རྒྱལ་བ་གཉིས་པ་རྡོ་རྗེ་འཆང་ཀུན་དགའ་བཟང་པོ་ལ་གསོལ་བ་འདེབས་པ་བྱིན་རླབས་བདུད་རྩིའི་ཆར་འབེབས
རྒྱལ་བ་གཉིས་པ་རྡོ་རྗེ་འཆང་ཀུན་དགའ་བཟང་པོ་ལ་གསོལ་བ་འདེབས་པ་བྱིན་རླབས་བདུད་རྩིའི་ཆར་འབེབས་ཞེས་བྱ་བ་བཞུགས་སོ། །དཔལ་ལྡན་རྡོ་རྗེ་འཆང་དངོས་གདུལ་བྱའི་ངོར། །ཀུན་དགའི་མཚན་དཔེའི་སྣང་བར་ཤར་ཙམ་གྱིས། །མཁས་བཙུན་བཟང་པོའི་ཡོན་ཏན་མཐའ་ཀླས་པའི། རྣམ་འདྲེན་བསྟན་པའི་ཉི་མར་གསོལ་བ་འདེབས། །མཁས་རྣམས་ཀུན་ཏུ་དགའ་བའི་ལེགས་བཤད་གསུང་། །སྡེ་སྣོད་རྒྱུད་སྡེ་རྒྱ་མཚོའི་དབྱངས་སྙན་པོས། །སྐལ་བཟང་འགྲོ་རྣམས་ལྷག་པར་དབུགས་འབྱིན་པའི། །ཁྱབ་བདག་འཁོར་ལོའི་མགོན་པོར་གསོལ་བ་འདེབས། །ཤེས་བྱ་ཀུན་གཟིགས་མཁྱེན་རབ་ངག་གི་དབང་། །ལྷར་བཅས་དགའ་མཛད་བརྩེ་ཆེན་སྙིང་། རྗེའི་གཏེར། །མཐུ་སྟོབས་ནུས་པ་རྨད་བྱུང་གསང་བདག་དང་། །དབྱེར་མེད་རྣམ་འདྲེན་བཟང་པོར་གསོལ༴ གང་ཞིག་དད་པས་བསྙེན་པའི་དེ་མ་ཐག །འཇིག་རྟེན་འཇིག་རྟེན་འདས་པའི་དགེ་ལེགས་ཀྱིས། །ཕན་བདེའི་འདོད་རྒུ་ལྷུག་པར་སྦྱིན་མཛད་པའི། །ཡོན་ཏན་ཕ་མཐའ་ཡས་ལ་གསོལ༴ རྒྱལ་བའི་རྡོ་རྗེའི་ལུང་གིས་རབ་བསྔགས་བཞིན། །རྩོད་དུས་ཀུན་མཁྱེན་གཉིས་པའི་ངོ་མཚར་གྱིས། །ས་གསུམ་བཀྲ་
ཤིས་སྣང་བས་དགེ་མཛད་པའི། །ཕྲིན་ལས་བསམ་མི་ཁྱབ་ལ་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །འདི་ནས་བྱང་ཆུབ་སྙིང་པོར་མཆིས་ཀྱི་བར། །ཀུན་དགའི་རྣམ་འདྲེན་བཟང་པོས་རྗེས་བཟུང་ནས། །རྒྱལ་བ་དགྱེས་པའི་ལམ་སྲོལ་འཛིན་པར་ཤོག །གནས་སྐབས་ནད་གདོན་བར་ཆད་ཞི་བ་དང་། །ཚེ་བསོད་དཔལ་འབྱོར་སྙན་གྲགས་རྒྱས། །ཚུལ་གནས་ཐོས་བསམ་སྒོམ་པའི་ཤེས་རབ་སོགས། །ཆོས་མཐུན་བསམ་སྦྱོར་ཡིད་བཞིན་འགྲུབ་གྱུར་ཅིག །མཐར་ཐུག་སྐུ་དང་ཡེ་ཤེས་ཕྲིན་ལས་རྣམས། །མགོན་པོ་ཁྱོད་དང་རྣམ་དབྱེར་མི་ཕྱེད་པས། །འགྲོ་ཀུན་སྲིད་དང་ཞི་བའི་ཆུ་གཏེར་ལས། །སྒྲོལ་བའི་དེད་དཔོན་ཆེན་པོར་བདག་འགྱུར་ཤོག །ཅེས་པའང་ཆོས་རྗེ་བླ་མ་ཀུན་དགའ་བརྩོན་འགྲུས་ཀྱི་ཞལ་འདོན་དུ་ཤཱཀྱའི་དགེ་སློང་བྱ་བྲལ་བ་འཇམ་དབྱངས་མཁྱེན་མརྩེས་གསོལ་བ་བཏབ་པ་སིདྡྷི་རསྟུ།། །།