ཞབས་བརྟན་ཤེས་བྱ་ཀུན་གཟིགས།
ཨ་མཱ་ར་སིདྡྷཾ་སྱ་སཏུ་གཱ་ཐ་ཤུ་བྷཾ། །ཨོཾ་སྭསྟི་ཛི་བནྟུ། ཤེས་བྱ་ཀུན་ལ་གཟིགས་པའི་བློ་གྲོས་དང་། །རབ་འབྱམས་མདོ་སྔགས་སྨྲ་བའི་དགེ་མཚན་ཅན། །རྒྱ་ཆེན་ཆོས་སྤྱན་མངའ་བ་ཡོངས་གྲགས་པ། །མཚོ་བྱུང་དགྱེས་པའི་བཤེས་གཉེན་ཞབས་བརྟན་གསོལ། །ཚེ་དཔག་མེད་པས་མངོན་སུམ་བྱིན་བརླབས་ཤིང་། །རྣམ་པར་རྒྱལ་མས་བར་ཆད་བགེགས་ཚོགས་བསལ། །ཡིད་བཞིན་འཁོར་ལོས་རྟག་ཏུ་རྗེས་བཟུང་ནས། །མཁས་བཙུན་བཟང་པོའི་ཕྲིན་ལས་འཕེལ་གྱུར་ཅིག །རྡོ་རྗེ་འཛིན་པ་བསྐལ་བརྒྱར་འཚོ་གཞེས་ཤིང་། །གཞུང་ལུགས་བརྒྱ་ཕྲག་བཤད་སྒྲུབ་སྣང་བ་ཡིས། །དྲི་མེད་ཐུབ་བསྟན་ཕྱོགས་བརྒྱར་དར་བ་དང་། ཕན་བདེའི་འདབ་བརྒྱ་རྒྱས་པའི་བཀྲ་ཤིས་ཤོག །ཅེས་མངོན་པར་དྭངས་པའི་ཡིད་ཀྱིས་ཤིས་པར་བརྗོད་པའི་མཚོན་བྱེད་རྟེན་འབྱུང་གི་མེ་ཏོག་ལྷས་རྫས་རབ་དཀར། གངས་ཅན་འདིར་ལོ་བརྒྱ་ཕྲག་ལྷག་པར་འཆི་མེད་གྲུབ་པའི་ཕྲིན་ལས་མཐས་ཡས་པ་མངའ་བ་གྲུབ་ཆེན་བརྩོན་འགྲུས་བཟང་པོའི་སྣང་བརྙན། སྒྲུབ་ཐབས་བརྒྱ་རྩའི་གླེགས་བམ། རིན་ཆེན་ཤེལ་གྱི་ཕྲེང་བ་བརྒྱ་རྩ། །ཚེ་རྫས་རིལ་བུ་བརྒྱ་ཕྲག་ལ་བཀྲ་ཤིས་པའི་གྲངས་ཀྱིས་ལྷག་པ་བཅས་རྡོ་རྗེ་འཛིན་དབང་དམ་པ་གང་ཉིད་ལོ་བརྒྱར་འཚོ་ཞིང་གཞེས་ལ་ཕྲིན་ལས་རྒྱས་པའི་རྟེན་འབྲེལ་དུ་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་ཕུལ་བ་སིདྡྷི་རསྟུ།། །།