བཅོམ་ལྡན་འདས་མ་ཀུ་རུ་ཀུལླེ་ལ་བསྟོད་པ་དབང་མཛད་དཔལ་མོ་དགྱེས་པའི་མཆོད་སྤྲིན།
བཅོམ་ལྡན་འདས་མ་ཀུ་རུ་ཀུལླེ་ལ་བསྟོད་པ་དབང་མཛད་དཔལ་མོ་དགྱེས་པའི་མཆོད་སྤྲིན་ཅེས་བྱ་བ། ན་མོ་ཀུ་རུ་ཀུལླེ་པཱ་དཱ་ཧཱུཾ། པདྨ་ལས་བྱུང་བཅུ་དྲུག་ལོན་ཚུལ་འཆང་། །གཡས་བརྐྱང་གཡོན་བསྐུམ་ཨུཏྤལ་སྐྱབས་སྦྱིན་མཛད། །ཐུགས་རྗེའི་འོད་ཀྱིས་ཁམས་གསུམ་དབང་དུ་སྡུད། །ཕྲིན་ལས་ལྷུན་གྲུབ་སྒྲོལ་མའི་ཞབས་ལ་འདུད། །དེ་ཉིད་འགྲོ་ལ་བརྩེ་བས་རྗེས་
ཆགས་ཀྱི། །ཡེ་ཤེས་སྣང་བ་རྒྱས་པའི་རོལ་མོ་ནི། །གང་འདུལ་ཅིར་ཡང་འཆར་བའི་ཟློས་གར་གྱིས། །འགྲོ་ཀུན་ཡིད་ཀྱི་བརྟན་པ་འཕྲོག་ལ་འདུད། །རབ་དམར་བྱེ་རུའི་རྡུལ་བརྩེགས་ལྷུན་པོ་ལ། །ཉི་གཞོན་འོད་ཀྱིས་འཁྱུད་པའི་མཚར་སྡུག་དཔལ། །མཚན་དཔེའི་ཉམས་འགྱུར་བྱེ་བའི་རོལ་སྒེག་ཅན། །བཅུ་དྲུག་དགའ་བའི་ལང་ཚོ་རྒྱས་ལ་འདུད། །ཆོས་སྐུའི་ཞལ་གཅིག་ཚད་མེད་བཞི་ཡི་ཕྱག །བདེ་ཆེན་གཟི་འབར་ཁྲོ་ཆགས་སྒེག་པའི་ཉམས། །རྣམ་ཐར་གསུམ་ལྡན་སྤྱན་གསུམ་གཡོན་དུ་གཟིགས། །བདེན་གཉིས་ཞབས་ཟུང་གར་གྱིས་འགྱིང་ལ་འདུད། །རྩ་བའི་ཕྱག་གཉིས་མ་རིག་འབིགས་བྱེད་པའི། པདྨའི་མདའ་གཞུ་སྙན་གྱི་ཐད་ཀར་འགེངས། །ལྷག་མ་ལྕགས་ཀྱུ་ཨུཏྤལ་བསྣམས་པ་ཡིས། །སྲིད་ཞིའི་དགེ་མཚན་ཐོགས་མེད་འགུགས་ལ་འདུད། །ཐོད་སྐམ་དབུ་རྒྱན་རློན་པའི་དོ་ཤལ་དང་། །རུས་པའི་རྒྱན་སྤྲས་༴ ཡོན་ཏན་ཡོངས་སུ་རྫོགས། །པད་ཟླའི་སྟེང་དུ་འོད་དམར་བྱེ་བའི་དབུས། །མཁའ་འགྲོའི་ཚོགས་ཀྱིས་བསྟེན་པ་ཁྱོད་ལ་འདུད། །དེ་ལྟར་བདག་བློ་རྩེ་གཅིག་དད་པ་ཡིས། །བསྟོད་དབྱངས་སྙན་པའི་རྒྱུད་མང་བསྒྲེང་བ་ལ། །ཡེ་ཤེས་གཟིགས་པའི་བདུད་རྩིས་དགེ་བྱས་མཐུས། །ཕན་བདེའི་པདྨོ་རྟག་ཏུ་རྒྱས་མཛད་གསོལ། །རྒྱུད་སྦྱང་དམ་ཚིག་དག་པའི་སྒྲུབ་པ་པོས། །དམིགས་པའི་རྟེན་གྱི་སྦྱར་བ་སྔོན་འགྲོ་བས། །
མྱུར་མ་དཔའ་མོའི་ལྷ་སྔགས་ཡེ་ཤེས་ཀྱི། །བསྙེན་པའི་རྣལ་འབྱོར་འགྲུབ་པར་བྱིན་གྱིས་རློབས། །འཁོར་འདས་དབང་བསྒྱུར་རྗེ་བཙུན་རིགས་བྱེད་མའི། །སྒྲུབ་པ་ཟབ་མོས་ལེགས་བྲིས་བཏུད་པ་ཡིས། །རྡོ་རྗེའི་ནུས་པའི་ལང་ཚོ་ཆེས་འབར་བས། །བརྟན་གཡོ་ཟིལ་གྱིས་གནོན་པར་བྱིན་གྱིས་རློབས། །མི་དང་མི་མིན་འབྱོར་པ་ངང་གིས་འདུ། །དྲག་ཤུལ་སྦྱོར་བས་གདུག་པའི་རྒྱུན་ལུགས་བཅད། །ལོངས་སྤྱོད་རྫས་ཀྱིས་འདོད་རྒུའི་ཆར་ཆེན་འབེབས། །རབ་འབྱམས་ཕྲིན་ལས་འགྲུབ་པར་བྱིན་གྱིས་རློབས། །མདོར་ན་དབང་མཛད་དཔལ་མོའི་ཡེ་ཤེས་ཀྱིས། །བདག་གི་སྒོ་གསུམ་བྱིན་གྱིས་བརླབས་པ་ལས། །མཆོག་དང་ཐུན་མོང་དངོས་གྲུབ་རབ་འབྱམས་ཀྱིས། །རང་གཞན་དོན་གཉིས་ཡིད་བཞིན་འགྲུབ་པར་ཤོག །ཅེས་རྗེ་བཙུན་མ་ཀུ་རུ་ཀུལླེ་དཔལ་མོ་སྙིང་གི་གསེར་ཐག་ཅན་དུ་གྲགས་པ་ལ་བསྟོད་ཅིང་གསོལ་བ་འདེབས་པའི་ཚིགས་སུ་བཅད་པ་བློ་ཀ་དང་པོ་ཡིག་རྙིང་ལས་བྱུང་བ་ལ་འཕྲོ་མཐུད་དེ་རིག་པ་འཛིན་པ་མཉྫགྷོ་ཥས་བྲིས་པ་དགེ།