གངས་ཅན་བསྟན་འགྲོའི་དཔལ་མགོན་བྲག་གཡབ་མཆོག་སྤྲུལ་རིན་པོ་ཆེའི་མྱུར་འབྱོན་གསོལ་འདེབས།
འཇམ་མགོན་དགྱེས་པའི་ཡེ་ཤེས་སྐུར་སྣང་བ། །འཇམ་དཔལ་སྙིང་པོའི་བསྟན་འཛིན་ཡོངས་ཀྱི་ཕུལ། །འཇམ་དབྱངས་རྒྱལ་སྲས་གཞོན་ནུའི་ཚུལ་འཆང་བ། །སྐྱབས་གཅིག་བླ་མ་འབོད་དོ་བརྩེ་བས་དགོངས། །དམ་པའི་དོན་དུ་སྐྱེ་འགག་ལས་འདས་ཀྱང་། །ཚུར་མཐོང་གདུལ་བྱའི་བསོད་ནམས་དམན་པའི་མཐུས། །ཆོས་དབྱིངས་ཞི་བ་ཆེན་པོར་ཐིམ་པ་ཡིས། །བདག་སོགས་བཟོད་དཀའི་གདུང་བའི་ཚུལ་འདིར་གཟིགས། །བསྟན་དང་འགྲོ་བའི་དོན་ཆེན་མཛད་པའི་སླད། །དྭངས་གསལ་འཁྲུལ་བྲལ་མཆོག་གི་སྤྲུལ་པའི་སྐུ། །མྱུར་དུ་འབྱོན་ཅིང་ཕྱི་ནང་བར་ཆད་ཀྱི། །བདུད་སྡེའི་གཡུལ་ལས་རྣམ་པར་རྒྱལ་བ་དང་། །ཚེ་དཔག་མེད་བཞིན་སྐུ་ཚེ་བསྐལ་བརྒྱར་བརྟན། །ཚུལ་གནས་གསན་བསམ་སྒོམ་པའི་ཡོན་ཏན་རྫོགས། །ཕན་བདེའི་ཕྲིན་ལས་མཁའ་ཁྱབ་རྒྱས་པ་ཡིས། །གངས་ཅན་བསྐལ་བཟང་དཔལ་ལ་འགོད་མཛད་གསོལ། །བླ་མ་ལྷ་དང་མཁའ་འགྲོའི་བྱིན་རླབས་དང་། །རྡོ་རྗེའི་ཆོས་སྲུང་རྒྱ་མཚོའི་མཐུ་སྟོབས་ཀྱིས། །གསོལ་བཏབ་འབྲས་བུ་ཡོངས་སུ་སྨིན་པ་ཡིས། ས་གསུམ་དགེ་ལེགས་འཕེལ་བའི་བཀྲ་ཤིས་ཤོག །ཅེས་པའང་གངས་ཅན་བསྟན་འགྲོའི་དཔལ་མགོན་བྲག་གཡབ་མཆོག་སྤྲུལ་རིན་པོ་ཆེའི་མཚན་དཔེའི་ཟླ་ཞལ་གསར་དུ་ཚེས་པ། སླར་ཡང་ཆོས་དབྱིངས་ཞི་བར་ཐིམ་པའི་ཚུལ་བསྟན་སྐབས། །སྐྱབས་མགོན་
མཆོག་གི་ཆོས་ཀྱི་དབྱིངས་ཀྱི་གདུགས་དཀར་མངོན་མཐོར་བཏེག་པའི་མཛོད་དར་མཁན་རིན་པོ་ཆེས་འདི་ལྟར་བྲིས་ཞེས་བཀྲ་ཤིས་པའི་ལྷ་རྫས་དང་། རིན་ཆེན་དཀར་པོ་སྲང་འཁོར་གསུམ་བཅས་ཆེད་དུ་སྩལ་བ་ལྟར། །བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་གདུང་ཤུགས་དྲག་པོས་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ། །