རིག་འཛིན་འཆི་མེད་གྲུབ་པའི་དཔའ་བོར་ཞབས་བརྟན་དུ་གསོལ་བ་ཕྱིན་དྲུག་སྒྲ་མའི་ཏམྦུ།
རིག་འཛིན་འཆི་མེད་གྲུབ་པའི་དཔའ་བོར་ཞབས་བརྟན་དུ་གསོལ་བ་ཕྱིན་དྲུག་སྒྲ་མའི་ཏམྦུ་ཞེས་བྱ་བ། ཨོཾ་སྭསྟི་ཛིཝནྟུ། འཆི་མེན་རིག་འཛིན་པདྨ་སཾ་བྷ་ཝའི། །འཆི་མེད་རྡོ་རྗེའི་སྣང་བརྙན་སྲིད་པ་ན། །འཆི་མེད་གྲུབ་པའི་དཔའ་བོར་ཡོངས་ཤར་བ། །འཆི་མེད་རྟག་པ་དམ་པར་ཞབས་བརྟན་གསོལ། ༡ །ཧཾ་ཡིག་བདེ་ཆེན་དམ་ཚིག་བསྲེག་བཞུའི་ཕུལ། །རྩ་ཁམས་དཔའ་བོ་ཌཱ་ཀིའི་གྲོང་ཁྱེར་དུ། །ཡོངས་ཁྱབ་སྦྱིན་པའི་ཕ་རོལ་མཐར་སོན་པ། །རྣམ་ཀུན་མཆོག་ལྡན་ཆེན་པོར་ཞབས ༢ ཀུན་ཏུ་འཕོ་བའི་བག་ཆགས་རྒྱུན་བཅས་པ། །འཕོ་མེད་དབུ་མའི་སྲོག་ཏུ་ཡོངས་གྲུབ་པས། །ཟག་བྲལ་ཚུལ་གནས་ཁྲིམས་ཀྱི་གཟི་འབར་བ། །སྐྱེ་འཆིའི་མཚན་མ་བྲལ་བར་ཞབས ༣ ཡུལ་ཅན་བདེ་བ་ཆེན་པོས་རབ་དྲངས་པའི། །
བསམ་གྱིས་མི་ཁྱབ་ཡེ་ཤེས་ཐུགས་ཆུད་པས། །ཟབ་མོའི་དོན་ལ་བཟོད་པའི་མཆོག་བརྙེས་པ། །འཁོར་འདས་དབྱེར་མེད་ཆོས་པོར་ཞབས རིམ་གཉིས་ཡན་ལག་བཅས་པའི་རྣམ་འབྱོར་ལ། །བརྩོན་འགྲུས་གོ་ཆ་བརྟན་པོས་ཉམས་བཞེས་པས། །ནང་གི་ལམ་ནས་སྐུ་བཞིའི་རྒྱལ་སྲིད་ལ། །དབང་འབྱོར་རྡོ་རྗེ་འཛིན་དངོས་ཞབས༴ ༥ ཀ་དག་གཉུག་མའི་ངང་ལས་མ་གཡོས་བཞིན། །ལྷུན་གྲུབ་སྣང་བ་རྣམ་བཞིའི་བསམ་གཏན་གྱིས། །ཟུང་འཇུག་གོ་འཕང་བརྙེས་པའི་ཡེ་ཤེས་སྐུ། །འཇའ་ལུས་རྡོ་རྗེའི་ངོ་བོར་ཞབས་བརྟན་གསོལ། ༦ །མདོར་ན་སོ་སོར་རྟོག་པའི་ཤེས་རབ་དང་། །དམིགས་མེད་སྙིང་རྗེའི་དབང་གིས་སྲིད་པ་འདིར། །བསྐལ་བརྒྱར་ཞབས་བརྟན་ཕྲིན་ལས་སྣང་བ་ཡིས། །ཕན་བདེའི་པདྨོ་རྒྱས་པའི་བཀྲ་ཤིས་སྩོལ། ༧ །ཅེས་སྔ་འགྱུར་བསྟན་པའི་སྲོག་ཤིང་མཚུངས་མེད་མཆོག་སྤྲུལ་རིན་པོ་ཆེ་གང་ཉིད་ཞབས་པད་བསྐལ་པ་རྒྱ་མཚོར་འཚོ་ཞིང་གཞེས་པའི་སླད། རིག་འཛིན་འཆི་མེད་གྲུབ་པའི་དཔའ་བོ་ཞེས་མཚན་གསར་འབུལ་གྱི་རྟེན་འབྱུང་དང་འབྲེལ་བར་ཟབ་གསང་རྡོ་རྗེ་ཐེག་པའི་ཐུན་མོང་མ་ཡིན་པའི་ཕ་རོལ་ཏུ་ཕྱིན་པ་དྲུག་བརྗོད་བྱར་བྱས་པའི་ཚིགས་སུ་བཅད་པ་འདིའང་། ཐེག་པ་མཆོག་གི་རྣལ་འབྱོར་པ་འཇིགས་པ་མེད་པའི་སྡེས་ལྷག་བསམ་དག་པས་ཕུལ་བ་དེ་དེ་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། །ཨོཾ་སྭསྟི་བི་ཛ་ཡནྟུ། མཁའ་ཁྱབ་མཁའ་ཡི་རྡོ་རྗེ་འཛིན་པའི་དབྱངས། །རྣམ་པ་ཉི་ཤུས་བྱང་ཆུབ་ཡེ་ཤེས་སྐུ། །
སྲིད་ན་རྗེས་ཆགས་སྙིང་རྗེའི་གཟི་འབར་བའི། །མཚན་བཟང་བསྐལ་པ་རྒྱ་མཚོར་འཚོ་གཞེས་གསོལ། ༡ །རྡོ་རྗེ་མི་ཤིགས་ནཱ་དའི་སྤྲིན་ཆེན་ལས། །ཟབ་རྒྱས་ཆོས་ཀྱི་ཆར་པ་འབེབས་མཁས་གསུང་། །རིགས་ཅན་གསུམ་གྱི་གདུལ་བྱའི་དཔྱིད་གཅིག་པུའི། །སྐལ་བཟང་ནུབ་པ་མེད་པར་འཚོ་གཞེས་གསོལ། ༢ །གཟུང་དང་འཛིན་པའི་སྤྲོས་ཀུན་ལས་རྒྱལ་བའི། །དགེ་མཚན་མངོན་སུམ་གཟིགས་པའི་ཡེ་ཤེས་ཐུགས། །གངས་ཅན་ལྗོངས་འདིར་ལྷག་པར་དགོངས་མཛད་པའི། །གཞན་དོན་དུས་ལས་ཡོལ་མེད་འཚོ་གཞེས་གསོལ། ༣ །མདོར་ན་བྲལ་དང་སྨིན་པའི་ཡོན་ཏན་ཚོགས། །སྲས་བཅས་རྒྱལ་བ་ཀུན་དང་མི་ཕྱེད་ཕྱིར། །རྟག་ཅིང་ཁྱབ་དང་ལྷུན་གྱིས་གྲུབ་པ་ཡི། །ཕྲིན་ལས་བསམ་མི་ཁྱབ་པར་འཚོ་གཞེས་གསོལ། ༤ །བདག་ཀྱང་འདི་ནས་བྱང་ཆུབ་སྙིང་པོའི་བར། །མགོན་པོར་ཁྱོད་ཀྱིས་འབྲལ་མེད་རྗེས་བཟུང་ནས། །ལམ་བཟང་གྲུབ་པའི་འགལ་རྐྱེན་ཀུན་ཞི་ཞིང་། །དོན་གཉིས་ཕ་མཐར་ཕྱིན་པའི་བཀྲ་ཤིས་སྩོལ།། །།