རྗེ་བཙུན་སྒྲོལ་མ་ལ་བསྔགས་པ་འདོད་དོན་འགྲུབ་པའི་ཤིས་བརྗོད།
རྗེ་བཙུན་སྒྲོལ་མ་ལ་བསྔགས་པ་འདོད་དོན་འགྲུབ་པའི་ཤིས་བརྗོད་ཅེས་བྱ་བ་བཞུགས་སོ། །།ན་མས་ར་ཡེ། ཁྱོད་མཚན་ཐོས་པ་ཙམ་གྱིས་ཀྱང་། །འགྲོ་རྣམས་འཁོར་མཚོ་ལས་སྒྲོལ་བའི། །ངོ་མཚར་ཁོ་ནར་ཡིད་ཆགས་པས། །རྩེ་གཅིག་གུས་པས་གསོལ་འདེབས་ན། །རབ་མཛེས་མརྒད་བྱེ་བའི་རྡུལ། །གཅིག་ཏུ་སྤུངས་པའི་དགེ་མཚན་ཅན། །མཛེས་སྐུ་བདག་གི་མིག་ལམ་དུ། །ཞི་འཛུམ་ཟློ ཉམས་བརྒྱས་རོལ་པར་མཛོད། །འཇིག་རྟེན་འཇིག་རྟེན་འདས་པ་ཡི། །དངོས་གྲུབ་རིན་ཆེན་རྒྱ་མཚོའི་དབྱིག །རིག་པའི་གསང་སྔགས་གྲུབ་པ་ལས། །ས་གསུམ་ཕན་བདེ་སྦྱིན་གྱུར་ཅིག །ཟབ་ཅིང་མཆོག་ཏུ་ཞི་བའི་དབྱིངས། །ཕྱོགས་དང་ཆ་ལས་རྣམ་གྲོལ་བས། །བྱིན་གྱིས་བརླབས་པའི་སྐད་ཅིག་ལ། །གཟུང་འཛིན་དབུ་མར་ཐིམ་མཛད་གསོལ། །ཁྱད་པར་སྙིགས་ལས་ཆེར་སྙིགས་པའི། །དུས་ཀྱི་རྒུད་པས་རབ་སྐྲག་རྣམས། །ཉིན་མཚན་མེད་པར་རྒྱལ་བའི་ཡུམ། །ཁྱོད་ལས་སྐྱབས་གཞན་སེམས་པ་བྲལ། །དེ་སླད་ཐུགས་རྗེའི་ཕྱག་བརྐྱངས་ནས། །འཇིགས་པ་མཐའ་དག་བསལ་བ་དང་། །ཀུན་དགའི་གནས་སུ་དབུགས་
དབྱུང་བའི། །སྐལ་པ་བཟང་པོ་གྲུབ་པར་མཛོད། །སླར་ལ་གནས་སྐབས་སྡེ་བཞི་ཡི། །ཡོན་ཏན་མེ་ཏོག་མཛེས་འབར་བར། །མཐར་ཐུག་སྐུ་གསུམ་མི་ཕྱེད་པའི། །ཟུང་འཇུག་སྙེ་མ་དུད་མཛད་གསོལ། །མདོར་ན་འདི་ནས་བྱང་ཆུབ་བར། །འཕགས་མ་དགྱེས་པའི་སྤྱན་ཟུར་དང་། །ནམ་ཡང་མི་འབྲལ་འགྲོགས་པ་ལས། །འདོད་དགུའི་རེ་ཁཱ་རྫོགས་གྱུར་ཅིག །ཅེས་པའང་དུས་ཀྱི་རྒུད་པས་སྐྲག་པའི་ཡིད་ཅན་རྣམས་དབུགས་དབྱུང་བའི་སླད་དུ་གསོལ་འདེབས་ཤིས་བརྗོད་ཀྱི་མེ་ཏོག་ཅུང་ཟད་འཐོར་བ་པོ་ནི་རིག་པ་འཛིན་པ་མཉྫགྷོ་ཥ་སྟེ་ཇི་ལྟར་སྨོན་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །སརྦ་དཱ་ཐེ་ཡོ་བྷ་བ་ཏུ། །