སྐྱབས་མགོན་རྫོགས་ཆེན་རིན་པོ་ཆེ་བཞི་པའི་མཆོག་སྤྲུལ་མྱུར་འབྱོན་གྱི་གསོལ་འདེབས་དོན་ཀུན་གྲུབ་པའི་དབྱངས་སྙན།
སྐྱབས་མགོན་རྫོགས་ཆེན་རིན་པོ་ཆེ་བཞི་པའི་མཆོག་སྤྲུལ་མྱུར་འབྱོན་གྱི་གསོལ་འདེབས་དོན་ཀུན་གྲུབ་པའི་དབྱངས་སྙན་ཅེས་བྱ་བ་བཞུགས་སོ། །མི་འགྱུར་ནམ་མཁའ་རྡོ་རྗེ་ཆོས་ཀྱི་དབྱིངས། །ཚེ་དབང་གྲུབ་པའི་རྩལ་འཆང་ལོངས་སྤྱོད་རྫོགས། །གང་འདུལ་སྒྱུ་འཕྲུལ་དྲྭ་བ་སྤྲུལ་པའི་སྐུ། །སྐྱབས་གཅིག་བླ་མ་འབོད་དོ་བརྩེ་བས་དགོངས། །མགོན་ཁྱོད་གདོད་ནས་རྟག་པའི་མཆོག་བརྙེས་པས། །སྐྱེ་དང་འགག་པའི་མཚན་མ་ལས་འདས་ཀྱང་། །ཀུན་རྫོབ་གདུལ་བྱའི་ཚོགས་རྣམས་དྲང་བའི་ཕྱིར། །ཆོས་དབྱིངས་ཞི་བ་ཆེན་པོར་མཉམ་བཞག་པས། །འཛམ་གླིང་བསྟན་འགྲོ་སྤྱི་དང་ཁྱད་པར་དུ། །སྔ་འགྱུར་ཐེག་པའི་བཤད་སྒྲུབ་ཉམས་པ་དང་། །བདག་ཅག་རྗེས་འཇུག་སློབ་མའི་ཚོགས་རྣམས་ཀུན། །ཉམ་ཐག་གདུང་བས་འབོད་ལ་དེང་འདིར་དགོངས། །གཞན་དོན་ཐུགས་བསྐྱེད་དམ་བཅའ་མཐར་ཕྱིན་ནས། །བྱང་ཆུབ་མཆོག་གི་གོ་འཕང་མངོན་མཛད་པའི། །ཡེ་ཤེས་སྙིང་རྗེའི་རྩལ་ཤུགས་སྤྲུགས་ནས་ཀྱང་། །འཁྲུལ་མེད་སྤྲུལ་པའི་སྒྱུ་འཕྲུལ་མྱུར་དུ་སྟོན། །
ཕུན་སུམ་ཚོགས་པའི་གཟིགས་པ་རྣམ་པ་ལྔས། །བསྐལ་བཟང་སྒྲོན་མེ་སྟོང་གི་ངོ་མཚར་དང་། །རྣམ་ཐར་ཕྲིན་ལས་མཐའ་དག་ཡོངས་རྫོགས་པས། །ལྷར་བཅས་འཇིག་རྟེན་རྒྱས་པར་འགེངས་མཛད་གསོལ། །མཆོག་གི་སྤྲུལ་པའི་སྣང་བརྙན་གསལ་བར་ཤར། །ཚུལ་གནས་གསན་བསམ་སྒོམ་པའི་ཕ་མཐར་སོན། །རྨད་བྱུང་འཁོར་ལོ་གསུམ་གྱི་མཛད་པ་ཡིས། །བསྟན་འགྲོའི་ཕན་བདེ་འཕེལ་བར་བྱིན་གྱིས་རློབས། །དཀོན་མཆོག་རྩ་གསུམ་རྒྱ་མཚོའི་བདེན་སྟོབས་དང་། །ཆོས་ཉིད་ཆོས་ཅན་རྒྱུ་འབྲས་བསླུ་མེད་མཐུས། །ཇི་ལྟར་གསོལ་བ་བཏབ་བཞིན་མྱུར་འགྲུབ་ནས། །ས་གསུམ་བཀྲ་ཤིས་སྣང་བས་ཁྱབ་གྱུར་ཅིག །ཅེས་མཚུངས་བྲལ་བསྟན་འགྲོའི་དཔལ་མགོན་རྫོགས་ཆེན་མཆོག་སྤྲུལ་རིན་པོ་ཆེ་བཞི་པ་རྡོ་རྗེ་འཆང་མི་འགྱུར་ནམ་མཁའི་མཚན་ཅན་ཆོས་དབྱིངས་ཞི་བ་ཆེན་པོར་ཐུགས་གཞོལ་བའི་ཚུལ་སྟོན་པའི་སྐབས། འཁྲུལ་མེད་སྤྲུལ་པའི་ཟླ་སྣང་མྱུར་དུ་འཆར་བའི་གསོལ་འདེབས་དོན་ཀུན་གྲུབ་པའི་དབྱངས་སྙན་ཅེས་བྱ་བ་འདིའང་། སྔ་འགྱུར་བསྟན་པའི་གསལ་བྱེད་དཔོན་སློབ་མཆོག་གི་སྤྲུལ་པའི་སྐུས་བཀྲ་ཤིས་པའི་ལྷ་རྫས་དང་། །རིན་ཆེན་དང་པོའི་གནང་སྐྱེས་བཅས་བཀའ་སྩལ་ནོར་བུའི་ཕྲེང་བས་བསྐུལ་བ་སྤྱི་བོར་མཆོད་དེ། །བྱ་བྲལ་ཆོས་རྗེ་འཇམ་དབྱངས་མཁྱེན་བརྩེའི་དབང་པོས་གང་ཤར་ཤུགས་འབྱུང་དུ་བྲིས་ཏེ་གསོལ་བ་བཏབ་པ་དེ་དེ་བཞིན་དུ་འགྲུབ་པར་བླ་མ་རྒྱལ་བ་སྲས་དང་བཅས་པས་བྱིན་གྱིས་བརླབ་ཏུ་གསོལ།། །།