དཔལ་ཀརྨ་པ་ཆེན་པོའི་མཆོག་གི་སྤྲུལ་པའི་སྐུ་མྱུར་དུ་འབྱོན་པར་གསོལ་བ་འདེབ་པ་དགེ་ལེགས་ཕན་བདེའི་དབྱངས་སྙན།
དཔལ་ཀརྨ་པ་ཆེན་པོའི་མཆོག་གི་སྤྲུལ་པའི་སྐུ་མྱུར་དུ་འབྱོན་པར་གསོལ་བ་འདེབ་པ་དགེ་ལེགས་ཕན་བདེའི་དབྱངས་སྙན་ཅེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། མཁའ་ཁྱབ་སྲས་བཅས་རྒྱལ་བ་ཐམས་ཅད་ཀྱི། །རྡོ་རྗེ་གསུམ་གྱི་ཡེ་ཤེས་གཅིག་བསྡུས་པ། །འཇིག་རྟེན་དབང་ཕྱུག་རྗེ་བཙུན་ཀརྨ་པ། །སྐྱབས་གཅིག་བླ་མ་འབོད་དོ་བརྩེ་བས་དགོངས། །མགོན་ཁྱོད་སྤྲུལ་པའི་སྣང་བརྙན་བསྡུས་པ་ཡིས། །ཡོངས་རྫོགས་བསྟན་དང་འགྲོ་བའི་ཚོགས་རྣམས་ཀུན། །ཉམ་ཐག་
མགོན་མེད་གྱུར་པ་འདི་གཟིགས་ནས། །དམིགས་མེད་སྙིང་རྗེའི་ཡེ་ཤེས་དེང་འདིར་བསྐྱེད། །མཆོག་གི་སྤྲུལ་པའི་སྒྱུ་འཕྲུལ་མྱུར་དུ་འཆར། །བསྐལ་བརྒྱར་ཞབས་བརྟན་ཕྲིན་ལས་རྒྱུན་གྱིས་རྟག །ཐུབ་བསྟན་སྤྱི་དང་དཔལ་ལྡན་ཀརྨ་པའི། །རིང་ལུགས་ཕྱོགས་བརྒྱར་འཕེལ་བའི་བཀྲ་ཤིས་སྩོལ། །ཅེས་པ་དད་དམ་རྨད་བྱུང་ཟླ་ནང་ཀར་དགའ་མཆོག་གི་གསུང་ངོར། འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་རྩེ་གཅིག་གུས་པས་གང་ཤར་ཤུགས་འབྱུང་དུ་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།། །།