ཁྱབ་བདག་རྡོ་རྗེ་འཆང་དང་པོའི་སངས་རྒྱས་རིན་ཆེན་བློ་གསལ་བསྟན་སྐྱོང་དཔལ་བཟང་པོའི་ཞལ་སྔ་ནས་ཤྲཱི་ཀཱ་ལ་ཙཀྲའི་དབང་བསྐུར་ནོས་པའི་སྐབས་སུ་ཕུལ་བའི་ཞབས་བརྟན་གསོལ་འདེབས་ཚིག་གི་བདུད་རྩི།
ཁྱབ་བདག་རྡོ་རྗེ་འཆང་དང་པོའི་སངས་རྒྱས་རིན་ཆེན་བློ་གསལ་བསྟན་སྐྱོང་དཔལ་བཟང་པོའི་ཞལ་སྔ་ནས་ཤྲཱི་ཀཱ་ལ་ཙཀྲའི་དབང་བསྐུར་ནོས་པའི་སྐབས་སུ་ཕུལ་བའི་ཞབས་བརྟན་གསོལ་འདེབས་ཚིག་གི་བདུད་རྩི་ཞེས་བྱ་བ་བཞུགས་སོ། །བི་བྷཱི་ཤྲཱི་བི་ཛ་ཡནྟུ། །སྤྲོས་པའི་ཕ་མཐའ་གཞར་ཡས་མི་ཕྱེད་རྣམ་ཀུན་མཆོག་ལྡན་སྟོང་ཉིད་དང་། །མི་འགྱུར་བདེ་བ་ཆེན་པོའི་ཡེ་ཤེས་ཟུང་འཇུག་དཔལ་ལྡན་དུས་འཁོར་ལོ། །ཚུར་མཐོང་བློ་གསལ་གདུལ་བྱའི་ཚོགས་དང་བསྟན་པ་རྒྱ་མཚོ་སྐྱོང་བའི་སླད། །མཆོག་གི་སྤྲུལ་སྐུའི་རྣམ་པར་འཆར་གང་སྲིད་ཞིའི་ཕྱོགས་ལས་རྒྱལ་གྱུར་ཅིག ༡ །མཚན་མའི་འདུ་འགོད་གཟོད་ནས་ཞི་བ་དེ་ཉིད་རྣམ་པ་བཅུ་དྲུག་གཟུགས། །སྒྱུ་འཕྲུལ་དྲྭ་བས་མངོན་པར་བྱང་ཆུབ་པདྨ་འདབ་མ་རྒྱས་པའི་སྤྱན། །བརྟན་གཡོའི་དངོས་ཀུན་སྤྲོ་དང་བསྡུ་མཛད་ཤཱཀྱ་སེང་གེའི་ངོ་བོར་ཉིད། །ཟག་པ་མེད་པའི་མཚན་དཔེའི་ཕུང་པོ་འཆི་མེད་མཆོག་ཏུ་འཚོ་གཞེས་གསོལ། ༢ །རྡོ་རྗེ་
མི་ཤིགས་ནཱ་དའི་ངོ་བོ་བདེན་དོན་རྣམ་པ་བཅུ་གཉིས་སྤྲིན། །རྣམ་པ་ཉི་ཤུས་མངོན་པར་བྱང་ཆུབ་བདུད་རྩིའི་སྙིང་པོས་ལྕི་བའི་འཛུམ། །སྨྲ་བའི་ཁྱུ་མཆོག་ཉིན་མོར་བྱེད་པ་ཀཱ་ལ་ཙཀྲར་མངོན་བརྗོད་པས། །ཟབ་ཅིང་རྒྱ་ཆེའི་ཆོས་ཀྱི་ཆར་ཆེན་དུས་གསུམ་རྟག་ཏུ་འབེབས་པར་བསྐུལ། ༣ །ཐོག་མར་སྐྱེ་བའི་འཛག་པ་མེད་ན་མཐར་གྱིས་འཇིག་པ་མ་དམིགས་ཕྱིར། །འགྱུར་བའི་ཚུལ་དང་གཞར་ཡང་མི་མཛའ་བདེ་ཆེན་མཆོག་གི་པྲ་སེ་ནཱ། །རྣམ་པ་ལྔ་ཡིས་མངོན་བྱང་ཆུབ་པ་དང་པོའི་སངས་རྒྱས་ཡེ་ཤེས་སྐུ། །ཁྱོད་ལས་གཞན་དུ་ནམ་ཡང་མི་འཚལ་རྟག་པ་དམ་པར་སྣང་མཛད་གསོལ། ༤ །འབར་གཡོ་བརྟན་པའི་ཐ་མར་སོན་པས་དུས་དང་ཡོན་ཏན་འཇུག་པ་བརྟུལ། །སྐད་ཅིག་གཅིག་གིས་མངོན་པར་བྱང་ཆུབ་ཕྱོགས་དང་ཆ་ལས་རིང་དུ་གྲོལ། །ཐམས་ཅད་མཁྱེན་པའི་གཟིགས་པ་མངོན་གྱུར་མཁའ་ཁྱབ་ཡེ་ཤེས་རྡོ་རྗེའི་དངོས། །ཤིན་ཏུ་ཞི་བ་ཕྱག་རྒྱ་ཆེན་པོར་འཆི་མེད་གྲུབ་པ་ཉིད་གྱུར་ཅིག ༥ །མདོར་ན་སྙིང་རྗེའི་ལུས་ཅན་ཁྱོད་ནི་ཡོངས་རྫོགས་བསྟན་པའི་ཉི་མ་སྟེ། །མཐའ་ཀླས་འགྲོ་བའི་གདུང་བ་སེལ་ལ་ཟླ་ཤེལ་བདུད་རྩི་མངོན་སུམ་ཉིད། །ཁྱད་པར་འཛམ་གླིང་བྱང་ཕྱོགས་ཐུབ་དབང་རིན་ཆེན་གྲུབ་པའི་བཤད་སྒྲུབ་ཁུར། །འདེགས་པའི་ཤིང་རྟ་གཅིག་པུ་ཉིད་ལས་གཉིས་པ་དམིགས་སུ་མ་འཚལ་བས། ༦ །བསྐལ་པ་རྒྱ་
མཚོར་ཞབས་པད་འཁོར་ལོ་རྡོ་རྗེའི་ཁམས་སུ་བརྟན་པ་དང་། །ཕྲིན་ལས་སྣང་བས་ས་གསུམ་ཁྱབ་ཅིང་ཆོས་འཁོར་རྟག་ཏུ་བསྐོར་བ་དང་། །བདག་སོགས་འགྲོ་ཀུན་བྱང་ཆུབ་བར་དུ་ཡེ་ཤེས་གཟིགས་པས་མི་འདོར་བར། །དངོས་པོ་ཀུན་གྱིས་བཏུད་དེ་གསོལ་ན་དགེ་མཚན་སྙེ་མ་གཡུར་ཟ་མཛོད། ༧ །ཅེས་སྙིང་ནས་གསོལ་འདེབས་ཀྱི་ཏམྱུར་དལ་གྱིས་བསྒྲེང་བའི་མཚོན་བྱེད་རྟེན་འབྱུང་གི་སྣང་བས་བཀྲ་ཤིས་པའི་པདྨོ་ཆེས་ཆེར་རྒྱས་པའི་སླད་དུ་ཡིད་ཀྱི་ཆོ་གས་མཎྜལ་ཀུན་བཟང་མཆོད་པའི་སྒོ་བརྒྱར་དབྱེ་བ་དང་ཆབ་གཅིག་འཆི་མེད་ཀྱི་རེག་བྱ་ཟླ་ཞུན་ལྟར་དཀར་བ་མངྒལའི་རེ་ཁཱས་མཚན་པ། བཅོམ་ལྡན་འཆི་མེད་མགོན་པོའི་མཚན་དཔེའི་ཞལ་སྐྱིན་བྱིན་ཅན། །འཆི་མེད་རྡོ་རྗེ་ནཱ་དའི་སྒྲ་བརྙན་གླུར་བླངས་པའི་རྒྱུད་ཆེན་པོའི་འགྲེལ་པ་ལེགས་བཤད་ཀྱི་ཕུལ་དུ་སོན་པ། འཆི་མེད་གྲུབ་པའི་ཡེ་ཤེས་ཨེ་ཝཾ་གྱི་གཟུགས་གཞན་པ་བཛྲ་གྷཎཱ། ཡོན་ཏན་དང་ཕྲིན་ལས་འཆི་མེད་རྟག་པའི་རྒྱལ་རྔ་ཀུན་ཏུ་དགེ་བའི་དབྱངས་སྙན་བདེ་སྐྱོང་གི་ཌ་མ་རུ། །རིན་ཆེན་དང་པོ་ཞོ་འཁོར། །རིན་གཉིས་ཀྱི་དོང་རྩེ་སྲང་འཁོར། ༣ །སྣ་ཚོགས་རྡོ་རྗེའི་རེ་ཁཱས་མཚན་པའི་ཨཱ་ས་ནཾ། །དབང་བཅུའི་ཡོན་ཏན་སྲུབ་པའི་མདངས་ལྡན་ལྷ་རྫས་བཟང་གོས་དམར་པོ་ཡུག་བཅས་རྡོ་རྗེའི་སློབ་མའི་ཐ་ཆུང་འཇམ་དབྱངས་མཁྱེན་བརྩེའི་དབང་པོས་གུས་པ་ཆེན་པོའི་ཕྱག་དང་བཅས་ཏེ་འབུལ་ལམ་ཞུས་པ་ལགས་ན་མངོན་འདོད་ཀྱི་གནས་ལ་སྨོན་པའི་དོན་ཀུན་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །