སྐྱབས་མགོན་རྒྱལ་བའི་དབང་པོ་དཔལ་ཀརྨ་པ་ཆེན་པོའི་མཆོག་གི་སྤྲུལ་པའི་སྐུའི་ཞབས་བརྟན་གསོལ་འདེབས་འཆི་མེད་རྟག་པ་དམ་པའི་དབྱངས་སྙན།
སྐྱབས་མགོན་རྒྱལ་བའི་དབང་པོ་དཔལ་ཀརྨ་པ་ཆེན་པོའི་མཆོག་གི་སྤྲུལ་པའི་སྐུའི་ཞབས་བརྟན་གསོལ་འདེབས་འཆི་མེད་རྟག་པ་དམ་པའི་དབྱངས་སྙན་ཅེས་བྱ་བ་བཞུགས་སོ། ཨོཾ་སྭསྟི་སིདྡྷཾ། དཔལ་ལྡན་སངས་རྒྱས་ཀུན་དངོས་ཀརྨ་པ། །སངས་རྒྱས་ཀུན་ལས་ལྷག་པའི་ཐུགས་རྗེའི་གཏེར། །ཐུགས་རྗེའི་དབང་ཕྱུག་འཕགས་པ་སྤྱན་རས་གཟིགས། །བསྐལ་པ་རྒྱ་མཚོ་འཚོ་གཞེས་བརྟན་གྱུར་ཅིག ༡ །མཁྱེན་གསུམ་ལ་བརྟེན་སྦྱོར་བཞིའི་མཐར་སོན་པའི། །རྣམ་གྲོལ་ཆོས་སྐུའི་ཡེ་ཤེས་གཟུགས་ཀྱི་ཚུལ། །ངེས་པ་ལྔ་ལྡན་ལོངས་སྤྱོད་ཆེན་པོའི་སྐུ། །ཚེ་དཔག་མེད་མགོན་ངོ་བོར་འཚོ་གཞེས་གསོལ། ༢ །མངོན་སུམ་རྗེས་དཔག་རིག་པའི་སྣང་བ་ཡིས། །ཟག་བཅས་ཟག་མེད་ཤེས་བྱ་ཇི་བཞིན་གཟིགས། །ངེས་འབྱུང་ཆོས་འདུལ་བདུད་རྩིའི་ཆར་འབེབས་
གསུང་། །ཡིད་བཞིན་འཁོར་ལོའི་ངོ་བོར ༣ གཟོད་ནས་སྟོང་དང་རྟེན་འབྱུང་མི་ཕྱེད་པའི། །བདེན་གཉིས་ཟུང་འཇུག་དབུ་མའི་ཚུལ་རིག་པས། །མཐར་འཛིན་ཡིད་སྲུབས་ཚོགས་ཀུན་ཕམ་མཛད་ཐུགས། །རྣམ་པར་རྒྱལ་མའི་ངོ་བོར་འཚོ༴ ༤ གཉུག་མའི་ལུས་སེམས་དངོས་པོའི་གནས་ལུག་གཟིགས། །ཐབས་གྲོལ་ལམ་ལས་འབྲས་བུ་སྐྱེ་བའི་རིམ། །ཁ་སྦྱོར་འདུན་ལྡན་ཡོན་ཏན་མཆོག་བརྙེས་པ། །ཀུན་ཏུ་འཆང་བའི་ངོ་བོར་འཚོ༴ ༥ གཞི་རྒྱུད་ལྷག་པའི་ཆོས་སྐུ་མངོན་དུ་གྱུར། །ལམ་རྒྱུད་རིམ་ལྔ་མཐར་ཕྱིན་རིག་པ་འཛིན། །འབྲས་རྒྱུད་སྐུ་དང་ཡེ་ཤེས་ཕྲིན་ལས་གཏེར། །མཆོ་སྐྱེས་བླ་མའི་ངོ་བོར་འཚོ་གཞེས་གསོལ། ༦ །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །རྗེ་བཙུན་བླ་མའི་ཞབས་པད་བསྐལ་བརྒྱར་བརྟན། །ཟབ་རྒྱས་ཆོས་འཁོར་རྣམ་པ་ཀུན་ཏུ་བསྐོར། །བཤད་སྒྲུབ་དགའ་སྟོན་འཕེལ་བར་བྱིན་གྱིས་རློབས། ༧ །ཐུབ་བསྟན་སྤྱི་དང་དཔལ་ལྡན་ཀརྨ་པའི། །རིང་ལུགས་ཕྱོགས་དུས་ཀུན་ཏུ་རྒྱས་པ་དང་། །བདག་སོགས་འགྲོ་ཀུན་བླ་མས་རྗེས་བཟུང་ནས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་སྩོལ། ༨ །ཅེས་རྩེ་གཅིག་གུས་པའི་ཡིད་ཀྱིས་གསོལ་བ་འདེབས་མཚོན་བཀྲ་ཤིས་པའི་ལྷ་གོས་རབ་དཀར་འཆི་མེད་སྐུ་གསུམ་ཐུགས་རྡོ་རྗེའི་སྣང་བརྙན། སྐུ་ཚེ་དང་མཁྱེན་རབ་སྤེལ་བའི་རིལ་བུ། མི་འགྱུར་བའི་རིན་ཆེན་དང་པོ་ཞོ་འཁོར་ཡེ་ཤེས་ལྔའི་གྲངས་ལྡན་བཅས་བོད་ཆེན་སྡེ་དགེའི་མངའ་རིས་རྫོང་སར་བཀྲ་ཤིས་ལྷ་རྩེའི་
བསམ་གཏན་གྱི་སྐྱིལ་ཆུང་ནས། མགོན་པོ་གང་གི་བཀའ་འབངས་ཀྱི་ཐ་ཆུང་བྱ་བྲལ་སྤོང་བ་པའི་གཟུགས་བརྙན་འཇམ་དབྱངས་མཁྱེན་བརྩེའི་དབང་པོའམ། མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་བསམ་པ་དག་ཅིང་སྦྱོར་བ་གུས་པས་འབུལ་ལམ་ཞུ་ན་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། སརྦ་དཱ་ཀ་ལྱཱ་ཎཾ་བྷ་བ་ཏུ།། །།