་རས་ཡངས། །ཁུ་བ་ལྟར་དཀར་མཚན་བཟང་ཁྱད་པར་འཕགས། ག་ལབ་གང་དྲན་པས་ཐར་ལམ་སྣང་། །ང་བདག་ལས་འདས་དབྱངས་ཅན་འཕགས་མར་བསྔགས། ༡ །ཅུ་ག་ལྷ་རྫས་གསར་པ་བརྒྱ་ཕྲག་དང་། །ཆ་ཙམ་གཞལ་དཀའ་རཏས་རབ་སྤྲས་པས། །ཇི་ལྟར་དམན་དང་དམ་པ་དགའ་མཛད་ལྷ། །ཉ་རྒྱས་ཟླ་མདངས་དབྱངས་ཅན་འཕགས་མར་བསྔགས། ༢ །ཏ་ཐཱ་ག་ཏས་ངག་ལ་དབང་སྩལ་བས། །ཐ་དད་སྙན་དངགས་དལ་འབབས་སྒྲ་བརྙན་འཆང་། །ད་ལྟ་སྐལ་བཟང་ཁམས་དབང་དང་འཚམས་པར། །ན་མར་བསྒྲགས་མཛད་དབྱངས་ཅན་འཕགས་མར་བསྔགས། ༣ །པ་སངས་ཤར་ནས་ཆས་སྙམ་ཤལ་བཟང་གསལ། །ཕ་མཐའ་མཁར་དང་རབ་མཉམ་གསང་བ་ཟབ། །བ་གམ་དང་ལྡན་རྣམ་རྒྱལ་ཁང་བཟངས་ལྟར། །མ་མ་བརྟན་ལྡན་དབྱངས་ཅན་འཕགས་མར་བསྔགས། ༤ །ཙ་ཀྲས་བརྒྱན་པ་ཞབས་པད་ལྷར་བཅས་པར། །ཚ་བས་མནར་ལ་ཟླ་ལྟར་སྨན་མཛད་ཀྱང་། །ཛ་ལང་རྟག་ཆད་གཡང་སར་འཁྱམས་པ་རྣམས། །ཝ་ལས་དམན་བྱས་དབྱངས་ཅན་འཕགས་
མར་བསྔགས། ༥ །ཞྭ་དང་རྒྱུན་ཙམ་ལ་ཆགས་ཨ་འཐས་ཅན། །ཟ་ཉལ་འཆག་ལས་ལམ་བཟང་མ་དྲན་པ། །འ་ཅག་རྣམས་ལ་ཐར་ལམ་སྣང་མཛད་པས། །ཡ་མཚན་འབྱམས་ཀླས་དབྱངས་ཅན་འཕགས་མར་བསྔགས། ༦ །རཱ་མ་ཎ་ལྟར་དམ་བཅའ་རབ་བརྟན་པས། །ལ་ལས་འབད་པས་མ་འཚལ་མཐར་ལམ་མཁར། །ཤུ་ཤ་དྷ་ར་ལྟར་གསལ་སྙན་གྲགས་གཏམ། །ས་དང་མཁའ་ཁྱབ་དབྱངས་ཅན་འཕགས་མར་བསྔགས། ༧ །ཧ་ཅང་དད་པས་བརླན་ལྡན་སྐལ་བཟང་དག །མཁའ་དང་གྲགས་དཀར་པདྨ་རྒྱས་པ་དང་། །ཨ་ལ་ལར་བཅས་འཕགས་པས་བསྔགས་མཛད་པ། །གཞན་ཕན་ཟླ་བྲལ་དབྱངས་ཅན་འཕགས་མར་བསྔགས། ༨ །རིག་པའི་གཟི་བརྗིད་སྲིད་འདིའི་སྙིང་གི་དཔྱིད། །ཕུལ་བྱུང་ཚུལ་འཁུམས་ཀུན་ཏུ་གུས་བཏུད་མཐུས། །མཁྱེན་བརྩེ་དཔེ་མེད་མེ་ཤེལ་ཟེར་ཕྲེང་ཆེས། །ཉོན་མོངས་ཚོགས་བཅོམ་བློ་མཆོག་འདོད་དོན་སྩོལ། ༩ །ཞེས་འཕགས་མ་སྭ་ར་སྭ་སྟི་ལ་དབྱངས་ངེས་པའི་བྱ་དཀའི་ཚུལ་དང་མཐུན་པར་ཅུང་ཟད་བསྔགས་པའི་ཚིགས་སུ་བཅད་པ་བཻཌཱུརྱའི་རྒྱུད་མང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བློ་གྲོས་ཀྱི་སོར་མོའི་རྩེས་བསྒྲེངས་པ་སུ་ཤུ་བྷ་བྷཱུ་ཡཱ་ཏ།། །།
བོད་ཀྱི་ཡང་དག་པའི་མཁས་པ་ཆེན་པོར་བསྟོད་པ་དད་གསུམ་ནོར་བུའི་རྒྱུད་མང་།
༈ བོད་ཀྱི་ཡང་དག་པའི་མཁས་པ་ཆེན་པོར་བསྟོད་པ་དད་གསུམ་ནོར་བུའི་རྒྱུད་མང་ཞེས་བྱ་བ་བཞུགས་སོ། །རྒྱ་གར་སྐད་དུ། སཾ་བྷོ་ཊ་མ་ཧཱ་པཎྜི་སཱུ་ཏི་ནཱ་མ། བོད་སྐད་དུ། བོད་ཀྱི་ཡང་དག་པའི་མཁས་པ་ཆེན་པོར་བསྟོད་པ། བཅོམ་ལྡན་འདས་གསུང་གི་རྡོ་རྗེ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཀ་ལིའི་ཕྲེང་མཛེས་རྡོ་རྗེའི་སྒྲ་དབྱངས་བརྗོད་པ་མཐའ་ཡས་གཞིར་གྱུར་པས། །ཁ་བ་ཅན་ལྗོངས་ཡིད་ཅན་ཀུན་ལ་ཤེས་རབ་ཟབ་མོའི་མིག་བྱིན་སླད། །ག་ནས་བསམས་ཀྱང་བཀའ་དྲིན་མཚུངས་མེད་སངས་རྒྱས་ཉིད་ཀྱི་ཕྲིན་ལས་པ། །ང་ཅག་སྐྱབས་གཅིག་ཐོན་མི་ལོ་ཙཱས་བྱང་ཆུབ་བར་དུ་བྱིན་གྱིས་རློབས། ༡ །ཅ་ག་མཚར་སྡུག་མཚུངས་པ་མེད་པ་མིག་གི་བདུད་རྩིའི་ཨུཏྤ་ལ། །ཆ་ཡི་ཆ་ཡང་གཞལ་བར་དཀའ་བའི་གཟི་བརྗིད་ཉི་མ་བྱེ་བའི་སྐུ། །ཇ་རིལ་སྐྲ་ཅན་ཚོགས་ཀྱང་འདར་བྱེད་འཇམ་དཔལ་ཁྲོས་པའི་སྙེམས་འཆང་བཞིན། །ཉ་རྒྱས་ཟླ་ལྟར་ཀུན་ལ་དགའ་སྟེར་བདུད་རྩིའི་སྤུན་ཟླ་དེ་ལ་འདུད། ༢ །ཏུ་ཐཱ་ག་ཏས་ལེགས་པར་གསུངས་པའི་ཞི་བསིལ་ཆགས་བྲལ་ཆོས་སྒོ་འབུམ། །ཐ་དད་བློ་ཡི་མོས་པ་དང་མཚུངས་མིང་ཚིག་བརྡ་དག་སྟོན་པའི་གསུང་། །ད་ལྟ་མཆོག་དམན་བར་མའི་སྤྱི་ནོར་སུམ་ཅུ་པ་དང་རྟགས་ཀྱི་གཞུང་། །ན་མར་འདོད་འཇོའི་དཔག་བསམ་ཤིང་བཞིན་འཆད་པ་མེད་པར་སྩོལ་ལ་འདུད། ༣ ། པ་སངས་ལྟ་བུར་རྣམ་པར་དཀར་བའི་ཀུན་རྫོབ་བྱང་སེམས་ཐིག་ལེ་ནི། །ཕ་རོལ་ཕྱིན་པ་ཀུན་གྱི་མཐར་ཐུག་ཤེས་རབ་ཟབ་མོར་མི་ཕྱེད་པས། །བ་མཆོག་ནོར་བུ་གཏེར་གྱི་བུམ་ལྟར་མཁའ་ཁྱབ་འགྲོ་ལ་རྗེས་ཆགས་
ཐུགས། །མ་ལུས་ཡིད་ཀྱི་རྒུད་པ་སེལ་བའི་མཁྱེན་བརྩེ་ཟླ་མེད་མཆོག་ལ་འདུད། ༤ །ཙ་ར་ཀ་སོགས་ཐུན་མོང་རིག་པའི་གོས་བཟང་ལྷབ་ལྷུབ་རྣམ་པར་གཡོ། །ཚ་ཟེར་ཅན་བཞིན་གཞན་སྡེའི་མུན་འཇོམས་ཡོན་ཏན་ནོར་བུའི་རྒྱན་བཀོད་པས། །ཛ་ཡའི་བསྟན་ལ་བྱ་བ་ཆེར་མཛད་དོན་གྱི་ཤིང་རྟ་ཆེན་པོ་དངོས། །ཝ་ལེར་ཡིད་ལ་དྲན་པའི་མོད་ནས་ལག་པད་སྙིང་གར་ཟུམ་སྟེ་འདུད། ༥ །ཞྭ་ཐོད་ཛམྦུ་ནཱ་དའི་སྒེག་འཆང་ཆེན་པོར་རློམ་པ་མན་ཆོད་ནས། །ཟླ་མའི་དོན་དུ་གྲོང་མཐའ་ཉུལ་བའི་དབྱུག་པ་འཆང་བ་ཡན་ཆོད་ཀྱི། །འ་འུར་སྤྱོད་པས་ལྟོ་འཚོལ་རྣམས་ཀྱང་ཁྱོད་ཀྱི་ཕྲིན་ལས་མགྲིན་པར་བརྒྱན། །ཡ་མཚན་རྟོགས་བརྗོད་ནམ་མཁའི་མཐའ་བརྒལ་འགྲན་ཟླ་སྤངས་ལ་སྙིང་ནས་འདུད། ༦ །རྭ་བ་གངས་རིས་བསྐོར་བའི་ཡུལ་འདིར་ཕྱག་ན་པདྨོ་འཆང་བ་དང་། །ལ་ལ་ཙམ་མིན་ཀུན་ཏུ་མཚུངས་པའི་ཐུགས་རྗེ་ཅན་ཁྱོད་བཀའ་དྲིན་ལ། །ཤ་སྟག་བདག་སོགས་མོས་པའི་ཡིད་ཅན་སྙིང་ནས་གདུང་པས་གསོལ་འདེབས་ན། །ས་བཅུའི་དབང་ཕྱུག་འཕགས་པ་མཆོག་གིས་ད་ལྟ་ཉིད་དུ་བྱིན་གྱིས་རློབས། ༧ །ཧ་ཅང་གཅམ་བུ་མིན་པར་མོས་པའི་བློ་ཡི་ནོར་བུའི་རྒྱུད་མང་པོ། །བཟོད་མེད་དད་པའི་སོར་རྩེས་བསྐུལ་ལས་སྙན་འགྱུར་ངག་གི་དབྱངས་བདུན་གླུས། །ཨ་ཡིག་སྐྱེ་མེད་དོན་གྱི་འཇམ་དཔལ་ཐོན་མི་ཆེན་པོ་ཁྱོད་བསྔགས་
པས། །མཁའ་ཁྱབ་ཡིད་ཅན་རྒྱ་མཚོའི་རྡུལ་སྙེད་ཀུན་བཟང་སྤྱོད་པར་རོ་གཅིག་ཤོག ༨།ཅེས་པའང་གངས་རིའི་ལྗོངས་འདིར་བཀའ་དྲིན་སུས་ཀྱང་གཞལ་བར་དཀའ་བའི་ཤིང་རྟ་ཆེན་པོ་ཐུ་མིའི་རིགས་འཁྲུངས་སཾ་བྷོ་ཊའི་རྣམ་པར་ཐར་པ་ཡང་ནས་ཡང་དུ་ཡིད་ཀྱི་ནོར་བུའི་མེ་ལོང་དྭང་ཞིང་གཙང་མའི་ངོགས་སུ་བཀོད་པ་ན། ཐུགས་རྗེ་ཆེན་པོ་བཞི་དང་ལྡན་པས་མངོན་སུམ་བཞིན་བྱིན་གྱིས་བརླབས་པའི་ཐུན་མོང་མ་ཡིན་པའི་མཚན་མ་ཕྲ་མོ་ཙམ་ཐོབ་པའི་ཚེ། རབ་ཚེས་ས་འབྲུག་ལོའི་རྒྱལ་ཟླ་བའི་རྒྱལ་བ་གཉིས་པའི་དུས་མཆོག་ཏུ་དགེ་བར་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་གང་ཤར་ཐོགས་པ་མེད་པར་སྐད་ཅིག་ལ་སྨྲས་རིམ་བཞིན་རྣམ་པར་དཔྱོད་པ་དང་ལྡན་པས་ཡི་གེར་བྲིས་པའི་དགེ་བས་བསིལ་ལྡན་གྱི་ལྗོངས་འདིར་སངས་རྒྱས་ཀྱི་བསྟན་པ་རིན་པོ་ཆེ་ཡུལ་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པའི་རྒྱུར་གྱུར་ཅིག། །།
སྤྱན་རས་གཟིགས་དངོས་སྤྲུལ་པའི་རྒྱལ་པོ་སྲོང་བཙན་ཞབས་ཀྱི་རྣམ་ཐར་ལ་ཅུང་ཟད་བསྔགས་པའི་ཚིག་རྒྱན་མེ་ཏོག་གཞོན་ནུའི་མཆོད་སྤྲིན།
༈ སྤྱན་རས་གཟིགས་དངོས་སྤྲུལ་པའི་རྒྱལ་པོ་སྲོང་བཙན་ཞབས་ཀྱི་རྣམ་ཐར་ལ་ཅུང་ཟད་བསྔགས་པའི་ཚིག་རྒྱན་མེ་ཏོག་གཞོན་ནུའི་མཆོད་སྤྲིན་ཅེས་བྱ་བ་བཞུགས་སོ། །ཨོཾ་སྭསྟི་པྲ་ཛེ་རབ་སྤེལ་གྱི་ཤིས་བརྗོད། ཕྱག་ན་པདྨོ་གཟུགས་གཞན་བསྒྱུར་བ་བྱང་ཆུབ་སྤྱོད་པའི་དྲང་སྲོང་ཆེ། གཞན་ཕན་སྨོན་ལམ་བཙན་པོའི་མཐུས་བསྐུལ་གངས་རིའི་ལྗོངས་འདིར་སྣང་བའི་མོད། །ཟབ་ཅིང་བརྟག་དཀའི་མཁྱེན་རབ་སྒམ་པོས་ཤེས་བྱ་མཐའ་དག་གཟིགས་པ་དང་། །ཕན་བདེའི་སྣང་བས་ས་གསུམ་ཁྱབ་མཛད་གང་དེས་ཤིས་པའི་མེ་ཏོག་སྩོལ། ༡ །རིགས་ཀྱི་རང་བཞིན་བརྗོད་པ། ཐོག་མ་ཉིད་ནས་ཚད་མེད་སྙིང་རྗེ་དང་། །དད་
དང་ངེས་འབྱུང་སྤོབས་པ་ཕུན་ཚོགས་ཤིང་། །དགེ་ཆོས་ཡོངས་སུ་སྡུད་ལ་མཁས་པ་གང་། རྒྱལ་བའི་སྲས་མཆོག་རྣམས་ཀྱི་བསྔགས་འོས་ཉིད། ༢ །བྱ་བའི་རང་བཞིན་བརྗོད་པ། ལྷག་པར་བྱང་ཆུབ་སེམས་དང་་མི་ཕྱེད་པའི། །སྙིང་སྟོབས་གཞར་ཡང་ཉམས་པ་མེད་པ་ཡིས། །མཐའ་ཀླས་སེམས་ཅན་དོན་རབ་བགྱིད་པ་ལ། །སྤྲོ་བས་སྲིད་པའི་གནས་སུ་བདེ་བར་ཞུགས། ༣ །ཡོན་ཏན་གྱི་རང་བཞིན་བརྗོད་པ། དེ་ལྟའི་ཡོན་ཏན་རྨད་བྱུང་གཏམ་གྱི་ཕུལ། །ཡང་ཡང་ཡིད་ལ་གོམས་པའི་ལེགས་བྱས་ཀྱིས། །མཆོག་ཏུ་གུས་པའི་བློ་མིག་གྲོལ་བ་དང་། བསྔགས་བརྗོད་ཚིག་གི་མཆོད་སྤྲིན་ཅུང་ཟད་སྟོབ། ༤ །རྫས་ཀྱི་རང་བཞིན་བརྗོད་པ། གྲུ་འཛིན་རི་ལ་དགྱེས་པའི་ཐུགས་རྗེའི་གཟུགས། །སྲིད་དང་ཞི་བའི་འབྱོར་པས་མངོན་མཐོ་བའི། །གངས་ཅན་བསོད་ནམས་ས་གཞིར་འཁྲུངས་པ་ན། །སྲོང་བཙན་སྒམ་པོར་གྲགས་པའི་ཡི་གེས་བརྗིད། ༥ །ཆོས་དཔེ། དེ་ཚེ་ལྷན་སྐྱེས་རིག་དང་བརྩེ་བ་སོགས། །དམ་པའི་ཡོན་ཏན་དུ་མའི་སྒེག་འཆང་བ། །ཟླ་ཤེལ་བདུད་རྩིའི་ཟེར་གྱིས་རབ་བྱེ་བའི། །སྟེང་འཐུང་དཀར་པོ་ལྟ་བུར་ལྷག་པར་མཛེས། ༦ །དངོས་པོའི་དཔེ། རྒྱལ་ཐབས་ཡན་ལག་བདུན་གྱིས་འབྱོར་པའི་ཕུལ། །ཤར་རིའི་རྩེ་མོར་འཛེགས་པའི་ཉི་གཞོན་དང་། །དེ་ལས་བྱུང་བའི་སྡེ་བཞིའི་ཕུན་ཚོགས་ཀྱང་། །སྣང་བའི་ངོ་མཚར་
འབུམ་དུ་འགྱེད་པས་མཚོན། ༧ །བཟློག་པའི་དཔེ། ཁྱད་པར་ཁ་བ་ཅན་གྱི་སྨན་ལྗོངས་འདིར། །དགེ་བཅུའི་ཁྲིམས་ཀྱི་དུས་སྟོན་དར་བབས་བཞིན། །དཔྱིད་དཔལ་ཡོངས་སུ་རྒྱས་པའི་བརླན་དྲོད་ཀྱིས། །པུཎྜ་རཱི་ཀའི་ནགས་ཀླུང་ཅིར་ཡང་གཡོ། ༨ །ཕན་ཚུན་དཔེ། ཚད་མེད་སྙིང་རྗེས་གཞན་ལ་སྨན་མཛད་གང་། །པད་དཀར་འཆང་བའི་དབང་པོ་དང་མཚུངས་ཏེ། །མིག་མི་འཛུམ་པའི་བྱང་ཆུབ་སྤྱོད་མཆོག་གི །དམ་བཅའ་དེ་ཡང་ཁྱོད་ཀྱི་རྗེས་སུ་འགྲོ། ༩ །ངེས་པའི་དཔེ། གཟུ་བོར་གནས་དང་ཤིན་ཏུ་ཟབ་པའི་བློ། །མཐའ་ཡས་འཆི་བ་མེད་པའི་རྫིང་རིང་ལས། །དཔེར་འོས་གཉིས་པ་སྲིད་འདིར་མ་དམིགས་ཕྱིར། །མཚན་གྱི་སྙན་པ་སྲིད་ཞིའི་བླ་ན་མཛེས། ༡༠ །ངེས་མེད་དཔེ། རེ་ཞིག་གཙུག་ལག་གཞུང་བརྒྱར་གཟིགས་པ་ཡི། །རྣམ་དཔྱོད་རྡོ་རྗེ་རྣོན་པོའི་ཡེ་ཤེས་དང་། །མཚུངས་མོད་གཞན་དུ་དེ་ལྟར་སྲིད་ན་ཡང་། །ཁྱོད་ཀྱི་དྲི་མེད་མཁྱེན་པའི་སྤུན་ཟླར་འོས། ༡༡ །བསྡུས་པའི་དཔེ། རྣམ་མང་འབྱོར་པས་མཐོ་བ་ཁོ་ན་ཡིས། །འཁོར་ལོས་སྒྱུར་བའི་རྗེས་སུ་བསྔགས་མིན་ཏེ། །ཕན་མཛད་དམ་ཆོས་སྣང་བས་རྫོགས་ལྡན་གྱི། །དགེ་མཚན་གསར་དུ་ངོམས་པ་འདིས་ཀྱང་ངོ་། ༡༢ །ཕུལ་བྱུང་དཔེ། སྙིང་རྗེའི་དབང་ཕྱུག་གྲུ་འཛིན་དགའ་ཚལ་དང་། །མགོན་ཁྱོད་ཁ་བའི་རྡུལ་མང་བརྩེགས་པའི་ཁྲོད། །མཚན་དཔེའི་འཛུམ་ཞལ་ངོམས་པའི་བྱེ་
བྲག་ལས། །སྤངས་རྟོགས་ཕྲིན་ལས་ཁྱད་པར་དམིགས་སུ་མེད། ༡༣ །རབ་བརྟག་དཔེ། འདི་ཡི་གཏོང་ལ་གོམས་པའི་འདོད་དགུའི་མཛོད། །ང་ལ་ཡོད་ཅེས་ཡོངས་འདུའི་དབང་པོ་གང་། །སྙེམས་པར་མི་འཚལ་ཡིད་བཞིན་དཔལ་སྦྱིན་པའི། །ཁྱད་པར་ཆེ་ལྡན་ནོར་གྱི་བུ་ཡང་མཐོང་། ༡༤ །རྨད་བྱུང་དཔེ། འབིགས་བྱེད་རླུང་གི་རྒྱུ་བ་དལ་འབབས་པའི། །འཁོར་བའི་ཚ་གདུང་ལྟུག་པོ་འཇིལ་ནུས་ན། །གང་གི་བྱང་ཆུབ་སེམས་དཔའི་ཚུལ་ཁྲིམས་ཀྱི། །ཕུང་པོ་ཡོངས་སུ་དག་པའི་དཔེ་ཟླར་འོས། ༡༥ །རྨོངས་པའི་དཔེ། གཞར་ཡང་འཁྲུགས་པ་མེད་པའི་བློ་གྲོས་ནི། །ཀུན་ལ་སྙོམས་པས་འཛིན་མར་རྣམ་བརྟགས་བློས། །བཟོད་པའི་གོ་ཆ་བརྟན་པོ་དེ་དྲན་པས། །ལྷན་པོའི་རྣ་རྒྱན་ཅན་གྱིའང་རྗེས་སུ་བསྙེགས། ༡༦ །ཐེ་ཚོམ་དཔེ། ཅི་འདི་ཀུན་གསལ་ཡངས་པའི་འགྲམ་ངོགས་སུ། །དལ་མེད་རྒྱུ་བའི་ཉིན་མོར་བྱེད་པའམ། །གཅིག་ཏུ་གཞན་ལ་སྨན་པ་འབའ་ཞིག་སླད། །བརྩོན་པས་བགྲོད་པའི་བྱང་ཆུབ་སེམས་དཔའ་གང་། ༡༧ །གཏན་ཕེབས་དཔེ། འོན་ཀྱང་སྲིད་པའི་མུན་པ་བསྙིལ་མཁས་པའི། །གཟུངས་དྲན་ཏིང་འཛིན་རྒྱ་མཚོའི་དཔལ་ལྡན་ཕྱིར། །འཆར་དང་ནུབ་པའི་གཞན་དབང་ལ་འཆེལ་བའི། །པདྨའི་རྩ་ལག་ཉིད་དུ་ཅི་ཕྱིར་རྟོག ༡༨ །སྦྱར་བའི་དཔེ། ཐོས་ན་རབ་དགའ་མྱོང་བས་སིམ་སྟེར་ཞིང་། །བསྟེན་པས་འཆི་མེད་གོ་འཕང་ལ་སྦྱོར་
བའི། །ཤེས་རབ་གསུམ་གྱི་མཛེས་པ་ཅུང་ངོམས་པས། །ལེགས་བྲིས་བདུད་རྩིའི་སྐལ་བཟང་འཕྲོག་པར་བྱེད། ༡༩ །མཉམ་ཉིད་དཔེ། ཁྱད་པར་ཐབས་ལ་མཁས་པའི་འཇུག་པ་ནི། །ལང་ཚོ་མ་བཞིན་ཀུན་གྱི་ཡིད་འོང་ཡང་། །འགྲོ་འདིའི་སྲེད་པ་འཕེལ་བར་བྱེད་མ་ལགས། །དེ་སླད་རྣམ་གྲོལ་ལམ་གྱི་གཤེད་མ་ཡིན། ༢༠ །སྨད་དཔེ། ཁྱབ་འཇུག་གཡོ་སྒྱུའི་སྒྱུ་ཐབས་དང་འགྲོགས་ཤིང་། །བདེ་འབྱུང་ཆགས་པའི་སྐྱོན་གྱིས་བཏང་མིན་ཕྱིར། །དེ་དག་དང་ནི་མགོན་པོ་ཁྱོད་ཀྱི་སྟོབས། །མཚུངས་པ་ལས་ཀྱང་ཁྱད་པར་དུ་མས་འཕགས། ༢༡ །བསྔགས་དཔེ། དཔག་བསམ་རྐང་འཐུང་དབུལ་བའི་གདུང་འཕྲོག་ཅིང་། །ཙིནྟ་མ་ཎིས་འདོད་དགུའི་ཆར་འབེབས་པའི། །ཕུན་ཚོགས་འཇིག་རྟེན་དགེ་བའི་ངོ་མཚར་དང་། །གང་གི་སྨོན་ལམ་ཡོངས་སུ་རྫོགས་པར་མཐུན། ༢༢ །བརྗོད་འདོད་དཔེ། ཡོན་ཏན་ལྡན་རུང་། །མཐའ་བྲལ་རིན་ཆེན་འབྱུང་བའི་རོལ་མཚོ་དང་། །ཟབ་ཅིང་རྒྱ་ཆེའི་རང་བཞིན་ཡེ་ཤེས་ཐུགས། །མཚུངས་ཞེས་བརྗོད་འདོད་སྙིང་ལ་རི་མོར་བྲིས། ༢༣ །འགལ་བའི་དཔེ། ཡིད་འཕྲོག་ཛམྦུ་ནཱ་དའི་ལྷུན་པོའི་དཔལ། །སྤྲིན་བྲལ་ཉི་གཞོན་འཆར་ཀའི་སྣང་བའི་གཟི། །བསོད་ནམས་བརྒྱ་ལས་གྲུབ་པའི་མཚན་དཔེ་རྣམས། །ཕན་ཚུན་རྣམ་པ་འགལ་བ་ཉིད་དུ་དྲན། ༢༤ །དགག་པའི་དཔེ། ཞི་བསིལ་ཐར་པ་དམ་པའི་སྙིང་
པོ་དང་། ཡན་ལག་དྲུག་ཅུའི་ཉམས་འགྱུར་རྫོགས་མིན་ཕྱིར། །དྲི་ཟའི་རྒྱུད་མང་སྟོང་གིས་ཁྱོད་གསུང་ལ། །ནམ་ཡང་འགྲན་པའི་གོ་སྐབས་བསྐྲུན་མི་ནུས། ༢ །མཛེས་པའི་དཔེ། འཕགས་མཆོག་སྤྱན་སྟོང་འཇོ་སྒེག་རབ་གཡོ་ཞིང་། །གང་ཁྱོད་འདྲེན་བྱེད་ཟུང་ཞིག་མངའ་བས་ཀྱང་། །མཁའ་ཁྱབ་ཡིད་ཅན་རྒྱ་མཚོར་དུས་རྟག་ཏུ། །བརྩེ་བས་གཟིགས་པའི་ཚུལ་ལ་མཉམ་པ་ཉིད། ༢༦ །དེ་ཉིད་བརྗོད་དཔེ། འདི་ནི་སྤྲུལ་པའི་ཞིང་མཆོག་པོ་ཏཱ་ལ། །མ་ཡིན་གངས་ཅན་ཡུལ་དབུས་དམར་པོ་རི། །ལུགས་གཉིས་ཕྲིན་ལས་སྐྱོང་མཁས་བློན་འབངས་ཚོགས། །ལྷ་དང་དྲང་སྲོང་གྲུབ་པའི་འདུ་བའང་མིན། ༢༧ །ཐུན་མིན་དཔེ། སྲིད་ན་ཚངས་སོགས་ཆེ་དགུའི་ཚོགས་རྣམས་ཀྱིས། །ལེགས་མཛད་བསོད་ནམས་དཔལ་ལ་བསྐྲུན་མིན་ཕྱིར། །གང་གི་དཔེ་ཟླར་འོས་པ་རང་ཉིད་ལས། །འཕགས་རྣམས་ཡེ་ཤེས་འཇུག་པས་བཙལ་ཡང་དབེན། ༢༨ །བྱུང་མིན་དཔེ། སྲིད་དང་ཞི་བའི་ངོ་མཚར་ཇི་སྙེད་ཀུན། །བྱེད་པོས་གཅིག་ཏུ་སྤུངས་པའི་རྗེས་འགྲོ་བ། །རྟེན་དང་བརྟེན་པར་བཅས་པའི་གཙུག་ལག་ཁང་། །རྣམ་མང་གངས་ཅན་འགྲོ་བའི་དཔྱིད་དུ་བསྐྲུན། ༢༩ །སྲིད་མིན་དཔེ། དེ་མཐུས་ཙནྡན་ཆུ་ཡིས་གདུང་བ་དང་། །ཟླ་ཤེལ་ཟེར་གྱིས་བསྐྱེད་པའི་མུན་པ་བཞིན། །ཁྱོད་ཞབས་བཀྲ་ཤིས་རྡུལ་གྱིས་བཏབ་པའི་གཞིར། །སྡེ་བཞིའི་རྒུད་པ་འབྱུང་
བ་ཅང་སྲིད་དམ། ༣༠ །མང་བའི་དཔེ། ལྷག་པར་ཁ་བ་དུང་དང་ཀུནྡ་ལྟར། །རབ་དཀར་སྣང་བ་རྫོགས་པའི་མཚར་སྡུག་ཅན། །རྒྱལ་བསྟན་རིན་ཆེན་ཐོག་མར་འདྲེན་མཛད་པའི། །བཀའ་དྲིན་བསམ་ཀྱིན་གཅིག་ཏུ་གུས་པས་འཕེལ། ༣༡ །རྣམ་འགྱུར་དཔེ། གང་ཕྱིར་མཐའ་གཉིས་དབུ་མར་བསྙིལ་བ་ཡི། །མཁྱེན་རབ་འཇམ་དཔལ་གཞོན་ནུའི་ཡེ་ཤེས་དང་། །བརྩེ་ཆེན་འཇིག་རྟེན་མགོན་པོའི་ཐུགས་རྗེ་ལས། ། ཉེ་བར་འཕོས་པ་བཞིན་དུ་རྨད་བྱུང་བས། ༣༢ །ཕྲེང་བའི་དཔེ། ཇི་ལྟར་རྒྱ་མཚོའི་རླབས་ཀྱིས་ནོར་བུ་དང་། །དེ་ཡི་དོན་མཐུན་ཚོགས་རྣམས་དེས་ཀྱང་ནི། །ཁོར་ཡུག་འབྱོར་པའི་ངལ་འཚོ་ལ་སྦྱར་བཞིན། །གང་ཁྱོད་སྣང་བས་ས་གསུམ་ཀུན་དགར་བྱས། ༣༣ །ངག་དོན་བཞིན་སྒྲ་གཅིག་པ། དཔལ་དང་ཡོན་ཏན་བྱེ་བས་བརྒྱན་པ་ཡི། །གྲགས་དཀར་གླིང་བཞིའི་ཕ་མཐར་བཀོད་པའི་ཚུལ། །བདུད་རྩིའི་ཟེར་བརྒྱས་རབ་གཏམས་རི་བོང་ཅན། །ཆ་ཤས་མཐའ་དག་གང་བས་མཚོན་བཞིན་མཛེས། ༣༤ །བཞིན་སྒྲ་དུ་མ་ཅན། སཱ་ལའི་ཤིང་ཆེན་ཇི་བཞིན་འཕགས་ཁྱོད་ཀྱི། །ཕྲིན་ལས་ཡལ་ག་ཇི་བཞིན་རྒྱས་པ་ན། །བུང་བ་གཞོན་ནུའི་ཚོགས་བཞིན་བོད་འབངས་རྣམས། །ཡང་ཡང་དབུགས་འབྱིན་ཐོབ་པའི་སྐལ་བཟང་བསྟེན། ༣༥ །ཟླ་བོ་དངོས་པོའི་དཔེ། ལྗོངས་འདིར་ས་གཞི་སྐྱོང་བ་མང་བྱུང་ཡང་། །ཕན་མཛད་ཁྱོད་དང་མཚུངས་
པ་ཡོད་མིན་ཏེ། །མཁའ་ལ་རྒྱུ་བའི་སྣང་བྱེད་གྲངས་མང་ཡང་། །གདུང་སེལ་ཟླ་བ་ཉིད་ལས་གཉིས་པ་མེད། ༣༦ །མཚུངས་སྦྱོར་དཔེ། ཁ་སྦྱོར་བདུན་ལྡན་འོག་མིན་ཞིང་མཆོག་དང་། །ཁྱོད་ཀྱིས་། །བསིལ་ལྡན་ཡུལ་དབུས་ཆོས་འཁོར་བསྐོར། །དེས་ནི་ས་བཅུ་རྒྱུན་མཐའི་ཚོགས་རྣམས་དང་། །ཁྱོད་ཀྱིས་དབང་རྣོན་གདུལ་བྱ་སྨིན་གྲོལ་མཛད། ༣༧ །རྒྱུ་ཡི་དཔེ། མདོར་ན་སྲིད་པའི་འབྱོར་པས་མངོན་མཐོ་། ཕྱིར། །འཁོར་ལོས་སྒྱུར་བའི་མཛེས་པ་འཕྲོག་བགྱིད་ཅིང་། །ཞི་བསིལ་ཕན་བདེའི་སྣང་བ་རབ་སྟེར་བས། །ཐམས་ཅད་མཁྱེན་པའི་རྗེས་སུ་རྐང་པ་འཇོག ༣༨ །གཟུགས་ཅན་གྱི་ཤིས་བརྗོད། དེ་སླད་འཕགས་དང་མཁས་པའི་ཚོགས་ཀྱིས་བསྔགས་བརྗོད་ཚིག་གི་ཆུ་ཀླུང་འབུམ། །འཐུང་བཟོད་རྣམ་ཐར་བདུད་རྩིའི་ཆུ་གཏེར་ཅུང་ཟད་མཆོད་པའི་ལེགས་བྱས་ཀྱི། །དགེ་མཚན་དམ་པས་ཀུན་ཏུ་མཛེས་ལས་བདག་གཞན་ཡིད་ཅན་རྒྱ་མཚོའི་ཚོགས། །དོན་གཉིས་པདྨོ་མཆོག་ཏུ་རྒྱས་པའི་བཀྲ་ཤིས་སྣང་བ་འབར་གྱུར་ཅིག ༣༩ །ཅེས་ཕྱག་ན་པདྨོ་སྲོང་བཙན་ཞབས་ཀྱི་རྣམ་ཐར་ལ་ཅུང་ཟད་བསྔགས་པའི་ཚིགས་སུ་བཅད་པ་འདིའང་། རྒྱལ་ཁམས་ཉུལ་བའི་ད་རི་དྭ་གཙུག་ལག་སྨྲ་བའི་ཉི་མས་རང་ལོ་ཉེར་གཅིག་པ་ཀུན་ལྡན་ལོའི་ས་ཟླ་༤པ་ཕྱི་མའི་དཀར་ཕྱོགས་ཀྱི་རྒྱལ་བ་གཉིས་པར་ལྷ་གདན་སྤྲུལ་པའི་གཙུག་ལག་ཁང་ཆེན་པོའི་ཉེ་འདབས་སུ་བྲིས་ཏེ་རང་བྱོན་ལྔ་ལྡན་གྱི་ཐུགས་རྗེ་ཆེན་པོའི་འདུན་སར་མངོན་པར་ཤེས་བཞིན་དུ་གསོལ་བ་བཏབ་པ་སརྦ་དཱ་ཀ་ལཾ་བྷ་བ་ཏུ། །
ཇོ་བོ་རྗེ་དཔལ་ལྡན་ཨ་ཏི་ཤ་ལ་ཅུང་ཟད་བསྔགས་པའི་ཚིག་གི་རྒྱུད་མང་དད་བརྒྱའི་མེ་ཏོག
ཇོ་བོ་རྗེ་དཔལ་ལྡན་ཨ་ཏི་ཤ་ལ་ཅུང་ཟད་བསྔགས་པའི་ཚིག་གི་རྒྱུད་མང་དད་བརྒྱའི་མེ་ཏོག་ཅེས་བྱ་བ་བཞུགས་སོ། །ན་མཿཤྲཱི་མཱི་དཱི་པཾ་ཀ་རཱ་ཡ། དགེ་ལེགས་ཐུགས་རྗེའི་བདུད་རྩིའི་སྤྲིན་གྱིས་སྲིད་པའི་གདུང་བ་མཐའ་དག་འཕྲོག །དཔལ་ལྡན་ཡོན་ཏན་དམ་པའི་ལྗོན་ཤིང་ཞི་བསིལ་འདོད་པ་འཇོ་བའི་གཏེར། །རིག་དང་བརྩེ་བའི་མར་མེའི་སྣང་བས་མཐའ་གཉིས་མུན་པ་བསྙིལ་མཛད་པའི། །མཁས་གྲུབ་རྒྱ་མཚོའི་གཙུག་གི་ནོར་བུས་ཤིས་པའི་མེ་ཏོག་ཆར་དུ་བསྙིལ། ༡ །ཕུལ་བྱུང་སྲིད་ན་མངོན་མཐོའི་ཟུར་ཕུད་ཀྱིས། །ཡང་ཡང་བསྙེན་པའི་ཞབས་སྐྱེས་བཀྲ་ཤིས་རྡུལ། །གང་དུ་བཀོད་པ་ཙམ་གྱིས་རྒྱལ་བའི་བསྟན། །སླར་ཡང་དར་ལ་བབས་པའི་ངང་ཚུལ་བཟུང་། ༢ །ཨེ་མ་དེ་ཡི་རྟོགས་པ་བརྗོད་པའི་གཏམ། །རིན་ཆེན་རིན་ཐང་བྲལ་བའི་ལེགས་བཤད་དབྱངས། །དཔྱོད་ལྡན་འཕགས་དང་མཁས་པའི་མགྲིན་པ་ནས། །ཁོར་ཡུག་རི་བོའི་ཁོངས་སུ་རླུང་ལྟར་སྒྲོགས། ༣ །ཐོག་མར་ཆེན་པོའི་རིགས་ཀྱི་སཱ་ལའི་ཚལ། །མཛེས་སྟེར་པདྨོ་གཞོན་ནུའི་སྙེམས་འཆང་བ། །ཤར་བའི་མོད་ནས་མཁྱེན་དང་བརྩེ་བ་ཡིས། །བདུད་རྩིའི་དོ་། ཤལ་མི་ཐུང་ཅི་ཡང་རིང་། ༤ །རྒྱུའོ་དྲི་བཟང་རྒྱས་པའི་ཀུ་མུ་དཱའི། །རྫིང་བུར་བུང་བ་མྱོས་པའི་ཚོགས་རྣམས་ཏེ། །ཞི་བསིལ་ཉམས་བརྒྱས་རབ་སྒེག་ཐར་པའི་གྲོང་། །འཇུག་ལ་ཁྱོད་ཐུགས་རྟག་ཏུ་ཉམས་
པ་མེད། ༥ །དེ་སླད་ཟླ་ཤེལ་གསར་པའི་འཛུམ་རླབས་དང་། །འཁྲུལ་པའི་རྣམ་ཐར་དཀར་པོས་མཛེས་པ་ཡང་། །ཕྱི་ནས་གྲུབ་པའི་དཔལ་གྱིས་མངོན་མཐོ་བའི། །ཚུལ་འདིས་སོམ་ཉིའི་དྲྭ་བ་འཇལ་ལ་དབང་། ༦ །སླར་ཡང་ཐམས་ཅད་གཟིགས་པས་རང་ཉིད་ཀྱི། །ཡོངས་རྫོགས་བསྟན་ལ་བྱ་བ་མཛད་པའི་སླད། །བག་མེད་འགོག་པའི་བདུད་རྩི་ཟུངས་ཤིག་ཅེས། །བསྐུལ་བའི་ངོ་མཚར་སྲིད་ན་ཉིན་བཞིན་གསལ། ༧ །དེ་ཚེ་རྣམ་པར་གྲོལ་བའི་ཚུལ་ཁྲིམས་ནི། །བརྟན་མཁས་ཡོན་ཏན་བྱེ་བའི་ཕུང་པོ་ཅན། །འཆད་དང་སྤྱོད་ལ་འཕགས་མཆོག་ཨུ་པ་ལི། །ཁོ་ན་ཉིད་ཅེས་འཇིག་རྟེན་གསུམ་ན་སྙན། ༨ ། ཡུན་རིང་དུས་ནས་གོམས་པའི་ཁྱད་པར་དང་། །བརྩོན་པས་ཟབ་མོའི་དོན་ལ་མཉམ་བཞག་པས། །གཟུངས་དང་མངོན་པར་ཤེས་དང་ཏིང་འཛིན་སྒོ། །ཕ་མཐའ་ཡས་པར་འཇུག་ཅིང་ལྡང་བར་མཛད། ༩ ། མ་ཕྱིས་དྲི་མེད་མཁྱེན་པའི་མེ་ལོང་དུ། །བྲིས་མིན་ཤེས་བྱའི་རི་མོ་འབུམ་འཆར་བས། །བསྐུལ་བ་མེད་པར་དཔྱོད་ལྡན་རྒྱ་མཚོ་ཡིས། །ཐོར་ཚུགས་ས་ལ་དུད་པའི་བསྟི་སྟང་སྟོབ། ༡༠ །ཕྱི་ནང་རིག་གཞུང་ཀུན་གྱི་ཚིག་དང་དོན། །གང་བློའི་གྲ་ཟུར་གཅིག་ན་བདེར་བཟུང་བས། །ཚུལ་བཞིན་འཆད་རྩོད་རྩོམ་ལ་མཚུངས་མེད་པའི། །གྲགས་དཀར་ཡི་གེ་ཕྱོགས་ཀྱི་འགྲམ་པར་བྱིན། ༡༡ །ཀུན་མཁྱེན་ཉིད་ཀྱང་
འདོད་པའི་ཆགས་བྲལ་ཞིང་། །འགྲོ་བའི་མིག་སྟེ་འཆར་ནུབ་གཞན་དབང་མིན། །སྣ་ཚོགས་གཟུགས་ཀྱིས་འཇིག་རྟེན་ཁྱབ་འཇུག་ཀྱང་། །གཞན་དག་བསླུ་བའི་བསམ་སྦྱོར་གཞར་ཡང་དབེན། ༡༢ ། ཁྱད་པར་བསིལ་ལྡན་ལྗོངས་སུ་ཐུབ་པའི་བསྟན། །སྙིགས་སྤྱོད་གདུང་བའི་མལ་དུ་ཉམ་ཐག་ཚེ། །རྗེ་བཙུན་འཕགས་མས་བསྐུལ་བའི་དེ་མ་ཐག །གང་ཁྱོད་ཁ་བའི་ཁྲོད་འདིར་དལ་གྱིས་གཤེགས། ༡༣ ། ཨཱི དེ་ཚེ་སྙིང་རྗེས་རབ་བརླན་བྱང་ཆུབ་སེམས། །སྲ་ཞིང་ལྕི་དང་གཡོ་བའི་མཆིལ་པ་རུ། །གྲུབ་པ་མིན་ཡང་ཚུར་མཐོང་རྣམས་ཀྱི་ཡིད། །མཐའ་དག་གཞུ་བཞིན་བཀུག་པའི་ངོ་མཚར་བཟུང་། ༡༤ །མཐའ་ཀླས་སྲས་བཅས་རྒྱལ་བའི་ཐུགས་ཀྱི་བཅུད། །སྐྱེས་བུ་གསུམ་གྱི་ལམ་རིམ་ཁོ་ནས་ཀྱང་། །ཟབ་རྒྱས་རྒྱལ་བའི་བཀའ་དང་དགོངས་འགྲེལ་ཀུན། །གདམས་ངག་གཅིག་ཏུ་འཆར་བའི་མཚན་སྙན་ལེན། ༡༥ ། སྡེ་སྣོད་རྒྱ་མཚོའི་བཤད་སྒྲ་སྒྲོག་པ་དང་། །ལྷན་ཅིག་མཁས་པའི་འདུ་བ་ཆེར་རྒྱས་ཤིང་། །རྩེ་གཅིག་སྒྲུབ་ལ་བརྩོན་པའི་དགེ་མཚན་གྱིས། །རྨད་བྱུང་གྲུབ་པའི་ལམ་སྲོལ་གསར་དུ་ཚུགས། ༡༦ །དེ་ཕྱིར་དགའ་ལྡན་གནས་སུ་མ་ཕམ་ཞབས། །འཕགས་པའི་ཡུལ་དུ་སློབ་དཔོན་ཀླུ་ཡི་དབང་། །གངས་རིའི་ལྗོངས་འདིར་མར་མེ་མཛད་དཔལ་རྣམས། །ཀུན་མཁྱེན་གཉིས་པར་གྲགས་པའི་སྒྲ་དེ་འཛིན། ༡༧ །
གང་གི་བསྐལ་པར་གོམས་པའི་ཐུགས་བསྐྱེད་ཀྱིས། །བསྟན་འགྲོར་ཕན་བདེ་བསྒྲུབས་ལ་ངོ་མཚར་ཅི། །བསོད་ནམས་བྱེ་བའི་རང་གཟུགས་མཚན་དཔེའི་བྱིན། །འདེགས་བཟོད་བྷོ་ཊའི་ལྗོངས་འདི་ཨེ་མ་བརླིང་། ༡༨ །དེ་སླད་མཐོང་ན་མི་མཐུན་མེད་པའི་ཞལ། །མངོན་སུམ་བསྙེན་པའི་སྐལ་བཟང་བཏང་གྱུར་ཀྱང་། །ཡིད་བཞིན་འདོད་པ་འཇོ་བའི་ཞལ་སྐྱིན་མཆོག །མཇལ་བས་མོས་པའི་ཆུ་གཏེར་སྙིང་ལ་ཁོལ། ༡༩ །གང་ཕྱིར་དད་བརྒྱའི་དཔྱིད་ཀས་བཟུང་བ་ཡི། །ཚིག་སྦྱོར་མེ་ཏོག་ཕྲ་མོའི་མཆོད་སྤྲིན་གྱིས། །ཅུང་ཟད་བསྙེན་བཀུར་བགྱིས་པའི་བསོད་ནམས་ཀྱིས། །ཡེ་ཤེས་གཟིགས་པའི་འབབ་སྟེགས་མཛེས་པར་བྱས། ༢༠ །དེ་ལས་བྱུང་བའི་ལེགས་བྱས་སྣང་བ་ཡིས། །ངེས་འབྱུང་ལོ་འདབ་མངོན་མཐོའི་ཐོར་ཚུགས་ཀྱིས། །དུད་བྱས་བྱང་ཆུབ་སེམས་གཉིས་པདྨོ་དང་། །ཡང་དག་ལྟ་བའི་འབྲས་བུས་འཁྱུད་གྱུར་ཅིག ༢༡ །ཁྱད་པར་དྲི་མེད་ཐུབ་བསྟན་རིན་པོ་ཆེའི། །བཤད་སྒྲུབ་གདུགས་དཀར་སྲིད་རྩེར་བསྒྲེངས་པ་ལས། །འགྲོ་ཀུན་གནས་སྐབས་མཐར་ཐུག་དོན་གཉིས་ཀྱི། །ངལ་འཚོའི་དགའ་སྟོན་མཆོག་ཏུ་རྒྱས་པར་ཤོག ༢༢ །མདོར་ན་རིག་དང་བརྩེ་བའི་ཡོན་ཏན་མཁའ་བཞིན་ཕ་མཐའ་ཡས་པའི་དཔྱིད། །རྣམ་འདྲེན་སྲས་བཅས་དགྱེས་པའི་ཟླ་བ་གྲགས་སྙན་བདུད་རྩིའི་དོ་ཤལ་གྱིས། །འཁྱུད་པའི་
ངོ་མཚར་སྲིད་ན་མཚུངས་མེད་ཕུལ་བྱུང་ཞབས་ཀྱི་རྣམ་ཐར་དག །བདག་གཞན་ཡིད་ཅན་རྒྱ་མཚོའི་ཚོགས་རྣམས་སྤྱོད་ཡུལ་མཉམ་པ་ཉིད་གྱུར་ཅིག ༢༣ །དེ་ལྟར་ལྔ་བརྒྱ་པ་རྣམས་ཀྱི་གཙུག་གི་ནོར་བུ་དཔལ་ལྡན་ཨ་ཏི་ཤའི་རྣམ་ཐར་ལ་ཅུང་ཟད་བསྔགས་པའི་ཚིགས་སུ་བཅད་པ་འདིའང་། རྗེ་དེ་ཉིད་ཀྱིས་བྱིན་གྱིས་བརླབས་པའི་གནས་དཔལ་གྱི་སྙེ་ཐང་དུ་སྐུ་འདྲ་རིན་པོ་ཆེ་ཡིད་བཞིན་ནོར་བུའི་སྤྱན་སྔར་ས་ཟླའི་དམར་ཕྱོགས་ཀྱི་རྒྱལ་བ་གཉིས་པར་རྒྱལ་ཁམས་ཉུལ་བའི་ད་རི་དྭ་གཙུག་ལག་སྨྲ་བའི་ཉི་མས་སྣང་གསལ་ཞིག་གི་ངོགས་སུ་འབད་པས་བྲིས་ཏེ་གསོལ་བ་བཏབ་པ་སིདྡྷི་རསྟུ།། །།
མ་ཧཱ་པཎྜི་ཏ་ཤཱཀྱ་ཤྲཱི་ལ་བསྔགས་པ་དད་པའི་ཨུཏྤལ།
༈ མ་ཧཱ་པཎྜི་ཏ་ཤཱཀྱ་ཤྲཱི་ལ་བསྔགས་པ་དད་པའི་ཨུཏྤལ་ཞེས་བྱ་བ་བཞུགས་སོ། །ན་མཤཱཀྱ་ཤྲཱི་བྷ་དྲ་བཱ་དཱ་ཡ། རྒྱལ་ཀུན་སྙིང་རྗེ་ཆེན་པོའི་དཔྱིད་ཀ་ཡིས། །རབ་དྲངས་མཚན་དཔེའི་མེ་ཏོག་དགོད་པའི་མོད། །བསྔགས་འོས་ཡོན་ཏན་བདུད་རྩིའི་དོག་པ་ཡིས། །ལྷར་བཅས་འཇིག་རྟེན་གསུམ་གྱི་ཉེར་འཚོར་གྱུར། ༡ །དེ་ཚེ་ཤེས་བྱ་རྒྱ་མཚོར་གཟིགས་པའི་སྤྱན། །འཇམ་དཔལ་གཞོན་ནུའི་བློ་ཡི་རྗེས་འགྲོ་བས། །ཐམས་ཅད་མཁྱེན་པའི་རྒྱལ་སར་འཛེགས་མཁས་པས། །ཕྱོགས་ལས་རྣམ་རྒྱལ་མ་ཧཱ་པཎྜི་ཏ། ༢ །གང་གི་བསླབ་གཞིའི་ས་ཧཱ་ཀ་རའི་ཚལ། །བག་མེད་འགོག་པའི་མཚར་སྡུག་རབ་འབར་བས། །གནས་བརྟན་ཤཱཀྱ་ཤྲཱི་བྷ་དྲ་ཞེས། །གྲགས་པའི་ཡི་གེ་སྲིད་ཞིའི་བླ་ན་མཛེས། ༣ །ཐུབ་པའི་རིང་ལུགས་མཐའ་དག་འཛིན་བཟོད་པའི། །ཕྱོགས་བྲལ་མཁས་མང་
གཙུག་ན་ངལ་འཚོ་བའི། །བཀྲ་ཤིས་དཔལ་གྱི་འབྱོར་པ་བཟང་པོ་ཡིས། །ས་འདིར་ཆོས་ཀྱི་རྫོགས་ལྡན་གསར་དུ་ཤར། ༤ །ལག་ན་པདྨོའི་ཞལ་གྱི་ཆུ་སྐྱེས་ལས། །འཁྲུངས་པའི་མྱུར་མ་དཔའ་མོས་ཉིན་རེ་བཞིན། །ཟབ་རྒྱས་གསུང་གིས་དབུགས་དབྱུང་མཛད་པས་མཚོན། །ངོ་མཚར་རྟོགས་བརྗོད་ཚངས་པའི་བློ་ལས་འདས། ༥ །ཁྱད་པར་བསིལ་ལྗོངས་འགྲོ་བའི་བསོད་ནམས་མཁར། །ཞབས་སེན་ཉིན་མོར་བྱེད་པ་འཆར་བའི་མོད། །ཆོས་འདུལ་རྒྱ་མཚོ་འཆད་དང་སྒྲུབ་པ་ཡི། །པུཎྜ་རཱི་ཀའི་དགའ་ཚལ་མཆོག་ཏུ་དར། ༦ །རྣམ་དག་ལྟ་དང་སྤྱོད་ལ་འཁྲུལ་མེད་ཅིང་། །རིག་པའི་དོ་ཤལ་བྱེ་བས་རབ་བརྒྱན་པའི། །ཐེག་མཆོག་བཤེས་གཉེན་འབུམ་ཕྲག་འདུ་བ་ཡིས། །རྩོད་པའི་དུས་ཀྱི་འགྱུར་བ་མིང་མཐར་བྱས། ༧ །དེ་སླད་བསམ་གྱིས་མི་ཁྱབ་ཡོན་ཏན་དཔྱིད། །ཅུང་ཟད་ཡིད་ལ་དྲན་པའི་དེ་མ་ཐག་།བསྔགས་བརྗོད་དད་པའི་ཨུཏྤལ་ཁ་ཕྱེ་བས། །འགྲོ་ཀུན་ཐམས་ཅད་གཟིགས་པ་ཉིད་གྱུར་ཅིག ༨ །ཅེས་པའང་སྣེའུ་གདོང་ཀུན་བཟང་ཚོགས་པའི་ནང་རྟེན་པཎ་ཆེན་དེ་ཉིད་ཀྱི་རྫ་སྐུ་བྱིན་རླབས་ཀྱི་གཟི་འོད་འབར་བ་དང་། ཐུགས་དམ་རྟེན་སྒྲོལ་མའི་བྲིས་སྐུ་སོགས་མཇལ་བའི་ཚེ་བཅོས་མིན་གྱི་དད་པ་བརྟན་པོས་མཚམས་སྦྱར་ཏེ། རྗེས་དེ་མ་ཐག་པར་གང་ཤར་གསོལ་བ་འདེབས་པ་པོ་ནི་རྒྱལ་ཁམས་ཉུལ་བའི་ད་རི་དྭ་གཙུག་ལག་སྨྲ་བའི་ཉི་མ་གསར་པའོ། །ཤུ་བྷཾ།
རིག་པར་སྨྲ་བ་རྣམས་ཀྱི་གཙུག་གི་ནོར་བུ་རྔོག་ལོ་ཙཱ་བ་ཆེན་པོ་བློ་ལྡན་ཤེས་རབ་ལ་བསྔགས་པ་མོས་གུས་ཀྱི་རོལ་མོ།
རིག་པར་སྨྲ་བ་རྣམས་ཀྱི་གཙུག་གི་ནོར་བུ་རྔོག་ལོ་ཙཱ་བ་ཆེན་པོ་བློ་ལྡན་ཤེས་རབ་ལ་བསྔགས་པ་མོས་གུས་ཀྱི་རོལ་མོ་ཞེས་བྱ་བ་བཞུགས་སོ། །ན་མསརྦ་ཛྷ་དྷི་མཱི་པྲ་ཛྙཱ་པཱ་དཱ་ཡ། གཟོད་ནས་རྣམ་པ་ཐམས་ཅད་མཁྱེན་པའི་གོ་འཕང་ལ། །མངོན་སུམ་གཤེགས་ཀྱང་བློ་ལྡན་བྱེ་བའི་ངལ་འཚོའི་སླད། །ཤེས་རབ་གསུམ་གྱི་མཚར་སྡུག་རྫོགས་པའི་ལང་ཚོ་ཅན། །གྲུབ་པའི་རིགས་ཀྱི་ཐིག་ལེར་མཛེས་གང་རྒྱལ་གྱུར་ཅིག ༡ །ཨེ་མ་སྐྱེས་ཐོབ་མཁྱེན་པའི་ས་བོན་ནི། །བཤེས་གཉེན་དམ་པའི་གསུང་གིས་བསྐྱེད་བསྲིངས་པས། །སྡེ་སྣོད་རྒྱ་མཚོར་མཁྱེན་རབ་རྒྱས་པ་དང་། །ལྷན་ཅིག་གྲགས་སྙན་ཨུཏྤལ་འཛུམ་རླབས་དགོད། ༢ །དངོས་ཀུན་རྡུལ་ལ་ཟ་བའི་འཇུག་པ་ནི། །ཚད་མའི་ཆུ་གཙང་ཁོ་ནའི་ཁྱད་ཆོས་ཏེ། །དེ་ཡང་རྟོག་གེའི་ཚིག་དོན་འཁྲུལ་མེད་པ། །བརྒྱད་གཉིས་ཁ་བས་རེག་པའི་འཇུག་ངོགས་བསྟེན། ༣ །ངེས་འབྱུང་ཚུལ་ཁྲིམས་ཁོ་ནའི་དབང་བྱས་ཏེ། །ཡང་དག་བླངས་དང་མི་ཉམས་བསྲུང་བ་དང་། །ཕྱིར་ཤིང་འཆོས་པའི་བཅུ་བདུན་གཞི་ཡི་དོན། །འཆད་དང་བསླབ་ལ་སྲིད་ན་མཚུངས་པ་མེད། ༤ །ཇི་སྙེད་ཤེས་བྱའི་ཉམས་འགྱུར་མཐའ་ཀླས་པ། །ཟག་བཅས་ཟག་མེད་གཉིས་སུ་གཏན་ཕབ་ནས། །བླང་དོར་ལམ་གྱིས་འགོག་པའི་འབྲས་སྟེར་བ། །ཆོས་མངོན་རྒྱ་མཚོ་སྨྲ་ལ་དབྱིག་གཉེན་དངོས། ༥ །ཐེག་མཆོག་སྡེ་སྣོད་བྱེ་བའི་ངོ་མཚར་གཏམ། །རྒྱ་ཆེན་སྤྱོད་པའི་རིང་ལུགས་ཟླ་མེད་པ། །ཚུལ་བཞིན་འཆད་
ལ་རྒྱལ་སྲས་མ་ཕམ་མགོན། །གངས་ཅན་རི་བོའི་སུལ་དུ་རྒྱུ་བ་བཞིན། ༦ །ཟབ་དོན་ནོར་བུའི་ཆུ་གཏེར་བསྲུབས་པའི་ཕུལ། །ཆོས་ཀུན་དབུ་མར་ལྟ་བའི་བདུད་རྩི་ཡིས། །སྐལ་བཟང་ཡིད་ཀྱི་པདྨོ་རྒྱས་མཛད་ཕྱིར། །ཀླུ་སྒྲུབ་ཞབས་དང་གཉིས་སུ་དབྱེ་བ་བྲལ། ༧ །མདོར་ན་ཕྱི་ནང་རིག་པའི་གཞུང་ལུགས་ཀུན། །ཇི་བཞིན་གཟིགས་ལ་འཇམ་དཔལ་གཞོན་ནུ་དང་། །བརྩེ་བས་སྲིད་ན་སྨན་མཛད་སྙིང་རྗེའི་གཏེར། །ངུར་སྨྲིག་གར་གྱིས་རོལ་པའི་སྒྱུ་འཕྲུལ་འཆང་། ༨ །དེ་སླད་གངས་ཀྱི་རི་བོའི་སྨན་ལྗོངས་འདིར། །ཡོངས་རྫོགས་བསྟན་པའི་མངའ་བདག་ཐམས་ཅད་ཀྱི། །གཙུག་ཏོར་རྩེ་མོར་ཞབས་སེན་ཨུཏྤ་ལ། །བཏབ་པའི་ངོ་མཚར་དཔལ་གྱི་སྤྲིང་ཡིག་འགོད། ༩ །ཁྱད་པར་གྲུབ་དབང་ཌོམྦྷི་ཧེ་རུ་ཀས། །རྡོ་རྗེའི་ཞིང་དུ་མངོན་སུམ་འཁྲིད་མཛད་ཀྱང་། །ཐུགས་རྗེས་བོད་ཡུལ་མུན་གླིང་བཏང་མིན་པའི། །གཏམ་ཙམ་གྱིས་ཀྱང་མི་ཕྱེད་གུས་པ་འཕེལ། ༡༠ །གང་ཡང་གཞུང་མང་འཆད་ཅིང་རྩོད་པ་དང་། །ཟབ་མོའི་དོན་ལ་རྣམ་དཔྱོད་འཁྲུལ་མེད་པ། །བྱོན་དང་འབྱོན་འགྱུར་ཇི་སྙེད་མཆིས་ཀུན་ཀྱང་། །མགོན་པོ་ཁྱོད་ཀྱི་བྱིན་རླབས་མཐུ་ཁོ་ན། ༡༡ །ཐུགས་ནི་ཞི་བའི་ནགས་སུ་ཉེར་གཟིམས་ཀྱང་། །རྣམ་པ་སྲིད་ན་སྲིད་པ་བཞིན་འཇུག་པས། །མཐའ་ཀླས་ཡིད་ཅན་རྒྱ་མཚོ་དབུགས་འབྱིན་པ། །ཨེ་མ་གང་ཚུལ་སུ་ཡིས་
མཚོན་བར་ནུས། ༡༢ །འོན་ཀྱང་དད་པའི་གཞན་དབང་ཁོ་ནས་གྲུབ་པའི་སྨན་ལྗོངས་འདིར་བགྲོད་ནས། །ཞབས་སེན་བཀྲ་ཤིས་རེ་ཁཱས་བཏབ་པའི་ཆོས་ཀྱི་མདུན་སར་ཕྱག་བྱས་ཏེ། །མོས་གུས་སོར་མོས་ཅུང་ཟད་བསྔགས་པའི་ཚིག་གི་རོལ་མོ་འཁྲོལ་འདི་ཡིས། །ཁྱོད་ཀྱི་རྣམ་ཐར་རྒྱ་མཚོའི་དགེ་མཚན་ཡིད་ཅན་ཀུན་ལ་རྫོགས་གྱུར་ཅིག ༡༣ །ཅེས་བསིལ་ལྡན་ལྗོངས་ཀྱི་རིགས་པར་སྨྲ་བ་ཐམས་ཅད་ཀྱི་གཙུག་གི་ནོར་བུ་རྔོག་ལོ་ཆེན་པོ་བློ་ལྡན་ཤེས་རབ་ལ་བསྔགས་པའི་ཚིགས་སུ་བཅད་པ་འདིའང་། གངས་རིའི་ཁྲོད་ཀྱི་རིག་པའི་འབྱུང་གནས་དཔལ་གསང་ཕུ་ནེའུ་ཐོག་གི་ཆོས་གྲྭ་ཆེན་པོའི་གཙུག་ལག་ཁང་གི་ཡང་སྟེང་དུ་ས་ག་ཟླ་བའི་ཤར་ཕྱོགས་ཀྱི་རྒྱལ་བ་གཉིས་པར་བྱ་བྲལ་བ་གཙུག་ལག་སྨྲ་བའི་ཉི་མས་སྐད་ཅིག་ལ་གསོལ་བ་བཏབ་པ་ཤུབྷཾ།། །།
གྲུབ་པའི་དབང་ཕྱུག་ཀུན་གྱི་གཙུག་གི་ནོར་བུ་རྗེ་བཙུན་མི་ལ་བཞད་པ་རྡོ་རྗེ་ལ་བསྔགས་པ་མཁའ་སྤྱོད་ཌཱ་ཀི་དགྱེས་པའི་རོལ་མོ།
༈ གྲུབ་པའི་དབང་ཕྱུག་ཀུན་གྱི་གཙུག་གི་ནོར་བུ་རྗེ་བཙུན་མི་ལ་བཞད་པ་རྡོ་རྗེ་ལ་བསྔགས་པ་མཁའ་སྤྱོད་ཌཱ་ཀི་དགྱེས་པའི་རོལ་མོ་ཞེས་བྱ་བ་བཞུགས་སོ། །ན་མཿཤྲཱི་ཧ་ས་བཛྲ་ཡ། གསང་བདག་མི་ཡི་གར་མཁན་ཁྱོད་ཅིག་ཅེས། །ལ་ལ་ཙམ་མིན་ཀུན་ཏུ་བསྔགས་པའི་ཕུལ། །མཁའ་སྤྱོད་མིག་ཡངས་བཞད་པའི་རོལ་མོ་ཅན། །རྡོ་རྗེའི་བརྟུལ་ཞུགས་གྲུབ་པས་དེས་སྲུངས་ཤིག ༡ །གང་གི་ངོ་མཚར་རྣམ་པར་ཐར་པ་ནི། །ཟླ་བ་ནོར་བུའི་སིམ་འོད་མངོན་སུམ་པས། །མཛེས་བྱས་བློ་གྲོས་དག་པའི་དཔྱིད་ཀ་ལས། །ཚིག་རྒྱན་ཀུ་མུད་དོ་ཤལ་ཅུང་ཟད་དགོད། ༢ །ཨེ་མ་བསོད་ནམས་བྱེ་བའི་ཆ་རྫོགས་པ། །རི་བོང་འཛིན་པ་གཞན་
ཞིག་གངས་ཅན་འདིར། །ལེགས་བྱས་ཆུ་གཏེར་འཇིངས་ལས་ཐོན་པ་ན། །གྲགས་དཀར་བདུད་རྩིའི་དཔལ་གྱིས་མངོན་པར་མཐོ། ༣ །རིག་སྔགས་གྲུབ་པའི་རྡོ་རྗེའི་མེ་ཆར་གྱིས། །ཕས་རྒོལ་མཐའ་དག་གཅིག་ཅར་སྲེག་མཛད་པ། །འདི་ན་ཆེར་རློམས་དྲེགས་ལྡན་བྱེ་སྙེད་ཀྱི། །འདར་བཅས་ཐོར་ཚུགས་དུད་པས་བསྙེན་འོས་ཀྱང་། ༤ །སྲིད་ལས་ཤིན་ཏུ་ངེས་འབྱུང་གངྒཱ་ནི། །རྣམ་གྲོལ་ཐར་པའི་ལམ་གསུམ་བདེར་འཇུག་པར། །སུས་ཀྱང་བཟློག་པ་མེད་པའི་སྙིང་སྟོབས་ཀྱིས། །ཐེག་མཆོག་བཤེས་གཉེན་འཚོལ་བའི་གཡར་དམ་བླངས། ༥ །དེ་ཚེ་ཁ་སྦྱོར་བདུན་ལྡན་ལྷོ་བྲག་པའི། །ཞབས་པད་གཙུག་ཏུ་ཐོབ་པའི་དེ་མ་ཐག །གང་ལ་འཁྲུངས་པའི་དགེ་མཚན་སླར་ཡང་དེའི། །བསོད་ནམས་ཕུང་པོར་བསྙེན་ལས་གཞན་གྱིས་མིན། ༦ །ཨེ་མ་ཕལ་གྱིས་བསམ་པར་མི་ནུས་པའི། །གྲངས་མེད་དཀའ་བའི་སྤྱོད་པས་ཡོངས་ཡེ འཛིན་མཆོག །ཚུལ་བཞིན་བསྙེན་པའི་གཏམ་གྱི་སྤྲིང་ཡིག་ནི། །ད་དུང་འཇིག་རྟེན་གསུམ་ན་རླུང་ལྟར་སྒྲོག ༧ །རྒྱས་པར་བྱས་སོ་འཆར་ཀའི་ཉི་གཞོན་གྱིས། །རབ་དྭངས་པདྨོའི་རྫིང་བུ་གསར་པ་སྟེ། །མར་སྟོན་ཆེན་པོའི་སྨིན་གྲོལ་ཟིལ་དངར་གྱིས། །ཁྱོད་ཐུགས་ངེས་དོན་ལང་ཚོ་མཆོག་ཏུ་དར། ༨ །སླར་ལ་གྲུབ་པས་མཛེས་པའི་སྨན་ལྗོངས་སུ། །སྲོག་ཀྱང་ཅི་དགར་འདོར་བའི་དཀའ་ཐུབ་བཅས། །མི་ཕྱེད་
ལམ་བཟང་བསླབ་པའི་རྣམ་ཐར་གྱིས། །སྒྲུབ་བརྒྱུད་སྙིང་པོའི་དུས་སྟོན་གསར་དུ་ཚུགས། ༩ །ཁྱོད་ཀྱིས་བརྩོན་འགྲུས་གཅིག་པུས་ལུས་རྟེན་འདིར། །བྱང་ཆུབ་དམ་པའི་ཕ་རོལ་སོན་ཞེས་བརྫུན། །འོན་ཀྱང་མྱུར་ལམ་རྡོ་རྗེ་ཐེག་པ་ཡི། །རྨད་བྱུང་ཐབས་ཀྱི་ཁྱད་པར་བསམ་མི་ཁྱབ། ༡༠ །དམན་པའི་གོ་འཕང་ཙམ་གྱིས་བསྒྲུབ་མིན་ཞིང་། །གྲངས་མེད་གསུམ་གྱི་ངལ་བས་མ་སྨད་པར། །མི་འགྱུར་མཆོག་ཏུ་བདེ་བའི་བརྟུལ་ཞུགས་ཀྱིས། །སྐུ་བཞིའི་རྒྱལ་སར་ཡུད་ཀྱིས་གཤེགས་འདི་ཅི། ༡༡ །དེ་སླད་འོག་མིན་ཞིང་ན་སྙེམས་མའི་བདག །འཕགས་པའི་ཡུལ་དུ་དཔལ་ལྡན་བི་རཱུ་པ། །གངས་རིའི་ལྗོངས་སུ་བཞད་པའི་མཚན་ཅན་རྣམས། །ཟུང་འཇུག་གོ་འཕང་བརྙེས་པའི་ངོ་མཚར་འཛིན། ༡༢ །ཁྱོད་དང་ཁྱོད་གསུང་སྙིང་ལ་བཀོད་པ་ཡིས། །རྒྱ་མཚོའི་གོས་ཅན་མཐའ་དག་ཁྱབ་བྱས་པས། །ཡིད་སྲུབས་རེ་བ་བཅད་པའི་གྲགས་དཀར་གྱིས། །སྲས་བཅས་རྒྱལ་ཀུན་དགྱེས་པའི་མེ་ཏོག་འཐོར། ༡༣ །མདོར་ན་ཕྱོགས་ཀྱི་བུ་མོའི་རྣ་ལུང་ནི། །ཅི་ཡང་མཛེས་པའི་བརྗོད་པ་རྨད་བྱུང་བས། །འཕགས་དང་མཁས་རྣམས་མགྲིན་པ་བཀང་བྱས་ནས། །བསྐལ་པར་བསྔགས་ཀྱང་རྫོགས་པའི་མཐའ་མི་མངོན། ༡༤ །ཚུལ་དེས་ཉེར་དྲངས་དད་པའི་སོར་མོ་ཡིས། །ཚིག་རྒྱན་རྒྱུད་མང་བསྒྲེངས་པའི་ལེགས་བྱས་ཀྱིས། །འགྲོ་ཀུན་ཟབ་མོའི་དེ་ཉིད་
ལ་བརྟེན་ནས། །སྲིད་དང་ཞི་བའི་ཕ་རོལ་ཕྱིན་གྱུར་ཅིག ༡༥ །ཅེས་གངས་རིའི་ཁྲོད་ཙམ་ན་གྲུབ་རིགས་རྒྱ་མཚོའི་གཙུག་གི་ནོར་བུས་ཞབས་བསྟེན་གྱི་པདྨོ་ལ་ཕྱག་བྱས་རྣལ་འབྱོར་གྱི་དབང་ཕྱུག་རྗེ་བཙུན་བཞད་པ་རྡོ་རྗེ་ལ་ཅུང་ཟད་བསྔགས་པའི་ཚིག་གི་སྦྱོར་བ་འདིའང་། ཤར་མདོ་ཁམས་ཀྱི་བཙུན་པ་གཙུག་ལག་སྨྲ་བའི་ཉི་མས་རང་ལོ་ཉེར་གཅིག་པ་ཀུན་ལྡན་ལོའི་དབྱུག་པ་ཟླ་བའི་དཀར་ཕྱོགས་ཀྱི་རྒྱལ་བ་གསུམ་པ་ལ་སྲསམཁར་དགྱེས་པ་རྡོ་རྗེའི་གཞལ་མེད་ཁང་ཆེན་པོའི་ཉེ་འདབས་སུ་བྲིས་ཏེ་གསོལ་བ་བཏབ་པ་སིདྡྷི་རསྟུ།། །།
འཇམ་དབྱངས་ས་སྐྱ་པཎྜི་ཏ་ཆེན་པོ་ལ་བསྟོད་པའི་སྙན་ངག་ཡིད་འཕྲོག་ནོར་བུའི་རྒྱུད་མང་།
༈ རྒྱ་གར་སྐད་དུ། མཉྫགྷོ་ཌ་བྷ་མི་ཤུཀླ་པཎྜི་ཏ་སཱུ་ཏི་ཀཱ་བྱ་མ་ནོ་ཧ་ར་མ་ཎི་ཏམྦུ་ར་ནཱ་མ། བོད་སྐད་དུ། འཇམ་དབྱངས་ས་སྐྱ་པཎྜི་ཏ་ཆེན་པོ་ལ་བསྟོད་པའི་སྙན་ངག་ཡིད་འཕྲོག་ནོར་བུའི་རྒྱུད་མང་ཞེས་བྱ་བ། བཅོམ་ལྡན་འདས་གསུང་གི་རྡོ་རྗེ་ལ་ཕྱག་འཚལ་ལོ། །ངོ་མཚར་མཚན་དཔེའི་དཔལ་གྱིས་རབ་མཛེས་ལྷར་བཅས་གཙུག་ན་མཐོ་བའི་སྐུ། །བཅུ་ཕྲག་དྲུག་གི་སྤྲིང་ཡིག་དང་འགྲོགས་མཐའ་ཀླས་ཆོས་ཕུང་རྒྱ་མཚོའི་གསུང་། །སྤྲོས་པའི་ཕ་མཐར་གཞར་ཡང་མི་གནས་རྣམ་ཀུན་མཆོག་ལྡན་འོད་གསལ་ཐུགས། །སྲས་བཅས་རྒྱལ་བའི་ཡེ་ཤེས་ལུས་ཅན་འཇམ་མགོན་བླ་མས་བདག་སྐྱོངས་ཤིག ༡ །ཨོ་ཡིག་གླུར་ལེན་རིལ་བས་ལག་བྲེལ་དྲང་སྲོང་མཆོག་སོགས་མི་རྣམས་དང་། །ཚངས་པ་ཁྱབ་འཇུག་མགྲིན་སྔོན་ཅན་སོགས་འཆི་མེད་གྲུབ་པའི་གཙོ་རྣམས་ཀྱིས། །ཐོར་ཚུགས་ནོར་བུའི་རེག་བྱས་བཏུད་གྱུར་ཞབས་སེན་
དམར་བའི་འོད་རིས་ཀྱིས། །ས་གསུམ་སྐྱེ་རྒུའི་རྨོངས་མུན་སེལ་མཛད་འཇམ་མགོན་བླ་མས་བདག་སྐྱོངས་ཤིག ༢ །ཨ་དོན་སྐྱེ་མེད་རབ་ཞིའི་ཆུ་གཏེར་རྟག་ཆད་རྡུལ་གྱིས་རིང་སྤངས་ཀྱང་། །ཡེ་ཤེས་སྒྱུ་འཕྲུལ་དྲྭ་བའི་ཟློས་གར་ཉིན་མོར་བྱེད་པའི་རྩེ་དགའ་ནི། །གྲུབ་པའི་རིགས་ཀྱི་འཁྲི་ཤིང་ལ་རྩེན་དེ་ཚེ་གྲགས་པའི་མེ་ཏོག་གིས། །བསིལ་ལྗོངས་ར་བ་གཅིག་ཏུ་དཀར་མཛད་འཇམ་མགོན་བླ་མས ༣ །ར་བི་ལྟ་བུར་གསལ་བའི་མཁྱེན་དཔྱོད་ནོར་བུའི་མེ་ལོང་དྭངས་པའི་ངོགས། །ཇི་ལྟ་ཇི་སྙེད་ཤེས་བྱའི་རི་མོ་མ་འདྲེས་གསལ་བར་འཆར་བའི་ཚེ། །རྩོད་དུས་ཐམས་ཅད་མཁྱེན་པ་ཉིད་ཅེས་གཏམ་གྱི་ཡི་གེའི་ཕྲེང་བ་ཡིས། །ཕྱོགས་ཀྱི་བུ་མོའི་རྣ་ལུང་མཛེས་བྱས་འཇམ་མགོན་བླ་མས༔ ༤ །པ་སངས་གསར་པའི་འོད་ཀྱིས་མཚོན་མིན་གཞན་ཕན་ཟླ་ཚེས་གཞོན་ནུའི འཛུམ། གང་དུ་བཞད་པ་དང་། །རང་དོན་ཡིད་བྱེད་པདྨའི་དོ་ཤལ་ཅིར་ཡང་ཟུམ་པའི་དཔལ་སྟེར་བ། །རྒྱལ་སྲས་སྤྱོད་པ་རྒྱ་མཚོའི་བདག་ཉིད་འཇམ་མགོན་བླ་མསཟ ༥ །ཙ་ཀོ་ར་ཚོགས་དྭངས་པའི་མིག་གིས་སིམ་འོད་ཟགས་པ་བཏུང་བ་བཞིན། །ཆོས་འདུལ་ཁྲིམས་ཀྱི་བདུད་རྩིས་བརླན་ཚེ་བག་མེད་ཚ་གདུང་འགོག་པ་དང་། །བརྟན་མཁས་ཡོན་ཏན་ཨུཏྤལ་སྙེ་མ་ཆེས་ཆེར་དུད་པའི་རྣམ་ཐར་ཅན། །བསིལ་ལྡན་ལྗོངས་ཀྱི་ཨུ་
པ་ལཱི་ཞེས་འཇམ་མགོན་བླ་མས ༦ །ན་མར་སྨིན་གྲོལ་གངྒཱའི་ཀླུང་རྒྱུན་ངལ་མེད་མཁྱེན་པའི་ལམ་གསུམ་དུ། །འབབས་པས་སྒྲིབ་གཉིས་དྲི་མ་ཀུན་སྦྱངས་སྐུ་གསུམ་མི་ཕྱེད་འཛུམ་དཀར་གྱིས། །རིག་འཛིན་བྱེ་བའི་ཟུར་ཕུད་རྩེ་མོར་ཞབས་ཀྱི་ནོར་བུ་འགོད་མཁས་པའི། །རྒྱུད་སྡེ་རྒྱ་མཚོའི་བདག་ཉིད་གཅིག་གྱུར་འཇམ་མགོན་བླ༴ ༧ །དྷིཡིག་དམར་སེར་ཞུན་མའི་མདོག་ཅན་གཞན་ཕྱིར་རྗེས་སུ་ཆགས་པའི་མཐུས། །འདི་ན་ཚུར་མཐོང་སྐྱེ་བོའི་སྣང་ངོར་མི་ལུས་ཟོལ་དུ་སྐུ་འཁྲུངས་ཏེ། །ཡོངས་རྫོགས་བསྟན་པའི་རྒྱུད་མང་བསྒྲེངས་ཚེ་ཀུན་མཁྱེན་གཉིས་པ་འདིའོ་ཞེས། །རྩོད་པའི་དུས་ཀྱང་ཀུན་དགར་བྱས་པའི་འཇམ་མགོན་བླ༔ ༨ །ཐོས་པའི་རྒྱ་མཚོ་གཏིང་མཐའ་མི་མངོན་བསམ་བྱུང་རྦ་རླབས་སྟོང་གཡོ་ཞིང་། །སྒོམ་སྤང་ནོར་བུའི་ཐག་པ་ཆད་པས་དོན་གཉིས་འདོད་པ་འཇོ་བའི་དཔལ། །ཁྱོད་གཅིག་ཁོ་ན་ཉིད་ཡེ ཅེས་བསྔགས་པས་ཆེན་པོ་གཞན་གྱི་རྣམ་ཐར་ལ། །མཛེས་པ་མིན་པའི་གོ་སྐབས་སྦྱིན་བྱེད་འཇམ་མགོན་བླ་མས༴ ༩ །འཆད་མཁས་སྒྲ་དོན་དཔྱད་པའི་ངག་གིས་ལུང་རྟོགས་ཆོས་ཕུང་གྲངས་མེད་འཇོ། །རྩོད་ངག་ཟླ་མེད་སྔགས་རིག་གྲུབ་པས་འཕྲོག་བྱེད་དྲེགས་པའི་སྤོབས་པ་བཅིལ། །རྩོམ་ཚེ་སྡེབ་ལེགས་སྙིང་པོས་ལྕི་བས་མཁས་ཀུན་ཡི་ག་དབང་མེད་འཕྲོག །དེ་སླད་ས་གསུམ་འགྲོ་བའི་མུན་སེལ་འཇམ་མགོན་
བླ་མས༴ ༡༠ །མཁྱེན་རབ་འཇམ་དཔལ་རྣོན་པོ་དངོས་ཏེ་གཞན་གྱིས་བསྐྲུན་པའི་ཡུལ་ལས་བརྒལ། །བརྩེ་ཆེན་པད་དཀར་འཆང་བ་ཉིད་ཅེས་གཟུར་གནས་ངག་གི་གླིང་བུ་འཁྲོལ། །ནུས་པས་མེ་ཏོག་མདེའུ་རྣོན་པོ་རྟུལ་པོའི་གོ་ས་ལ་བཀོད་པས། །གསང་བ་འཛིན་པའི་ཡེ་ཤེས་གཟུགས་ཅན་འཇམ་མགོན་བླ་མས ༡༡ །མདོར་ན་ཀེ་ལ་ཤ་རིའི་མགུལ་འདིར་རྒྱལ་བསྟན་རྙོགས་མར་གྱུར་པའི་མཚོ། །རྣམ་དཔྱོད་ཨཱི ཀེ་ཏ་ཀ་ཡིས་བགྲུངས་ནས་བཤད་སྒྲུབ་གཟུགས་བརྙན་གསལ་བྱས་པའི། །བཀའ་དྲིན་ཁོ་ནས་དེང་གི་དུས་ཀྱང་གྲགས་པ་གཟུགས་ཅན་བཞིན་རྒྱུ་བས། །སྟོན་པ་གཉིས་པའི་རྒྱལ་ཐབས་ལ་འཛེགས་འཇམ་མགོན་བླ་མས་བདག་སྐྱོངས་ཤིག ༡༢ །སྒོ་གསུམ་གུས་པའི་ཕྱག་གིས་ལེགས་བསྙེན་བླ་ན་ཡོད་མེད་མཆོད་སྤྲིན་འབུལ། །སྟོབས་བཞིས་སྒྲིབ་པའི་ཚོགས་ཀུན་མཛའ་མིན་འཕགས་དང་སོ་སྐྱེའི་དགེ་བ་ལ། ། མཛའ་གཅུགས་དམ་བཅའ་སྙིང་ནས་སྟེར་ཞིང་ཕྱོགས་བཅུར་བཞུགས་པའི་སྲས་བཅས་རྒྱལ། །ལེགས་གསུང་ཆོས་འཁོར་བསྐོར་བར་བསྐུལ་ནས་རྟག་པ་རྒྱུན་དུ་བཞུགས་གསོལ་འདེབས། ༡༣ །ཁྱད་པར་མགོན་པོ་ཁྱོད་ཀྱི་ལེགས་མཛད་རྣམ་ཐར་ཁོ་ནས་ཡིད་དྲངས་ཏེ། །ཉིན་མཚན་ཀུན་ཏུ་འབད་པར་གསོལ་འདེབས་གང་གི་བྱང་ཆུབ་སྤྱོད་པའི་རྗེས། །སློབ་པའི་བརྟུལ་ཞུགས་གཡར་དམ་ལེན་ན་སྙིང་རྗེའི་ཟུར་མིག་
སྒེག་ལྡན་པས། །ད་ཙམ་གཟིགས་པའི་གོ་སྐབས་ཕྱེ་ནས་ཡེ་ཤེས་སྤྱན་གྱིས་བཙའ་མཛོད་ཀྱེ། ༡༤ །དེ་མཐུས་སྲིད་དང་ཞི་བའི་ཉམས་འགྱུར་རྣམ་མང་ལི་ཁྲིའི་ཐིག་ལེ་ནི། །སྒོ་གསུམ་མཛེས་མའི་མཁུར་ཚོས་ལ་འཕོས་ཡིད་འོང་ཟློས་གར་བསྒྱུར་བ་ཡིས། །སྣ་ཚོགས་ལས་པ་ས་འདིར་སྣང་ཞེས་ཕལ་ཆེར་ག་ཞའི་ཚིག་འབྱིན་ཅིང་། །ལྷར་བཅས་ཀུན་དགའི་བདུད་རྩི་སྟེར་བགྱིད་བཟོ་རིག་ཕ་མཐར་སོན་པར་ཤོག ༡༥ །འདུ་བ་འཕེལ་ཟད་འཁྲུགས་པའི་ཉི་མས་ལུས་ཅན་ཨུཏྤལ་དཀར་པོའི་ཚལ། །བཅིངས་ཚེ་སྨན་བྱེད་སྤྲིན་སྔོན་ལས་འོངས་འཚོ་ཐབས་ཟིལ་དངར་རྟག་འབབས་པས། །རྣམ་འགྱུར་གདུང་བ་ཕ་མཐར་བཅིལ་ནས་རིང་དུ་གནས་པའི་མཚར་སྡུག་གིས། །འགྲོ་འདི་དབུགས་ཆེན་འབྱིན་པའི་དཔལ་གྱུར་གསོ་དཔྱད་རྒྱ་མཚོའི་མཐར་སོན་ཤོག ༡༦ །རང་བཞིན་ཛམྦུ་ནཱ་དའི་སྙེ་མ་སྣ་ཚོགས་རྐྱེན་གྱི་མ་དྲོས་པས། །བསྒྱུར་བས་མིང་ཚིག་གསེར་གྱི་དུམ་བུས་མགྲིན་པའི་ཆུ་གཏེར་མཛེས་པ་ལས། །སྨྲ་བ་ཟླ་མེད་སྐྱེ་རྒུའི་མིག་ཅེས་གཟུར་གནས་རྣ་བར་གྲགས་འབར་བའི། །བརྡ་སྤྲོད་རིན་ཆེན་འབྱུང་གནས་བརྒལ་ཏེ་ཚིག་གི་གཏེར་ལ་དབང་བསྒྱུར་ཤོག ༡༧ །མངོན་དང་ལྐོག་གྱུར་ཤིན་ཏུ་ལྐོག་གྱུར་ཡུལ་གྱི་གཟུགས་བརྒྱ་ཇི་སྙེད་པ། །མངོན་སུམ་རྗེས་དཔག་ལུང་གིས་ཚད་མའི་བེ་ཌཱུར་མེ་ལོང་ཕྱིས་པའི་ངོགས། །དོགས་པ་མེད་
པར་འཆར་བའི་དགེ་མཚན་སྒྲུབ་དང་སུན་འབྱིན་དོ་ཀེར་རྩེར། །བཀོད་ལས་ཕས་རྒོལ་ཡི་ག་འཆིང་ཞིང་དོན་མཁས་འདོད་པ་འཇོ་བར་ཤོག ༡༨ །བསྒྱུར་དགོད་འཕྲི་བསྣན་རི་མོའི་གར་དང་སྙན་ཚིག་གླུ་དབྱངས་ལེན་མཁས་པའི། །རྣ་ཐོད་སྡེབ་སྦྱོར་ཨུཏྤལ་གྱིས་དུད་མངོན་བརྗོད་རྒྱུད་མང་བརྡུངས་པའི་སྒྲས། །ངོ་མཚར་ཟློས་གར་ཅིར་ཡང་རྩེན་པའི་སྐལ་བཟང་རི་དྭགས་མིག་ཅན་ཅེས། །བློ་མིག་གྲོལ་བའི་བ་དན་གྱིས་མཛེས་རྨོངས་པའི་གདུང་བ་གཅོད་པར་ཤོག ༡༩ །ལེགས་གསུང་འདུལ་མདོ་མངོན་པའི་སྡེ་སྣོད་ནོར་བུའི་ས་འཛིན་མཐོན་པོའི་རྩེར། །བྱ་སྤྱོད་རྒྱུད་སྡེའི་མེ་ཏོག་གིས་དུད་ཐབས་དང་ཤེས་རབ་རྣལ་འབྱོར་གྱི། །དྲི་བསུང་མངར་འཐུལ་རྡོ་རྗེ་ཐེག་པའི་བདུད་རྩིའི་ཟིལ་དངར་བླ་མེད་འབར། །ཐམས་ཅད་མཁྱེན་པའི་དཔག་བསམ་གསར་པས་སྲིད་ཞིའི་རྒུད་པ་ཀུན་སྲུང་ཤོག ༢༠ །གཞན་ཡང་གནས་སྐབས་རིགས་གཟུགས་ཤེས་རབ་དད་གཏོང་འབྱོར་པས་མངོན་མཐོ་ཞིང་། །ཁྱད་པར་ཡོན་ཏན་རིན་ཆེན་འབྱུང་གཞི་ཚུལ་གནས་ཁྲིམས་ཀྱི་ནོར་འཛིན་མར། །སྨོན་འཇུག་སེམས་ཀྱི་སྙེ་མ་གཡུར་ཟ་ཨེ་ཝཾ་མཱ་ཡཱ་མཉམ་སྦྱོར་བའི། །གྲིབ་མ་སྣུམ་པོར་སྐུ་བཞི་དབྱེར་མེད་སྙིང་གི་གསོས་སུ་ངལ་འཚོ་ཤོག ༢༡ །མདོར་ན་སྲིད་པའི་ཁམས་རྣམས་ཀུན་ན་ཚངས་པའི་བློ་ཡིས་བཙལ་བྱས་ཀྱང་། །མཚུངས་པ་མེད་པའི་རྣམ་ཐར་རྨད་བྱུང་
ཕྱོགས་ལས་རྣམ་རྒྱལ་པཎྜི་ཏ། །མགོན་པོ་ཁྱོད་དང་མཉམ་པ་ཉིད་གྱུར་མཐའ་ཀླས་ཡིད་ཅན་རྒྱ་མཚོ་ཀུན། །བདག་ཉིད་གཅིག་པུས་ངེས་པར་འདྲོངས་པའི་སྨོན་ལམ་ཇི་བཞིན་འགྲུབ་པར་ཤོག ༢༢ ། དེ་ལྟར་སྲས་བཅས་རྒྱལ་བ་ཀུན་དངོས་འཇམ་མགོན་བླ་མའི་ཡོན་ཏན་ལ། །སྙན་ངག་ཡིད་འཕྲོག་ནོར་བུའི་རྒྱུད་མང་ཅུང་ཟད་བསྒྲེངས་པས་བསྟོད་པའི་དགེས། །མ་ལུས་མི་ལུས་ལུས་པ་མེད་པའི་ཡིད་ཅན་རྒྱ་མཚོའི་རྡུལ་སྙེད་ཀྱིས། །གང་གི་རྟོགས་པ་བརྗོད་པའི་རྗེས་ཞུགས་རྣམ་པ་ཐམས་ཅད་མཁྱེན་བརྙེས་ཤོག ༢༣ །ཚིག་འདི་གང་གིས་མཐོང་བ་དང་། །ཐོས་སམ་ཡིད་ལ་བྱེད་ཀུན་ཀྱང་། །རིང་མིན་འཇམ་མགོན་བླ་མའི་ཞལ། །དགྱེས་བཞིན་རྗེས་སུ་བཟུང་བར་ཤོག ༢༤ །ལ་ལ་འདི་ན་མཁས་དང་གྲུབ། །ཕྱོགས་རེས་ཁེངས་པ་ཙམ་མིན་པ། །ངེས་པ་དོན་གྱི་ཐམས་ཅད་མཁྱེན། །སླར་ཡང་དྲན་པས་ཕྱག་བགྱིད་དོ། ༢༥ །ཅེས་དཔལ་ལྡན་ས་སྐྱ་པཎྜི་ཏ་ཆེན་པོའི་རྣམ་ཐར་ལ་ཅུང་ཟད་བསྔགས་པའི་སྙན་ངག་ཡིད་འཕྲོག་ནོར་བུའི་རྒྱུད་མང་ཞེས་བྱ་བ་འདིའང་། རིས་མེད་པའི་བསྟན་པ་ཀུན་ལ་མཆོག་ཏུ་དད་ཅིང་། འཇམ་མགོན་བླ་མའི་ཡོན་ཏན་ལ་ཐུན་མོང་མ་ཡིན་པའི་མོས་གུས་རྙེད་པ་ཙམ་རྒྱུ་མཚན་དུ་བྱས་ནས། ཉང་སྨད་སའི་ཐིག་ལེ་རྒྱན་གང་བྱང་ཆུབ་ཆེན་པོའི་དབེན་གནས་དང་ཉེ་བར། མ་བྱོན་སངས་རྒྱས་གསུམ་པ་ཁ་ཆེའི་པཎྜི་ཏ་ཆེན་པོས་འཇམ་མགོན་ཆོས་ཀྱི་རྒྱལ་པོ་བསྙེན་པར་རྫོགས་པའི་ཁྲི་ལ་མངའ་གསོལ་བའི་ཚེ། བསོད་ནམས་བརྒྱ་
ཕྲག་ལས་གྲུབ་པའི་དབུ་སྐྲ་བུང་བའི་མདངས་ཅན་འཁྲུ་བར་གནང་བའི་རྡོ་གཞོང་རིན་པོ་ཆེ་མངའ་བའི་ཚེ་གསོལ་བ་ཕུར་ཚུགས་སུ་བཏབ་པའི་མཐུ་ལས་བྱིན་རླབས་ཀྱི་ཟིལ་ཅུང་ཟད་ཐོབ་ནས་ཡིད་ལ་ཇི་ལྟར་ཤར་བ་བཞིན། རྒྱལ་ཁམས་ཉུལ་བའི་ད་རི་དྭ་གཙུག་ལག་སྨྲ་བའི་ཉི་མས་རྩོད་དུས་ཀྱི་ཐམས་ཅད་མཁྱེན་པ་བུ་སྟོན་རིན་པོ་ཆེས་བྱིན་གྱིས་བརླབས་པའི་གནས་དཔལ་ཞྭ་ལུ་གསེར་ཁང་མཁས་པའི་ཆོས་གྲྭ་ཆེན་པོའི་འདབས་འབྱོར་དུ་སྣང་གསལ་ཞིག་གི་ངོགས་སུ་དགེ་བྱེད་ཀྱི་ལོའི་ཁྲུམས་ཟླརཔའི་དཀར་ཕྱོགས་ཀྱི་རྒྱལ་བ་དང་པོ་༣ལ་ཤར་མར་བྲིས་ཏེ་གསོལ་བ་བཏབ་པའི་དགེ་བས་བདག་ཉིད་མཐོང་ཐོས་དྲན་རེག་གི་འགྲོ་ཀུན་སོ་སོ་ཡང་དག་པའི་རིག་པ་བཞི་ལ་དབང་འབྱོར་བའི་རྒྱུར་གྱུར་ཅིག།
རྩོད་པའི་དུས་ཀྱི་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་ལ་བསྔགས་པ་མཆོག་ཏུ་དད་པའི་བདུད་རྩིའི་དབྱངས་སྙན།
རྩོད་པའི་དུས་ཀྱི་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་ལ་བསྔགས་པ་མཆོག་ཏུ་དད་པའི་བདུད་རྩིའི་དབྱངས་སྙན་ཞེས་བྱ་བ་བཞུགས་སོ། །ན་མསརྦ་ཛྷ་རཏྣ་སིདྡྷ་ཡ། ཐམས་ཅད་མཁྱེད་པའི་ཆོས་ཀྱི་རྒྱལ་ཐབས་ལ། དབང་མཛད་ཡོན་ཏན་རིན་ཆེན་རྣམ་བདུན་གྱིས། །རབ་མཛེས་གྲུབ་པའི་འཁོར་ལོས་སྒྱུར་བ་ཁྱོད། །བསྔགས་པའི་ཡི་གེ་སྟོབས་བཅུ་མངའ་བས་བྱིན། ༡ །སྣ་ཚོགས་ལས་པའི་ཁེངས་པ་སྙིལ་བྱེད་པ། །སྒོ་གསུམ་འདོད་རྒུར་བསྒྱུར་བ་བཟོ་རིག་གི །ཉམས་ལྡན་ནོར་བུའི་དོ་ཤལ་གཅིག་ཁོ་ནས། །ལྷར་བཅས་ཡི་ག་དབང་མེད་འཕྲོག་པར་བྱེད། ༢ །འཚོ་ཐབས་བདུད་རྩིས་གཏམས་པའི་རྣམ་དཔྱོད་ཟླ། །གང་དུ་སྣང་བས་སྡེ་བཞིའི་ཆུ་གཏེར་དང་། །གྲགས་པའི་རྦ་རླབས་ལྷན་ཅིག་དགོད་པ་ཡིས། །དཔལ་ལྡན་
དཔའ་བོའི་སྙན་པ་ཅི་ཡང་བཟུང་། ༣ །སྒྲ་རིག་རྒྱ་མཚོའི་འཇུག་པ་དུས་གཅིག་ཏུ། །འཐུང་བཟོད་བུམ་པ་སྐྱེས་ཀྱི་ངང་ཚུལ་ཅན། །ཁྱོད་མཐོང་སརྦ་ཛྙཱ་ཞེས་སྙེམས་འཆང་བ། །འཆི་མེད་དགའ་བའི་ཚལ་དུ་རིངས་པར་ཞུགས། ༤ །གཞལ་བྱ་མངོན་ལྐོག་ཤིན་ཏུ་ལྐོག་གྱུར་པ། །འཇལ་བྱེད་ཚད་མ་གསུམ་གྱིས་གཞལ་བའི་མོད། །ཕྱོགས་ལས་རྣམ་པར་རྒྱལ་བའི་དགེ་མཚན་ཅན། །ཆོས་ཀྱི་གྲགས་པ་སླར་ཡང་ས་འདིར་སྣང་། ༥ །ཁྱད་པར་སྡེ་སྣོད་གསུམ་གྱི་ངེས་གསང་ཀུན། །ཇི་བཞིན་འཆད་དང་སྒྲུབ་ལ་མཚུངས་མེད་པས། །རྩོད་དུས་ཀུན་མཁྱེན་གཉིས་པ་འདིའོ་ཞེས། །འཇིག་རྟེན་དགེ་ལེགས་འགུགས་པའི་ངོ་མཚར་དར། ༦ །མཆོག་ཏུ་རྒྱུད་སྡེ་རྣམ་བཞིའི་ནོར་བུའི་ཆར། །གངས་ཅན་རི་བོའི་ལྗོངས་སུ་འབེབས་མཁས་པས། །གྲུབ་གཉིས་རྫོགས་ལྡན་འབྱོར་པའི་དགའ་སྟོན་མཁན། །གསང་བདག་ངུར་སྨྲིག་གར་རོལ་ཁྱོད་ཁོ་ན། ༧ །དེ་སླད་གཞུང་མང་འཆད་པའི་གྲྭར་ཞུགས་ཚེ། །ས་བཅུའི་དབང་ཕྱུག་འཕགས་མཆོག་མ་ཕམ་པ། །དགའ་ལྡན་ཆོས་ཀྱི་འདུན་ས་བཏང་ནས་སླར། །བསིལ་ལྗོངས་བསོད་ནམས་མགྲོན་དུ་སྣང་བ་བཞིན། ༨ །རྩོད་ངག་སེང་གེའི་སྒྲ་ཆེན་བསྒྲགས་པའི་མོད། །ཕས་རྒོལ་ལག་ལྡན་མྱོས་པའི་ཚོགས་རྣམས་ཀུན། །འདར་བཅས་ཐོར་ཚུགས་འཛིན་མར་བསྙིལ་བ་དང་། །མི་སྨྲ་བརྟུལ་ཞུགས་བཟུང་བའི་
དམ་བཅའ་སྦྱིན། ༩ །འཇམ་མགོན་སྨྲ་བའི་ཉི་མའི་ཡེ་ཤེས་སྐུ། །རྟག་ཏུ་མགྲིན་པའི་པདྨོར་ངལ་གསོས་པས། །སྡེབ་ལེགས་རྩོམ་པའི་ཟིལ་དངར་ད་དུང་ཡང་། །བློ་ལྡན་བུང་བའི་ཉེར་འཚོར་ཤིན་ཏུ་མཐོ། ༡༠ ། །།གསང་ཆེན་སྨིན་གྲོལ་ལམ་གྱི་ཐེམ་སྐས་ལ། །འཛེགས་ཏེ་ཟུང་འཇུག་གྲུབ་པའི་མཚན་སྙན་གྱིས། །ཡིད་སྲུབས་དཔུང་བཅས་མུན་པར་བཀོད་ནས་སླར། །ས་གསུམ་བཀྲ་ཤིས་སྣང་བས་མཛེས་པར་བྱས། ༡༡ ། མདོར་ན་འཁོར་ལོ་གསུམ་གྱི་མཛད་བཟང་ལས། །བརྩམས་ཏེ་མཚོ་བྱུང་དགྱེས་པའི་ཏམྦུ་རས། །བསྐལ་པར་བརྗོད་ཀྱང་ཕ་མཐས་གཏུགས་མིན་པའི། །རྣམ་ཐར་ཐམས་ཅད་གཟིགས་པའི་སྤྱོད་ཡུལ་ཉིད། ༡༢ །དེ་སླད་མི་ཕྱེད་དད་གསུམ་དཔྱིད་ཀ་ཡིས། །བཟུང་བའི་རྣམ་དཔྱོད་གཞན་གསོས་གཞོན་ནུའི་མགྲིན། །བསྔགས་བརྗོད་བདུད་རྩིའི་དབྱངས་ཀྱིས་དགེ་བྱས་པས། །ཕན་བདེའི་དགའ་ཚལ་མཆོག་ཏུ་རྒྱས་གྱུར་ཅིག ༡༣ །ཅེས་རྩོད་པའི་དུས་ཀྱི་ཐམས་ཅད་མཁྱེན་པ་བུ་སྟོན་ལོ་ཙཱ་བ་ཆེན་པོ་རིན་ཆེན་གྲུབ་ལ་བསྔགས་པའི་ཚིག་རྒྱན་བདུད་རྩིའི་དབྱངས་སྙན་མངོན་པར་སྒྲོག་པའང་། རྗེ་དེ་ཉིད་ཀྱི་རྣམ་ཐར་ལ་ཤེས་ནས་དད་པ་ཐོབ་པ་བྱ་བྲལ་བ་མཁྱེན་བརྩེའི་མིང་གིས་དཔལ་ཞྭ་ལུ་རི་ཕུག་བྱང་ཆུབ་ཤིང་གི་ནགས་ཁྲོད་དུ་གསོལ་བ་བཏབ་པ་སརྦ་དཱ་ཀ་ལྱཱ་ཎཾ་བྷ་བ་ཏུ།། །།
རྗེ་བཙུན་ཙོང་ཁ་པ་ཆེན་པོ་བློ་བཟང་གྲགས་པའི་ཞབས་ཀྱི་པདྨོ་ལ་བསྔགས་པ་ནོར་བུའི་རྒྱུད་མང་།
༈ རྗེ་བཙུན་ཙོང་ཁ་པ་ཆེན་པོ་བློ་བཟང་གྲགས་པའི་ཞབས་ཀྱི་པདྨོ་ལ་བསྔགས་པ་ནོར་བུའི་རྒྱུད་མང་ཞེས་བྱ་བ་བཞུགས་སོ། །ན་མསྶ་མ་ཏི་ཀིརྟི་པཱ་ད་ཡ། །
སྲས་བཅས་རྒྱལ་བ་ཀུན་གྱིས་རབ་བསྔགས་པ། །མང་ཐོས་བློ་བཟང་མཁས་རྣམས་དགྱེས་པའི་ཕུལ། །དང་པོར་སྣང་བ་ཙམ་གྱི་དགེ་མཚན་གྱིས། །ས་གསུམ་གྲགས་པའི་ཟླ་རིས་མཆོག་ཏུ་གསལ། ༡ །ཕྱི་ནང་རིག་གཞུང་རྒྱ་མཚོ་གང་དང་གང་། །དེ་དེར་བསམ་བྱུང་འཇུག་པ་ལྷུང་བའི་མོད། །ཚིག་དང་དོན་གྱི་དཔྱད་པ་ཡོངས་རྫོགས་པས། །དཔྱོད་ལྡན་བྱེ་བའི་ཁེངས་པ་གཅིག་ཅར་འཕྲོགས། ༢ །སླར་ལ་ཐུང་པས་བསྟེན་འོས་སྨན་ལྗོངས་སུ། །རྩེ་གཅིག་ཟབ་དོན་བསྒོམ་པའི་བརྟུལ་ཞུགས་ཀྱིས། །སྟོང་དང་རྟེན་འབྱུང་འགལ་མེད་སྨྲ་བ་ལ། །དཔལ་ལྡན་ཟླ་བའི་མཁྱེན་པ་དངོས་དེ་བརྡོལ། ༣ །ཡན་ལག་དྲུག་ཅུའི་དབྱངས་ཀྱི་ཏམྦུ་རས། །ཟབ་རྒྱས་སྡེ་སྣོད་རྒྱ་མཚོ་འཆད་པ་ན། །བློ་གསལ་ཕྱོགས་ཀྱི་བུ་མོའི་རྣ་ལུང་དུ། །བདུད་རྩིའི་དགའ་སྟོན་གསར་པ་བསྒྲུབ་ལ་དབང་། ༤ །ཕྲ་བའི་གནད་ལ་ངེས་པའི་བདེན་མཐོང་ཞིང་། །ཟབ་མོའི་དོན་ལ་འཇིགས་མེད་སེང་གེའི་སྒྲས། །རྩོད་པའི་གཡུལ་ངོ་བཤམས་པའི་དེ་མ་ཐག །ཕས་རྒོལ་ལག་ལྡན་མྱོས་པའི་རྒྱུན་ལུགས་བཅད། །ཨེ་མ་སྲིད་དང་ཞི་བའི་སྙན་འགྱུར་ཀུན། །བྱེད་པོས་གཅིག་ཏུ་སྤུངས་པའི་རྗེས་འགྲོ་བ། །ལེགས་བཤད་རྩོམ་ཕྲེང་ནོར་བུའི་རྒྱུད་མང་པོར། །མཁས་རྣམས་བློ་གྲོས་འགུགས་པའི་ཆོ་ག་རྫོགས། ༦ །ཤེས་བྱ་མཐའ་དག་
གཟིགས་པའི་མཁྱེན་རབ་ཀྱི། །ལང་ཚོའི་མཛེས་པ་དར་བའི་ཕུན་ཚོགས་ཀྱིས། །འཇམ་དཔལ་གཞོན་ནུ་ཉིད་ཅེས་སྒྲ་དབྱངས་ལྷ། །རྟག་ཏུ་མགྲིན་མཚོར་འཁྱུད་པའི་དགའ་བས་རྩེན། ༧ །གཅིག་ཏུ་གཞན་། ཕྱིར་བརྩེ་བའི་ཐུགས་རྗེའི་ཟླ། །བྱང་ཆུབ་སྤྱོད་པའི་བདུད་རྩིའི་སྒེག་འཆང་བས། །ཕྱག་ན་པདྨོ་ངུར་སྨྲིག་བླ་གོས་ཅན། །བསིལ་ལྡན་རི་བོའི་ཁོངས་སུ་རྒྱུ་བ་བཞིན། ༨ །རྨད་བྱུང་ནུས་པའི་རྡོ་རྗེའི་མཚོན་རྣོན་གྱིས། ཡིད་སྲུབས་རི་བོའི་རྐང་པ་བཅིངས་ནས་སླར། །རྒྱལ་བསྟན་འཆི་མེད་གྲོང་ཁྱེར་སྐྱོང་མཛད་སླད། །གསང་བའི་བདག་པོའི་རྗེས་སུ་རྐང་པ་འཇོག ༩ །མདོར་ན་ཐུབ་པའི་རིང་ལུགས་ནོར་འཛིན་མ། །རྩོད་དུས་ཆུ་གཏེར་ཆེན་པོར་བྱིང་བའི་ཚེ། །མཁས་ཚུལ་གསུམ་གྱི་རུ་སྦལ་འཇུག་པ་ཡིས། །འདེགས་བཟོད་འཇིག་རྟེན་འདི་ན་གཉིས་པ་མེད། ༡༠ །མཆོག་ཏུ་མདོ་དང་སྔགས་ཀྱི་འདུལ་བ་ཡི། །བཅས་པའི་མཚམས་ལས་ནམ་ཡང་མི་འདའ་བའི། །བཙུན་ཚུལ་ཕུལ་དུ་སོན་པའི་རྣམ་ཐར་གྱིས། །སྲས་བཅས་རྣམ་འདྲེན་དགྱེས་པའི་འཛུམ་དཀར་གཡོ། ༡༡ །ལྷག་པར་ལྟ་དང་སྤྱོད་པ་མ་འཁྲུལ་པའི། །བཟང་པོའི་ཕྲིན་ལས་ནམ་མཁའི་མཐར་ཁྱབ་པས། །ཁོར་ཡུག་རི་བོའི་ཁོངས་སུ་དམ་ཆོས་ཀྱི། །རྫོགས་ལྡན་དང་པོའི་དུས་སྟོན་དར་བབས་མཛད། ༡༢ །དེ་སླད་ངོ་མཚར་གཏམ་གྱི་བརླན་ཆགས་པའི། །བློ་གྲོས་
ཨུཏྤལ་གསར་པའི་ཁོང་སེང་ནས། །བསྔགས་བརྗོད་སྦྲང་རྩིའི་ཕུང་པོ་དལ་བབས་པས། །དོན་གཉིས་ངལ་འཚོ་རྟག་ཏུ་རྒྱས་གྱུར་ཅིག ༡༣ །ཅེས་རྗེ་བཙུན་བླ་མ་བློ་བཟང་གྲགས་པའི་ཞབས་ཀྱི་པདྨོར་བསྔགས་པའི་ཚིགས་སུ་བཅད་པ་འདིའང་། རིས་མེད་པའི་བསྟན་པ་ཀུན་ལ་དག་པའི་སྣང་བ་གཅིག་ཏུ་དཀར་བའི་གཞོན་ནུ་གཙུག་ལག་སྨྲ་བའི་ཉི་མས་ཕྱོགས་མེད་ཀྱི་རྒྱལ་ཁམས་ཉུལ་བའི་སྐབས་འབྲོག་དགའ་ལྡན་རྣམ་པར་རྒྱལ་བའི་གླིང་གི་ཆོས་གྲྭ་ཆེན་པོར་སྒྲོན་ཟླ་༥བའི་དཀར་ཕྱོགས་ཀྱི་བཟང་པོ་གསུམ་པར་བྲིས་ཏེ་གསོལ་བ་བཏབ་པའོ།། །།
ཐམས་ཅད་མཁྱེན་གཟིགས་གཉིས་པ་འཇིགས་མེད་གྲགས་པའི་རྣམ་ཐར་ལ་དང་བས་བསྔགས་པ།
༈ རྒྱ་ཆེན་ཆོས་ཀྱི་སྤྱན་ལྡན་རིན་པོ་ཆེ། །ཕྱོགས་ལས་རྣམ་པར་རྒྱལ་པའི་རྒྱལ་མཚན་འཛིན། །ཡིད་འཕྲོག་རབ་མཛེས་དབྱངས་ཅན་དགའ་བའི་དཔལ། །འཇིགས་མེད་གྲགས་པའི་ཞབས་ལ་གསོལ་བ་འདེབས། ༡ །སྙིང་རྗེའི་བདུད་རྩི་བྱེ་བའི་ཟླ་བ་ནི། །བྱང་ཆུབ་སྤྱོད་མཆོག་ཆ་ཤས་ཡོངས་གང་བས། །རྣམ་པ་ཐམས་ཅད་མཁྱེན་པའི་སྣང་བ་ཡིས། །ས་གསུམ་མཛེས་པར་མཛད་ལ་གསོལ་བ་འདེབས། ༢ །གང་དུ་མཚན་དཔེའི་མེ་ཏོག་འཁྲུངས་པའི་མོད། །དམ་པས་བསྔགས་འོས་ཡོན་ཏན་དྲི་བསུང་གཏེར། །རྫོགས་པར་བཟུང་བའི་དགེ་མཚན་འཇིག་རྟེན་ན། །ཉིན་བཞིན་རྟག་ཏུ་འཆར་ལ་གསོལ་བ་འདེབས། ༣ །དགེ་བའི་བཤེས་ཀྱིས་ཡོངས་སུ་བཟུང་བ་དང་། །ཚུལ་གནས་ཐོས་བསམ་ཕ་མཐར་སོན་པ་དང་། །སྒོམ་བྱུང་ཤེས་རབ་ཟབ་མོའི་འཇུག་པ་རྣམས། །ལྷན་ཅིག་རྒྱས་པར་གྱུར་
ལ་གསོལ་བ་འདེབས། ༤ །མཁས་བཙུན་བཟང་པོའི་གཙུག་ན་མངོན་མཐོ་ཞིང་། །མཁྱེན་བརྩེ་ནུས་པའི་ཕྲིན་ལས་མཁའ་མཐར་བརྡལ། །འཆད་རྩོད་རྩོམ་ལ་འཇིགས་མེད་སེང་གེའི་དབྱངས། །སྲིད་འདིར་མཚུངས་པ་བྲལ་ལ་གསོལ་བ་འདེབས། ༥ །ཁྱད་པར་དཔལ་ལྡན་དེ་ཉིད་འདུས་པ་ཡི། །ཆོས་ཀྱི་ཕུང་པོ་ཟད་མི་ཤེས་པ་གང་། །འགྱེད་ལ་ཁྱོད་དང་སྟོན་མཆོག་ཉི་མའི་གཉེན། །རྣམ་ཐར་གཅིག་ཏུ་མཚུངས་ལ་གསོལ་བ་འདེབས། ༦ །མཁས་རྣམས་བསྔགས་པའི་རོལ་མོ་སྒྲོག་པ་དང་། །གྲུབ་རིགས་ཀུན་གྱིས་ཕྱག་གིས་འདུད་པ་དང་། །སྲས་བཅས་རྒྱལ་བས་དགྱེས་པར་ལུང་བསྟན་པའི། །དཔལ་ལྡན་འཇིགས་མེད་གྲགས་པར་གསོལ་བ་འདེབས། ༧ །ཨེ་མ་གང་གི་ཚད་མེད་ཡོན་ཏན་གྱི། །རྣམ་ཐར་རྟག་ཏུ་ཡིད་ལ་གོམས་བྱས་པས། །བདག་སོགས་འགྲོ་ཀུན་སྲིད་ཞིའི་ཕ་མཐའ་ལས། །རྣམ་གྲོལ་སྐུ་བཞིའི་ངལ་འཚོ་བསྙེན་གྱུར་ཅིག ༨ །ཅེས་རྩོད་པའི་དུས་ཀྱི་ཐམས་ཅད་མཁྱེན་གཟིགས་གཉིས་པ་འཇིགས་མེད་གྲགས་པའི་རྣམ་ཐར་ལ་དང་བས་བསྔགས་པའི་མེ་ཏོག་ཕྲ་མོ་འཐོར་བ་འདིའང་འཇམ་དབྱངས་མཁྱེན་བརྩེའི་དབང་པོའི་བློ་མཚོ་ལས་བྱུང་བའོ། །སརྦ་མངྒལཾ།། །།
སྔ་འགྱུར་རྡོ་རྗེ་ཐེག་པའི་བསྟན་འཛིན་ཆེན་པོ་རྣམས་ལ་བསྔགས་བརྗོད་ཨུཏྤལ་འཛུམ་ཕྲེང་།
༈ སྔ་འགྱུར་རྡོ་རྗེ་ཐེག་པའི་བསྟན་འཛིན་ཆེན་པོ་རྣམས་ལ་བསྔགས་བརྗོད་ཨུཏྤལ་འཛུམ་ཕྲེང་ཞེས་བྱ་བ། ན་མོ་གུ་རུ་ཛྙཱ་ནཱ་ཡ། འཕགས་ཡུལ་ཆོས་ཀྱི་གན་མཛོད་ཆེན་པོ་ནས། །རིག་འཛིན་སྡེ་སྣོད་ནོར་བུའི་ཟ་མ་ཏོག །
ཡིད་འཕྲོག་རི་རྩེ་ཟླ་ཞུན་གྱིས་བཅིངས་ལྗོངས། །འདྲེན་པའི་བྱེད་པོ་ལོ་ཆེན་བཻ་རོའི་དྲིན། ༡ །སྨྲ་བའི་ཟླ་བར་གྲགས་པའི་མཁྱེན་རབ་ཀྱང་། །སྙིང་དབུས་ཀུནྡའི་བཅུད་ལེན་ལ་བཏུང་བས། །གསང་རྒྱུད་རྒྱ་མཚོའི་མཚར་སྡུག་རྫོགས་པའི་དཔྱིད། །ཡེ་ཤེས་གཞོན་ནུའི་མཚན་གྱིས་རྣམ་པར་གསལ། ༢ །ཀུན་ཏུ་སྦས་པའི་ལམ་མཆོག་གདུགས་དཀར་པོ། །ཐུགས་བསྐྱེད་དཔུང་པས་ཁྱེར་བའི་དགེ་མཚན་། གྱིས། །གྲུབ་གཉིས་རྒྱལ་སྲིད་མཆོག་ལ་དབང་འབྱོར་བས། །ཆོས་ཀྱི་འཁོར་ལོས་སྒྱུར་བ་གནུབས་ཆེན་རྗེ། ༣ །ལུང་རྟོགས་བདུད་རྩིས་ཕྱུག་པའི་ཨ་ཏི་ཤས། །གང་གི་མཁྱེན་དཔྱོད་ཕ་མཐའ་མ་མཐོང་། ནས། །བསྔགས་པའི་ཨུཏྤལ་དཀར་པོ་བཞད་མཛད་ཕྱིར། །མཚུངས་ཟླས་བསྐྲུན་ནུས་མིན་ནོ་ཆོས་ཀྱི་བཟང་། ༤ །རྣམ་པ་ཀུན་གྱི་མཆོག་ལྡན་ཧེ་རུ་ཀ ་།ཟུང་འཇུག་གྲུབ་པ་བརྙེས་པའི་སྒྱུ་འཕྲུལ་ལ། །ཆགས་པ་འདི་ཀོས་བོད་ཡུལ་གསང་སྔགས་ཀྱི། །དགའ་སྟོན་མཆོག་ཏུ་བདོ་མཛད་ཤཱཀྱ་འབྱུང་། ༥ །བཤད་དང་སྒྲུབ་པའི་འཇོ་སྒེག་ཆུ་སྐྱེས་གསར། །སྔོན་གོམས་སྤོབས་པའི་ཕྱག་རྒྱས་དབྱེ་བ་ལས། གཞན་དྲིན་འཇོག་པ་མིན་པའི་ངོ་མཚར་གཏམ། །ཤེས་རབ་གྲགས་པའི་སྤྲིང་ཡིག་ཕྱོགས་བཅུར་སྤྲོ། ༦ །གསང་བ་འཛིན་པའི་བདག་ཉིད་སྙིགས་མའི་དུས། །མཚན་དཔེའི་ཟློས་གར་གསར་པ་བསྒྱུར་བའི་ཕྱིར། །
གནོད་སྦྱིན་འཁོར་གྱིས་བསྟེན་པའི་ཁྱད་པར་ལས། །གཞན་དུ་དབྱེ་བ་མེད་དོ་སྒྲོ་ཕུག་པ། ༧ །སྡེ་སྣོད་བཞི་པའི་ཆུ་གཏེར་ཆེན་པོ་ཉིད། །བློ་མཆོག་རིན་ཆེན་གྲུ་བོས་བརྒལ་ནས་སླར། །གྲུབ་གཉིས་འབྱོར་པས་བཀང་བའི་དེད་དཔོན་ཆེ། །ཤེས་རབ་སེང་གེར་གྲགས་པའི་བ་དན་གཡོ། ༨ །གསན་བསམ་སྒོམ་པའི་ལང་ཚོའི་སྒྱུ་རྩལ་གྱིས། །རྒྱན་དྲུག་མཆོག་གཉིས་ཁྲི་ལ་འཛེགས་ནས་སླར། །ལུང་རྟོགས་དགོས་དགུ་འདྲེན་པའི་ཤིང་རྟ་ཆེ། །དྲི་མེད་འོད་ཟེར་སྟོན་པ་གཉིས་པ་ཡིན། ༩ །བསླབ་པ་གསུམ་གྱི་ཆུ་གཏེར་ལས་ཐོན་ཞིང་། །གནས་ལྔ་རིག་པའི་འོད་ཟེར་འབུམ་གྱིས་འཁྱུད། །ངེས་དོན་རྒྱུད་སྡེའི་བདུད་རྩི་སྤྲོ་བའི་དཔྱིད། །པདྨ་དབང་གི་རྒྱལ་པོ་ལས་གཞན་སུ། ༡༠ །རྣམ་སྣང་རིགས་གྲོལ་སྒྱུ་འཕྲུལ་ལ་ཆགས་པའི། །ཟློས་གར་དཔག་བསམ་གཞོན་ནུའི་རོལ་སྒེག་ནི། །སྔ་འགྱུར་བསྟན་པའི་སྲོག་ཤིང་གཅིག་གྱུར་ཕྱིར། །འགྱུར་མེད་རྡོ་རྗེའི་ལུང་གིས་བསྔགས་མིན་ནམ། ༡༡ །གྲངས་མེད་མཁྱེན་པའི་པདྨ་དཀར་པོའི་ཚལ། །གཡུ་སྒྲའི་ཐུགས་བསྐྱེད་ཉི་ཟེར་གྱིས་སྨིན་པས། །བཤད་དང་སྒྲུབ་པའི་བཅུད་ལེན་རྟག་འཇོ་བའི། །ཁུར་ཆེན་ཚངས་པས་བཟོད་མིན་དྷརྨ་ཤཱི། ༡༢ །སོ་སོ་རིག་པའི་ཡེ་ཤེས་བརྙེས་དེའི་མཐུས། །བརྒྱ་ཕྲག་ངལ་བས་བསྐྲུན་ཀྱང་འཐོབ་དཀའ་བའི། །ལུང་རྟོགས་ཆོས་ཀྱི་འབྱོར་པས་མངོན་མཐོ་ཕྱིར། །ཀུན་
མཁྱེན་ཁྲི་ལ་འཛེགས་པ་འཇིགས་མེད་གླིང་། ༡༣ །འཇམ་དཔལ་གཞོན་ནུའི་སྤོབས་པའི་ཡེ་ཤེས་ཀྱང་། །ངུར་སྨྲིག་བླ་གོས་གསར་པ་ལ་ཆགས་ཕྱིར། །བཤད་སྒྲུབ་སྒྲ་དབྱངས་སྲིད་རྩེར་སྒྲོག་པའི་དཔལ། །འཇིགས་མེད་བློ་ལྡན་རྒྱ་མཚོར་གྲགས་པ་གཡོ། ༡༤ །དེ་སོགས་ཟླ་བའི་རྡུལ་བརྩེགས་གངས་རིའི་ཁྲོད། །བསྔགས་འོས་བདེ་འབྱུང་རལ་རྩེས་མངོན་བཏུད་པའི། །མཁས་དང་གྲུབ་པའི་ཤར་གྱི་ཐིག་ལེ་ཡིས། །བསྟན་འགྲོར་སྨན་པའི་དགེ་མཚན་རྒྱ་ཆེར་བྱིན། ༡༠ །ཞེས་སྔ་འགྱུར་བསྟན་པའི་སྲོལ་འབྱེད་ཆེན་པོ་རྣམས་ལ་བསྔགས་བརྗོད་ཀྱི་མེ་ཏོག་ཕྲ་མོ་འདིའང་གཞོན་ནུ་ཨ་བྷཱ་ཡས་བཅོས་མིན་གྱི་མོས་གུས་ཆེན་པོས་མཚམས་སྦྱར་ཏེ་གང་ཤར་བཀོད་པ་ཛ་ཡནྟུ།། །།
ཀུན་མཁྱེན་ཆེན་པོ་ལ་བསྟོད་པ་ཛམྦུའི་འཁྲི་ཤིང་།
༈ ཀུན་མཁྱེན་ཆེན་པོ་ལ་བསྟོད་པ་ཛམྦུའི་འཁྲི་ཤིང་ཞེས་བྱ་བ། ན་མོ་གུ་རུ་ཛྙཱ་ན་ཡེ། ཀ་དག་ཀློང་ཆེན་དགོངས་པར་དབང་བསྒྱུར་བས། །ཁ་ཙམ་མ་ཡིན་དོན་གྱི་ཐམས་ཅད་མཁྱེན། །ག་བུར་འཛིན་ལྟར་དྲི་མེད་ཐར་མཆོག་གིས། །ང་བདག་གདུང་སེལ་འོད་ཟེར་སྤྲོ་དེར་འདུད། ༡ །ཅ་ཅོ་རྣམ་སྤངས་གཞོམ་བྲལ་ནཱ་དའི་སྒྲ། །ཆུ་མེད་དབུ་མའི་དབྱིངས་སུ་སྒྲོག་པ་ལས། །ཇ་ཆང་སྐྱེམས་ཀྱིས་མི་མཚོན་ལུང་རྟོགས་ཆོས། །ཉ་རྒྱས་ཀུན་འཛུམ་བཞིན་སྩོལ་ལ་འདུད། ༢ །ཏ་ཐཱ་ག་ཏས་ལེགས་གསུངས་བདེན་གཉིས་ལམ། །ཐ་དད་མོས་པའི་རྗེས་འགྲོ་ཐེག་ཀུན་རྩེ། །ད་གཟོད་བསྐྱར་གྲོལ་ལས་འདས་རྫོགས་པ་ཆེ། །ན་མར་
ཁོར་ཡུག་མཉམ་པར་རོལ་དེར་འདུད། ༣ །པ་སངས་ལྟར་དཀར་སྨོན་འཇུག་བདུད་རྩིས་རོལ། །ཕ་རོལ་ཕྱིན་ལམ་སྟེང་འཐུང་བཞད་པ་ལས། །བ་མཆོག་ཙིནྟ་མ་ཎི་ཇི་བཞིན་དུ། །མ་ལུས་འགྲོ་བའི་རེ་འདོད་སྐོང་ལ་འདུད། ༤ །ཙ་རི་ཏྲ་སོགས་གནས་ཡུལ་ཕྱག་རྒྱ་རུ། །ཚ་གྲང་ཁུར་དུ་བཟོད་པའི་དཀའ་སྤྱད་ཀྱིས། །ཛ་ཧུའི་རྒྱུན་བཞིན་བསྐྱེད་རྫོགས་ཏིང་འཛིན་དང་། །ཝ་ལྟར་རི་སུལ་དབེན་པར་སྦས་དེར་འདུད། ༥ །ཞ་རེངས་བྲལ་བའི་གཉུག་མའི་འཁྲི་ཤིང་ཆེར། །ཟ་མ་ཏོག་བཞིན་ཤེས་བྱའི་ཚོགས་བསྡམས་པས། །འ་ཅག་འགྲོ་བ་སྒྲོལ་ཕྱིར་ལུང་རྟོགས་ཆོས། །ཡ་བྲལ་ལས་འདས་རྟག་ཏུ་སྦྱིན་ལ་འདུད། ༦ །རྭ་། ལྟར་ཉེས་པའི་རྡུལ་གྱིས་མ་གོས་ཤིང་། །ལ་ཀླུང་འགྲོ་ལ་ཕན་བདེའི་དགའ་སྟོན་སྦྱིན། །ཤ་ཟ་སྲོག་གཅོད་དྲེགས་པའི་སྡེ་དཔོན་ཀུན། །ས་བཅུའི་བཀའ་རྟགས་གསར་པས་འཆིང་དེར་འདུད། ༧ །ཧཱ་རིའི་ལ དྲི་བསུང་འཐུལ་བའི་བདེ་སྟོང་རོས། །ཨ་ཏི་ཟུང་འཇུག་ལང་ཚོ་ཆེར་བརྟས་པས། །ཤེས་རབ་ཕ་རོལ་ཕྱིན་ཡུམ་རྗེ་བཙུན་མ། །བརྟན་པ་འཕྲོག་པའི་བྱེད་པོ་ཁྱོད་ལ་འདུད། ༨ །འགྱུར་བཅས་སྲིད་པའི་འཕོ་བ་དབུ་མར་ཞིག །འགྱུར་མེད་གདན་གསུམ་མཚན་དཔེའི་དཀྱིལ་འཁོར་སྨིན། །ཡོངས་གྲུབ་ཡེ་ཤེས་ཆེན་པོར་མཉམ་རོལ་པས། །ཞིང་ཁམས་ཀུན་སྦྱངས་འགྲོ་རྣམས་སྨིན་བགྱིད་ཤོག ༩ །ཡུལ་ལ་ལྟོས་
པའི་སྤྲོས་བྲལ་སྟོང་པ་ཉིད། །ཡུལ་ཅན་བདེ་བ་ཆེན་པོས་རབ་བསྡམས་པས། །བདེ་སྟོང་ཟུང་འཇུག་རྣམ་ཀུན་མཆོག་ལྡན་དང་། །འཕོ་འགྱུར་བྲལ་བའི་གོ་འཕང་བརྙེས་གྱུར་ཅིག ༡༠ །གུས་པའི་ཆུ་གཏེར་ལས་སྐྱེས་ཚིག་གི་སྤྲིན། །རྣམ་དཀར་ཆར་གྱིས་སྤུད་པའི་དགེ་མཚན་གྱིས། །སྡུག་བསྔལ་བདེན་པའི་ཚ་གདུང་རབ་བཅིལ་ཏེ། །ལྷན་སྐྱེས་ཐར་པའི་པདྨོ་བཞད་ཕྱིར་བསྔོ། ༡༡ །ཞེས་ཀུན་མཁྱེན་སངས་རྒྱས་གཉིས་པའི་རྟོགས་པ་བརྗོད་པ་དང་མཐུན་པར་བསྔགས་པའི་མེ་ཏོག་ཕྲ་མོ་འདིའང་གཞོན་ནུ་ཨ་བྷཱ་ཡས་གང་ཤར་མྱུར་དུ་སྦྱར་བའོ། །
གངས་རིའི་ཁྲོད་ཙམ་ན་ཕུལ་དུ་བྱུང་བའི་མ་ཧཱ་པཎྜི་ཏ་ཆོས་ཀྱི་བཟང་པོ་ལ་གསོལ་བ་འདེབས་པ་དད་པའི་རྦ་རླབས་མངོན་པར་གཡོ་བ།
གངས་རིའི་ཁྲོད་ཙམ་ན་ཕུལ་དུ་བྱུང་བའི་མ་ཧཱ་པཎྜི་ཏ་ཆོས་ཀྱི་བཟང་པོ་ལ་གསོལ་བ་འདེབས་པ་དད་པའི་རྦ་རླབས་མངོན་པར་གཡོ་བ་ཞེས་བྱ་བ་བཞུགས་སོ། །རྒྱ་གར་སྐད་དུ། མ་ཧཱ་པཎྜི་ཏ་དྷརྨ་བྷ་དྲེཉུདྡྷེཥ་ཎ་ཤདྡྷ་ནཱི་སོརྨི་ཀཱ་བྷི་ཙ་ལ་ནཱ་མ། བོད་སྐད་དུ། མཁས་པ་ཆེན་པོ་ཆོས་ཀྱི་བཟང་པོ་ལ་གསོལ་བ་འདེབས་པ་དད་པའི་རྦ་རླབས་མངོན་པར་གཡོ་བ་ཞེས་བྱ་བ། དཔལ་ངག་གི་དབང་ཕྱུག་ལ་ཕྱག་འཚལ་ལོ། །དགེ་ལེགས་རྟག་པ་དམ་པའི་ཡེ་ཤེས་རྣམ་མེད་འོད་གསལ་སྟོང་པ་ཉིད། །རྣམ་བཅས་སྒྱུ་མའི་ཕྱག་རྒྱར་བཞེངས་པས་ཁ་སྦྱོར་བདུན་གྱི་དཔལ་འབར་བ། །དང་པོའི་མགོན་པོ་རྒྱལ་སྲས་ཟོལ་གྱིས་འཇིག་རྟེན་གསུམ་ན་རབ་གྲགས་པ། །འཇམ་དཔལ་གཞོན་ནུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༡ །གང་ཁྱོད་གཟོད་ནས་རབ་ཞི་
བརྙེས་ཀྱང་སྲིད་དང་མཐུན་པར་འཇུག་པ་ན། །བསིལ་ལྡན་གཙང་རོང་གྲུབ་པའི་སྨན་ལྗོངས་འཆི་མེད་འདུན་སའི་རྒྱན་གཅིག་པུར། །དཔལ་ལྡན་གྲུབ་རིགས་ཐིག་ལེར་ཆས་ཚེ་བསྔགས་འོས་རྒྱ་མཚོའི་གཞིར་གྱུར་པ། །འཇམ་དཔལ་གཞོན་ནུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༢ །ཐོག་མ་ཉིད་ནས་སྙིང་རྗེ་ཆེ་དང་བློ་མཆོག་སྣང་བ་མ་སྨད་པས། །ལན་རེ་ཟུང་རེས་གཞུང་ལུགས་ཀུན་མཁྱེན་ཐམས་ཅད་གཟིགས་པའི་གྲགས་སྙན་གྱིས། །འཕགས་བོད་མཁས་ཀུན་སྤོབས་པ་འཕྲོག་མཛད་ལག་ན་རལ་གྲིའི་སྙེམས་འཆང་བ། །འཇམ་དཔལ་གཞོན་ནུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༣ །ཕྱོགས་ཀྱི་གླང་པོའི་ཤེས་རབ་མཚོན་ཅན་དབྱིག་གཉེན་ཞབས་ཀྱི་ཐོས་པས་བརྒྱན། །ཙནྡྲ་གོ་མཱིའི་བརྗོད་པ་ཡོངས་བཟུང་ཆོས་ཀྱི་གྲགས་པའི་བརྒལ་བརྟག་དང་། །དཔལ་ལྡན་དཔའ་བོའི་རྩོམ་པ་ལ་འཇུག་འགྲན་ཟླ་མེད་པའི་པཎྜི་ཏ། །འཇམ་དཔལ་གཞོན་ནུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༤ །བསླབ་གཞིའི་སྐྱེད་ཚལ་ཉམས་དགའ་ལེགས་འཁྲུངས་ཐུགས་བསྐྱེད་ཡལ་ག་ཁྱོན་ཡངས་ཤིང་། །ཐ་མལ་དངོས་ཀུན་བདེ་བ་ཆེར་བསྡོམས་ལྷ་སྔགས་ཡེ་ཤེས་འབྲས་བུས་ཕྱུག །རང་གཞན་དོན་གཉིས་འབྱོར་པས་ཚིམ་མཛད་དཔག་བསམ་དབང་པོའི་གཟུགས་ཀྱི་ཟླ། །འཇམ་དཔལ་གཞོན་
ཞུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༥ །མཁས་ཚུལ་གསུམ་གྱི་གཟི་བརྗིད་རྨད་བྱུང་གངས་ཅན་བསྟན་པའི་ཤིང་རྟ་ཆེ། །གྲུབ་པ་མཆོག་གི་བརྟུལ་ཞུགས་མཐའ་ཡས་རིག་འཛིན་བྱེ་བའི་རྒྱན་གཅིག་པུ། །བསྔགས་འོས་སྣང་བས་ས་གསུམ་ཀུན་ཁྱབ་རྒྱལ་བའི་མྱུ་གུའི་ཉིན་མོར་བྱེད། །འཇམ་དཔལ་གཞོན་ནུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༦ །རྒྱུད་ལུང་མན་ངག་ཆ་ཤས་ཡོངས་གང་གཙུག་ལག་རྒྱ་མཚོའི་རི་དྭགས་གཡོ། །ཆེར་རློམས་ཁེངས་པའི་པདྨ་ཟུམ་ཞིང་གཟུར་གནས་ཀུན་དགའི་ཆུ་གཏེར་འཕེལ། །གྲགས་པའི་འོད་དཀར་སྲིད་ན་མཚུངས་བྲལ་སྔོན་མེད་སྨྲ་བའི་ཟླ་བ་ཆ། །འཇམ་དཔལ་གཞོན་ནུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༧ །སྣང་བ་མཐའ་ཡས་ཡེ་ཤེས་སྒྱུ་འཕྲུལ་ལྷ་གཅིག་དཱི་པཾ་ཀཱ་ར་དང་། །འབེལ་བའི་གཏམ་གྱི་སྦྱོར་བར་ཞུགས་ཚེ་ཁེངས་པའི་འཁྲི་ཤིང་ཉེར་དུད་པས། །སྤྱོད་འཆང་དབང་པོའི་རྣམ་འཕྲུལ་ཉིད་ཅེས་བསྔགས་པའི་མེ་ཏོག་རབ་འཐོར་བ། །འཇམ་དཔལ་གཞོན་ནུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༨ །འཆི་མེད་མཆོག་གི་དགེ་མཚན་བརྙེས་པས་གསང་ཆེན་བསྟན་པ་ཡུན་དུ་བསྐྱངས། །དེ་ཡིས་བསྟན་འཛིན་འབུམ་ཕྲག་འདུ་བས་གངས་རིའི་ཁྲོད་ཀུན་མཛེས་པར་བྱས། །དེས་ཀྱང་བསྟན་འགྲོའི་ཕན་བདེ་ཡོངས་
སྤེལ་འགྲན་ཟླ་ཀུན་བྲལ་སྤྲུལ་པའི་སྐུ། །འཇམ་དཔལ་གཞོན་ནུ་ཆོས་ཀྱི་བཟང་པོས་བྱང་ཆུབ་བར་དུ་བྱིན་གྱིས་རློབས། ༩ །མདོར་ན་མགོན་པོ་ཁྱོད་ཀྱི་རྣམ་ཐར་རྒྱལ་བ་ཀུན་དང་མི་ཕྱེད་པས། །འཕགས་ཆེན་གྱིས་ཀྱང་གཞལ་བར་དཀའ་ན་བྱིས་པའི་བློ་ཡིས་ཅི་ཞིག་ཅེས། །སྙིང་ནས་མོས་གུས་གདུང་ཤུགས་དྲག་པོས་དུས་གསུམ་ཀུན་ཏུ་གསོལ་འདེབས་ན། །རིག་དང་བརྩེ་བའི་ཡེ་ཤེས་གཟིགས་པས་བྱང་ཆུབ་བར་དུ་བྱིན་གྱིས་རློབས། ༡༠ །གང་ཞིག་འཁོར་བའི་རྒྱ་མཚོ་ལས་བརྒལ་ཐར་པའི་གྲོང་དུ་འཇུག་འདོད་པས། །འགྲོ་འདི་ཉོན་མོངས་ཕུང་པོ་མེད་སྣང་སྒྱུ་མ་ལྟ་བུའི་རིམས་ནད་ཀྱིས། །ཆེས་ཆེར་མནར་བའི་ངང་ཚུལ་དྲན་འི་ནགས་ཀླུང་དུ། །གཉེན་པོར་གྱུར་པའི་ལམ་མཆོག་བདུད་རྩི་འབད་པས་བསྒྲུབ་པར་བྱིན་གྱིས་རློབས། ༡༡ །ཕུང་སོགས་ཆོས་ཀུན་རྒྱུ་རྐྱེན་གཞན་དང་གཞན་གྱིས་དབང་གིས་རབ་སྣང་ཕྱིར། །ཡང་དག་མ་ཡིན་བསླུ་བའི་ཆོས་ཅན་དངོས་ཀུན་སྒྱུ་འདྲར་རོ་མཉམ་པ། །ཐེག་པ་ཆེན་པོའི་ཚུལ་ལ་འཇུག་པའི་འཇིགས་མེད་སེང་གེའི་སྒྲ་བསྒྲགས་པས། །དངོས་སྨྲའི་རི་དྭགས་བརྟན་པ་འཕྲོག་པའི་བརྟུལ་ཞུགས་གྲུབ་པར་བྱིན་གྱིས་རློབས། ༡༢ །སྣང་ཙམ་མི་འགག་དེར་འཛིན་ཀུན་ཞིག་དངོས་པོའི་གནས་ལུགས་མཐོང་བའི་བློས། །ཀུན་རྫོབ་འཁྲུལ་པ་རྫ་ས་སུ་བལྟ་དང་དོན་བྱེད་ནུས་པར་སྨྲ་ལ་སོགས། །ཕྱོགས་རེར་ཞེན་
པའི་རྟོག་པས་མ་བཅིངས་བདེན་གཉིས་གཟོད་ནས་ཟུང་འཇུག་པའི། །མི་མཐུན་དང་ནི་གཉེན་པོ་དབྱེར་མེད་ཟབ་དོན་རྟོགས་པར་བྱིན་གྱིས་རློབས། ༡༣ །དམིགས་པར་འཛིན་པའི་འདུ་ཤེས་ལ་བརྟེན་སྒྲོ་འདོགས་སྐུར་འདེབས་ཕྱོགས་ལྷུང་བ། །ཡང་དག་སྣང་བས་ལེགས་པར་དཔྱད་དེ་ངོ་བོ་ཉིད་ཀྱི་ཚུལ་རིག་པ། །དྲི་མ་མེད་པའི་ཤེས་རབ་མཆོག་གིས་རིག་ཚུལ་དུ་མའི་མཚོན་ལྷུང་བས། །རྟོག་གེས་རློམས་པའི་རི་བོ་བསྙིལ་ནས་ལས་བཟང་བསྒྲུབ་པར་བྱིན་གྱིས་རློབས། ༡༤ །དེ་ལྟར་འཕགས་པའི་ཡེ་ཤེས་ལམ་བྱེད་རང་བཞིན་རྫོགས་པ་ཆེན་པོའི་ཚུལ། །གཉིས་མེད་བྱང་ཆུབ་སེམས་སུ་རོ་མཉམ་ཐམས་ཅད་ཀུན་བཟང་རོལ་པའི་རྒྱན། །མ་རྟོགས་ལོག་རྟོག་གོལ་སྒྲིབ་ལས་འདས་བཏང་སྙོམས་ཆེན་པོའི་ངང་གནས་པས། །སྤངས་དང་རྟོགས་པའི་ཡོན་ཏན་ལྷུན་རྫོགས་མཆོག་དངོས་འགྲུབ་པར་བྱིན་གྱིས་རློབས། ༡༥ །གཅིག་ཅར་རྟོགས་པའི་སྐལ་བས་དབེན་ན་ཉེས་པ་ལྔ་སྤོང་འདུ་བྱེད་བརྒྱད། །ཚུལ་བཞིན་བསྟེན་པས་སེམས་གནས་རབ་བསྒྲུབ་ལྷ་སྔགས་ཡེ་ཤེས་སྦྱོར་པ་ཡིས། །ཀུན་རྟོག་གཉིས་འཐུང་སྡེར་བཅས་ཟིལ་མནན་སྟོང་ཆེན་སྙིང་རྗེ་སྒྱུ་མ་དང་། །ཕྱག་རྒྱ་གཅིག་སྤྲོས་ཕྲ་རགས་མཐར་ཕྱིན་བསམ་གཏན་འགྲུབ་པར་བྱིན་གྱིས་རློབས། ༡༦ །ཚོགས་ཀྱི་འདུ་བའི་ཉེ་རྒྱུ་ལ་བརྟེན་ཟབ་མོའི་ཤེས་རབ་མངོན་སུམ་གྱུར། །རྣམ་སྨིན་ཚེ་དབང་ཕྱག་རྒྱར་རབ་
བཞེངས་ལྷུན་གྱིས་གྲུབ་པའི་སྒྱུ་མ་ཡིས། །སྒྲིབ་གསུམ་བག་ཆགས་ཆ་བཅས་མཐར་བྱས་སྐུ་དང་ཡེ་ཤེས་དབྱེར་མེད་པའི། །རྟག་ཁྱབ་ལྷུན་གྲུབ་ཕྲིན་ལས་སྣང་བས་དོན་གཉིས་འགྲུབ་པར་བྱིན་གྱིས་རློབས། ༡༧ ། གཞན་ཡང་གནས་སྐབས་མི་མཐུན་ཀུན་ཞི་ཆོས་བཞིན་སྤྱོད་པའི་འདུ་བ་འཕེལ། །སྣོད་བཅུད་རྒུད་པའི་གདུང་བ་རབ་འཕྲོག་བཤད་སྒྲུབ་བསྟན་པ་ཕྱོགས་བཅུར་རྒྱས། །བསྟན་འཛིན་མཆོག་རྣམས་བསྐལ་བརྒྱར་ཞབས་བརྟན་ཆོས་འཁོར་རྟག་ཏུ་བསྐོར་བ་ཡིས། །བཀྲ་ཤིས་སྣང་བ་ནུབ་པ་མེད་པས་ས་གསུམ་ཁྱབ་པར་བྱིན་གྱིས་རློབས། ༡༨ །ཞེས་གངས་རིའི་ཁྲོད་ཙམ་ན་ཕུལ་དུ་བྱུང་བའི་མ་ཧཱ་པཎྜི་ཏ་རྣམ་སྣང་མཆོག་གི་སྤྲུལ་པའི་སྐུ་རོང་ཟོམ་ཆེན་པོ་ཆོས་ཀྱི་བཟང་པོའི་རྣམ་པར་ཐར་པ་ཡི་གེ་རྙིང་པ་ལས་ཇི་ལྟར་འབྱུང་བ་ཙམ་གཞིར་བཀོད་དེ་གསོལ་བ་འདེབས་པ་དང་། ཐེག་པ་ཆེན་པོའི་ཚུལ་ལ་འཇུག་པ་དང་། སྙིང་པོའི་ལམ་རིམ་ཟུང་འབྲེལ་གྱི་ཚུལ་དུ་སྨོན་ལམ་དུ་བགྱིས་པའི་ཚིགས་སུ་བཅད་པ་ཉུང་ངུ་འདིའང་སྙེ་མོ་བྱེ་མཁར་གྱི་ལོ་ཙཱ་བ་ཆེན་པོ་བཻ་རོ་ཙ་ན་རཀྴི་ཏ་བསམས་བཞིན་དུ་སྲིད་པ་ཉེ་བར་བཟུང་བ་རྒྱལ་སྲས་རྡོ་རྗེ་འཆང་གཞན་ཕན་མཐའ་ཡས་འོད་ཟེར་གྱི་ཐུགས་དགོངས་རྫོགས་པའི་ཆེད། བྱང་ཆུབ་སེམས་དཔའ་བློ་གྲོས་མི་ཟད་པ་ཆོས་ཀྱི་དབང་པོའི་སྡེས་རྗེས་སུ་གནང་སྟེ། བསླབ་གསུམ་རིན་པོ་ཆེའི་མཛོད་འཛིན་དགེ་སློང་དགེ་བའི་བཤེས་གཉེན་མཉྫ་ཤྲཱི་སཱ་ག་རས་ལྕང་ར་ལྷ་ཀླུ་འཆི་མེད་དགའ་ཚལ་ནས་བཀྲ་ཤིས་པའི་ལྷ་རྫས་དང་བཅས་ནན་ཏན་ཆེན་པོས་བསྐུལ་བ་ལྟར། བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རབ་ཡིད་ལྕགས་སྤྲེལ་ལོའི་ཆུ་སྟོད་ཟླ་བའི་ཚེས་བཞི་རྒྱལ་བས་ཆོས་འཁོར་བསྐོར་བའི་དུས་ཆེན་ལ་དཔལ་ལྷུན་གྲུབ་སྟེང་གི་ཆོས་གྲྭར་བྲིས་ཏེ་རྩེ་གཅིག་གུས་པས་གསོལ་བ་བཏབ་པ་དགེ་ལེགས་འཕེལ། །
གཏེར་ཆེན་ཆོས་ཀྱི་རྒྱལ་པོ་རིག་འཛིན་གཏེར་བདག་གླིང་པའི་རྣམ་པར་ཐར་པ་ལ་ཅུང་ཟད་བསྔགས་པ་རྒྱལ་བ་སྲས་བཅས་དགྱེས་པའི་རྒྱུད་མང་།
གཏེར་ཆེན་ཆོས་ཀྱི་རྒྱལ་པོ་རིག་འཛིན་གཏེར་བདག་གླིང་པའི་རྣམ་པར་ཐར་པ་ལ་ཅུང་ཟད་བསྔགས་པ་རྒྱལ་བ་སྲས་བཅས་དགྱེས་པའི་རྒྱུད་མང་ཞེས་བྱ་བ་བཞུགས་སོ། །ཛ བུ ག ག ན ཤུ རྒྱུ རྒྱུ རྒྱུ ། སྡེབ་སྦྱོར་མཉམ་པའི་བྲྀཏྟ་ཡི་གེ་བཅུ་གཅིག་པ་གསུམ་བསྔགས་སམ་ཟླ་༢༢པའི་མཚམས་ནས་ཟིན་པའི་ཕྲ་སྣ་རས་མཛེས་པའོ། །དགབག་བཛྲ་ཀོ་ཊི་བི་དྱ་དྷ་ར་རྩྭ་ཌགྲོ བཛྲ་ཡཱ་ན་ཤཱསཱིཔ་སོ་མཱནཾ། བཛ྄དྷཱརཏཱཀྐརཙསིདྡྷཤཱི བཛྲདེཧིཔཱརླསུཤུབྷཱཙཱརླ རྡོ་རྗེའི་རིག་འཛིན་བྱེ་བའི་ཟུར་ཕུད་རྩེར། །རྡོ་རྗེ་ཐེག་པའི་ལམ་བཟང་སྟོན་མཁས་པ། །རྡོ་རྗེ་འཆང་དངོས་འགྱུར་མེད་གྲུབ་པའི་དཔྱིད། །རྡོ་རྗེའི་སློབ་དཔོན་མཆོག་དེས་དགེ་ལེགས་སྩོལ། ༡ །གང་གི་རྨད་བྱུང་བསྔགས་འོས་རྣམ་ཐར་བྱིས་བློའི་ཡུལ་ལས་རིང་འདས་པ། །རྗེས་སུ་དཔག་པའི་ངག་གིས་བརྗོད་ལས་གྲུབ་པའི་ངང་ཚུལ་མ་ཡིན་ཀྱང་། །དད་པའི་གཞན་དབང་ཁོ་ནས་བརླན་གྱུར་རྣམ་དཔྱོད་
ནོར་འཛིན་དགའ་མ་ཡིས། །བསྟོད་ཚིག་མེ་ཏོག་གསར་པའི་དོ་ཤལ་ཅུང་ཟད་གཡོ་བས་བསྙེན་བཀུར་བྱ། ༢ །གཟོད་ནས་སྲིད་དང་ཞི་བའི་ཆུ་གཏེར་ལས། །ཕ་རོལ་སོན་པའི་སྙིང་རྗེའི་ཟླ་རིས་ནི། །གྲངས་མེད་འགྲོ་བའི་མོས་པ་དང་འཚམས་པར། །སྒྱུ་འཕྲུལ་དྲྭ་བའི་རོལ་རྩེད་ཅིར་ཡང་བསྒྱུར། ༣ །ཤིན་ཏུ་རྣམ་དག་འོད་གསལ་དབུ་མའི་དབྱིངས། །འཇུག་དང་ལྡང་བ་བྲལ་བར་མཉམ་བཞག་ཀྱང་། །བདེ་ཆེན་ཀླུ་ཀིས་བསྐུལ་བའི་དེ་མ་ཐག །ཁ་བའི་རྡུལ་བརྩེགས་ཁྲོད་དུ་དལ་གྱིས་གཤེགས། ༤ །དེ་ཚེ་གྲུབ་པའི་རིགས་ཀྱི་འཁྲི་ཤིང་ལ། །རྣམ་པར་འཆེལ་བའི་མཚན་བཟང་ཨུཏྤལ་གསར། །དགོད་པའི་མོད་ནས་ཡིད་སྲུབས་དཔུང་བཅས་ཀྱི། །ཚུལ་མིན་མཛེས་པ་མཐའ་དག་ཟུམ་པར་བྱས། ༥ །ཐོག་མ་ཉིད་ནས་དམ་པའི་ཡོན་ཏན་གྱི། །བདུད་རྩིས་མགྲིན་པ་བརྒྱན་པའི་ཆུ་བ་ལས། །དད་དང་བརྩེ་བའི་གེ་སར་འཛུམ་པ་ཡང་། །དྲི་མེད་མཁྱེན་པའི་མཚར་སྡུག་སར་པས་སྒེག ༦ །དེ་ཚེ་སྤྲིན་སྔོན་བཞད་པའི་རོལ་མོ་ཡིས། །ཡིད་ལ་སིམ་པ་ཐོབ་པའི་མདོངས་མཐའ་ལྟར། །རིགས་ལས་བྱུང་བའི་བསྔགས་འོས་བརྒྱ་ཕྲག་གིས། །དཔྱོད་ལྡན་ཡིད་ཀྱི་བརྟན་པ་ཕྱོགས་དེར་དྲངས། ༧ །རྒྱལ་ཀུན་ཐུགས་ཀྱི་ཐིག་ལེ་གསང་བའི་བདག །དོན་གཉིས་ཕྲིན་ལས་ལྷུན་གྱིས་གྲུབ་པ་ཅན། །འཁོར་ལོའི་མགོན་པོར་བསྙེན་པའི་དགེ་མཚན་ལས། །
སྨིན་དང་གྲོལ་བའི་དགའ་སྟོན་ཅིར་ཡང་འཕེལ། ༨ །ཁྱད་པར་བག་མེད་འགོག་པའི་བརྟུལ་ཞུགས་ཀྱིས། །ཉེས་པར་སྤྱོད་པའི་གཞན་དབང་རིང་བཏང་ནས། །ཨུ་པ་སཱི་ཀ་རྒྱ་མཚོའི་ཐོར་ཚུགས་རྩེར། །ཞབས་སེན་དམར་བའི་རྡུལ་ཕྲེང་ངང་གིས་བཏབ། ༩ །འཇམ་མགོན་དཔྱིད་ཀྱི་དཔལ་མོའི་བརླན་ཆགས་པའི། །བློ་མཆོག་སིནྡྲ་ཝཱ་རའི་འགྲམ་པ་རུ། །ལུགས་གཉིས་ཚོན་ཆགས་བཀྲ་བའི་དོ་ཤལ་ཞིག །ཐུན་མོང་ལྷ་མིའི་ཐེག་པའི་ཚལ་ན་བརྗིད། ༡༠ །ཇི་ལྟར་འདམ་ལས་སྐྱེས་པའི་པདྨོ་དང་། །ཆུ་མཚོར་ལུས་རྟེན་མཚམས་ཀྱི་སྤྲིན་པ་བཞིན། །མགོན་ཁྱོད་སྲིད་དང་མཐུན་པར་ཉེར་འཇུག་ཀྱང་། །ཟག་པར་བཅས་པའི་ཀུན་དཀྲིས་རིང་དུ་བཏང་། ༡༡ །འཁོར་དང་མྱ་ངན་འདས་པའི་གོ་ས་ན། །སྣ་ཚོགས་གཟུགས་དང་ཡི་གེའི་རྣམ་འགྱུར་སོགས། །ཇི་སྙེད་གྲུབ་པའི་སྤུན་ཟླ་བསྐྲུན་པ་ལ། །ཟླ་མེད་བི་ཤྭ་ཀརྨའི་ཁེངས་པ་བསྙིལ། ༡༢ །རྣམ་པར་མ་གྱུར་ཡུན་དུ་འཚོ་བ་དང་། །རྣམ་འགྱུར་གསོ་བའི་ཐབས་ཚུལ་མ་རྨོངས་པའི། །ཡན་ལག་བརྒྱད་ལྡན་རིག་པའི་གྲིབ་བསིལ་དུ། །མཐའ་ཀླས་འགྲོ་བའི་དབུགས་ཆེན་ འབྱིན་ལགས་གྲང་། ༡༣ །རང་བཞིན་ཁམས་ཀྱི་གནས་ཚུལ་ཇི་སྙེད་པར། །སྣ་ཚོགས་རྐྱེན་གྱི་སྦྱོར་བས་ཉེར་བསྐྲུན་པས། །མིང་དང་ཚིག་གི་རྒྱུད་མང་སྟོང་འཁྲོལ་བའི། །བྱེད་པོ་དཔལ་ལྡན་ཟླ་བ་གཉིས་
པར་འཁྲུལ། ༡༤ །མངོན་སུམ་རྗེས་དཔག་ལུང་གི་ཚད་མ་སོགས། །དྲི་མེད་རིག་པའི་འོད་རྡུལ་ལྷུང་བའི་མོད། །ཚུལ་མིན་སྨྲ་བའི་མུན་སྟུག་ཀུན་བཅོམ་ནས། །དོན་མཁས་སྣང་བའི་རི་མོ་སྲིད་ན་འབར། ༡༥ །གང་ལ་གང་གིས་ཇི་ལྟར་ལོངས་སྤྱོད་པའི། །ཕྱི་རོལ་དུས་ཀྱི་འཁོར་ལོའི་གནད་གསང་དང་། །སྤོར་ཐང་དབྱངས་འཆར་བཅས་པའི་རྩིས་རིག་གིས། །ལྐོག་གྱུར་རྗེན་པ་གཟིགས་མཁས་ཁྱོད་ལས་སུ། ༡༦ །ཐུན་མོང་ལམ་གྱི་རྣམ་པར་དབྱེ་བ་ནས། །དོན་དང་སྒྲ་ཡི་དཔྱད་པ་ཡོངས་རྫོགས་པའི། །སྐྱོན་བྲལ་སྙན་པར་སྨྲ་བའི་རོལ་མོ་ཡིས། །དཔལ་ལྡན་དཎྜིའི་སྤུན་ཟླར་འཛེགས་ལ་དབང་། ༡༧ ། ལྕི་དང་ཡང་བའི་ཡི་གེའི་གུར་གུམ་ཚལ། །བྲྀཏྟ་ཛཱ་ཏིའི་དོ་ཤལ་ལ་བཀོད་པར། །ངོ་མཚར་ཡོན་ཏན་དྲུག་གིས་སྒེག་པའི་ཕྱིར། །དམར་སེར་ཅན་གྱིས་བློ་ཡི་མཛེས་པ་ཕྲོགས། ༡༨ །འདོད་རྒྱལ་ཉིད་དང་རྗེས་སུ་གྲུབ་པ་ཡི། །མིང་དང་དོན་གྱི་མངོན་པར་བརྗོད་པའི་མཐའ། །གཟིགས་ལ་འཆི་བ་མེད་པའི་སེང་གེ་ཞེས། །བསྔགས་བའི་རྣམ་དཔྱོད་དེ་ཡང་མ་བྱིན་བླངས། ༡༩ །སྲིད་ན་སྔོན་བྱུང་རྣམ་པར་ཐར་པས་མཚོན། །མཐའ་ཀླས་ངོ་མཚར་གཟུགས་སུ་ཟློས་པའི་གར། །ཚུར་མཐོང་མིག་གི་བདུད་རྩི་གསར་པ་ཡང་། །བྱིན་པའི་མཚུངས་ཟླ་གུད་ན་དབེན་པ་བཞིན། ༢༠ །དེ་ལྟར་ཐུན་མོང་རིག་པའི་པད་རྩ་ཡིས། །བློ་གྲོས་
ཤ་ཚུགས་རྒྱས་པའི་གཉིས་འཐུང་དབང་། །ལེགས་བཤད་རིན་ཆེན་དྲྭ་བས་གདོང་གཡོགས་ཏེ། །ཁྱད་པར་རིག་པའི་སྤོ་ལ་རིངས་པར་གཤེགས། ༢༡ །ཤེས་པར་བྱ་བའི་ཆོས་ཁམས་ཇི་སྙེད་པ། །གཟུགས་སེམས་སེམས་བྱུང་ལྡན་མིན་འདུ་བྱེད་དང་། །འདུས་མ་བྱས་ཀྱི་གཞི་ལྔར་གཏན་དབབས་ནས། །ཟག་བཅས་ཟག་པ་མེད་པ་གཉིས་སུ་བསྡུ། ༢༢ །དེ་ཡང་ཐམས་ཅད་རྫས་གྲུབ་འདོད་པ་ཡི། །ཉན་ཐོས་མདོ་སྡེ་པ་དང་དེ་ལས་གཞན། །བཏགས་ཡོད་ཙམ་དུ་ཁས་ལེན་བྱེ་སྨྲ་བའི། །གྲངས་མེད་གཞུང་བཟང་འཆད་ལ་ཐོགས་པ་སྤངས། ༢༣ །ཁམས་གསུམ་སྣང་བ་འདི་ཀུན་སེམས་ཙམ་དུ། །ངེས་པ་རྙེད་པས་རབ་དྲངས་འཁོར་འདས་ཆོས། །མཚན་ཉིད་གསུམ་དུ་གཏན་ལ་དབབ་པའི་གཏམ། །དངོས་པོར་སྨྲ་བའི་གྲུབ་མཐའི་རྩེ་མོར་སྒྲོག ༢༤ །ཆོས་ཀུན་དབུ་མའི་རིགས་ཆེན་རྣམ་དྲུག་གིས། གཟོད་ནས་སྟོང་པ་ཆེན་པོར་རབ་དཔྱད་ནས། །མཐར་ཐུག་བདེན་གཉིས་ཁས་ལེན་བྲལ་བའི་དངོས། །ཐལ་འགྱུར་འཆད་ལ་དཔལ་ལྡན་ཀླུ་དབང་དངོས། ༢༥ །ཁྱད་པར་ལྟ་གཞི་མཐའ་དག་བཟློག་པའི་ལམ། །འཁོར་ལོ་ཐ་མའི་དགོངས་དོན་རྨད་བྱུང་གི །ངེས་གསང་གཏམ་གྱི་བདུད་རྩིས་རབ་མྱོས་གང་། །མ་ཕམ་ཞབས་དང་གཉིས་སུ་དབྱེ་བ་བྲལ། ༢༦ །དེ་སླད་བློ་བུར་སྒྲིབ་ཚོགས་ལས་གྲོལ་བའི། །རྟག་བརྟན་ཡོངས་གྲུབ་
བདེ་གཤེགས་སྙིང་པོའི་ཞལ། །མངོན་སུམ་གཟིགས་པ་དམ་པའི་གོམ་སྟབས་ཀྱིས། །ཐམས་ཅད་མཁྱེན་པའི་རྒྱལ་སར་ཡུད་ལ་འགྲོད། ༢༧ །གཞན་ལ་ཕན་པར་དགོངས་པའི་དམ་བཅའ་དང་། །རབ་འགྲོགས་སྨོན་འཇུག་བྱང་ཆུབ་སེམས་ཀྱི་དངོས། །ལེགས་པར་བཟུང་བའི་དགེ་མཚན་ཡིད་འོང་དེར། །རྒྱལ་ཀུན་བསྔགས་པའི་མེ་ཏོག་འཐོར་ལ་བྲེལ། ༢༨ །ཆོས་དོན་གཉེར་ལ་ཞི་བའི་ལམ་མཆོག་དང་། །ཕོངས་པ་རྣམས་ལ་འདོད་དགུའི་དཔལ་སྟེར་ཞིང་། །འཇིགས་བཅས་བདེ་བའི་མལ་དུ་དབུགས་དབྱུང་བའི། །བརྩེ་བའི་སྙིང་སྟོབས་བླ་ན་མེད་པ་སྦྱིན། ༢༩ །ཉེས་སྤྱོད་རྡུལ་ལ་ཟ་བའི་དག་བྱེད་ནི། །དགེ་ཆོས་ཡོངས་སུ་སྡུད་པ་ལས་བྱུང་ཞིང་། །དེས་ཀྱང་སེམས་ཅན་དོན་རབ་བགྱིད་པའི་ཕྱིར། །རྣམ་པར་གྲོལ་བའི་ཚུལ་ཁྲིམས་ཕུང་པོས་མཛེས། ༣༠ །གནོད་པའི་ཡུལ་གྱིས་ནམ་ཡང་མི་བརྫི་དང་། །ཆོས་ཕྱིར་དཀའ་བ་སྤྱད་ལ་བཟོད་པ་ཡིས། །ཟབ་མོའི་དོན་ལ་སྐྲག་པ་མི་མངའ་བའི། །ཕུལ་བྱུང་སྤོབས་པའི་མཆོག་ཀྱང་མགྲོན་དུ་བོས། ༣༡ །བྱང་ཆུབ་སྤྱོད་ལ་ཞུམ་པའི་བློ་སྤངས་ཏེ། །ཆོག་མི་ཤེས་པའི་འཇུག་པ་དང་བཅས་པས། །མི་ཕྱེད་བརྟན་པ་བསྐྱེད་པའི་རྣམ་ཐར་གྱིས། །བྲལ་སྨིན་ཡོན་ཏན་བྱེ་སྙེད་ལག་རྩེར་བླངས། ༣༢ །ལུས་སེམས་ཤིན་སྦྱངས་བདེ་བ་ལ་བརྟེན་ཏེ། །ལམ་གྱི་སྣང་ཚུལ་རིམ་པར་བགྲོད་པ་ལས། །ཟག་པར་བཅས་
པའི་གཞན་དབང་རིང་བཏང་ནས། །སེམས་བྱུང་འཇུག་པ་ཞི་བའི་བསམ་གཏན་གྲུབ། ༣༣ །གང་ཞིག་ཐོས་པས་ལམ་མིན་ལས་ལྡོག་ཅིང་། །བསམ་པས་དྲང་ངེས་དགོངས་པའི་གཏིང་འཇལ་ཏེ། །སྒོམ་བྱུང་སོ་སོར་རྟོག་པའི་ཡེ་ཤེས་ཀྱིས། །ལྷག་མཐོང་བདེན་པ་གཟིགས་པའི་ངོ་མཚར་འཛིན། ༣༤ །དེ་མཐུན་ལམ་ལྔ་ས་བཅུའི་ཆུ་གཏེར་ལས། །བྱང་ཆུབ་སྤྱོད་པའི་རིན་ཆེན་གྲུབ་བརྒལ་ཏེ། །མི་གནས་མྱ་ངན་འདས་པའི་གྲོང་ཁྱེར་དུ། །སྐུ་དང་ཡེ་ཤེས་མཆོག་གི་ངལ་བསོ་བསྟེན། ༣༥ །ཁྱད་པར་དབང་རྣོན་གདུལ་བྱའི་བགོ་སྐལ་དུ། །མ་རྨོངས་ཐབས་མང་དཀའ་བ་མེད་ལྡན་པའི། །རིག་འཛིན་སྡེ་སྣོད་བྱེ་བའི་སྨིན་གྲོལ་གྱིས། །སྔགས་རྒྱུད་རྒྱ་མཚོའི་དེད་དཔོན་གཅིག་ཏུ་གྱུར། ༣༦ །དེ་ཡང་རྫོགས་ལྡན་བལྟས་པའི་སིམ་པ་དང་། །རྗེས་མཐུན་ཆུ་དང་ཅོད་པན་དབང་བསྐུར་ནས། །དེ་ཁོ་ན་ཉིད་རྣམ་བཞིར་མཉམ་བཞག་པས། །རིགས་གསུམ་རྡོ་རྗེ་འཛིན་པའི་རྒྱལ་སར་གཤེགས། ༣༧ །སུམ་ལྡན་དགོད་པའི་བདེ་བ་ལམ་བྱས་ཏེ། །རྡོ་རྗེ་དྲིལ་བུའི་དབང་གིས་སྨིན་པའི་རྗེས། །མཚན་བཅས་མཚན་མ་བྲལ་བའི་བསམ་གཏན་གྱིས། །རིགས་བཞི་དབྱེར་མི་ཕྱེད་པའི་གོ་འཕང་ལེན། ༣༨ །གཉིས་ལྡན་ལག་པའི་འཁྲི་ཤིང་འབྲེལ་བའི་ཆེད། །རྡོ་རྗེ་སློབ་དཔོན་དབང་གིས་དབུགས་དབྱུང་ནས། །བསྙེན་དང་སྒྲུབ་པའི་ཐབས་ཀྱིས་འོག་མིན་
དུ། །ཡེ་ཤེས་རྣམ་ལྔའི་རོལ་རྩེད་གསར་དུ་བཟུང་། ༣༩ །རྩོད་ལྡན་གཉིས་གཉིས་འཁྱུད་སྦྱོར་ཆགས་པའི་སླད། །དབང་བཞིའི་རྗེས་མཐུན་བསྐྱེད་རྫོགས་སྡོམ་པ་དང་། །སྦྱོར་དང་ཉེ་རྒྱུའི་བརྟུལ་ཞུགས་ལ་gབརྟེན་ནས། །ཁ་སྦྱོར་ཡན་ལག་བདུན་གྱི་གསང་བ་འཛིན། ༤༠ །ཁྱད་པར་སྐུ་གསུམ་སྟོན་པའི་ས་འཛིན་ལས། །ལེགས་འོང་ནང་རྒྱུད་སྡེ་གསུམ་དགའ་བའི་ཚལ། །སྙིགས་སྤྱོད་སོས་ཀའི་གདུང་བས་ཉམ་ཐག་ཡ ཚེ། །ཁྱོད་ཀྱི་ཐུགས་རྗེའི་ཆར་གྱིས་སླར་ལ་གསོས། ༡ །དེ་ལྟའི་རྣམ་ཐར་ཁོ་ནའི་སྤྲིང་ཡིག་ཀྱང་། །ཕྱོགས་ཀྱི་བུ་མོའི་རྣ་བར་བྱིན་པའི་མོད། །དད་དང་བཀའ་དྲིན་དྲན་པའི་མེ་ལྕེ་ཡིས། །སྙིང་ནས་གུས་པའི་ཆུ་གཏེར་མི་ཁོལ་སུ། ༤༢ །གང་ཞིག་དད་བརྩོན་བརྟུལ་ཞུགས་ལྡན་པ་ལ། །ཕན་ནུས་ཟབ་མོའི་དབང་གིས་སྨིན་བྱས་ནས། །རྟོགས་དང་དག་མཉམ་བདག་ཉིད་ཆེན་པོ་ཡིས། གཞི་འབྲས་རོ་གཅིག་བལྟ་བའི་གནས་ལུགས་མཐོང་། ༤༣ །འཆི་བར་སྐྱེ་བའི་བག་ཆགས་སྦྱོང་བའི་ལམ། །གཡོ་ཐོབ་གོམ་བརྟན་ཉམས་ལྔའི་ཕ་མཐར་སོན། །ཐབས་གྲོལ་ལམ་གྱི་བགྲོད་པ་ལ་བརྟེན་ནས། །རིག་འཛིན་རྣམ་པ་བཞི་ཡི་ཟློས་གར་རྩེན། ༤༤ །ལྟ་སྤྱོད་དཀྱིལ་འཁོར་དབང་དང་དམ་ཚིག་སྡོམ། །ཕྲིན་སྒྲུབ་ཏིང་འཛིན་མཆོད་སྔགས་ཕྱག་རྒྱ་སྟེ། །རྒྱུད་ཀྱི་དངོས་པོ་རྣམ་བཅུར་དབང་འབྱོར་བས། །རྡོ་རྗེ་འཛིན་པ་ཡོངས་
ཀྱི་འཁོར་ལོས་སྒྱུར། ༤༥ །ཉེ་རྒྱུའི་སྤྱོད་པའི་ཐབས་མཁས་ལ་བརྟེན་ནས། །སློབ་པ་མིན་པའི་གོ་སར་མྱུར་སྤྱད་ཏེ། །སྐུ་དང་ཡེ་ཤེས་མཛད་པ་ཕྲིན་ལས་རྣམས། །རྟག་ཅིང་ཁྱབ་དང་ལྷན་གྲུབ་རོལ་པར་སྤྱོད། ༤༦ །རྒྱུད་དང་མན་ངག་རྗེས་སུ་འགྲོ་བ་ཡི། །དབང་བསྐུར་ཟབ་མོའི་འཇུག་པས་སྨིན་བྱས་ཏེ། །ཡུལ་དང་ཡུལ་ཅན་གཉིས་སུ་མི་ཕྱེད་པའི། །བྱང་ཆུབ་སེམས་ཀྱི་དཀྱིལ་འཁོར་དངོས་སུ་མཐོང་། ༤༧ །དེ་ཚེ་ཀུན་རྫོབ་དོན་དམ་དབྱེར་མེད་པའི། །ཟུང་འཇུག་ཐིག་ལེ་ཆེན་པོར་མཉམ་བཞག་པས། །ལྷན་སྐྱེས་བདེ་བའི་སྒྱུ་ཐབས་དང་འགྲོགས་པའི། །མངོན་སུམ་རིག་པའི་ཡེ་ཤེས་ཉིད་ལ་སྦྱོར། ༤༨ ། ཟླ་མེད་མྱུར་ལམ་རྐང་མགྱོགས་གྲུབ་པ་ཡིས། །ས་བཅུ་ལམ་ལྔའི་རྩེ་མོར་ལེགས་བགྲོད་དེ། །འབྲས་བུའི་ཆོས་ཁམས་ཉེར་ལྔར་དབང་འབྱོར་པའི། །རྗེས་སུ་རྣལ་འབྱོར་གནས་ལུགས་སྨྲ་ལ་མཁས། ༤༩ །མཚོན་བྱ་དོན་གྱི་ཆོས་ཉིད་རྗེན་པའི་དབྱིངས། །མཚོན་བྱེད་རྣམ་བཞིས་སྨིན་པར་བྱེད་པའི་ཆུས། །བརླན་པའི་མོད་ནས་གྲུབ་པའི་མེ་ཏོག་གིས། །ཡིད་དཔྱོད་ཐེག་པའི་མཛེས་པ་ཡོངས་སུ་ཕྲོགས། ༥༠ །འདི་ལྟར་འཁོར་དང་འདས་པའི་བྱེད་རྒྱུ་ཀུན། །སེམས་ཉིད་གཅིག་གི་རོལ་པ་ལས་བྱུང་བའི། །བརྗོད་བྲལ་གཉུག་མའི་རང་ཞལ་ལྟ་བའི་ལམ། །སེམས་ཕྱོགས་རྒྱུད་སྡེ་རྒྱ་མཚོ་ལེགས་པར་འཛིན། ༥༡ །ཆོས་
དང་ཆོས་ཅན་འཇུག་ལྡང་མཐའ་ཀླས་ཀྱང་། །རང་གྲོལ་རིག་པ་ཀུན་ཏུ་བཟང་པོའི་ཀློང་། །འགྲོ་འོང་བྲལ་བའི་ངང་དུ་མཉམ་བཞག་པས། །དཔག་ཡས་ཀློང་དགུའི་ཟབ་དོན་འཆང་ལ་དབང་། ༥༢ །གཟོད་ནས་རྣམ་གྲོལ་ཀ་དག་རྡོ་རྗེ་སེམས། །ལྷུན་གྲུབ་མངོན་སུམ་མཐོང་བ་རྣམ་པ་བཞིར། །མི་ཕྱེད་འདྲེས་པའི་དབྱིངས་སུ་ངལ་བསོ་བ། །མན་ངག་སྙིང་པོའི་བསྟན་འཛིན་ཁྱོད་ཁོ་ན། ༥༣ །ལྷག་པར་འདའ་དཀའི་ཕྱག་རྒྱས་བཏབ་པ་ཡི། །མཆོག་གསང་གདམས་པའི་ཙིནྟ་མ་ཎི་ཡང་། །རྡོ་རྗེའི་བརྟུལ་ཞུགས་ཁོ་ནས་ཉེར་བླངས་པས། །གངས་ཅན་ཕན་བདེའི་དགའ་སྟོན་སྲིད་རྩེར་འཕེལ། ༥༤ །གང་ཚེ་ཡེ་ཤེས་གཟིགས་པའི་གཡར་ལམ་དུ། །འཕུར་འགྲོའི་སློབ་དཔོན་མངོན་སུམ་ཉིད་བསྙེན་ནས། །སྨིན་གྲོལ་སིམ་འོད་དཀར་པོས་སྙིང་བརླན་པས། །གྲུབ་གཉིས་ཀུནྡའི་ཐིག་ལེ་ཅི་དགར་དགོད། ༥༥ །གཞན་ཡང་རྩ་གསུམ་རྒྱལ་བ་རབ་འབྱམས་ཀྱིས། །དགྱེས་པའི་ཞལ་བཟང་ལྷུག་པར་བསྟན་ནས་ཀྱང་། །རྡོ་རྗེ་ཡེ་ཤེས་འཕོ་བའི་དབང་བསྐུར་གྱིས། །ཤིན་ཏུ་ཕྲ་བའི་བདེན་དོན་ཉེ་བར་སྨིན། ༥༦ །དེ་སླད་ཚངས་སོགས་ཆེ་དགུས་རྟག་མཆོད་པའི། །ལྷར་བཅས་འགྲོ་བའི་བླ་མ་ཆེན་པོས་ཀྱང་། །ཞབས་ཀྱི་རྡུལ་ཕྲན་སྤྱི་བོར་བསྙེན་པ་དང་། །ཟབ་གསང་གདམས་པའི་བཀའ་དྲིན་དཔག་ཡས་བཟུང་། ༥༧ །རིགས་གཟུགས་ཐོས་དང་ཤེས་རབ་འབྱོར་
པ་ཡིས། །ཉེ་བར་མཐོ་བའི་མཆོག་དམན་མཐའ་ཀླས་པས། །བསྔགས་པའི་རྔ་ཡབ་དལ་བུར་གཡོབ་པ་ཡིས། །གྲགས་སྙན་རི་བོའི་ཁོངས་སུ་རླུང་ལྟར་རྒྱུ། ༥༨ །དེས་ཀྱང་མི་མཚོན་ཕྱོགས་དུས་འདྲེན་པ་དང་། །ཡེ་ཤེས་ཌཱ་ཀིའི་ཚོགས་ཀྱི་དད་ཕྱག་གིས། །ཉིན་བཞིན་བཏུད་པའི་ཡ་མཚན་ཟླ་ཤེལ་ལ། །གུས་པའི་སྟེང་འཐུང་མི་གྲོལ་ཤེས་ལྡན་སུ། ༥༩ །ཁྱད་པར་ངེས་དོན་སྙིང་པོའི་བཤད་སྒྲུབ་ཉིན་མོའི་སྣང་བ་ལྟར་གསལ་ཕྱིར། །འཁོར་ལོ་གསུམ་གྱི་ཕྱག་རྒྱས་མཛེས་ཤིང་རྡོ་རྗེའི་རྣལ་འབྱོར་ཆེར་གཞོལ་བའི། །ཨོ་རྒྱན་མཁའ་འགྲོའི་དགའ་ཚལ་གཉིས་པ་གངས་རིའི་ཁྲོད་དུ་འཕོས་པའི་གཏམ། །སྲིད་པའི་མཐའ་ཡང་ནུབ་པ་མེད་པ་སྨིན་གྲོལ་གྲུབ་པའི་གླིང་ཞེས་བསྐྲུན། ༦༠ །དེ་སོགས་ཚངས་པའི་བློ་ཡིས་དཔྱད་པས་ཀྱང་། །ཤིན་ཏུ་དཔག་དཀའི་རྣམ་པར་ཐར་པ་ལ། །ཚད་མེད་གུས་པའི་སྦྱོར་བ་ལས་བྱུང་བའི། །ཚོ ཐལ་མོའི་འདམ་སྐྱེས་ཟུམ་པའི་དད་ཕྱག་སྟོབ། ༦༡ །བླ་ན་ཡོད་དང་མེད་པའི་མཆོད་སྤྲིན་དང་། །ཁྱད་པར་གཞན་ཕྱིར་དམིགས་པ་ལ་གོམས་པའི། །བསླབ་གཞིའི་གཡར་དམ་སྙིང་ནས་ལེན་པ་ཡིས། །མགོན་ཁྱོད་བྱང་ཆུབ་བར་དུ་མཉེས་པར་བགྱིད། ༦༢ །ཡོངས་གྲུབ་སེམས་ཀྱི་རྡོ་རྗེའི་གཤིས་ལུགས་ལ། །གློ་བུར་དྲི་མས་ནོངས་པའི་སྒྲིབ་གཉིས་རྒྱུན། །རང་གྲོལ་རིག་པའི་གཤིས་སུ་མཉམ་བཞག་ནས། །
འགྲོ་འོང་མེད་པའི་ངང་དུ་ཡང་དག་མཐོལ། ༦༣ །འཕགས་དང་སོ་སྐྱེའི་རྣམ་དཀར་ཇི་སྙེད་དང་། །གང་གི་བསྔགས་འོས་ཡོན་ཏན་རྒྱ་མཚོའི་སྤྲིན། །གདུལ་བྱའི་བསོད་ནམས་མཁའ་ལ་ཉེར་དཀྲིགས་པར། །རྗེས་སུ་ཡི་རང་མདོངས་མཐའ་སྙིང་ནས་དགོད། ༦༩ །འགོག་བདེན་རྟག་པ་དམ་པའི་ནཱ་དའི་སྒྲ། །ལམ་བདེན་མིང་ཚིག་ཡི་གེར་འཕོས་པ་ཡིས། །འགྲོ་ཀུན་མ་རིག་གཉིད་ལས་བསླང་བགྱིད་ཕྱིར། །མཐའ་ཀླས་སྡེ་སྣོད་རྒྱལ་རྔ་བརྡུང་བར་མཛོད། ༥ །གང་ཞིག་སྐྱེ་བའི་འཇུག་པ་མ་དམིགས་ན། །དེ་ལ་འགགས་པའི་ཕ་མཐར་སུ་ཡིས་དྲང་། །དེ་ཕྱིར་འཆི་མེད་གཉུག་མའི་རྡོ་རྗེ་རུ། །བརྟན་པར་མཛོད་ཅིག་ཕྱོགས་བཅུའི་རྒྱལ་བ་ཀུན། ༦༦ །འདི་ལྟར་བསགས་ལས་གྲུབ་པའི་དགེ་ཚོགས་གང་། །དམིགས་པའི་མཚན་མ་ཕྲ་མོར་བགྱིད་མཛད་པ། །སྲས་བཅས་རྣམ་འདྲེན་ཀུན་གྱི་ཡོངས་བསྔོ་དང་། །འཇུག་པ་མཉམ་པ་ཉིད་དུ་འདྲེས་གྱུར་ཅིག ༦༧ །དེ་མཐུས་བདག་གཞན་ཡིད་ཅན་རྡུལ་སྙེད་ཀུན། །སྲིད་པའི་ཕ་མཐར་འགྲིམ་པ་དེ་སྙེད་དུ། །དལ་འབྱོར་རིན་ཆེན་སྙེ་མ་གཡུར་ཟ་བས། །དོན་གཉིས་འདོད་པ་ལྷུག་པར་འཇོ་བར་ཤོག ༦༨ །ཁྱད་པར་བཅོས་མིན་ངེས་འབྱུང་སྙིང་རྗེ་དང་། །མི་ཕྱེད་དད་པ་མཆོག་གིས་ལེགས་བསྐུལ་ཏེ། །མཚན་ཉིད་ཀུན་ལྡན་ཐེག་མཆོག་བཤེས་གཉེན་གྱི། །ཞབས་རྡུལ་གཙུག་གི་ནོར་བུར་
ཐོབ་གྱུར་ཅིག ༦༩ །ཐོག་མའི་འཇུག་སྒོ་བག་མེད་འགོག་པའི་ལམ། །ཡོན་ཏན་གཞི་རྟེན་སོ་སོར་ཐར་པ་ནི། །ཡང་དག་བླངས་ལ་ཉེས་པའི་སྐྱོན་བྲལ་ཞིང་། །དྲི་མེད་ཚུལ་ཁྲིམས་ཕུང་པོ་གོང་འཕེལ་ཤོག ༧༠ །གང་ན་སྲས་བཅས་རྒྱལ་བ་འཁྲུངས་པའི་གཞི། །སྨོན་འཇུག་བྱང་ཆུབ་སེམས་ལ་ལེགས་གོམས་པས། །ལམ་ལྔ་ས་བཅུའི་ཕ་མཐར་ཕྱིན་ནས་ཀྱང་། །བྱང་ཆུབ་སྙིང་པོ་མངོན་དུ་བརྙེས་གྱུར་ཅིག ༧༡ །ཟབ་གསང་སྨིན་བྱེད་དབང་བཞིའི་གྲུ་ཆར་གྱིས། །རང་རྒྱུད་ཞིང་ས་གཤིན་པོ་བརླན་པ་དང་། །སྤྱི་དང་ཁྱད་པར་ལྷག་པའི་དམ་ཚིག་ལ། །ཉེས་པར་སྤྱོད་པའི་གདུང་བ་ལས་བརྒལ་ཤོག ༧༢ །ཐ་མལ་སྣང་ཞེན་སྒྱུ་འཕྲུལ་དྲ་བའི་སྐུར། །རྣམ་བཞིས་བསྐྱེད་པའི་འགྲོས་ཀྱིས་བྱང་ཆུབ་པས། །ཕུང་ཁམས་སྐྱེ་མཆེད་ཡོངས་གྲུབ་བླ་མའི་ཞལ། །འདུ་འབྲལ་མེད་པའི་ངང་དུ་མཇལ་གྱུར་ཅིག ༧༣ །ཕྲ་མའི་རྩ་ཡི་འཕོ་ཆགས་རྒྱུ་དང་བཅས། །ཟག་མེད་དྷ་ཏིའི་སྦུབས་སུ་འཇུག་པ་ཡིས། །གདན་གསུམ་གྲུབ་པ་ཧེ་རུ་ཀ་ཡི་གྲོང་། །བདེ་ཆེན་ཌཱ་ཀིའི་དགའ་མས་འཁྱུད་པར་ཤོག ༧༤ །ཀོ་ཊ་ཁུ་སོགས་འགྲོ་དང་ལྡོག་པ་ཀུན། །འོད་གསལ་དབུ་མའི་དཔའ་བོར་ཕྱག་བྱས་པས། །མི་ཤིགས་རྡོ་རྗེ་ནཱ་དའི་མཁའ་དབྱིངས་སུ། །གྲགས་སྟོང་སྔགས་ཀྱི་རོལ་མོར་འཁྲོལ་གྱུར་ཅིག ༧༥ །ཆར་ཡང་འཕོ་འཛག་སྤྲོས་པ་ལས་གྲོལ་
ཏེ། །ཛ་ལནྡྷ་རའི་རྩེ་མོར་འཆིང་བ་ཡིས། །ཞུ་བདེའི་ཉམས་བརྒྱས་སྒེག་པའི་དེ་ཁོ་ནས། །རླུང་སེམས་ས་བོན་ཡོངས་སུ་བཅོམ་པར་ཤོག ༧༦ །ཁྱད་པར་ཡེ་ཤེས་སྐུ་ཅན་བླ་མ་ཡིས། །དོན་གྱི་དབང་བསྐུར་སྙིང་དབུས་བྱིན་པ་ལས། །ལྷན་སྐྱེས་ཀ་དག་བརྗོད་དུ་མེད་པའི་གཤིས། །དུས་གསུམ་དུས་མེད་ཆེན་པོར་མཇལ་གྱུར་ཅིག ༧༧ །དེ་ཚེ་སྣ་ཚོགས་རྟོག་པའི་འཕྲོ་འདུ་ཀུན། །གྲོལ་ལུགས་ཆེན་པོ་རྣམ་ལྔར་ཐིམ་པ་ལས། །ཅོག་བཞག་རྣལ་འབྱོར་བཞི་ཡི་ཉམས་ལེན་གྱིས། །གཞི་གྲོལ་གཉུག་མའི་གཏན་སྲིད་ཟིན་པར་ཤོག ༧༨ །མངོན་སུམ་ཆོས་ཉིད་མཐོང་ཞིང་གོམས་པ་ལས། །འཇའ་ཟེར་ཐིག་ལེའི་ཉམས་སྣང་གོང་འཕེལ་ཞིང་། །སྐུ་དང་ཡེ་ཤེས་རིག་པ་ཚད་ལ་ཕེབས། །ཆོས་ཀུན་ཟད་པའི་ཕ་རོལ་སོན་གྱུར་ཅིག ༧༩ །གལ་ཏེ་གོམས་པ་སྟོབས་སུ་མ་གྱུར་ན། །ནམ་ཞིག་འདིར་སྣང་ནུབ་པར་གྱུར་མ་ཐག །འཆི་བ་འོད་གསལ་དོན་གྱི་མེ་ནཱ་ཀས། །རིང་དུ་འཁྱུད་པའི་རྩེ་དགས་སྐྱོང་བར་ཤོག ༨༠ །དེ་ལས་ཆོས་ཉིད་བར་དོའི་སྣང་ཆ་ནི། །ཐིམ་ལུགས་བརྒྱད་ཀྱི་རོལ་པར་འཆར་སྲིད་ན། །ཐམས་ཅད་རིག་པའི་རྩལ་དུ་ངོ་ཤེས་པས། །མི་ཕྱེད་འདྲེས་པའི་ངལ་བསོ་སྦྱིན་གྱུར་ཅིག ༨༡ །འོན་ཀྱང་ལས་ཀྱི་གཞན་དབང་ལ་འཆེལ་བས། །རླུང་སེམས་སྒྱུ་མའི་ཕུང་པོར་གྲུབ་པའི་ཚེ། །ཁྱབ་བདག་བླ་མའི་ཐུགས་རྗེའི་ཕོ་ཉ་ཡིས། །རང་
བཞིན་སྤྲུལ་པའི་ཞིང་དུ་འཁྲིད་པར་ཤོག ༨༢ །གཞན་ཡང་རྒྱལ་བསྟན་སྤྱི་དང་ཁྱད་པར་དུ། །སྔ་འགྱུར་འོད་གསལ་རྡོ་རྗེ་སྙིང་པོ་ཡི། །བཤད་སྒྲུབ་རྒྱ་མཚོའི་གོས་ཅན་ཡོངས་ཁྱབ་པས། །འགྲོ་ཀུན་ཕན་བདེའི་དགའ་བས་སྙེམས་གྱུར་ཅིག ༨༣ །དེ་མཐུས་ཕྱི་སྣོད་འབྱུང་བའི་དཔྱིད་དཔལ་སྙོམས། །ནང་བཅུད་འགྲོ་རྣམས་དགེ་བཅུའི་སྤྱོད་པས་འཚོ། །ལྷར་བཅས་རྫོགས་ལྡན་གསར་པའི་དུས་སྟོན་ལ། །ངོམ་པ་མེད་པར་ཡོངས་སུ་སྤྱོད་པར་ཤོག ༨༤ །མདོར་ན་འགྱུར་བཅས་སྲིད་པའི་ཆོས་ཁམས་འཕོ་མེད་དབུ་མར་བསྡམས་པའི་སྐུ། །འཇུག་དང་ལྡང་བའི་རྒྱུ་བ་ཇི་སྙེད་མི་ཤིགས་ནཱ་དར་ཐིམ་པའི་གསུང་། །རྡོ་རྗེ་ནམ་མཁའི་དཀྱིལ་ལྟར་རྡུལ་བྲལ་སྐྱེ་དང་འཇིག་པ་སྤངས་པའི་ཐུགས། །རྗེ་བཙུན་བླ་མའི་རྣམ་ཐར་རྒྱ་མཚོ་འགྲོ་བ་ཀུན་གྱིས་གྲུབ་གྱུར་ཅིག ༨༥ །དེ་ལྟར་རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོ་རིག་འཛིན་གཏེར་བདག་བ གླིང་པའི་རྣམ་པར་ཐར་པ་ལ་ཅུང་ཟད་བསྔགས་པ་རྒྱལ་བ་སྲས་བཅས་དགྱེས་པའི་རྒྱུད་མང་ཞེས་བྱ་བ་འདི་ནི། སྒྱུར་བྱེད་ཀྱི་ལོའི་སྨལ་པོ་ཟླ་༡༡པའི་དཀར་པོའི་ཕྱོགས་ཀྱི་དགའ་བ་དང་པོ་དུས་ཀྱི་དགེ་མཚན་ཕུན་སུམ་ཚོགས་པའི་ཉིན། ཨོ་རྒྱན་སྨིན་གྲོལ་གླིང་ངེས་པ་དོན་གྱི་དགའ་བའི་ཚལ་ཆེན་པོའི་བླ་བྲང་ཆོས་འཁོར་ལྷུན་པོར་མགོན་པོ་གང་གི་གསང་བ་གསུམ་གྱི་བྱིན་རླབས་མཆོག་ཏུ་འབར་བའི་མཆོད་སྡོང་རིན་པོ་ཆེའི་མདུན་དུ་ཚོགས་ཀྱི་འཁོར་ལོའི་འདུ་བས་མཆོད་ཅིང་དབང་བླངས་པའི་ཚེ་ན། བཅོས་མིན་མོས་གུས་དྲག་པོས་མཚམས་སྦྱར་ཏེ་
ཆོས་གྲྭ་དེ་ཉིད་ཀྱི་འདབས་རོལ་ཏུ་རྒྱལ་ཁམས་ཉུལ་བའི་ད་རི་དྲྭ་རང་ལོ་ཉི་ཤུ་པར་གཙུག་ལག་སྨྲ་བའི་ཉི་མས་སྣང་གསལ་ཆུང་ངུ་ཞིག་གི་ངོགས་སུ་ཤར་མར་བྲིས་ཏེ་གསོལ་བ་བཏབ་པ་ལས། སླར་ཡང་ཅུང་ཟད་གསལ་བར་བགྱིས་པ་སརྦ་དཱ་ཀ་ལྱཱ་ཎཾ་བྷ་བ་ཏུ།།
འཇམ་མགོན་སྤྲུལ་པའི་སྐུ་པདྨ་དབང་རྒྱལ་རྡོ་རྗེ་ལ་གསོལ་བ་འདེབས་པ་དད་པའི་མེ་ཏོག་མངོན་པར་གཡོ་བ།
འཇམ་མགོན་སྤྲུལ་པའི་སྐུ་པདྨ་དབང་རྒྱལ་རྡོ་རྗེ་ལ་གསོལ་བ་འདེབས་པ་དད་པའི་མེ་ཏོག་མངོན་པར་གཡོ་བ་ཞེས་བྱ་བ་བཞུགས་སོ། །རྒྱ་གར་སྐད་དུ། མཉྫ་ནཱ་ཐ་ནིརྨ་ཀ་མ་ཧཱ་པཎྜི་ཏ་པདྨེནྡ་བཛེཉུདྡྷེཥཎ་ཤདྡྷ་ནི་པུཥྛ་བྷི་ཙ་ལ་ནཱ་མ། བོད་སྐད་དུ། འཇམ་མགོན་སྤྲུལ་པའི་སྐུ་པཎ་ཆེན་པདྨ་དབང་རྒྱལ་རྡོ་རྗེ་ལ་གསོལ་བ་འདེབས་པ་དད་པའི་མེ་ཏོག་མངོན་པར་གཡོ་བ་ཞེས་བྱ་བ། གསུང་གི་དབང་ཕྱུག་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དགེ་ལེགས་ཡོན་ཏན་བྱེ་བའི་གཞིར་གྱུར་འདུལ་བ་གསུམ་གྱི་ཚུལ་ཁྲིམས་དང་། །ཏིང་འཛིན་ཤེས་རབ་ཆ་བཅས་ཡོངས་རྫོགས་སྲིད་ཞིའི་ཕ་མཐའ་ལས་བརྒལ་བཞིན། །ཀུན་གཟིགས་ཡེ་ཤེས་སྣང་བ་རྨད་བྱུང་འཇིག་རྟེན་གསུམ་གྱི་མགོན་གཅིག་པུ། །འཇམ་མགོན་པདྨ་དབང་གི་རྒྱལ་པོས་བྱང་ཆུབ་བར་དུ་བྱིན་གྱིས་རློབས། ༡ །རྟག་ཏུ་གཞན་ཕན་སྙིང་རྗེའི་དབང་པོ་སྤྲུལ་པའི་རྣམ་འཕྲུལ་མཐའ་ཡས་ཀྱང་། །གངས་ཅན་ལྗོངས་འདིར་ལྷག་པར་ཆགས་པའི་ཐུགས་བསྐྱེད་ཕྲིན་ལས་རྨད་བྱུང་བས། །རྒྱལ་བའི་མྱུ་གུ་དུ་མའི་གར་གྱིས་ཕན་བདེའི་ཤིང་རྟ་གཅིག་གྱུར་པ། །འཇམ་མགོན་པདྨ་དབང་གི་རྒྱལ་པོས་བྱང་ཆུབ་བར་དུ་བྱིན་གྱིས་
རློབས། ༢ །ཁྱད་པར་མངའ་རིའི་ལྷོ་རྒྱུད་ས་གཞིར་ཤཱཀྱའི་རིགས་སུ་ཡོངས་གྲགས་པའི། །གངས་ཁྲོད་རྡོར་འཛིན་བྱེ་བའི་གཙུག་རྒྱན་གྲུབ་པ་མཆོག་གི་ཐིག་ལེ་རུ། །བསམས་བཞིན་སྲིད་པ་བཟུང་བའི་མོད་ནས་འཕགས་དང་མཁས་པས་ཕྱག་བྱས་པའི། །འཇམ་མགོན་པདྨ་དབང་གི་རྒྱལ་པོས་བྱང་ཆུབ་བར་དུ་བྱིན༔ ༣ །རང་དང་གཞན་དོན་ཕན་པ་ཆེར་བསྔགས་ཚུལ་ཁྲིམས་ཡོངས་སུ་དག་པས་བཙུན། །ཕྱི་ནང་རིག་གཞུང་གསན་བསམ་སྒོམ་ལ་འགྲན་པའི་ཟླ་གཞན་དབེན་ཞིང་མཁས། །རླབས་ཆེན་བསྟན་འགྲོར་སྨན་པའི་ལེགས་མཛད་བཟང་པོའི་ཕྲིན་ལས་མཁའ་ཁྱབ་པ། །འཇམ་མགོན་པདྨ་དབང་གི་རྒྱལ་པོས་བྱང་ཆུབ་བར་དུ་བྱིན ༤ །རིས་མེད་ཆོས་སྒོ་མཐའ་ཡས་འཆད་ཚེ་མ་ཕམ་གཉིས་པའི་དགེ་བའི་བཤེས། །སྒྲུབ་དང་སུན་འབྱིན་ཚེར་མ་དབྱུང་ལ་ཆོས་ཀྱི་གྲགས་པའི་རྩོད་ངག་ཅན། །དོན་ལྡན་ལེགས་བཤད་རྩོམ་པའི་ཕྲེང་བ་ཤིང་རྟ་ཆེན་པོའི་རྗེས་འགྲོ་བའི། །འཇམ་མགོན་པདྨ་དབང་གི་རྒྱལ་པོས་བྱང་ཆུབ་བར་དུ ༥ །ཇི་ལྟ་ཇི་སྙེད་མཁྱེན་པའི་ཡེ་ཤེས་འཇམ་དཔལ་གཞོན་ནུ་མངོན་སུམ་བཞིན། ། དམིགས་མེད་སྙིང་བརྩེའི་གཞན་དབང་ལ་ཆགས་འཇིག་རྟེན་དབང་ཕྱུག་གཟུགས་ཀྱི་ཟླ། །ནུས་པས་ཡིད་སྲུབས་དཔུང་བཅས་མཐར་མཛད་གསང་བ་འཛིན་པའི་སྙེམས་འཆང་བའི། །འཇམ་མགོན་པདྨ་དབང་
གི་རྒྱལ་པོས་བྱང་ཆུབ་བར་དུ༴ ༦ །རྟག་ཏུ་ཆོས་བརྒྱད་འཆིང་བ་ལས་གྲོལ་སྤོང་དང་དབེན་པ་ལྷུར་ལེན་བཞིན། །ཡོངས་རྫོགས་བསྟན་པ་རྒྱ་མཚོའི་རིང་ལུགས་འཆད་དང་བསླབ་དང་སྒྲུབ་པ་དང་། །གྲུབ་པ་། མཆོག་གི་རྣམ་ཐར་ཕུལ་བྱུང་རྒྱལ་བ་དགྱེས་པའི་ངོ་མཚར་ཅན། །འཇམ་མགོན་པདྨ་དབང་གི་རྒྱལ་པོས་བྱང་ཆུབ་བར་དུ༔ ༧ །རྡོ་རྗེའི་གནས་ཡུལ་ཀུན་ཏུ་སྤྱོད་ཅིང་རྩ་གསུམ་འཁོར་ལོས་རྗེས་སུ་བཟུང་། །སྔོན་སྨོན་ཆེན་པོས་ཟབ་གཏེར་མཛོད་བརྙེས་སྔ་འགྱུར་མཆོག་གི་རིང་ལུགས་ལ། །བཤད་སྒྲུབ་ལས་གསུམ་མཛད་པའི་རྒྱུན་བཟང་དུས་ཀྱི་མཐར་ཡང་ནུབ་མེད་པ། །འཇམ་མགོན་པདྨ་དབང་གི་རྒྱལ་པོས་བྱང་ཆུབ་བར་དུ༔ ༨ །མདོར་ན་སྲས་བཅས་རྒྱལ་བ་ཀུན་དང་ཡོན་ཏན་རྣམ་དབྱེར་མི་ཕྱེད་པས། །ཐུབ་བསྟན་ནོར་བུའི་ཁྲི་ལ་དབང་སྒྱུར་སྟོན་པ་གཉིས་པའི་དགེ་མཚན་གྱིས། །བསྟན་འཛིན་བྱེ་བའི་དབུས་ན་མངོན་མཐོ་སྐྱབས་ཀུན་འདུས་པའི་ངོ་བོ་ཉིད། །འཇམ་མགོན་པདྨ་དབང་གི་རྒྱལ་པོས་བྱང་ཆུབ་བར་དུ༴ ༩ །དེ་ལྟར་སྙིང་ནས་དད་གསུམ་བདུད་རྩིས་གུས་པའི་མེ་ཏོག་བསྐྱེད་བསྲིངས་པ། །གསོལ་འདེབས་ཚིག་གིས་མངོན་པར་འཐོར་བའི་བསོད་ནམས་ནོར་བུའི་སྤྲིན་གཡོ་བས། །མགོན་ཁྱོད་ཡེ་ཤེས་གཟིགས་པའི་འབབས་སྟེགས་མཛེས་པར་བསྟར་བའི་ལེགས་བྱས་ལ། །ཐུགས་རྗེའི་འཇུག་པས་ལྷག་པར་
དགོངས་ཏེ་བྱང་ཆུབ་བར་དུ་བྱིན༴ ༡༠ །སྟོང་གསལ་རང་རིག་འདུས་མ་བྱས་པ་གཞི་དབྱིངས་རང་བཞིན་རྫོགས་པ་ཆེ། །སྤངས་རྟོགས་སེམས་ཀྱི་ཕུལ་དུ་སོན་པ་འབྲས་བུའི་མཐར་ཐུག་ལམ་བྱེད་པའི། །བླ་མེད་རྡོ་རྗེ་ཐེག་པའི་ཡན་ལག་བྱང་སེམས་སོ་སོར་ཐར་དང་བཅས། །འཆད་དང་བསླབ་པའི་ཚུལ་དུ་ཤེས་ནས་ཚུལ་བཞིན་འཇུག་པར་བྱིན༴ ༡༡ །ངེས་པར་འབྱུང་བའི་ཚུལ་ཁྲིམས་རབ་བཟུང་སྤོང་བདུན་འཁོར་འདས་ལས་ལྡོག་ཅིང་། །བསླབ་ཚུལ་ཆོས་རྣམས་དག་པར་ཡོངས་སྦྱོང་བདེ་བར་གནས་པའི་སྤྱོད་པས་མཛེས། །ལྟུང་དང་རྩོད་པའི་གདུང་བ་བསྙིལ་ཞིང་ཏིང་ངེ་འཛིན་དང་ཤེས་རབ་ཀྱིས། །ཉོན་མོངས་བདག་ལྟའི་རྒུད་པ་ཀུན་ཞི་ཡོན་ཏན་རྒྱས་པར་བྱིན༴ ༡༢ །གཞན་གྱི་དོན་དུ་སངས་རྒྱས་བསྒྲུབ་ཕྱིར་སྒོ་གསུམ་ཉེས་སྤྱོད་ཆ་བཅས་སྤོང་། །ཕར་ཕྱིན་དྲུག་གིས་དགེ་ཆོས་སྡུད་པས་རྒྱལ་སྲས་སྤྱོད་བ ཡུལ་རྒྱ་མཚོར་འཇུག །བསྡུ་དངོས་རྣམ་བཞིས་གཞན་དོན་སྤྱོད་ལ་ཁ་ན་མ་ཐོ་རིང་དབེན་པས། །ལམ་ལྔ་ས་བཅུའི་སྤངས་རྟོགས་རབ་རྫོགས་དོན་གཉིས་འགྲུབ་པར་བྱིན༴ ༡༣ །རྒྱུད་སྡེ་རྣམ་བཞིའི་དཔང་གིས་སྨིན་ཅིང་ཞེན་རྟོགས་ཐབས་ཤེས་ཕྱག་རྒྱར་སྡོམ། །རྩ་བ་ཡན་ལག་དམ་ཚིག་རྣམ་དག་མཚན་བཅས་མཚན་མེད་རྣལ་འབྱོར་དང་། །བསྐྱེད་དང་རྫོགས་པའི་ལམ་བཟང་ལ་བརྟེན་ཐུན་མོང་མཆོག་གི་རིག་འཛིན་
གྱིས། །སྐུ་དང་ཡེ་ཤེས་ཕྲིན་ལས་རྨད་བྱུང་ཚེ་འདིར་ཐོབ་པར༴ ༡༤ །མདོར་ན་སྡོམ་གསུམ་རང་ལྡོག་མ་འདྲེས་དགག་དགོས་ཡོངས་རྫོགས་ངོ་བོ་ཉིད། །གནས་འགྱུར་གྱིས་བཟུང་ཡོན་ཏན་ཡར་ལྡན་འགལ་མེད་དུས་སྐབས་གཙོར་སྤྱོད་པའི། །ཐེག་མཆོག་བཤེས་གཉེན་འབུམ་ཕྲག་འདུ་བས་བཤད་སྒྲུབ་བསྟན་པ་རྒྱས་པ་དང་། །འཇིག་རྟེན་ཕན་བདེའི་སྣང་བས་མཛེས་པའི་དགེ་མཚན་འགྲུབ་པར་བྱིན་གྱིས་རློབས། ༡༥ ། དེ་ལྟར་འཇམ་མགོན་ཚངས་པ་ལྷའི་མེ་ཏོག་གི་འབྲས་བུ་མཐར་ཕྱིན་པའི་མཆོག་གི་སྤྲུལ་པའི་སྐུ་མངའ་རི་མ་ཧཱ་པཎྜི་ཏ་པདྨ་དབང་རྒྱལ་རྡོ་རྗེ་གྲགས་པ་རྒྱལ་མཚན་དཔལ་བཟང་པོའི་རྨད་དུ་བྱུང་བའི་རྣམ་པར་ཐར་པ་ཕྱོགས་གཅིག་ཏུ་བསྔགས་པའི་སྒོ་ནས་གསོལ་བ་འདེབས་པ་དང་། སྡོམ་གསུམ་རྣམ་པར་ངེས་པའི་བསྟན་བཅོས་ཀྱི་ལུས་ཡོངས་རྫོགས་བརྗོད་བྱར་འབྲེལ་བའི་སྨོན་ལམ་དང་བཅས་པ་འདིའང་། ས་བཅུའི་དབང་ཕྱུག་ལྷ་སྲས་ཆོས་ཀྱི་བློ་གྲོས་བསམས་བཞིན་དུ་སྲིད་པ་ཉེ་བར་བཟུང་བ་སྤྲུལ་པའི་གཏེར་འབྱིན་རྒྱ་མཚོའི་འཁོར་ལོས་སྒྱུར་བ་ཨོ་རྒྱན་མཆོག་གྱུར་བདེ་ཆེན་གླིང་པས་སྔ་འགྱུར་བསྟན་པ་གཉིས་ལྡན་གྱི་བཤད་སྒྲུབ་འཁྲུལ་པ་མེད་པའི་ལམ་སྲོལ་གསར་དུ་བྱེ་བའི་དགོངས་བཞེད་མཐར་ཕྱིན་པའི་རྟེན་འབྱུང་དུ། དགེ་སློང་དགེ་བའི་བཤེས་གཉེན་སྡེ་སྣོད་འཛིན་པ་པདྨ་མ་ཏིས་རྗེས་སུ་བསྐུལ་བས་མཚམས་སྦྱར་ཏེ། །རིག་པ་སྨྲ་བའི་གཟུགས་བརྙན་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རབ་ཡིད་ལྕགས་སྤྲེལ་ལོའི་རྒྱལ་ཟླ་བའི་དཀར་ཕྱོགས་ཀྱི་རྒྱལ་བ་གཉིས་པར་བསམ་པ་དག་ཅིང་སྦྱོར་བ་གུས་པས་བྲིས་ཏེ་གསོལ་བ་བཏབ་པ་དགེ་ལེགས་འཕེལ། །
རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལ་བསྟོད་པ་གྲུབ་གཉིས་མཆོག་སྦྱིན།
རྒྱ་གར་སྐད་དུ། བཛྲ་དྷཱ་ར་མེ་ཏྲི་ཏཱ་ནནྡ་ཤཱ་ས་ན་དྷཱ་རེ་སྟུ་ཏི་དཱི་སིདྡྷ་ཤྲཱི་དཱ་ནཱ་མ། བོད་སྐད་དུ། རྡོ་རྗེ་འཆང་བྱམས་པ་ཀུན་དགའ་བསྟན་འཛིན་ལ་བསྟོད་པ་གྲུབ་གཉིས་མཆོག་སྦྱིན་ཅེས་བྱ་བ། ངག་གི་དབང་ཕྱུག་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྣམ་ཀུན་མཆོག་ལྡན་ཡེ་ཤེས་སྐུ་ནི་མཚན་དཔེའི་མཚར་སྡུག་རྫོགས་པས་མཛེས། །མི་ཤིགས་བདེ་ཆེན་ནཱ་དའི་གསུང་ནི་སྤངས་རྟོགས་རོལ་མོར་འཆར་བས་སྙན། སྤྲོས་པའི་མཐའ་ལས་རྣམ་གྲོལ་ཐུགས་ནི་མཁྱེན་དང་བརྩེ་བའི་སྙིང་པོ་ཅན། །རྡོ་རྗེ་འཆང་དངོས་འཁོར་ལོའི་མགོན་པོས་བྱང་ཆུབ་བར་དུ་ཐུགས་རྗེས་ཟུངས། ༡ །གང་ཞིག་ཐོག་མཐའི་འཇུག་སྒོ་གཅིག་གྱུར་ཡོན་ཏན་རིན་ཆེན་ཕྲག་བརྒྱའི་གཞི། །ངེས་པར་འབྱུང་བའི་དཔྱིད་ཀས་ཡོངས་བཟུང་ཚུལ་ཁྲིམས་ཕུང་པོའི་མནྡ་ར། །རྣམ་གྲོལ་བཀྲ་ཤིས་དུ་མ་དང་བཅས་ལྔར་བཅས་ཀུན་དགའི་ངལ་འཚོའི་དཔྱིད། །རྡོ་རྗེ་འཆང་དངོས་འཁོར་ལོའི་མགོན་པོས ༢ །གཞན་ཕྱིར་ཡུན་རིང་དུ་གནས་གོམས་པའི་བྱམས་པ་ཆེན་པོའི་ཟླ་ཤེལ་ནི། །སྙིང་རྗེའི་ཤེལ་གྱི་དུ་བས་བསྡམས་ལ་བྱང་ཆུབ་སེམས་ཀྱི་འོད་རིས་ཅན། །ཐེག་པ་ཆེན་པོའི་འཆི་མེད་ལམ་དུ་སྐུ་དང་ཡེ་ཤེས་ངལ་འཚོ་མཁན། །རྡོ་རྗེ་འཆང་དངོས༴ ༣ །མང་དུ་ཐོས་པའི་ཕ་རོལ་སོན་ཕྱིར་དབྱིག་གཉེན་ས་འདིར་འོང་བ་བཞིན། །དེ་དོན་བསམ་པའི་སྒྲོ་འདོགས་ལེགས་
ཆོད་ཆོས་ཀྱི་གྲགས་པའི་རྣམ་དཔྱོད་ཅན། །ཚེ་གཅིག་བསྒོམས་པས་གྲུབ་པའི་ས་བརྙེས་རྣལ་འབྱོར་དབང་ཕྱུག་གཟུགས་ཀྱི་ཟླ། །རྡོ་རྗེ་འཆང་དངོས༴ ༤ །འཆད་མཁས་དཔྱོད་ལྡན་རྣ་བར་ལྷུང་བས་ཡིད་ཀྱི་བརྟན་པ་དབང་མེད་འཕྲོག །རྩོད་པས་ཕས་རྒོལ་བྲག་རི་བསྙིལ་ལ་རྡོ་རྗེ་གཟེགས་མའི་མཚོན་འཆང་ཞིང་། །རྩོམ་ཚེ་སྡེབ་ལེགས་ཚིག་དང་དོན་བཅས་བློ་ལྡན་དགྱེས་པའི་མཆོད་སྤྲིན་ཅན། །རྡོ་རྗེ་འཆང་དངོས༴ ༥ ། འཇམ་མགོན་མཁྱེན་པའི་ཉི་གཞོན་གཡོ་བས་བློ་གྲོས་ཨུཏྤལ་རབ་ཏུ་རྒྱས། །ཕྱག་ན་པདྨོའི་བརྩེ་ཆེན་བདུད་རྩིས་ཡིད་ཅན་ཀུན་གྱི་སྨན་གཅིག་པུ། །གསང་འཛིན་ནུས་པའི་འཛུམ་དཀར་གསར་པས་སྲིད་ཞིའི་རྒུད་པ་ཀུན་སྲུང་བ། །རྡོ་རྗེ་འཆང་དངོས ༦ །དཀྱིལ་འཁོར་རྣམ་བཞིའི་མཐོ་རིས་ལས་འོངས་དབང་བཞིའི་གངྒཱའི་རྒྱུན་བཟང་པོས། །སྒྲིབ་པ་རྣམ་བཞིའི་ཚ་གདུང་ཀུན་བཅིལ་སྐུ་བཞིའི་ངལ་འཚོ་ལ་རོལ་བ ཞིང་། །དམ་ཚིག་སྡོམ་པའི་ལང་ཚོ་མཛེས་པས་རྒྱལ་བ་དགྱེས་པའི་རྣམ་ཐར་ཅན། །རྡོ་རྗེ་འཆང་དངོས༴ ༧ གསལ་སྟོང་ཟུང་འཇུག་ལྷན་ཅིག་སྐྱེས་པའི་གནས་ལུགས་མངོན་སུམ་གཟིགས་པ་ལས། །ཆོས་ཀུན་སེམས་ཉིད་སྒྱུ་མའི་རྣམ་རོལ་རྟེན་འབྱུང་བསམ་བརྗོད་བྲལ་བའི་གཤིས། །རྒྱུ་ལམ་འབྲས་གསུམ་འཁོར་འདས་དབྱེར་མེད་ངེས་དོན་དགོངས་པར་དབང་འབྱོར་པས། །རྡོ་རྗེ་འཆང་༴ ༨ ཐ་མལ་སྣོད་
བཅུད་སྣང་བའི་ལྕགས་ཁམས་ལམ་བྱེད་རྣམ་བཞིའི་གསེར་འགྱུར་རྩིས། །རེག་པས་རྟེན་དང་བརྟེན་པར་བཅས་པའི་དཀྱིལ་འཁོར་འཁོར་ལོའི་མཚར་སྡུག་ཏུ། །ཡོངས་ཤར་ཐུན་མོང་གྲུབ་པའི་ཉམས་བརྒྱས་ཕན་བདེའི་དགའ་སྟོན་མགྲོན་གཉེར་བས། །རྡོ་རྗེ་འཆང་དངོས༴ ཕུང་ཁམས་སྐྱེ་མཆེད་རྡོ་རྗེའི་གྲོང་ཁྱེར་གདན་གསུམ་ཚང་བའི་ལྷར་ཤེས་ཤིང་། །རྩ་ཡིག་བདུད་རྩི་རླུང་གི་དཀྱིལ་འཁོར་སྐུ་བཞིའི་ངོ་བོར་བྱང་ཆུབ་པས། །ཟབ་གསལ་གཉིས་མེད་ཡེ་ཤེས་མཆོག་གིས་སྣང་སྟོང་ཟུང་འཇུག་དཔལ་སྟེར་བ། །རྡོ་རྗེ་འཆང་དངོས༴ ༡༠ །སྦྱོར་བ་རྣམ་བདུན་ཆོ་གས་བཅིངས་པས་ལས་རླུང་དབུ་མའི་དབྱིངས་ཐིམ་ཞིང་། །ཟླ་བ་མེད་པ་སྒྲ་གཅན་གྲངས་ཀྱིས་རབ་སྒེག་གཏུམ་མོའི་མེ་ལྕེའི་རེག་བྱ་ཡིས། །ཧཾ་ཡིག་བདུད་རྩིར་བཞུ་བའི་བྱེད་པས་རང་བྱུང་ཡེ་ཤེས་མངོན་གྱུར་པའི། །རྡོ་རྗེ་འཆང་དངོས ༡༡ །ལུས་ངག་རྦ་རླབས་སྦྱོར་བ་ལེགས་སྦྱངས་པདྨ་ཅན་དང་ལྷན་ཅིག་ཏུ། །རྦ་རླབས་མཆོག་གི་བྱེད་པ་ལ་བརྟེན་གཟུང་འཛིན་དབུ་མར་ཐིམ་པ་ལས། །རྣམ་ཀུན་ཡེ་ཤེས་ཆེན་པོར་བྱང་ཆུབ་སྙིང་པོའི་དཔལ་འཛིན་པ། །རྡོ་རྗེ་འཆང་དངོས་འཁོར་ལོའི་མགོན་པོས་བྱང་ཆུབ་བར་དུ་ཐུགས་རྗེས་ཟུངས། ༡༢ །མཛད་འཕྲོ་ལུས།
རྒྱལ་བའི་མྱུ་གུ་ཆོས་ཀྱི་དབང་པོ་རྗེས་སུ་དྲན་པའི་ངག་གི་ཕྲེང་བ་བཀྲ་ཤིས་བིཝའི་ལྗོན་བཟང་ཀུན་ཏུ་དགའ་བའི་ཚལ།
རྒྱལ་བའི་མྱུ་གུ་ཆོས་ཀྱི་དབང་པོ་རྗེས་སུ་དྲན་པའི་ངག་གི་ཕྲེང་བ་བཀྲ་ཤིས་བིཝའི་ལྗོན་བཟང་ཀུན་ཏུ་དགའ་བའི་ཚལ་ཅེས་བྱ་བ་བཞུགས་སོ། །རྒྱ་གར་སྐད་དུ། ཛ་ཡཱངྒཱ་ར་དྷརྨེནྡྲ་སཱུ་ཏི། བོད་སྐད་དུ། རྒྱལ་བའི་མྱུ་གུ་ཆོས་ཀྱི་དབང་པོ་ལ་བསྟོད་པ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཨོ་རྒྱན་མཚོ་སྐྱེས་རྡོ་རྗེའི་རིང་ལུགས་འཆད་དང་སྒྲུབ་པས་འཛིན་པ་ལ། །འཇིགས་མེད་སྨྲ་བའི་སེང་གེ་ཉིད་ཅེས་འཇིག་རྟེན་ཀུན་ཏུ་གྲགས་འབར་བ། །ཆོས་ཀྱི་དབང་པོ་དཔལ་ལྡན་བླ་མའི་ཞབས་སེན་ཉིན་མོར་བྱེད་པའི་གཟིས། །བྱང་ཆུབ་བར་དུ་ཤིས་པའི་སྣང་བས་རྟག་ཏུ་དགེ་ལེགས་མཛད་གྱུར་ཅིག ༡ །གང་ཚེ་ཤེས་དང་ཤེས་བྱ་རོ་གཅིག་གདོད་མའི་དབྱིངས་སུ་བྱང་ཆུབ་ཀྱང་། །དམིགས་མེད་སྙིང་རྗེའི་རྫོགས་ལྡན་སྤྲིན་ཆེན་རྒྱས་པར་དཀྲིགས་པའི་འཛུམ་དཀར་ལས། །མཆོག་གི་སྤྲུལ་སྐུའི་སྒྱུ་འཕྲུལ་རོལ་མོས་ཡིད་ཅན་འདོད་པ་འཇོ་བའི་ཕུལ། །རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་རྗེས་སུ་ཟུངས། ༢ །མཚན་དཔེའི་ཟླ་བ་བདུད་རྩིའི་འོད་ཅན་ཐོག་མར་འཆར་དང་ལྷན་ཅིག་པར། །རིག་དང་བརྩེ་སོགས་སྣང་ཆེན་དཀར་པོས་དཔྱོད་ལྡན་ཡིད་ཀྱི་ཀུ་མུ་དཱ། །ཅི་དགར་བཞད་པའི་ངལ་འཚོ་སྟེར་ལས་བསྔགས་པའི་ཆུ་གཏེར་འབུམ་གཡོ་བ། །རྒྱལ་བའི་མྱུ་གུ་ཆོས་ཀྱི་དབང་པོས ༣ །ཚུལ་གནས་ཁྲིམས་ཀྱི་མཐོ་རིས་ཚལ་དུ་མང་པོར་གསན་པའི་ཡོངས་འདུས་དབང་། །ཇི་བཞིན་བསམ་པའི་མེ་ཏོག་མཛེས་འབར་སྒོམ་བྱུང་ཤེས་རབ་འབྲས་དུད་པས། །འཕགས་དང་མཁས་མང་
བློ་མཆོག་ཟུར་མིག་ཕྱོགས་དེར་གཅིག་ཅར་ལྷུང་གྱུར་པ། །རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ༔ ༤ །ཆོས་བརྒྱད་འཁྲུལ་པའི་རྫུན་རིས་མ་ལུས་འོད་གསལ་ཞི་བའི་དབྱིངས་སུ་སིམ། །ཆོས་བཞིན་སྤྱོད་ཕྱིར་དབེན་པའི་རི་སུལ་ལྷ་ཡི་ཁང་བཟང་བཞིན་བསྟེན་ནས། །ཆོས་ཀྱི་སྙིང་པོ་ཐེག་ཆེན་ལམ་ལ་རྩེ་གཅིག་སྒྲུབ་པ་ལྷུར་བཞེས་པའི། །རྒྱལ་བའི་མྱུ་གུ༴ ༥ །གཟོད་ནས་རྣམ་གྲོལ་ཡེ་ཤེས་བརྙེས་༩qཀྱང་ཚོགས་ཟུང་བྱེ་བས་རྒྱུད་སྦྱངས་ཏེ། །ཟག་མེད་སྦྱོར་བའི་འབྲས་བུ་ལས་སྐྱེས་བདེན་པ་མངོན་སུམ་ཉིད་མཐོང་ཕྱིར། །སྤོབས་པའི་གཏེར་མཛོད་མཐའ་ཀླས་འཇོ་སྒེག་འཕགས་བཞིའི་དབུས་སུ་ཆེས་རྔམས་པ། །རྒྱལ་བའི་མྱུ་གུ ༦ །ཤིང་རྟ་ཆེན་པོའི་ལམ་སྲོལ་འཆད་ལ་དགོས་པའི་དོན་གྱིས་མདུན་བསུས་ཏེ། །བསྡུས་དོན་ཚོམས་སུ་ལེགས་པར་བཅད་ཅིང་ཚིག་གི་སྦྱོར་བ་སྙན་འཇེབས་ཀྱིས། །སྔ་ཕྱིའི་མཚམས་སྦྱོར་བརྒལ་ལན་དང་བཅས་མ་ཕམ་དགྱེས་པའི་གཟུགས་གཞན་པ། །རྒྱལ་བའི་མྱུ་གུ༴ ༧ །གཞལ་བྱ་མངོན་སུམ་མངོན་སུམ་མིན་དང་ཤིན་ཏུ་ལྐོག་གྱུར་ཇི་སྙེད་པ། །ཚད་མ་གསུམ་གྱིས་གཏན་ལ་ཕབ་ནས་དངོས་སྟོབས་རིག་པའི་མཚོན་རྣོན་པོས། །ཕས་རྒོལ་བརྟན་པ་གཅིག་ཅར་འཕྲོག་མཁས་ཆོས་ཀྱི་གྲགས་པའི་རྗེས་འགྲོ་བ། །རྒྱལ་བའི་མྱུ་གུ ༨ །ཚིག་སྙན་རྒྱན་གསུམ་ལམ་ལས་དྲངས་ཤིང་སྡེབ་ལེགས་སྦྱོར་
བ་འབུམ་གྱིས་བཅིངས། །དོན་བཟང་རིན་ཆེན་ཐང་མར་བརྡལ་བས་དཔྱོད་ཤེས་ཡིད་ཀྱི་འདོད་རྒུ་འཇོ། །ཐུབ་བསྟན་སྲོག་ཤིང་བསྐལ་བརྒྱར་བརྟན་མཛད་ལེགས་བཤད་རྩོམ་ལ་དཔའ་བོའི་ཞབས། །རྒྱལ་བའི་མྱུ་གུ ་༩ །མཁྱེན་པས་ཤེས་དང་ཤེས་བྱ་ཀུན་གཟིགས་འཇམ་དཔལ་གཞོན་ནུའི་རྗེས་སུ་འགྲོ། །བརྩེ་བས་སེམས་ཅན་ཁམས་ཀུན་ཁྱབ་འཇུག་ཕྱག་ན་པདྨོའི་གཟུགས་ཀྱི་ཟླ། །ནུས་པས་ཡིད་སྲུབས་སྡེར་བཅས་སྙིལ་མཛད་གསང་བའི་བདག་པོའི་སྙེམས་འཆང་བ། །རྒྱལ་བའི་མྱུ་གུ༴ ༡༠ །མདོར་ན་སྲས་བཅས་རྣམ་འདྲེན་ཡོངས་ཀྱི་ཡེ་ཤེས་སྒྱུ་འཕྲུལ་དྲྭ་བའི་ཚུལ། །རྣམ་པ་ཉི་ཤུས་མངོན་པར་བྱང་ཆུབ་སྙིང་རྗེ་ཆེན་པོའི་ལུས་བཟུང་སྟེ། །སྙིགས་མའི་མཐར་ཡང་ཀུན་མཁྱེན་གཉིས་པའི་ཕྲིན་ལས་ས་གསུམ་རྒྱས་མཛད་པ། །རྒྱལ་བའི་མྱུ་གུ ༡༡ །དེ་ལྟར་ངག་གི་ནོར་བུའི་རྒྱུད་མང་དད་གསུམ་སོར་མོས་བསྒྲེངས་དང་བཅས། །རྣམ་ཀུན་གུས་པས་ཁྱོད་ཉིད་འབོད་ན་མཐའ་ཡས་འགྲོ་བའི་གཉེན་གཅིག་པུ། །ཅི་སླད་བདག་ལ་ཐུགས་བརྩེར་མི་མཛད་ཏིང་འཛིན་རྫུ་འཕྲུལ་མཐའ་ཡས་གཏེར། །རྒྱལ་བའི་མྱུ་གུ༴ ༡༢ །ཨེ་མ་འཕགས་ཁྱོད་བྱིན་རླབས་བདུད་རྩིས་ཡང་ཡང་ཡིད་ལ་བཤེས་བྱས་པས། །སྲིད་ལས་ངེས་འབྱུང་ཨུཏྤལ་ནགས་ཀླུང་ཐར་པའི་ཕྱོགས་སུ་རབ་གྲོལ་བར། །དད་སོགས་འཕགས་ནོར་འབྲས་བུའི་ཁུར་གྱིས་ཤིན་ཏུ་
ལྕི་དང་ལྷན་ཅིག་པར། །རྒྱལ་བའི་མྱུ་གུ༴ ༡༣ །ཇི་ལྟར་ཁས་བླངས་ཁྲིམས་ཀྱིས་རྒྱུད་སྦྱངས་དབེན་པའི་བྲག་རིའི་ཁང་བཟང་དུ། །མང་ཐོས་བསམ་པས་གཏན་ལ་ཕབ་ཅིང་རྩེ་གཅིག་མཉམ་པར་བཞག་པ་ལས། །ལུས་སེམས་ཤིན་སྦྱང་བདེ་བས་རབ་བརླན་ཤེས་རབ་ཟབ་མོའི་གཟུངས་ཐོབ་བཞིན། །རྒྱལ་བའི་མྱུ་གུ ༡༤ །སྙིང་རྗེ་ཆེན་པོའི་མ་མས་རབ་བསྐྱེད་ཕར་ཕྱིན་དྲུག་གི་མཆོད་སྦྱིན་ཅན། །བསྡུ་དངོས་བཞི་ཡི་ཚངས་སྐུད་འཁྲིལ་ཆགས་འཕགས་རྣམས་དགྱེས་པའི་དྲང་སྲོང་ཆེའི། །སྤྱོད་ཚུལ་ནམ་ཡང་མཚུངས་པ་སྤངས་པས་འཇིག་རྟེན་དགེ་བའི་མཐུ་ཐོབ་བཞིན། །རྒྱལ་བའི་མྱུ་གུ༴ ༡༥ །སྙིང་ནི་བདེ་སྟོང་བདུད་རྩིས་རོས་སིམ་སྣང་སྤྱོད་ཐམས་ཅད་ལྷ་སྐུར་ཤར། །སྲོག་རྩོལ་དྷཱ་ཏིའི་ཕྱག་རྒྱར་དབང་བྱས་གཞོམ་མེད་འོད་གསལ་ཐིག་ལེ་ཆེར། །རྡོ་རྗེ་གསུམ་གྱི་དགའ་བས་སྙེམས་གྱུར་རིག་འཛིན་ཚོགས་དང་ལྷན་ཅིག་སེ ཏུ། །རྒྱལ་བའི་མྱུ་གུ ༡༦ །གནས་སྐབས་ཆོས་བཞིན་སྤྱོད་པའི་འགལ་ཟླ་ཡིད་སྲུབས་རྒྱུར་བཅས་མཚོན་རྣོན་པོ། །དབང་གཞུ་སར་པའི་རྗེས་སུ་སོན་པས་མཐུན་པའི་རྐྱེན་ཀུན་ཕུན་ཚོགས་ཏེ། །ཕན་དང་བདེ་བའི་ལེགས་བྱས་ཇི་སྙེད་ཉིན་རེ་ཞིང་ཡང་འཕེལ་བཞིན་དུ། །རྒྱལ་བའི་མྱུ་གུ་ཆོས་ཀྱི་དབང་པོས་བྱང་ཆུབ་བར་དུ་ཐུགས་རྗེས་ཟུངས། །མདོར་ན་རྒྱལ་བའི་མྱུ་གུའི་ཁྱུ་མཆོག་ཆོས་ཀྱི་དབང་པོའི་གསང་
གསུམ་དང་། །རྣམ་དཀར་མཛད་པའི་ངོ་མཚར་མ་ལུས་འགྲོ་ཀུན་སྙིང་ལ་རྫོགས་གྱུར་པས། །སྲིད་དང་ཞི་བའི་ཕ་མཐར་མི་གནས་དགེ་མཚན་བྱེ་བའི་མནྡཱ་རས། །དེང་ནས་བཟུང་སྟེ་འཇིག་རྟེན་གསུམ་ན་རྟག་ཏུ་བཀྲ་ཤིས་སྣང་གྱུར་ཅིག ༡༨ །འདི་ལྟར་འཕགས་པ་དང་མཁས་པ་དང་སོ་སོ་སྐྱེ་བོ་རྣམ་ཤེས་ཤིན་ཏུ་ལྐོག་ཏུ་གྱུར་པ་དག་གིས་ཀྱང་ཨེ་མ་རྒྱལ་བའི་སྲས་ཆེན་པོའི་ཞེས་བསྔགས་པའི་མེ་ཏོག་ཕྱོགས་བརྒྱར་འགྲེམས་པ། མགོན་པོ་ཞི་བ་ལྷ་དང་དབྱེར་མི་ཕྱེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་བསྔགས་པའི་ཚིག་གི་སྦྱོར་བ་གྱིས་ཞེས། འཕགས་བཞིའི་རིགས་ལ་ཡང་དག་པར་གནས་པའི་དྲང་སྲོང་ཆེན་པོའི་བརྟུལ་ཞུགས་ཅན་བི་ཛ་ཡ་དྷརྨ་བྷ་དྲས་གུས་པས་བསྐུལ་བ་དོན་ཡོད་ཅིང་། རང་ཉིད་ཀྱིས་ཀྱང་སྐྱེ་བར་ངག་གི་ལས་དཀར་མིན་བསགས་པའི་གཉེན་པོར་ཆེད་དུ་དམིགས་ཏེ། ཀུན་མཁྱེན་བླ་མ་དགྱེས་པའི་འབངས་མཁྱེན་བརྩེའི་དབང་པོས་དཀྱུས་གཅིག་ཏུ་དད་པས་གསོལ་བ་བཏབ་པའི་དགེ་བས་བདག་གཞན་རྣམས་ཀྱི་རྒྱུད་ལ་རྗེ་བཙུན་སྙིང་རྗེའི་གཏེར་དང་མི་གཉིས་པའི་བླ་མ་མཆོག་གི་ཡེ་ཤེས་གཟིགས་པའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག །མངྒ་ལཾ།། །།
དགེ་བའི་བཤེས་གཉེན་ཆེན་པོ་ཚུལ་ཁྲིམས་རྣམ་རྒྱལ་ལ་བསྔགས་པ་དད་པའི་མེ་ཏོག་རྒྱས་པ།
དགེ་བའི་བཤེས་གཉེན་ཆེན་པོ་ཚུལ་ཁྲིམས་རྣམ་རྒྱལ་ལ་བསྔགས་པ་དད་པའི་མེ་ཏོག་རྒྱས་པ་ཞེས་བྱ་བ་བཞུགས་སོ། །ན་མོ་གུ་རུ་ཤཱི་ལ་བི་ཛ་ཡཱ་ཡ། ཚུལ་གནས་ཁྲིམས་ཀྱི་ཆུ་གཏེར་ལས། །ལེགས་པར་འོངས་བའི་ཟླ་བ་ནི། །ཉེས་སྤྱོད་མུན་པའི་ཕྱོགས་ཀུན་ལས། །རྣམ་རྒྱལ་བདུད་རྩིའི་འོད་ཀྱིས་མཛེས། །མང་དུ་གསན་པའི་མན་ར། །ཚུལ་བཞིན་བསམ་པའི་ཡལ་ག་ཅན། །སྒོམ་
པའི་འབྲས་བུར་མངོན་དུད་པ། །ལྷར་བཅས་དགའ་བའི་རྒྱན་དུ་འཁྲུངས། །རྟག་ཏུ་དབེན་པའི་ནགས་ཀླུང་དུ། །ཞི་བ་དམ་པས་རབ་དགྱེས་ཀྱང་། །མཁའ་ཁྱབ་འགྲོ་ལ་རྗེས་བརྩེ་བའི། །ཐུགས་བསྐྱེད་སྲིད་ན་མཚུངས་པ་མེད། །འཆད་མཁས་ལེགས་བཤད་བྱེ་བའི་གླུ། །རྩོད་པའི་གཡུལ་གྱིས་མི་བརྫི་བ། །ཡི་གེར་འཕོས་པའི་རྩོམ་ཕྲེང་གིས། །ཐུབ་བསྟན་ཁང་བཟང་མཛེས་པར་བྱས། །གང་ཐུགས་བདེ་བ་ཆེན་པོ་ལས། །མ་གཡོས་བཞིན་དུ་ཅིར་སྣང་ཀུན། །ལྷ་སྔགས་མཉམ་པར་རབ་སྦྱར་བས། །མཚན་མའི་རྟོག་པ་དབྱིངས་སུ་བཅིལ། །ཨེ་མ་འཕགས་དང་མཁས་རྣམས་ཀྱིས། །ཡང་ཡང་བསྔགས་པའི་རྣམ་པར་ཐར། །ལན་གཅིག་ཡིད་ལ་བྱས་པས་ཀྱང་། །བསོད་ནམས་ཕུང་པོ་དཔག་མེད་ན། །ཡོན་ཏན་ཆ་ཤས་ཕྱོགས་གཅིག་ཙམ། །དད་པས་བརྗོད་པའི་ལེགས་བྱས་ཀྱིས། །སྐྱེ་ཞིང་སྐྱེ་བ་ཐམས་ཅད་དུ། །བླ་མ་མཆོག་གིས་རྗེས་བཟུང་ཤོག །ངེས་འབྱུང་ཆུ་ཡིས་རབ་བརླན་པའི། །གཞན་ཕན་བྱང་སེམས་པདྨ་དཀར། །བདེ་སྟོང་སྡོམ་པའི་འབྲས་འབར་བ། །འགྲོ་བ་ཀུན་གྱིས་ཐོབ་གྱུར་ཅིག །ཤེས་དང་སྙིང་བརྩེའི་ཐབས་མཁས་ཀྱིས། །སྲིད་ཞིའི་མཐའ་ལ་མི་གནས་པར། །ཐམས་ཅད་མཁྱེན་པའི་ཡེ་ཤེས་ཀྱིས། །ཡིད་ཅན་ཀུན་ལ་འཁྱུད་པར་ཤོག །བཀྲ་ཤིས་གང་ཞིག་འཇམ་པའི་དཔལ། །ངུར་སྨྲིག་གར་
མཛད་བླ་མ་རྗེའི། །གསང་བ་གསུམ་དང་རྣམ་དཀར་གྱི། །མཛད་པས་ས་གསུམ་དགེ་གྱུར་ཅིག །ཅེས་པའང་དགེ་སློང་དགེ་བའི་བཤེས་གཉེན་རྣམ་རྒྱལ་ཆོས་བཟང་གིས་བསྐུལ་བ་ལྟར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་དད་པས་གསོལ་བ་བཏབ་པ་བླ་མའི་བྱིན་རླབས་རྒྱུད་ལ་འཇུག་པའི་རྒྱུར་གྱུར་ཅིག། །།འདི་ཡན་གྱིས་བསྟོད་ཚོགས་སྐོར་ཅི་རིགས་པར་རྫོགས་སོ།། ༈ །།