གནས་གསར་མཆོག་སྤྲུལ་རིན་པོ་ཆེ་བྱམས་པ་དངོས་གྲུབ་བསྟན་པའི་རྒྱལ་མཚན་ལ་ཞབས་བརྟན་དུ་གསོལ་བ་འཆི་མེད་འདུད་རྩིའི་གྲུ་ཆར།
གནས་གསར་མཆོག་སྤྲུལ་རིན་པོ་ཆེ་བྱམས་པ་དངོས་གྲུབ་བསྟན་པའི་རྒྱལ་མཚན་ལ་ཞབས་བརྟན་དུ་གསོལ་བ་འཆི་མེད་འདུད་རྩིའི་གྲུ་ཆར་ཞེས་བྱ་བ། ཨོཾ་སྭསྟི་ཛཱི་བནྟུ། རྨད་བྱུང་བྱམས་པའི་བདུད་རྩིས་ཕན་བདེའི་དངོས། །གྲུབ་གཉིས་འདོད་དགུར་འཇོ་བའི་དཔག་བསམ་དབང་། །མཐའ་ཀླས་བསྟན་འགྲོའི་ཉེར་འཚོའི་གཞི་གཅིག་པུ། །མཚུངས་མེད་བསྟན་
པའི་རྒྱལ་མཚན་ཞབས་བརྟན་གསོལ། ༡ །བསོད་ནམས་ཡེ་ཤེས་ཚོགས་གཉིས་ཆུ་གཏེར་ལས། །མཚན་དཔེའི་ཉིན་བྱེད་དང་པོར་ཤར་ཙམ་ནས། །དགེ་མཚན་ཨུཏྤལ་དགའ་ཚལ་རྒྱས་མཛད་པའི། །གཟུགས་སྐུ་འཆི་མེད་གྲུབ་པ་ཉིད་གྱུར་ཅིག ༢ །ཟབ་དང་རྒྱ་ཆེའི་ཆོས་ཕུང་ཇི་སྙེད་པ། །ཡན་ལག་དྲུག་ཅུའི་རོལ་མོར་འཁྲོལ་བའི་གསུང་། །རྣམ་མང་གདུལ་བྱའི་བསམ་པའི་རྗེས་འགྲོ་བས། །བཤད་སྒྲུབ་བསྟན་པ་ཕྱོགས་བཅུར་རྒྱས་མཛད་གསོལ། ༣ །མཁྱེན་དང་བརྩེ་བའི་ཆ་ཤས་ཡོངས་རྫོགས་པ། །གང་ཐུགས་སྤྲོས་པ་ཉེར་ཞིའི་ཟླ་ཤེལ་ནི། །གངས་ཅན་འགྲོ་འདིའི་ལེགས་བྱས་མཁའ་དབྱིངས་སུ། །ལྷག་པར་དགྱེས་པའི་ངང་ཚུལ་རྟག་ཏུ་སྟོན། ༤ །ཡོན་ཏན་ནོར་བུའི་དོ་ཤལ་ཡིད་འོང་བ། །སྐལ་བཟང་རྣ་བའི་རྒྱན་དུ་མཛེས་པ་དང་། །ཕྲིན་ལས་དོན་གཉིས་ལྷུན་གྱིས་གྲུབ་པ་ཡི། །དགའ་སྟོན་འཇིག་རྟེན་གསུམ་ན་ཁྱབ་གྱུར་ཅིག ༥ །མདོར་ན་མཚུངས་མེད་བསྟན་པའི་ཉི་མ་ཆེའི། །གསང་གསུམ་བསྐལ་པ་རྒྱ་མཚོར་འཚོ་གཞེས་ཤིང་། །རྒྱལ་བསྟན་སྤྱི་དང་ཚར་ཆེན་ཆོས་ཀྱི་རྗེའི། །རིང་ལུགས་ཕྱོགས་དུས་ཀུན་ཏུ་རྒྱས་པར་ཤོག ༦ །གང་གི་མཚན་ཙམ་ཡིད་ལ་དྲན་པས་ཀྱང་། །སྲིད་དང་ཞི་བའི་ཕུན་ཚོགས་ཀུན་སྩོལ་བ། །དཀོན་མཆོག་གསུམ་གྱི་ཐུགས་རྗེའི་སྣང་བ་ཡིས། །ཤིས་པའི་པདྨོ་རྟག་ཏུ་རྒྱས་གྱུར་ཅིག ༧ །ཅེས་པའང་འཇམ་དབྱངས་མཁྱེན་བརྩེའི་དབང་པོས་མངོན་པར་དྭང་བའི་ཡིད་ཀྱིས་གསོལ་བ་བཏབ་པ་དགེ་ལེགས་སུ་གྱུར་ཅིག། །།