བསྟོད་ཡུལ་དམ་པ་རྣམས་ལ་གསོལ་འདེབས་ཡན་ལག་བདུན་པ་སྨོན་ལམ་དང་བཅས་པ་ཀུན་བཟང་སྤྱོད་པའི་ཐེམ་སྐས།
བསྟོད་ཡུལ་དམ་པ་རྣམས་ལ་གསོལ་འདེབས་ཡན་ལག་བདུན་པ་སྨོན་ལམ་དང་བཅས་པ་ཀུན་བཟང་སྤྱོད་པའི་ཐེམ་སྐས་ཞེས་བྱ་བ་བཞུགས་སོ། །ན་མོ་གུ་རུ་བྷ༔ རྒྱལ་ཀུན་ཕྲིན་ལས་གཅིག་བསྡུས་ཀརྨ་པ། །དཀྱིལ་འཁོར་རྒྱ་མཚོའི་ཁྱབ་བདག་ཐུགས་རྗེའི་དབང་། །ཐེག་པ་མཆོག་གི་རྡོ་རྗེ་སློབ་དཔོན་ཚུལ། །འཇིགས་མེད་སྨྲ་བའི་སེང་གེར་གསོལ་བ་འདེབས། །ངག་གི་དབང་ཕྱུག་ཡོན་ཏན་རྒྱ་མཚོའི་གཏེར། །རྒྱལ་བས་ལུང་བསྟན་བློ་གྲོས་མཐའ་ཡས་ཞབས། །རིགས་ཀུན་བདག་པོ་པདྨ་གར་གྱི་དབང་། །འཛམ་གླིང་ཤིང་རྟ་ཆེན་པོར་གསོལ་བ་འདེབས། །སྤྲུལ་པའི་གཏེར་
འབྱིན་ཡོངས་ཀྱི་མཆོག་ཏུ་གྱུར། །བདེ་ཆེན་ས་བརྙེས་གཟུང་འཛིན་འཁྲུལ་པ་ཞིག །མཁས་གྲུབ་དབང་པོ་ཐར་གླིང་སྣང་མཛད་པ། །མཚོ་སྐྱེས་རྒྱལ་བ་གཉིས་པར་གསོལ་བ་འདེབས། །ཚུལ་གནས་གསན་བསམ་སྒོམ་པའི་པདྨ་རྒྱས། །སྔ་འགྱུར་མདོ་སྔགས་བསྟན་པའི་ཉི་མ་ཆེ། །རིག་འཛིན་བྱེ་བའི་གཙུག་གི་རྒྱན་གཅིག་པུ། །རྣམ་འདྲེན་སྨྲ་བའི་ཟླ་བར་གསོལ་བ་འདེབས། །འཇམ་པའི་དབྱངས་དངོས་མཁྱེན་བརྩེའི་དབང་པོ་ཆེ། །མཁས་ཀུན་དགའ་མཛད་བསྟན་པའི་རྒྱལ་མཚན་འཛིན། པདྨས་རྗེས་བཟུང་འོད་གསལ་མདོ་སྔགས་གླིང་། །མཚུངས་མེད་བཤེས་གཉེན་མཆོག་ལ་གསོལ་བ་འདེབས། །དངོས་དང་བརྒྱུད་པའི་དཔལ་ལྡན་བླ་མ་དང་། །ཡི་དམ་ཞི་ཁྲོ་རྒྱལ་བ་སྲས་དང་བཅས། །མཁའ་འགྲོ་ཆོས་སྐྱོང་ནོར་ལྷའི་ཚོགས་རྣམས་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ལུས་དང་ལོངས་སྤྱོད་དངོས་འབྱོར་ཡིད་སྤྲུལ་གྱི། །ཀུན་ཏུ་བཟང་པོའི་མཆོད་སྤྲིན་རྒྱ་མཚོས་མཆོད། །ཐོག་མེད་དུས་ནས་བསགས་པའི་སྡིག་ལྟུང་ཀུན། །སྟོབས་བཞི་ཚང་བའི་སྒོ་ནས་བཤགས་པར་བགྱི། །འཁོར་འདས་ཀུན་གྱིས་བསྒྲུབས་པའི་དགེ་ཚོགས་ལ། །མཆོག་ཏུ་དགའ་བས་རྗེས་སུ་ཡི་རང་ངོ་། །ཕྱོགས་བཅུའི་བླ་མ་རྒྱལ་བ་སྲས་དང་བཅས། །མྱ་ངན་མི་འདའ་རྟག་པར་བཞུགས་གསོལ་འདེབས། །འགྲོ་བ་མ་རིག་གདུང་བས་ནོན་པ་
ལ། །ཟབ་རྒྱས་ཆོས་ཀྱི་ཆར་ཆེན་འབེབས་པར་བསྐུལ། །དུས་གསུམ་བསགས་པའི་ལེགས་བྱས་ཇི་སྙེད་རྣམས། །བྱང་ཆུབ་སྙིང་པོར་ཡོངས་སུ་བསྔོ་བར་བགྱི། །བསོད་ནམས་འདི་ཡིས་བདག་གཞན་ཡིད་ཅན་ཀུན། །ཚོགས་གཉིས་རྫོགས་ཤིང་སྒྲིབ་གཉིས་ཡོངས་སུ་བྱང་། །ལམ་ལྔ་ས་བཅུའི་ཐེམ་སྐས་ལ་བརྟེན་ནས། །ཐམས་ཅད་གཟིགས་པའི་གོ་འཕང་མྱུར་ཐོབ་ཤོག །དེ་མ་ཐོབ་པའི་ཚེ་རབས་ཐམས་ཅད་དུ། །དལ་འབྱོར་རྟེན་ཐོབ་ནམ་འཆི་ངེས་མེད་དྲན། །ཐེག་མཆོག་དགེ་བའི་བཤེས་ཀྱིས་རྗེས་བཟུང་ནས། །བསམ་དང་སྦྱོར་བས་ཚུལ་བཞིན་བསྟེན་པར་ཤོག །ཁམས་གསུམ་རིགས་དྲུག་མཐོ་དམན་གར་སྐྱེས་ཀྱང་། །སྡུག་བསྔལ་གསུམ་གྱི་རང་བཞིན་ཉིད་མཐོང་ནས། །ངེས་འབྱུང་དྲག་པོ་གཏིང་ནས་སྐྱེ་བ་དང་། །ལས་འབྲས་བླང་དོར་ཇི་བཞིན་བརྩོན་པར་ཤོག །སེམས་ཅན་ཐམས་ཅད་ཕ་མ་དྲིན་ཅན་ཕྱིར། །རང་གི་བདེ་དགེ་གཞན་ལ་བཏང་བ་དང་། །མཁའ་ཁྱབ་འགྲོ་བའི་སྡུག་བསྔལ་རྒྱུ་དང་བཅས། །བདག་ཉིད་ཁོ་ནས་དྭང་དུ་ལེན་ནུས་ཤོག །བྱམས་དང་སྙིང་རྗེའི་ཤུགས་ཀྱིས་དྲངས་པ་ཡིས། །སྨོན་འཇུག་བྱང་ཆུབ་སེམས་གཉིས་ལེགས་བཟུང་སྟེ། །ཕར་ཕྱིན་དྲུག་དང་བསྡུ་དངོས་བཞི་ལ་སོགས། །རྒྱལ་སྲས་སྤྱོད་པ་རྒྱ་མཚོར་འཇུག་པར་ཤོག །ཁྱད་པར་ཞི་གནས་ཏིང་འཛིན་རྩེ་གཅིག་པས། །ལུས་སེམས་ཤིན་སྦྱངས་
བདེ་བ་གྲུབ་པ་དང་། །ལྷག་མཐོང་སོ་སོར་རྟོག་པའི་ཡེ་ཤེས་ཀྱིས། །དོན་དམ་བྱང་ཆུབ་སེམས་མཆོག་མངོན་གྱུར་ཤོག །དེ་ལྟར་ཐུན་མོང་ཐེག་པས་བློ་སྦྱངས་ནས། །གཞན་དོན་མྱུར་དུ་སངས་རྒྱས་ཐོབ་བྱའི་ཕྱིར། །གསང་ཆེན་རྡོ་རྗེ་ཐེག་པའི་སྒོར་ཞུགས་ཏེ། །ཟབ་མོ་དབང་བཞིའི་བདུད་རྩིས་སྨིན་པར་ཤོག །དབང་དུས་ཐོབ་པའི་དམ་ཚིག་སྡོམ་པའི་ཚོགས། །རྟག་ཏུ་སྲོག་ལས་གཅེས་པར་བསྲུང་བ་དང་། །དྭང་འདོད་ཡིད་ཆེས་དད་པས་གསོལ་བཏབ་མཐུས། །བླ་མའི་བྱིན་རླབས་སྙིང་ལ་འཇུག་པར་ཤོག །གཞི་རྒྱུད་བདེན་གཉིས་དབྱེར་མེད་ལྟ་བ་རྟོགས། །ལམ་རྒྱུད་ཐབས་གྲོལ་བསྒོམ་པའི་ཏིང་འཛིན་གྲུབ། །རིག་འཛིན་རྣམ་བཞིའི་སྤྱོད་པས་འབྲས་རྒྱུད་མཆོག །སྐུ་དང་ཡེ་ཤེས་ཕྲིན་ལས་དབང་འབྱོར་ཤོག །གཞན་ཡང་དམ་ཆོས་སྒྲུབ་པའི་མི་མཐུན་གེགས། །ཕྱི་ནང་གསང་བའི་བར་ཆད་ཞི་བ་དང་། །ཆོས་མཐུན་བསམ་སྦྱོར་མ་ལུས་ལྷུན་གྱིས་གྲུབ། །རྒྱལ་བ་དགྱེས་པའི་དགེ་མཚན་ཡོངས་རྫོགས་ཤོག །བསྟན་འཛིན་མཆོག་རྣམས་ཞབས་པད་བསྐལ་བརྒྱར་བརྟན། །བཤད་སྒྲུབ་ལས་ཀྱི་བསྟན་པས་ས་གསུམ་ཁྱབ། །བསྟན་པའི་སྦྱིན་བདག་ཆོས་ལྡན་མངའ་ཐང་རྒྱས། །འགྲོ་ཀུན་ཕན་བདེ་འཕེལ་བའི་བཀྲ་ཤིས་ཤོག །ཅེས་པའང་འཕྲུལ་ཆེན་སྤར་གྱི་རིག་བྱེད་འཛིན་པ་དགེ་སྦྱོང་ཀརྨ་ལེགས་ལྡན་དབང་པོ་ནས་བཀྲ་ཤིས་པའི་ལྷ་རྫས། རིན་ཆེན་གཉིས་པའི་མེ་
ཏོག །དཔལ་ཀྱེ་རྡོ་རྗེའི་སྒྲུབ་པའི་ཐབས་ཀྱི་གླེགས་བུ་གསུམ་བཅས་མཎྜལ་དུ་ཕུལ་ནས་འདི་ལྟ་བུ་ཞིག་དགོས་ཞེས་ཆེད་དུ་བསྐུལ་ངོར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་ཏེ་སྨོན་ལམ་དུ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །སརྦ་དྭ་ཧྥེ་ཡོ་བྷ་བ་ཏུ། །