རྡོ་རྗེའི་སློབ་དཔོན་ཆེན་པོ་ངག་དབང་ལེགས་གྲུབ་ཀྱི་ཞབས་བརྟན་གསོལ་འདེབས་བྱིན་རླབས་སྣང་བ།

---

^{[མ་དཔེ་གཟིགས་ན་འདིར་གནོན།]}

རྡོ་རྗེའི་སློབ་དཔོན་ཆེན་པོ་ངག་དབང་ལེགས་གྲུབ་ཀྱི་ཞབས་བརྟན་གསོལ་འདེབས་བྱིན་རླབས་སྣང་བ་བཞུགས། །ཁྱབ་བདག་ངག་གི་དབང་ཕྱུག་ཡེ་ཤེས་སྐུ། །དཔག་ཡས་འགྲོ་ལ་ལེགས་པའི་ལམ་སྟོན་ཕྱིར། །རྡོ་རྗེའི་སློབ་དཔོན་མཆོག་གི་རྣམ་རོལ་ཆེ། །མཁས་གྲུབ་རྒྱ་མཚོའི་དབང་པོར་ཞབས་

---

^{[མ་དཔེ་གཟིགས་ན་འདིར་གནོན།]}

བརྟན་གསོལ། །ངག་དབང་ལྷ་དང་དབྱེར་མེད་བློ་གྲོས་ཀྱིས། །ཟབ་རྒྱས་སྙིང་པོའི་བསྟན་པ་སྣང་མཛད་པ། །གཞན་ཕན་ཕ་མཐའ་ཡས་པའི་འོད་ཟེར་ཅན། །འཇམ་དབྱངས་སྨྲ་བའི་ཉི་མ་ཁྱེད་ལ་འདུད། །བདག་སོགས་བྱང་ཆུབ་སྙིང་པོར་མཆིས་ཀྱི་བར། །མགོན་པོ་ཁྱོད་ཀྱིས་དགེ་བའི་བཤེས་མཛད་ནས། །ལུང་དང་རྟོགས་པའི་དམ་ཆོས་ཡོངས་བཟུང་ཞིང་། །ཕན་བདེའི་དགེ་མཚན་རྒྱས་པར་བྱིན་གྱིས་རློབས། །ཞེས་པའང་བསྟོད་ཡུལ་དམ་པ་གང་དེའི་ལེགས་གསུང་གི་བདུད་རྩིས་འཚོ་བའི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རྩེ་གཅིག་གུས་པས་གསོལ་བ་བཏབ་པ་སིདྡྷི་རསྟུ།། །།