རྡོ་རྗེ་འཛིན་དབང་དཔལ་ལྡན་ཕྲིན་ལས་ལ་གསོལ་བ་འདེབས་པ་བྱིན་རླབས་སྣང་བ།
རྡོ་རྗེ་འཛིན་དབང་དཔལ་ལྡན་ཕྲིན་ལས་ལ་གསོལ་བ་འདེབས་པ་བྱིན་རླབས་སྣང་བ་ཞེས་བྱ་བ་བཞུགས་སོ། །ཁྱབ་བདག་རྡོ་རྗེ་འཛིན་པའི་ངོ་བོར་ཉིད། །དཔལ་ལྡན་སྲས་བཅས་རྒྱལ་བའི་མཁྱེན་བརྩེའི་དངོས། །ཕྲིན་ལས་མཐའ་ཡས་གདུལ་བྱའི་མགོན་གཅིག་པུ། །མཚུངས་མེད་རྗེ་བཙུན་བླ་མར་གསོལ་བ་འདེབས། །རྣམ་གསུམ་ཚུལ་ཁྲིམས་ཕུང་པོས་བརྒྱན་པའི་སྐུ། །ཐེག་གསུམ་ཆོས་ཀྱི་ཆར་པ་འབེབས་མཁས་གསུང་། །སྐུ་གསུམ་ཡོན་ཏན་མངོན་གྱུར་ཡེ་ཤེས་ཐུགས། །སྐྱབས་གསུམ་ཀུན་འདུས་བདག་ཉིད་ཁྱོད་ལ་འདུད། །དེ་ལྟར་རྩེ་གཅིག་གུས་པས་གསོལ་བཏབ་མཐུས། །དམ་ཆོས་སྒྲུབ་པའི་འགལ་རྐྱེན་ཀུན་ཞི་ཞིང་། །མཐུན་རྐྱེན་མ་ལུས་ཕུན་སུམ་ཚོགས་པ་ལས། །རྒྱལ་བ་དགྱེས་པའི་ལམ་བཟང་མཐར་ཕྱིན་ཤོག །ཅེས་པའང་དགེ་བའི་བཤེས་གཉེན་ཆེན་པོ་ཕན་བདེ་བཟང་པོས་བཀྲ་ཤིས་ལྷ་རྫས་ཟུང་དང་བཅས་ཏེ་བསྐུལ་བའི་ངོར། བསྟོད་ཡུལ་དམ་པ་གང་དེའི་ལེགས་གསུང་གི་བདུད་རྩི་ཅུང་ཟད་ཐོབ་པའི་སློབ་བུའི་ཐ་ཆུང་འཇམ་དབྱངས་མཁྱེན་བརྩེའི་དབང་པོས་གསོལ་བ་བཏབ་པ་དགེ་ལེགས་སུ་གྱུར་ཅིག། །།