བླ་མ་དམ་པ་བསྟན་འཛིན་རྒྱལ་མཚན་གྱིས་བསྐུལ་ངོར།
སྲས་བཅས་རྒྱལ་བའི་ཡབ་གཅིག་འཇམ་པའི་དབྱངས། །བརྩེ་ཆེན་ཀུན་དགའི་རིང་ལུགས་སྤེལ་བའི་ཕྱིར། །བསོད་ནམས་མཐའ་ཡས་ཤེས་རབ་དྲི་མེད་པ། །འཁོན་གདུང་རྡོ་རྗེ་འཆང་ལ་གསོལ་བ་འདེབས། །བྱམས་པའི་དཔལ་མངའ་དམིགས་མེད་ཐུགས་རྗེའི་གཏེར། །མཁས་ཀུན་དགའ་བའི་མཁྱེན་རབ་ཕ་མཐའ་ཡས། །ཡོངས་འཛིན་བསྟན་པའི་རྒྱལ་མཚན་འཛིན་མཛད་པ། །རིགས་
བརྒྱའི་ཁྱབ་བདག་ཆེན་པོར་གསོལ་བ་འདེབས། །དཔལ་ལྡན་རྡོ་རྗེ་འཛིན་པའི་ངོ་བོ་ཉིད། །བློ་གྲོས་མཚུངས་མེད་མཁྱེན་བརྩེ་ནུས་པའི་གཏེར། །ཕྱོགས་ལས་རྣམ་པར་རྒྱལ་བའི་དགེ་མཚན་ཅན། །མཁན་ཆེན་ཐམས་ཅད་མཁྱེན་པར་གསོལ་བ་འདེབས། །མཐའ་ཡས་ཤེས་བྱ་ཀུན་གཟིགས་འཇམ་པའི་དབྱངས། །མཚུངས་མེད་མཁྱེན་བརྩེའི་གཏེར་ཆེན་རྒྱལ་བའི་སྲས། །མཁས་ཤིང་གྲུབ་པའི་དབང་པོ་རྡོ་རྗེ་འཛིན། །གཙུག་ལག་སྨྲ་བའི་ཉི་མར་གསོལ་བ་འདེབས། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །རྗེ་བཙུན་མཆོག་རྣམས་ཞབས་པད་བསྐལ་བརྒྱར་བརྟན། །བཤད་སྒྲུབ་བསྟན་པས་ས་ཆེན་ཀུན་ཏུ་ཁྱབ། །བདག་སོགས་འགྲོ་ཀུན་བྱང་ཆུབ་མྱུར་ཐོབ་ཤོག །ཅེས་པའང་བླ་མ་དམ་པ་བསྟན་འཛིན་རྒྱལ་མཚན་གྱིས་འདི་ལྟར་བྲིས་ཤིག་ཅེས་རྒྱང་རིང་མོ་ནས་གསུང་གིས་བསྐུལ་བའི་ངོར། འཇམ་དབྱངས་བླ་མ་དགྱེས་པའི་འབངས་མཁྱེན་མརྩེའི་དབང་པོས་བྲིས་པ་བླ་མའི་བྱིན་རླབས་སྙིང་ལ་འཇུག་པའི་རྒྱུར་གྱུར་ཅིག། །།