རྣམ་འདྲེན་བླ་མ་རིན་པོ་ཆེ་ཀུན་དགའ་ཆོས་ཀྱི་དབང་པོའི་ཞབས་བརྟན་གསོལ་འདེབས་འཆི་མེད་གྲུབ་པའི་རོལ་མོ།
རྣམ་འདྲེན་བླ་མ་རིན་པོ་ཆེ་ཀུན་དགའ་ཆོས་ཀྱི་དབང་པོའི་ཞབས་བརྟན་གསོལ་འདེབས་འཆི་མེད་གྲུབ་པའི་རོལ་མོ་ཞེས་བྱ་བ་བཞུགས་སོ། །འཆི་མེད་ཚེ་དཔག་མེད་མགོན་རྣམ་པར་རྒྱལ། །ཡིད་བཞིན་འཁོར་ལོའི་ཐུགས་རྗེའི་བྱིན་རླབས་ཀྱིས། །དཔལ་ལྡན་བླ་མ་བསྐལ་བརྒྱར་འཚོ་གཞེས་ཤིང་། ཕྲིན་ལས་ཕྱོགས་དུས་ཀུན་ཏུ་ཁྱབ་པར་ཤོག །ཚུལ་ཁྲིམས་ཕུང་པོར་ཉེས་པའི་སྐྱོན་དང་བྲལ། །མང་དུ་གསན་དང་བསམ་པའི་ཕ་རོལ་སོན། །ངེས་འབྱུང་དྲག་པོས་སྒྲུབ་པའི་རྒྱལ་མཚན་བསྟེན། །ཀུན་དགའ་ཆོས་ཀྱི་དབང་པོ་ཞབས་བརྟན་གསོལ། །བྱམས་དང་སྙིང་རྗེ་བྱང་ཆུབ་སེམས་མཆོག་འབྱོངས། །ཏིང་ངེ་འཛིན་དང་ཤེས་རབ་དྲི་མ་མེད། །གཞན་ཕན་རྣམ་དཀར་ཕྲིན་ལས་བསམ་མི་ཁྱབ། །རྒྱལ་བའི་མྱུ་གུ་ཆེན་པོ་ཞབས་བརྟན་གསོལ། །དབེན་པའི་གནས་སུ་དབང་བཞིའི་ལམ་ཟབ་མོ། །རྩེ་གཅིག་བསྒོམ་པས་སྒྲིབ་བཞི་ཡོངས་སྦྱངས་ཏེ། །སྐུ་བཞིའི་རྒྱལ་སྲིད་ཆེ་ལ་དབང་འབྱོར་བའི། །རྡོ་རྗེ་འཛིན་པའི་གཙུག་རྒྱན་ཞབས་བརྟན་གསོལ། །རྗེ་བཙུན་བླ་མའི་ཞབས་པད་བསྐལ་བརྒྱར་བརྟན། །དད་ལྡན་སློབ་མའི་བསམ་སྦྱོར་ཆོས་བཞིན་འགྲུབ། ། བཤད་སྒྲུབ་བསྟན་པ་དར་ཞིང་འགྲོ་ཀུན་བདེ། །མྱུར་དུ་བྱང་ཆུབ་གོ་འཕང་ཐོབ་པར་ཤོག །ཅེས་པའང་རྗེ་དེ་ཉིད་ཀྱི་ཐུགས་སྲས་སྒྲུབ་བརྩོན་སྤོང་བ་པ་ཆེན་པོ་མཉྫཤྲཱི་དྷཱ་ཛས་བཀྲ་ཤིས་པའི་ལྷ་རྫས་དང་བཅས་ཆེད་དུ་བསྐུལ་བ་དང་། །རང་ཉིད་
ཀྱིས་ཀྱང་མངོན་པར་དྭངས་བའི་ཡིད་ཀྱིས་ཀུན་ནས་བསླངས་ཏེ། །བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས་རབ་ཚེས་ས་འབྲུག་གི་ལོ་མགོ་ཟླ་བའི་དཀར་ཕྱོགས་ཀྱི་ཚེས་བཅུར་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །སརྦ་དཱ་ཀ་ལྱཱ་ཎཾ་བྷ་བ་ཏུ།། །།